Mphikamakaneta Yo Landzelela Minkondzo Ya Yena

“Hikuva Kriste na yena ú twile ku vaviseka hikwalaho ka n’wina, a mi boxela ntila leswaku mi ta n’wi landza hi le ndzhaku.”—1 PETRO 2:21.

1, 2. (a) Xana mphikamakaneta ya xiviri ku nga va yini, naswona hikwalaho ka yini leswi swi ri leswi tsakisaka eka Vakriste? (b) I swivutiso swihi leswi tlakusiwaka laha?

XANA u tshama u famba hi le ribuweni ra sava kumbe ku tsemakanya nsimu leyi nga ni gamboko ivi u tikuma u kokiwa mahlo hi nxaxamelo wa minkondzo leyi siyiweke hi un’wana loyi a fambeke kwalaho emahlweni ka wena? Xana kumbexana u vone ni ntlawa wa minkondzo ivi u ringeta ku yi landzelela, u ringanisa minkondzo ya wena n’wini na yona hi ku kongoma hi laha swi nga kotekaka ha kona? Loko swi ri tano, u kume leswaku a swi nga olovi. Entiyisweni, ku landzelela khwatsi mintila ya un’wana—hi ku kongoma kumbe hi ku fanekisela—i mphikamakaneta ya xiviri. Kutani hambi swi ri tano, hi ku tivula Vakriste, hi kombise ku navela ka hina ko endla sweswo, ku landzelela swinene minkondzo ya Kriste.

² Xana u rhandza ku endla matshalatshala lama fanelaka ku hlangavetana ni mphikamakaneta leyi hi laha ku humelelaka? Ku tlula sweswo, xana u tiyimisele ku endla tano, ku nga khathariseki leswaku ku nga endleka yini? Loko swi ri tano, ku twisisa ku nonon’hwa ka ku landzelela minkondzo ya xiviri hi laha ku taleke swi ta ku endla leswaku u humelela swinene eku landzeleleni ka minkondzo yo fanekisela ya Kriste.

Dyondza Ku Hundzuka

3. Hikwalaho ka yini ku landzelela minkondzo ya un’wana eku sunguleni swi languteka swi nga ri swa ntumbuluko?

³ Un’wana ni un’wana u ni ndlela leyi hambaneke ya ku famba. Hi xikombiso, ku leha ka goza, ka hambana hi ku ya hi vanhu, hi laha tlhelo leri munhu a vekaka milenge ya yena eka rona ri endlaka ha kona. Swikunwani swa yena swi nga ha kombetela emahlweni, kumbe swi nga ha nghena endzeni kumbe swi languta etlhelweni, tlhelo leri tshikileriweke ngopfu hi nenge wun’wana ku tlula lowun’wana. Xana wa yi xiya mphikamakaneta ke? Ku landzelela minkondzo ya un’wana kahle, u fanele ku cincela ku leha ka goza ra wena ni xiyimo xa nenge eka swa yena. Eku sunguleni leswi swi ta vonaka swi nga ri swa ntumbuluko, kambe swi fanele ku endliwa. Ku hava ndlela yin’wana.

