Ndlela Leyi Nkhuvulo Wu Nga Hi Ponisaka Ha Yona

“Ku nyuperisiwa . . . ka hi ponisa.”—1 PETRO 3:21, The Emphatic Diaglott.

1, 2. I yini lexi lavekaka loko munhu a nga si nghenela nkhuvulo wa mati?

YEHOVA u na swilaveko leswi kongomeke eka lava va lavaka ku pona. Va fanele ku kuma vutivi lebyinene, va kombisa ripfumelo, va hundzuka eswidyohweni swa vona, va hundzuriwa, va tinyiketela eka Xikwembu, kutani va khuvuriwa tanihi vapfumeri. (Yohane 3:16; 17:3; Mintirho 3:19; 18:8) Lava yaka eku khuvuriweni va fanele ku pfumela erivaleni leswaku exisekelweni xa gandzelo ra Yesu va hundzukile eswidyohweni swa vona naswona va tinyikete eka Yehova. Nakambe va fanele ku twisisa leswaku ku tinyiketa ni nkhuvulo swi va hlamusela tanihi Timbhoni ta Yehova.

² Lunghiselelo hinkwaro ra nkhuvulo, ku katsa ni ku kombisa loku ka le rivaleni ka ripfumelo, swa laveka ku kuma ku pona. (Varhoma 10:10) Leswi swi tiyisiwile loko muapostola Petro a tsarile a ku: “Ku nyuperisiwa . . . ka hi ponisa.” (1 Petro 3:21, ED) Kambe kahle-kahle xana hi fanele ku wa twisisisa ku yini marito lawa? Xana mongo wu komba yini?

Ndlela Leyi Nkhuvulo Wu Ponisaka Ha Yona

3. Hi marito ya wena n’wini, u nga yi katsakanya njhani 1 Petro 3:18-21?

³ Petro u kombise leswaku tanihi moya lowu pfuxiweke, Yesu u chumayela rungula ra ku avanyisa eka mimoya leyo biha ekhotsweni, mademona lama hlayiseriweke ku avanyisa ka siku lerikulu ra Yehova eswibohweni leswi nga heriki. Ma xandzukile hi ku teka mimiri ya nyama ni ku hanya kun’we ni vavasati “loko [Xikwembu] xi lehisa mbilu xi yima xi nga endli nchumu, enkarhini lowu Nowa a nga lunghisa ngalava ha wona. Engalaveni leyi ku nghenile va nga ri vangani, hi leswaku vanhu va 8 [Nowa, nsati wa yena, majaha ya yena ni vavasati va vona], lava ponisiweke ha yona ematini.” Petro u tlhandlekerile a ku: “Nkhuvulo wu yelana ni mhaka leyi; sweswi wa mi ponisa, ku nga ri hi ku susa thyaka emirini [ntsena] kambe ku ri hi ku tinyiketa eka Xikwembu hi ripfalo leri tengeke. Nkhuvulo wa mi ponisa hi mhaka ya ku pfuka ka Yesu Kriste eku feni.”—1 Petro 3:18-21; Genesa 6:1, 2; 2 Petro 2:4; 2 Vakorinto 7:1.

4. Petro a a kombetela eka yini loko a te, “Wu yelana ni mhaka leyi”?

⁴ Petro a a vula yini loko a te, “Wu yelana ni mhaka leyi”? A a vula leswaku nkhuvulo lowu sekeriweke eka ripfumelo wu yelana ni ku hlayisiwa ka Nowa ni ndyangu wa yena, lava va hlayisiweke ematini ya ndhambi lama ma heriseke lava a va ri ehandle ka ngalava. Tanihi leswi Nowa a laveke ripfumelo leswaku a aka ngalava, hinkwavo lava va vaka vadyondzisiwa lava khuvuriweke va Yesu Kriste ni timbhoni ta Yehova va fanele va va ni ripfumelo ro hlula mintshikilelo leyi tisiwaka eka vona hi misava leyi leyi yi nga hava ripfumelo ni xikwembu xa yona, Sathana Diyavulosi.—Vaheveru 11:6, 7; 1 Yohane 5:19.

