Yimani Mi Tiyile Mi Lwisana Ni Marhengu Ya Sathana
“Havaxelani swisirhelelo ni matlhari hinkwawo lawa Xikwembu xi mi nyikaka wona, leswaku mi ta kota ku yima mi lwa ni mano layo biha [Xigriki, “swiendlo swa vusukumbele”] ya Diyavulosi.”—VAEFESA 6:11.
1. Hi byihi vumbhoni bya leswaku Sathana u kona lebyi nyikeriweke hi miringo ya Yesu?
XANA Sathana u kona hakunene? Vanhu van’wana va endla njhekanjhekisano wa leswaku eBibeleni, “Sathana” swi vula ntsena vubihi lebyi nga endzeni ka munhu. Va ala vukona byakwe tanihi xivumbiwa. Kambe xana Matsalwa ya hi byela yini? Timhaka ta Evangeli ta Matewu na Luka ti komba leswaku Kriste Yesu u ringiwe hi ku kongomana makhamba manharhu hi Sathana, naswona khamba rin’wana ni rin’wana Yesu u n’wi arile hi ku tirhisa Tsalwa. Ha yini Yesu a n’wi hlamule hi Matsalwa ya Xiheveru? Hikuva Sathana u te eka yena a tirhisa Matsalwa wolawo hi ndlela yo hoxa leswaku a n’wi dyohisa ni ku n’wi hlulekisa tanihi N’wana wa Xikwembu, Rixaka leri tshembisiweke.—Matewu 4:1-11; Luka 4:1-13.
2. Hi swi tivisa ku yini leswaku Yesu a nga swi ehleketelanga swiendlakalo swakwe na Sathana?
2 Handle ko tipfinyinga, Yesu, munhu la hetisekeke, a nga swi ehleketelanga swiendlakalo leswi. (Vaheveru 4:15; 7:26) U kongomiwe hi munhu la fanaka loyi a a ri matimba lama a ya hlohlotela nyoka le Edeni, khale ka makwavo wakwe loyi wa ntsumi loyi malembe yo tala lama hundzeke a xandzukeke naswona sweswi a a tiyimisele ku lwisana ni ku hetiseka ka Genesa 3:15. Sathana u lave ku tshova vutshembeki bya Rixaka leri tshembisiweke. Hi ku tlharihela swiendlo swakwe swa vusukumbele, Yesu u lwisane ni Muringi loyi hi laha ku tiyeke. Sathana u endlise ku yini ke? “Loko Diyavulosi a hetile ku ringa Yesu hi matlhelo hinkwawo, a n’wi tshika, a yimela ku kuma nkarhi wun’wana lowunene.” Kahle-kahle, Yesu a nga karhalanga ha yena! Sathana, hi ku hlundzuka, u n’wi tshikile, “kutani tintsumi ti ta ka Yesu, ti ta n’wi tirhela.”—Luka 4:13; Matewu 4:11.
3. N’wamatimu un’wana u ri yini ehenhleni ka ntikelo wa vukona bya Diyavulosi eka Vukriste?
3 Hi laha ku twalaka, n’wamatimu un’wana u ri: “Ku ala vukona ni ntikelo lowukulu wa Diyavulosi eVukristeni i ku lwisana ni dyondzo ya vaapostola ni xiendlakalo xa matimu xa dyondzo ya Vukriste. Tanihi leswi ku hlamusela Vukriste hi marito man’wana ku tlula lawa hi ku kongoma ya nga twariki, hi tlhelo ra vutlhari a swi twali ku endla njhekanjhikisano wa Vukriste lowu vekelaka Diyavulosi etlhelo. Loko Diyavulosi a nga ri kona, kutani Vukriste byi hoxile swinene eka yinhla-nkulu ku sukela eku sunguleni.”a Makumu wolawo ya tisa ntlhontlho eka munhu un’wana ni un’wana emisaveni namuntlha. Xana wa byi xiya vukona bya nala la nga vonekiki loyi a tiyimiseleke ku wisa vuhosi bya Xikwembu ni vutshembeki bya vanhu?
