Xana U Yi Tekisa Ku Yini Milawu Ya Khume?

VANHU va languta Milawu ya Khume ya Bibele hi tindlela to hambana-hambana. Masavata ma vula leswaku Milawu ya Khume ya boha eka vanhu hinkwavo. Malutere ma yi vula “milawu yo antswa leyi tshameke yi nyikiwa leyi munhu a nga vumbaka vutomi bya yena ha yona.” “Hi laha swi twisisekaka,” ku hlamusela muvulavuleri wa Khatoliki, “Milawu ya Khume ya ha nyika xisekelo xa mahanyelo ya Vukriste.”

Xisweswo, hambi loko mintlawa yin’wana ya vukhongeri yi tshemba leswaku hi fanele ku yingisa Milawu ya Khume hinkwayo, van’wana va yi languta tanihi xiletelo xa nkongomiso wa mahanyelo lamanene ntsena. Hakunene, hi ku ya hi Encyclopædia of Religion and Ethics, “a ku na tsalwa ra munhu leri veke na nkucetelo lowukulu ehenhleni ka vukhongeri ni vutomi lebyinene ku tlula Nxaxamelo wa Milawu [Milawu ya Khume].” Hikwalaho ka yini leswi swi ri tano? Xiya leswi yi swi vulaka ku sungula. Yi komile, ya twisiseka naswona yi ni matimba. Kambe xana u fanele u yi languta njhani Milawu ya Khume? Yi vula yini eka wena?

[Bokisi leri nga eka tluka 3]

MILAWU YA KHUME

1. U nga ṭhuki u v̌a ni ŝikwembu ŝiṅwana e mahlweni ka mina.

2. U nga ṭhuki u tiendlela šifaniso le’ši v̌atliweke, ni loko ši ri šifaniso šihi ni šihi ša ŝilo le’ŝi nge henhla e tilweni, ni loko ši ri ša ŝilo le’ŝi nge hansi e misav̌eni, ni loko ši ri ša ŝilo le’ŝi nge matini, e hansi ka misav̌a; u nga ṭhuki u ŝi nkhinsamela, ni loko ku ri ku ŝi tirela . . .

3. U nga ṭhuki u tlanga hi v̌ito ra Yehova Šikwembu ša wena . . .

4. Anakanya siku ra ku wisa ku ri hlawula. U ta tira hi masiku ya ntlhanu na riṅwe, u tira ntiro wa wena hikwawo. . . . U nga ṭhuki u tira ntiro ni wuṅwe hi siku lero, hambi u ri wena, hambi a ri ṅwana wa wena wa wanuna, kumbe wa wansati; hambi a ri nanḍa wa wena wa wanuna, kumbe wa wansati; hambi ŝi ri ŝifuwo ŝa wena, hambi a ri muenḍi wa wena l’a nge mutini wa wena . . .

5. Šišima tata wa wena ni mana wa wena . . .

6. U nga ṭhuki u dlaya.

7. U nga ṭhuki u oŝa.

8. U nga ṭhuki u yiv̌a.

9. U nga ṭhuki u lumbeta warikwenu hi v̌umboni byo hemba.

10. U nga ṭhuki u nav̌ela e yindlu ya warikwenu; u nga ṭhuki u nav̌ela e nsati wa yena, hambi a ri nanḍa wa yena wa wanuna, kumbe wa wansati, hambi yi ri homu ya yena, hambi yi ri mbongolo ya yena, hambi ši ri šilo šiṅwana ša warikwenu.—Eksoda 20:3-17.