Hambeta U Handzisisa Ku Fana Ni Rifuwo Leri Fihlekeke
VONA ntikelo wa rifuwo ra vutlhari lebyi kumiwaka eRitweni ra Xikwembu, ku nga Bibele! Rifuwo leri ri paluxa xikongomelo xa Xikwembu naswona ri veka ku langutela loku nyanyulaka emahlweni ka hina. Ri nyika ku rhula naswona ri hi komba ndlela yo tsakisa Xikwembu. (Varhoma 15:4) Rifuwo leri nakambe ri hi pfuna ku endla hi vutlhari eku hanyisaneni ka hina ni van’wana. Hakunene, vutlhari byo huma eka Xikwembu byi hi pfuna ku famba eka “ndlela ya vutomi” hi ku aneriseka na hi ntsako.—Psalma 16:11; 119:105.
Tanihi leswi mimpfuno ya vutlhari yi taleke, hi fanele ku yi teka yi ri ya nkoka swinene. Munhu la nga ni vutlhari u ri: “Ku v̌ula-v̌ula hikwaku ka nomu wa mina ku lulamile, e ka wona, ku hav̌a ku šisa ni ku hambuka; hikwaŝo ŝa twakala e ka munhu l’a nga ni ku anakanya, ŝi lulamile ka la’v̌a kumaka v̌utiv̌i. Amukelani dyonḍo ya mina le’yi tlulaka silver ni v̌utiv̌i le’byi tlulaka nsuku lo’wo saseka. Hikuv̌a v̌utlhari byi tlula tiperla, hikwaŝo le’ŝi ṭakisaka ŝi nga ka ŝi nga šašameri na byona.”—Swivuriso 8:8-11.
Ha Yini U Hambeta U Handzisisa?
Hi ntolovelo, vuhandzisisi bya swin’wetsin’wetsi, nsuku kumbe silivere leswi celeriweke a byi pfuni nchumu. Leswi a swi fanelanga ku va ntiyiso hi vuhandzisisi bya vutlhari bya Xikwembu. Kambe xana hi nga humelerisa ku yini eka vuhandzisisi lebyi ke? Phela, ku humelela ku titshege hi leswi hi ri naverisaka xiswona rifuwo leri ni ndlela leyi hi nga ta tirha hi matimba ha yona leswaku hi ri kuma. Loko hi xiya ntinkelo wa rona wa ntiyiso, hi ta ri tlakusa eka swilo swin’wana hinkwaswo leswi nga ni nkoka. Hikwalaho, “ku fuwa v̌utlhari, ku tlula nsuku, ni ku fuwa ku twisisa ku tlula silver.”—Swivuriso 16:16.
Swivuriso 2:1-6 ya tsundzuxa loko yi ku: “Ṅwana nga loko u amukela marito ya mina, u va u tihlayisela milawu ya mina, loko u riya ndleve ya wena u ku yingisa v̌uthlari, u nyiketa mbilu ya wena e ku yingiseni; nḍi ri, loko u rilela v̌utiv̌i, loko u huwelela e ku twisisa, loko u ŝi lava kukotisa mali, u hakuta kukotisa šuma le’ši fihliweke, hi laha u nga ta twisisa ku tšhav̌a ka Yehova, u ta kuma ku tiv̌a ka Šikwembu. Hikuv̌a Yehova hi yena l’a nyikaka v̌utlhari; ku tiv̌a ni ku twisisa ŝi huma e noṅwini wa yena.”
Tanihi leswi rifuwo leri celeriweke ri fihliweke i swa nkoka ku ri lavisisa. Loko va ri karhi va cela, van’wana va titsona nkarhi wo tlanga, swakudya ni vurhongo. Kambe matshalatshala yo tano ya tekiwa ya ri ya nkoka loko rifuwo ri kumiwile. Hi fanele hi endla matshalatshala lama fanaka leswaku hi kuma vutlhari bya Xikwembu. Tanihi leswi ku handzisisa rifuwo leri celeriweke swi lavaka ku cela loku vavaka, ni vuhandzisisi bya vutlhari byi lava ku tiyisela. A swi anelanga ku famba-fambisa mahlo eBibeleni ni le tibukwini ta Vukriste. Nkarhi, vulavisisi ni ku anakanyisisa swa laveka ku kuma rifuwo ra moya. Kambe mawaku ntsako lowonghasi loko hi kuma vutlhari eMatsalweni!—Nehemia 8:13.
