Kombisa Ku Tshembeka Ka Vukreste Loko Xaka Ra Wena Ri Susiwe Eku Hlanganyeleni
1. Hi xihi xiyimo lexi nga nghenisaka vutshembeki bya Mukreste endzingweni?
1 Vuxaka bya swirho swa ndyangu byi nga va lebyi tiyeke swinene. Sweswo swi nghenisa Mukreste endzingweni loko nkatakwe, n’wana, mutswari kumbe xaka rin’wana ra le kusuhi ri susiwa eku hlanganyeleni kumbe ri tisusa hi roxe evandlheni. (Mat. 10:37) Xana Vakreste lava tshembekaka va fanele va hanyisana njhani ni xaka ro tano? Xana loko ku ri munhu loyi mi tshamaka swin’we u fanele a khomiwa hi ndlela yin’wana? Xo sungula, a hi kambisiseni leswi Bibele yi swi vulaka hi mhaka leyi, laha misinya ya yona ya milawu yi tirhaka hi ndlela leyi fanaka eka lava va susiweke eku hlanganyeleni ni lava va tisuseke hi voxe.
2. Hi ku ya hi Bibele, xana Vakreste va fanele va va khoma njhani vanhu lava hlongoriweke evandlheni?
2 Leswi Lava Susiweke Eku Hlanganyeleni Va Faneleke Va Khomisiwa Swona: Rito ra Xikwembu ri lerisa Vakreste leswaku va nga tolovelani kumbe ku tihlanganisa ni munhu loyi a susiweke evandlheni: “Mi tshika ku tihlanganisa na mani na mani loyi a vuriwaka makwerhu, kasi i mbhisa kumbe munhu wa makwanga kumbe mugandzeri wa swifaniso swa hava kumbe murhuketeri kumbe xidakwa kumbe mudyeleri, hambi ku ri ku dya mi nga dyi na yena munhu wo tano. . . . Susani munhu wo homboloka exikarhi ka n’wina.” (1 Kor. 5:11, 13) Marito ya Yesu lama nga eka Matewu 18:17 na wona ma vulavula hi mhaka leyi: “[Loyi a susiweke eku hlanganyeleni] a a kotise munhu wa matiko ni muluvisi.” Vayingiseri va Yesu a va swi tiva kahle leswaku Vayuda va le nkarhini wolowo a va nga okelani ndzilo ni Vamatiko naswona a va nga lavi ni ku vona nkondzo wa muluvisi hileswi a va n’wi teka a ri munhu wa le handle. Hikwalaho, Yesu a a lerisa valandzeri vakwe leswaku va nga tihlanganisi ni vanhu lava hlongoriweke.—Vona Xihondzo xo Rindza xa March 1, 1982, matluka 5-7 (w81 9/15 matl. 18-20).
3, 4. I xinakulobye xa njhani lexi hi faneleke ku papalata ku va na xona ni vanhu lava susiweke eku hlanganyeleni ni lava va tisuseke hi voxe?
3 Leswi swi vula leswaku Vakreste lava tshembekeke a va hlangani helo hi timhaka ta moya ni munhu wihi ni wihi loyi a hlongoriweke evandlheni. Kambe a hi sweswo ntsena. Rito ra Xikwembu ri vula leswaku ‘hambi ku ri ku dya ni munhu wo tano’ a hi fanelanga hi dya na yena. (1 Kor. 5:11) Hikwalaho ni le ka swilo swa nyama a hi tihlanganisi ni munhu loyi a susiweke eku hlanganyeleni. Sweswo swi katsa ku tihlanganisa na yena etipikinikini, eswinkhubyaneni, emintlangwini, hambi ku ri ku famba na yena eku xaveni kumbe etibayiskopeni kumbe ku dya swin’we na yena ekaya kumbe ekhefini.