4. Ha yini ku landzela mintila ya Yesu ku ri mphikamakaneta leyi hlawulekeke?

⁴ Hi ku fanekisela, mafambelo ya Kriste, a ya ri ya nkoka hikuva exikarhi ka tintangha ta yena a a ri yena ntsena munhu la hetisekeke loyi, “a a nga ri ni xidyoho.” (2 Vakorinto 5:21) Leswi vanhu hi ntumbuluko va nga vadyohi lava nga hetisekangiki, ku famba eminkondzweni ya Yesu a hi mafambelo ya vona lama tolovelekeke. Pawulo u tsundzuxe Vakriste eKorinto hi leswi, a ku: ‘Hikuva ma ha ri va nyama. Hikuva loko mavondzo ni timholovo swi ri exikarhi ka n’wina, xana a mi va nyama ke? Naswona xana a mi fambi tanihi vanhu ke?’ Ku tolovela mavondzo ni timholovo, “mintirho ya nyama,” swi tolovelekile eka vanhu lava nga hetisekangiki, kambe Yesu u fambe hi ndlela ya rirhandzu, naswona “rirhandzu a ri na mavondzo, . . . a ri na ximbilwa-mbilwana.” Kutani ku famba emintileni ya Kriste ku tisa mphikamakaneta leyikulu ku tlula loko a hi lo komberiwa ku landzelela minkondzo ya munhu la nga hetisekangiki ntsena ku fana na hina.—1 Vakorinto 3:3; 13:4, 5; Vagalatiya 5:19, 20; nakambe vona Vaefesa 5:2, 8.

5, 6. (a) Hikwalaho ka yini vanhu vo tala va hluleka ku landzelela minkondzo ya Yesu, swi susumeta Pawulo ku nyika ndzayo yihi? (b) Xana vanhu va khutaziwa ku famba eminkondzweni ya Yesu namuntlha hi ndlela yihi, hi vuyelo byihi eka vona ke?

⁵ Handle ka ku nga hetiseki, ku honisa ku rhandza ka Xikwembu na kona ku nga sivela munhu ku famba eminkondzweni ya Kriste. Xisweswo Pawulo u tsundzuxe Vakriste va le Efesa leswaku va nga “hanyi ku fana ni leswi vamatiko va hanyisaka swona, hi miehleketo ya vona leyi nga pfuniki nchumu. Mianakanyo ya vona yi le munyameni; a va na ku averiwa evuton’wini bya Xikwembu, hikuva eka vona vutivi ku hava, na swona timbilu ta vona ti tlanyarile.”—Vaefesa 4:17, 18.

⁶ Hi ntirho wo chumayela ta Mfumo, vanhu namuntlha va karhi va khutaziwa ku tshika ku famba endleleni ya vona leyi tolovelekeke, eku honiseni ka swikongomelo swa Xikwembu, va ri emunyameni emianakanyweni, va hlohloteriwa hi timbilu ta vona leti tlanyaleke ku lava tipakani leti nga pfuniki nchumu. Va khutaziwa ku pfumelelana ni xikombiso lexi hetisekeke xa Kriste, hi ku ‘hanya hi ku va xilo xin’we na yena,’ xisweswo ‘va khoma mianakanyo hinkwayo va yi endla leswaku yi yingisa Kriste.’ (Vakolosa 2:6, 7; 2 Vakorinto 10:5) Vanhu lava rhandzaka ku hlangavetana ni mphikamakaneta leyi va tiyisiwa eripfumelweni. Loko va karhi va tolovela ku famba hi ndlela leyi Kriste a fambeke ha yona, swi ya swi va olovela hakantsongo-ntsongo.

7. I xitiyisekiso xihi lexi hi nga na xona xa leswaku, hambi leswi hakanyingi ku nga mphikamakaneta, ku landzela mintila ya Yesu swa koteka?

⁷ Hambi swi ri tano, hakanyingi i mphikamakaneta. Ku hambana exikarhi ka xivumbiwa lexi hetisekeke ni lexi nga hetisekangiki i ku kulukumba. Kutani swivumbiwa leswi nga hetisekangiki swi fanele swi endla ku hundzuka lokukulu leswaku swi ringeta ku landzela xikombiso lexi hetisekeke. Vanhu van’wana, kumbexana hikwalaho ka ndzhaka kumbe matshamelo, va ni ku nonon’hweriwa lokukulu eku pfumelelaneni ni mahanyelo ya Vukriste ku tlula van’wana. Kambe Yehova wa hi tiyisekisa leswaku un’wana ni un’wana loyi hakunene a rhandzaka ku ringeta hi matimba a nga swi kota. “Ndzi nga endla hinkwaswo hi matimba ya Loyi a ndzi tiyisaka,” ku vule muapostola Pawulo. (Vafilipiya 4:13, nakambe vona 2 Vakorinto 4:7; 12:9.) Sweswo i ntiyiso hi Vakriste hinkwavo.

