Ku Famba Ni Xikwembu—Magoza Yo Sungula

“Tshinelani eka Xikwembu, kutani xi ta tshinela eka n’wina.”—YAKOBO 4:8.

1, 2. Ha yini u nga vulaka leswaku ku tirhela Yehovha i lunghelo lerikulu?

WANUNA un’wana u vone maxangu hi malembe yo tala ekhotsweni. Endzhaku u vitaniwile hi mufumi wa tiko. Swilo swi endleke hi ku hatlisa. Xikan’we-kan’we, mukhotsiwa loyi u tikume a tirhela mufumi wa matimba swinene eka hinkwavo emisaveni hi nkarhi wolowo. Khale ka mukhotsiwa loyi u vekiwe exikhundlheni xa vutihlamuleri lebyikulu ni lexi xiximekaka swinene. Yosefa—wanuna loyi milenge yakwe yi tshameke yi bohiwa hi tinketana—se a a famba na hosi!—Genesa 41:14, 39-43; Pisalema 105:17, 18.

² Namuntlha, vanhu va ni lunghelo ro tirhela un’wana loyi a tlakukeke swinene ku tlula Faro wa le Egipta. Munhu wa le Henhla-henhla evuakweni u hi rhamba hinkwerhu leswaku hi n’wi tirhela. I lunghelo ro hlamarisa swonghasi ku endla tano ni ku hlakulela vuxaka lebyikulu na Yehovha, Xikwembu xa matimba hinkwawo! EMatsalweni, u fambisana ni matimba lamakulu ni ku vangama kun’we ni ku chaviseka, vuxongi ni ntsako. (Ezekiyele 1:26-28; Nhlavutelo 4:1-3) Hinkwaswo leswi a swi endlaka u swi endla hi rirhandzu. (1 Yohane 4:8) A nga hembi nikan’we. (Tinhlayo 23:19) Naswona Yehovha a nga va khomisi tingana lava va tshembekaka eka yena. (Pisalema 18:25) Loko hi titwananisa ni swilaveko swa yena swa vululami, hi nga va ni vutomi lebyi tsakisaka, lebyi nga ni xikongomelo sweswi, hi karhi hi langutele ku hanya hilaha ku nga heriki. (Yohane 17:3) A nga kona mufumi wa munhu loyi a nga hi nyikaka mikateko ni malunghelo yo tano.

3. Nowa ‘u fambe na Xikwembu xa ntiyiso’ hi ndlela yihi?

³ Khale swinene, mupatriarka Nowa a a tiyimisele ku hanya hi ku pfumelelana ni ku rhandza ka Xikwembu ni xikongomelo xa xona. Malunghana na yena, Bibele yi ri: “Noa a a ri munhu l’a lulameke ni l’a sasekeke e nkarini wa yena; Noa a ṭhama a famba ni Šikwembu.” (Genesa 6:9) Ina, Nowa a nga fambanga na Yehovha hi xiviri, tanihi leswi ku nga riki na munhu “la tshameke a vona Xikwembu.” (Yohane 1:18) Ku ri na sweswo, Nowa a a famba na Xikwembu hileswi a a endla leswi Xikwembu xi n’wi byeleke ku swi endla. Hikwalaho ka leswi Nowa a tinyiketeleke ku endla ku rhandza ka Yehovha evuton’wini byakwe, u ve ni vuxaka lebyikulu na Xikwembu xa Matimba Hinkwawo. Ku fana na Nowa, vanhu va timiliyoni namuntlha va “famba ni Šikwembu” hi ku hanya hi ku pfumelelana ni ndzayo ni vuleteri bya Yehovha. Xana munhu u sungurisa ku yini ku nghena endleleni yo tano?