4 Ku vuriwa yini hi ku vulavurisana ni munhu la susiweke eku hlanganyeleni? Hambileswi Bibele yi nga hlamuseriki timhaka hinkwato, 2 Yohane 10 yi hi pfuna ku twisisa vonelo ra Yehovha malunghana ni leswi: “Loko un’wana a ta eka n’wina a nga tisi dyondzo leyi, mi nga tshuki mi n’wi amukela emakaya ya n’wina kumbe ku n’wi xeweta.” Loko xi hlamusela hi mhaka leyi, Xihondzo xo Rindza xa March 1, 1982, tluka 12 xi ri: “Ku vula ntsena u ku ‘avuxeni’ eka un’wana ku nga va goza ro sungula leri yisaka eku vulavurisaneni kumbexana ni le xinakulobyeni. Xana hi nga teka goza rolero ro sungula ni munhu la tsemiweke ke?”
5. Loko munhu a susiwile eku hlanganyeleni i yini leswi n’wi lahlekelaka?
5 Hakunene, hilaha nkandziyiso lowu fanaka wa Xihondzo xo Rindza eka tluka 18 wu swi vekaka hakona: “Mhaka hi leswaku loko Mukreste a tinyiketela xidyoho kutani a fanela ku tsemiwa, u lahla swo tala: xiyimo xakwe lexi amukeriwaka hi Xikwembu; . . . vunghana byo nandziha bya vamakwerhu, ku katsa ni vunghana lebyikulu lebyi a ri na byona ni maxaka lama nga Vakreste.”
6. Xana Mukreste u languteriwe ku tihambanisa hi ku helela ni xaka leri susiweke eku hlanganyeleni leri a tshamaka na rona emutini wun’we? Hlamusela.
6 Loko Mi Tshama Muti Wun’we Ni Loyi A Susiweke Eku Hlanganyeleni: Xana leswi swi vula leswaku Vakreste lava tshamaka muti wun’we ni xirho xa ndyangu lexi susiweke eku hlanganyeleni va fanele va papalata ku vulavula, ku dya ni ku tihlanganisa ni munhu yoloye loko va endla mintirho ya vona ya siku ni siku? Xihondzo xo Rindza xa April 15, 1991, eka nhlamuselo ya le hansi eka tluka 22, xi ri: “Loko endyangwini wa Vukreste ku ri na xaka leri susiweke, yoloye wa ha ta tama a ri xiphemu xa timhaka ni mintirho leyi tolovelekeke ya siku na siku ya ndyangu.” Xisweswo, swirho swa ndyangu hi swona swi nga ta endla xiboho leswaku xirho xa ndyangu wolowo lexi susiweke eku hlanganyeleni xi ta pfumeleriwa ku fikela kwihi ku va swin’we ni ndyangu loko ku dyiwa kumbe ku endliwa mintirho yin’wana ya le kaya. Kambe a va fanelanga va endla leswaku vamakwerhu lava va hlanganyelaka na vona va anakanya leswaku a ku cincanga nchumu hi mpfhuka a susiwa.
7. Xana xinakulobye xa moya ekaya xi cinca njhani loko xirho xa ndyangu xi susiwile eku hlanganyeleni?
7 Hambiswiritano, Xihondzo xo Rindza xa March 1, 1982, eka tluka 15, xi vula leswi landzelaka malunghana ni munhu la susiweke eku hlanganyeleni kumbe loyi a tisuseke hi yexe: “Swiboho leswo sungula swa moya swi tsemiwe hi laha ku heleleke. Leswi i ntiyiso ni le mhakeni ya maxaka ya yena, ku katsa ni lava nga endyangwini wa yena hi woxe. . . . Sweswo swi ta vula ku hundzuka ka vunakulobye bya moya lebyi byi nga vaka byi ve kona ekaya. Hi xikombiso, loko wanuna a tsemiwile, nsati wakwe ni vana va yena va nga ka va nga ntshunxeki ku va yena a fambisa dyondzo ya ndyangu ya Bibele kumbe ku fambisa ku hlaya ka Bibele ni xikhongelo. Loko a lava ku khongela, tanihi le nkarhini wa swakudya, u ni mfanelo yo endla tano ekaya ka yena. Kambe vona va nga ha tikhongelela hi timbilu eka Xikwembu. (Swiv. 28:9; Ps. 119:145, 146) Ku nga vuriwa yini loko munhu la tsemiweke a lava ku va kona loko ndyangu wu hlaya Bibele kun’we kumbe wu ri na dyondzo ya Bibele ekaya ke? Lavan’wana va nga ha n’wi pfumelela ku va kona leswaku a yingisela loko a ta ka a nga ringeti ku va dyondzisa kumbe ku avelana na vona mianakanyo yakwe ya vukhongeri.”
