Ku Tirha Tanihi Vatirhi-kulorhi Lava Nga Ni Ntshembo Va Yehova

“Wena munhu o tiv̌isiwile le’ŝi lulameke, ni leŝi Yehova a ŝi lav̌aka e ka wena; hi leŝaku u endla le’ŝi lulameke, u ranḍa tintŝalo, ni ku famba hi ku tiṭongahata e mahlweni ka Šikwembu ša wena.”—MIKEA 6:8.

1. Hi le ka xisekelo xihi xa Matsalwa laha malandza hinkwawo ya Yehova namuntlha ya vitaniwaka “vatirhi-kulorhi” va yena?

YOHANE, muapostola wa Mukriste u tsarile a ku: “Ma nga vona rirhandzu lerikulu leri tatana a hi rhandzaka ha rona, ku fika laha hi vuriwaka vana va Xikwembu; ni sweswi, hi vona.” (1 Yohane 3:1) Kutani muapostola Pawulo u vulavule hi yena na Apolosi munghana wakwe a ku: “Hi vatirhi-kulorhi va Xikwembu.” (1 Vakorinto 3:9) Tinhlamuselo leti hinkwato ti endliwile ehenhleni ka valandzeri lava totiweke va Yesu Kriste. Kambe ngopfu-ngopfu ti tirha eka malandza hinkwawo ya ntiyiso ya Xikwembu. Kutani tona leti ti nga kombisiwa hi ku: ‘Vonani muxaka wa rirhandzu lowu Tatana a wu ngheniseke eka hina hi mhaka ya leswi hi faneleke ku va vatirhi-kulorhi va Yehova.’

2. Ha yini swi koteka eka malandza ya Yehova ku va vatirhi-kulobye?

² Swi kotekisa ku yini eka vanhu lava tsaneke, lava nga hetisekangiki ku va vatirhi-kulorhi va Muvumbi lonkulu, loyi a nga hava makumu hi matimba ni vutlhari, loyi a hetisekeke hi ku lulama ni xikombiso xa rirhandzu? Leswi swa koteka hikuva vatswari va hina vo sungula va endliwe hi xifaniso ni xivumbeko xa Muvumbi ni xa mutirhi-kulobye, ku nga Rito. (Genesa 1:26, 27; Yohane 1:1) Kutani vatswari va hina vo sungula va nyikiwe mpimo wa vutlhari, ku lulama, matimba ni rirhandzu. Hi yona mhaka leyi Yehova a swi koteke ku vula eka malandza yakwe ya la misaveni hi ku tirhisa muprofeta wa yena a ku: “Wena munhu u tiv̌isiwile le’ŝi lulameke, ni leŝi Yehova a ŝi lav̌aka eka wena; hi leŝaku u endla le’ŝi lulameke, u rhanḍa tintŝalo, ni ku famba hi ku tiṭongahata e mahlweni ka Šikwembu ša wena.”—Mikea 6:8.

3. I yini leswi vuriwaka eka Mikea 6:8, naswona i yini leswi lavekaka eka munhu a nga si va un’wana wa vatirhi-kulobye va Yehova?

³ Loko hi hlaya marito lama nge, “Leŝi Yehova a ŝi lav̌aka e ka wena . . . ” ku tirha ka wona ku vonaka ku landzela leswi katsakanyaka vutihlamuleri bya ‘munhu’ kahle eka Xikwembu ni le ka vanhu-kulobye. Leswaku leswi swi tano ku fikela kwihi swi ta vonaka loko bulo ra hina ri ri karhi ri ya emahlweni. Kavula, a hi un’wana ni un’wana ntsena loyi a nga fambaka na Yehova. Hi ndlela yin’wana, lunghelo leri ri hlayiseriwe lava va ‘pfumelelaneke na yena.’ (Amos 3:3) Hi ndlela yihi? Hi ku va lava va endleke ku tinyiketela loku nga hikiwangiki eka Yehova ivi va kombisa leswi hi nkhuvulo wa mati, hi laha swi kombisiweke ha kona eka xihloko lexi hundzeke. Kutani ke, Mikea 6:8 yi vula yini eka vanhu lava?