Yingisa

8, 9. (a) Ha yini nyingiso lowu nga avanangiki ni ku vuyisa miehleketo hinkwayo swi laveka loko u landzelela minkondzo ya un’wana? (b) I ku landzela ndzayo yihi ya Bibele leswi nga ta hi sivela ku hambuka eminkondzweni ya Yesu?

⁸ Hi nga ka hi nga landzeleli minkondzo ya xiviri hi nga langutanga khwatsi laha hi kandziyaka kona. Loko mahlo ya hina ya hala-hala—ya languta swilo leswi endlekaka ekusuhi na hina kumbe swilo swin’wana—hi boheka ku hupha nkondzo hi ku hatlisa kumbe endzhakunyana. Handle ka loko hi va ni ku yingisela loku nga avanangiki ivi hi vuyisa miehleketo hinkwayo, hi ta hambuka eminkondzweni leyi a hi fanele ku yi landzela. Xisweswo, nkarhi na nkarhi ku na xilaveko xa ku tivonela, ngopfu-ngopfu loko huwa ya xitshuketa kumbe swihinga swin’wana leswi nga rindzeriwangiki swi nga ha hambukisa mianakanyo ya hina eka ntirho lowu hi nga na wona.—Ringanisa Yobo 18:10, 11.

⁹ Hi ndlela yo fanekisela, lowu i ntiyiso ni le ka lava landzelelaka minkondzo ya Yesu. Yesu u tsundzuxe valandzeri va yena ku tivonela swinene, leswaku ‘timbilu ta vona ti nga tikeriwi hi makolo ni ku pyopya, ni ku vilela hi swa vutomi lebyi.’ (Luka 21:34) Sathana u tirhisa ku kavanyeta loku ka siku na siku ku hi endla leswaku hi susa mahlo ya hina eminkondzweni ya Yesu. U hatla ku hi kanganyisa hi ku tirhisa swiyimo leswi nga languteriwangiki, swo fana ni nkaneto, vuvabyi, kumbe swihinga swa timali. Ku tiyiseka leswaku “hi nga hambuki,” hi fanele “ku hlayisa swinene timhaka leti hi ti tweke,” hi marito man’wana, hi veka mahlo ya hina swinene eminkondzweni ya Kriste ku tlula rini na rini.—Vaheveru 2:1; nakambe vona 1 Yohane 2:15-17.

U Nga Hambuki

10. (a) I khombo rihi leri humelelaka loko mintlawa ya minkondzo yi hingakanyana? (b) Hi ku twisisa ka moya, hikwalaho ka yini vuyelo bya ku landzelela mintila leyi hoxeke byi ri bya nkoka?

¹⁰ Eribuweni ra lwandle leri talaka hi vanhu, ku nga ha va ni mintlawa yo hlayanyana ya minkondzo esaveni leri tsakamaka, naswona migandliso yin’wana ya minkondzo yi nga ha tsemakanya lowu hi wu landzelelaka. Mintlawa yo tala ya minkondzo, yi nga ha vonaka yi fana hi xivumbeko. I swa nkoka swonghasi ku tiyiseka leswaku hi landzelela leyi faneleke! Handle ka swona hi nga ha hambukiseriwa ku ya etlhelweni leri hoxeke. Hi ku twisisa ka moya, leswi a swi ta va ni vuyelo lebyikulu. Khombo ra ku landzelela minkondzo leyi nga ha vonakaka yi ri ya ntiyiso kambe leyi entiyisweni ku nga riki yona ri kombisiwa eka xivuriso lexi tshinyaka: “Ndlela yi kona leyi v̌onekaka e ka munhu ingi yi lulamile, kasi makumo ya yona, ma yisa ku feni.”—Swivuriso 16:25.

