Mikateko Ya Xikwembu Eka “Lava Nga Ni Vutlhari”

“La’v̌o tlhariha v̌a ta v̌angama kukotisa ku v̌angama ka le matilweni, kutani la’v̌a dyonḍiseke la’v̌o tala e ku lulameni, v̌a ta fana ni tinyeleti hi mikari ni mikari, hi laha ku nga heriki.”—DANIEL 12:3.

1. Endzhaku ka ku hlamusela nkarhi wa nhlomulo eka vahlohleteri va nyimpi, ntsumi yi hundzuluxela mianakanyo ya yona eka yini?

VUPROFETA bya ntsumi eka Daniyele byi hi tise ku suka eka lembe xidzana ra vumune B.C.E. ku fikela eArmagedoni. Byi kombise leswaku Mikayele u ta tisa ku rhula emisaveni hi ndlela yin’we ntsena leyi kotekaka: hi ku herisa vahlohleteri va nyimpi. Manuku, endzhaku ka ku kambisisa ko tano loku xiyekaka ka matimu ka ha ri nkarhi, ntsumi yi vhumba yin’wana ya mikateko leyi fuweke leyi tsakeriwaka hi vanhu va Xikwembu “e mikarini ya makumu.”—Daniel 10:14.

Nkarhi Wa Ku Pfuxiwa Ka Vafi

2. Xana van’wana lava feke va ‘pfuke’ njhani enkarhini wa ‘xiyenge xo hetelela xa masiku’?

² Ntsumi yi byela Daniyele yi ku: “Kutani la’vo tala la’v̌a etleleke e nṭhurini wa misav̌a v̌a ta pfuka, v̌aṅwana v̌a ta pfukela v̌utomi le’byi nga heriki, v̌aṅwana v̌a ta pfukela šisanḍu ni tingana le’ti nga heriki.” (Daniel 12:2) Entiyisweni, ‘xiyenge xo hetelela xa masiku’ i nkarhi wa ku pfuxiwa ka vafi, wa ku pfuxa ka lava “etleleke e nṭhurini wa misav̌a.” Ku pfuxiwa kun’wana ko tano ku sungule hi ku hatlisa endzhaku ka loko Yesu a ve Hosi hi 1914. (Matewu 24:3) Loko a languta emahlweni eka nkarhi wolowo, muapostola Pawulo u tsarile a ku: “Hina lava nga ta sala ha ha hefemula loko Hosi yi vuya hi nga ka hi nga rhangeli lava ti etleleleke; . . . kutani lava feleke ka Kriste, va ta rhanga va pfuka eku feni.” (1 Vatesalonika 4:15, 16; Nhlavutelo 6:9-11) Kutani, entiyisweni, hi ku hatlisa endzhaku ka 1914 Yesu u pfuxele lava va “Israyele wa Xikwembu” evuton’wini bya moya ematilweni lava ana se a va fe va tshembekile. (Vagalatiya 6:16) Eka vona, ku pfuxiwa a ku ri “v̌utomi le’byi nga heriki.”

3, 4. Xana ntlawa wa malandza lama tshembekaka wu ‘fise’ ku yini hi 1918?

³ Kambe a swi kanakanisi leswaku marito ya ntsumi ma katsa ni ku pfuxiwa kun’wana ka vafi. Kwalomu ka 40 wa malembe lama rhangelaka 1914, ntlawa lowuntsongo wa Vakriste a wu ri karhi wu tsundzuxa leswaku lembe rero a ri ta fungha ku hela ka Minkarhi ya Vamatiko hi laha swi profetiweke hi Yesu ha kona. (Luka 21:24) Vakriste lava va vumbe Zion’s Watch Tower Tract Society hi 1884, naswona va kandziyise mimbuyelo ya ku kambisisa ka vona Bibele eka magazini lowu vitaniwaka Zion’s Watch Tower and Herald of Christ’s Presence.

⁴ Hi 1914 ntiyiso wa rungula ra vona wu tiyisiwe swinene loko nyimpi yo sungula ya misava yi tlhekeka, naswona “ku sungula ka mahlomulo” loku vhumbiweke hi Yesu ku sungurile. (Matewu 24:7, 8) Hambi swi ri tano, valala va vona va vukhongeri va tirhise xihinga xa nyimpi leswaku va va xanisa ku fikela loko eku heteleleni, hi 1918, ntirho wa vona wo chumayela wu yimisiwe hi laha ku heleleke, naswona malandza-nkulu ya Sosayiti ya Watch Tower ya khotsiwile handle ka nandzu. Leswi swi vange ntsako lowukulu eka mintlawa yin’wana. Swi tlhele swi hetisisa vuprofeta lebyi rhekhodiweke ebukwini ya Nhlavutelo lebyi nge: “Loko va heta ku vula vumbhoni bya vona, xivandzana lexi humaka hi le kheleni lero enta ku ya ni ku ya, xi ta lwa na vona. Xi ta va hlula, xi va dlaya.”—Nhlavutelo 11:7.