5. Ku pona ku ta hi “ku pfuka ka Yesu Kriste eku feni” hi ndlela yihi?

⁵ Nkhuvulo hi woxe a hi wona lowu ponisaka. Naswona hambi leswi hi faneleke ‘ku susa thyaka ra nyama,’ sweswo swi ri swoxe a swi hi ponisi. Ematshan’wini ya sweswo, ku pona ku ta hi “ku pfuka ka Yesu Kriste eku feni.” Lava va yaka eku khuvuriweni va fanele va va ni ripfumelo leswaku ku pona ku koteka ntsena hi mhaka ya leswi N’wana wa Xikwembu a feke rifu ra gandzelo ivi a pfuxiwa. Nakambe va fanele ku amukela Yesu tanihi Hosi ya vona leyi nga ni matimba yo avanyisa lava hanyaka ni lava feke. Petro u te: “Yena loyi a yeke tilweni, kutani sweswi u le vokweni ra xinene ra Xikwembu, tintsumi ni vafumi ni leswa matimba swi ri ehansi ka yena.”—1 Petro 3:22.

6. Ku kuma ripfalo lerinene, la lavaka ku khuvuriwa u fanele ku va a endle yini?

⁶ Nakambe Petro u fanise nkhuvulo ni ‘xikombelo lexi endliweke eka Xikwembu xa ripfalo lerinene.’ Ku kuma ripfalo lerinene, la khuvuriwaka hi ku nyuperisiwa u fanele ku tisola eswidyohweni swa yena, a hundzuluka endleleni leyi hoxeke, kutani a endla ku tinyikela loku heleleke eka Yehova Xikwembu hi xikhongelo ha Yesu Kriste. Loko munhu la khuvuriweke a hlayisa ripfalo rero lerinene hi ku titwananisa ni mimpimanyeto ya Xikwembu, u tshama a ri exiyin’weni xa ku ponisiwa lexi nga vangiki ku avanyisa loku lovisaka ka Yehova.

Ku Fanelekela Nkhuvulo

7. Emhakeni ya nkhuvulo, i yini lexi varhumiwa va Vujagana va xi endleke?

⁷ Loko Yesu a lerise valandzeri va yena ku khuvula vadyondzisiwa, a nga va byelanga leswaku va phuphutela vapfumeri va magidi. Kambe i yini lexi varhumiwa va Vujagana va xi endleke? Malunghana na India, Jesuit Francis Xavier u tsarile hi 1545 a ku: “Emfun’weni wa Travancore . . . hi nkarhi wa tin’hweti ti nga ri tingani ndzi khuvule ku tlula khume ra magidi ya vavanuna, vavasati ni vana. . . . Ndzi fambe hi ximutana ni ximutana ndzi va endla Vakriste.” Yoleyo a hi yona ndlela ya Yesu ya ku ‘endla Vakriste.’ Vanhu va fanele ku fanelekela nkhuvulo.

8. I yini lexi leswi swi vuriwaka matsalwa ya Pawulo swi swi vulaka mayelana ni lava va titisaka leswaku va khuvuriwa?

⁸ Hambi ku ri van’wana lava tivulaka Vakriste va le ndzhaku ka nkarhi wa vaapostola va pfumele leswaku lava va titisaka leswaku va khuvuriwa va fanele ku fikelela swilaveko swo karhi leswi kongomeke. Malunghana ni vanhu vo tano lava lavaka ku khuvuriwa, matsalwa lama nga riki ya Bibele, lama ku vuriwaka leswaku ya tsariwe hi muapostola Pawulo, ya ri: “Mikhuva ya vona ni vutomi bya vona a swi kambisisiwe . . . loko va nga nghenanga evukatini, a va dyondzi ku ka va nga oswi, kambe ku nghenela vukati hi nawu. . . . Loko muoswi a ta, a a tshike vuoswi, kumbe a fularheriwa. Loko muendli wa swifaniso a ta, a a tshike ntirho wa yena, kumbe a a aleriwe. . . Loyi a nga ni nandzu wa swidyoho leswi nga vulekiki, . . . mungoma, noyi, mungoma wa tinyeleti, nyamusoro, mutirhisi wa vutshila bya vungoma, . . . munhu la endlaka switshungulo, mufembi, muvhumbi, muhlahluvi, muxiyi wa tilayeni ta xandla . . . , lava a va ringetiwe nkarhinyana . . . kutani loko va tshika mikhuva yoleyo, a va amukeriwe; kambe loko va nga pfumelelani ni sweswo, a va papalatiwe.”

