Marungula Ya Tintsumi Ya Siku Ra Hina

“Xikwembu . . . xi rhumele ntsumi ya xona naswona xi yi yimele hi swikombiso.”—NHLAVUTELO 1:1. NW.

1. I xidoledole xihi lexi nga kona ehenhleni ka vito leri nge Apocalipsi, naswona Nhlavutelo yi paluxa yini ehenhleni ka vumundzuku?

APOCALIPSI. Vito rero ri twiwe ko tala swonghasi eka lembe xidzana leri ra vu-20—kambe ri twisisiwe hi laha ku hoxeke swonghasi! Elangutelweni ra Bibele, a ri vuli ku lovisiwa ka vanhu hinkwavo hi ndzoviso wa nyutliya. Ematshan’wini ya sweswo, rito leri ra Xigriki ri vula ku “paluxa.” Hi ku fanekisela ka vuprofeta, buku ya Bibele ya Apocalipsi, kumbe Nhlavutelo, yi paluxa maendlelo lama hetelelaka eku sunguleni ka nkarhi wa ntsako wa vanhu. Xisweswo, Yohane muapostola wa Yesu u sungula Nhlavutelo hi marito lawa: “Ku katekile munhu loyi a hlayaka mahungu lawa ya vuhlavuteli, ku katekile ni lava va ma yingisaka, ni ku landza leswi tsariweke ebukwini ya kona; hikuva nkarhi wa ku humelela ka swona wu kusuhi.”—Nhlavutelo 1:3.

2, 3. Ha yini misava yi ri leyi nga tsakangiki, naswona Yehova u kunguhata ku endla yini?

² Namuntlha misava a yi tsakanga. Xivangelo xa ku pfumala ka yona ku tsaka xi hlamuseriwe eka risimu leri qambiweke hi Muxe eka 3 460 wa malembe lama hundzeke: “Leŝi v̌a tionheke, a nga na nanḍu ka v̌ona, e tingana ti ni v̌ana v̌a yena, i rišaka ro homboloka ni ro hemba.” (Deuteronoma 32:5) Mawaku ku faneleka konghasi ka marito wolawo eka rixaka ra manguva lawa, leri mintirho ya rona yi soholotiweke ni ku homboloka! Hi xikombiso, rito ro rhanga ra World Military and Social Expenditures 1987-88 yi hlamusela hi ku pakanisa yi ku: “Vutomi bya matiko hinkwawo byi hombolokisiwe hi mphikizano wa matlhari. United States na Soviet Union ya hlanganile ya tirhisa kwalomu ka timiliyoni ta R3 750 hi siku eka nsirhelelo wa nyimpi. Kambe United States i ra vukhume nhungu exikarhi ka matiko hinkwawo ya ku fa ka vana, USSR i ra vumakume-mune-tsevu. Matiko lama ya ha hluvukaka ya tirhisa kwalomu ka ku andza ka mune ka mali eka matlhari ku tlula eka ku khathalela rihanyo ra vanhu va wona. Kambe madzana ya timiliyoni ematikweni wolawo ya ni ndlala; 20 wa tiphesente ta vana va vona va fa emahlweni ka siku ra vona ra vuntlhanu ra ku velekiwa.”

³ Tinhla tin’wana ta tlhandlekela eka ndlela leyi yi onhaka—ku hohloka eka mahanyelo lamanene ni vun’we bya ndyangu, vugevenga ni nchavo lowu xungetaka misava, ku pfumaleka ka rirhandzu ni ku homboloka ka rixaka ra sweswi. Hi nga tsaka swonghasi leswi Yehova a kunguhataka ku “herisa lava herisaka misava”! (Nhlavutelo 11:18) Hi nhlamuselo leyi nyanyulaka, buku ya Bibele ya Nhlavutelo, eka minxaxamelo ya swivono swa 16 yi hlamusela ndlela leyi a nga ta hetisisa leswi ha yona.