5, 6. Xana mintokoto ya ntlawa lowu hi 1919 yi lunghiselele ku hetiseka ka vuprofeta bya leswaku “la’v̌o tala la’v̌a etleleke e nṭhurini wa misav̌a . . . v̌a ta pfuka” hi ndlela yihi?

⁵ Hambi swi ri tano, hi ku ya hi vuprofeta lebyi, a va nga ta tshama va ‘file.’ “Kambe endzhaku ka masiku lawa manharhu ni hafu, ku hefemula ka vutomi loku humaka eka Xikwembu, ku nghene eka vona, va suka va yima hi milenge ya vona. Hinkwavo lava va va vonaka va khomiwa hi ku chava lokukulu . . . Hi loko va tlhandlukela etilweni hi papa; valala va vona va ri karhi va va vona.” (Nhlavutelo 11:11, 12; Ezekiel 37:1-14) Ku pfuxiwa ka vona eku feni kahle-kahle a ku ri ko fanekisela, tanihi leswi ku pfuxeriwa ka xiviri evuton’wini bya moya etilweni a ku nga ta vonaka eka valala va vona. Kambe, va pfuxiwe va ri eka xiyimo lexi fanaka ni ku fa xa ku ka va nga gingiriteki va ya eka xiyimo xa ntirho wo chivirika hi langutelo leri heleleke ra lava va kunguhateke ku va herisa. Hi 1919 vayimeri va Sosayiti ya Watch Tower va ntshunxiwile ekhotsweni, ntirho wo chumayela wu tlhele wu hleriwa, naswona misava yi vone ku sungula ka tsima lerikulu ro veka vumbhoni bya Mfumo ematin’wini.—Matewu 24:14.

⁶ Hi ku twisisa loku ko fanekisela, ‘vo tala va lava etleleke entshurini wa misava va pfukile.’ Kutani, ku sukela hi 1919, huvo yoleyo leyintsongo, leyi pfuxiweke ya Swichudeni swa Bibele yi sungule ku lava ni ku hlengeleta lava seleke va vamakwavo va Yesu leswaku nhlayo leyi heleleke ya 144 000 yi ta lemiwa. (Matewu 24:31; Nhlavutelo 7:1-3) Loko vanhu va ri karhi va swi amukela, va tinyiketele eka Xikwembu ha Kriste ivi va va swirho swa nhlengeletano leyi vonekaka ya Yehova emisaveni. Loko va amukela nyiko ya mahala ya moya lowo kwetsima, va vuriwe lavo lulama exisekelweni xa ripfumelo ra vona eka gandzelo ra Yesu ra nkutsulo naswona va ve vana va Xikwembu hi ndlela ya moya.—Varhoma 8:16; Vagalatiya 2:17; 3:8.

7. Eka vo tala va lava, xana leswi swi ta tikombisa ku ri ku pfukela “vutomi le’byi nga heriki” hi ndlela yihi?

⁷ Van’wana va vona lava tshamaka va tshembekile ku fikela eku heteleleni ka vutomi bya vona bya laha misaveni va ni langutelo leri tiyeke ro teka xivandla xa vona etilweni kun’we na Yesu Kriste. (1 Vakorinto 15:50-53) Xisweswo, ku pfuxiwa ka vona ka moya ku yisa eka vutomi lebyi nga heriki. Loko va ha hanya emisaveni, va tokota ku rhula exikarhi ka vona hambi leswi va hanyaka emisaveni leyi lwaka. (Varhoma 14:19) Kambe xa nkoka ngopfu va tsakela ku rhula na Yehova Xikwembu hi yexe, “ku rhula ka Xikwembu loku tlulaka ku twisisa hinkwako.”—Vafilipiya 4:7.

Ku Pfukela ‘Swisandzu’

8, 9. Xana ku pfuxiwa loku ka moya ku nga va “šisanḍu ni tingana le’ti nga heriki” hi ndlela yihi?

