Swivutiso Swa Vahlayi
◼ Xana Yesu u endle yini ‘ku lunghisa ndhawu’ ya vadyondzisiwa va yena etilweni?
Emahlweninyana ka ku sungula Xilalelo xa Hosi, Yesu u byele vaapostola va yena vo tshembeka leswaku wa famba. Kavula, a a vula leswaku endzhaku ka loko a file, a a ta teka riendzo ra yena ro ya etilweni. Petro u hlamule hi ku kombela ku pfumeleriwa ku n’wi landza. Kwalaho Yesu u te: “Timbilu ta n’wina ti nga karhateki; pfumelani ka Xikwembu, ni le ka mina mi pfumela. Tindhawu ti tele endlwini ya Tata wa mina; loko a swi nga ri tano, a ndzi ta va ndzi mi byerile; hikuva ndzi ya mi lunghisela kona. Loko ndzi yile ku ya mi lunghisela kona, ndzi ta vuya; kutani ndzi ta mi teka mi ta ka mina, leswaku laha ndzi nga kona, mi va kona na n’wina.”—Yohane 14:1-3.
Xana i “tindhawu” muni leti a ti fanele ku lunghiseleriwa vaapostola? Vahundzuluxeri van’wana va Bibele va hundzuluxele Yohane 14:2 hi ndlela leyi vulaka leswaku Yesu a a vulavula hi “vuwiselo” lebyi laviwaka hi vaapostola endleleni ya vona leyi yaka etilweni kumbe ku kuma ka vona makamara yo hambana-hambana etilweni. Kambe, W. E. Vine ehenhleni ka rito ra Xigriki leri katsekaka u ri: “A ku na nchumu eritweni ku komba makamara yo hambana eTilweni; naswona a ri vuli vuwiselo bya nkarhinyana egondzweni.” Hi ku olova rito ri vula ndhawu yo tshama. Hikokwalaho Yesu a a tshembisa vutshamo ematilweni ya moya laha a a ya va ni Tata wa yena kona.—Vaefesa 1:20; 1 Petro 1:4; 3:21, 22.
Kambe Yesu a a ta va lunghisela hi ndlela yihi vuako byo tano valandzeri va yena vo tshembeka? Loko a file rifu ra gandzelo, Yesu u yile etilweni ku ya nyika Xikwembu nkoka wa ngati ya yena ya vutomi. Leswi ro sungula a swi ta pfuna lava nga ta vitaniwa leswaku va va vadya-ndzhaka va vutomi bya le tilweni. Muapostola Pawulo u tsarile: “Kriste a nga nghenanga exivandleni lexo hlawuleka xo endliwa hi mavoko, lexi ngo va xifaniso ntsena xa lexa xiviri, kambe u nghenile etilweni hi koxe, a ta humelela sweswi emahlweni ka Xikwembu ku hi yimela.” (Vaheveru 9:12, 24-28; Varhoma 6:5; 8:17) Kutani loko Yesu a byele vaapostola leswaku u ya va ‘lunghisela ndhawu,’ kunene a a tsundzuka ‘ku humelela ka yena emahlweni ka Xikwembu hikwalaho’ ka vona. Hi le ndzhaku ka loko a endle sweswo ntsena laha vona kumbe vanhu van’wana a va ta n’wi landza etilweni.—Vafilipiya 3:20, 21.
Xana Yesu a a fanele ku endla swilo swin’wana leswaku a va lunghisela ndhawu? Hi nkarhi lowu faneleke, a a ta amukela matimba ya vuhosi naswona a a ta lwa na Sathana, a hlongola yena ni mademona ya yena etilweni. (Nhlavutelo 12:7-9) Leswi a swi ta humelela ku nga si sungula ku pfuxiwa ka le tilweni ka vaapostola ni vatotiwa van’wana lava etleleke eku feni. (1 Vatesalonika 4:14-17) Hambi nhlamuselo ya Yesu ya ‘ku lunghisa ndhawu’ ya valandzeri va yena yi katse ku hlongoriwa ka Sathana etilweni, a hi swi tivi.
Ku tlula kwalaho, a hi swi tivi loko Yesu a ve ni swiavelo swin’wana leswi a swi yelana ni ku lunghisa ndhawu ya Vakriste lava totiweke etilweni. Kambe, hi nga tiyiseka leswaku Yesu u yi lunghisile ndlela ya valandzeri va yena lava totiweke hi ku nyika Xikwembu nkoka wa “ngati ya yena yo saseka.” (1 Petro 1:19) Exisekelweni xa ngati yoleyo, ntwanano lowuntshwa wu endliwile exikarhi ka Yehova Xikwembu ni Vakriste lava totiweke hi moya.