Swikhongelo Swi Lava Mintirho
“Yehova o ṭhama kule ni la’v̌o biha, kambe o yingisa mikhongelo ya la’v̌o lulama.”—SWIVURISO 15:29.
1. I xiyimo xihi xin’wana lexi hi faneleke ku hlangavetana na xona loko Xikwembu xi ta hlamula swikhongelo swa hina?
SWILAVEKO hinkwaswo swa Yehova i swa vutlhari, swi lulamile naswona i swa rirhandzu. Naswona a swi tiki. (1 Yohane 5:3) Sweswo swi katsa swilaveko swakwe mayelana ni xikhongelo, xin’wana xa leswi hi leswaku hi fanele ku hanya vutomi lebyi twananaka ni swikhongelo swa hina. Ndlela ya hina ya xiendlo yi fanele ku tsakisa Yehova Xikwembu. Handle ka sweswo, xana hi nga rindzela leswaku a khathalela swikombelo swa hina hi tintswalo hi ndlela yihi?
2, 3. Ha yini Yehova a nga swi hlamulanga swikhongelo swa Vaisrayele, hi laha swi voniweke ha kona hi marito ya Esaya, Yeremiya na Mikea?
2 Leyi i mhaka ya xikhongelo leyi honisiweke hi vo tala lava nga eVujaganini, hambi ku ri hi laha yi honisiweke ha kona hi vagwinehi va Vaisrayele esikwini ra Esaya. Hi yona mhaka leyi Yehova a endleke leswaku muprofeta wakwe a n’wi yimela a ri loyi a nge: “Loko mi anḍisa mikhongelo ya ṅwina, a nḍi yingisi . . . Hlambani, mi tibasisa; susani mahlweni ka mina e mitiro le’yo biha ya ṅwina; ṭhikani ku endla ŝo biha. Dyonḍani ku endla le’ŝinene.” (Esaya 1:15-17) Ina, loko Vaisrayele volavo a a va lava tintswalo ta Xikwembu, a a va fanele ku endla hi ndlela leyi yi xi tsakisaka. Hi laha swi vuriweke kahle ha kona: “Loko mi lava leswaku Xikwembu xi mi yingisa loko mi khongela, mi fanele ku Xi yingisa loko Xi vulavula.”
3 Kahle-kahle, Yehova hi ku phindha-phindha u kume swi laveka ku tsundzuxa vanhu vakwe va Israyele hi mintiyiso leyi. Xisweswo ha hlaya: “L’a pfalaka tindlev̌e leŝaku a nga twi milawu—šikhongelo ša yena i manyala” eka Xikwembu. “Yehova o ṭhama kule ni la’v̌o biha, kambe o yingisa mikhongelo ya la’v̌o lulama.” (Swivuriso 28:9; 15:29) Hikwalaho ka xiyimo lexi, Yeremiya u ririle a ku: “U [Yehova] tifunengetile hi papa, leŝaku šikhongelo ša mina ši nga ṭhuki ši fika ka wena.” (Swirilo swa Yeremia 3:44) Entiyisweni, xitsundzuxo lexi Mikea a huhuteriweke ku xi nyikela xi hetisekile: “E nkarini lowo v̌a ta huwelela e ka Yehova, kambe a nga v̌a yingisi; o ta v̌a fihlela mombo wa yena e nkarini lowo, hikuv̌a v̌a onhile ku famba ka v̌ona.”—Mikea 3:4; Swivuriso 1:28-32.
4. I yini leswi kombaka leswaku hambi ku ri exikarhi ka vanhu va Yehova van’wana a va xi tlangeli xilaveko xa mintirho leyi twananaka ni swikhongelo swa vona?