11. I xitsundzuxo xihi lexi Pawulo a xi nyikeke Vakriste vo sungula, a vekela vamani xikombiso namuntlha?

¹¹ Hikwalaho ka khombo leri ra xiviri swinene, Pawulo u titwe a boheka ku tsundzuxa vamakwavo ebandlheni ro sungula ra Vukriste: “Ma ndzi hlamarisa: Hi nkarhinyana wu nga ri wungani, mi fularhela loyi a mi vitaneke hi tintswalo ta Kriste, kutani mi tsutsumela eka Evangeli yin’wana . . . Ndzi vula leswi hikuva ku na van’wana lava mi pfilunganyisaka tinhloko, lava ringetaka ku soholota Evangeli ya Kriste . . . Loko un’wana a mi dyondzisa Evangeli yin’wana ehandle ka leyi mi yi amukeleke, a a rhukaniwe!” (Vagalatiya 1:6-9) Ku pfumelelana ni xikombiso xa Pawulo, Huvo leyi Fumaka ya Timbhoni ta Yehova namuntlha yi hi tsundzuxa hi vagwinehi ni vamakwerhu va mavunwa lava, kavula, va gandlisaka minkondzo yo hambukisa. Vakriste va ntiyiso a va swi lavi ku hambuka eka gondzo leri Yesu a ri pfuleke emahlweni ka vona hi nkongomiso wa Xikwembu.—Psalma 44:18.

12. (a) Xana 2 Timotiya 1:13 yi nga hi pfuna njhani eku papalateni ka ku hambukisiwa hi landzelela minkondzo leyi lahlaka? (b) I yini lexi funghaka tinxaka tin’wana ta mahungu lamanene?

¹² Hi ku xiya swinene mimfungho leyi hlawulaka ya minkondzo ya Kriste, hi papalata ku hambukisiwa. Vutivi lebyinene ha Yesu, hi tidyondzo ta yena na hi ndlela leyi bandlha ra Vukriste ri tirhaka ha yona swi hi pfuna ku tiva “ntila wa marito lama tiyeke ya xiviri” lama hi sirhelelaka eka lava va ‘hundzulaka Evangeli ya Kriste.’ (2 Timotiya 1:13) Tinxaka tin’wana ta leswi vuriwaka mahungu lamanene—entiyisweni, minkondzo leyi hambukisaka—ta hluleka ku faneleka entileni wolowo wa ntiyiso. Va wu hundzula, va cukumeta ntiyiso ekule. Ematshan’wini yo hlamusela mintiyiso ya masungulo ya Bibele ni misinya ya milawu, va swi kaneta. Ematshan’wini ya ku hi khutazela ntirho lowukulu entirhweni wa Yehova, va endla njhekanjhekisano ku endlela leswaku wu nonoka. Mahungu ya vona a hi manene naswona a ya ri kwetsimisi vito ra Yehova ni nhlengeletano; ya bihile, ya lava swihoxo naswona ya sola. Entiyisweni, leyi a hi yona minkondzo leyi hi lavaka ku yi landzelela.

Hlayisa Fambelo Leri Faneleke

13. Xana mafambelo ya katseka njhani loko hi landzelela minkondzo ya un’wana?

¹³ Loko hi famba, ku leha ka goza ra hina hi ku komisa ku tiyisiwa hi rivilo leri hi fambaka ha rona. Hi ntolovelo, loko hi famba hi ku hatlisa goza ra hina ra leha; loko hi famba hi ku nonoka, goza ra koma. Xisweswo, swi ta hi olovela ku landzelela minkondzo ya xiviri ya un’wana loko hi lulamisa mafambelo ya hina leswaku ya twanana ni ya yena. Hi ku fanana, leswaku hi famba hi laha ku humelelaka emintileni yo fanekisela ya Murhangeri wa hina, Yesu Kriste, hi fanele ku hlayisa mafambelo yakwe.