‘Ku Kombisa Vululami’

4. Entiyisweni, swi vula yini ku “endla le’ŝi lulameke?”

⁴ Xo sungula, ku na xilaveko xo ‘kombisa vululami.’ Tanihi vatirhi-kulorhi va Yehova Xikwembu, hi fanele ku hlayisa ripfalo lerinene. Ku “endla le’ŝi lulameke” entiyisweni swi vula ku endla leswinene, leswi Xikwembu xi swi lavaka eka hina. Leswi swi vula leswaku hi fanele ku hetisisa mindzhwalo ya hina, leyi lowukulu wa kona ku nga ku nyika Yehova ku tinyiketela loku heleleke. (Nahum 1:2) A nga wu amukeli nkwetlembetano. Hi nga ka hi nga swi koti ku tirhela tihosi timbirhi.—1 Vakorinto 10:22; Matewu 6:24.

5. Yesu Kriste u kombise leswaku a a rhandza ku lulama ni ku venga leswo biha hi ndlela yihi?

⁵ Ku tlula kwalaho, leswaku hi “endla le’ŝi lulameke,” hi fanele ‘ku rhandza leswinene ivi hi venga leswo homboloka,’ hi laha Yesu a endleke ha kona. Hikwalaho ka rirhandzu rakwe ra leswo lulama, u tihlayisile a “pfumala nandzu, wo kala xivati, wo hambana ni vadyohi.” (Psalma 45:7; Vaheveru 7:26) Naswona hi mhaka ya leswi Yesu a vengeke leswo biha, a ku ri hi ku kariha loko lulama leswi a xupuleke varhangeri va vukanganyisi ni vamakwanga va vukhongeri va siku rakwe.—Matewu 23:13-36; Yohane 8:44.

6. Ha yini hi fanele ku va ni leswi tlulaka ku pfumela emianakanyweni ntsena leswaku hi fanele ku papalata leswi siveriwaka hikwalaho ka leswi swi biheke?

⁶ Hi laha swi nga voniwaka ha kona eka xikombiso xa Yesu, a swi anelanga ku rhandza ku lulama. Nakambe hi fanele ku venga—ina, ku venga, ku nyenya, ku siringeka, ku va ni ku nyenya loku tiyeke ka—leswo biha. Hikwalaho ka leswi mimboyamelo ya hina yi biheke ku sukela evuhlangini bya hina naswona timbilu ta hina ti kanganyisaka, ti nga ni mano, hi lava leswi tlulaka ku pfumela emianakanyweni ntsena leswaku leswo biha a swi laveki. (Genesa 8:21; Yeremia 17:9) Loko hi nga lwisani ni mimboyamelo ni miringo ya vudyoho hi laha ku tiyeke, hi ta wela eswirimbanini swa yona. Hi fanele ku va ni ku nyenya loku fanaka loku tiyeke ka leswo biha loku Fineas a ku kombiseke loko a tirhise tlhari eka mpatswa lowu hlanganeke evugandzerini lebyo biha bya Baal-Peor.—Tinhlayo 25:5-8.

7. Hi byihi vumbhoni lebyi hi nga na byona bya leswaku Yehova a nga tirhisi van’wana ni van’wana lava va nga lavo biha tanihi vatirhi-kulobye?

⁷ Yehova a nga swi lavi ku tirhisa vanhu vahi ni vahi lavo biha tanihi vatirhi-kulobye naswona a nge va tirhisi. Leswi swi vekiwe erivaleni eka Psalma 50:16-18, laha hi hlayaka: “Kambe Šikwembu ši ku ka lowo biha: Šana-ke hi wena l’a fanelaka ku hlaya milawu ya mina, U v̌a ni ntwanano wa mina e noṅwini wa wena šana? Wena l’a v̌engaka ku layiwa, l’a tšukumetaka marito ya mina e nḍaku ka wena! Loko u v̌ona muyiv̌i, u ranḍana na yena, Kutani ku av̌eriwa ka wena ku na v̌aoŝi.”