Nhlamuselo Ya Ntiyiso Ya Sathana
4. Xivumbiwa lexi hetisekeke xa moya xi ve Sathana hi ndlela yihi?
4 Sathana i xivumbiwa xa moya lexi nga ni matimba, lexi eku sunguleni xi vumbiweke hi Xikwembu tanihi ntsumi, n’wana wa moya loyi a kotaka ku nghena ehubyeni ya Yehova ya le tilweni. (Yobo 1:6) Hambi swi ri tano, Sathana u tirhise ku rhandza ka yena loku ntshunxekeke ku lwisana ni Xikwembu; hi mano u yise Evha naswona, hi ku tirhisa yena, u yise Adamu eku xandzukeni ni le ku feni. (2 Vakorinto 11:3) Xisweswo, u ve Sathana, leswi vulaka “Nala”—muxandzuki, demona, mudlayi ni muhembi. (Yohane 8:44) Xi fanela swonghasi xiga xa Pawulo xa leswaku “Sathana, u tinyika ngohe ya ntsumi ya ku vonakala,” kasi kahle-kahle i ‘mufumi wa misava ya munyama lowu’! (2 Vakorinto 6:14; 11:14; Vaefesa 6:12) Hi ku phasa tintsumi tin’wana leswaku ti xandzuka, u ti humesile eku vonakaleni ka Xikwembu a ti nghenisa emunyameni wa yena. U ve “hosi ya mademona.” Nakambe Yesu u n’wi hlamusele tanihi “mufumi wa misava leyi.” Swi lo dla ke, leswaku loko a ta va mufumi, u fanele ku va kona tanihi munhu wa moya la vumbiweke.—Matewu 9:34; 12:24-28; Yohane 16:11.
5. Sathana u hlamuseriwa kahle eMatsalweni ya Vukriste ya Xigriki hi ndlela yihi?
5 Hambi leswi Sathana a nga vuriwiki ngopfu eMatsalweni ya Xiheveru, u paluxiwe hi xitalo eMatsalweni ya Vukriste ya Xigriki—lerova hi kuma vito leri nge Sathana kona minkarhi ya 36 na rito leri nge Diyavulosi, minkarhi ya 33. (Vona Comprehensive Concordance of the New World Translation of the Holy Scriptures.) U tlhela a hlamuseriwa ehansi ka mavito ni swithopo swin’wana. Mambirhi ya wona lawa ma tirhisiwe hi Yohane eka Nhlavutelo 12:9: “Hi loko dragona leyikulu leyi yi cukumetiwa yi wela hansi, yona nyoka ya khale leyi vuriwaka Diyavulosi na Sathana, Mukanganyisi wa misava hinkwayo.”—Nakambe vona Matewu 12:24-27; 2 Vakorinto 6:14, 15.
6. Hi yihi nhlamuselo ya rito leri nge “Diyavulosi”?
6 Laha ka Nhlavutelo ku humelela rito ra Xigriki leri nge di·aʹbo·los, leri hundzuluxeriweke va ku “Diyavulosi.” Hi ku ya hi mudyondzi wa Mugriki J. H. Thayer, hi ku kongoma ri vula “mutseketseli, muhehli wo hemba, muhlevi.” (Ringanisa 1 Timotiya 3:11; 2 Timotiya 3:3, Kingdom Interlinear.) W. E. Vine u hlamusela Diyavulosi tanihi “la nga nala la tseketselaka wa Xikwembu ni munhu.”b
7. Hikwalaho ka yini Sathana a yisa matshalatshala yakwe eka vanhu va Yehova?
7 Nala lonkulu a nga fani ni lolo. (1 Petro 5:8) Kumbexana yoleyo hi yona mhaka leyi xivutiso xi nge, “Diyavulosi u kumela mavoko lama lolohaka ntirho wo wu endla.” U tiyimisele ku hambukisa Vakriste hinkwavo va ntiyiso. (2 Timotiya 3:12) Naswona wa swi kota ku yisa mianakanyo eka vanhu va Yehova hikwalaho ka xivangelo xin’we xo olova—ana se misava hinkwayo yi le matimbeni yakwe! (1 Yohane 5:19) Misava ya namuntlha i misava ya Sathana. Yena i mufumi ni xikwembu xa yona, hambi vanhu va swi xiya kumbe e-e. (Yohane 12:31; 2 Vakorinto 4:4) Hikwalaho ke, u ta tirhisa xiendlo xihi na xihi xa vusukumbele kumbe xa mano kumbe xiringanyeto leswaku a hambukisa vanhu va Yehova, ha un’we-un’we kumbe tanihi ntlawa. A hi kambisiseni tin’wana ta tindlela leti a tirhaka ha tona.—Marka 4:14, 15; Luka 8:12.
