Ndzayo Leyi Nga Vekaka Mihandzu Ya Ku Rhula

“Hikuva ku laya hinkwako, ku vonaka ku ri loku vavisaka enkarhini wolowo, loku nga tsakisiki, kambe endzhaku, ku veka mihandzu ya ku rhula ya vutomi lebyo lulama, eka lava va dyondzisiweke hi kona.”—VAHEVERU 12:11.

1, 2. (a) Hi ku ya hi Vaheveru 12:9-11, i yini lexi Xikwembu hi rirhandzu xi xi nyikelaka? (b) Hi xihi xikombiso xin’wana xa ku laya, naswona i yini lexi nga vangiwaka hi leswi?

EHLEKETA endzhaku emasikwini ya vuhlangi bya wena. Xana u nga tsundzuka loko vatswari va wena va ku laya? Vo tala va hina hi nga tsundzuka. Muapostola Pawulo u tirhise sweswo tanihi xikombiso loko a vulavula hi ndzayo leyi humaka eka Xikwembu, hi laha hi hlayaka ha kona eka Vaheveru 12:9-11.

² Ndzayo ya Xikwembu yo fana ni ya tatana, leyi nga khumbaka vutomi bya hina bya moya, yi nga ha va hi swivumbeko swo tala. Xin’wana i lunghiselelo ra xona ro susa munhu loyi a nga ha laviki ku hanya hi mimpimanyeto ya Xikwembu, kumbe loyi a alaka ku endla tano ebandlheni ra Vukriste. Munhu loyi xisweswo a xupuriweke swinene kumbe a tshinyiweke a nga ha tisola ni ku hundzuka. Nakambe, lava tshembekaka xisweswo va layiwa hi leswi va dyondzaka nkoka wa ku landzelela mimpimanyeto leyi tlakukeke ya Xikwembu.—1 Timotiya 1:20.

3. Xana van’wana va yi languta njhani mianakanyo ya ku susa?

³ ‘Kambe,’ un’wana a nga ha vutisa, ‘a swi vavisi xana ku hlongola ivi u tlhela u ala ku vulavula na munhu loyi a hlongoriweke?’ Langutelo ro tano ri humelerisiwile eka nandzu wa sweswinyana lowu katsaka wansati loyi a kurisiweke hi vatswari lava a va ri Timbhoni ta Yehova. Vatswari va yena a va tsemiwile. Yena a a nga susiwanga, kambe u tihambanisile hi ku tirhandzela hi ku tsala papila a suka ebandlheni. Hi mfanelo, bandlha ri tivisiwile leswaku a a nga ha ri un’wana wa Timbhoni ta Yehova. U sukile a ya ekule, kambe endzhakunyana ka malembe a vuya kutani a kuma leswaku Timbhoni ta kwalaho a ti nga ta vulavula na yena. Kutani hi loko a teka mhaka a yi yisa ehubyeni. Vuyelo ku ve byihi, naswona leswi a swi ta ku khumbisa ku yini xana? Leswaku hi twisisa mhaka leyi kahle, a hi voneni leswi Bibele yi swi vulaka malunghana ni mhaka leyi yelanaka ya ku susa.

Ha Yini Ku Va Ni Xiyimo Lexi Xi Tiyeke?

4. Ku humelela yini hakanyingi eka van’wana ebandlheni? (Vagalatiya 6:1; Yuda 23)

⁴ Vakriste vo tala va ntiyiso va seketela Xikwembu ni milawu ya xona leyo lulama hi ku tshembeka. (1 Vatesalonika 1:2-7; Vaheveru 6:10) Hambi swi ri tano, hakanyingi, munhu wa hambuka endleleni ya ntiyiso. Hi xikombiso, ku nga khathariseki mpfuno wa vakulu, hi ku pfumala ku hundzuka a nga ha tlula nawu wa Xikwembu. Kumbe a nga ha ala ripfumelo hi ku dyondzisa dyondzo ya mavunwa kumbe hi ku tihambanisa ni bandlha. Manuku i yini lexi faneleke ku endliwa xana? Swilo swo tano swi humelerile ni loko vaapostola va ha hanya; kutani ke, a hi voneni leswi va swi tsaleke malunghana ni leswi.

