Ntsako Lowu Nga Heriki—ETilweni Kumbe eMisaveni?

XANA ntsako wa wena wu titshege swinene hi leswaku u tshama kwihi? Vanhu vo tala va nga pfumela hi ku olova leswaku ntsako wu titshege ngopfu hi swilo swo fana ni rihanyo lerinene, xikongomelo evuton’wini ni ku hanyisana kahle ni van’wana. Xivuriso xa Bibele xi swi veka hi ndlela leyi: “Matsavu ma antswa laha ku nga ni rirhandzu ematshan’weni ya nkunzi leyi wundleriweke exidyelweni kambe ku ri ni rivengo.”—Swivuriso 15:17.

Hambiswiritano, lexi vavaka hi leswaku kaya ra hina ra laha misaveni i khale ri tiveka hi rivengo, madzolonga ni vubihi bya mixakaxaka. Kambe ku vuriwa yini hi matilo kumbe xivandla xa moya, laha vanhu vo tala va nga ni ntshembo wo ya kona endzhaku ka ku fa. Xana minkarhi hinkwayo a a ku ri ndhawu leyi rhuleke laha ku nga ni ku tshamiseka, yi nga ri na mpfilumpfilu, hi laha vo tala va ehleketaka hakona?

Bibele yi hi dyondzisa leswaku Xikwembu xi tshama etilweni ni swivumbiwa swa moya swa timiliyoni leswi vitaniwaka tintsumi. (Matewu 18:10; Nhlavutelo 5:11) Swi hlamuseriwa tanihi “vana va Xikwembu” va moya. (Yobo 38:4, 7) Ku fana ni vanhu, tintsumi na tona i swivumbiwa leswi tihlawulelaka; a hi tirhoboto. Hikwalaho, swi vula leswaku na tona ti nga hlawula ku endla leswinene kumbe leswi hoxeke. Xana tintsumi ti nga hlawula ku endla leswi hoxeke? Swi nga va hlamarisa vo tala ku twa leswaku magidi ya malembe lama hundzeke, tintsumi to tala ti swi endlile sweswo, entiyisweni ti dyohele Xikwembu—ti xi xandzukela!—Yudha 6.

Vaxandzuki Va Le Tilweni

Xidyoho xi ve kona exivandleni xa moya hikwalaho ko xandzuka ka ntsumi, leyi vitaniweke Sathana (Mukaneti) na Diyavulosi (Mulumbeti). Ntsumi leyi yi tshameke yi tshembeka yi tihlawulele ku endla leswi hoxeke. Endzhaku ka sweswo yi hundzuke mukuceteri la onhaka eka swivumbiwa leswin’wana swa moya lerova hi nkarhi wa Nowa emahlweni ka Ndhambi, nhlayo leyikulu ya swivumbiwa leswi swi landzele Sathana loko a xandzukela Xikwembu.—Genesa 6:2, nhlamuselo ya le hansi ya NW; 2 Petro 2:4.

Tintsumi leti ti dyoheke a ti hlongoriwanga xikan’we-kan’we etilweni. Ematshan’weni ya sweswo ti tshikiwe kwale—handle ko kanakana ti vekeriwe swipimelo swo karhi—ku ringana magidi ya malembe.a Hambiswiritano, loko nkarhi wa Xikwembu wo pfumelela vaendli lava va leswo biha wu herile, va “cukumeteriwe” ehandle ka matilo, laha eku heteleleni va nga ta lovisiwa. Kutani rito ri twakale etilweni ri ku: “Tsakani hikwalaho ka swona, n’wina matilo na n’wina lava tshamaka eka wona!” (Nhlavutelo 12:7-12) Entiyisweni, tintsumi leti tshembekeke a ti tsakile swinene leswaku eku heteleleni matilo a ma nga ha ri na vanhu vo homboloka lava karhataka!