Swiendlo Swa Sathana Leswi Kanganyisaka Ni Swa Vusukumbele
8. Hi wihi mpfuno lowu Sathana a nga ha vaka a tirha ha wona ku lwisana na hina?
8 Sathana u ve ni nkarhi wo leha wo dyondza ntivo-miehleketo wa vanhu, wo kambisisa ntumbuluko wa vanhu ni vuyelo bya wona hinkwabyo bya loko va nga si velekiwa ni lebyi va byi kumeke. Wa yi tiva ndlela yo tlanga hi ku tsana ka hina ni vuhava bya hina. Sweswi, xiyimo hi xihi loko nala wa wena a tiva ku tsana ka wena kutani wena hi wexe u hluleka ku ku vona ke? Manuku u hlome hi ndlela leyi tsaneke yo tilwela, tanihi leswi u nga yi voniki miseve leyi nga etlharini ra wena ra moya. (1 Vakorinto 10:12; Vaheveru 12:12, 13) Ya fanela swonghasi marito ya mutlhokovetseri wa le Scottland lama nge: ‘Loko matimba yo karhi a yo hi nyika ku tivona hi laha van’wana va hi vonaka ha kona! A swi ta hi ntshunxa eka swihoxo swo tala.’
9. Vuyelo bya gome byi nga ha va byihi loko hi hluleka ku tikambela ivi hi hundzuka?
9 Xana hi tsakela ku tivona hi laha van’wana va hi vonaka ha kona—ngopfu-ngopfu hi laha Xikwembu kumbe Sathana va nga ha hi vonaka ha kona? Sweswo swi lava ku tikambela ka xiviri ni ku tihluvukisa ni ku rhandza ku endla ku hundzuka. Ku tikanganyisa swi olova ngopfu. (Yakobo 1:23, 24) Minkarhi yin’wana hi kanganyisiwa swonghasi leswaku hi yimelela maendlelo ya hina! (Ringanisa 1 Samuel 15:13-15, 20, 21, 24.) Naswona swi olova swonghasi ku, “Ina, ku hava loyi a hetisekeke, wa swi tiva!” Kutani sweswo hi leswi Sathana a swi tivaka, naswona u tirhisa ku tsana ka hina. (2 Samuel 11:2-27) Swi khomisa gome swonghasi ku fika emalembeni ya le xikarhi ni ku xiya leswaku hikwalaho ka ndlela ya vutilawuri, leyi nga riki ya munhu hi xiyexe, kumbe leyi nga hava musa leyi munhu a hanyisaneke ni van’wana hi malembe yo tala ha yona, munhu u ve loyi a nga hava xinghana kumbe ku xiya leswaku munhu a nga endlanga nchumu ku endla leswaku vanhu van’wana va va lava tsakeke. Hi mano Sathana kumbexana u hi fambisile evuton’wini a tirhisa vutianakanyi lebyi hi tswariweke na byona ku hi pfala mahlo. Hi hlulekile ku kuma ntikelo wa mianakanyo ya ntiyiso ya Kriste—rirhandzu, ntwela-vusiwana ni musa.—1 Yohane 4:8, 11, 20.
