Mutshila Lonkulu—Yehova!

“VATSHILA va penda ku huma ka dyambu ni ku pela ka dyambu ko tala swinene, naswona mintirho ya vona yi xaviwa hi madzana, hambi ku ri hi magidi, ya tirhandi. Hambi swi ri tano, Yehova Xikwembu, Mutshila Lonkulu ni Musunguri wa ku pela ka dyambu ni ku huma ka dyambu, u hi nyika kun’we siku rin’wana ni rin’wana—mahala. Swo sungula swi tlula tikopi swinene. Xana sweswo a swi fanelanga ku hi nyika xivangelo xo n’wi tlangela tanihi Muvumbi?” U anakanyisise hi ndlela yoleyo mulanguteri la famba-fambaka wa Timbhoni ta Yehova eHawaii eka yin’wana ya tinkulumo ta yena ebandlheni.

Wansati la alaka vukona bya Xikwembu, la endzeleke Holo ya Mfumo ro sungula, a a ri exikarhi ka vayingiseri. U xiye ku anakanyisisa ka mutirheli, kambe ku kanakana ka matimba mayelana ni vukona bya Xikwembu a ka ha ri kona. Hambi swi ri tano, loko a ri karhi a tlhelela ekaya a huma hi le ntirhweni kwalomu ka malembe mambirhi endzhakunyana, u khomekile hi ntalo wa mimovha egondzweni. Leswi swi n’wi vangele ku xiya ku pela ka dyambu loku hlamarisaka swinene. Mianakanyo ya yena yi tlhelele eka nkulumo ya mulanguteri luyani la famba-fambaka.

U ri: “Ematshan’wini yo hlundzuka hi ku khomeleriwa hi ntalo wa mimovha, ndzi xiye ku pela ka dyambu ko saseka naswona ku ndzi tsundzuxe hi leswi xivulavuri xi swi vuleke mayelana ni ku tlangela Yehova Xikwembu tanihi Mutshila ni Muvumbi. Swi ndzi endle ndzi anakanya, ‘Kumbexana leswi a swi vuleke i ntiyiso; kumbexana muvumbi u kona hakunene.’ Ndzi anakanye hi swona loko ndzi ri karhi ndzi ya ekaya, naswona vusiku byebyo ndzi vitane munghana wa mina loyi eku sunguleni a ndzi rhambeleke eHolweni ya Mfumo. Ndzi sungule ku dyondza Bibele naswona sweswi ndzi gandzela Yehova tanihi Xikwembu ni Muvumbi wa mina.”

Ku fana ni Mupisalema, wansati loyi a nga tivanga Yehova tanihi Mutshila Lonkulu ntsena wa ntumbuluko kambe u tlhele a yimbelela ku dzunisa ka yena. Mupisalema u tsarile a ku: “Ḍunisani Yehova e matilweni, ṅwi ḍuniseni, dyambu ni ṅhweti! Ṅwi ḍuniseni hikwenu, ṅwina tinyeleti to v̌angama! Hikwaŝo ŝeŝo a ŝi ḍunise v̌ito ra Yehova! Hikuv̌a u lerisile, kutani ŝi v̌a kona.”—Psalma 148:1-5.