Swivutiso Swa Vahlayi

◼ Loko a ri emhandzeni, Yesu u huwelerile a ku: “Xikwembu xanga, Xikwembu xanga, u ndzi tshikele yini?” Xana a a nga ri na ripfumelo, a tshemba leswaku Xikwembu xi n’wi fularherile?

Loko va hlaya marito lawa eka Matewu 27:46 kumbe Marka 15:34, van’wana va hete hi leswaku loko Yesu a kongomane ni rifu leri vavaka, ntshembo wakwe eka Xikwembu wu herile. Van’wana va vule leswaku leswi a ku ri ku amukela ka vumunhu ka Yesu, ku rila loku twisisekaka ka ku pfumala ntshembo ka munhu wa nyama ni ngati la nge nhlomulweni. Hambi swi ri tano, ku na xivangelo lexinene xo languta leswi tlulaka mimpimanyeto yo tano ya vanhu leyi sekeriweke eswivumbekweni swa le handle. Hambi leswi ku nga hava na un’we wa hina namuntlha la tivaka ntiyiso wa hinkwaswo leswi a swi katseka eku huweleleni ka Yesu hi laha a endleke ha kona, hi nga xiya minsusumeto mimbirhi leyi fanaka.

Yesu a a swi tiva swinene leswaku u fanele “ku ya eYerusalema, a twisiwa ku vaviseka lokukulu . . . , a dlawa, a tlhela a pfuka eku feni hi siku ra vunharhu.” (Matewu 16:21) Etilweni N’wana wa Xikwembu a a xiyile ni ntokoto wa mafu lama tsemaka nhlana ya vanhu lava nga hetisekangiki loko va hlayisa vutshembeki bya vona. (Vaheveru 11:36-38) Kutani a ku na xivangelo xo pfumela leswaku Yesu—munhu la hetisekeke—a a ta rhurhumerisiwa hi ku chava hikwalaho ka leswi a langutaneke na swona; naswona rifu emhandzeni a ri nga ta vula swona leswaku Tata wakwe a a n’wi cukumetile. Yesu u swi tive ka ha ri emahlweni “hi ku ringanisa rifu leri a nga ta fa ha rona,” hi leswaku, ku fa hi ku vambiwa. (Yohane 12:32, 33) Nakambe, a a tiyiseka leswaku hi siku ra vunharhu u ta pfuxiwa. Manuku, Yesu a a ta vurisa ku yini leswaku Xikwembu a xi n’wi tshikile?

Xo sungula, kumbexana a a swi vula hi miehleketo leyi faneleke ya leswaku Yehova a a suse nsirhelelo wakwe eka N’wana wakwe leswaku vutshembeki bya Yesu byi ringiwa hi mpimo, rifu leri vavaka ni leri khomisaka gome. Kambe ku tshika ka Xikwembu Yesu eka vukari bya valala lebyi kongomisiwaka hi Sathana a swi kombanga ku fularheriwa hi laha ku heleleke. Yehova u hambete a komba tintswalo eka Yesu, hi laha swi tikombeke ha kona hi siku ra vunharhu loko a pfuxile N’wana wakwe eku feni, leswi Yesu a swi tiveke leswaku a swi ta humelela.—Mintirho 2:31-36; 10:40; 17:31.

Leswi yelanaka ni leswi nga laha henhla i xivangelo xa vumbirhi lexi fanaka xa ku vulavula ka Yesu loko a ri emhandzeni, leswaku hi ku tirhisa marito lawa a a ta hetisisa xikombiso xa vuprofeta ehenhleni ka Mesiya. Tiawaranyana emahlweni Yesu u byele vaapostola vakwe leswaku swilo leswi a swi ta humelela “hi laha ku tsariweke ha kona ehenhla ka yena.” (Matewu 26:24; Marka 14:21) Ina, a a lava ku hetisisa swilo leswi a swi tsariwile, ku katsa ni swilo leswi nga eka Psalma 22. U nga swi kuma swi ri leswi hlavutelaka ku ringanisa Psalma 22:7, 8—Matewu 27:39, 43; Psalma 22:15—Yohane 19:28, 29; Psalma 22:16—Marka 15:25 na Yohane 20:27; Psalma 22:18—Matewu 27:35. Psalma 22, leyi nyikeke swikombiso swo tala swa vuprofeta swa mintokoto ya Mesiya, yi sungula hi ndlela leyi: “Šikwembu šanga! Šikwembu šanga! U nḍi ṭhikele yini?” Kutani, loko Yesu a huwelerile hi laha a endleke ha kona, a a engetela rhekhodo ya vuprofeta lebyi a byi hetisiseke.—Luka 24:44.

Mupisalema a a nga tshembi leswaku Xikwembu xakwe hakunene xi n’wi cukumetile kumbe ku n’wi fularhela, hikuva Davhida u ye emahlweni a vula leswaku a a ta ‘vula vito ra Xikwembu eka vamakwavo,’ naswona u khutaze van’wana ku dzunisa Yehova. (Psalma 22:22, 23) Hi ku fanana, Yesu, loyi a a tiva Psalma 22 swinene, nakambe a a ri ni xivangelo xo tshemba leswaku Tata wakwe wa ha n’wi amukela ni ku n’wi rhandza, ku nga khathariseki leswi Xikwembu xi n’wi pfumeleleke ku swi tokota emhandzeni.