Vukati Lebyi Pfunaka Timiliyoni Leti Hanyaka Sweswi
“Ku fuma i ka [Yehova] Xikwembu xa hina lexi nga ni matimba hinkwawo. . . . A hi tsakeni hi tsakisisa, hi xi dzunisa, hikuva nkhuvo wa vukati bya Xinyimpfana wu fikile, ni mutekiwa wa xona u tilulamisile.”—NHLAVUTELO 19:6, 7.
1. Risimu ra vuprofeta ra Nhlavutelo 19:6-8 ri ta sunguriwa rini ku yimbeleriwa, naswona ha yini?
MARITO lawa lama nyanyulaka ya vumba xiphemu xa risimu ra ku hlula. Xana ri ta sungula rini ku yimbeleriwa? Endzhaku ka ku lovisiwa ka nala wa khale wa vugandzeri bya Yehova—“Babilona Lonkulu,” “muoswi lonkulu” wo fanekisela la yimelelaka tinxaka hinkwato ta vukhongeri bya mavunwa. Ku avanyisa ku fanele ku tisiwa ehenhla ka yena hikwalaho ka ndlela yo biha leyi a nga yimela Xikwembu ha yona. Ndlela leyi ha yona a lahleke vanhu hi ku katseka ka yena etipolitikini, makwanga ya yena ya swilo leswi vonekaka ni rivengo ra yena ro dlaya vagandzeri va Yehova va ntiyiso!—Nhlavutelo 17:1-6; 18:23, 24; 19:1, 2; Yakobo 4:4.
2. (a) Yehova u ta ku tisa njhani ku lovisiwa ka Babilona Lonkulu? (b) Ematshan’wini yo dzunisa Yehova, i yini lexi valovisi va vukhongeri bya mavunwa va nga ta xi endla?
2 Ku nga ri khale, Yehova Xikwembu u ta nghenisa etimbilwini ta varhangeri va tipolitiki ta misava leswaku va n’wi lovisa. (Nhlavutelo 17:12, 16, 17) Kambe valovisi va vukhongeri bya mavunwa va nge hlanganyeli eku yimbeleleni ka risimu lerikulu ra ku hlula. Ematshan’wini ya sweswo, ehansi ka nkucetelo wa Sathana, kumbe Gog, va ta hlasela vagandzeri va vukhongeri bya ntiyiso, lava hanyaka hi ku rhula naswona va tshamaka va tihambanisile ni vubihi bya misava leyi.—Esaya 2:2-4; Ezekiel 38:2, 8-12; Yohane 17:14; Yakobo 1:27.
3. Hi swihi swivangelo leswi malandza ya Yehova ya vanhu ya nga ta joyina risimu ra le tilweni ha swona?
3 Nhlaselo lowu wa vafumi va politiki lowu tlhontlhaka Xikwembu wu ta vanga nyimpi ya Armagedoni, leyi nga ta tisa makumu lama heleleke eka matiko hinkwawo lama nga laviki vukhongeri. Endzhaku ka sweswo, nkucetelo wo biha wa Sathana ni mademona ya yena wu ta susiwa emisaveni. (Nhlavutelo 16:14, 16; 19:11-21; 20:1, 2) Hi timbilu leti teleke ku tlangela, hinkwavo vanhu lava hanyaka va ta hlanganyela eka risimu ra le tilweni leri nge: “Aleluya!, hikuva ku fuma i ka [Yehova], Xikwembu xa hina lexi nga ni matimba hinkwawo.” (Nhlavutelo 19:6) Kunene, swiendlakalo swo tano leswi tsekatsekisaka misava swi ta kombisa ku sungula ka nguva leyintshwa. Yehova u ta va a byi lwerile vuhosi bya yena naswona a va susile emisaveni hinkwavo lava lwisanaka ni vuhosi bya yena. Eku heteleleni nkarhi wa vukati bya le tilweni wu ta va wu fikile. Loko risimu ra vuprofeta ri ya emahlweni ri ri: ‘A hi tsakeni hi tsakisisa, hi dzunisa Yehova, hikuva nkhuvo wa vukati bya Xinyimpfana wu fikile, ni mutekiwa wa xona u tilulamisile.’—Nhlavutelo 19:7, 8.