10. I swivutiso swihi leswi hi nga ha tivutisaka swona, naswona ha yini?
10 Hikwalaho ke, leswaku hi lwisana na Sathana, hi fanele ku tikambela. Xana u na ku tsana loku Sathana a nga ku tirhisaka kumbe loku kumbexana a ku tirhisaka sweswi? Xana u na xiphiqo xo tikurisa? Xana minkarhi hinkwayo u fanele ku va wo sungula? Xana ku tinyungubyisa i matimba ya wena lama susumetaka lama fihlekeke? Xana vukwele, ku navela loko biha, kumbe rirhandzu ra mali swi hambukisa vumunhu bya wena ke? Xana u hlundzukisiwa hi ku olova? Xana u xopa-xopa swihoxo ngopfu? Xana u tsemeka nhlana ku tlula mpimo loko u nyikiwa switsundzuxo kumbe xisolo? Wa khunguvanyeka kumbe hambi ku ri ku ala ndzayo ke? Loko hi titiva, hi nga swi lulamisa swiphiqo swo tano, loko hi titsongahata. Handle ka sweswo, hi tipaluxela Sathana.—1 Timotiya 3:6, 7; Vaheveru 12:7, 11; 1 Petro 5:6-8.
11. Hi tihi tindlela ta vukanganyisi leti Sathana a nga ha ringetaka ku tsongahata vumoya bya hina ha tona?
11 Nakambe Sathana a nga tsongahata vumoya bya hina hi ndlela ya mano, leyi kanganyisaka. Kumbexana hi vavisiwa hi ndlela leyi swilo swi endliwaka ha yona ebandlheni kumbe enhlengeletanweni. Hakanyingi hi hava mintiyiso hinkwayo, kambe hi ku olova hi tsutsumela ku boha makumu. Loko vuxaka bya hina na Yehova byi tsanile, manuku i goza ro koma ro ya emianakanyweni ni le minkanakanweni leyo biha ehenhleni ka ntiyiso. Van’wana va nga ha languta ndlela yo tiyimelela yo huma evutihlamulerini bya leswi ntiyiso wu swi katsaka. Kutani Sathana u nghenisa ku pfumala ku tshembeka ni ku kanganyisa etimbilwini ta vona. Hi ku hatlisa i vahlaseriwa va vugwinehi, naswona Sathana wa tsaka.—Luka 22:3-6; Yohane 13:2, 27; 2 Yohane 9-11.
12. (a) Van’wana va kandziwe mapfalo hi Sathana hi ndlela yihi? (b) Sathana u phasela vo tala evunghwavaveni hi ndlela yihi?
12 Van’wana va kandziwa mapfalo hi Sathana hayi ku endla swidyoho leswikulu leswi faneriwaka hi ku susiwa ntsena kambe hambi ku ri ku tirhisa mavunwa ni vuxisi leswaku va ringeta ku xisa vakulu va bandlha. Ku fana na Ananiya na Safira, va ehleketa onge va kanganyisa ni tintsumi ni moya lowo kwetsima wa Xikwembu. (Mintirho 5:1-10) Magidi yo tala emalembeni ya sweswinyana ya wele exirimbanini xa Sathana xa vunghwavava. Diyavulosi wa swi tiva leswaku minyanyuko ya vanhu ya rimbewu yi na matimba, naswona hi ku tirhisa mafambiselo yakwe ya misava, wa kurisa, a hambukisa ni ku thyakisa ntirho wa rimbewu. (Tinhlayo 25:1-3) Vakriste lava nga nghenangiki evukatini va nga ha ringeriwa ku endla vumbhisa kumbe ku tirhisiwa kun’wana loko biha ka rimbewu. (Swivuriso 7:6-23) Loko Vakriste lava tekeke va pfumelela mianakanyo ni timbilu ta vona swi tsendzeleka, va nga wela emahanyelweni lama kanganyisaka hi ku olova, va xenga vukati lebyi va hlambanyeleke vutshembeki eka byona.—1 Vakorinto 6:18; 7:1-5; Vaheveru 13:4.
13. (a) Thelevhixini yi nga yi vumbisa ku yini mianakanyo ya hina? (b) Hi nga lwisana ni nkucetelo wo tano hi ndlela yihi?
