Xiviko Xa Vahuweleri Va Mfumo

Ntiyiso Wa Mfumo Wa Kula eSri Lanka

SRI LANKA, leswi vulaka “Tiko ro Saseka,” i vito ra khale leri tlheleke ri thyiwa xihlala lexi xinene lexi eka vo tala xa ha tivekaka hi vito ra xona ra vahlapfa, “Ceylon.” Hikwalaho ka ndhawu ya xona eLwandle ra India, nakambe xi vuriwa Nthonsi Ra Mihloti ya India; kambe mihloti a ku nga ri yona liya ya ntsako tanihi leswi eminkarhini ya sweswinyana vukarhi bya rixaka byi tlhekekeke, byi va tinhloko-mhaka ta mahungu emisaveni hinkwayo.

Kambe, laha na kona ntiyiso wa Mfumo wa kula. Mabudha, Mahindu, Mamuslim, Maparsi ni Mukriste wa nomu ntsena, va dyondzisiwa leswaku i Mfumo wa Yehova ntsena ha Yesu Kriste lowu nga tisaka ku horisa ka hi laha ku nga heriki ka swilondza swa rixaka ni swa politiki leswi hambanisaka matiko. Mintokoto leyi landzelaka yi kombisa ku kula ka ntiyiso wa Mfumo eka ‘Tiko leri ro Saseka.’

◻ Salimoon u kurisiwe ku pfumela leswaku Qur’an i Rito ra Xikwembu. Kambe a nga swi amukelanga hi laha ku taleke leswaku Xikwembu xa tintswalo hinkwato a xi ta xanisa vanhu etiheleni leti hisaka. Siku rin’wana Timbhoni ta Yehova ti n’wi rhambele enhlanganweni. Hi ku xiya ntiyiso xikan’we-kan’we, a nga ha langutanga endzhaku, naswona sweswi u tirha hi ku tsaka tanihi nkulu ebandlheni ra Vukriste.

◻ Harry, Mubudha wa vutomi byo leha loyi a kombiseke ripfumelo ra vukhongeri bya yena hi ku famba ehenhla ka makala lama pfurhaka, a nga swi kotanga ku landzelela milawu leyi a yi ri edyondzweni ya Mabudha ya ndlela leyi nga hi matlhelo ya nhungu: (1) ku twisisa loku lulameke; (2) mianakanyo leyi lulameke; (3) ku vulavula lokunene; (4) magoza lama lulameke; (5) ndlela leyinene yo tihanyisa; (6) matshalatshala lamanene; (7) ku tsundzuka loku lulameke, na (8) ku yingisa loku lulameke. Leswi swi fanele ku tata xiphemu xin’wana ni xin’wana xa vutomi bya munhu. Hambi leswi a tivoneke a ri Mubudha lonene, ku dzaha ka yena, ku nwa ni mahanyelo man’wana lama nga fanelangiki swi vumbe swiphiqo ni ndyangu wakwe. Eku heteleleni, u kunguhate ku dyondza Bibele. Kambe ku hava la tinyiketeleke ku dyondza na yena. U twe leswaku Timbhoni ta Yehova ti nga ha swi tsakela, kutani u ve kona enhlanganweni eHolweni ya Mfumo, naswona dyondzo yi lunghiseleriwile. Un’wana wa Timbhoni loyi a a ri Mumuslim u n’wi pfune ku dyondza leswi Bibele yi swi dyondzisaka. Sweswi, eku heteleleni, u kume matimba lama humaka eka Yehova yo landzelela ntila wa milawu leyi lulameke hi laha ku humelelaka. Wa tsaka ku tirha tanihi nandza wa vutirheli naswona u endla makungu yo nghenela vutirheli bya vuphayona.

Kutani ntiyiso wa Mfumo wa kula eSri Lanka, naswona sweswi ku ni 1 086 wa Timbhoni etikweni leri ro saseka. Ku kula loku ku vula leswaku miako ya rhavi ya laveka, naswona ndhawu ya leswi ya karhi ya laviwa. Vamakwerhu va tlhela va aka Tiholo ta Mfumo. Le Puttalam bandlha leri nga ni mindyangu ya khume ri kunguhate ku aka Holo ya Mfumo ni ku yi aka yi kula ku ringana ku yi tirhisela tinhlengeletano ta xifundza. Holo leyi yi hetiwe hi nkarhi lowu faneleke ku yi tirhisela nhlengeletano ya xifundza, laha 107 va veke kona. Sweswi bandlha leri ri andze hi kwalomu kambirhi, ri na lava tlulaka 75 wa lava vaka kona eminhlanganweni leyi khomeriwaka eTamil ni le Sinhalese. Naswona hambi swi ri tano ka ha ri na xivandla lexikulu xa ku kula loku yaka emahlweni.

Vuprofeta lebyi hetisekeke bya Bibele byi kombetela eka mhaka ya leswaku ku nga ri khale mihloti hinkwayo ya ku hlunama yi ta hlanguriwa emahlweni hinkwawo tanihi laha Xikwembu xi tshembiseke ha kona. Hambi ku ri miehleketo ya vukarhi bya tinxaka a yi nga ha ti etimbilwini. (Nhlavutelo 21:4; Esaya 65:17) Naswona eka ‘nthonsi leri ra mihloti’ leri rhandzekaka ra xihlala, mihloti ya ntsako yi ta halaka loko mimbuyelo ya mihandzu yo rhula ya Mfumo wa Xikwembu yi hambeta yi tsakeriwa hi laha ku nga heriki.