8. I mhaka yihi leyi kandziyisaka ndzhukano lowu hi nga wu vangaka hi ku amukela vudyoho?

⁸ Hi nga ha khomeka entirhweni wa Yehova, hi chumayela mahungu lamanene ya Mfumo wa Xikwembu. Kambe loko hi nga tivoneli swinene leswaku hi kombisa ku tikhoma, hi nga ha dyoha hikwalaho ka ku tsana ka nyama ivi hi tisa ndzhukano evitweni ra Yehova. Xisweswo, malembe ma nga ri mangani lama hundzeke nkulu u endle vuoswi ni makwerhu wa xisati wa moya loyi a a ri na nuna la nga pfumeriki. Hi madyambu lawa ku tsemiwa ka khale ka nkulu ku tivisiweke ha wona, nuna la kariheke u nghene eHolweni ya Mfumo a ri ni xibalesa ivi a balesela tihlampfu eka vanhu vambirhi lava nga ni nandzu. Ku hava ni un’we wa vona la dlayiweke, kambe siku leri tlhandlamaka lawa a ma ri mahungu ya tluka ro sungula eka nyuziphepha leyikulu eUnited States! Hakunene, xidyoho xi tisa ndzhukano.—Swivuriso 6:32.

9. Hi ku ya hi Swivuriso 4:23, hi fanele ku hlayisa yini, naswona ha yini?

⁹ Hikwalaho ke, hi laha ku fanelaka, ha tsundzuxiwa: “Hlayisa mbilu ya wena ku tlurisa le’ŝi hlayisiwaka, hikuv̌a i šihlov̌o ša v̌utomi.” (Swivuriso 4:23) Ina, hi fanele ku titshinya malunghana ni leswi hi pfumelelaka timbilu ta hina to fanekisela ku tshama eka swona. Nkarhi na nkarhi, thelevhixini, timagazini ni swivumbeko swin’wana swa mahungu swi kombisa swilo leswi thyakeke, ku katsa ni swifaniso swa vanhu lava nga ambalangiki. Hikwalaho ke, hi fanele ku hlawula swinene ehenhleni ka leswi hi swi hlalelaka, ku swi yingisela ni ku swi hlaya. Ku lawula mianakanyo ka munhu hi xiyexe i ka nkoka! Hi xikombiso, swi nga ha va leswi olovaka ku kuma ntsako hi ku nghenisa miehleketo ya rimbewu emianakanyweni ya hina, swilo leswi a hi nga ta ehleketa ku ringeta ku swi endla evuton’wini bya xiviri. (Matewu 5:28) Kambe hakanyingi ku ehleketa ko tano ku vanga swiendlo leswo biha. Manuku ke, ematshan’wini yo godzomberiwa hi timhaka to tano emiehleketweni, a hi kombiseni muhandzu wa moya lowo kwetsima wa ku tikhoma ivi hi anakanyisisa hi swilo leswi xaxametiweke eka Vafilipiya 4:8.—Vagalatiya 5:22, 23.

“U Ranḍa Tintŝalo”

10, 11. (a) I ku hambana kwihi loku nga endliwaka exikarhi ka ku tshembeka ni vunene? (b) N’wana wa Xikwembu u kombise ku tshembeka ni vunene hi ndlela yihi?

¹⁰ Xilaveko xa vumbirhi lexi boxiweke eka Mikea 6:8 hi leswaku hi “ranḍa tintŝalo.” “Rhandza vunene” i ndlela leyi The New English Bible yi hlayekisaka swona laha. Nhlamuselo leyi nga eka New World Translation Reference Bible yi komba leswaku rito ra Xiheveru leri nge cheʹsedh, leri hundzuluxeriweke va ku “tintswalo,” ri nga tlhela ri hundzuluxeriwa va ku “musa” kumbe “rirhandzu ra leswinene.” Hi ku ya hi vatsari va tidikixinari, “vunene swi vula ku ala loku tiyeke eka ndzingo wihi na wihi wo landzula kumbe ku xenga.” “Vunene byi engetela ehenhla ka ku tshembeka mianakanyo yo lava ku yimela ni ku lwela munhu kumbe xanchumu, hambi ku ri ku lwisana ni mavuthu ya matimba.” Lexi tsakisaka, eMatsalweni hi tlhela hi kuma ku hambananyana ka ku tirhisiwa ka marito lawa. Hi xikombiso, rito leri nge “vunene” a ri tirhisiwi eka swilo leswi nga hanyiki. Kambe rito leri nge “ku tshembeka” ri tirhisiwa hi ku phindha-phindha. Xisweswo, n’weti wu vitaniwa “mboni le’yi nge matilweni yo ṭhembeka.” (Psalma 89:37) Manuku ke, nakambe, marito ya Xikwembu ya vuriwa ya ri lama tshembekaka, hi leswaku, ya ni ntiyiso.a (Nhlavutelo 21:5; 22:6) Hambi swi ri tano, vunene byi nyikiwa Yehova Xikwembu ni malandza ya yena lama amukelekaka ntsena. Hi mfanelo, malunghana na Yehova, ha hlaya: “Lo’nene, u ṅwi endlela v̌unene.”—2 Samuel 22:26.