5, 6. (a) Hi na ndzayo yihi ya vutlhari ehenhleni ko hanyisana ni lava va endlaka swidyoho leswikulu naswona va nga hundzuki? (Matewu 18:17) (b) Hi kongomane ni swivutiso swihi xana?

⁵ Loko munhu eKorinto a tikhome hi ndlela leyo biha handle ko hundzuka, Pawulo u byele bandlha a ku: “Mi nga tolovelani ni loyi a vuriwaka ‘makwerhu’ kasi i muoswi, kumbe i munhu wa makwanga, kumbe i muphahli wa swikwembu swa hava, kumbe i murhukani, kumbe i xidakwa, kumbe i muxisi, munhu lowo tano, hambi ku ri ku dya mi nga dyi na yena.” (1 Vakorinto 5:11-13) Sweswo a swi ta humelela eka vagwinehi, vo tanihi Himenayo: “Munhu loyi a vangaka ku hambana, n’wi tshinye kan’we, kumbe kambirhi, kutani u nga ha vi na mhaka na yena, hikuva wa swi tiva leswaku munhu lowo tano u onhakile, kutani swidyoho swa yena swi komba leswaku u humile endleleni.” (Tito 3:10, 11; 1 Timotiya 1:19, 20) Nakambe, ku papalata ko tano a ku ta fanela eka mani na mani la sukelaka bandlha: “Va sukile va hi siya, kambe a va nga ri va hina, hikuva loko a va ri va ka hina, ingi va ha ri na hina ni sweswi; kambe va sukile, leswaku swi ta vonaka swinene leswaku hinkwavo a hi va hina.”—1 Yohane 2:18, 19.

⁶ Hi ku tiyiseka, munhu wo tano u ta hundzuka leswaku a ta amukeriwa nakambe. (Mintirho 3:19) Kambe sweswi, xana Vakriste va nga ha va na vuxaka lebyi ringaniseriweke na yena, kumbe swa fanela ku n’wi papalata hi laha ku heleleke? Loko swi ri tano, hikwalaho ka yini?

Ku Susa Hi Ku Helela?

7. Hanyelo ra hina ri hambanisa ku yini eka mintlawa mimbirhi ya vadyohi xana?

⁷ Vakriste a va tihambanisi na vanhu. Hi na ku hlangana loku tolovelekeke na vaakelani, vatirhi-kulorhi, vadyondzi-kulorhi ni van’wana, naswona hi nyikela vumbhoni eka vona hambi loko van’wana va ri ‘vaoswi, vanhu va makwanga, vaxisi, kumbe lava phahlaka swikwembu swa hava.’ Pawulo u tsale leswaku a hi nge va papalati hi ku helela, ‘handle ka swona a hi ta fanela ku suka emisaveni.’ Hambi swi ri tano, u kombise leswaku a ku ta va na ku hambana, eka “makwerhu” loyi a hanyisaka sweswo: “Mi nga tolovelani ni loyi a vuriwaka ‘makwerhu’ [loyi a tlheleleke eka tindlela to tano], hambi ku ri ku dya mi nga dyi na yena.”—1 Vakorinto 5:9-11; Marka 2:13-17.

8. Muapostola Yohane u nyike xitsundzuxo xihi emhakeni ya ku papalata?

⁸ Eka matsalwa ya muapostola Yohane, hi kuma ndzayo leyi fanaka leyi tshikilelaka ndlela leyi ha yona Vakriste va nga papalataka vanhu vo tano hi ku helela: “Un’wana ni un’wana loyi a yaka emahlweni ni swa yena a nga tiyiseli edyondzweni ya Kriste, a nga na Xikwembu . . . Loko ku ta munhu eka n’wina kambe a nga tisi dyondzo leyi, mi nga n’wi amukeli endlwini ya n’wina kumbe ku n’wi xeweta; hikuva loyi a n’wi xewetaka [Xigriki, khaiʹro] u twanana ni mintirho ya yena leyo biha.”a—2 Yohane 9-11.