Loko hi languta vuxokoxoko lebyi byi nga tivekiki, swi le rivaleni leswaku ku nge vi na ku rhula ka xiviri loko swivumbiwa leswi tlhariheke swi honisa milawu ni misinya ya milawu ya Xikwembu. (Esaya 57:20, 21; Yeremiya 14:19, 20) Hi hala tlhelo, loko hinkwavo va yingisa milawu ya Xikwembu, ku va ni ku rhula ni ku tshamiseka. (Pisalema 119:165; Esaya 48:17,18) Kutani loko vanhu hinkwavo a va rhandza Xikwembu va tlhela va xi yingisa ivi va rhandzana, xana misava a yi nga ta va vutshamo lebyi rhandzekaka hakunene ni lebyi tsakisaka? Bibele yi hlamula hi ina!

Kambe ku vuriwa yini hi lava alaka hi vomu ku cinca tindlela ta vona leto homboloka? Xana va ta kavanyeta ku rhula ka lava va lavaka ku endla ku rhandza ka Xikwembu hilaha ku nga heriki? Doo, Xikwembu xi hlongole tintsumi leto homboloka etilweni naswona xi ta tlhela xi lovisa vanhu vo homboloka laha misaveni.

Misava Leyi Basisiweke

Xikwembu xi te: “Matilo i xiluvelo xa mina, misava i vunavelo bya mina.” (Esaya 66:1) Leswi xi kwetsimaka swinene, Xikwembu a xi nge pfumeleli “vunavelo” bya xona byi thyakisiwa hi vubihi hilaha ku nga heriki. (Esaya 6:1-3; Nhlavutelo 4:8) Leswi xi hlongoleke mimoya leyo biha etilweni, hilaha ku fanaka xi ta herisa vanhu hinkwavo vo homboloka emisaveni, hilaha tindzimana leti landzelaka ta Bibele ti kombisaka hakona:

“Lava endlaka swo biha va ta herisiwa, kambe lava tshembaka Yehovha hi vona lava nga ta dya ndzhaka ya misava.”—Pisalema 37:9.

“Lavo lulama hi vona lava nga ta tshama emisaveni, naswona lava va pfumalaka xisandzu hi vona lava nga ta sala eka yona. Loko ku ri lavo homboloka, va ta dlayiwa emisaveni; kasi loko ku ri vaxengi, va ta tsuvuriwa eka yona.”—Swivuriso 2:21, 22.

“Swi lulamile eka Xikwembu leswaku xi tlherisela nhlomulo eka lava mi tiselaka nhlomulo, kambe, n’wina lava weriwaka hi nhlomulo, xi ta mi hakela hi ku wisa swin’we na hina eku hlavuteriweni ka Hosi Yesu a huma etilweni swin’we ni tintsumi takwe ta matimba a ri endzilweni lowu pfurhaka malangavi, a tisa ndzihiselo eka lava va nga xi tiviki Xikwembu ni lava va nga ma yingisiki mahungu lamanene malunghana ni Hosi ya hina Yesu. Vona va ta kuma nxupulo wa vuavanyisi bya ku loviseriwa makumu emahlweni ka Hosi ni le ku vangameni ka ntamu wa yona.”—2 Vatesalonika 1:6-9.

“Misava [ya vanhu vo homboloka] ya hundza ni ku navela ka yona, kambe loyi a endlaka ku rhandza ka Xikwembu u tshama hi masiku.”—1 Yohane 2:17.

Xana Misava Yi Ta Tshama Yi Ri Ni Ku Rhula?

Hambileswi Matsalwa ma swi kombisaka kahle leswaku ku pfumelela ka Xikwembu vubihi ku ta hela, hi nga tiyiseka njhani leswaku loko vubihi se byi herisiwile a byi nge he vuyi nakambe? Endzhaku ka Ndhambi ya le nkarhini wa Nowa, byi tlhele byi tala lerova Xikwembu xi kavanyeta marhengu ya vanhu yo homboloka hi ku pfilunganya ririmi ra vona.—Genesa 11:1-8.