4. (a) Xana i vamani lava fanekiseriwaka hi Xinyimpfana ni “nsati” wa xona? (b) I swivutiso swihi leswi vutisiwaka laha, naswona hi nga tikuma njhani tinhlamulo?
4 Xinyimpfana a hi un’wana loko ku nga ri Yesu Kriste la dzunisiwaka naswona “nsati” wa yena i nhlayo leyi heleleke ya valandzeri va yena va vatotiwa vo tshembeka va 144 000 lava sweswi va hlanganeke na yena etilweni. Vanghana lava hinkwavo va vukati bya le tilweni va vumba ntlawa lowu heleleke wa Mfumo wa Xikwembu, lowu nga ta yisa vanhu eku hetisekeni, ku katsa ni vafi lava pfuxiweke. (Nhlavutelo 5:8-10; 14:1-4; 20:4, 12, 13; 21:3-5, 9, 10; 22:1-3) Xana swiendlakalo leswi yisaka evukatini byebyo lebyi katekisiweke swi ta humelela? Xana u nga pfuneka njhani eka vukati byebyo? Ku kuma tinhlamulo ta swivutiso sweswo, a hi kambisiseni swiendlakalo leswi rhendzeleke vukati bya Isaka, hi laha swi rhekhodiweke ha kona eka Genesa ndzima 24.
Mutekiwa La Hlawuriweke Hi Xikwembu Wa Isaka
5, 6. Ha yini Abrahama a sindzise leswaku Isaka a nga teki Mukanana, naswona nkongomiso lowu lowunene i wa vamani namuntlha? (1 Vakorinto 7:39)
5 Mhaka yi sungula laha Abrahama a nyikaka swiletelo eka mulanguteri wa yindlu ya yena, loyi entiyisweni ku nga Eliyezeri. (Genesa 15:2; 24:2) “Nḍi ku hlambanyisa ha Yehova,” ku vula Abrahama, “leŝaku u nga ka u nga tekeli ṅwana wa mina e nsati e šikari ka v̌anhwana v̌a v̌a-Kanana, v̌olav̌o nḍi akeke šikari ka v̌ona; kambe u ta ya e tikweni ra mina, ni laha nḍi tŝariweke kona, u ya tekela ṅwana nga, Isak, e nsati kona.”—Genesa 24:3, 4.
6 Ha yini Abrahama a sindzisa leswaku n’wana wa yena a nga fanelanga a teka Mukanana? Hikuva Vakanana a va ri vatukulu va Kanana, loyi a rhukaniweke hi Nowa. (Genesa 9:25) Ku tlula kwalaho, Vakanana a va dume hi mintirho ya vona yo biha, naswona xa nkoka ngopfu a va nga gandzeli Yehova. (Genesa 13:13; Levitika 18:3, 17-28) Hi laha ku faneleke, Abrahama u lave leswaku n’wana wa yena a teka un’wana wa ndyangu wa ka vona, eka vatukulu va Sem, loyi a kumeke nkateko wa Nowa lowu huhuteriweke. (Genesa 9:26) Mayana nkongomiso lowunene swonghasi lowu leswi swi nga wona eka Vakriste lava hlawulaka ku teka namuntlha!—Deuteronoma 7:3, 4.
7. Abrahama u n’wi lunghiselerise ku yini Eliyezeri ku hetisisa xiavelo xa yena?
7 Kutani Eliyezeri u teke riendzo ro tlula 800 wa tikhilomitara ku ya eMesopotamiya. U fambe a tilunghiselele kahle, a ri ni tikamela ta khume leti rhwaleke tinyiko. (Genesa 24:10) Ku engetela kwalaho, a ta anakanyisisa hi marito ya n’wini wakwe lama tiyisaka ripfumelo lama nge: “Yehova, Šikwembu ša tilo, . . . o ta ruma e nṭumi ya yena e mahlweni ka wena, u ta tekela ṅwana nga e nsati kona.”—Genesa 24:7.