“Tintsumi” Ni “Swikombiso”

4. Tintsumi ti katseka njhani eka Nhlavutelo, naswona swivono swi yi kombisa njhani ntsumi leyikulu?

⁴ Nhlavutelo yi tisa ku vonakala eka vuprofeta byo sungula bya Bibele, eka Genesa 3:15, yi komba ndlela leyi rivengo exikarhi ka Sathana ni nhlengeletano ya Xikwembu leyi fanaka ni wansati, ni le xikarhi ka ‘tinxaka’ ta vona timbirhi, ri tlhantlhiwaka ha yona. Yi paluxa ku avanyisa ka Yehova eka valala va yena ni le ka lava va n’wi rhandzaka ni ku seketela vuhosi bya yena. Nhlavutelo yi yisiwe eka Yohane hi “swikombiso” hi ntsumi. Tintsumi tin’wana kumbe varhumiwa, ta hlanganyela eku tiviseni ni le ku endleni ka swikombiso sweswo. Ntsumi leyikulu swinene yi tivisiwe eka Nhlavutelo 1:5 tanihi “Yesu Kriste, mbhoni leyo tshembeka, mativula ya lava feke ni mufumi wa tihosi ta misava.” “Swikombiso,” kumbe swivono, swi n’wi hlamusela nakambe tanihi “nghala,” tanihi “Xinyimpfana,” tanihi “Mikayele,” naswona minkarhi yo hlayanyana tanihi ntsumi ya matimba.—Nhlavutelo 5:5, 13; 9:1, 11; 10:1; 12:7; 18:1.

5. Ku kombisiwe yini eka xivono xo sungula xa Nhlavutelo, naswona xi hi katsisa ku yini?

⁵ Xivono xo sungula, eka Nhlavutelo 1:10–3:22; xi kombisa marungula lama nyanyulaka lama Yesu loyi a kwetsimisiweke a ya hundziselaka eka “tintsumi,” kumbe valanguteri, va mabandlha ya nkombo ya le Asiya lama fanekiselaka mabandlha ya misava hinkwayo ya Timbhoni ta Yehova hi “siku ra Hosi.” Kutani marungula i ya hina namuntlha! Hi fanele hi hisekela ku ‘twa leswi moya wu swi byelaka mabandlha,’ hikuva tindzayo leti ni switsundzuxo i swa ku khutaza hina, leswaku hi tshembeka​—⁠hi amukeriwa hikwalaho ka swiendlo swa hina ni ‘rirhandzu ra hina ni ku tshembeka ka hina, ni migingiriko ya hina, ni ku tiyisela ka hina.’—Nhlavutelo 1:10; 2:7, 10, 19.

6. Hi nga pfuneka njhani eka marungula lama rhumeriweke emabandlheni ya nkombo ya le Asiya?

⁶ Ku fana ni bandlha ra le Efesa, hi nga ha va hi tirhe hi ku tshembeka naswona hi venge swiendlo swa vagwinehi va mintlawa, kambe loko rirhandzu ra hina ri hungutekile hi ndlela yihi na yihi, a hi hundzulukeleni hi ku tisola eka rirhandzu ra hina ro sungula, ni ku hisa ka rona hinkwako ka ku chivirika! Ku fana ni Vakriste lava fuweke emoyeni va le Smirna, a hi tikarhateleni hakelo hi xivindzi, hi tikomba hi ‘tshembekile ku fikela eku feni,’ loko sweswo swi fanela. Ku fana ni lava va ringiweke hi Sathana ePergamo, hi fanele ku hundzuka eka ku gandzela kwihi na kwihi ka swikwembu loku hundzeke, vunghwavava, kumbe mintlawa. Vatiyatira va byeriwe ku tivonela eka miringo leyi fanaka, ngopfu-ngopfu minkucetelo leyi fanaka ni ya Yesabele. Na hina hi fanele ku tivonela! Mani na mani la feke emoyeni, ku fana ni Vakriste va le Sarda, u fanele ku pfuka nkarhi wu nga si hela. Nyangwa lowu pfuriweke wa ntirho wu vekiwile emahlweni ka hina, tanihi laha a wu ri xiswona emahlweni ka Vafiladelfiya; onge hi nga va ni matimba yo hlula enkarhini wa ndzingo, hi laha va endleke ha kona! Loko un’wana wa hina a sungule ku kufumela ku fana ni Valawodikiya, hi fanele ku xalamukela ku va ka hina lava nga ambalangiki emoyeni kutani hi hundzuka. Yesu u yime enyangweni a gongondza. Onge hinkwerhu ka hina hi nga n’wi amukela kutani hi tiphina hi swakudya leswi hambetaka swa moya na yena eka mabandlha ya hina ya 55 000 emisaveni hinkwayo!—Nhlavutelo 1:11; 2:7, 10, 11, 17, 29; 3:6, 13, 22.