9. Ha yini vakulu va bandlha va va ni bulo ni munhu la navelaka ku khuvuriwa?

⁹ Timbhoni ta Yehova a ti landzeleli tibuku leti nga riki ta matsalwa, to tanihi leti ta ha ku tshahiwaka, kambe vakulu va bula ni lava va lavaka ku khuvuriwa. Ha yini? Ku tiyiseka leswaku vanhu lava i vapfumeri lava fikelelaka swilaveko swa Xikwembu ni lava va tinyiketeke eka Yehova. (Mintirho 4:4; 18:8; 2 Vatesalonika 3:2) Ku vulavurisana hi swivutiso leswi nga ebukwini leyi nge Organized to Accomplish Our Ministry swi pfuna ku vona loko munhu a fanelekela nkhuvulo. Loko tinhla tin’wana a nga ti twisisi kahle, kumbe a nga si pfumelelanisa vutomi bya yena ni mimpimanyeto ya Xikwembu, vakulu va tsaka ku nyikela mpfuno wa moya.

10. Loko hi navela ku khuvuriwa, i langutelo rihi leri hi faneleke ku va na rona?

¹⁰ Loko hi tlangela tintswalo ta Xikwembu eku hi pfuneni leswaku hi dyondza hi xikongomelo xa xona, hi ta fana ni vanhu lava Pawulo a chumayeleke eka vona eAntiyoka, Asia Minor. Ku nga khathariseki nkaneto wa Vayuda, “loko vamatiko va [twe hi ta lunghelo ra ku amukeriwa hi Xikwembu], va tsaka, va dzunisa Rito ra [Yehova]; kutani hinkwavo lava hlawuleriweke vutomi lebyi nga heriki, va pfumela.” (Mintirho 13:48) Vapfumeri vo tano va khuvuriwile.

Nkhuvulo Eka Vantshwa

11. Xana swi fanerile ku tinyiketela eka Xikwembu loko wa ha ri muntshwa, naswona ha yini u hlamula tano?

¹¹ ‘Lava hlawuleriweke vutomi lebyi nga heriki’ va katsa ni vantshwa. Swi nga ha xiyiwa leswaku hambi leswi Samuyele na Yohane Mukhuvuri a va nyikeriwe eka Xikwembu va nga si tswariwa, vatswari va nge swi koti ku endlela vana va vona ku tinyiketela. (1 Samuel 1:11, 24-28; 2:11, 18, 19; Luka 1:15, 66) Kambe hikwalaho ka vuleteri lebyinene bya Bibele, vantshwa vo tala va endla nhluvuko lowu yisaka eku khuvuriweni. Makwerhu wa xisati la nga murhumiwa la khuvuriweke emalembeni ya yena ya kondlo-a-ndzi-dyi u tsarile a ku: “Eka mina swi vonaka onge a ndzi tinyiketele ku tirhela Muvumbi wa mina ku sukela emalembeni lawa ndzi sunguleke ku vona leswaku u kona, kambe hi ku nghenisa vutivi lebyinene ha yena ni swikongomelo swa yena, ndzi lave ku khuvuriwa tanihi vumbhoni bya le handle bya mhaka yoleyo. Hambi swi ri tano, Manana u kanakanile leswaku a ndzi swi tiva leswi a ndzi swi endla, u ringanyete leswaku ndzi rindza ku kondza un’wana a lulamela ku khuvuriwa.” Wansati loyi a navelaka ku khuvuriwa u kumiwile, naswona makwerhu loyi wa xisati wa engetela a ku: “A ku ri hava mintlawa ya vuleteri lebyi hlawulekeke bya lava va lavaka ku khuvuriwa emasikwini wolawo, hambi leswi Mufambisi wa Ntirho la vekiweke hi Sosayiti . . . a vulavuleke na mina hi musa mayelana ni nkoka wa goza leri a ndzi ri teka. Ndzi pfumelelane swinene ni marito hinkwawo lama vuriweke, naswona hi mixo lowu vangamaka wa Sonto hi May 1921 [wansati loyi] kun’we na mina hi khuvuriwile.”