13 Hi hanya emisaveni leyi mavunwa, vuxisi ni ku kariha lokukulu swi tolovelekeke. Sathana u tirhisa vuhaxi hi xitalo ku hundzisela mianakanyo leyi yi onhakeke. Mintlangu ya thelevhixini kumbe mintlangu ya swiphemu swi kombisa vanhu lava vonakaka va nyanyula lava hanyaka exirimbanini xa vuxisi lebyikulu. Loko hi pfumelela ku anakanya koloko ku hi khumba, hi ku hatlisa hi nga sungula ku pfulela swidyoho “leswintsongo,” leswi swi nga vaka xibilohwana xo nghenisa swidyoho “leswikulu.” Swiringanyeto leswi kanganyisaka swa Sathana swi tinghenisa hi ku olova emianakanyweni ya hina. Hi nga yi fularherisa ku yini minkucetelo yo tano? Mi nga “nyiki Diyavulosi nkarhi,” hi laha Pawulo a tshinyeke ha kona. Sweswo nakambe swi vula ku lawula loyi u n’wi pfumelelaka ekaya ka wena hi ku tirhisa thelevhixini. Xana a hi fanelanga ku venga ku nghena ka vanhu lava nga ni vukarhi, vunghwavava, lava nga ni tinhlamba lava tisaka thyaka ekamareni ra hina ro tshama eka rona?—Vaefesa 4:23-32.
Xana Hi Nga Lwa Na Sathana Ivi Hi Tshama Hi Tshembekile Eka Xikwembu Hi Ndlela Yihi?
14. I ku tiyimisela kwihi ka matlhelo mambirhi loku lavekaka leswaku hi lwisana na Sathana, naswona leswi swi lava yini?
14 Leswi hi nga ni nala wo tano wa matimba, la tlulaka munhu loyi a lwisanaka na hina swivumbiwa leswi nga hetisekangiki swa vanhu, hi nga byi hlayisisa ku yini vutshembeki bya hina? Xilotlelo xi kumeka eka marito ya Yakobo lama nge: “Loko swi ri tano, titsongahateni emahlweni ka Xikwembu. Alelani Diyavulosi, kutani u ta mi siya a tsutsuma.” (Yakobo 4:7) Xiya leswaku ndzayo ya Yakobo i ya matlhelo mambirhi. Loko hi ri karhi hi alela Diyavulosi ni ku rhandza kakwe, hi fanele ku titsongahatela ku rhandza ka Xikwembu. Sweswo swi katsa ku tsakela ku rhandza ka Xikwembu ni ku venga ku rhandza ka Sathana. (Varhoma 12:9) Xisweswo, Yakobo u ri: “Tshinelani kusuhi ni Xikwembu kutani xi ta tshinela kusuhi na n’wina. Hlambani mandla ya n’wina, n’wina vadyohi, mi basisa timbilu ta n’wina, n’wina vanhu va miehleketo mimbirhi.” (Yakobo 4:8) Ina, eku lwisaneni ka hina na Sathana, ku hava xivandla xa mbilu leyi nga helelangiki kumbe ku kanakana. Hi nga ka hi nga swi koti ku tshika vutshembeki bya hina hi ku vona ndlela leyi hi nga tshinelaka kusuhi ha yona ni mfungho wa ndzilakano ku suka evubihini. Hi fanele ku “[venga] le’ŝo biha” hi laha ku heleleke.—Psalma 97:10.
15. Hikwalaho ka yini ‘matlhari hinkwawo lama humaka eka Xikwembu’ ya ri ya nkoka? Kombisa.
15 Ndzayo leyi xiyekaka yo lwisana na Sathana yi kumeka eka Vaefesa ndzima 6. Xana Pawulo u ri hi nga lwisana ni “mano,” “marhengu,” kumbe “vusukumbele” bya Sathana hi ndlela yihi? (Vaefesa 6:11, Phillips, New International Version, The Jerusalem Bible) Wa tsundzuxa: “Havaxelani swisirhelelo ni matlhari hinkwawo lawa Xikwembu xi mi nyikaka wona.” Xiga lexi lexi nge “matlhari hinkwawo” a xi pfumeleli xivandla xa langutelo ra vusopfa eVukristeni, tanihi leswi socha ra Rhoma a ri nga ta swi tiyela ku va ni vusopfa loko ri lunghiselela nyimpi. Socha a ri ta endlisa ku yini loko ri tilulamisile hi matlhari hinkwawo handle ka xitlhangu kumbe xihuku? Ri nga ha va ri anakanyile ri ku, ‘Xexo hakunene i xitlhangu lexikulu, naswona xihuku xa tika. Swi na ntiko lowukulu, naswona a ndzi kali ndzi swi lava hakunene.’ Anakanya xiyimo—socha ra Rhoma ri tihlomisele ku lwa kambe ri ri hava swilo swa rona leswikulu swo tisirhelela.—Vaefesa 6:16, 17.