9, 10. (a) I yini lexi humeleleke eka vatluli va nawu lava nga hundzukiki eIsrayele, naswona ha yini? (b) Hi fanele hi titwisa ku yini hi lunghiselelo leri ro hanyisana ni vanhu lava hlongoriweke hikwalaho ka xidyoho lexi nga hava ku hundzuka namuntlha? (2 Petro 2:20-22)

⁹ Ha yini ku tiya ko tano ku fanerile hambi ku ri namuntlha? Kutani ke, tsundzuka ku susiwa loku chavisaka loku lerisiweke eNawini wa Xikwembu eka Israyele. Eka timhaka ta nkoka to hambana-hambana, lava tlulaka nawu hi vomu a va dlayiwa. (Levitika 20:10; Tinhlayo 15:30, 31) Loko sweswo swi humelela, van’wana, hambi ku ri maxaka, a va nga ha ta vulavula ni mutluli wa nawu loyi a feke. (Levitika 19:1-4; Deuteronoma 13:1-5; 17:1-7) Hambi leswi Vaisrayele lava tshembekaka le ndzhaku a va ri vanhu lava tolovelekeke lava nga na mintlhaveko yo fana ni ya hina, a va swi tiva leswaku Xikwembu xi lulamile naswona xi na rirhandzu ni leswaku Nawu wa xona a wu sirheleta ku basa ka vona ka mahanyelo ni ka moya. Kutani a va ta pfumela leswaku lunghiselelo ra xona ra ku susa vadyohi a ku ri mhaka leyinene ni leyo lulama hakunene.—Yobo 34:10-12.

¹⁰ Hi nga tiyiseka leswaku lunghiselelo ra Xikwembu ra leswaku Vakriste va ala ku endla vuxaka ni munhu loyi a hlongoriweke hikwalaho ko ka a nga hundzuki exidyohweni i nsirhelelo wa vutlhari eka hina: “Cukumetani comela xa khale, leswaku mi ta va mbila leyintshwa. Mhaka ya kona hi leswaku a ma ha ri na comela.” (1 Vakorinto 5:7) Hi ku papalata ni vanhu lava tihambaniseke hi vomu, Vakriste va sirheletiwa eka malangutelo yo xopa swihoxo, yo pfumala ku tlangela, kumbe hambi ku ri ya vugwinehi.—Vaheveru 12:15, 16.

Ku Vuriwa Yini Hi Maxaka?

11, 12. (a) A swi vula yini eka maxaka ya Vaisrayele loko mudyohi a tsemiwile xana? (b) Kombisa mimpfuno ya ku yingisa.

¹¹ Xikwembu xa swi vona hakunene leswaku ku hetisisa milawu ya xona leyo lulama malunghana na ku susa vadyohi hakanyingi swi katsa ni ku khumba maxaka. Tanihi leswi swi vuriweke laha henhla, loko mudyohi wa Muisrayele a dlayiwa, ku hlangana ka ndyangu a ku nga ha koteki. Entiyisweni, loko n’wana wa jaha a ri xidakwa naswona a ri na makolo, vatswari va yena a va ta n’wi yisa emahlweni ka vaavanyisi, kutani loko a nga hundzuki, vatswari a va fanele ku hlanganyela eku n’wi dlayeni, ‘ku susa leswo biha exikarhi ka Israyele.’ (Deuteronoma 21:18-21) U nga swi vona leswaku leswi a swi nga ta olova eka vona. Nakambe, ehleketa, ndlela leyi vamakwavo va xinuna ni va xisati, kumbe vakokwa wa mudyohi va titweke ha yona. Kambe, ku rhangisa ku tshembeka ka vona eka Xikwembu xa vona xo lulama emahlweni ka rirhandzu ra ndyangu a ku ta ponisa vutomi eka vona.