12. Makwerhu Russell u ku langute njhani ku tinyiketa ka n’wana?

¹² Hi 1914, C. T. Russell (muungameri wa Sosayiti ya Watch Tower wa nkarhi wolowo) u amukele papila leri eka rona Mukriste-kulobye a vutiseke loko mufana wa yena wa malembe ya 12 hi vukhale a fanele ku khutaziwa ku endla ku tinyikela eka Xikwembu. “Loko a ndzi ri wena,” ku hlamule Russell, “a ndzi nga ta kandziyisa ku tinyikela eka yena, kambe a ndzi ta swi nghenisa emianakanyweni ya yena tanihi yona ntsena ndlela leyi faneleke eka vanhu lava tlhariheke hinkwavo lava va tiveke Xikwembu ni swikongomelo swa xona swa musa . . . Handle ko tinyikela a nga kona loyi a nga ta kuma vutomi lebyi nga heriki . . . N’wana wa wena a nga ka a nga vavisiwi hi ku tinyiketela, kambe a nga pfuneka swinene. . . . I mani la nga vulaka leswaku n’wana wa khume ra malembe a nge ku twisisi hi laha ku teleke ni hi laha ku heleleke ku tinyikela loku taleke hi ku anakanya na hi rito na hi xiendlo ke? Loko ndzi languta endzhaku ndza swi vona leswaku ku tinyikela ka mina hinkwako ku endliwe ro sungula ndza ha rintsongo—ehansi ka malembe ya khume-mbirhi hi vukhale.”

13. Magazini lowu wu te yini eka vantshwa kwalomu ka malembe ya 94 lama hundzeke?

¹³ Zion’s Watch Tower ya July 1, 1894, yi te: “Eka vana hinkwavo ni vantshwa lava rhandzekaka lava va nyiketeke timbilu ta vona eka Xikwembu, ni lava va ringetaka siku na siku ku landzelela Yesu, WATCH TOWER yi rhumela marungula ya yona. Hi tiva van’wana va vana lavantsongo swinene lava rhandzaka Yesu, ni lava va nga nyumiki ku seketela Yesu exikarhi ka vana van’wana lava nga n’wi rhandziki kumbe ku ringeta ku n’wi tsakisa; ni lava va nga ni xivindzi ni lava nga ni ntiyiso eka Xikwembu, hambi loko va hlekiwa ni ku tekiwa va hambanile ni vanghana va vona va xikolo lava va vulaka mahungu lamanene ya mfumo eka vona. Naswona ha tsaka ku vona vantshwa van’wana, lava hi xivindzi va aleke misava ni ku navela kun’we ni mintsako ya yona, exikarhi ka lava va tshembekaka swinene lava [nyikeleke] vutomi bya vona eka Hosi. Van’wana va vapfuni va hina ehofisini, kun’we ni makhalipotiya yo tala lama humelelaka, va ha ri vantsongo hi malembe.” Hambi loko wa ha rintsongo, ha yini u nga vulavuli ni vatswari va wena mayelana ni ku tinyiketela eka Yehova Xikwembu ke?