Ku Laveka Vutivi Lebyi Kongomeke

4. Yehovha u va dyondzisa njhani vanhu vakwe?

⁴ Leswaku hi famba na Yehovha, hi fanele hi n’wi tiva ku sungula. Muprofeta Esaya u vhumbhile a ku: “E mikarini ya makumo, ku ta humelela leŝaku nṭhav̌a ya yindlu ya Israel yi ta v̌ekiwa e nhlohlorini ya ṭinṭhav̌a, yi tlakusiwa henhla ka ŝiṭunga, kutani matiko hikwawo ma ta talela kona. Matiko la’yo tala ma ta ta kona, ma ku: Tanani, hi ta tlhandlukela nṭhav̌eni ya Yehova, e ndlwini ya Šikwembu sa Yakob; ši ta hi dyonḍisa tindlela ta šona, kutani hi ta famba e mitileni ya šona. Hikuv̌a nawu wu ta huma e Sion, ni rito ra Yehova ri ta huma e Yerusalem.” (Esaya 2:2, 3) Ina, hi nga tiyiseka leswaku Yehovha u ta dyondzisa hinkwavo lava swi lavaka ku famba etindleleni ta yena. Yehovha u hi nyike Rito rakwe, ku nga Bibele, naswona u hi pfuna ku ri twisisa. Ndlela yin’wana leyi a endlaka leswi ha yona i ku tirhisa “hlonga ro tshembeka ni ro tlhariha.” (Matewu 24:45-47) Yehovha u tirhisa “hlonga ro tshembeka” ku hi nyika dyondzo ya moya hi ku tirhisa tibuku leti sekeriweke eBibeleni, minhlangano ya Vukreste ni lunghiselelo ra dyondzo ya le kaya ya Bibele ya mahala. Nakambe Xikwembu xi pfuna vanhu va xona ku twisisa Rito ra xona hi ku tirhisa moya wa xona lowo kwetsima.—1 Vakorinto 2:10-16.

5. Ha yini ntiyiso wa Matsalwa wu ri wa risima swonghasi?

⁵ Hambileswi hi nga humesiki mali leswaku hi kuma ntiyiso wa Bibele, ntiyiso lowu i wa risima. Loko hi kambisisa Rito ra Xikwembu, hi dyondza hi ta Xikwembu hi xoxe—vito ra xona, vumunhu bya xona, xikongomelo xa xona ni ndlela leyi xi khomaka vanhu ha yona. Hi tlhela hi kuma tinhlamulo leti ntshunxaka malunghana ni swivutiso swa xisekelo hi vutomi leswi nge: Ha yini hi ri laha? Ha yini Xikwembu xi pfumelela ku xaniseka? Xana vumundzuku byi hi khomele yini? Ha yini hi dyuhala ni ku fa? Xana ku ni vutomi endzhaku ka rifu? Ku tlula kwalaho, hi dyondza leswi Xikwembu xi rhandzaka swona hi hina, ku nga ndlela leyi hi faneleke hi famba ha yona leswaku hi xi tsakisa ngopfu. Hi dyondza leswaku swilaveko swa xona swa amukeleka naswona swa vuyerisa swinene loko hi hanya hi ku pfumelelana na swona. Swilo swo tano a hi nga ta swi twisisa loko Xikwembu a xi nga hi dyondzisanga swona.

6. Vutivi lebyi kongomeke hi Bibele byi hi pfuna ku landzela ndlela yihi?

⁶ Ntiyiso wa Bibele wu ni matimba naswona wu hi susumetela ku hundzuka evuton’wini bya hina. (Vaheveru 4:12) Loko hi nga si tswonga vutivi bya Matsalwa, a hi famba “hi ku ya hi mafambiselo ya swilo ya misava leyi” ntsena. (Vaefesa 2:2) Kambe ku va ni vutivi lebyi kongomeke hi Rito ra Xikwembu swi hi pfulela ndlela leyintshwa leswaku hi kota ku “famba hi mukhuva lowu fanelaka eka Yehovha leswaku [hi] n’wi tsakisa hi ku helela.” (Vakolosa 1:10) I ntsako lowukulu ku teka magoza yo sungula hi famba na Yehovha, Munhu la tlakukeke swinene evuakweni hinkwabyo!—Luka 11:28.

Magoza Mambirhi Ya Nkoka —Ku Tinyiketela Ni Nkhuvulo

7. Loko hi dyondza Rito ra Xikwembu, i ntiyiso wihi malunghana ni vurhangeri bya vanhu lowu vaka erivaleni?

⁷ Loko ku twisisa ka hina Bibele ku kula, hi sungula ku kambisisa swiyimo swa vanhu ni vutomi bya hina hi ku ya hi mpfuno wa moya wa Rito ra Xikwembu. Kutani ntiyiso lowu tiyeke wu va erivaleni. Ntiyiso wolowo wu vuriwe khale swinene hi muprofeta Yeremiya, loyi a tsaleke a ku: “Oho Yehova, nḍa ŝi tiv̌a, ndlela ya munhu a yi le matimbeni ya yena, kambe munhu l’a fambaka a nga ka a nga lulamisi renḍo ra yena.” (Yeremiya 10:23) Hina vanhu—hinkwerhu ka hina—hi lava vukongomisi bya Xikwembu.