14. (a) I tindlela tihi leti hi nga ha vaka hi nga fambisani na Yesu ha tona? (b) Hikwalaho ka yini ku ri vuphukuphuku ku ringeta ku rhangela “nandza lowo tshembeka, lowa vutlhari”?

¹⁴ Ku nga fambisani na Kriste a swi ta vula xin’wana xa swilo leswi swimbirhi. Ku ringeta ku hatlisanyana, hi siya “nandza lowo tshembeka, lowa vutlhari” loyi Yesu a n’wi tirhisaka ku hetisisa xikongomelo xa Yehova, kumbe ku nonoka eku landzeleni ka vukongomisi bya ‘nandza’ yoloye. (Matewu 24:45-47) Tanihi xikombiso xo sungula, Vakriste van’wana eminkarhini leyi nga hundza va hele timbilu ehenhleni ka ku hundzuka ka tidyondzo kumbe ka nhlengeletano kumbe ku basisiwa leswi va nga vona leswaku a swi laveka ni ku fanela swinene. Hi ku sungula ku hlundzukisiwa hi mhaka ya leswi va voneke onge swilo a swi nga fambi hi ku hatlisa loku aneleke, va tlhentlhile eka vanhu va Yehova. Vona vuphukuphuku lebyonghasi ni ku koma ka miehleketo ya vona! Hakanyingi nchumu lowu a wu va hlundzukisa endzhakunyana wu cinciwile—hi nkarhi lowu faneleke wa Yehova.—Swivuriso 19:2; Eklesiasta 7:8, 9.

15. Hosi Davhida na Yesu a va ri swikombiso leswinene swa ku hlayisa fambelo lerinene hi ndlela yihi?

¹⁵ Ndlela ya vutlhari i ku yimela Yehova ku teka goza ku ri na ku ringeta ku hlamusela mafambelo lawa swilo swi faneleke ku humelela hi wona. Hosi Davhida wa khale u veke xikombiso lexinene. U ale ku khira Hosi Sawulo hi ku ringeta ku vutla vuhosi ku nga si fika nkarhi lowu faneleke wa Yehova wo n’wi nyika. (1 Samuel 24:1-15) Hi ku fanana, “N’wana Davhida,” Yesu, u xiye leswaku a a fanela ku rindzela ku nghena hi laha ku heleleke evuhosini bya yena bya le tilweni. A a ma tiva marito ya vuprofeta lama a ma tirha eka yena. “Ṭhamisa e v̌okweni ra mina ra šinene, nḍi ko nḍi endla la’v̌a nga v̌alala e ka wena e v̌unav̌elo bya mikonḍo ya wena.” Kutani loko ntlawa wa Vayuda wu lave ku n’wi “vutla leswaku va n’wi endla Hosi,” hi ku hatlisa Yesu u balekile. (Matewu 21:9; Psalma 110:1; Yohane 6:15) Malembe ya 30 endzhakunyana, hi ku ya hi Vaheveru 10:12, 13, Yesu a a ha yimele vuhosi bya yena. Entiyisweni, u rindzele kwalomu ka malembe xidzana ya 19 a nga si vekiwa tanihi Hosi leyi fanelaka ya Mfumo wa Xikwembu eku simekiweni ka wona hi 1914.

16. (a) Kombisa ndlela leyi hi nga ha fambaka hi ku nonoka swinene ha yona ku tlula leswi a hi fanele ku fambisa swona. (b) Xana xikongomelo xa ku lehisa ka Yehova mbilu hi xihi, naswona hi fanele ku ku papalatisa ku yini ku tirhisa ku lehisa mbilu koloko hi ndlela yo biha?