Xiphemu Xa Vatswari

14. I mimpfuno yihi leyi tsakeriwaka hi vantshwa lava tinyikelaka eka Yehova?

¹⁴ Kambisisa mimpfuno leyi tsakeriwaka hi vana lava amukelaka nkongomiso wa vutswari lowu yisaka enkhuvulweni. (Vaefesa 6:4) Ku anakanya hi timhaka ta moya swi va pfuna ku balekela mintlhamu ni swirimbana swa misava. (1 Yohane 2:15-17) A va tshoveli ntshovelo wo vava lowu vangiwaka hi ‘ku byala enyameni.’ (Vagalatiya 6:7, 8) Tanihi leswi va dyondzisiweke ku hanya vutomi lebyinene, va kombisa mihandzu ya moya wa Xikwembu. (Vagalatiya 5:22, 23) Hi ku va lava va tinyiketeke eka Xikwembu, va tsakela vuxaka bya le kusuhi na xona. Naswona hi mhaka ya leswi va dyondzeke ku “tshemba Yehova,” va kongomisiwa hi vutlhari bya le tilweni naswona va famba etindleleni ta ku tsaka ni ku rhula.—Swivuriso 3:5, 6, 13, 17.

15. I yini lexi vatswari va Vukriste va nga xi endlaka ku vumba vutomi bya vana va vona?

¹⁵ Tanihi leswi ku tinyikela eka Yehova swi pfunaka swinene eka vantshwa, vatswari va Vukriste va fanele ku endla hinkwaswo leswi va nga swi kotaka ku vumba vutomi bya vana va vona. Ku fana na Timotiya, vantshwa va nga dyondzisiwa Matsalwa ku sukela evuhlangini leswaku ‘va ya emahlweni ni swilo leswi va swi dyondzeke ivi va hundzuleriwa ku swi pfumela.’ (2 Timotiya 3:14, 15) Vatswari lava chavaka Xikwembu va nga rhendzela vana va vona hi nkucetelo wa vutomi bya vona vini lebyi nga xikombiso, va nghenisa eka vana va vona vutivi lebyi vuxaka bya vona vini na Xikwembu, ntokoto ni ku avanyisa loku vupfeke swi nga byi humesaka. Loko ya tirhisiwe kahle, matshalatshala lama a ma lahleki eka vana.—Swivuriso 22:6.

16. I yini lexi vana va wena va faneleke ku xi vona eka xikombiso ni ku dyondzisa ka wena?

¹⁶ Hi xikombiso na hi ku dyondzisa, pfuna vana va wena ku vona ndlela leyi ntila wu tsariweke wu vonaka kahle ha yona exikarhi ka nhlengeletano ya Yehova na liya ya Sathana. Va kombisi leswaku ku nge vi na ku landzula emisaveni leyi, leswaku Vakriste va fanele ku ala swilo swa vuxisi, mintsako leyo biha, ku navela ni swinakulobye swa yona. (1 Vakorinto 15:33; 2 Vakorinto 4:2) Hi langutelo ra wena, kun’we ni dyondzo ni xikombiso xa wena, kombisa vana va wena ndlela leyi mintsako ya misava yi nga vuhava ha yona, ndlela leyi vanhu va misava va hambukisiweke ha yona loko va ringanisiwa ni Timbhoni ta Yehova. Hlamusela ndlela leyi Xikwembu xi ku kongomiseke hi ku tirhisa moya wa xona lowo kwetsima, xi ku sirheleteke ku hambukela etindleleni leti a ti ta yisa enhlomulweni, xi ku tiyiseke ha yona eminkarhini ya ku hlaseriwa ni gome. U nga tshuki u endla xihoxo xo anakanya leswaku loko vana va wena va pfumeleriwa ku tsutsuma etindleleni ta misava ta ku tikukumuxa, ku navela, leti nga nyawuriki ni ta vuhunguki, va ta va vapfumeri. Loko misava leyi yi nga si phasa vana va wena, va sirheleti eka minkucetelo ya yona leyo biha kutani u va pfuna ku veka rirhandzu ni mintshembo ya vona eka Yehova.