Xiluvelo Xa Xikwembu, Buku Na Xivutiso

7. I ku dzunisa kwihi loku yimbeleriwaka eka xivono xa vumbirhi, naswona u endlisa ku yini?

⁷ Eka xivono xa vumbirhi Yohane u vona xiluvelo xa Yehova xo kwetsima xa le tilweni. Xikwembu xa hina lexikulu xi humelela exikarhi ka ku vangama lokukulu, xi ri na tikerubimi ta mune, mavandla ya tintsumi ni vahluri lava pfuxiweke va Vukriste. Ri nyanyula swonghasi risimu ra vona ra ku dzunisa: “O [Yehova] ni Xikwembu xa hina, u lulameriwile hi ku amukela ku twala, ni ku dzunisiwa, ni matimba hikuva hi wena Muendli wa swilo hinkwaswo, kutani hi ku rhandza ka wena swi tumbulukile, swi kuma ku hanya”! Yehova u nyika buku eka Loyi a nga ni mfanelo ya ku yi pfula—Nghala ya rixaka ra Yuda, Xinyimpfana lexi tlhaviweke lexi xi vaka Mukutsuri wa hina. Swivumbiwa hinkwaswo swi dzunisa Yehova ni Xinyimpfana.—Nhlavutelo 4:11; 5:2-5, 11-14.

8. Xana hi vona yini eka xivono xa vunharhu xa Nhlavutelo, naswona xi yelanisa ku yini ni siku ra hina?

⁸ Sweswi eka xivono xa vunharhu! Xinyimpfana xi hambeta xi pfula swilemo swa nkombo swa buku. Xana hi vona yini? Xo sungula, Yesu loyi a ha ku ambexiwaka harhi ya vuhosi u khandziya hanci yo basa etilweni, leswi yimelaka nyimpi yo lulama. Endzhaku ka sweswo, mugadi wa hanci yo tshwuka u funengeta misava hi nyimpi leyi heleleke. Manuku ku landzela hanci ya ntima ya ndlala, kutani endzhaku ka yona ku ta hanci yo kwalala ya vuvabyi, leyi mugadi wa yona a vuriwaka Rifu! Hades ya landzela, ku mita timiliyoni ta vahlaseriwa. Leswi hinkwaswo swi sungule hi “mahlomulo” lama hlaseleke vanhu hi 1914-18 naswona vadyuhari va rixaka rero lava poneke va swi tsundzuka kahle. (Matewu 24:3-8) Vagadi volavo va tihanci va hambeta va tsutsuma! Naswona eku pfuriweni ka xilemo xa vuntlhanu ni xa vutsevu, swiendlakalo swi tshinelela ‘siku lerikulu ra vukarhi bya Yehova ni bya Xinyimpfana.’ Ku vutisiwa xivutiso lexi: “I mani loyi a nga ri tiyelaka xana?”—Nhlavutelo 6:1-17.

Lava “Ri Tiyelaka”