¹¹ N’wana wa Xikwembu a a ri lonene naswona a a tshembeka eka Yehova ematilweni. Emisaveni, u hlangane ni miringo tanihi munhu Yesu Kriste naswona u kombise hi ku yingisa kakwe leswaku a a ri lonene naswona a a tshembeka tanihi munhu. Leswi swi kombisiwe hi Vaheveru 5:7-9, laha hi hlayaka: “Emasikwini ya yena ya ku hanya la misaveni, Yesu u khongerile ni ku kombela hi ku titsongahata, a huwelela hi matimba ni ku rila hi mihloti, eka Xikwembu lexi a xi ri ni matimba ya ku n’wi ponisa eku feni, kutani u yingisiwile hikwalaho ka xichavo xa yena. Hambi leswi a a ri N’wana wa Xikwembu, u dyondzile ku yingisa hi mhaka ya ku xaniseka ka yena. Kutani loko a endliwile la hetisekeke, u hundzukile xihlovo xa ku ponisiwa loku nga heriki eka hinkwavo lava n’wi yingisaka.”

Miringo Ya Vutshembeki

12. Minkarhi yin’wana, i yini lexi nga ringaka vutshembeki bya hina, naswona van’wana va endlise ku yini eka miringo yo tano?

¹² Vutshembeki eka Yehova Xikwembu byi lava leswaku na hina hi tshembeka eka malandza yakwe emisaveni, Vakriste-kulorhi. Muapostola Yohane u veke leswi erivaleni loko a hi tsundzuxa a ku: “La nga rhandziki makwavo loyi a n’wi vonaka hi mahlo, a nge koti ku rhandza Xikwembu lexi a nga xi voniki.” (1 Yohane 4:20) Ku tsana ka van’wana ku nga ha ringa vutshembeki bya hina emhakeni leyi. Hi xikombiso, loko va dyoheriwile, van’wana va kombise ku tsana eka vutshembeki bya vona enhlengeletanweni ya Yehova hi ku tshika ku ya eminhlanganweni ya Vukriste. Ndzingo wun’wana wa vutshembeki bya hina eka vamakwerhu wa tlhekeka loko lava Yehova a va tirhisaka ku rhangela va hoxisa eku avanyiseni. Nkarhi na nkarhi, swihoxo swo tano swi tirhisiwile hi van’wana tanihi xikhomela-ndhawu xo hlundzuka ni ku tihambanisa ni nhlengeletano ya Yehova leyi vonekaka. Xana xiendlo xa vona xi pfumala nandzu? Nikantsongo!

13. Hikwalaho ka yini ku tihambanisa ni nhlengeletano ya Yehova ku nga ri loku pfumalaka nandzu, naswona hi tihi tindlela leti ti tihumelerisaka eka vanhu vo tano lava nga tshembekiki?