⁸ Kutani, hikwalaho ka yini van’wana va “pfukela . . . šisanḍu ni tingana le’ti nga heriki”? Ntiyiso hi leswaku, a hi hinkwavo lava va amukelaka xirhambo xo va xiphemu xa ntlawa wa Mfumo wolowo lava tshamaka va tshembekile. Van’wana va pfumelela ripfumelo ra vona ri tsana ivi va tsandzeka ku tiyisela. (Vaheveru 2:1) Van’wana va tlhela va va vagwinehi naswona va boheka ku susiwa ebandlheni ra Vukriste. (Matewu 13:41, 42) Vo tano va hlamuseriwe hi Yesu tanihi ‘nandza yoloyi wo biha’ loyi N’wini wakwe a n’wi ‘baka,’ a n’wi nyika ku averiwa kun’we ni vakanganyisi. “Kona ku ta va ni minkosi ni ku getsela ka meno.”—Matewu 24:48-51; Vaefesa 4:18; 5:6-8.

⁹ Vona khombo ra kona, ro amukela lunghelo lerikulu ngopfu leri tshameke ri nyikiwa vanhu lava nga hetisekangiki ivi endzhaku u ri fularhela! Eka lava va endlaka hi ndlela leyi, muapostola Pawulo u te: “Hikuva lava va tshamaka va voningiwa hi Xikwembu, lava nantsweke nyiko ya le tilweni, lava averiweke Moya lowo Kwetsima, lava nga nantswa ku nandziha ka Rito ra Xikwembu ni matimba ya swa minkarhi leyi taka, loko kutani va tlhelela endzhaku, a swi endleki ku va vuyisela kambe eku hundzukeni; va tlhela va vamba N’wana wa Xikwembu, va n’wi endla xisandzu.” (Vaheveru 6:4-6) Hi ndlela leyi, ku pfuka ka vona ku hundzuka ku va “šisanḍu ni tingana le’ti nga heriki.” A va na ku langutela kun’wana ka vutomi lebyi nga heriki.

‘Ku Vangama Tanihi Timboni’

10. “La’v̌o tlhariha” i vamani ke, naswona va ‘vangamisa ku yini kukotisa tinyeleti’?

¹⁰ Kambe eka lava va tshamaka va tshembekile, vuprofeta byi ri: “La’v̌o tlhariha v̌a ta v̌angama kukotisa ku v̌angama ka le matilweni, kutani la’v̌a dyonḍiseke la’v̌o tala e ku lulameni, v̌a ta fana ni tinyeleti hi mikari ni mikari, hi laha ku nga heriki.” (Daniel 12:3) “La’v̌o tlhariha” entiyisweni i swirho leswi tshembekaka leswi swa ha riki kona swa bandlha leri totiweke ra Vukriste, leswi ‘teleke vutivi bya ku rhandza ka xona, evutlharini hinkwabyo ni le ku twisiseni hinkwako loku nyikiwaka hi Moya.’ Hi ku tiyisiwa hi Yehova, va ‘tiyisela swinene, ni ku leha mbilu va tsakile. Naswona, va nkhensa Tata wa vona loyi a endleke leswaku va averiwa ndzhaka ya vahlawuriwa, eku fumeni ka ku vonakala.’ (Vakolosa 1:9, 11, 12) Ku sukela hi 1919, hambi leswi ‘munyama a wu funengeta misava, ni papa lera ntima ri ri ehenhla ka matiko,’ a va ri karhi va ‘vangama tanihi timboni’ exikarhi ka vanhu. (Esaya 60:2; Vafilipiya 2:15; Matewu 5:14-16) Va “hatima kukotisa dyambu, eMfun’weni wa Tata wa vona.”—Matewu 13:43.