9. Xana i ku hlavutela kwihi loku nyanyulaka loku ku endliwaka eka xivono xa vumune?

⁹ Xivono xa vumune xa pfuleka, xi komba lava va nga ta pona siku ra vukarhi bya Xikwembu ni xivangelo xa kona. Tintsumi ti khome mimoya ya mune ya ku lovisa misava leswaku ku lemiwa ka Israyele wa moya—144 000—ku helela. “Endzhaku ka swona,” xivono xi ndlandlamukela eka xivono lexi chavisaka: “Ndzi vona ntshungu lowukulu wa vanhu, lava ku nga pfumaleka ni munhu ni un’we la koteke ku va hlaya. A va huma hi le matikweni hinkwawo, ni le tinxakeni hinkwato, va ri va swivongo hinkwaswo ni va tindzimi hinkwato. A va yimile emahlweni ka xiluvelo ne mahlweni ka Xinyimpfana va ambele tinguvu to leha leto basa, va tamele micindzu emavokweni ya vona. A va huwelela hi rito leri tlakukeke va ku: ‘Ku ponisiwa ku huma eka Xikwembu xa hina lexi tshameke exiluvelweni, ni le ka Xinyimpfana!’” (Nhlavutelo 7:1-10) Xana wa tivona exifanisweni lexi?

10. (a) Xana ku pimanisa swiviko swa 1935 na 1987 swi komba yini tanihi ku hetiseka ka xivono xa vumune? (b) I xivutiso xihi lexi sweswi xi katsaka un’wana ni un’wana wa hina, naswona ha yini?

¹⁰ Hi 1935 lava a va ri kona emisaveni hinkwayo eka nkhuvo wa Xitsundzuxo xa rifu ra Yesu a va ri 32 795. Eka vona, 27 006 va dyile swifanekiselo tanihi lava saleke emisaveni va lava va 144 000, lava ntshembo wa vona wu nga wa le tilweni. Endzhakunyana eka lembe leri fanaka, ku hlamuseriwa ka ntshungu lowukulu ku humele kahle erivaleni. Vanhu lava vo titsongahata, lava langutaka emahlweni evuton’wini lebyi nga heriki eparadeyisini emisaveni, na vona va kombisa ripfumelo eka ngati ya Yesu leyi halatiweke, va ta eka Yehova hi ku tinyikela, va titsongahatela nkhuvulo, kutani va tirhela Xikwembu hi ku hiseka va ri ni langutelo leri tsakisaka ra ku hundza ‘enhlomulweni lowukulu’ va ri karhi va hanya. Eka Xitsundzuxo xa 1987, lava a va ri kona a va ri 8 965 221, ku ri na 8 808 ntsena lava dyaka. Leswi swi komba leswaku timiliyoni namuntlha i ta van’wana va ntshungu lowukulu kumbe ti tsakela ku va ta nhlayo yoleyo. Xana u ta “ri tiyela” tanihi wun’wana wa vona hi nkarhi wa ‘siku lerikulu ra vukarhi bya Yehova ni bya Xinyimpfana’? Ku teka magoza ku fika emakun’wini wolawo swi vula ku pona ka wena.—Nhlavutelo 6:15-17; 7:14-17.

Ku Twarisa Ku Avanyisa Ka Xikwembu

11. I ku avanyisa kwihi loku twarisiwaka eka xivono xa vumune, naswona leswi swi yelanisa ku yini na siku ra hina?

¹¹ Xilemo xa vunkombo xa pfuriwa! Ku vonaka xivono xa vuntlhanu xa Nhlavutelo. Tintsumi ta nkombo ti yima emahlweni ka Xikwembu. Ti nyikiwa tinanga ta nkombo, kutani ti twarisa mahungu lawa ya phindha-phindhiweke emisaveni hinkwayo hi vanhu va Yehova ku sukela hi 1922 hi tona. Leti ta mune to sungula ti tivisa ku avanyisa ehenhla ka ‘n’we xa nharhu’ xa vanhu, entiyisweni eka lava hanyaka eVujaganini. “Tinanga” leti ti komba leswaku xiphemu xa “misava” xa Vujagana (Mafambiselo ya swilo ya Sathana lama vonakaka ya ri ya hi laha ku nga heriki) ni xa “lwandle” (mintshungu ya vanhu lava nga riki na ku rhula), kun’we ni ‘milambu, ni swihlovo swa mati’ ya yena (tidyondzo ni tifilosofi ta Vujagana) ni ku vonakala ka byona loku dzwihatiweke (vafundhisi, lava pfumalaka ku vonakala ka moya), hinkwavo i vahlaseriwa va vukarhi bya Xikwembu. “Gama” leri hahaka, leri fanekiselaka ntsumi, endzhaku ra humelela exikarhi ka tilo, ri tivisa leswaku ku chayiwa ka tinanga tinharhu loku ka ha taka ku ta vula “khombo! khombo! khombo! eka vaaki va misava.”—Nhlavutelo 8:1-13.