8, 9. (a) Xana ku humelele yini loko Eliyezeri a fika emutini wa Nakor? (b) Xana nsati la fanelekaka a a ta hlawuriwa hi ku ringetiwa kwihi?
8 Eku heteleleni, u fikile emutini wa Nakor en’walungu wa Mesopotamiya. Eliyezeri u nkhinsamise tikamela leti karhaleke leswaku ti wisa exihlobyeni ehandle ka muti. A ku ri hi nkarhi wa siku lowu vavasati va kaka mati ha wona—kunene a ku ri nkarhi lowunene eka Eliyezeri leswaku a lava nsati la fanelekaka! Kambe a a fanele a va nsati wa njhani? Wo saseka xana? Doo. Xo sungula Eliyezeri a a tsakela nsati loyi a nga na vumunhu byo chava Xikwembu. Leswi swi paluxiwe hi xikhongelo xo titsongahata xa ripfumelo lexi a xi vulaka sweswi a ku: “Yehova Šikwembu ša ṅwini wa nga, Abraham, nḍi hlanganise namuntlha ni loyi nḍi ṅwi lav̌aka, u endla hi tintŝalo e ka ṅwini wa mina, Abraham. Waŝiv̌o, nḍi ta yima kusuhi ni šihlov̌o ša mati e nkarini lowu v̌anhwana v̌a v̌anhu v̌a muti v̌a humaka ha wona e ku ya ku keni ka mati; u nge nhwanyana loyi nḍi nga ta ku ka yena: Wa nga koramisa e khuwana ra wena, nḍi nwa, yena a ku ka mina: Nwana, nḍi ta nwisa ni tikamela ta wena, a v̌e yena yoloyi u nga hlawulela nanḍa wa wena, Isak; hi kona nḍi nga ta v̌onisisa leŝaku u endla hi tintŝalo e ka ṅwini wa mina.”—Genesa 24:11-14.
9 Kunene koloko a ku ri ku ringeta lokunene. Hi ku ya hi The New Encyclopædia Britannica, kamela leyi nga ni torha ku tlurisa mpimo yi nga nwa ‘95 wa tilitara ta mati hi timinete ta 10.’ Swi nga endleka leswaku tikamela ta Abrahama a ti nga ri na torha ngopfu, kambe a swi kanakanisi leswaku vavasati va nkarhi wolowo a va wu tiva mpimo wa mati ya swifuwo. Entiyisweni, a swi ta lava wansati wa musa, la nga riki na vutianakanyi, la gingiritekaka leswaku a tinyiketela ku kela tikamela leti karhaleke ta khume ta munhu wumbe mati.
10, 11. (a) Hi yihi ndlela leyi xiyekaka leyi xikhongelo xa Eliyezeri xi hlamuriweke ha yona? (b) Xana Rebeka u tikombise njhani timfanelo leti navelekaka? (c) Eliyezeri u endlise ku yini?
10 Hambi loko Eliyezeri a nga si heta xikhongelo xa yena, a xi hlamuriwile, tanihi laha mhaka yi nge: “Ku huma Rebeka . . . e nhwanyana loyi a a ri lowo saseka ngopfu loko a v̌oniwa, a ri wanhwana l’a nga siki tiviwa hi wanuna. A relela šihlobyeni, a tata khuwana ra yena, a v̌uya a tlhandluka. Kambe nanḍa a ṭuṭuma, a hlangana na yena, a ku ka yena: Wa nga nḍi pfumelela nḍi nwa e matinyana ya khuwana ra wena. Yena a ku: Nwana, hosi ya nga. A hatlisa, a koramisa khuwana e v̌okweni ra yena, a ṅwi nwisa. Kute loko a hetile ku ṅwi nwisa, a ku: Nḍi ta kelela ni tikamela ta wena, ti nwa ti ko ti kolwa. Kutani a hatlisa a tšhulula khuwana ra yena e siṭengeleni, a tlhela a ṭuṭuma e šihlobyeni e ku kela kona, a v̌a a kelela tikamela ta yena hikwato.”—Genesa 24:15-20.