¹³ Ha yini vanhu vo tano va nga pfumali nandzu hi ku sukela nhlengeletano ya Xikwembu? Hikuva Rito ra xona ra hi tiyisekisa: “La’v̌a ranḍaka nawu wa wena [Yehova] v̌a ni ku rula lo’kukulu, a ku na ku khunguv̌anyisa e ka v̌ona.” (Psalma 119:165) Ku tlula kwalaho, hi lerisiwa ku “[tiya] eku rhandzaneni, hikuva rirhandzu ri funengeta swidyoho leswo tala.” (1 Petro 4:8; Swivuriso 10:12) Nakambe, a hi nge munhu a a fanele ku tihambanisa ni vanhu va Yehova. A a ta ya kwihi xana? Xana a nga langutananga ni mphikamakaneta leyi fanaka ni lowu kongomaneke ni vaapostola va Yesu loko a va vutisile loko na vona va lava ku n’wi siya? Muapostola Petro u hlamule kahle a ku: “Hosi, hi nga ya ka mani xana? U ni marito ya vutomi lebyi nga heriki.” (Yohane 6:68) Ku hava kun’wana ko ya kona kambe eka “Babilona Lonkulu,” mfumo wa misava wa vukhongeri byo hemba, kumbe eka minkwetlembetano ya “xivandzana” xa Sathana xa politiki. (Nhlavutelo 13:1; 18:1-5) Ngopfu-ngopfu, lava nga tshembekiki lava tshikeke nhlengeletano ya Yehova leyi vonekaka va nyike xivangelo lexi tolovelekeke eka lava va nga eka “Babilona Lonkulu” la delelaka Xikwembu.

“Famba Hi Ku Tiṭongahata e Mahlweni Ka Šikwembu Ša Wena”

14, 15. (a) I tinhlamuselo tihi leti rito ra Xinghezi leri nge “ku tiṭongahata” ri nga na tona? (b) Hi yihi nhlamuselo ya “ku tiṭongahata” leyi hi yi khathalelaka laha, naswona hikwalaho ka swivangelo swihi? (c) Ha yini Vakriste va fanele ‘ku veka ndzinganyeto lowu ringaniselaka ehenhleni ka vuswikoti ni mfanelo ya vona?’

¹⁴ Rito ra Xinghezi leri nge “ku titsongahata” ri na tinhlamuselo to hlayanyana. Ri nga ha kombetela eka leswi swi nga kanganyisiki, “mpimo lowu hikiweke, ntsengo, kumbe nxaxamelo.” Kumbe ri nga ha va na nhlamuselo ya ku tenga, ‘ku xiya ku faneleka ka mpahla ni mahanyelo.’ (1 Timotiya 2:9) Manuku ku na nhlamuselo ya “ku tiṭongahata” leyi ngopfu-ngopfu hi yi khathalelaka, hi leswaku, ku xiya mindzilakana ya munhu kumbe “ku veka ndzinganyeto lowu ringaniselaka ehenhleni ka vuswikoti bya munhu kumbe mfanelo.” Hi nga ka hi nga vi un’wana wa vatirhi-kulorhi va Yehova loko hi ri na mianakanyo leyi tlakukeke ngopfu hi hina, hi yisa mianakanyo eka hina ematshan’wini yo yisa mianakanyo leyikulu eka Yehova Xikwembu.

¹⁵ ‘Ku veka ndzinganyeto lowu ringaniselaka ehenhleni ka vuswikoti kumbe mfanelo ya hina’ i nhlamuselo leyi nga erivaleni leyi hi faneleke ku yi hlanganisa ni rito ra Xiheveru leri hundzuluxeriweke va ku “ku tiṭongahata” eka Mikea 6:8. Leswi swa vonaka eka ndlela leyi rito ri tirhisiweke ha yona eku humeleleni ka rona kun’wana kun’we eMatsalweni ya Xiheveru. Eka Swivuriso 11:2 ri hambanisiwile hayi ni ku thyaka ka rimbewu kambe ni ku tikukumuxa, loku vaka kona hi ku ehleketa ngopfu hi munhu hi yexe. Kona ha hlaya: “Loko ku humelela ku tikukumuša, hi laha tingana ti humaka kona, kambe v̌utlhari byi le ka la’v̌a tiṭongahataka.” Ku va la titsongahataka ku fambisana ni ku va ni ku chava ka Yehova, loku na kona ku fambisanaka ni vutlhari. (Psalma 111:10) Munhu loyi a titsongahataka u na ku chava ka Yehova hikuva u vona ku hambana lokukulu loku nga kona exikarhi ka yena na Xikwembu, exikarhi ka mimpimanyeto ni matimba ya Yehova ni ku nga hetiseki ni ku tsana ka yena n’wini. Hikwalaho ke, munhu la titsongahataka u tirhela ku ponisiwa ka yena hi ku chava ni ku rhurhumela.—Vafilipiya 2:12.

