Wa Tsundzuka Xana?

Xana u anakanyisise hi vukheta hi minkandziyiso ya sweswinyana ya Xihondzo xo Rindza? Loko swi ri tano, u ta swi kota ku tsundzuka leswi landzelaka:

◻ Ha yini Mukriste a nga fanelanga ku tlangela Khisimusi?

Xivangelo xin’wana hi leswaku nkhuvo wa khisimusi wu sungule enkhubyeni wa vuhedeni wa Saturnalia, nkhuvo wa Varhoma wa Saturn xikwembu xa vurimi. Rito ra Xikwembu ri ri: “Mi nga rhwaleni mpingu wun’we ni lava nga riki vapfumeri.” (2 Vakorinto 6:14-17) Mukriste a nge hambanisiwi ni lava nga pfumeriki loko a ha tlangela nkhuvo wa masungulo ya vuhedeni.—12/15, tluka 6.

◻ Yubile ya Vukriste i yini xana?

I ntshunxeko lowu katsaka “ntiyiso” lowu nga ntshunxaka vanhu eka “nawu wa ku dyoha ni wa rifu.” Ntiyiso lowu wu sekeriwe eka “N’wana,” Yesu Kriste. (Yohane 8:31-36; Varhoma 8:1, 2, 21)—1/1, tluka 21.

◻ Xana Yubile ya Vukriste yi tlangeriwa rini?

Hi Pentekosta ya 33 C.E., Yubile ya Vukriste yi sungule ku tlangeriwa hi lava va tshembisiweke vutomi etilweni. Eka vanhu lava pfumelaka lava va nga ta tsakela vutomi lebyi nga heriki emisaveni, Yubile leyinene ya Vukriste yi ta tokotiwa enkarhini wa Gidi ra Malembe, loko swivati hinkwaswo swa xidyoho xa ndzhaka ni ku nga hetiseki swi ri karhi swi susiwa.—1/1, matluka 21, 22, 27.

◻ Ha yini Timbhoni ta Yehova ti nga fambisi swikolo swa vana eAsia ni le kun’wana?

Hikokwalaho ka leswi Bibele yi swi vulaka, Timbhoni ta Yehova ti fanele ti khathalela ngopfu ntirho wa tona wo chumayela rungula ra nkoka hi Mfumo wa Xikwembu. (Matewu 24:14; 28:19, 20) A hi lava va nga xiyiki ku xaniseka ka vanhu ni vuhomboloki emafambiselweni ya sweswi, naswona va pfuna hi laha va nga kotaka ha kona. Kambe va xiya leswaku murhi a wu le mavokweni ya vanhu, kambe eka nkutsulo lowu Mfumo wa Xikwembu wu nga ta wu tisa hi ku hatlisa. (Psalma 146:3-10)—1/15, tluka 7.

◻ I swivumbeko swihi swa ripfumelo leswi hi nga swi dyondzaka eka swikombiso swa Avele, Henoko, Nowa, Abrahama na Muxe?

Ripfumelo ro fana ni ra Avele ri kurisa ku tlangela ka hina gandzelo ra Yesu. Ripfumelo ra ntiyiso ri hi pfuna ku va ni xivindzi, ku fana na Henoko. Tanihi Nowa, ripfumelo ri hi susumetela ku landzelela swiletelo swa Xikwembu. Ripfumelo ra Abrahama ri hi tsundzuxa xilaveko xo yingisa Xikwembu ni ku tshembela eka switshembiso swa xona. Hi fanele ku tshama hi nga thyakisiwanga hi misava naswona hi yima ni vanhu va Xikwembu hi ku tshembeka, hi laha Muxe a kombiseke ha kona.—1/15, tluka 20.

◻ Ku navela ku tiva swi nga va nkateko kumbe ndzhukano hi ndlela yihi?

Ku navela lokunene ka ku tiva ehenhleni ka muvumbi wa hina, ku rhandza ka yena ni swikongomelo swa yena swi nga va leswi anerisaka ni leswi pfunaka ngopfu, swi tisa ntsako ni ku phyuphyisa evuton’wini bya hina. Hi tlhelo rin’wana, ku navela ku tiva loku nga lawulekiki ku nga hi yisa eka ndzinganyeto wa miehleketo ni mianakanyo ya vanhu, ku tsongahata ripfumelo ra xiviri ni ku tinyikela eka Xikwembu.—2/1, tluka 29.

◻ Yesu a a vula yini loko a khongela a ku: “Tatana, loko swi nga endleka, xinwelo lexi a xi fambeli kule na mina”? (Matewu 26:39)

Yesu a a khumbeka ehenhleni ka xihehlo xa ndzhukano lexi a xi voneke leswaku a xi ta lahleriwa eka yena. Lebyi a byi ri vugevenga lebyikulu lebyi Muyuda a a ta va ni nandzu wa byona. Hikwalaho ke, rifu ra yena ehansi ka xiyimo xexo ri nga ha vonaka ri tisa ndzhukano ehenhla ka Tata wa yena wa le tilweni.—2/15, tluka 13.

◻ Loko munhu a fanele ku tiyisela ku xaniseka kumbe ku vaviseka, i ndlela yihi ya vutlhari leyi a faneleke ku yi teka?

I swinene eka yena leswaku a lehisa mbilu, a languta eka Xikwembu hi ku tshemba, naswona a tshinela ekusuhi na Xona. Leswi swi ta olovisela munhu leswaku a hundza eka mintokoto yin’wana leyi fanaka evuton’wini handle ko lahlekeriwa hi ntshembo. (Swirilo swa Yeremia 3:25-31)—2/15, tluka 24.

◻ “Tinxaka leta 12 ta Israyele” leti vuriweke hi Yesu eka Luka 22:28-30 i vamani xana?

Lava va yimela tinxaka hinkwato ta vanhu lava nga ta avanyisiwa hi Kriste ni vaprista va yena lavantsongo va 144 000 mayelana ni ku vuyeteriwa ka hinkwaswo leswi Yehova a swi kunguhateleke misava leyi. (Matewu 19:28)—3/1, tluka 28.

◻ Ku vuriwa yini hi ku rhula ka Xikwembu, naswona xana ku nga kumiwa njhani?

Ku rhula ka Xikwembu i xiyimo xo hola xa miehleketo ni mbilu, xiyimo xa le ndzeni xa ku rhula, ku nga khathariseki swilo leswi swi nga ha vaka swi endleka. (Psalma 4:8) Ku nga huma eka vunakulobye lebyi amukelekaka ni Xikwembu ntsena, lebyi endliweke byi koteka hi gandzelo ra nkutsulo ra Yesu Kriste. (Vakolosa 1:19, 20)—3/15, matluka 11, 14, 15.

◻ I mimpfuno yihi leyi hi nga na yona namuntlha leswaku hi tiva Xikwembu swinene ngopfu?

Hi na Bibele ni ku twisisa lokunene ka malembe xidzana ya vuprofeta lebyi hetisekeke bya Bibele. Nakambe, hi na tirhekhodo ta Evangeli ya vutomi, mintirho ni marito ya Yesu Kriste, loyi Pawulo a tsaleke ha yena a ku: “Hikuva vukwembu hinkwabyo byi akile hi ku tala eka yena [Kriste], emirini wa yena.” (Vakolosa 2:9)—4/1, tluka 6.