Ku Languta Endzhaku Ka Nkhuvulo

17. (a) Ha yini Vakriste van’wana lava khuvuriweke va tokota ku wa ka moya? (b) Hi fanele hi ku languta njhani ku tinyiketela ka hina?

¹⁷ Hambi hi lontsongo kumbe hi lonkulu, handle ko kanakana la lavaka ku khuvuriwa u lava ku tshama a tshembekile eka Yehova. Kutani ha yini Vakriste van’wana lava khuvuriweke va tokota ku wa emoyeni? Hambi leswi swilo swo hambana-hambana swi nga ha katsekaka, ku vonaka ku ri na xivangelo xin’we lexikulu—ku tsandzeka ku twisisa hinkwaswo leswi vuriwaka hi ku tinyiketela. A hi mhaka ya ku tinyiketela entirhweni. Sweswo swi ta hi hlayisa hi gingiriteka kambe a swi nge hi endli vanhu va moya. Hi fanele ku tsundzuka leswaku a hi tinyiketanga entirhweni kambe eka Munhu—Yehova Xikwembu. Leswi swi hi pfuna ku papalata xihoxo xo languta ku tinyiketela ka hina tanihi goza ro sungula leri hi faneleke ku ri teka hi nga si ya emahlweni ni ntirho. Ku tinyiketela swi fanele swi tekiwa tanihi ku nghenela vuxaka bya nkoka lebyi minkarhi hinkwayo byi faneleke ku khathaleriwa ni ku hlayisiwa. Emhakeni leyi, hi na xikombiso xa Yesu Kriste. Lama ma phofulaka langutelo ra yena leri humaka embilwini loko a titisa eka Yehova i marito ya vuprofeta lama nge: “Vona, ndzi tile . . . Xikwembu xanga, ndzi tsakela ku endla ku rhandza ka wena! Kutani nawu wa wena wu le mbilwini ya mina.”—Psalma 40:6-8; Vaheveru 10:5-10.

18. Nawu wa Xikwembu a wu ri “embilwini” ya Yesu hi ndlela yihi?

¹⁸ Nawu wa Yehova a wu ri “embilwini” ya Yesu hi ndlela yihi? U byele mutsari wa Muyuda leswaku Yehova Xikwembu xa hina i un’we naswona a ku na un’wana, xisweswo a kandziyisa vukulukumba bya Yehova. Manuku Yesu u kombe leswaku ntikelo wa nawu wa Xikwembu wu vumbiwa hi ku rhandza Yehova hi mbilu ya hina hinkwayo, ku twisisa ni matimba, hi ri karhi hi rhandza vaakelani va hina tanihi loko hi tirhandza. (Marka 12:28-34) Xexo i xivangelo xa xisekelo xa mhaka leyi ha yona Yesu a nga te, ‘ndzi tsakela ku endla ku rhandza ka Xikwembu.’ U swi kotile ku namarhela ndlela ya yena hi ku tshembeka ku nga khathariseki miringo leyikulu swinene ni minxaniso, hayi hi leswi a voneke leswi swi ri ntirho lowunene kambe a a ri ni vuxaka lebyikulu na Yehova Xikwembu. Loko hi xiya vukulukumba bya Yehova hi laha ku fanaka naswona hi n’wi rhandza hi ku hlangana loku nga tshovekiki, hi ta hanya hi ku pfumelelana ni ku tinyiketela ka hina ni nkhuvulo.