¹² Tsundzuka mhaka ya Kore, murhangeri eku xandzukeriweni ka vurhangeri bya Xikwembu ha Muxe. Hi ku lulama ka yena loku heleleke, Yehova u vone leswaku Kore u fanele ku fa. Kambe vatshembeki hinkwavo va tsundzuxiwile: “Kendlukelani miṭonga ya la’v̌o biha lav̌a, mi nga khumbi ntšhumu e ka le’ŝi nga ŝa v̌ona, mi tšhav̌a ku lov̌a hikwalaho ka ŝidyoho hikwaŝo ŝa v̌ona.” Maxaka lama nga yingisangiki xitsundzuxo xa Xikwembu ya love ni vaxandzuki. Kambe man’wana ya maxaka ya Kore hi vutlhari ya hlawule ku tshembeka eka Yehova, leswi poniseke vutomi bya vona kutani swi va yisa eka minkateko ya nkarhi lowu taka.—Tinhlayo 16:16-33; 26:9-11; 2 Tikronika 20:19.

13. Xana Vakriste lava tshembekaka va ta endlisa ku yini loko xirho xa ndyangu xa le kusuhi xi susiwile kumbe xi tihambanisa ni bandlha?

¹³ Ku susiwa ebandlheni ra Vukriste a swi katsi rifu ra xihatla, kutani vuxaka bya ndyangu byi ya emahlweni. Xisweswo, wanuna loyi a tsemiweke kumbe ku tihambanisa a nga ha va a tshama ekaya ni nsati wa yena wa Mukriste ni vana lava tshembekaka. Ku xixima ku avanyisa ka Xikwembu ni xiendlo xa bandlha swi ta susumetela wansati ni vana ku twisisa leswaku hi ndlela ya yena, u dlaye vuxaka bya moya lebyi a byi ri kona exikarhi ka vona. Kambe ke, tanihi leswi ku susiwa ka yena ku nga herisiki vuxaka bya vona bya ngati kumbe vuxaka bya vukati, ku hanyisana loku tolovelekeke ka ndyangu ni ku rhandzana swi nga ya emahlweni.

14. I xitsundzuxo xihi xa le tilweni lexi faneleke ku susumeta ku hlangana ka hina ni xaka leri susiweke kumbe leri tihambaniseke leri tshamaka ehandle ka ndyangu wa ka hina lowu hlanganeke?

¹⁴ Xiyimo xa hambana loko loyi a susiweke kumbe loyi a tihambaniseke a ri xaka leri tshamaka ehandle ka ndyangu lowu hlanganeke ni kaya. Swi nga ha koteka ku nga vi na ku hlangana hi ku helela ni xaka rero. Hambi loko a ku ri na timhaka ta ndyangu leti lavaka ku hlangananyana, leswi hakunene a swi nga ta endliwa mukhuva, hi ku fambisana ni nawu wa Xikwembu: “Mi nga tolovelani ni loyi a vuriwaka ‘makwerhu’ kasi i muoswi, kumbe munhu wa makwanga [kumbe a ri na nandzu wun’wana wa xidyoho lexikulu], . . . hambi ku ri ku dya mi nga dyi na yena.”—1 Vakorinto 5:11.

15. Maxaka ya nga wu lawurisa ku yini nkucetelo wa mintlhaveko etimhakeni to tano xana? (Psalma 15:1-5; Marka 10:29, 30)

¹⁵ Hi laha ku twisisekaka, leswi swi nga ha nonon’hwa hikwalaho ka mintlhaveko ni vuxaka bya ndyangu, byo fana na rirhandzu ra vakokwana eka vatukulu va vona. Hambi swi ri tano, lowu i ndzingo wa ku tshembeka eka Xikwembu, hi laha swi vuriweke ha kona hi makwerhu wa xisati loyi a tshahiweke eka tluka 26. Un’wana ni un’wana loyi a nga ni gome ni ku twa ku vava loku vangiweke hi xaka leri susiweke a nga chaveleriwa ni ku khutaziwa hi xikombiso lexi vekiweke hi van’wana va maxaka ya Kore.—Psalma 84:10-12.b

Xiboho Xa Huvo

16-18. I xiboho xihi lexi endliweke eka nandzu lowu vuriweke eku sunguleni, naswona i mianakanyo yihi leyi engetelekeke leyi huvo yi yi nyikeleke xana?

¹⁶ U nga ha lava ku tiva makumu ya nandzu lowu katsaka wansati loyi a a hlundzukile hi mhaka ya leswi khale ka vanghana va yena a va nga ha ta vulavula na yena endzhaku ka ku hlawula ku sukela ripfumelo, a tihambanisa ni bandlha.