16. Hi wahi matsalwa man’wana lama kombaka mhaka leyi Vakriste va faneleke ku titsongahata ha yona?

¹⁶ Ku na swivangelo swo tala ngopfu leswi vatirhi-kulobye va Yehova va faneleke ku titsongahata ha swona! Ku nga khathariseki vutlhari lebyi hi nga ha vaka hi ri na byona, matimba ya nyama lama hi nga ha vaka hi ambexiwe wona, kumbe leswaku i rifuwo ro tanihi kwihi ra nyama leri hi nga ha vaka na rona, hi hava swisekelo swo tinyungubyisa. (Yeremia 9:23) Ha yini hi nga fanelanga? Hikwalaho ka nawu lowu andlariweke eka 1 Vakorinto 4:7 leyi nge: “Hikuva i mani la ku tlakuseke ku tlula van’wana? Xana u na yini lexi u nga nyikiwangiki? Kutani loko u nyikiwile, hikwalaho ka yini u tidzunisa, wonge hi loko u nga swi kumanga hi ku nyikiwa xana?” Nakambe hi hava xivangelo xihi na xihi xo tinyungubyisa hikwalaho ka mihandzu ya vutirheli bya hina, hikuva hi hlaya yini eka 1 Vakorinto 3:6, 7 ke? Kwalaho Pawulo u te: “Mina ndzi byarile, Apolosi u cheletile, kambe Xikwembu hi xona xi miriseke. Hikokwalaho, loyi a byalaka a hi nchumu, hambi loyi a cheletaka, kambe i Xikwembu, hikuva hi xona xi mirisaka.” Marito ya Yesu eka Luka 17:10 na wona ma fanele ku hi pfuna ku titsongahata, hikuva u te: “Hi mukhuva wolowo, na n’wina, loko mi hetile hinkwaswo leswi mi lerisiweke swona, vulani mi ku: ‘Hi malandza lama nga faneriki ku nkhensiwa, hi endlile ntsena leswi a hi fanela ku swi endla.’”

17. Ha yini ku titsongahata hakunene ku ri ndlela ya vutlhari?

¹⁷ Ku va la titsongahataka hakunene i ndlela ya vutlhari. Vutitsongahati byi hi pfuna ku aneriseka kwihi na kwihi laha hi nga ni lunghelo ro tirhela kona. Loko hi titsongahata, hi nga ka hi nga ringeti ku vangama hi ku navela kambe hi ta anerisekela ku hanya tanihi ‘lavantsongo.’ (Luka 9:48) Manuku ke, nakambe, hi ta va na langutelo ra mupisalema, loyi a nga te: “Hikuv̌a e ku ṭhama siku riṅwe e ndlwini ya wena, ŝi tlula khume ra maḍana e kuṅwana. Nḍi ranḍa e ku ṭhama erikupakupeni ra yindlu ya Šikwembu šanga, ku tlula ku ṭhama e miṭongeni ya lav̌o biha.” (Psalma 84:10) Ku tlula kwalaho, loko hi titsongahata, hi ta va ni rirhandzu leri nga ta hi susumetela ku va vo sungula eku kombiseni ka ku xixima eka van’wana.—Varhoma 12:10.

Vutitsongahati Eka Vantshwa

18. (a) Hikwalaho ka yini vutitsongahati ngopfu-ngopfu byi fanela eka vantshwa? (b) Xilaveko xa vutitsongahati xi tiyisiwe hi rhekhodo yihi leyi katsaka vantshwa va manguva lawa?