¹⁶ Hambi swi ri tano, ku hluleka ku hlayisa mafambelo lama faneleke, swi nga tlhela swi vula ku tsana, ku nonoka. Xisweswo, loko Rito ra Xikwembu ri kombisa leswaku ku hundzuka ku fanele ku endliwa evuton’wini bya hina, xana hi teka goza handle ko hlwela? Kumbe xana hi ehleketa leswaku leswi Xikwembu xi lehisaka mbilu, hi nga tshika ku endla ku hundzuka ko tano ku ko ku hundza nkarhinyana, hi ri ni ntshembo wa leswaku swi nga ha olova hi nkarhi wolowo? I ntiyiso, Yehova u lehisa mbilu. Kambe leswi a swi endleriwanga swona leswaku hi nonoka ehenhleni ka ku endla mindzulamiso leyi lavekaka. Kambe, u “lehisa mbilu hikwalaho ka n’wina; a [nga] lavi leswaku ni un’we wa n’wina a lova, kambe [u] lava leswaku hinkwavo va ta eku hundzukeni.” (2 Petro 3:9, 15) Manuku ke, swi antswa swinene swonghasi ku tekelela mupisalema loyi a nga te: “Nḍa hatlisa, a nḍi hlweri ku hlayisa ŝileriso ŝa wena.”—Psalma 119:60.

17. Ku hlayisa fambelo lerinene ku yelana njhani ni ku chumayela ta Mfumo, leswi swi hi vangelaka ku tivutisa xivutiso xihi?

¹⁷ Ku hela matimba ku nga ha katsa ku chumayela hi Mfumo. Hi ku ya hi Matewu 25, Yesu sweswi u le ku avanyiseni ka vanhu, a hlawula “tinyimpfu” eka “timbuti.” Leswi ngopfu-ngopfu swi endliwa hi ku chumayeriwa ka “Evangeli leyi ya Mfumo.” (Matewu 24:14; 25:31-33; Nhlavutelo 14:6, 7) Nkarhi lowu vekeriweke ku hetisisa ntirho lowu wo hlawula wu hikiwe hi laha ku faneleke. (Matewu 24:34) Leswi nkarhi lowu wu nga kona wu nga kusuhi ni ku hela, hi nga rindzela leswaku Yesu a hatlisisa ntirho. Eku endleni ka sweswo, u tirha tanihi xitirho xa Xikwembu, lexi, loko xi vulavula hi ntirho wo hlengeleta, xi tshembisaka: “Mina, Yehova, nḍi ta hatlisisa ŝilo leŝi e mikarini ya ŝona.” (Esaya 60:22) Tanihi vatirhi-kulobye va Xikwembu, lava landzelaka swinene mintila ya N’wana wa xona, xana hi hatlisisa magoza ya hina ya ku chumayela hi Mfumo ku fika eka mpimo lowu xiyimo xa hina xa nyama ni vutihlamuleri bya Matsalwa swi wu pfumelelaka? Swiviko swa ntirho wa nsimu swi kombisa leswaku timiliyoni ta Timbhoni ta Yehova ta swi endla!

Nyenya Ku Titshemba Ku Tlula Mpimo, Lwisana Ni Ku Hela Matimba

18. Hikwalaho ka yini munhu a nga ha titshembaka ku tlula mpimo, naswona Bibele yi tsundzuxa hi khombo leri hi ndlela yihi?

¹⁸ Loko hi tiyisela nkarhi wo leha eku landzeleleni ka minkondzo ya un’wana, hi laha mafambelo ya yena ya nga ta toloveleka eka hina. Kambe, loko hi sungula ku vilela, hi ku hatlisa kumbe endzhakunyana hi ta hupha goza. Xisweswo, loko hi landzela minkondzo ya Yesu yo fanekisela, hi fanele ku xiya khombo ro titshemba ku tlula mpimo, hi titshega hi matimba ni vuswikoti bya hina vini hi vusopfa, hi vona onge hi khome mafambelo ya yena lama hetisekeke. Ntokoto wa Petro lowu rhekhodiweke eka Luka 22:54-62 wu tirha tanihi xitsundzuxo lexi nga enkarhini. Wu tlhela wu kandziyisa ntiyiso wa 1 Vakorinto 10:12, leyi nge: “Loyi a anakanyaka leswaku wa ha yimile, a a tivonele leswaku a nga wi.”