4 Kutani swa fanela ku hanya hi ku twanana ni swikhongelo swa hina. Xana i swa nkoka ku kandziyisa mhaka leyi namuntlha? Hakunene swi tano, hayi hikwalaho ka xiyimo eVujaganini ntsena kambe hikwalaho ka xiyimo xa vanhu van’wana lava tinyiketeke va Yehova. Eka lava tlulaka 3 000 000 wa vahuweleri va mahungu lamanene n’waxemu, lava nga henhla ka 37 000 va tsemiwile hikwalaho ka mahanyelo lama nga riki ya Vukriste. Sweswo swi endla mpimo wa kwalomu ka un’we eka 80. Kahle-kahle, vo tala va vanhu lava a va khongela nkarhi na nkarhi. Kambe xana a va endla hi ku twanana ni swikhongelo swa vona? A swi tano! Hambi ku ri vakulu van’wana lava a va ri entirhweni wa nkarhi hinkwawo hi makume ya malembe va le xikarhi ka lava layiweke hi ndlela yo karhi. Swi vavisa swonghasi! Entiyisweni, “loyi a anakanyaka leswaku wa ha yimile, a a tivonele leswaku a nga wi,” leswaku a nga endli hi ndlela leyi endlaka leswaku swikhongelo swakwe swi nga amukeleki eka Muendli wa yena.—1 Vakorinto 10:12.
Mhaka Leyi Swikhongelo Swi Lavaka Mintirho Ha Yona
5. Leswaku Yehova a hlamula swikhongelo swa hina, hi nga komba ku tiyiseka ka hina hi ndlela yihi?
5 Leswaku swikhongelo swa hina swi twiwa hi Yehova Xikwembu, a hi fanelanga ku va lava tengeke emahanyelweni ni le moyeni ntsena kambe hi fanele ku tlhela hi tikomba hi ri lava tiyisekaka hi swikhongelo swa hina hi ku tirhela eka leswi hi swi khongelelaka. Xikhongelo xi ri xoxe a hi muyimeri wa matshalatshala lama tshembekaka, lama tlhariheke. Yehova a nga ka a nga hi endleli leswi hi nga tiendlelaka swona hi hexe hi ku tirhisa xitsundzuxo xa Rito rakwe ni ku landzela xiletelo xa moya wakwe lowo kwetsima hi ku tshembeka. Hi fanele hi rhandza ku endla hinkwaswo leswi hi nga swi kotaka emhakeni leyi leswaku a ta va ni xisekelo xo hlamula swikhongelo swa hina. Xisweswo, a hi fanelanga ‘ku kombela swo tala ku tlula leswi hi navelaka ku tirhela eka swona,’ hi laha un’wana a swi vekeke kahle ha kona.
6. I swivangelo swihi swimbirhi leswi hi faneleke ku khongela hikwalaho ka swona?
6 Hambi swi ri tano, xivutiso xi nga ha vutisiwa: ‘Ha yini hi khongela loko hi fanele ku tirhela leswi hi swi khongelelaka?’ Hi fanele ku khongelela swivangelo swimbirhi leswinene. Xo sungula, hi swikhongelo swa hina hi pfumela leswaku swilo hinkwaswo leswinene swi huma eka Xikwembu. I Munyiki wa nyiko yin’wana ni yin’wana leyinene ni leyi hetisekeke—masana ya dyambu, mpfula, tinguva ta mihandzu ni swin’wana swo tala! (Matewu 5:45; Mintirho 14:16, 17; Yakobo 1:17) Xa vumbirhi, ku nga khathariseki leswaku matshalatshala ya hina ya humelela kumbe a ya humeleli swi titshege hi nkateko wa Yehova. Hi laha hi hlayaka ha kona eka Psalma 127:1: “Loko Yehova a nga aki yindlu, la’v̌a yi akaka v̌a tikaratela ŝa hav̌a. Loko Yehova a nga hanyanyeli muti, v̌alanguteri a v̌a pfuni ntšhumu.” Marito lawa ya Pawulo ya hlamusela mhaka leyi fanaka loko eka 1 Vakorinto 3:6, 7 a ku: “Mina ndzi byarile, Apolosi ú cheletile; kambe Xikwembu hi xona xi miriseke. Hikokwalaho, loyi a byalaka a hi nchumu, hambi loyi a cheletaka, kambe i Xikwembu, hikuva hi xona xi mirisaka.”