8. (a) Vanhu va susumetiwa hi yini leswaku va tinyiketela eka Xikwembu? (b) Ku tinyiketela ka Vukreste i yini?

⁸ Ku twisisa mhaka leyi ya ntikelo swi hi susumetela ku lava ku kongomisiwa hi Yehovha. Naswona ku rhandza Xikwembu swi hi susumetela ku nyiketela vutomi bya hina eka xona. Ku tinyiketela eka Xikwembu swi vula ku vulavula na xona hi xikhongelo hi xi tshembisa hi mbilu hinkwayo leswaku hi tiyimisele ku xi tirhela evuton’wini bya hina ni ku famba etindleleni ta xona hi ku tshembeka. Loko hi endla tano, hi tekelela xikombiso xa Yesu, loyi a tinyikeleke eka Yehovha hi ku tiyimisela lokukulu leswaku a endla ku rhandza ka yena.—Vaheveru 10:7.

9. Ha yini vanhu va nyiketela vutomi bya vona eka Yehovha?

⁹ Yehovha Xikwembu a nga sindzisi munhu nikatsongo leswaku a tinyiketela eka yena. (Ringanisa 2 Vakorinto 9:7.) Ku tlula kwalaho, Xikwembu a xi langutelanga leswaku munhu a nyiketela vutomi bya yena eka xona hi ku tekeka. Emahlweni ka ku va munhu a khuvuriwa, u fanele ana se a ri mudyondzisiwa, naswona sweswo swi lava leswaku a endla matshalatshala lamakulu yo kuma vutivi. (Matewu 28:19, 20) Pawulo u khongotele lava ana se a va khuvuriwile leswaku ‘va nyikela mimiri ya vona yi va xitlhavelo lexi hanyaka, xo kwetsima ni lexi amukelekaka eka Xikwembu, ku nga ntirho wo kwetsima, hi matimba ya vona ya ku anakanya.’ (Varhoma 12:1) Hi tinyiketela eka Yehovha Xikwembu hi xikombiso lexi fanaka xa matimba ya hina ya ku anakanya. Loko hi kumisise leswi lavekaka ni ku anakanyisisa kahle hi mhaka leyi, hi nyiketela vutomi bya hina eka Xikwembu hi ku swi rhandza ni hi ntsako.—Pisalema 110:3.

10. Ku tinyiketela ni nkhuvulo swi fambisana njhani?

¹⁰ Loko hi vulavule na Xikwembu hi xikhongelo hi ri hexe hi xi byela ku tiyimisela ka hina ku famba etindleleni ta xona, hi teka goza leri landzelaka. Hi kombisa ku tinyiketela ka hina erivaleni loko hi khuvuriwa ematini. Lexi i xihlambanyo xa le rivaleni xa leswaku hi tiyimisele ku endla ku rhandza ka Xikwembu. Loko a sungula vutirheli bya yena bya laha misaveni, Yesu u khuvuriwile hi Yohane, xisweswo a hi vekela xikombiso. (Matewu 3:13-17) Endzhaku, Yesu u lerise valandzeri vakwe leswaku va endla vadyondzisiwa va va khuvula. Hikwalaho, ku tinyikela ni nkhuvulo i magoza ya nkoka eka mani na mani loyi a tsakelaka ku famba na Yehovha.

11, 12. (a) Nkhuvulo wu nga fanisiwa njhani ni nkhuvo wa vukati? (b) I xifaniso xihi lexi nga tirhisiwaka exikarhi ka vuxaka lebyi hi nga na byona na Yehovha ni lebyi byi nga kona exikarhi ka nuna na nsati?

¹¹ Ku va mudyondzisiwa wa Yesu Kreste la tinyiketeleke ni la khuvuriweke hi ndlela yo karhi swi fana ni ku nghenela vukati. Ematikweni yo tala, siku ra mucato ri ta endzhaku ka magoza yo hlayanyana. Wanuna ni wansati va hlangana, va tivana, kutani va rhandzana. Endzhaku va vutana. Nkhuvo wa vukati wu kombisa xiboho lexi va xi endleke va ri vambirhi—ku nghenela vukati kutani va hanya swin’we tanihi nuna ni nsati. I nkhuvo wa vukati lowu kombisaka masungulo ya vuxaka byebyo byo hlawuleka erivaleni. Siku rero ri fungha masungulo ya vukati. Hi ku fanana, nkhuvulo wu fungha masungulo ya vutomi lebyi nyiketeriweke leswaku hi famba na Yehovha hi ku va ni vuxaka lebyinene na yena.

