Yesu A Hanyisa Xinhwanyatana Ni Wanuna La Nga Twiki

Loko Yesu a heta ku sola Vafarisi hikwalaho ka mindhavuko ya vona leyi a yi dzime timitsu, u famba ni vadyondzisiwa vakwe. Va kongoma exifundzheni xa Tiri ni xa Sidoni eFenikiya, laha swi endlaka tikhilomitara to tala ku ya en’walunguvupeladyambu.

Yesu u kuma yindlu yo tshama eka yona kambe a nga lavi vanhu va swi tiva leswaku u kwalaho. Hambiswiritano, vanhu va n’wi vona. Wansati wa Mugriki loyi a velekiweke endhawini yoleyo u kuma Yesu kutani a sungula ku n’wi kombela a ku: “Ndzi twele vusiwana Hosi yanga, N’wana wa Davhida. N’wana wa mina wa nhwanyana wa xaniseka swinene hileswi a nga ni dimona.”—Matewu 15:22; Marka 7:26.

Loko se ku hundze nkarhinyana, vadyondzisiwa va kombela Yesu va ku: “N’wi tlherise, hikuva wa hi tinga.” Yesu u va nyika xivangelo xo va a nga n’wi hlamuli hi ku vula a ku: “A ndzi rhumiwanga eka un’wana ni un’wana kambe ndzi rhumiwe eka tinyimpfu leti lahlekeke ta yindlu ya Israyele.” Hambiswiritano, wansati a nga heli matimba. U ya eka Yesu kutani a fika a khinsama emahlweni ka yena, a kombela a ku: “Ndzi pfune Hosi yanga!”—Matewu 15:23-25.

Leswaku a vona loko wansati yoloye a ri ni ripfumelo leri tiyeke, Yesu u boxa vonelo leri hoxeke ra Vayuda hi vanhu va matiko man’wana, u ri: “A hi swinene ku teka xinkwa xa vana u xi hoxela swimbyanyana.” (Matewu 15:26) Loko Yesu a vulavula hi “swimbyanyana,” u kombisa ndlela leyi a va twelaka hayona vusiwana vanhu lava nga riki Vayuda. Ndlela leyi xikandza xakwe xi langutekaka hayona ni ku va a vulavula hi ndlela ya musa, swi kombisa ndlela leyi a titwaka hayona.

Ematshan’weni yo hlundzuka, wansati yoloye u twisisa leswi a byeriwaka swona hi xihlawuhlawu xa Vayuda kutani hi ku titsongahata, u hlamula a ku: “U tiyisile Hosi yanga, kambe ntiyiso hi leswaku swimbyanyana swi dya mahlanhla lawa ma waka etafuleni ra vini va swona.” Yesu wa swi xiya leswaku wansati loyi u ni mbilu leyinene kutani u n’wi byela a ku: “Wansati, ripfumelo ra wena i rikulu; a swi endleke hilaha u kombelaka hakona.” (Matewu 15:27, 28) Sweswo swi endlekile hambileswi xinhwanyatana a xi nga ri kona kwalaho! Loko wansati yoloye a tlhelela ekaya, u kuma n’wana wakwe wa nhwanyana a etlele emubedweni naswona a hanyisiwile, “dimona ri humile” eka yena.—Marka 7:30.

Loko va suka exifundzheni xa Fenikiya, Yesu ni vadyondzisiwa vakwe va kongoma etikweni leri nga ekusuhi ni Nambu wa Yordani. Va tsemakanya Nambu wa Yordani hi le n’walungwini wa Nambu wa Galeliya kutani va ya exifundzheni xa Dekapolisi. Loko va fika kwalaho, va ya ehenhla ka ntshava kambe ntshungu wu va kumile. Hiloko vanhu va tisa vanhu lava lamaleke, lava khwitaka, lava nga voniki ni lava nga vulavuriki eka Yesu. Va fika va va veka emilengeni ya Yesu ivi a va horisa. Hikwalaho ko hlamala, vanhu va vangamisa Xikwembu xa Israyele.

Yesu u dzike swinene eka wanuna loyi a feke tindleve a tlhela a nga vulavuli kahle. Ehleketa ndlela leyi wanuna yoloye a titwaka hayona loko a ri exikarhi ka ntshungu lowukulu. Loko a xiya ku chuha ka wanuna loyi, Yesu u n’wi susa laha ku nga ni ntshungu a ya na yena etlhelo. Loko va ri swin’we, Yesu u kombisa leswi a nga ta n’wi endlela swona. U nghenisa tintiho etindleveni ta wanuna yoloye, endzhaku ko tshwutelela, a khumba ririmi rakwe. Hiloko Yesu a languta etilweni kutani a vula xiga xa Xiyuda lexi vulaka leswaku “Pfuleka.” Hi nkarhi wolowo, wanuna yoloye a sungula ku twa ni ku vulavula kahle. Yesu a nga lavi leswaku mhaka leyi yi tiviwa hikuva u lava leswaku vanhu va va ni ripfumelo eka yena hikwalaho ka leswi va swi voneke ni ku swi twa.—Marka 7:32-36.

Matimba ya Yesu yo kota ku hanyisa vanhu ma va khumba swinene lava va swi vonaka naswona va “hlamal[a] ngopfu.” Kutani va ri: “Swilo hinkwaswo u swi endl[a] kahle. U kota ni ku endla leswaku lava feke tindleve va twa ni timbheveve ti vulavula.”—Marka 7:37.