11 Eliyezeri u ‘langute hi ku hlamala’ tanihi leswi a xiyaka nhlamulo ya singita eka xikhongelo xa yena. Loko nhwana la dzunekaka a hetile, a n’wi hakela hi xingwavila xa nsuku xa le nhompfini ni masindza mambirhi ya nsuku kutani a nwi vutisa a ku: “U ṅwana mani?” Loko a kuma leswaku a a ri ntukulu wa makwavo wa Abrahama, Eliyezeri a nkhinsamela Yehova a n’wi gandzela hi ku xixima, a ku: “A ku nkhensiwe Yehova Šikwembu ša ṅwini wa mina Abraham, loyi a nga rutelangiki ku hlayisela ṅwini wa mina e tinṭŝalo ta yena, ni ku ṭhembeka ka yena. Na mina, Yehova o nḍi fambisile e ndleleni ya mina, e kaya ka v̌amakwav̌o v̌a ṅwini wa mina.”—Genesa 24:21-27.
12. Xana mhaka yi hetiseke njhani ekaya ka va Rebeka?
12 Hi ku nyanyuka Rebeka u tsutsumele ekaya ku ya byela va ndyangu wa yena. Endzhakunyana, loko tata wa Rebeka ni makwavo va twile xikongomelo xa riendzo ra Eliyezeri hi nomu wa yena ni ndlela leyi ha yona Yehova a hlamuleke xikhongelo xa yena, va pfumerile va nga ri na ku kanakana leswaku Rebeka u fanele a va nsati wa Isaka. “Kute loko nanḍa wa Abraham a twe marito walawo, a nkhinsamela hansi e mahlweni ka Yehova. Kutani nanḍa a humesa šuma ša silver ni ša nsuku, ni tinguv̌u, a nyika Rebeka; ni makwav̌o wa yena, ni mana wa yena, a v̌a nyika šuma ša risima.”—Genesa 24:52, 53.
Endlelo Ra Mutekiwa Ni Malandza Yakwe
13. Ku hlawula ka Yehova ku tiyisiwe njhani tanihi loku faneleke?
13 Xana Rebeka u ri langute njhani lunghelo ra ku hlawuriwa hi Xikwembu tanihi nsati wa Isaka? Siku leri landzelaka ku humelele xin’wana lexi paluxaka mintlhaveko ya yena ya xiviri. Loko a hetisisile xikongomelo xa riendzo ra yena, Eliyezeri u navele ku tlhelela eka n’wini wa yena hi ku hatlisa. Kambe va ndyangu wa Rebeka va lave leswaku mutekiwa a tshama na vona ku ringana masiku ya khume. Kutani swi vekiwe emakatleni ya Rebeka leswaku a boha loko a ku lungherile ku hatla a famba. U te: “Nḍi ta ya.” Ku pfumela ku sukela ndyangu wa yena xikan’we kutani a ya etikweni leri nga le kule leswaku a ya tekiwa hi wanuna loyi a nga si tshamaka a n’wi vona a ku ri xikombiso lexi xiyekaka xa ripfumelo eka nkongomiso wa Yehova. Swi tiyisise leswaku a a faneleka.—Genesa 24:54-58.
14. (a) Xana Rebeka u fambe na vamani? (b) Xana i riendzo ra njhani leri va kongomaneke na rona?