¹² Xiya xikombiso xin’wana. Endzhaku ka siku ra mucato, rirhandzu exikarhi ka nuna na nsati ri fanele ri enta ni ku hetiseka. Leswaku vanghana va vukati va rhandzana swinene, va fanele va lwela ku hlayisa ni ku tiyisa vuxaka bya vona bya vukati handle ka vutianakanyi. Hambileswi hi nga tekaniki na Xikwembu, endzhaku ka ku khuvuriwa ka hina hi fanele hi lwela ku tshama hi ri ni vuxaka lebyikulu na Yehovha. Matshalatshala ya hina ya ku endla ku rhandza ka yena wa ma xiya ni ku ma tlangela, kutani a tshinela ekusuhi na hina. Mudyondzisiwa Yakobo u tsarile a ku: “Tshinelani eka Xikwembu, kutani xi ta tshinela eka n’wina.”—Yakobo 4:8.

Ku Famba eMitileni Ya Yesu

13. Eku fambeni ka hina ni Xikwembu, i xikombiso xa mani lexi hi faneleke hi xi landzela?

¹³ Leswaku hi famba na Yehovha, hi fanele hi fambisana ni xikombiso lexi vekiweke hi Yesu Kreste. Muapostola Petro u tsarile a ku: “Mi vitaneriwe endleleni leyi, hikuva hambi Kreste u xanisekele n’wina, a mi siyela ntila leswaku mi landzelerisisa mikondzo yakwe.” (1 Petro 2:21) Tanihi leswi Yesu a a hetisekile naswona hina hi nga hetisekangiki, xikombiso lexi a hi vekeleke xona a hi nge swi koti ku xi landzela hi ku hetiseka. Hambiswiritano, Yehovha u langutele leswaku hi endla leswi hi nga swi kotaka. A hi xiyeni swilo swa ntlhanu malunghana ni vutomi ni vutirheli bya Yesu leswi Vakreste lava tinyiketeleke va faneleke va lwela ku swi tekelela.

14. Ku katseka yini emhakeni ya ku tiva Rito ra Xikwembu?

¹⁴ Yesu a a ri ni vutivi lebyi kongomeke ni lebyi heleleke hi Rito ra Xikwembu. Hi nkarhi wa vutirheli byakwe, Yesu a a tshaha eMatsalweni ya Xiheveru nkarhi na nkarhi. (Luka 4:4, 8) Ina, varhangeri va vukhongeri lava hombolokeke va minkarhi yoleyo na vona a va tshaha eMatsalweni. (Matewu 22:23, 24) Ku hambana ka swona hi leswaku Yesu a a twisisa leswi Matsalwa wolawo a ma vula swona, naswona a a ma tirhisa evuton’wini bya yena. A a nga tivi nhlamuselo ya Nawu ntsena, kambe a a tiva ni mongo wa kona. Loko hi landzelela xikombiso xa Kreste, na hina hi fanele hi lwela ku twisisa Rito ra Xikwembu, hi kuma mongo wa rona. Loko hi endla tano, hi nga va vatirhi lava amukeriwaka hi Xikwembu, lava kotaka ku ‘tamela rito ra ntiyiso hi mfanelo.’—2 Timotiya 2:15.

15. Yesu u xi veke njhani xikombiso malunghana ni ku vulavula hi Xikwembu?

¹⁵ Kreste Yesu u vulavule ni van’wana malunghana ni Tata wakwe wa le tilweni. Yesu a nga byi fihlanga vutivi lebyi a a ri na byona bya Rito ra Xikwembu. Hambi ku ri valala va yena a va n’wi vitana “Mudyondzisi,” hikuva kwihi ni kwihi laha a yeke kona a a vulavula ni van’wana hi Yehovha ni swikongomelo swa Yena. (Matewu 12:38) Yesu a a chumayela erivaleni etempeleni, emasinagogeni, emitini ni le matiko-xikaya. (Marka 1:39; Luka 8:1; Yohane 18:20) A a dyondzisa hi ntwela-vusiwana ni musa, a kombisa rirhandzu eka lava a a va pfuna. (Matewu 4:23) Lava va tekelelaka xikombiso xa Yesu na vona va kuma tindhawu ni tindlela to tala to dyondzisa van’wana malunghana na Yehovha Xikwembu ni swikongomelo swa yena leswinene.