8. Hi byihi vutihlamuleri lebyi vatswari lava nga Vakreste va nga na byona eka n’wana la susiweke eku hlanganyeleni loyi a ha tshamaka na vona ekaya?
8 Loko n’wana lontsongo loyi a ha tshamaka ekaya a susiwile eku hlanganyeleni, vatswari lava nga Vakreste va ha ri ni vutihlamuleri bya ku n’wi kurisa. Xihondzo xo Rindza xa November 15, 1988, xi vula leswi landzelaka eka tluka 20: “Tanihi leswi va nga ta hambeta va n’wi nyika swakudya, swiambalo ni byetlelo, va fanele va n’wi dyondzisa ni ku n’wi laya hi ku ya hi Rito ra Xikwembu. (Swivuriso 6:20-22; 29:17) Vatswari va rirhandzu xisweswo va nga lunghiselela dyondzo ya le kaya ya Bibele na yena, hambiloko a susiwile. Kumbexana u ta kuma mpfuno lowu lulamisaka swinene eku dyondzeni ka vona na yena a ri yexe. Kumbe va nga kunguhata leswaku a nga hambeta a hlanganyela eka lunghiselelo ra dyondzo ya ndyangu.”—Nakambe vona Xihondzo xo Rindza xa October 1, 2001, matluka 16-17.
9. Mukreste u fanele a va ni vuxaka byo tanihi kwihi ni xaka leri susiweke eku hlanganyeleni leri nga tshamiki muti wun’we na yena?
9 Maxaka Lama Tshamaka Kun’wana: Xihondzo xo Rindza xa April 15, 1988, xi vula leswi landzelaka, eka tluka 28: “Xiyimo xa hambana loko loyi a susiweke kumbe loyi a tihambaniseke a ri xaka leri nga tshamiki ndhawu yin’we ni ndyangu. Swi nga ha koteka ku nga vi na ku hlangana hi ku helela ni xaka rero. Hambiloko ku ri na timhaka ta ndyangu leti lavaka ku hlangananyana, leswi hakunene a swi nge endliwi mukhuva,” hi ku fambisana ni nawu wa Xikwembu wo “tshika ku tihlanganisa na mani na mani” loyi a nga mudyohi la nga hundzukiki. (1 Kor. 5:11) Vakreste lava tshembekaka va fanele va ringeta ku papalata ku tihlanganisa swi nga fanelanga ni xaka ro tano, naswona va fanele va swi papalata hilaha va nga kotaka hakona ku hlanganyela timhaka ta mabindzu ni munhu wo tano.—Nakambe vona Xihondzo xo Rindza xa March 1, 1982, matluka 17-18.
10, 11. Xana Mukreste u ta rhanga a kambisisa yini a nga si pfumelela xaka leri tsemiweke leswaku ri vuya ekaya?
10 Xihondzo xo Rindza xi tlhela xi vulavula hi xiyimo xin’wana lexi nga vaka kona: “Ku vuriwa yini loko xaka ra le kusuhi tanihi n’wana wa xinuna kumbe mutswari la nga tshamiki ekaya, a tsemiwile naswona endzhaku ka sweswo a lava ku tlhelela ekaya? Ndyangu wu nga ha hlawula leswi wu nga swi endlaka hi ku ya hi xiyimo lexi. Hi xikombiso, mutswari la susiweke eku hlanganyeleni a nga ha vabya kumbe a nga ha swi koti ku tihlayisa hi swa timali kumbe emirini. Vana lava nga Vakreste va boheka hi Matsalwa leswaku va n’wi pfuna, naswona va ta va va kombisa vumunhu. (1 Tim. 5:8) . . . Leswi endliwaka swi nga ha lawuriwa hi swilaveko swa xiviri swa mutswari, malangutelo ya yena ni ku khathala loku nhloko ya ndyangu yi nga na kona hi vuhlayiseki bya moya bya ndyangu.”—Xihondzo xo Rindza xa March 1, 1982, tluka 16.