16. (a) Hi fanele ku landzela xikombiso xa Yesu eku tirhiseni ka “fumu ra hina” hi ndlela yihi? (b) Hi nga ku hlayisisa ku yini ku tirindza ka hina ‘emiseveni leyi pfurhaka’ ya Sathana, naswona hi vuyelo byihi?
16 Nakambe, anakanya hi socha leri nga hava tlhari ra rona. “Fumu ra Moya” i xisirhelelo lexinene, tanihi leswi ri tirhisiwaka ku sivela matlhari lama Sathana a ma tisaka eka Mukriste. “Fumu” ra hina ri fanele ku tshama ri tilulamisile. Swi ta va hi ndlela yoleyo loko hi nga yi honisi dyondzo ya hina ya munhu hi xiyexe ni ya ndyangu ya Bibele. Kambe hi ndlela leyi tlakukeke, ‘fumu leri . . . Rito ra Xikwembu’ i xitirho xa hina xo lwa hi xona. Yesu u ri tirhise hi tindlela hinkwato. (Matewu 4:6, 7, 10; 22:41-46) Kutani na hina swa hi fanela. Hi fanele ku hambeta hi kurisa ku tlangela ka hina ka ntiyiso. Hi nga ka hi nga swi koti ku hlayisa vumoya bya hina exisekelweni xa leswi hi swi dyondzeke etin’hwetini ta hina kumbe emalembeni ma nga ri mangani yo sungula entiyisweni. Loko hi hlulekile ku pfuxeta tindlela ta moya ta mianakanyo ya hina, xivono xa hina xa moya a xi ta va lexi nga nyawuriki. Ku hisekela ka hina vugandzeri bya ntiyiso bya Yehova a ku ta nyamalala. A hi ta va lava tsaneke emoyeni. A hi nga ha ta swi kota ku lwisana ni minhlaselo ya maxaka, vanghana, vanakulorhi kumbe vagwinehi lava nga ha hlaselaka tidyondzo ta hina. Kambe Xikwembu xi ta hi ponisa eka Diyavulosi ni ‘miseve yakwe leyi hisaka’ loko hi hambeta hi tihlomisa hi “matlhari hinkwawo lawa Xikwembu xi [hi] nyikaka wona.”—Esaya 35:3, 4.
17, 18. Nyimpi ya hina i yo lwisana na mani, naswona hi nga hlurisa ku yini?
17 Ina, Pawulo u kandziyise khombo ro katseka enyimpini ya Vukriste loko a tsarile a ku: “Nyimpi ya hina a hi yo lwa ni valala va vanhu, kambe i yo lwa ni matimba ya hinkwako-nkwako, hi lwa ni vafumi ni tindhuna ta misava leyi ya munyama, hi lwa ni mavuthu lama tlulaka ya vanhu ya vuhomboloki ematilweni.” (Vaefesa 6:12, The New English Bible) Xana hina vanhu lava nga nyawuriki hi nga lwa ivi hi hlula enyimpini yo tano leyi nga ringanisiwiki hi ndlela yihi? Pawulo u tlhela a kandziyisa yinhla yakwe a ku: “Hikokwalaho hlomani xisirhelelo ni matlhari hinkwawo ya Xikwembu wa ha ri nkarhi, leswaku mi ta kota ku tilwela hi siku ra khombo, kutani loko mi ta va mi lwile ku ya fika makumu, mi ta tikuma ma ha tiyile.” (Vaefesa 6:13) Xiga-nkulu hi lexi: “Loko mi ta va mi lwile ku ya fika makumu.” Leswi nakambe a swi pfumeleli Vukriste bya mbilu leyi nga helelangiki kumbe lebyi kavanyetiwaka.—1 Yohane 2:15-17.