16. Vuxaka lebyi Yesu a a ri na byona na vagandzeri-kulobye va Yehovha a byi tiye ku fikela kwihi?

¹⁶ Yesu a a ri ni vuxaka lebyikulu ni van’wana lava a va gandzela Yehovha. Siku rin’wana loko Yesu a ri karhi a vulavula ni mintshungu, mana wakwe ni vamakwavo lava a va nga ri vapfumeri va fikile va ta vulavula na yena. Rungula ra Bibele ri ri: “Un’wana a ku eka yena: ‘Waswivo! Mana wa wena ni vamakwenu va yime hala handle, va lava ku vulavula na wena.’ A hlamula loyi a n’wi byelaka a ku: ‘I mani mana wa mina, naswona i vamani vamakwerhu?’ Kutani a tshambulutela voko rakwe eka vadyondzisiwa vakwe, a ku: ‘Maswivo! Mana wa mina ni vamakwerhu hi lava! Hikuva mani na mani la endlaka ku rhandza ka Tata wa mina la nge tilweni, hi yena a nga makwerhu wa xinuna, hi yena a nga makwerhu wa xisati, hi yena a nga manana.’” (Matewu 12:47-50) Leswi a swi vuli leswaku Yesu a a landzula ndyangu wa ka vona, hikuva leswi endlekeke endzhaku swi komba leswaku a nga endlanga tano. (Yohane 19:25-27) Kambe mhaka leyi yi kandziyisa rirhandzu leri Yesu a a ri na rona eka vapfumeri-kulobye. Hi ku fanana namuntlha, lava va fambaka na Xikwembu va lwela ku va ni xinakulobye ni malandza man’wana ya Yehovha naswona va va ni rirhandzu lerikulu eka vona.—1 Petro 4:8.

17. Yesu a a titwisa ku yini hi ku endla ku rhandza ka Tata wakwe wa le tilweni, naswona sweswo swi fanele swi hi khumba njhani?

¹⁷ Hi ku endla ku rhandza ka Xikwembu, Yesu u kombise rirhandzu eka Tata wakwe wa le tilweni. Yesu u yingise Yehovha eka swilo hinkwaswo. U te: “Swakudya swa mina i ku endla ku rhandza ka loyi a ndzi rhumeke ni ku heta ntirho wakwe.” (Yohane 4:34) Nakambe Kreste u te: ‘Nkarhi hinkwawo ndzi endla swilo leswi tsakisaka Xikwembu.’ (Yohane 8:29) Yesu u rhandze Tata wakwe wa le tilweni swinene lerova a “titsongahat[a] kutani a yingisa ku ya fika eku feni, ina, rifu emhandzini ya nxaniso.” (Vafilipiya 2:8) Hi ku fanana, Yehovha u katekise Yesu, a n’wi tlakusela exikhundlheni xa vulawuri ni ku dzuneka lexi tluriwaka hi xa Yehovha ntsena. (Vafilipiya 2:9-11) Ku fana na Yesu, hi kombisa rirhandzu ra hina eka Xikwembu hi ku hlayisa milawu ya xona ni hi ku endla ku rhandza ka xona.—1 Yohane 5:3.

18. Yesu u veke xikombiso hi ndlela yihi emhakeni ya xikhongelo?

¹⁸ Yesu a a ri munhu wo khongela. U khongerile loko a khuvuriwa. (Luka 3:21) Loko a nga si hlawula vaapostola vakwe va 12, u khongele vusiku hinkwabyo. (Luka 6:12, 13) Yesu u dyondzise vadyondzisiwa vakwe ndlela yo khongela. (Luka 11:1-4) Evusikwini bya le mahlweni ka ku fa kakwe, u khongelele vadyondzisiwa va yena a tlhela a khongela na vona. (Yohane 17:1-26) Xikhongelo a ku ri nchumu wa nkoka evuton’wini bya Yesu, naswona xi fanele xi va nchumu wa nkoka ni le vuton’wini bya hina, tanihi leswi hi nga valandzeri va yena. I lunghelo lerikulu swonghasi ku vulavula ni Hosi ya Vuako Hinkwabyo hi xikhongelo! Ku tlula kwalaho, Yehovha wa swi hlamula swikhongelo, hikuva Yohane u tsarile a ku: “Ku tiyiseka loku hi nga na kona ha xona, i ka leswaku, ku nga khathariseki leswaku i yini lexi hi xi kombelaka hi ku ya hi ku rhandza ka xona, xa hi twa. Ku tlula kwalaho, loko hi tiva leswaku xa hi twa malunghana ni xin’wana ni xin’wana lexi hi xi kombelaka, ha swi tiva leswaku hi ta swi kuma swilo leswi hi swi kombelaka tanihi leswi hi swi kombelaka eka xona.”—1 Yohane 5:14, 15.