Swikombiso Swin’wana Swa Khale
7, 8. (a) I xiendlakalo xihi evuton’wini bya Yakobo lexi kombaka ku u tlangele leswaku mintirho yi fanele ku fambelana ni swikhongelo? (b) I xikombiso xihi lexi Hosi Davhida a xi nyikeleke mayelana ni leswi?
7 Matsalwa ya vika timhaka to tala leti kombaka leswaku malandza lama tshembekaka ya Yehova ya tirhele leswi a ya swi khongelela. A hi xiyeni swikombiso swi nga ri swingani swa vayimeri. Hikuva ntukulu wa Abrahama Yakobo a kume nkateko wa vukulukumba, makwavo wakwe lonkulu Esawu u n’wi venge hi rivengo lerikulu. (Genesa 27:41) Hi malembe ya 20 endzhaku, loko Yakobo a suka ePadan-Aram a ya etikweni leri a velekeriweke eka rona ni ndyangu wakwe lowukulu ni swifuwo swakwe swo tala, u twile leswaku Esawu a a ta leswaku a ta n’wi hlanganisa. Hi ku tsundzuka rivengo ra Esawu, Yakobo u khongele swinene eka Yehova leswaku a n’wi sirheleta eka vukari bya makwavo. Kambe xana u endle sweswo ntsena? Kunene, a swi tano. U rhumele tinyiko to hanana leti n’wi rhangelaka, a ku: “Nḍi ta rulisa mbilu ya yena hi nhlengo lo’wu nḍi rangelaka e mahlweni.” Kutani swi ve tano, hikuva loko vamakwavo vambirhi va hlangana, Esawu u angarhe Yakobo ivi a n’wi ntswontswa.—Genesa, tindzima 32, 33.
8 Davhida u nyikele xikombiso xin’wana lexi tirhaka mayelana ni leswi hi swi khongelelaka. Loko n’wana wakwe Abšalom a vutle xiluvelo xakwe xa vuhosi, ndhuna ya Davhida Akitofel u yime na Abšalom. Kutani Davhida u endle xikombelo lexinene leswaku xitsundzuxo xa Akitofel xi siveriwa. Xana hakunene-nene Davhida u khongelele vuyelo byolebyo? E-e, u lerise ndhuna yakwe leyi tshembekaka Hušai ku hlangana na Abšalom leswaku a ta sivela xitsundzuxo xa Akitofel. Kutani yoleyo i ndlela leyi swilo swi endlekeke ha yona. Abšalom u landzele xitsundzuxo lexo biha lexi a xi nyikiweke hi Hušai, a ala xitsundzuxo xa Akitofel.—2 Samuel 15:31-37; 17:1-14; 18:6-8.
9. Nehemiya u kombe leswaku u tlangele nawu wa leswaku swikhongelo swi lava mintirho hi ndlela yihi?
9 Kambe xikombiso xin’wana lexi xi nga ha tshahiwaka leswaku xi hi tsundzuxa hi lexiya xa Nehemiya. A a ri na ntirho lowukulu wo wu endla—ku pfuxa marhangu ya Yerusalema. Hambi swi ri tano, valala vo tala a va n’wi khira. Nehemiya u khongerile ni ku tirha, hi laha hi hlayaka ha kona: “Kambe hina hi khongela Šikwembu ša hina hi ku v̌a tšhav̌a, hi v̌eka v̌alanguteri nhlekanhi ni v̌usiku, leŝaku hi tisiv̌elela ka v̌ona.” Ku sukela kwalaho ku ya emahlweni, hafu ya majaha ya Nehemiya ya yime ya tilunghisele ku sirheleta hafu leyin’wana, lavaya va akaka rirhangu.—Nehemia 4:9, 16.
Xikombiso Xa Yesu
10, 11. I swikombiso swihi leswi nyikeriweke hi Yesu swi kombaka leswaku u endla hi ku twanana ni swikhongelo swakwe?