12. I mani la pfulaka khele ro enta ngopfu, naswona eminkarhini ya manguva lawa ntlawa wa “tinjiya” wu va lume njhani vafundhisi?

¹² Kutani ntsumi ya vuntlhanu yi chaya nanga ya yona. Vonani! “Nyeleti”—Hosi Yesu—u pfula khele ro enta ngopfu, kutani ntlawa wa tinjiya wu huma. Lexi xiyekaka, leswi swi fanekisela ku ntshunxa ka Yesu timbhoni ta Xikwembu leti totiweke eku pfumaleni ka tona ntirho hi 1919. Hi matimba ya Xikwembu, leti ti herisa madyelo ya vafundhisi, ti paluxa tidyondzo ta vona ta vunwa ni vukanganyisi hi “ntlhanu wa tin’hweti”—mpimo lowu tolovelekeke wa vutomi bya njiya. Leswi swi tiyisa leswaku rixaka ra manguva lawa ra tinjiya “ri nga ka ri nga hundzi” ku kondza loko Yehova na Kriste va hetile ku avanyisa matiko. Ana se, ntlawa wa tinjiya wu siyele vanhu va magidi ya timiliyoni tibuku leti seketeriweke eBibeleni, ni mahungu ya ku avanyisa ko vava lama lumaka ku fana ni mincila ya swipame. Yohane wa hlamusela a ku: “Ku hundzile khombo ro sungula, kambe vonani, ka ha ri ni makhombo man’wana mambirhi lama ha taka.”—Nhlavutelo 9:1-12; Matewu 24:34; 25:31-33.

13. (a) I vamani lava fanekiseriwaka hi tintsumi ta mune leti ntshunxiwaka ekusuhi ni Nambu wa Yufrata, naswona va na ntirho wihi? (b) Xana timiriyadi ta tinhenha i vamani, naswona matimba ya wona ya le ‘milon’wini ya wona ni le mincileni ya wona’ hi ndlela yihi?

¹³ Ku chayiwa nanga ya vutsevu, leyi tivisaka “khombo” ra vumbirhi. Tintsumi ta mune ta ntshunxiwa ekusuhi ni Nambu wa Yufrata, hi laha ku fanelaka swi fanekisela ku ntshunxiwa ka timbhoni ta Xikwembu leti totiweke evuhlongeni bya Babilona hi 1919. A ti tilunghiselele ku “dlaya xiphemu xin’we xa nharhu xa vanhu,” ti tivisa leswaku vafundhisi va Vujagana va file elangutelweni ra Yehova. Kambe mpfuno wa laveka ku ndlandlamuxa ntirho lowu wo veka vumbhoni, naswona Yehova u nyikela leswi hi ku tisa ntshungu lowukulu wa vatirhi-kulobye. Timbhoni leti totiweke ni vapfuni lava va mpfhumpfha swinene tanihi tinhenha leti nga hlayekiki, “timiriyadi timbirhi ta timiriyadi.” Matimba ya tona ya le “milon’wini ya tona” hi mhaka ya leswi tivulavulaka mahungu ya ku avanyisa ka Yehova emakaya ya vanhu, naswona ya le “mincileni ya tona” hi leswi endzhaku ka vona va siyaka tibuku ta Bibele leti twarisaka siku ra yena ra ku tirihisela leri tshinelaka hi ku hatlisa.—Nhlavutelo 9:13-21; Mintirho 20:20, 21.

14. (a) I mani ‘ntsumi ya matimba’ eka xivono xa vutsevu, naswona yi endla yini ni ku vula yini? (b) Xana ku vuriwa yini hi nantswo wa xibukwana wo “tsokombela ku fana ni vulombe” kambe ‘ekhwirini wu bava’?