19. (a) I timfanelo tihi ta Yesu leti hi faneleke hi ti tekelela? (b) Hi pfuneka hi tindlela tihi loko hi dyondza vutomi ni vutirheli bya Yesu?

¹⁹ Hi nga dyondza swo tala swinene loko hi kambisisa vutomi ni vutirheli bya Yesu Kreste loko a ha ri laha misaveni! Anakanyisisa hi timfanelo leti a ti kombiseke: rirhandzu, ntwela-vusiwana, musa, matimba, ku ringanisela, ku anakanyela, ku titsongahata, xivindzi ni ku pfumala vutianakanyi. Loko hi dyondza leswi engetelekeke hi Yesu, ku navela ka hina ku va vadyondzisiwa vakwe lava tshembekaka ka kula. Nakambe ku tiva Yesu swi endla leswaku hi va ni vuxaka lebyikulu na Yehovha. Phela, Yesu a a ri xikombiso lexi hetisekeke xa Tata wakwe wa le tilweni. A a ri ni vuxaka lebyikulu na Yehovha lerova a ku: “Loyi a ndzi voneke u vone na Tatana.”—Yohane 14:9.

Tshemba Xikwembu Leswaku Xi Ku Tiyisa

20. Hi nga tiyiseka njhani eku fambeni ka hina na Yehovha?

²⁰ Loko vana va ha ku sungula ku dyondza ku famba, va dedeleka. Va dyondzisa ku yini ku famba kahle? Hi ku titoloveta ni ku phikelela. Kutani lava va fambaka na Yehovha va lwela ku famba hi magoza lama tiyeke, va nga dedeleki. Leswi na swona swi lava nkarhi ni ku phikelela. Pawulo u kombise nkoka wa ku phikelela eku fambeni na Xikwembu loko a tsala a ku: “Xo hetelela, vamakwerhu, ha mi kombela ni ku mi khongotela hi Hosi Yesu, tanihi leswi mi amukeleke xiletelo lexi humaka eka hina malunghana ni ndlela leyi mi faneleke mi famba ha yona mi tsakisa Xikwembu, hilaha entiyisweni n’wina mi fambaka hakona, leswaku mi hambeta mi swi endla hi xitalo swinene.”—1 Vatesalonika 4:1.

21. Loko hi famba na Yehovha, i mikateko yihi leyi hi nga yi kumaka?

²¹ Loko hi tinyiketele eka Xikwembu hi ku helela, xi ta hi pfuna leswaku hi hamba hi famba na xona. (Esaya 40:29-31) A ku na nchumu lexi misava leyi yi nga hi nyikaka xona lexi ringanaka ni mikateko leyi xi yi nyikaka lava va fambaka etindleleni ta xona. Hi xona ‘lexi hi dyondzisaka leswaku xi hi pfuna, lexi hi fambisaka endleleni leyi hi faneleke hi famba hi yona. Naswona loko kunene hi yingisa swileriso swa xona, ku rhula ka hina ku ta fana ni nambu, ni ku lulama ka hina ku ta fana ni magandlati ya lwandle.’ (Esaya 48:17, 18) Loko hi amukela xirhambo xo famba na Xikwembu, kutani hi famba na xona hi ku tshembeka, hi nga va ni ku rhula na xona hilaha ku nga heriki.

U Nga Hlamurisa Ku Yini Ke?

◻ Ha yini ku famba na Xikwembu xa ntiyiso ku ri lunghelo?

◻ Ha yini ku dyondza, ku tinyiketela ni nkhuvulo ku ri magoza yo sungula ya leswaku hi famba na Yehovha?

◻ Hi nga yi landzela njhani mitila ya Yesu?

◻ Hi swi tivisa ku yini leswaku Yehovha u ta hi tiyisa loko hi famba na yena?

[Swifaniso leswi nga eka tluka 13]

Ku dyondza, ku tinyiketela ni nkhuvulo i magoza yo sungula ya leswaku hi famba ni Xikwembu