Swivutiso Swa Vahlayi

Hikwalahokayini Yesu loko a nga si fa a tshahe marito ya Davhida lama nga eka Pisalema 22:1?

Loko Yesu a nga si fa, u vule marito lama nga eka Matewu 27:46, lama nge: “Xikwembu xanga, Xikwembu xanga, u ndzi tshikele yini?” Laha Yesu a a tshaha marito ya mupisalema Davhida lama nga eka Pisalema 22:1. (Mar. 15:34) Hi ta va hi endla xihoxo loko hi gimeta hi ku vula leswaku Yesu u tshahe marito lawa hileswi a a hele matimba kumbe hileswi a a heleriwe hi ripfumelo. Yesu a a swi tiva leswaku hikwalahokayini a fanele a fa naswona a a tiyimisele ku endla tano. (Mat. 16:21; 20:28) Nakambe a a swi tiva leswaku hi nkarhi wa rifu rakwe, Yehovha a a ta tshika ku n’wi sirhelela “matlhelo hinkwawo.” (Yobo 1:10) Xisweswo, Yehovha u tshike Yesu a kombisa leswaku a a ta swi kota ku tshama a tshembekile, ku nga khathariseki ndlela yo vava leyi a a ta dlayiwa hayona.—Mar. 14:35, 36.

Hikwalahokayini Yesu a tshahe marito lama nga eka pisalema leyi? Hambileswi hi nga tiyisekiki kambe a hi buleni hi swivangelo swi nga ri swingani.a

Xana loko Yesu a vula marito lawa, a a vula leswaku Yehovha a nge n’wi pfuni loko a dlayiwa? Yesu a a fanele a kutsula vanhu handle ko pfuniwa hi Yehovha. A a fanele a fa leswaku a ta “nantswa rifu hikwalaho ka vanhu hinkwavo.”—Hev. 2:9.

Xana loko Yesu a tshaha pisalema yoleyo, a a lava leswaku vanhu va ehleketa hi pisalema yoleyo hinkwayo? Enkarhini wolowo, Vayuda a va tiva tipisalema to tala hi nhloko. Loko va twa ndzimana yin’we ya pisalema, a va ta namba va tsundzuka pisalema ya kona hinkwayo. Loko ku ri leswaku sweswo hi swona leswi Yesu a a lava swona, u ta va a pfune Vayuda vo tala lava a va ri valandzeri va yena leswaku va tsundzuka vuprofeta byo tala lebyi nga eka pisalema leyi, lebyi vulavulaka hi swilo leswi a swi ta endleka loko a dlayiwa. (Ps. 22:7, 8, 15, 16, 18, 24) Nakambe, loko pisalema leyi yi ya eku heleni, yi ndhundhuzela Yehovha tanihi hosi leyi nga ta fuma misava hinkwayo.—Ps. 22:27-31.

Xana loko Yesu a tshaha marito lawa ya Davhida, a a kombisa leswaku a nga dyohanga nchumu? Loko Yesu a nga si dlayiwa, u tengisiwe emahlweni ka Sanedri swi nga ri enawini naswona u voniwe nandzu wa ku rhuketela Xikwembu. (Mat. 26:65, 66) Nimadyambu hi siku rero, hi ku hatlisa Sanedri yi hlengeletanile swi nga ri enawini leswaku yi ta kuma swivangelo swo n’wi hehla ha swona. (Mat. 26:59; Mar. 14:56-59) Loko Yesu a tshaha marito lawa lama nga xivutiso lexi nga laviki nhlamulo, a a kombisa leswaku a a nga dyohanga nchumu lexi a xi endla a faneriwa hi ku dlayiwa.

Xana Yesu a a tsundzuxa van’wana leswaku hambi Davhida mutsari wa tipisalema u xanisekile hambileswi sweswo a swi nga vuli swona leswaku Yehovha u n’wi fularherile? Xivutiso lexi Davhida a xi vutiseke, a xi kombisi swona leswaku a nga ri na ripfumelo. Endzhaku ko vutisa xivutiso xexo, u ye emahlweni a kombisa leswaku wa ma tshemba matimba lawa Yehovha a nga na wona yo ponisa munhu naswona Yehovha u n’wi katekisile. (Ps. 22:23, 24, 27) Hilaha ku fanaka, loko Yesu, “N’wana wa Davhida” a a ri eku xanisiweni emhandzini, a swi nga vuli swona leswaku Yehovha u n’wi fularherile.—Mat. 21:9.

Xana Yesu a a twa ku vava emoyeni hileswi Yehovha a bohekeke ku n’wi tshika a xanisiwa leswaku a ta kombisa ku tshembeka? A ku nga ri xona xikongomelo xa Yehovha leswaku N’wana wakwe a xaniseka a tlhela a fa. Kambe u pfumelele sweswo endzhaku ka loko Adamu na Evha va tshike ku n’wi yingisa. Yesu a a nga dyohanga nchumu kambe u boheke ku xaniseka ni ku fa leswaku ku ta lulamisiwa timhaka leti vuriweke hi Sathana ni ku kutsula vanhu eka xidyoho ni rifu. (Mar. 8:31; 1 Pet. 2:21-24) Leswi a swi ta koteka ntsena loko Yehovha a tshika ku sirhelela Yesu swa xinkadyana.

Xana Yesu a a ringeta ku pfuna valandzeri va yena ku ehleketisisa hi xivangelo lexi endleke Yehovha a n’wi tshika a dlayiwa hi ndlela yoleyo yo vava?b Yesu a a swi tiva leswaku loko a dlayeriwa emhandzini ya nxaniso onge i xigevenga, vanhu vo tala a va ta khunguvanyeka. (1 Kor. 1:23) Loko valandzeri vakwe va ehleketisisa hi lexi a feleke xona, a va ta swi twisisa kahle leswi rifu rakwe ri vulaka swona. (Gal. 3:13, 14) Sweswo a swi ta endla leswaku va n’wi teka a ri Muponisi, ku nga ri xigevenga.

Ku nga khathariseki xivangelo lexi endleke Yesu a tshaha marito lawa, kambe lexi a a xi tiva hileswaku hinkwaswo leswi a swi endleka, a ku ri ku rhandza ka Yehovha. Endzhakunyana ka loko a tshahe pisalema leyi, u te: “Swi hetisekile!” (Yoh. 19:30; Luka 22:37) Ku va Yehovha a tshike ku sirhelela Yesu swa xinkadyana, swi endle leswaku Yesu a kota ku hetisisa swilo hinkwaswo leswi a a rhumiwe ku ta swi endla laha misaveni. Nakambe, swi endle a kota ku paluxa ntiyiso wa swilo hinkwaswo leswi tsariweke mayelana na yena “eNawini wa Muxe ni hi Vaprofeta ni le ka Tipisalema.”—Luka 24:44.