19. I ku hlangana kwihi loku nga kona exikarhi ka vuxaka bya hina na Yehova ni ntirho lowu hi wu endlaka?

¹⁹ Kavula, ku ni ku hlangana exikarhi ka vuxaka bya hina na Xikwembu ni ntirho lowu hi wu endlaka. Hi kombisa rirhandzu ra Yehova hi ku endla ntirho wo chumayela hi Mfumo. Emhakeni leyi, mufi Grant Suiter, khale ka xirho xa Huvo leyi Fumaka ya Timbhoni ta Yehova, u tshame a tsala a ku: “Loko ndzi ri karhi ndzi yingisela [mulanguteri un’wana la famba-fambaka] a vulavula hi malunghelo ya ku tirhela Yehova ni vutihlamuleri byo endla tano, ndzi xiye leswi ndzi faneleke ku swi endla ni leswi ndzi laveke ku swi endla. Xisweswo ndzi endle ku tinyiketela ka munhu hi xiyexe eka Yehova naswona hi nkarhi lowu fanaka swirho swin’wana swa ndyangu wa ka hina swi endle tano na swona. Hi October 10, 1926, eSan Jose, California, hinkwerhu ka hina hi kombise ku tinyiketa eka Yehova Xikwembu hi ku khuvuriwa ematini. . . . Endzhaku ka nkhuvulo . . . tatana u byele nkulu loyi a langutelaka nkhuvulo a ku: ‘N’wina mi famba ni tibuku, a swi tano xana? Na hina, hi lava ku endla ntirho wolowo sweswi.’ Kutani ndyangu wa ka hina wu sungula vutirheli bya nsimu.” Namuntlha, vanhu lava fanelekaka va sungula ku hlanganyela hi xitalo entirhweni wa nsimu hambi va nga si khuvuriwa.

Nkhuvulo Wu Nga Hi Ponisa

20, 21. (a) Mahlonga ya Yehova ‘ya funghiwe’ hi ndlela yihi? (b) “Mfungho” lowu i yini, naswona ku va na wona swi vula yini?

²⁰ Hi mintirho ya hina, hi nga kombisa leswaku ‘hi va Yehova.’ Phela, ku pona ku titshege hi ku tirha hi ku tshembeka tanihi mahlonga ya yena lama tinyiketeke! (Varhoma 6:20-23; 14:7, 8) Eminkarhini ya khale, hakanyingi mahlonga a ma funghiwa emombyeni. Hi ntirho wo chumayela namuntlha, ‘wanuna wo fanikisela loyi a ambaleke nguvu ya lineni’—masalela ya valandzeri lava totiweke va Yesu—wu ‘fungha’ lava va nga ta pona makumu ya mafambiselo lawa. Entirhweni lowu vatotiwa va pfuniwa hi vanghana va vona, “tinyimpfu tin’wana.” (Ezekiel 9:1-7; Yohane 10:16) Kutani “mfungho” i yini ke? I vumbhoni bya leswaku hi tinyiketele eka Yehova naswona hi vadyondzisiwa va Yesu lava khuvuriweke lava va nga ni vumunhu lebyi fanaka ni bya Kriste.

²¹ Ngopfu-ngopfu sweswi i swa nkoka leswaku hi va ni “mfungho” ivi hi wu hlayisa, hikuva hi le ndzeni ka ‘nkarhi wa makumu.’ (Daniel 12:4) Leswaku hi ta ponisiwa hi fanele ‘ku tiyisela ku fika emakumu’ ya vutomi bya hina bya sweswi kumbe ya mafambiselo lawa. (Matewu 24:13) Nkhuvulo wu ta hi ponisa ntsendze loko xisweswo hi tshama hi tshembekile tanihi Timbhoni ta Yehova.

Swivutiso Swa Mpfuxeto

◻ Leswaku hi ponisiwa, ku laveka yini eka hina?

◻ Ha yini vakulu va bula ni lava va navelaka ku khuvuriwa?

◻ I yini lexi vatswari va nga xi endlaka ku nyika vana va vona vukongomisi bya moya lebyi yisaka eku khuvuriweni?

◻ Xana hi tinyiketela entirhweni?

◻ Nkhuvulo wu nga hi ponisa njhani?

[Xifaniso lexi nga eka tluka 16]

Xana wa yi tiva ndlela leyi nkhuvulo wu yelanaka ha yona ni ku ponisiwa ka Nowa ni ndyangu wa yena engalaveni?

[Xifaniso lexi nga eka tluka 18]

Ku tinyiketela ni nkhuvulo ku pfuna vantshwa. Xana wa swi tiva leswaku hi ndlela yihi?