10 Yesu Kriste u hi vekele xikombiso lexinene xo tirhela leswi hi swi khongelelaka. U hi dyondzisile ku khongela: “Vito ra wena a ri hlawuleke.” (Matewu 6:9) Kambe Yesu u endle hinkwaswo leswi a nga swi kotaka leswaku vayingiseri vakwe va ta hlawulekisa vito ra Tata wakwe. Hi ku fanana, Yesu a nga kalanga a tshika ku khongela: “Tatana, dzunisa vito ra wena!” (Yohane 12:28) E-e, u endle leswi a nga swi kotaka ku dzunisa vito ra Tata wakwe ni ku endla leswaku van’wana va endla tano.—Luka 5:23-26; 17:12-15; Yohane 17:4.
11 Hi ku vona xilaveko lexikulu xa moya lexi vanhu a va ri na xona, Yesu u te eka vadyondzisiwa vakwe: “Ku tshovela i kukulu, kambe vatirhi a va talanga. Hikokwalaho, khongelani N’wini wa ku tshovela [Yehova Xikwembu], leswaku a rhuma vatirhi eku tshoveleni ka yena.” (Matewu 9:37, 38) Xana Yesu u endle sweswo ntsena? Doo! Endzhaku ka sweswo, u rhume vaapostola vakwe va 12 hi vambirhi-mbirhi eka pfhumba ro chumayela, kumbe ro “tshovela.” Endzhaku, Yesu u rhume vavuri va rito va 70 ku ya endla ntirho lowu fanaka.—Matewu 10:1-10; Luka 10:1-9.
Ku Tirhisa Xitsundzuxo
12. Ntirho wu na nsusumeto wihi eka swikhongelo swa hina leswaku Xikwembu xi hi nyika vuswa bya hina bya siku rin’wana ni rin’wana?
12 Entiyisweni, Yehova Xikwembu u rindzela leswaku hi va lava tiyeke, hi endla hi ku twanana ni swikhongelo swa hina, xisweswo hi kombisa ku tiyiseka ka hina. Yesu u hi byele ku khongela: “U hi nyika namuntlha vuswa bya hina bya siku rin’wana ni rin’wana.” (Matewu 6:11) Hikwalaho ke, hi laha ku faneleke, valandzeri vakwe hinkwavo va kombela leswaku Xikwembu xi endla tano. Kambe xana hi rindzela Tata wa hina wa le matilweni ku hlamula xikhongelo xexo handle ko endla nchumu wun’wana hi xona? Kavula a swi tano. Hi yona mhaka leyi hi hlayaka: “Mbilu ya lolo yi dyiwa hi ku nav̌ela”—kumbexana hambi hi ku khongela—“hambi ŝi ri tano, a ri fuwi ntšhumu.” (Swivuriso 13:4) Muapostola Pawulo u endle yinhla leyi fanaka eka 2 Vatesalonika 3:10, a ku: “Un’wana ni un’wana loyi a nga laviki ku tirha, ni ku dya a nga dyi!” Ku khongelela swakudya swa hina swa siku rin’wana ni rin’wana ku fanele ku fambisana ni ku navela ku tirha. Lexi tsakisaka, Pawulo hi vutlhari u vule leswaku lava va nga “laviki ku tirha” ni ku dya va nga dyi. Van’wana lava lavaka ku tirha va nga ha va va nga thoriwi, va vabya, kumbe va kule ngopfu lerova va nga tirha. Va swi lava ku tirha, kambe leswi a swi pfumelelani na swiyimo swa vona. Kutani, hi laha ku fanelaka va nga ha khongelela swakudya swa vona swa siku rin’wana ni rin’wana ivi va tshemba ku swi amukela.