11. Xana “la’v̌o tlhariha” va tikombe njhani va ri lava “dyonḍiseke la’v̌o tala e ku lulameni”?

¹¹ Xana va tikombisa njhani va ri lava “dyonḍiseke la’v̌o tala e ku lulameni”? (Daniel 12:3) Hikwalaho ka ku veka ka vona vumbhoni loko tshembeka, vo hetelela va Israyele wa moya va hlengeletiwile naswona va vuriwa lava lulameleke vutomi ematilweni. Tlhandla-kambirhi, ntshungu lowukulu wa “tinyimpfu tin’wana” wu tikombise hi woxe, wu ta eku vonakaleni loku humaka eka Yehova hi laha ku kombisiweke ha kona hi ‘tiko ra Daniyele.’ (Yohane 10:16; Zakaria 8:23) ‘Tinyimpfu leti tin’wana’ ti tihlanganisile ni lava totiweke entirhweni wa vona wo chumayela ‘mahungu lamanene’ hi ku tirhandzela. (Matewu 24:14; Esaya 61:5, 6) Na vona va kombisa ripfumelo engatini leyi halakeke ya Yesu Kriste, leswaku va vuriwa lava lulameleke ku tsakela xinakulobye na Xikwembu. (Nhlavutelo 7:9-15; ringanisa Yakobo 2:23.) Loko va tshama va tshembekile ku fikela emakumu, mavito ya vona ma ta hambeta ma ri lama “ṭariweke bukwini.” Xisweswo, va nga ha langutela ku pona nkarhi lowu vavisaka ngopfu wa nhlomulo lowu kalaka wu nga si tshama wu hlasela matiko.—Daniel 12:1; Matewu 24:13, 21, 22.

“V̌a Ta V̌angama . . . Hi Laha Ku Nga Heriki”

12, 13. (a) Xana swi endlekise ku yini leswaku “la’v̌o tlhariha” va swi kota ku “v̌angama . . . hi laha ku nga heriki”? (b) Xana, hi ndlela yin’wana, va ta tikombisa njhani va ri “la’v̌a dyonḍiseke la’v̌o tala e ku lulameni”?

¹² Ntsumi yi byele Daniyele yi ku: “La’v̌o tlhariha v̌a ta v̌angama kukotisa ku v̌angama ka le matilweni . . . , v̌a ta fana ni tinyeleti hi mikari ni mikari, hi laha ku nga heriki.” (Daniel 12:3) Xana lava totiweke va nga vangamisa ku yini hi laha ku nga heriki, tanihi leswi un’wana ni un’wana a nga ta fa eku heteleleni? Hikuva va ta hambeta va “v̌angama” hambi ku ri endzhaku ka rifu. Loko a va hlamusela va ri exiyin’weni xa vona xa le tilweni, Yesu wa hi byela ebukwini ya Nhlavutelo a ku: “Xiluvelo xa Xikwembu ni xa Xinyimpfana xi ta va endzeni ka muti, kutani malandza ya xona ma ta xi tirhela. Va ta vona nghohe ya xona, ni vito ra xona ri ta va emimombyeni ya vona. Vusiku a byi nga ha vi kona, a va nga ha lavi ku vonakala ka rivoni kumbe ka dyambu, hikuva Hosi Xikwembu xi ta va ku vonakala ka vona, kutani va ta fuma hi laha ku nga heriki.”—Nhlavutelo 22:3-5.

¹³ Ina, vanhu lava va pfuxiweke va ta fuma tanihi tihosi ku fana ni tinyeleti ematilweni, “hi laha ku nga heriki.” Vutlhari bya vona bya moya byi ta tisa mikateko leyikulu eka vanhu. (Nhlavutelo 14:13) Loko yi va hlamusela tanihi “Yerusalema lowuntshwa,” buku ya Nhlavutelo ya vika: “Muti a wu nga lavi dyambu kumbe n’hweti ku wu voninga, hikuva wu voningiwa hi ku kwetsima ka Xikwembu, kutani Xinyimpfana i rivoni ra wona. Vanhu va matiko hinkwawo va ta famba eku vonakaleni ka wona, kutani tihosi ta misava ti ta neha vukosi bya tona eka wona.” (Nhlavutelo 21:2, 9, 23, 24) Lava pfuxiweke va ta pfuneta eku tirhiseni ka mimpfuno ya gandzelo ra nkutsulo ku “tshungula vanhu va matiko hinkwawo.” (Nhlavutelo 22:2) Loko, eku heleni ka ku Fuma ka Gidi ra Malembe, Yesu ni tihosi-kulobye ni vaprista va 144 000 va tlherisele vanhu lava tshembekaka eku hetisekeni, va ta va hakunene va tise “la’v̌o tala e ku lulameni.” Endzhaku ka ku ringiwa ko hetelela enkarhini wolowo, vanhu lava pfuxetiweke va ta vumba vandla ra vanhu lava hetisekeke lava hanyaka emisaveni ya paradeyisi hi laha ku nga heriki. (Nhlavutelo 20:7-10; Psalma 37:29) Hi ndlela leyi, mimbuyelo leyi vonekaka ya ku dzuneka ka le tilweni ka ‘tiko ra Daniyele’ na yona yi ta tshama “hi mikari ni mikari, hi laha ku nga heriki.”

