Vutomi Ni Vutirheli Bya Yesu

Ku Twela Lava Nga eKhombyeni Vusiwana

ENDZHAKU ka ku sola Vafarisi hikwalaho ka mikhuva ya vona ya vutianakanyi, Yesu wa suka ni vadyondzisiwa va yena. Ku nga ri khale, u nga ha tsundzuka, leswaku matshalatshala yakwe yo famba na vona va ya wisanyana ya kavanyetiwile loko mintshungu yi va kumile. Sweswi, ni vadyondzisiwa va yena, wa famba a ya ematikweni ya Tiri na Sidoni, tikhilomitara to tala ku ya en’walungwini. Leri ri vonaka ri ri rendzo ro sungula leri Yesu a ri tekaka ni vadyondzisiwa ehandle ka mindzilakana ya Israyele.

Endzhaku ko kuma yindlu yo tshama eka yona, Yesu u tivisa leswaku a nga lavi munhu a tiva laha va nga kona. Kambe, hambi ku ri endhawini leyi yi nga riki ya Vaisrayele, a nga swi koti ku tumbela. Wansati wa Mugriki, la tswariweke laha Phoenicia ya Siriya, wa n’wi kuma kutani a sungula ku kombela: “Ndzi twele vusiwana, Hosi N’wana Davhida! N’wana wa mina wa wanhwanyana wa xaniseka hi mademona.” Hambi swi ri tano, Yesu, a nga hlamuli nchumu.

Eku heteleleni, vadyondzisiwa va yena va byela Yesu va ku: “N’wi hlongole, hikuva u hi bela huwa a ri karhi a hi landzelela.”

Loko a hlamusela xivangelo xa yena xo n’wi honisa, Yesu u ri: “A ndzi rhumiwanga eka van’wana, loko ku nga ri eka tinyimpfu leti lahlekeke ta yindlu ya Israyele.”

Kambe, wansati a nga tshiki. U tshinelela Yesu, a nkhinsama emahlweni ka yena, ivi a kombela, “Hosi, ndzi pfune!”

Mbilu ya Yesu yi fanele yi susumetiwile swonghasi hi xikombelo xa xiviri xa wansati loyi! Hambi swi ri tano, u tlhela a kombetela eka vutihlamuleri byakwe byo sungula, ku tirhela vanhu va Xikwembu va Israyele. Hi nkarhi lowu fanaka, kahle-kahle ku ringa ripfumelo rakwe, u n’wi yisa eka langutelo ra Vayuda ro tekela va matiko man’wana ehansi, a ku: “A swi sasekanga ku tekela vana evuswa, u nyika timbyana.”

Hi mpfumawulo wa rito ra yena ni xikandza xa ntwelo-vusiwana, hakunene Yesu a a kombisa ndlela leyi a titwaka ha yona ya rirhandzu eka lava va nga riki Vayuda. Nakambe u susa ku fanisiwa ka Vamatiko ni timbyana ka rivengo hi ku va vula “timbyana letintsongo,” kumbe swimbyanyana. Ematshan’wini ya ku twa ku vava, wansati u twisisa nhlamuselo ya Yesu ya xihlawu-hlawu xa Vayuda ivi hi ku titsongahata a ku: “Hosi! Hambi ti ri timbyana leti nge hansi ka tafula, ti dya mahlanhla lama wisiwaka hi vana.”

Yesu wa hlamula a ku, “Manana, ku pfumela ka wena i kukulu, a ku endliwe hi laha u kombelaka ha kona!” Kutani swi endleka! Loko a tlhelela ekaya ka yena, a kuma n’wana wakwe wa nhwana esangwini, a hanye hi laha ku heleleke.

Yesu ni vadyondzisiwa va yena va tsemakanya tiko va suka exivandleni xa le ribuweni ra lwandle xa Sidoni, va kongoma emasungulweni ya Nambu wa Yordani. Va tsemakanya Yordani hi kun’wana ehenhla ka Lwandle ra Galeliya ivi va nghena etikweni ra Dekapolisi, evuxeni bya lwandle. Kwalaho va tlhandlukela entshaveni, kambe mintshungu yi va kuma kutani yi tisa lavo khwita, ni swilema, ni lavo-fe-mahlo, na timbheveve, ni van’wana lava vabyaka ni lava lamaleke hi tindlela tin’wana eka Yesu. Va va veka emilengeni ya Yesu, kutani a va hanyisa. Vanhu va hlamala loko va vona timbheveve ti vulavula, lavo khwita va famba, ni lavo-fe-mahlo va vona, kutani va dzunisa Xikwembu xa Israyele.

Wanuna un’wana loyi a feke tindleve no nonon’hweriwa hi ku vulavula u nyikiwa nkhathalelo wo hlawuleka wa Yesu. Lavo-fe-tindleve hakanyingi a va hlweli ku chava, ngopfu-ngopfu entshungwini. Yesu a nga ha va a ku xiya ku chava ko karhi ka wanuna loyi. Kutani hi ntwelo-vusiwana Yesu a n’wi susa entshungwini ku nga ri na loyi a n’wi vonaka. Loko a ri yexe, Yesu a n’wi kombisa leswi a nga ta n’wi endlela swona. A nghenisa tintiho ta yena etindleveni ta wanuna loyi ivi, endzhaku ko tshwutela marhi, a khumba ririmi ra yena. Kutani ke, a languta etilweni, Yesu a koka moya kutani a ku: “Pfuleka.” Hi loko, matimba ya wanuna ya ku twa ya kondleteleka, kutani a swi kota ku vulavula kahle.

Loko Yesu a endle ku hanyisa loku ko tala, mintshungu hi ku tlangela yi ku: “Ú endlile hinkwaswo hi ndlela leyinene; ú pfula tindleve ta lava nga twiki, ú endla leswaku na timbheveve ti kota ku vulavula.” Matewu 15:21-31; Marka 7:24-37.

◻ Ha yini Yesu a nga tshunguli n’wana wa wansati wa Mugriki hi xihatla?

◻ Endzhaku ka sweswo, Yesu u va yisa kwihi vadyondzisiwa va yena?

◻ Yesu hi ntwelo-vusiwana u n’wi khoma njhani wanuna lowo-fe-tindleve loyi a a nga swi koti ku vulavula?