14 Rebeka a a ri ni tinxangwana eriendzweni ra yena. Tanihi laha mhaka yi hlamuselaka ha kona: “Rebeka a pfuka ni malanḍa ya yena ya v̌av̌anhwana, v̌a khanḍiya e tikamela.” (Genesa 24:61) Kutani xitimele xa tikamela xi fambe riendzo ra ku tlula 800 wa tikhilomitara xi famba tindhawu timbe. “Avhareji ya rivilo ra tikamela leti rhwaleke ri kwalomu ka 4 wa tikhilomitara hi awara,” ku hlamusela buku leyi nge The Living World of Animals. Loko tikamela ta Abrahama ti fambe hi rivilo rero nhungu wa tiawara hi siku, a ti ta va ti teke ku tlula masiku ya 25 ku fika laha ti yaka kona eNegeb.
15. (a) I xikombiso xihi lexinene lexi hi xi vonaka eka Eliyezeri, Rebeka ni tinxangwana takwe? (b) Xana mhaka leyi yi fanekisela yini?
15 Eliyezeri, Rebeka ni malandza ya yena ya vanhwana va tshembe nkongomiso wa Yehova hi laha ku heleleke, i xikombiso lexinene eka Vakriste namuntlha! (Swivuriso 3:5, 6) Ku engetela kwalaho, mhaka leyi i drama ya vuprofeta leyi tiyisaka ripfumelo. Tanihi laha hi swi voneke ha kona, Abrahama u fanekisela Yehova Xikwembu, loyi a nyikeleke N’wana wakwe la rhandzekaka, Isaka Lonkulu, leswaku vanhu lava nga ni xidyoho va kuma vutomi lebyi nga heriki. (Yohane 3:16) Ku lunghiseleriwa ka vukati bya Isaka ku te endzhaku ka loko a ponisiwile eku feni ealtarini ya gandzelo. A ku fanekisela ku lunghiseleriwa ka vukati bya le tilweni, lebyi ku lunghiseleriwa ka byona ku sunguleke hi ku tiyiseka endzhaku ka ku pfuka ka Yesu.
Vukati Bya Isaka Lonkulu
16. (a) Nandza wa Abrahama u wu fanekisela kahle moya lowo kwetsima wa Xikwembu hi ndlela yihi? (b) I xivutiso xihi lexi nga ha vutisiwaka malunghana ni moya ni mutekiwa?
16 Vito ra Eliyezeri ri vula leswaku “Xikwembu Xa Nga I Mupfuni.” Hi vito na hi xiendlo, u fanekisela kahle moya lowo kwetsima wa Abrahama Lonkulu, Yehova Xikwembu, lowu a wu rhumeke etikweni ra le kule, emisaveni ya hina, leswaku wu hlawulela Isaka Lonkulu, Yesu Kriste nsati la fanelekaka. (Yohane 14:26; 15:26) Ntlawa wa mutekiwa i ‘bandlha,’ leri vumbiweke hi vadyondzisiwa va Yesu lava va tswariweke hi moya lowo kwetsima tanihi vana va Xikwembu va moya. (Vaefesa 5:25-27; Varhoma 8:15-17) Tanihi leswi Rebeka a kumeke tinyiko to durha, kutani swirho swo sungula swa bandlha ra Vukriste hi siku ra Pentekosta ya 33 C.E. swi kume tinyiko ta masingita to komba ku hlawuriwa ka swona ka le tilweni. (Mintirho 2:1-4) Ku fana na Rebeka, hi ku tirhandzela va fularhela vuxaka hinkwabyo bya misava ni bya nyama leswaku eku heteleleni va hlangana ni Muteki wa vona wa le tilweni. Ku sukela enkarhini lowu swirho swo karhi swa ntlawa wa nandza swi hlawuriwaka ha wona ku ya fika eku feni ka swona, swi fanele swi tivonela vunhwana bya swona loko swi ri karhi swi famba emisaveni ya Sathana leyi nga ni khombo, leyi kanganyisaka. (Yohane 15:18, 19; 2 Vakorinto 11:3; Yakobo 4:4) Ntlawa wa mutekiwa, hi ku tatiwa hi moya wo kwetsima, wu rhambela van’wana ku hlanganyela emalunghiselelweni ya Yehova ya ku hlayiseka. (Nhlavutelo 22:17) Xana u landzela xikombiso xa yena hi ku amukela nkongomiso wa moya na wena?