¹⁴ Sweswi xivono xa vutsevu xa pfuleka. Hi vona ‘ntsumi ya matimba,’ entiyisweni Hosi Yesu a ri entirhweni wo hlawuleka. U na xibukwana evokweni ra yena. Marito ni ku dzindza swa twiwa, kutani manuku ntsumi yi hlambanya hi Muvumbi wa hina Lonkulu yi ku: “A ku nga ha vi na ku hlwela, kambe siku leri ntsumi ya vu-7 yi chayaka nanga ya yona, makungu ya Xikwembu lawa a ma fihliwile, . . . ma ta hetiseka.” Yohane u byeriwa ku teka xibukwana a xi dya. Enon’wini wa yena xa “tsokombela ku fana ni vulombe,” tanihi leswi rungula ra Mfumo, ni minkateko ya wona leyi tshembisiweke ya “matilo lamantshwa ni misava leyintshwa,” swi tsakisaka swinene eka ntlawa lowu totiweke wa Yohane ni vanghana va wona namuntlha. Kambe, hi laha ku hambaneke, ntirho wa ku twarisa siku ra Xikwembu ra ku tirihisela eka ‘vanhu va swivongo swo tala ni va matiko yo tala ni va tindzimi to tala, ni le ka tihosi to tala’ swa nonon’hwa eka vo tala ku wu amukela. Hambi swi ri tano, tiyani matimba! Tiyani eripfumelweni ra leswaku Yehova u ta mi nyika matimba lama lavekaka loko mi ri karhi mi huwelela siku ra yena ra ku tirihisela.—Nhlavutelo 10:1-11; 21:1, 4; 1 Yohane 5:4; Esaya 40:29-31; 61:1, 2.

Nanga Ya Vunkombo Ni Khombo Ra Vunharhu

15. (a) Xana ku humelela yini loko khombo ra vunharhu ri tivisiwa ni ntsumi ya vunkombo yi chaya nanga ya yona? (b) Xana ku huweleriwa ka Mfumo i khombo hi ndlela yihi?

¹⁵ Endzhaku ka ku vhumba ku ringeta ka nala ku “dlaya” timbhoni ta Xikwembu hi 1918, ni le ndzhaku ka ku hlamusela ndlela leyi xiyekaka leyi ‘moya wa vutomi lowu humaka eka Xikwembu’ wu va nyikeke matimba ha yona hi 1919 ku nyika vumbhoni bya misava hinkwayo, Yohane wa tsala a ku: “Ku hundzile khombo ra vumbirhi. Kambe vonani, ra vunharhu ri ta ta ku nga ri khale.” Hi ndlela yihi? Rhekhodo yi hambeta yi ku: “Hi loko ntsumi ya vu-7 yi chaya nanga ya yona.” Kutani khombo ra vunharhu ri fambisane ni ku chaya ka nanga yoleyo yo hetelela. Kutani yingisani! “Marito lama huwelelaka hi le tilweni ma ku: ‘Matimba ya ku fuma misava, sweswi ma nyikiwile Hosi ya hina [Yehova] ni Mesiya wa yona, kutani u ta fuma hi laha ku nga heriki.’” Lowu i Mfumo wa Xikwembu ha Kriste Yesu, loyi yena ni vadyandzhaka-kulobye va 144 000 va tisaka xihundla xa Xikwembu emakumu, va lwela vuhosi lebyi nga heriki bya Yehova Xikwembu, xa Matimba hinkwawo. Xana ku huweleriwa loku ka Mfumo i khombo? Ina, eka lavo biha! Hikuva ku komba ndlela leyi Xikwembu xi nga ta “herisa lava herisaka misava” ha yona.—Nhlavutelo 11:1-19.