Ku Pfuxiwa Kun’wana Ka Vafi

14. Vuprofeta bya leswaku “la’v̌o tala la’v̌a etleleke e nṭhurini wa misav̌a . . . v̌a ta pfuka” byi ta katsa na vamani van’wana?

¹⁴ Xisweswo, marito ya ntsumi ma hi yisa endzhaku ka nkarhi wa ‘ku yima’ ka Mikayele ni le ka “nkarhi wa mapfalo” lowu nga ringanisiwiki ku ya fika emafambiselweni lamantshwa ya swilo. Ku tlula kwalaho, mikateko leyi lunghiseleriweke hi ku tirhisa vanhu lava va vangamaka ku “fana ni tinyeleti” yi nge hikeriwi eka lava va ponaka “nkari wa mapfalo.” Yesu, loko a ha ri munhu laha misaveni, u te: “Mi nga hlamaleni hi mhaka leyi; hikuva nkarhi wa ta lowu hinkwavo lava nge masirheni va nga ta twa rito ra yena; kutani va ta huma; lava endleke leswinene va pfuka va ya evutomini lebyi nga heriki, lava endleke leswo biha va ta pfuka va ya eku avanyisiweni.” (Yohane 5:28, 29) Marito lawa ma kombetela eka ku pfuxiwa ka xiviri ka vanhu lava feke, naswona a swi kanakanisi leswaku ku pfuxiwa loku, na kona, i ku hetiseka loku yaka emahlweni ka marito ya ntsumi lama nge: “La’v̌o tala la’v̌a etleleke e nṭhurini wa misav̌a . . . v̌a ta pfuka.”—Daniel 12:2.

15. Eka lava pfuxiweke hi nkarhi wolowo, xana ku ta tikombisa njhani ku ri ku pfukela “v̌utomi lebyi nga heriki”?

¹⁵ Exikarhi ka lava katsiweke eka ku pfuxiwa loku ko tano i Daniyele hi yexe. U byeriwe hi ntsumi loko yi ku: “Kambe wena, yana e ku heleni ka wena, u wisa, [etlela vurhongo hi ku fa] kutani u ta pfuka u yimela nḍaka ya wena e ku heleni ka masiku.” (Daniel 12:13) Lava vo fana na Daniyele lava va pfuxiwaka enkarhini wolowo ni lava amukelaka vutirheli bya Yesu ni vamakwavo lebyi humaka etilweni va ta pfuxeriwa eku hetisekeni ka vanhu. Loko va hlula eka ku ringiwa ko hetelela, mavito ya vona ma ta tsariwa hi laha ku nga heriki ebukwini ya vutomi. (Nhlavutelo 20:5) Ni le ka vona, ku pfuxiwa ku ta va ka “vutomi lebyi nga heriki.”

16. Ku pfuxiwa emafambiselweni lamantshwa ya swilo ku ta tikombisa eka vamani ku ri ka “tingana le’ti nga heriki”?

¹⁶ Hambi swi ri tano, a hi hinkwavo lava nga ta swi amukela hi ndlela leyi. A swi kanakanisi leswaku van’wana va ta ringeta ku vuyisa mintirho leyi tekeleke vanhu ku rhula hi nkarhi wo leha. Vanhu vo tano va ni xitsundzuxo lexinene eBibeleni: “Kambe loko ma ri matoya, ni lava nga hava ku pfumela, ni va manyala, ni loko va ri vadlayi, ni vaoswi, ni vangoma, ni vaphahli va swikwembu swa hava, ni vahembi hinkwavo, xa vona ku ta va ku hoxiwa etiveni leri pfurhaka hi ndzilo ni xivavula, ri nga rona rifu ra vumbirhi.” (Nhlavutelo 21:8) ‘Rifu leri ra vumbirhi’ i ku avanyisa loku kongomeke loku humaka eka Yehova loku ku nga hava ku pfuxiwa ka vafi. Hi loku nga heriki, ku rivariwa loku nga heriki. Lava pfuxiweke eku feni lava va tikombisaka va ri lava nga tlangeriki va ta xaniseka hi rifu leri ra vumbirhi; kutani, ku pfuxiwa ka vona ku ta va ka “šisanḍu ni tingana le’ti nga heriki.”—Daniel 12:2.

‘Ku Tiva Ka Ntiyiso Ku Ta Engeteleka’

17. Xana hi swi tivisa ku yini leswaku vuprofeta lebyi vulavulaka hi hosi ya le n’walungwini ni hosi ya le dzongeni ngopfu-ngopfu byi rhekhoderiwe ku pfuna hina namuntlha?