17. (a) Xana tikamela ta khume ti fanekisela yini? (b) Xana langutelo ra hina ri fanele ri va rihi ehenhleni ka Bibele na hi tibuku leti sekeriweke eBibeleni leti lunghiseleriweke hi ntlawa wa mutekiwa? (Mintirho 17:11)
17 Ntlawa wa mutekiwa wu xiya nkoka wa leswi fanekiseriwaka hi tikamela ta khume. Nhlayo ya khume eBibeleni yi tirhisiwa ku kombisa ku hetiseka kumbe ku helela eka swilo leswi nga emisaveni. Tikamela ta khume ti nga fanisiwa ni Rito ra Xikwembu leri heleleke ni ku hetiseka, leri ha rona ntlawa wa mutekiwa wu kumaka ku seketeriwa ka moya ni tinyiko ta moya. (Yohane 17:17; Vaefesa 1:13, 14; 1 Yohane 2:5) Loko xi hlamusela hi ku kelelela ka Rebeka tikamela, Xihondzo xo Rindza xa Xinghezi xa November 1, 1948, xi tirhise leswi eka ntlawa wa mutekiwa xi ku: “Va xiya Rito ra Xikwembu leri va nyikaka moya wa xona wo tala hi rirhandzu. Va tsakela Rito ra xona leri tsariweke, va ri phamela kutani va ri phyuphyisa hi ku ri hlaya ivi va kombisa ku khathalela ka ntiyiso eka rungula ni xikongomelo xa rona, va lava ku ri pfumela.” Tanihi xikombiso xa leswi, masalela ya ntlawa wa mutekiwa hi rirhandzu ma endle leswaku New World Translation of the Holy Scriptures leyintshwa, leyi nge nkarhini yi kumeka eka timiliyoni. Hambi loko ku hundzuluxela loku ku kumeka hi ririmi ra wena kumbe e-e, xana u kombisa ku tlangela hi ku kambisisa Bibele kun’we ni swipfuneti swo dyondza leswi lunghiseleriweke hi ntlawa wa mutekiwa minkarhi hinkwayo?—2 Timotiya 3:16.
Vukati Bya Xinyimpfana Bya Tshinela
18. Ha yini tinxangwana ta Rebeka ti fanekisela kahle vanghana va mutekiwa namuntlha?
18 Emasikwini lawa ya makumu ya misava ya Sathana, masalela ya ntlawa wa mutekiwa ya joyiniwe hi “ntshungu lowukulu,” lowu fanisiwaka ni ‘malandza ya Rebeka ya vanhwana.’ Tanihi le mhakeni ya Rebeka, lava va yi tlula swinene nhlayo leyi heleleke ya ntlawa wa mutekiwa ya 144 000. I “ntshungu lowukulu” wa “tinyimpfu tin’wana” ta Yesu Kriste. (Nhlavutelo 7:4, 9; Yohane 10:16) Tanihi tinxangwana to tshembeka ta mutekiwa, na vona va fanele va nga tithyakisi hi misava yo biha ya Sathana. Na vona va fanele va amukela swiletelo swa moya wa Yehova ni Rito ra yena hi laha swi hlamuseriweke ha kona eka vona hi ntlawa wa mutekiwa. Kambe hakelo ya vona yi hambanile. Loko va hisekela ku seketela mutekiwa wa Kriste hi ku tshembeka va ta pona makumu ya misava ya Sathana naswona va va ni nkarhi lowunene wo hanya emisaveni hi laha ku nga heriki emisaveni ya paradeyisi.—Nhlavutelo 21:3, 4.