16. I ku paluxeka kwihi lokukulu loku endliwaka eka xivono xa vunkombo?

¹⁶ Sweswi ku vonaka xivono xa vunkombo! Vonani, kwalaho, nhlengeletano ya Xikwembu leyi tshembekaka ya le tilweni, “wansati” wa xona. U na nyimba naswona u twa ku lumiwa ka ku veleka n’wana loyi a rindzeriweke khale. Ro sungula—kambe ku nga ri ro hetelela—eka Nhlavutelo, dragona yo tshwuka, “yona nyoka ya khale leyi vuriwaka Diyavulosi na Sathana, Mukanganyisi wa misava hinkwayo,” ya humelela, yi yimela ku mita n’wana loko a velekiwa. “Ku v̌engana e šikari ka [nyoka] ni wansati” loku vhumbiweke ku ya eku heteleleni! Wansati u veleka “n’wana wa wandzisanyana,” loyi hi xihatla a yisiwaka ehenhla exiluvelweni xa Xikwembu.—Nhlavutelo 12:1-6, 9; Genesa 3:15; Daniel 2:44; 7:13, 14.

17. (a) I mani Mikayele, naswona u hanyise ku yini hi ku pfumelelana ni vito ra yena ku sukela hi 1914? (b) Hambanisa exikarhi ka ‘makhombo manharhu’ ni ‘khombo ra misava’ ra Nhlavutelo 12:12.

¹⁷ Loyi i Mfumo wa n’wana wa xinuna, lowu tlhomiweke ematilweni hi lembe ra matimu ra 1914. Hosi ya wona, Kriste Yesu, nakambe u vuriwa Mikayele, leswi vulaka ku ‘I Mani La Fanaka Ni Xikwembu?’ U hlamula xivutiso xexo handle ko ba mariri hi ku lwa na Sathana kutani a cukumeta dragona ya khale ni mademona ya yona emisaveni. Ku sukela hi 1914, ku ve “khombo, emisaveni ni le lwandle, hikuva Diyavulosi u xikele kona a karihile ngopfu, hi ku tiva leswaku nkarhi wa yena wu komile.’ Kutani khombo leri, leri kombisiweke eka xiyimo xo vava eka vanhu namuntlha, a ri fanelanga ri pfilunganisiwa ni ‘makhombo manharhu’ lawa Yehova a ya tisaka eka lavo biha loko a va avanyisa.—Nhlavutelo 12:7-12.

18. (a) Xana i khombo rihi leri Sathana Diyavulosi a ringeteke ku ri endlela malandza ya Yehova lama tshembekaka emahlweni ni le ka Nyimpi ya Vumbirhi ya Misava? (b) Xana Diyavulosi wa ha tiyimisele ku endla yini, naswona swivono leswi swa ha saleke swi ta paluxa yini?

¹⁸ Diyavulosi u ringetile ku tisa khombo ni le ka malandza ya Yehova lama tshembekaka lama nga emisaveni. Emahlweni ni le ka Nyimpi ya Vumbirhi ya Misava, u humese ndhambi ya nxaniso hi matshalatshala yo herisa ntirho wa “lava saleke” va nhlengeletano ya Xikwembu ya wansati—lava va 144 000 lava ha tirhaka exikarhi ka vanhu. Yehova u endle leswaku misava, mafambiselo ya swilo ya Sathana hi yexe, ya mita ndhambi. Hambi swi ri tano, Sathana la kariheke wa ha karihele ku tlhontlha nyimpi yo lwisana ni Timbhoni ta Yehova. (Nhlavutelo 12:13-17) Xana vuyelo byo hetelela ku ta va byihi? Swivono swa kaye swa ha ta ta, kutani leswi swi ta hi byela!—Habakuk 2:3.

SWIVUTISO SWA MPFUXETO

◻ Yehova u ti tirhise njhani tintsumi mayelana ni buku ya Nhlavutelo?

◻ Marungula ya Yesu lama yaka eka mabandlha ya nkombo ya fanele ku hi khumbisa ku yini?

◻ Xana ku humelele yini eku chayiweni ka tinanga to nkombo?

◻ Xana i yini lexi fanekiseriwaka hi ntlawa wa tinjiya ni tinhenha leti nga hlayekiki?

◻ Ha yini ku velekiwa ka Mfumo wa Xikwembu ku hlanganisiwa ni “khombo ra vunharhu”?