11 Loko ku ri n’wana, xihloko lexi fanaka xi ya emahlweni xi ku: “Minkarhi yin’wana vatswari va Vakreste va pfumelele n’wana la tsemiweke leswaku a vuya ekaya nkarhinyana, hileswi a vabyaka emirini kumbe emintlhavekweni. Kambe emhakeni yihi ni yihi vatswari va nga kambisisa swiyimo swa munhu. Xana n’wana la tsemiweke a a tihanyisa hi yexe ke, naswona a nga ha swi koti sweswi ke? Kumbe, xana u lava ku tlhelela ekaya ngopfu-ngopfu hikwalaho ka leswi swilo swi nga ta n’wi olovela? Xana ku vuriwa yini hi ku tikhoma ni malangutelo yakwe ke? Xana u ta tisa ‘comela’ ekaya?—Vagal. 5:9.”
12. Hi byihi vuyelo byin’wana bya lunghiselelo ra ku susa eku hlanganyeleni?
12 Leswi Ku Tshembeka Eka Yehovha Swi Pfunaka Swona: Ku fambisana ni lunghiselelo ra Matsalwa ra ku susa eku hlanganyeleni ni ku papalata vadyohi lava nga hundzukiki swa pfuna. Swi endla leswaku vandlha ri tshama ri basile naswona hi vonaka hi ri vanhu lava namarhelaka milawu yo hlawuleka ya Bibele ya mahanyelo lamanene. (1 Pet. 1:14-16) Swa hi sirhelela leswaku hi nga tluleriwi hi mahanyelo yo biha. (Gal. 5:7-9) Swi tlhela swi nyika mudyohi nkarhi wa ku vuyeriwa hi xitalo hi nxupulo lowu a wu kumeke, leswi nga n’wi pfunaka ku veka ‘mbhandzu wo rhula, ku nga ku lulama.’—Hev. 12:11.
13. I ndzulamiso wihi lowu endliweke hi ndyangu wun’wana, naswona vuyelo byi ve byihi?
13 Endzhaku ko twa nkulumo yin’wana enhlengeletanweni ya xifundzha, makwerhu un’wana wa xinuna kun’we ni makwavo wakwe wa xisati va xiye leswaku va fanele va lulamisa ndlela leyi a va n’wi khoma ha yona mana wa vona loyi a a tshama kun’wana, ni loyi a a ri ni malembe ya tsevu a susiwile eku hlanganyeleni. Endzhaku ka nhlengeletano yoleyo, makwerhu loyi u bele mana wa yena riqingho, a n’wi byela leswaku yena ni makwavo va n’wi rhandza swinene kambe a va nga ha ta vulavurisana na yena handle ka loko ku ri ni timhaka ta nkoka ta ndyangu leti lavaka leswaku va vulavula na yena. Endzhakunyana ka sweswo, mana wa jaha leri u sungule ku ya eminhlanganweni naswona eku heteleleni u vuyiseriwe eku hlanganyeleni. Nakambe nuna wa yena la nga riki mupfumeri u sungule ku dyondza ivi hi ku famba ka nkarhi a khuvuriwa.
14. Ha yini hi fanele hi ri seketela hi ku tshembeka lunghiselelo ra ku susa eku hlanganyeleni?
14 Ku tshembeka eku seketeleni ka lunghiselelo ra ku susa eku hlanganyeleni leri nga eMatsalweni swi kombisa leswaku hi rhandza Yehovha naswona swi n’wi nyika marito yo hlamula loyi a N’wi rhukanaka. (Swiv. 27:11) Hi hala tlhelo, hina hi nga tiyiseka leswaku Yehovha u ta hi katekisa. Hosi Davhida u tsale leswi landzelaka malunghana na Yehovha: “Loko ku ri milawu ya yena, a ndzi nge hambuki eka yona. U ta n’wi endla hi vutshembeki loyi a tshembekeke.”—2 Sam. 22:23, 26.