¹⁷ Emahlweni ka ku tenga nandzu, handle ko ba mariri huvo ya nkonaniso ya muganga yi n’wi avanyisile. Ku avanyisa koloko a ku seketeriwe emianakanyweni ya leswaku tihuvo a ti ngheneleli etimhakeni ta kereke to tshinya. U endle xikombelo. Ku avanyisa loku fanaka ka huvo ya swikombeloc a ku seketeriwe eswisekelweni leswikulu swa malunghelo ya Ndzulamiso wo Sungula (wa Buku ya Milawu ya U.S.): “Hikuva xiendlo xa ku papalata i xiphemu xa ripfumelo ra Timbhoni ta Yehova, hi kuma leswaku lunghiselelo ra ‘ntshunxeko’ eBukwini ya Milawu ya le United States . . . ri [n’wi] sivela ku hlula. Valumbetiwa va ni lunghelo leri sirheletiweke hi nawu ro hlanganyela eka xiendlo xa ku papalata. Hi mfanelo, hi seketela” ku avanyisa ko sungula ka huvo ya muganga.

¹⁸ Mianakanyo ya huvo yi ye emahlweni yi ku: “Ku papalata [ku susa] i xiendlo lexi xi endliwaka hi Timbhoni ta Yehova hi ku ya hi nhlamuselo ya vona ya tsalwa ra Bibele, naswona a hi pfumeleriwi ku tlhela hi hlamusela tsalwa rero . . . Valumbetiwa va ni mfanelo yo tirhisa leswi va swi pfumelaka hi tlhelo ra vukhongeri hi ku ntshunxeka . . . Tihuvo kahle-kahle a ti ngheneleli ngopfu eka vuxaka bya swirho (kumbe khale ka swirho) swa kereke. Tikereke ti nyikiwe ntshunxeko lowukulu loko ti nyikela ndzayo eka swirho kumbe khale ka swirho. Hi pfumelelana na langutelo ra Justice Jackson [khale ka Huvo-nkulu ya U.S.] ra leswaku ‘mintirho ya [v]ukhongeri leyi khumbaka swirho swa ripfumelo ntsena yi ntshunxekile naswona yi fanele ku ntshunxeka—yi ntshunxeka hi ku helela.’ . . . Swirho swa kereke leyi [a] kunguhateke ku yi tshika swi endle makumu ya leswaku a swa ha lavi ku tihlanganisa na yena. Hi yima hi rito ra leswaku va ntshunxekile ku endla ku hlawula koloko.”

19, 20. Ha yini munhu la susiweke ebandlheni a nga ri eka xiyimo xo hlakarhela eka timbanga ehubyeni?

¹⁹ Huvo yi xiye leswaku hambi loko wansati a twe ku vava hikwalaho ka leswi khale ka vanghana va yena va hlawuleke ku ka va nga ha buli na yena, “ku n’wi pfumelela leswaku a hlakarhela eku vavisekeni lokukulu kumbe eku vavisekeni ka mintlhaveko a ku ta sivela Timbhoni ta Yehova ku tirhisa vukhongeri hi ku ntshunxeka swi nga fanelanga . . . Mpfumelelo lowu tiyisiweke hi nawu wa ku fambisa vukhongeri hi ku ntshunxeka wu lava leswaku vandla ri pfumelela muxaka wa ku vaviseka loku [a] ku tweke tanihi nxavo lowu faneleke ku wu hakela ku sirheleta mfanelo ya ku hambana ka vukhongeri leyi tsakeriwaka hi vaaki hinkwavo.” Entiyisweni, kungu leri ri amukele ntikelo lowukulu swinene ku sukela loko ri andlariwile. Njhani? Endzhaku wansati u kombele huvo leyi tlakukeke swinene ya tiko ku twa nandzu ivi loko swi koteka yi herisa xiboho lexi lwisanaka na yena. Kambe hi November 1987, Huvo-nkulu ya United States yi arile ku endla tano.