[Bokisi leri nga eka tluka 14]

TINDZIMA NI TINDZIMANA TA XIVONO XIN’WANA NI XIN’WANA:

◻ XIVONO XA VU-1 1:10–3:22

◻ XIVONO XA VU-2 4:1–5:14

◻ XIVONO XA VU-3 6:1-17

◻ XIVONO XA VU-4 7:1-17

◻ XIVONO XA VU-5 8:1–9:21

◻ XIVONO XA VU-6 10:1–11:19

◻ XIVONO XA VU-7 12:1-17

◻ XIVONO XA VU-8 13:1-18

◻ XIVONO XA VU-9 14:1-20

◻ XIVONO XA VU-10 15:1–16:21

◻ XIVONO XA VU-11 17:1-18

◻ XIVONO XA VU-12 18:1–19:10

◻ XIVONO XA VU-13 19:11-21

◻ XIVONO XA VU-14 20:1-10

◻ XIVONO XA VU-15 20:11–21:8

◻ XIVONO XA VU-16 21:9–22:5

[Bokisi/Swifaniso leswi nga eka tluka 15-18]

SWIVONO SWA 16 SWA NHLAVUTELO—TINHLA TIN’WANA

1 Yesu, exikarhi ka switlhoma rivoni swa mabandlha swa nkombo, a rhumela marungula ya rirhandzu hi ku tirhisa tinyeleti ta nkombo, valanguteri lava totiweke

2 Emahlweni ka xiluvelo xa Yehova xa le tilweni Xinyimpfana lexi hlulaka xi kuma buku ya marungula ya ku avanyisa

3 Kriste Yesu a khandziyela ku ya hlula, loko vagadi van’wana va tihanci va hlasela vanhu naswona siku ra vukarhi bya Xikwembu ri karhi ri tshinela

4 Loko tintsumi ti sivele nhlomulo lowukulu, ku hlengeletiwa ka 144 000 ni ka ntshungu lowukulu ku fikisiwa emakumu

5 Tintsumi ti twarisa marungula ya ku avanyisa, naswona Timbhoni ta Yehova ti haha hi ntlawa ku fana ni tinjiya eku paluxeni ka vukhongeri byo hemba

6 Eku chayiweni ka nanga ya vunkombo, “timbhoni” ta Xikwembu ti nyikiwa matimba leswaku ti tivisa Mfumo lowu taka wa Yehova na Kriste wa yena

7 Endzhaku ka ku velekiwa ka Mfumo hi 1914, Kriste a cukumetela Sathana ni mademona ya yena ehansi emisaveni

8 Ku humelela swivandzana swimbirhi, kutani xivandzana xa vumbirhi xa politiki xi hefemulela vutomi exifanisweni xo sungula, nhlangano wa UN

9 Vanhu lava ‘chavaka Xikwembu ni ku xi dzunisa’ va tshoveleriwa vutomi lebyi nga heriki, van’wana ku lovisiwa

10 Ku chuluriwa ka minkambana ya nkombo ya vukarhi bya Xikwembu ku fika emakumu eku lovisiweni ka hinkwavo lava susumetiwaka hi “moya” wa Sathana lowu thyakeke

11 Muoswi lonkulu, vukhongeri bya mavunwa, a nga ha tshamanga eka “xivandza” xa politiki, lexi manuku xi n’wi hlaselaka

12 Endzhaku ka ku lovisiwa ka Babilona Lonkulu, malunghiselelo ya vukati bya Xinyimpfana ni mutekiwa wa xona, lava 144 000 ya heteleriwa

13 Endzhaku ka ku lova ka muoswi, Yesu u rhangela mavuthu ya le tilweni eku heriseni ka mafambiselo hinkwawo ya la misaveni ya Sathana

14 Ku nghenisiwa ka Sathana ekheleni ku pfula ndlela ya Mfumo wa Kriste wa Gidi ra Malembe ni mutekiwa wa yena, lava 144 000

15 Ehansi ka “matilo lamantshwa” ya Kriste Yesu ni mutekiwa wa yena, vandla ra “misava leyintshwa” ra vanhu ri ta tiphina hi minkateko leyi nga vuriwangiki leyi humaka eka Yehova

16 Malunghiselelo ya Xikwembu ya ku hanyisa ni vutomi eka vanhu ya ta ya huma eka Yerusalema Lontshwa la vangamaka