13. Leswaku Yehova a hlamula swikhongelo swa hina swa moya wakwe lowo kwetsima, hi fanele ku endla yini?
13 Yesu nakambe u hi tsundzuxe ku kombela Tata wakwe wa le tilweni moya Wakwe lowo kwetsima. Hi laha Yesu a hi tshembisaka ha kona, Xikwembu xa swi rhandza ku hi nyika moya lowo kwetsima ku tlula vatswari va la misaveni lava nyikaka vana va vona swilo leswinene. (Luka 11:13) Kambe xana hi nga rindzela Yehova Xikwembu ku hi nyika moya wakwe lowo kwetsima hi mihlolo, handle ka matshalatshala wahi ni wahi eka hina? A swi tano! Hi fanele ku endla hinkwaswo leswi hi nga swi kotaka ku amukela moya lowo kwetsima. Ku tlhandlekela eku wu khongeleleni, hi fanele ku tiwundla swinene hi Rito ra Xikwembu. Ha yini? Hikuva Yehova Xikwembu a nga nyiki moya wa yena lowo kwetsima ehandle ka Rito rakwe; naswona hi nga ka hi nga languteli ku amukela moya lowo kwetsima loko hi honisa ndlela ya la misaveni leyi Yehova a yi tirhisaka namuntlha, “nandza lowo tshembeka, lowa vutlhari,” loyi a yimeriwaka hi Huvo leyi Fumaka ya Timbhoni ta Yehova. Handle ka mpfuno lowu humaka eka “nandza” loyi, hi nga ka hi nga swi koti ku twisisa nhlamuselo leyi teleke ya leswi hi swi hlayaka kumbe ku tiva ndlela yo tirhisa leswi hi swi dyondzaka.—Matewu 24:45-47.
14, 15. (a) Leswaku Yehova a hlamula swikhongelo swa hina swa vutlhari, hi fanele ku tirhisana na yini? (b) Leswi swi tiyisiwe njhani hi xikombiso xa Hosi Solomoni?
14 Nawu lowu nge swikhongelo swi lava mintirho nakambe wu tirha eka marito lawa ya mudyondzisiwa Yakobo, makwavo wa Yesu hi tatana: “Loko un’wana wa n’wina a pfumala vutlhari, a a kombele eka Xikwembu, lexi nyikaka vanhu hinkwavo hi tintswalo, ku nga ri na ku vilela, kutani ú ta nyikiwa byona.” (Yakobo 1:5; Matewu 13:55) Kambe xana Xikwembu xi hi nyika vutlhari lebyi hi singita ke? Doo. Xo sungula, hi fanele ku va ni langutelo lerinene, hi laha hi hlayaka ha kona: “A dyonḍisa la’v̌a tiṭongahataka e ndlela ya yena.” (Psalma 25:9) Kutani Xikwembu xi dyondzisa “la’v̌a tiṭongahataka” hi ndlela yihi? Hi Rito ra xona. Nakambe, hi fanele ku rhangisa matshalatshala yo ri twisisa ni ku ri tirhisa, hi laha swi kombisiweke ha kona eka Swivuriso 2:1-6: “Ṅwana nga loko u amukela marito ya mina, u v̌a u tihlayisela milawu ya mina, loko u riya ndlev̌e ya wena e ku yingisa v̌utlhari, u nyiketa mbilu ya wena e ku yingiseni; Nḍi ri, loko u rilela v̌utiv̌i, loko u huwelela e ku twisisa, loko u ŝi lav̌a kukotisa mali, . . . hi laha u nga ta twisisa ku tšhav̌a ka Yehova, u ta kuma ku tiv̌a ka Šikwembu. Hikuv̌a Yehova hi yena l’a nyikaka v̌utlhari.”