Lexi endlaka hi tshemba swinene leswaku vubihi a byi nge he vi kona nakambe, hi leswaku misava a yi nge he fumiwi hi vanhu hilaha a swi ri hakona endzhaku ka Ndhambi. Ematshan’weni ya sweswo yi ta fumiwa hi Mfumo wa Xikwembu. Leswi wu nga ta fuma wu ri etilweni, Mfumo lowu wu ta va hulumendhe yin’we ntsena ya misava. (Daniyele 2:44; 7:13, 14) Wu ta teka goza hi ku hatlisa eka un’wana ni un’wana la ringetaka ku sungula vubihi. (Esaya 65:20) Entiyisweni, eku heteleleni wu ta lovisa musunguri wa vubihi—Sathana Diyavulosi—kun’we ni madimona, tintsumi leto homboloka leti ti n’wi landzeleke.—Varhoma 16:20.

Ku engetela kwalaho, vanhu a va nge vi na xivangelo xo karhateka hikwalaho ka swakudya, swiambalo, vutshamo ni ntirho—leswi hikwalaho ko swi pfumala swi susumetelaka van’wana leswaku va va makhamba. Ina, misava hinkwayo yi ta hundzuriwa yi va paradeyisi leyi nga ni nga ni swilo hinkwaswo hi vunyingi bya swona.—Esaya 65:21-23; Luka 23:43.

Xa nkoka swinene hi leswaku Mfumo wu ta dyondzisa vanhu va wona hi ndlela yo rhula loko hi tlhelo wu va yisa eku hetisekeni. (Yohane 17:3; Varhoma 8:21) Endzhaku ka sweswo, vanhu a va nge he boheki ku lwisana ni mboyamelo wa ku tsana ni wa xidyoho, leswi nga ta endla leswaku swi koteka swi tlhela swi tsakisa ku yingisa Xikwembu hilaha ku hetisekeke, hilaha a swi ri hakona eka Yesu munhu la hetisekeke. (Esaya 11:3) Entiyisweni, Yesu u tshame a tshembekile eka Xikwembu hambiloko a langutane ni ndzingo ni ku xaniseka lokukulu—swilo leswi swi nga taka swi nga tiviwi eParadeyisini.—Vaheveru 7:26.

Xivangelo Lexi Endlaka Van’wana Va Ya eTilweni

Hambiswiritano, vahlayi vo tala va Bibele va ya lemuka marito ya Yesu lama nge: “Endlwini ya Tatana ku ni vutshamo byo tala. . . . Ndzi ya mi lunghiselela ndhawu.” (Yohane 14:2, 3) Xana leswi a swi lwisani ni dyondzo leyi yo hanya hilaha ku nga heriki emisaveni leyi nga paradeyisi?

Tidyondzo leti a ti lwisani. Entiyisweni ta seketelana. Xo sungula Bibele yi ri i nhlayo leyi ringaniseriweke ntsena ya Vakreste lava tshembekaka—va 144 000—lava pfuxeriwaka ku ya hanya etilweni va ri swivumbiwa swa moya. Hikwalaho ka yini va nyikiwa hakelo leyi yo hlawuleka? Hikuva va vumba ntlawa lowu Yohane a wu voneke exivonweni wa lava “va [hanyaka] nakambe, va va tihosi na Kreste ku ringana malembe ya 1000.” (Nhlavutelo 14:1, 3; 20:4-6) Loko va ringanisiwa ni magidi ya timiliyoni ta vanhu emisaveni, hakunene lava 144 000 i “ntlhambinyana.” (Luka 12:32) Tlhandlakambirhi, leswi va langutaneke ni swiphiqo leswi tolovelekeke evanhwini, ku fana na Yesu va ta swi kota ku “hi tshandzisa eku tsaneni ka hina” loko va ri karhi va langutela ntirho wo vuyisela vanhu ni misava exiyin’weni lexinene.—Vaheveru 4:15.

