Vutomi Ni Vutirheli Bya Yesu

Mufuwi Na Lazaro

YESU a a ri karhi a vulavula ni vadyondzisiwa va yena ehenhleni ka ku tirhisiwa lokunene ka rifuwo ra leswi vonekaka, a hlamusela leswaku hi nge swi koti ku va mahlonga ya leswi ivi hi nkarhi lowu fanaka hi va mahlonga ya Xikwembu. Vafarisi na vona va yingisela, naswona va sungula ku sandza Yesu hikuva i varhandzi va mali. Kutani u ri eka vona: “Loko mi ri n’wina, mi tiendla lava lulameke emahlweni ka vanhu; kambe Xikwembu xi tiva timbilu ta n’wina; hikuva leswi swi titlakusaka emahlweni ka vanhu i manyala emahlweni ka Xikwembu.”

Nkarhi wu fikile wa leswaku matafula ya hundzuriwa eka vanhu lava fumeke hi nhundzu ya misava, matimba ya politiki ni vulawuri ni nkucetelo wa vukhongeri. Va fanele ku tsongahatiwa, naswona lava va xiyaka xilaveko xa vona xa moya va fanele ku tlakusiwa. Yesu u kombetela eka ku cinca ko tano loko a ya emahlweni a byela Vafarisi a ku:

“Nawu ni Vaprofeta hi swona a swi tirha ku fika loko Yohane Mukhuvuri a humelela; ku sukela enkarhini wolowo Evangeli ya Mfumo wa Xikwembu ya vuriwa, kutani un’wana ni un’wana u nghena hi matimba eka wona. Swi nga olova eka tilo ni misava ku hundza, ku tlula loko valanyana hambi ri ri rin’we ra Nawu ri wela hansi.”

Vatsari ni Vafarisi va tinyungubyisa hi ku namarhela ka vona ka nomu ntsena ka Nawu wa Muxe. Tsundzuka leswaku loko Yesu hi singita a hanyanyise mahlo ya wanuna un’wana eYerusalema, va tikurisile va ku: “Hina hi vadyondzisiwa va Muxe. Ha swi tiva leswaku Xikwembu xi vulavurile na Muxe.” Kambe sweswi Nawu wa Muxe wu xi hetisisile xikongomelo lexi a wu endleriwe xona xa ku yisa vanhu lava titsongahataka eka Hosi leyi vekiweke hi Xikwembu, ku nga Yesu Kriste. Kutani eku sunguleni ka vutirheli bya Yohane, vanhu va tinxaka hinkwato, ngopfu-ngopfu lava titsongahataka ni swisiwana, va endla hi matimba ku va vafumiwa va Mfumo wa Xikwembu.

Tanihi leswi Nawu wa Muxe wu nga eku hetisekeni, ndzhwalo wo wu hlayisa wu fanele ku susiwa. Nawu lowu wu pfumelela ku dlaya vukati eswisekelweni swo hambana-hambana kambe sweswi Yesu u ri: “Un’wana ni un’wana la tshikaka nsati wa yena, loko ku nga ri hi mhaka ya vunghwavava, kutani a teka un’wana, wa oswa.” Marito yo tano ma fanele ma karhata Vafarisi swonghasi, ngopfu-ngopfu tanihi leswi va pfumelelaka ku dlaya vukati eswisekelweni swo tala!

Loko a ya emahlweni ni tinhlamuselo takwe eka Vafarisi, Yesu u hlamusela xifaniso lexi kombisaka vavanuna vambirhi lava xivumbeko xa vona kumbe xiyimo, eku heteleleni xi hundzuriwaka hi ndlela leyi hlamarisaka. Xana u nga swi kota ku vona leswi vavanuna va kona va yimelaka swona ni leswi ku hundzuka ka swiyimo swa vona swi vulaka swona ke?

Yesu wa hlamusela a ku: “A ku ri ni mufuwi la ambaleke nguvu yo vangama ya xivunguvungu ni ntswembani lowo saseka, a tshama eku tsakeni a tiphina hi masiku hinkwawo. Naswona, a ku ri ni xisiwana lexi a va ku i Lazaro; a a hamba a ta vekiwa kwala nyangweni ya mufuwi, a tele swilondza. A a navela ku xurha hi mahlanhla lama waka hi le tafuleni ra mufuwi; timbyana na tona a ti ta, ti ta n’wi lakatsela swilondza.”

Yesu laha u tirhisa mufuwi ku yimela varhangeri va vukhongeri bya Xiyuda, hayi ku katsa ni Vafarisi ni vatsari ntsena kambe ni Vasaduki kun’we ni Vaprista lavakulu, Va fuwile eka malunghelo ni swikhundla swa moya, naswona va hanya hi ndlela leyi mufuwi a hanyeke ha yona. Swiambalo swa vona swa xivunguvungu swa vuhosi swi yimela xiyimo xa vona lexi rhandziwaka, naswona ntswembani wo basa wu fanisela ku tiendla lava lulameke.

Ntlawa lowu wa mufuwi la tinyungubyisaka wu languta vanhu va swisiwana, lava tolovelekeke hi ku sola loku heleleke, wu va vitana ‛am ha·’aʹrets, kumbe vanhu lava nga va misava. Xisweswo Lazaro loyi a nga mukomberi u fanisela vanhu lava varhangeri va vukhongeri va va tsonaka swakudya ni malunghelo lama faneleke ya moya. Hikwalaho, ku fana na Lazaro la funengetiweke hi swilondza, vanhu lava tolovelekeke va tsongahatiwa tanihi lava nga ni vuvabyi emoyeni ni lava va faneriwaka hi ku tshama ni timbyana ntsena. Kambe ke, lava va ntlawa wa Lazaro va ni ndlala ni torha ra swakudya swa moya naswona hi ndlela yoleyo va le nyangweni va lava ku amukela swiphemu swihi na swihi leswi nga nyawuriki swa swakudya swa moya leswi nga ha waka swi huma etafuleni ra mufuwi.

Sweswi Yesu u ya emahlweni a hlamusela ku hundzuka exiyin’weni xa mufuwi na Lazaro. Ku hundzuka loku hi kwihi, naswona ku yimela yini ke? Swivutiso leswi swi ta kambisisiwa enkandziyisweni lowu landzelaka wa magazini werhu. Luka 16:14-21; Yohane 9:28, 29; Matewu 19:3-9; Vagalatiya 3:24; Vakolosa 2:14.

◆ Eku sunguleni ka vutirheli bya Yohane, i ku hundzuka kwihi loku Yesu a kombaka leswaku ka humelela?

◆ I yini lexi faneleke ku susiwa endzhaku ka ku fa ka Yesu, naswona leswi swi ta khumba mhaka yo dlaya vukati hi ndlela yihi?

◆ Exifanisweni xa Yesu, i vamani lava fanekiseriwaka hi mufuwi na Lazaro?

◆ I rungula rihi leri hi nga ha ri langutelaka enkandziyisweni lowu landzelaka wa magazini lowu?