15 Loko Hosi Solomoni a khongelele vutlhari ivi Xikwembu xi hlamula xikhongelo xakwe hi singita, xana nawu lowu nge swikhongelo swi lava mintirho na wona a wu tirha xana? Ina, a wu tirha, hikuva tanihi hosi ya Israyele, Solomoni a a fanele ku tsala kopi ya yena n’wini ya Nawu, a yi hlaya siku rin’wana ni rin’wana, ivi a yi tirhisa evuton’wini byakwe. Kambe loko Solomoni a hambane ni swiletelo swa yona, tanihi ku andzisa vavasati ni tihanci, mintirho yakwe a yi nga ha twanani ni swikhongelo swa yena. Hikwalaho ka sweswo, Solomoni u ve mugwinehi naswona u file tanihi “šihunguki.”—Psalma 14:1; Deuteronoma 17:16-20; 1 Tihosi 10:26; 11:3, 4, 11.
16. I xikombiso xihi xi kombaka leswaku swikhongelo swa hina swo hlula ku tsana ka nyama swi fanele ku fambelana ni mintirho?
16 Nawu wa leswaku mintirho yi fanele ku fambelana ni swikhongelo wa tirha ni loko hi kombela mpfuno wa Xikwembu xa ku hlula mukhuva wun’wana lowu mileke, wa vutianakanyi. Xisweswo makwerhu wa xisati wa phayona u pfumerile leswaku a a godzomberiwe hi mintlangu ya swiphemu, a a yi hlalela ku sukela hi 11:00 a.m. ku ya eka 3:30 p.m. siku rin’wana ni rin’wana. Hi ku dyondza eka nkulumo ya ntsombano wa muganga hi laha minongonoko yo tano ya mahanyelo ya vunghwavava yi vavisaka ha kona, u yise mhaka eka Xikwembu hi xikhongelo. Kambe, swi n’wi tekele nkarhi wo leha ku hlula mukhuva lowu. Ha yini? Hikuva, hi laha a vuleke ha kona: ‘A ndzi khongela leswaku ndzi hlula mukhuva lowu ivi ndzi hlalela minongonoko ku ya emahlweni. Kutani ndzi anakanye ku tshama entirhweni wa nsimu siku hinkwaro leswaku ndzi ta ka ndzi nga ringeki. Eku heteleleni ndzi kume yinhla ya leswaku ndzi fanele ku tima TV nimixo ivi ndzi yi tshika yi timekile siku hinkwaro.’ Ina, ku tlhandlekela eka ku khongelela ku hlula ku tsana ka yena, a a fanele ku tirhela ku ku hlula.
Xikhongelo Ni Ku Chumayela Ka Hina
17-19. (a) I timhaka tihi leti kombaka leswaku Timbhoni ta Yehova a ti tirha hi ku twanana ni swikhongelo swa tona? (b) I xikombiso xihi xa munhu hi xiyexe lexi endlaka yinhla leyi fanaka?
17 Ku hava laha xitsundzuxo xa leswaku swikhongelo swi lava mintirho xi nga ntiyiso kona ku tlula entirhweni wo chumayela hi ta Mfumo. Xisweswo, Timbhoni ta Yehova hinkwato a ti khongeleli ku andza eku tshoveleni ka vatirhi ntsena kambe ta tikarhata eka ntirho wolowo. Hikwalaho ka sweswo, ti vone ku andza loku xiyekaka etikweni rin’wana ni rin’wana. Ku xiya xikombiso xin’we ntsena: Hi 1930 a ku ri na mbhoni yin’we ntsena ya Yehova leyi chumayelaka eChile. Namuntlha, Mbhoni yoleyo yin’we a yi vanga khume ra madzana ntsena kambe van’wana va 30 000. (Esaya 60:22) Xana lebyi a ku ri vuyelo bya swikhongelo ntsena? E-e, ntirho nakambe a wu katseka. Hikwalaho, hi 1986 ntsena, Timbhoni ta Yehova eChile ti nyikele maawara lama tlulaka 6 492 000 entirhweni wo chumayela!