19. Xana ku humelele yini loko Rebeka ni tinxangwana ta yena va fika emakumu ya riendzo?
19 Xana Rebeka ni “malanḍa ya yena ya v̌av̌anhwana” va yi fikelerile pakani ya vona hi laha ku humelelaka? Ina. Tanihi laha Bibele yi vikaka ha kona: “Kutani Isak a a humile masiṅwini, e nkarini wa madyambu, a ya tiyingisela; kaku loko a tlakusa mahlo, a languta, a ṭhuka a v̌ona tikamela ti ri kari ti ta. Kutani Rebeka a tlakusa e mahlo a v̌ona Isak, kutani a džitama e kameleni.” Endzhaku ka loko Eliyezeri a hlamusele ku humelela ka vurhumiwa bya yena, Isaka u amukele Rebeka tanihi nsati wa yena kutani “a ṅwi ranḍa.”—Genesa 24:63-67.
20. Xana i nkarhi wihi wa ntsako lowu kombisiweke hi vukati bya Isaka?
20 Hi ku fanana, xikongomelo xa Xikwembu mayelana ni mutekiwa wa Kriste xi nge hluleki. (Esaya 55:11) Ku nga ri khale loko Babilona Lonkulu a avanyisiwa ni ku lovisiwa, lava saleke va masalela ya mutekiwa va ta heta riendzo ra vona. Nkarhi wu ta va wu fikile leswaku va hambanisiwa ni vanghana va vona va tinxangwana kutani va hlangana evukatini na Isaka Lonkulu etilweni. Mawaku nkarhi lowunene swonghasi wa ku tsaka ka vuako hinkwabyo lowu nga ta va wona!—Nhlavutelo 19:6-8.
21. Leswi ku chaputa ka vukati bya le tilweni ku tshinelaka, xana i yini leswi hinkwerhu hi faneleke hi swi endla?
21 Sweswi, timiliyoni ta tikatekisa hi ku amukela vutirheli bya masalela ya mutekiwa lama hungutekaka. Loko hinkwavo va nga si heta pfhumba ra vona ra la misaveni hi rifu, ku lovisiwa ka mfumo wa misava wa vukhongeri bya mavunwa lebyi fanaka ni muoswi ku ta fungha ku sungula ka ‘nhlomulo lowukulu lowu nga si tshamaka wu va kona hi mpfhuka misava yi tumbuluka.’ Nkarhi lowu saleke wu komile. Loko u lava ku pona, i swa nkoka swinene leswaku u hlanganyela eku hetisiseni ka swileriso swa Xikwembu! (Matewu 24:14, 21; Marka 13:10; Luka 21:15; Yohane 13:34) Swileriso swo tano swi tirha hi laha ku hlawulekeke eminkarhini ya hina leyo nonon’hwa. Kutani, hambi u wa masalela ya mutekiwa kumbe u wa “ntshungu lowukulu” wa tinxangwana ta yena, hambeta u yingisa Yehova u n’wi kwetsimisa ni leswaku u tikumela ntsako lowu nga heriki. Mawaku ku tsakisa konghasi loku nga ta va kona eka ntshungu lowukulu lowu ana se wu hlayiweke tanihi vanghana va Xikwembu, leswaku va hambeta va hanya loko Yehova a “endla swilo hinkwaswo swi va leswintshwa,” ni loko mimpfuno leyi nga heriki yi khulukela eka timiliyoni emisaveni ya paradeyisi!—Nhlavutelo 21:5; 22:1, 2, 17.
Wa Tsundzuka Xana?
◻ Xana i swiendlakalo swihi leswi nyanyulaka leswi faneleke ku humelela ku nga ri khale?
◻ I yini leswi tiyisaka leswaku vukati bya le tilweni byi ta humelela hi laha ku heleleke?
◻ Eliyezeri ni tikamela ta khume va nga fanisiwa na yini?
◻ I vamani namuntlha lava faniselaka Rebeka ni malandza ya yena ya vanhwanyana?
◻ Xana hi dyondza yini eka swiendlakalo leswi yisaka evukatini bya Isaka?