Ku Lavisisa Rifuwo Loku Humelelaka
Ina, ntsako wu huma eku celeni ka Rito ra Xikwembu ni ku kuma rifuwo ra vutlhari. (Swivuriso 3:13:18) Emhakeni yoleyo, hi tlharihile loko hi aka layiburari ya munhu hi xiyexe kumbe ya ndyangu. Kambe i yini lexi yi faneleke ku va na xona? Handle ka dikixinari leyinene, Timbhoni ta Yehova ti swi kuma swi pfuna ku va ni ku hundzuluxela ko hambana-hambana ka Matsalwa kun’we ni tibuku ta Bibele ta Vukriste, ku katsa ni tikopi ta Xihondzo xo Rindza ni ta magazini lowu fambisanaka na xona wa Awake! ta lembe rin’wana ni rin’wana! Kavula, layiburari yi fanele ku tirhisiwa hi mfanelo loko yi ta hi pfuna tanihi hi valavisisi va rifuwo.
Eka vuhandzisisi bya hina bya vutlhari, hi nga ya eka timhaka ni swiyenge swa Matsalwa swa Watch Tower Publications Index kumbe swikombo leswi swi nga endzhaku ka tibuku kumbe tivholomu ta timagazini ta Sosayiti ya Watch Tower. Leswi i switirho swa xisekelo swa ku lavisisa vutlhari bya Xikwembu. Entiyisweni, swi fana ni mepe lowu nga hi yisaka eka “xuma lexi fihliweke” xa vutlhari bya Xikwembu. (Swivuriso 2:4) Loko hi ri hava tibuku to karhi leti lavekaka ku endla vulavisisi, ti nga ha kumeka eHolweni ya Mfumo ya Timbhoni ta Yehova ya kwalaho.
Manuku ke, a hi nyikeni xikombiso xa ku lavisisa rifuwo loku humelelaka. Eku hlayeni ka hina ka Bibele, hi nga ha hlamala ndlela leyi Yudasi Iskariyota a feke ha yona endzhaku ko xenga Yesu Kriste. Matewu 27:5 yi vula leswaku Yudasi “a suka a ya tisunga.” Kambe Mintirho 1:18 yi ri: “Leyi a nga ya wela hi nhloko eka yona [nsimu], a handzuka hi le xikarhi, kutani marhumbu ya yena ma huma hinkwawo.” Kutani Yudasi u fise ku yini? Nhlamulo yi nga kumiwa hi ku kambisisa minxaxamelo ya Matsalwa lama eka “Xikombo xa Matsalwa” xa buku leyi nge Insight on the Scriptures. Ya hi byela: “Matewu yi vonaka yi hlamusela hi xivumbeko xa ku tisunga loku ringetiweke, loko Mintirho yi hlamusela vuyelo. Loko u hlanganisa timhaka ha timbirhi, swi vonaka onge Yudasi u ringete ku tihayeka ehenhla ka riwa, kambe ngoti kumbe rhavi ra murhi ri tshovekile lerova a wela ehansi ivi a phyandlekela ehenhla ka maribye lama nga ehansi. Xivumbeko xa Yerusalema xi endla leswaku xiendlakalo xolexo xi twisiseka.” (Vholumo 2, tluka 130) Malunghana na Insight on the Scriptures, vona tluka 10 ra magazini lowu.
Ku tirhisa concordance swi hi pfuna ku kuma matsalwa ya Bibele. Kavula, loko hi hlamusela tsalwa, hi fanele ku nyikela nyingiso eka mongo. Ku kombisa leswi, a hi kambisiseni Psalma 144:12-14. Tindzimana leti ti yimela vanhu tanihi lava nge: ‘Vana va hina va xinuna va fana ni swimilana, vana va hina va vanhwanyana va fana ni maribye lama vatliweke, tingula ta hina ti tele, mintlhambi ya hina yi andza hi magidi, mathokazi ya hina ma tswala, ku hava khombo.’ Hi nga ha ehleketa leswaku marito lama ya tirha eka vanhu va Xikwembu, kambe mongo wu komba leswaku a ma tirhi. Eka ndzimana 11, mupisalema Davhida u kombela ku ntshuxiwa eka lava vulavulaka vunwa. A va tinyungubyisa hi vana va vona va xinuna, va xisati, mintlhambi ni tihomu ta vona. Hi ku ya hi ndzimana 15, vadyohi vo tano va te: “Ku katekile tiko le’ri nga tano!” Hambi swi ri tano, hi laha ku hambaneke, Davhida u huwelerile a ku: “Ku katekile tiko leri Yehova a nga Šikwembu ša rona!”