18 Leswi fanaka i ntiyiso loko ntirho wo chumayela wu yirisiwile. Timbhoni a ti khongeleli ku andza ntsena kambe ti tirha hi ku tumbela kutani ti hambeta ti chumayela. Hikwalaho, ku nga khathariseki nkaneto wa mfumo, ku andza ku va kona ematikweni lawa. Xisweswo, ematikweni ya 33 laha Timbhoni ta Yehova ti hlangavetanaka ni ku kanetiwa ko tano ka mfumo, hi lembe ra ntirho ra 1986 ti nyikele maawara yo tlula 32 600 000 entirhweni wa tona wo chumayela naswona ti tsakele ku andza ka tiphesente ta 4,6!
19 Kavula, nawu wa leswaku swikhongelo swi lava mintirho nakambe wu tirha eka munhu hi xiyexe. Hi nga ha khongela eka Yehova ku kuma dyondzo ya le kaya ya Bibele kambe hi nga ha va hi nga endli hinkwaswo leswi hi nga swi kotaka ku kuma yin’we. Wolowo a wu ri ntokoto wa phayona rin’wana. Loko a ri ni dyondzo yin’we ntsena ya Bibele, u khongelele ku va ni to tala. Xana ri endle sweswo ntsena? E-e, kambe hi vukheta ri xiye vutirheli bya rona ivi ri kuma leswaku eka maendzo ya rona yo vuyela a ri nga tlakusi mhaka yo va ni dyondzo ya le kaya ya Bibele. Ku ya emahlweni ni leswi, hi ku anghwetla ri vile ni tidyondzo tin’wana leti engetelekeke timbirhi ta Bibele.
20. Xana nawu wa leswaku swikhongelo swi lava mintirho wu nga katsakanyiwa hi ndlela yihi?
20 Swikombiso swin’wana swo tala swi nga nyikeriwa ku kombisa leswaku swikhongelo swi lava mintirho. Hi xikombiso, ku ni leswiya swi vulavulaka hi vuxaka bya munhu hi xiyexe endyangwini kumbe ebandlheni. Kambe swikombiso leswi nga laha henhla swi fanele swi ringene ku swi endla swi twisiseka hi xitalo leswaku swikhongelo swi lava mintirho. Leswi swi twisiseka swinene, hikuva hi nga ka hi nga rindzeli Yehova Xikwembu ku hi nyika nkhathalelo wa tintswalo eka swikombelo swa hina loko hi n’wi hlundzukisa hi mahanyelo ya hina. Nakambe swi le rivaleni leswaku hi fanele ku endla hinkwaswo leswi hi nga swi kotaka hi ku twanana ni swikhongelo swa hina loko hi ta rindzela Yehova ku hi endlela leswi hi hlulekaka ku tiendlela swona hi hexe. Hakunene-nene, milawu ya Yehova i ya vutlhari naswona yi lulamile. Ya twala, naswona swi pfuna hina vini loko hi endla hi ku twanana na yona.
Wa Tsundzuka Xana?
◻ I xilaveko xihi mayelana ni xikhongelo lexi honisiweke hi vo tala eIsrayele ya khale?
◻ Ha yini Xikwembu xi nga ri lexi nga twisiseki loko xi lava leswaku hi tirha kun’we ni ku khongelela leswi hi swi navelaka?
◻ I swikombiso swihi swa khale leswi kombaka leswaku malandza ya Yehova ya tirhele leswi a ya swi khongelela?
◻ Leswaku Xikwembu xi hlamula swikhongelo swa hina swa moya wa xona lowo kwetsima ni vutlhari, hi fanele ku endla yini?
◻ Nawu wa leswaku swikhongelo swi lava mintirho wu tirha njhani evutirhelini bya hina bya nsimu?
[Swifaniso leswi nga eka tluka 17]
Yesu u khutaze vakyondzisiwa vakwe ku khongelela vatirhi vo tala vo tshovela. Kambe u va rhume ni le ntirhweni wo chumayela, kumbe wo ‘tshovela’
[Xifaniso lexi nga eka tluka 18]
Xana u khongelela mpfuno wo lawula langutelo ra wena ra ku hlalela thelevhixini? Kutani tirhisa nawu wa leswaku swikhongelo swi lava mintirho hi ku tima sete ya TV ya wena