18 Hikwalaho, a hi yimeni hi tiyile entiyisweni, hi rhandza vululami bya Yehova, hi chumayela mahungu lamanene ya ku rhula, hi namarhela ripfumelo leri tiyeke eku hlayisekeni loku Yehova a ku nyikaka ha Kriste Yesu, loko hi ri karhi hi titshega hi Rito ra Xikwembu tanihi khokholo ra hina. (Vaefesa 6:14-17) Tsundzuka, Xikwembu xa hi khathalela naswona xi ta hi pfuna ku hlula miringo ni mivilelo leyi taka eka hina emafambiselweni ya swilo ya Sathana. Onge hinkwerhu ka hina hi nga hlayisa xitsundzuxo lexi nge: “Tikhomeni mi hiteka. Nala wa n’wina a nga Diyavulosi, wa rhendzeleka-rhendzeleka ku fana ni nghala leyi bongaka, yi lava loyi yi nga n’wi dyaka.” Ina, “n’wi aleleni mi tiya eku pfumeleni ka n’wina.”—1 Petro 5:6-9.
19. (a) Hi rihi lunghiselelo rin’wana ra nkoka leri hi faneleke ku ri tirhisa leswaku hi lwisana na Sathana? (b) I yini lexi eku heteleleni xi nga ta humelela eka Sathana?
19 Hi nga tshuki hi rivala ku tlhandlekela ka nkoka ka Pawulo eka “matlhari hinkwawo.” U ri: “Endlani hinkwaswo leswi hi ku khongela, mi kombela ku pfuniwa hi Xikwembu; khongelani minkarhi hinkwayo hi laha Moya wu mi letelaka ha kona. Hikokwalaho, tshamani mi hanyanyile, mi nga rhuteli ku khongelela vahlawuriwa va Xikwembu hinkwavo.” (Vaefesa 6:18) Nala wa hina la nga vonekiki u na matimba ngopfu lerova hi fanele ku “[endla] leswi hi ku khongela, [hi] kombela.” Manuku ke, swikhongelo swa hina swi fanele ku va swa xiviri ni leswi hambaneke swonghasi! Ku titshenga ka hina loku heleleke hi Yehova i ka nkoka loko hi ta hlula enyimpini ivi hi hlayisa vutshembeki. Hi yena ntsena a nga hi nyikaka ‘matimba lama tlulaka lama tolovelekeke’ lama nga ta hi pfuna ku lwisana ni Nala wa hina la nga karhaliki. Mayana ku chavelela loku ku nga swona ku tiva leswaku Nala wa hina lonkulu ku nga ri khale u ta nghenisiwa ekheleni ivi manuku eku heteleleni a heriseriwa makumu!—2 Vakorinto 4:7; Nhlavutelo 20:1-3, 10.
[Tinhlamuselo ta le hansi]
a Satan—The Early Christian Tradition, hi Jeffrey Burton Russell, tluka 25.
b An Expository Dictionary of New Testament Words.
Xana U Nga Hlamula?
◻ Hi swi tivisa ku yini leswaku Sathana i munhu wa xiviri?
◻ Ha yini mavito ni swithopo swin’wana swa Sathana swi fanela?
◻ I ku tikambela kwihi loku nga ha hi pfunaka ku lwisana ni minhlaselo leyi kanganyisaka ya Sathana?
◻ I ndzayo yihi leyi nga ta pfuna eku hluleni ka Sathana, naswona ha yini?
[Xifaniso lexi nga eka tluka 15]
Ndlela yin’wana yo lwisana ni nkucetelo wa Sathana yi hi pfuna ku va lava humelelaka, lava pfunaka, lava nga ni rirhandzu
[Xifaniso lexi nga eka tluka 16]
Hi fanele ku tivonela ku va lava fanaka na Ananiya na Safira, lava hluriweke hi Sathana
[Xifaniso lexi nga eka tluka 17]
Ku lwisana ni miseve ya Sathana, hi nga ka hi nga swi koti ku tshika xiyenge xihi na xihi xa matlhari ya hina ya moya