19. (a) Xana ku humelela yini eka Mukriste un’wana ni un’wana nkarhi na nkarhi? (Yakobo 3:2) (b) Hi fanele ku ma languta njhani marito ya Pawulo eka Varhoma 7:19, 24?

¹⁹ Hikwalaho ka ku nga hetiseki, Mukriste un’wana ni un’wana u ta hupha goza nkarhi na nkarhi. Ku hambuka ku nga ha va kuntsongo, ku nga vonaki kahle eka van’wana. Kumbe ku nga ha va ku hupha ko tano ka le rivaleni ka mfungho lerova ku ta voniwa hi vanhu hinkwavo. Etimhakeni hinkwato, swi chavelela swonghasi ku tsundzuka xitsundzuxo lexi tshembekaka xa Pawulo: “Hikuva leswinene leswi ndzi navelaka ku swi endla, a ndzi swi endli, kambe leswo biha leswi ndzi nga naveliki ku swi endla, ndza swi endla. Yo! mina munhu wa khombo leronghasi!” (Varhoma 7:19, 24) Kavula, marito lawa a ma fanelanga ku xiyiwa tanihi xisirhelelo xa ku endla vubihi. Kambe, i xikhutazo eka Vakriste lava tinyiketeleke lava lwisanaka ni ku nga hetiseki, ma va pfuna ku tiya eku ringeteni ka vona ku hlangavetana ni mphikamakaneta ya ku famba emintileni leyi hetisekeke ya Yesu.

20. (a) Swivuriso 24:16 yi hi pfuna njhani emphikizanweni wa hina wa vutomi? (b) Xana hi fanele ku tiyimisela ku endla yini?

²⁰ “L’a lulameke, hambi a nga wa e ka ntlhanu na kambiri, o ta pfuka,” ku vula Swivuriso 24:16. Emphikizanweni wa hina wa vutomi, ku hava loyi a fanelaka ku titwa a boheka ku tshika. Mphikizano lowu wu fana na maratoni, mphikizano wo tiyisela, ku nga ri mpfhukanyana wa dzana ra timitara. Ku lahlanyana goza ka xitsutsumi swi ta xi lahlela mphikizano hinkwawo. Kambe xitsutsumi xa maratoni, hambi loko xi wa, xi ni nkarhi wa ku lulamisa ivi xi hetisa mpfhuka wa xona. Kutani loko xihoxo xin’wana xa munhu hi xiyexe xi ku vangela ku huwelela u ku, “Yo! mina munhu wa khombo!” tsundzuka leswaku wa ha ri na nkarhi wo hlakarhela. Wa ha ri na nkarhi wo tlhelela endzhaku u famba ni Murhangeri wa wena, Yesu Kriste. Ku hava xivangelo xa ku pfumala ntshembo! Ku hava xivangelo xa ku tshika! Tiyimiseli, hi mpfuno wa Xikwembu, ku hlangavetana hi laha ku humelelaka ni mphikamakaneta yo ‘landzela minkondzo ya Yesu swinene.’—1 Petro 2:21.

Hikwalaho ka yini Vakriste va fanele

◻ ku dyondza ku hundzuka?

◻ ku va ni nyingiso lowu nga avanangiki?

◻ ku tsundzuka xikombiso xa ntiyiso?

◻ ku hlayisa fambelo lerinene?

◻ ku nyenya ku titshemba ku tlula mpimo?

◻ ku lwisana ni ku hela matimba?

[Xifaniso lexi nga eka tluka 15]

Hi ku veka mahlo ya yena eka pakani ya yena, la lulameke u ta pfuka hakunene