Misava—Kaya Ra Vanhu Ra Hilaha Ku Nga Heriki

Hi ku lunghiselela nkutsulo wa xitlhavelo xa Yesu Kreste, Xikwembu xi sungule ku hlengeleta lava 144 000 kwalomu ka malembe ya 2 000 lama hundzeke, naswona swikombiso swi vula leswaku ntlawa lowu se wu helerile. (Mintirho 2:1-4; Vagalatiya 4:4-7) Hambiswiritano, xitlhavelo xa Yesu a xi nga ri xa swidyoho swa lava 144 000 ntsena, kambe “ni swa misava hinkwayo.” (1 Yohane 2:2) Hikwalaho, hinkwavo lava kombisaka ripfumelo eka Yesu va langutele ku kuma vutomi lebyi nga heriki. (Yohane 3:16) Lava va etleleke emasirheni kambe va ri emianakanyweni ya Xikwembu va ta pfuxiwa, hayi etilweni, kambe leswaku va ta hanya emisaveni leyi basisiweke. (Eklesiasta 9:5; Yohane 11:11-13, 25; Mintirho 24:15) Xana i yini lexi va nga ta xi kuma eka yona?

Nhlavutelo 21:1-4 ya hlamula yi ku: “Waswivo! Ntsonga wa Xikwembu wu le vanhwini . . . Kutani xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.” Ehleketa—rifu, ni xitlhavi ni xirilo swi herisiwe hilaha ku nga heriki evanhwini! Eku heteleleni, xikongomelo xa Yehovha xo sungula mayelana ni misava ni vanhu xi ta fika eku hetisekeni ka xona loku vangamaka.—Genesa 1:27, 28.

Nhlawulo Wa Hina—Wu Vula Vutomi Kumbe Rifu

Adamu na Evha a va nyikiwanga nhlawulo wa ku ya etilweni. Nhlawulo wa vona a ku ri ku yingisa Xikwembu kutani va hanya hilaha ku nga heriki emisaveni leyi nga paradeyisi kumbe va nga xi yingisi kutani va fa. Khombo ra kona va hlawule ku nga yingisi kutani hikwalaho ka sweswo va tlhelele “entshurini” wa misava. (Genesa 2:16, 17; 3:2-5, 19) A ku nga ri xikongomelo xa Xikwembu leswaku ndyangu wa vanhu wu rhanga wu fa kutani wu hundzela etilweni. Xikwembu xi vumbe makume ya magidi ya tintsumi leswaku ti hanya etilweni; swivumbiwa leswi swa moya a hi vanhu lava feke ivi va pfuxeriwa ku ya hanya etilweni.—Pisalema 104:1, 4; Daniyele 7:10.

Xana hi fanele hi endla yini leswaku hi kuma mikateko yo hanya hilaha ku nga heriki emisaveni leyi nga Paradeyisi? Goza ro sungula i ku dyondza Rito ra Xikwembu Bibele yo Kwetsima. Yesu u vule leswi exikhongelweni: “Leswi swi vula vutomi lebyi nga heriki, ku nghenisa ka vona vutivi ha wena, Xikwembu xi ri xin’we xa ntiyiso, ni loyi u n’wi rhumeke, Yesu Kreste.”—Yohane 17:3.

Ku tirhisa vutivi byebyo evuton’wini bya hina i goza rin’wana leri yisaka entsakweni lowu nga heriki eParadeyisini. (Yakobo 1:22-24) Lava va hanyaka hi Rito ra Xikwembu va ni ntshembo wo vona hi mahlo ya vona ku hetiseka ka vuprofeta lebyi tsakisaka ku fana ni lebyi tsariweke eka Esaya 11:9 lebyi nge: “[Vanhu] a va nge endli swo biha kumbe ku onha entshaveni ya mina hinkwayo yo kwetsima; hikuva kunene misava yi ta tala hi ku tiva Yehovha kukota mati lama funengetaka lwandle.”

[Nhlamuselo ya le hansi]

[Swifaniso leswi nga eka tluka 7]

“Lavo lulama va ta dya ndzhaka ya misava, va ta tshama eka yona hi masiku.”—Pisalema 37:29