¹⁷ Ntsumi kutani yi nyika Daniyele marito yo tsundzuxa yi ku: “Kutani wena, Daniel, funengeta timhaka leto, u lemela buku leyi e ku yisa nkarini wa makumu; la’v̌o tala v̌a ta yi šiya, kutani ku tiv̌a ku ta engeteleka.” (Daniel 12:4) Marito lawa ma koka mianakanyo ya hina. Hambi leswi vuprofeta bya ntsumi mayelana ni tihosi timbirhi byi sunguleke ku hetiseka kwalomu ka 2 300 wa malembe lama hundzeke, ku twisiseka ka byona ngopfu-ngopfu ku pfuriwe “e nkarini wa makumu,” ngopfu-ngopfu ku sukela hi 1919. Emasikwini lawa, “vo tala . . . va xiya” eBibeleni, naswona vutivi bya ntiyiso hakunene byi engetelekile. Sweswi i nkarhi lowu Yehova a nyikeke lava twisisaka vutivi.

18. (a) I swiphemu swihi leswikulu swa vuprofeta leswi swi hetisekaka sweswi kumbe leswi nga ta hetiseka ku nga ri khale? (b) Xana i langutelo rihi ro ringanisela leri leswi swi hi nyikaka rona?

¹⁸ Ntiyiso wa leswaku timhaka to tala ta vuprofeta ti hetiseke eka malembe xidzana yo tala lama hundzeke wu tirha ku tiyisa ripfumelo ra hina eka swiyenge swa vuprofeta leswi swi nga siki hetisekaka. (Yoxuwa 23:14) Misava namuntlha yi nghenele mphikizano wa nyimpi exikarhi ka hosi ya le n’walungwini ni hosi ya le dzongeni, hi laha ntsumi yi vhumbeke ha kona. Ku tlula kwalaho, vuprofeta byi tsundzuxa hambi ku ri hi minkarhi ya khombo lerikulu leyi nga emahlweni. Kutani hi pfuniwa ku hlayisa ku ringanisela ka hina ni ku papalata ku tsekatsekisiwa hi mavunwa ya hosi yihi na yihi. Lowu i nkarhi wo tiyisa ntshembo wa hina eka Yehova. U nga tshuki u rivala leswaku “Mikayele . . . hosana leyikulu” u ‘yimela’ vanhu va Xikwembu. Ku ponisiwa ka hina vini ntsena ku le ka ku titsongahata eka Mfumo wa Xikwembu ehansi ka Kriste Yesu.—Mintirho 4:12; Vafilipiya 2:9-11.

19. I nkoka wihi lowu marito ya ntsumi eka Daniyele ya wu rhwaleleke un’wana ni un’wana wa hina?

¹⁹ Kutani, namarhela “la’v̌o tlhariha,” lava va ‘vangamaka kukotisa ku vangama ka le matilweni.’ Tshama u ri karhi u chivirika eka ku tirhela Mfumo wa Xikwembu. (1 Vakorinto 15:58; Varhoma 15:5, 6) Kurisa rirhandzu ra wena ra ntiyiso wa Rito ra Xikwembu, ni ku tlangela swinene ku rhula loku nga kona hambi ku ri sweswi enhlengeletanweni ya Xikwembu. (Psalma 119:165; Vaefesa 4:1-3; Vafilipiya 2:1-5) Kutani, loko Mikayele a ‘yimela’ ku herisa valala va Yehova, onge u nga pona, kun’we ni vanhu va Xikwembu hinkwavo lava mavito ya vona ma “ṭariweke bukwini.”

Xana U Nga Hlamula?

◻ Xana “la’v̌o tala la’v̌a etleleke e nṭhurini” ana se a va pfuxiwe hi ndlela yihi?

◻ Xana ‘ku pfuxiwa’ loku ku nga hundzukisa ku yini ku va ‘swisandzu’?

◻ Xana “la’v̌o tlhariha” va vangamisa ku yini tanihi timboni ivi va tisa lavo tala eku lulameni?

◻ I ku hetiseka kwihi ka nkarhi lowu taka loku nga ta va kona ehenhleni ka ‘lava etleleke entshurini’?

◻ Xana Daniel 12:4 yi hetisekisa ku yini?

[Xifaniso lexi nga eka tluka 23]

Ku sukela hi 1919 lava tlhariheke a va vangamisa ntiyiso lowu nyikaka vutomi

[Xihlovo Xa Kona]

NASA photo