Rifuwo Ra Moya Ra Andza!
Ntsako entiyisweni wu huma eka vuhandzisisi lebyi humelelaka bya vutlhari. Naswona rifuwo ra moya leri nga kumiwaka hi ku endla vulavisisi ri katsa tinhlamulo leti anerisaka eka swivutiso swa Bibele. I tinhlamulo tihi leti hi ti kumaka loko hi hambeta hi handzisisa! Hi xikombiso, Kayini u n’wi kume kwihi nsati wa yena? Xihondzo xo Rindza xa Xinghezi (October 1, 1981) xi te: “Bibele yi hi byela leswaku Adamu na Evha a va ri ni vana vo tala, hayi vambirhi ntsena [Kayini na Avele]. ‘Masiku ya Adamu endzhaku ka ku kuma Seta [n’wana un’wana wa jaha] a ma ri malembe ya madzana ya nhungu. Nakambe u vile tatana wa majaha ni vanhwana.’ (Gen. 5:4) Hi ku ya hi mhaka yoleyo, hi kwihi laha u nga vulaka leswaku Kayini u n’wi kume kona nsati wa yena? Ina, u fanele a teke un’wana wa vamakwavo va yena va xisati. Namuntlha leswi swi nga ha va ni khombo eka n’wana wihi na wihi la tswariweke hi vatswari lava nga ni vuxaka byo tano bya le kusuhi. Kambe ekusuhi ni le ku sunguleni ka vurunguri bya vanhu, loko vanhu va ha ri ekusuhi swinene ni ku hetiseka, a ku nga ri xiphiqo.”
A hi nge hi hlaya buku ya Bibele ya Swivuriso. Hi ku xiya leswi vuriwaka eka Swivuriso 1:7, hi nga ha hlamala hi ku: ‘Xana “ku chava Yehova” i yini?’ Ku handzisisa ku nga ha hi yisa eka Xihondzo xo Rindza xa May 15, 1987, lexi nga te: “I ku xixima ka xichavo, xichavo lexi tiyeke ni xichavo lexinene xo n’wi hlundzukisa hikuva hi tlangela tintswalo ni vunene bya yena. ‘Ku chava Yehova’ swi vula ku pfumela leswaku i Muavanyisi la Tlakukeke ni wa Matimba Hinkwawo la nga ni mfanelo ni matimba yo tisa ku xupula kumbe rifu ehenhla ka lava nga n’wi yingisiki. Nakambe swi vula ku tirhela Xikwembu hi ku tshembeka, hi tshembela eka xona hi laha ku heleleke, ivi hi venga leswo biha emahlweni ka xona.”
Hambeta U Handzisisa!
Xihondzo xo Rindza xi humeseriwa ku pfuna vahandzisisi va vutlhari lava tiyimiseleke leswaku va kuma rifuwo ra moya leri nga ni ntikelo. Hinkwerhu ka hina hi lava vutlhari ni ku twisisa Rito ra Xikwembu. Swivuriso 4:7,8 yi ri: “Ku sungula ka v̌utlhari, hi ku lav̌a byona; u šav̌a ku anakanya hi hikwaŝo leŝi u nga na ŝona, kurisa v̌utlhari, byi ta ku kurisa; loko u byi namarela, byi ta ku ḍunisa.”
Hi nga kuma ntsako wa ntiyiso hi ku nghenisa vutivi bya Matsalwa ni ku tirhisa vutlhari hi mfanelo ntsena. Ina, hi nga tsakisa Yehova Xikwembu hi ku tirhisa vutlhari bya Xikwembu ntsena. Kutani u nga pfumeleli nchumu wu ku sivela ku lavisisa vutlhari ku fana ni rifuwo.
[Xifaniso lexi nga eka tluka 4]
Ku handzisisa rifuwo leri fihliweke swi lava ku cela, hi matimba. Xana a hi fanelanga ku tiyisela eku handzisiseni ka hina ka vutlhari bya Xikwembu?