²⁰ Kutani, mhaka leyi ya nkoka yi tiyise leswaku munhu la susiweke kumbe la tihambaniseke a nga ka a nga hlakarheli eku vavisekeni loku humaka eka Timbhoni ta Yehova eka huvo ya nawu hikwalaho ka ku papalatiwa.d Tanihi leswi bandlha a ri amukela vukongomisi lebyi hetisekeke lebyi hinkwerhu ka hina hi nga byi hlayaka eRitweni ra Xikwembu ni ku byi tirhisa, munhu u twa ku lahlekeriwa loku tisiweke hi swiendlo swa yena n’wini.

Ndzayo—Vo Tala Va Vuyeriwa

21. Ha yini ku ringanisela swi laveka eku languteni ka ku susa xana?

²¹ Van’wana va le handle, loko va twa hi ku susa, va tala ku rila ni mudyohi loyi a nga ha swi kotiki ku vulavula ni swirho swa bandlha ra Vukriste. Kambe xana ntwelo-vusiwana wo tano a wu hoxanga ke? Languta ku vuyeriwa lokukulu loku mudyohi ni van’wana va nga ha ku kumaka.

22, 23. Kombisa nkoka ni ntikelo wa ku yingisa Xikwembu hikwalaho ka vanhu lava susiweke.

²² Hi xikombiso, eka tluka 26 hi xiye leswi Lynette a swi vuleke malunghana na ku hlawula ka yena ‘ku tisusa hi ku helela eku hlanganyeleni hinkwako’ ni makwavo wa xisati loyi a susiweke Margaret. Yena ni maxaka ya yena ya Vukriste ‘a va tshemba leswaku ndlela ya Yehova hi yona yo antswa.’ Naswona ya antswa!

²³ Makwavo wa Lynette wa xisati endzhakunyana u n’wi byerile a ku: ‘Loko ku susa a wu ku languta hi ku vevuka, ndza swi tiva leswaku a ndzi ta va ndzi nga si ri teka goza ro tlheriseriwa hi xihatla tanihi leswi ndzi endliseke swona. Ku va ndzi susiwe hi ku helela eka varhandziwa ni le ku hlanganeni na bandlha swi vumbe ku navela lokukulu ka leswaku ndzi hundzuka. Ndzi swi vonile leswaku ndlela ya mina a yi hoxe ku fika kwihi ni ndlela leyi ku tlhelela eka Yehova a swi ri swa nkoka ha yona.’

24. Endlelo ra makwerhu un’wana wa xisati ri khumbe yena ni van’wana hi ndlela yihi?

²⁴ Eka mhaka yin’wana, vatswari va Laurie va susiwile. Kambe u ri: ‘Vuxaka bya mina na vona a byi yimanga kambe byi kurile. Hi ku famba ka nkarhi, a ndzi ya ndzi tsana. Ndzi fikela laha ndzi nga ha yiki ni le minhlanganweni.’ Kutani u hlaye mhaka leyi nga eka Xihondzo xo Rindza xa February 1 na March 1, 1982, leyi yi tshikileleke ndzayo ya 1 Vakorinto 5:11-13 na 2 Yohane 9-11. “A swi fana ni loko rivoni ri kombeteriwe eka mina,” ku tsala yena. ‘A ndzi swi tiva leswaku ndzi fanele ku endla ku cinca ko karhi. Sweswi ndzi yi twisisa ku antswa nhlamuselo ya Matewu 10:34-36. Kungu ra mina a ri nga wu oloveli ndyangu wa mina ku ri amukela, hikuva n’wana wa mina wa ntlhanu wa malembe, hi yena mufana a ri yexe, naswona va n’wi rhandza swinene.’ Ku tshembiwa leswaku ku lahlekeriwa hi vuxaka byo tano ku ta khumba mbilu ya vatswari, tanihi laha swi endlekeke ha kona eka Margaret. Hambi swi ri tano, ndzayo leyi katsekaka yi n’wi pfunile Laurie: ‘Ndzi vuyile evutirhelini bya nsimu nakambe. Vukati ni ndyangu wa mina swi tiyile hikwalaho ka ku cinca ka mina, kutani na mina ndzi tiyile.’