¹⁸ Ngopfu-ngopfu swa fanela leswaku vantshwa va Vukriste va tiambexa nguvu ya vutitsongahati. Mayana xikombiso lexinene lexi Elihu a va vekeleke xona! Hambi leswi a a ri na tinhlamulo letinene, a a tsakela ku rindza hi ku xixima ku kondza loko vakulukumba va vulavurile. (Yobo 32:6, 7) Hakanyingi, vantshwa va hatlisela ku titwa va titshemba, ku khathalela mindzilakana ya vona kantsongo. Hikwalaho ka leswi va nga ni matimba ya nyama naswona va kumeke vutivi byo karhi, va nga ha voyamela eku languteleni ka vakulu va vona ehansi. Kambe vutivi a byi fani na vutlhari, lebyi ku nga ku tirhisiwa ka vutivi. Xikombiso i rhekhodo leyi khomisaka tingana leyi vantshwa va manguva lawa va yi endlaka eUnited States. Kona, 63 wa tiphesente ta lava khomeriwaka vugevenga lebyikulu ti katsa vantshwa lava fikaka eka 24 wa malembe hi vukhale, ni 30 wa tiphesente ta lava khomiwaka va ri va lava va nga ehansi ka 18 wa malembe hi vukhale. Nakambe ku vikiwe leswaku “Ku chayela va pyopyiwile kumbe va ri ni swidzidzirisi i xivangelo lexikulu xa rifu exikarhi ka Maamerika lama nga ni malembe ya 15-24.” Etikweni rero, “vukati byo tala bya vantshwa byi hetelela hi ku dlaya vukati,” kasi ku vikiwe leswaku “vukati byi nga ha teka nkarhi wo leha loko muteki ni mutekiwa va ri ni malembe ma nga ri mangani ya vutlhari endzhaku ka vona loko va ya ealtarini.”

19. Hi yihi ndzayo ya Matsalwa leyi vantshwa va endlaka kahle ku yi nghenisa etimbilwini?

¹⁹ Manuku ke, i ya vutlhari swonghasi ndzayo ya Rito ra Xikwembu! Hi laha ku fanelaka, yi letela vantshwa ku xixima tata wa vona ni mana wa vona, va va yingisa eka hinkwaswo. (Vaefesa 6:1-3; Vakolosa 3:20) Ngopfu-ngopfu vantshwa va fanele ku nghenisa ndzayo leyi ya vutlhari etimbilwini: “Ṭhemba Yehova hi mbilu ya wena hikwayo, u nga tiṭhembi ku tlhariha ka wena. U ṅwi nghenisa e makungwini ya wena hikwawo, O ta lulamisa tindlela ta wena.”—Swivuriso 3:5, 6.

20. Hi tihi tihakelo leti vanhu hinkwavo lava tinyiketeke ni ku khuvuriwa va nga tilangutelaka loko va hlayisa Mikea 6:8?

²⁰ Hi tihi tihakelo leti hinkwerhu ka hina hi nga ti langutelaka loko, endzhaku ko kombisa ku tshemba Yehova hi ku tirhisa ku tinyiketa ni nkhuvulo wa mati, hi ‘kombisa vululami, hi kombisa rirhandzu leri tshembekaka ni ku famba hi ku titsongahata emahlweni ka Xikwembu xa hina?’ Xa nkoka eka hinkwaswo, hi ta amukeriwa hi Yehova hikwalaho ka ku fikelela swilaveko swakwe naswona xisweswo hi ta tsakisa mbilu ya yena hi ku hlanganyela eku kwetsimisiweni ka vito rakwe lerikulu ni leri chavisaka. (Swivuriso 27:11) Ku tlula kwalaho, evuton’wini bya hina vini hi ta xiya ntiyiso wa nawu lowu nge “vukhongeri byi pfuna hi matlhelo hinkwawo, naswona byi tshembisa vutomi bya nkarhi lowu, ni bya lowu taka.”—1 Timotiya 4:8.

[Nhlamuselo ya le hansi]

Tinhlamulo Ta Wena Hi Tihi?

◻ Ku pfumelelana na Mikea 6:8, i yini lexi lavekaka ku “endla le’ŝi lulameke?”

◻ Hi byihi vumbhoni lebyi vutshembeki eka Yehova byi nga na byona eka vuxaka bya hina ni Vakriste-kulorhi?

◻ Ha yini hi fanele ku ‘titsongahata loko hi famba ni Xikwembu?’

◻ Ha yini vutshembeki ngopfu-ngopfu byi fanela vantshwa va Vukriste?

[Xifaniso lexi nga eka tluka 17]

Xana u hlayisa mbilu ya wena hi ku va loyi a hlawulaka ehenhleni ka leswi u swi hlalelaka, leswi u swi yingiselaka ni ku swi hlaya?

[Xifaniso lexi nga eka tluka 18]

Petro u swi tivile leswaku a ku ri hava ka ku ya kona hikuva Yesu a a ri ni “marito ya vutomi lebyi nga heriki.” Xana u tiyimisele ku tshama u tshembekile eka nhlengeletano ya Yehova?