Xana Vanhu Hinkwavo Lavanene Va Ya eTilweni?

“Nkosi a wu herile kambe a ku nga ri ku tsemeka nhlana loku tlulaka mpimo. . . . A swi vonaka swi nga kholweki leswaku mavhiki ma nga ri mangani emahlweni xifanyetana xa mina a xi karhi xi sungula ku deya, xikandza xa yena lexintsongo xi khana hi ku n’wayitela ka ntsako lowunene. Kambe sweswi Andrew a a lovile! . . .

“Ndzi tshame ndzi yime efasitereni, ndzi hlometela exinyamini, ndzi lava matilo. ‘Xi kwihi xin’wanana lexi sweswi?’ Ndzi tivutisile ndzi ku: ‘Xana u kun’wana le henhla etilweni exikarhi ka tinyeleti?’”

RIFU ra n’wana loyi a rhandziwaka kumbexana i ntokoto lowu khomisaka gome ngopfu lowu vatswari va nga vaka na wona. Va vutisa va ku: ‘U kwihi n’wana wa hina sweswi? U le tilweni kumbe exivandleni xin’wana?’ Vukhongeri byo tala byi dyondzisa leswaku tincece leti faka ti ya etilweni. EJohannesburg, Afrika Dzonga, marito lama nga eribyeni rin’wana ra sirha ma ri: “Xikwembu xi lave xiluva xo khangula, ntsumi ya xona yi teke un’wana wa hina.” Kambe munhu a nga ha hlamala: ‘Ha yini Xikwembu xi lave “xiluva xo khangula” loko, hi ku ya hi dyondzo leyi tolovelekeke, ana se xi ri na vo tala?’ Ni vanhu vo tala va hlamala . . .

‘Xana Tilo Ri Njhani?’

Vanhu vo tala vo va ni mianakanyo leyi rharhanganeke ntsena ehenhleni ka tilo. Van’wana hi mbilu leyi tiyisekeke va vulavula hi “ku tlhandlukela etilweni loko u fa.” Kambe xana Bibele yi ri yini? Ndzimana ya yona yo sungula yi ri: “E ku sunguleni Šikwembu ši tumbulušile tilo ni misav̌a.” (Genesa 1:1) Leswi swi vula matilo ya xiviri, nxaxamelo lowu vangamaka wa tinyeleti ni swirimele. (Deuteronoma 4:19) Kambe ku tlhela ku va ni matilo ya moya. Xisweswo, Bibele yi vulavula hi ‘xivandla lexi tlakukeke xo kwetsima ni ku saseka’ xa Yehova.—Esaya 63:15.

I mani wo sungula ku tlhandlukela ‘exivandleni lexi xo tlakuka’ xa tata wa hina wa le tilweni? N’wana wa yena la rhandziwaka, Yesu Kriste. U te: “A ku na munhu loyi a tshamaka a tlhandlukela ematilweni, loko a nga ri loyi a xikeke hi le matilweni, yena N’wana-wa-Munhu.” (Yohane 3:13) Leswi swi kombisa kahle leswaku ku hava swivumbiwa swa vanhu leswi yeke etilweni. Kambe Yesu u tshembise leswaku vanhu van’wana va ta ya kona. Emahlweninyana ka ku va a tlhandlukela etilweni, u te eka vadyondzisiwa va yena lava tshembekaka: ‘Ndzi ya mi lunghisela vutshamo . . . kutani ndzi ta mi teka mi ta ka mina, leswaku laha ndzi nga kona, mi va kona na n’wina.’—Yohane 14:2, 3.

Manuku ke, swi le rivaleni leswaku vanhu van’wana lavanene va ya etilweni. Kambe xana i vanhu hinkwavo lavanene va yaka etilweni? Ku vuriwa yini hi kaya ra munhu—misava? Xana yi fanele ku herisiwa hi nyimpi ya nyutliya leswaku yi va nkuma lowu hisiweke lowu hahaka empfhukeni? A swi tano nikantsongo. Bibele yi ri: “Rišaka riṅwana ra hunḍa, kutani ku humelela riṅwana, kambe misav̌a yi ṭhama hi laha ku nga heriki.” (Eklesiasta 1:4) Naswona ha yini Muvumbi a fanele ku herisa misava leyi yo xonga, hambi leswi swiphemu swa yona swi thyakisiweke hi vanhu va vutianakanyi? Rito ra Xikwembu ra tshembisa: “La’v̌o lulama v̌a ta fuma misav̌a, v̌a ṭhama ka yona hi masiku.”—Psalma 37:29.

Manuku ke, swi le rivaleni leswaku misava yi na vumundzuku lebyi tsakisaka. Eka Dyondzo ya yena leyi dumeke ya le Ntshaveni, Yesu u vhumbile a ku: “Ku katekile lavo rhula, hikuva va ta dya ndzhaka ya misava.” (Matewu 5:5) Ku tlula kwalaho, Nhlavutelo, buku yo hetelela ya Bibele, yi kombisa leswaku misava yi ta va paradeyisi. Malunghana ni vanhu lava yingisaka, “Xikwembu hi xoxe xi ta va na vona, xi va Xikwembu xa vona. Xi ta hlangula mihloti hinkwayo emahlweni ya vona, ni rifu a ri nga ha vi kona; hambi ya ri mahlomulo kumbe ku rila kumbe ku vaviseka a swi nga ha vi kona.”—Nhlavutelo 21:3, 4.

Eka leswi nga laha henhla, swi nga voniwa leswaku vanhu van’wana lavanene va ya etilweni, kasi van’wana va ta tiphina hi vutomi emisaveni. Leswi swi vula leswaku ku ni mintlawa mimbirhi ya vanhu leyi hambaneke leyi katsekaka. Xana sweswo swi endlekisa ku yini? Ku tlula kwalaho, ku fana ni mana wa Andrew, vo tala va vilela hi leswi humelelaka eka vana va vona lava faka va nga khuvuriwanga. Makhatoliki ya Rhoma ma dyondzisiwa leswaku va ya exivandleni lexi vuriwaka Limbo. Xana xi kona xivandla xo tano ke? Xana tincece ti ya kona? Tinhlamulo leti anerisaka ni leti chavelelaka ti nyikeriwe exihlokweni lexi landzelaka.