25. I langutelo rihi leri munhu la vuyiseriweke a veke na rona malunghana ni ndzayo ya Xikwembu?

²⁵ Kumbe vona ku titwa ka un’wana loyi a a susiwile ivi endzhaku a tlheriseriwa. Sandi u tsarile: ‘Ndzi tsakela ku mi nkhensa hikwalaho ka swihloko leswi pfunaka ni ku dyondzisa kahle [leswi vuriweke laha henhla] ehenhleni ka ku sola ni ku susa. Ndzi tsakile hi leswi Yehova a rhandzaka vanhu va yena swinene ku vona leswaku nhlengeletano ya yena yi tshama yi basile. Leswi swi nga ha vonakaka swi nonon’hwa eka lava nge handle swa laveka naswona hakunene i xilo xa rirhandzu ku xi endla. Ndza nkhensa swinene hikuva Tata wa hina wa le matilweni i Xikwembu lexi nga na rirhandzu ni lexi rivalelaka.’

26. Xana i mihandzu yihi yo lulama leyi nga tisiwaka hi ku amukela ndzayo? (Psalma 94:10, 12)

²⁶ Kutani Xikwembu xa hina lexi lavaka leswaku mudyohi loyi a nga hundzukiki a hlongoriwa ebandlheni nakambe hi rirhandzu xi kombisa leswaku mudyohi a nga tlheriseriwa ebandlheni loko a tisola ivi a hundzuka. (Munhu loyi a tihambaniseke hi ku fanana a nga kombela ku tlhela a va xiyenge xa bandlha.) Endzhaku a nga chaveleriwa hi Vakriste lava nga ta tiyisa rirhandzu ra vona eka yena. (2 Vakorinto 2:5-11; 7:8-13) Entiyisweni, swi tanihi laha Pawulo a tsaleke ha kona a ku: “Hikuva ku laya hinkwako, ku vonaka ku ri loku vavisaka enkarhinyana wolowo, loku nga tsakisiki, kambe endzhaku, ku veka mihandzu ya ku rhula ya vutomi lebyo lulama, eka lava va dyondzisiweke hi kona.”—Vaheveru 12:11.

[Tinhlamuselo ta le hansi]

Tinhla To Ti Tsundzuka

◻ Ku susa ku nga va xivumbeko xa ku laya hi tindlela tihi?

◻ Ha yini endlelo ra Mukriste eka vanhu lava susiweke ri hambana ni endlelo ra yena eka vadyohi emisaveni?

◻ I vukongomisi byihi bya Matsalwa lebyi faneleke ku tsundzukiwa hambi loko xaka ri susiwile?

◻ Huvo ya swikombelo yi fikelele makumu wahi eka nandzu lowu tisiweke hi munhu la tihambaniseke ni bandlha?

◻ Xana hi nga dyondza yini eka marito man’wana ya munhu hi xiyexe malunghana na ku susa?

[Marito lama tshahiweke exihlokweni lama nga eka tluka 26]

“Ku tsema ku hlangana hinkwako hi laha ku heleleke na [makwerhu wa mina wa xisati la tsemiweke] Margaret swi ringe vutshembeki bya hina elunghiselelweni ra Yehova. Swi nyike ndyangu wa ka hina nkarhi ku komba leswaku hakunene hi tshemba leswaku ndlela ya Yehova ya antswa.”—Lynette.

[Bokisi leri nga eka tluka 30]

Ku Susiwa—Vuyelo Hi Byihi Xana?

N’wamatimu wa Munghezi Edward Gibbon u tsale malunghana ni ku faneleka ni vuyelo bya ku susa ekusuhinyana ni nkarhi wa vaapostola a ku:

“I mfanelo leyi nga kanakanisiki ya vandla rin’wana ni rin’wana ku endla leswaku exikarhi ka swirho swa rona vo tanihi lava alaka kumbe ku tlula milawu leyi vekiweke hi vandla hinkwaro va nga katsiwi eku avelaneni na le ka mimpfuno ya rona. . . . Mimbuyelo ya ku susiwa a yi ri ya xivumbeko xa nkarhinyana [xa laha misaveni] kun’we ni xa moya. Mukriste loyi a susiwaka a a tsoniwa xiphemu xihi na xihi eku gandzeleni ka lava tshembekaka. Swiboho swa vukhongeri ni swa vunghana bya le tlhelo a swi herisiwa.”