Nyikela Magandzelo Lama Tsakisaka Yehova
“A hi humeseni magandzelo masiku hinkwawo ha yena Yesu [Kriste], hi dzunisa Xikwembu ha wona, hi leswaku, hi fanele ku vonga vito ra xona hi marito lama humaka emilon’weni ya hina.”—VAHEVERU 13:15.
1. Xana Yehova u khutaze Vaisrayele lava dyoheke leswaku va endla yini?
YEHOVA i Mupfuni wa lava va nyikelaka magandzelo lama amukelekaka eka yena. Hikwalaho, tintswalo ta yena ti tshama ti va ehenhla ka Vaisrayele lava a va nyikela magandzelo ya swihari. Kambe ku humelele yini loko va dyohe hi ku phindha-phindha? Hi ku tirhisa muprofeta Hosiya, va khuthaziwile: “Israel, tlhelela ka Yehova, Šikwembu ša wena, hikuv̌a u wile hikwalaho ka ku dyoha ka wena. Tekani marito, kutani mi tlhelela ka Yehova, mi ku ka yena: Susa ŝidyoho hikwaŝo, u hi amukela ŝinene, kutani hi ta ku tlangela hi maganḍelo ya tinḍimi ta hina.”—Hosea 14:1, 2.
2. Xana ‘swinkuzana swa milomu’ a ku ri yini naswona Pawulo u kombetele eka vuprofeta bya Hoseya hi ndlela yihi?
2 Kutani vanhu va Xikwembu va khale va khutaziwe xisweswo ku nyikela ‘swinkuzana swa milomu ya vona’ eka Yehova Xikwembu. Xana a ku ri yini leswi? A ku ri magandzelo ya ku dzunisa ka xiviri! Hi ku kombetela eka vuprofeta lebyi, muapostola Pawulo u khutaze Vakriste va Vaheveru leswaku va ‘humesela Xikwembu magandzelo ya ku dzunisa, hi leswaku, mihandzu ya milomu leyi twarisaka vito ra xona erivaleni.’ (Vaheveru 13:15) I yini lexi nga pfunaka Timbhoni ta Yehova ku nyikela magandzelo yo tano namuntlha?
“Mi Landza Ntila Wa Ku Pfumela Ka Vona.”
3. Xana muapostola Pawulo u vule yini eka Vaheveru 13:7, leswi tlakusaka xivutiso xihi?
3 Ku tirhisa xitsundzuxo lexi Pawulo a xi nyikeke Vaheveru swi ta hi pfuna ku nyikela magandzelo lama amukelekaka eka Mupfuni wa hina Lonkulu, Yehova Xikwembu. Hi xikombiso, muapostola u tsarile a ku: “Anakanyani vafambisi va n’wina, lava nga mi dyondzisa rito ra Xikwembu; ehleketani vutomi bya vona ni mahelele ya byona, mi landza ntila wa ku pfumela ka vona.” (Vaheveru 13:7) Xana Pawulo a a kombetela eka vamani loko a te, “Anakanyani vafambisi va n’wina,” kumbe “vafumi va n’wina”?—New World Translation Reference Bible, nhlamuselo.
4. (a) Hi ku ya hi ndzimana ya Xigriki, xana “vafambisi” va endla yini? (b) I vamani “vafambisi” eka Timbhoni ta Yehova?
4 Pawulo u vulavule hi “vafambisi,” kumbe lava fumaka. (Tindzimana 7, 17, 24) Rito ra Xinghezi leri vulaka “ku fuma” ri huma eka Xilatini leri hundzuluxeriweke eka rito ra Xigriki leri nge ky·ber·naʹo, leri vulaka ku “lawula xikepe, ku kongomisa, ku fuma.” Vakulu va Vukriste va fuma hi ku tirhisa ‘vuswikoti bya vona byo kongomisa’ (Xigriki, ky·ber·neʹseis) ku nyikela vurhangeri ni nkongomiso emabandlheni ya vona. (1 Vakorinto 12:28) Kambe vaapostola ni vakulu van’wana eYerusalema va tirhe tanihi huvo ku nyikela nkongomiso ni xitsundzuxo eka mabandlha hinkwawo. (Mintirho 15:1, 2, 27-29) Hikwalaho, namuntlha huvo leyi fumaka ya vakulu yi nyikela vulanguteri bya moya eka Timbhoni ta Yehova emisaveni hinkwayo.
5. Ha yini hi fanele hi khongelela vakulu va bandlha ni swirho swa Huvo leyi Fumaka naswona hi ndlela yihi?
5 Vakulu va mabandlha ni swirho swa Huvo leyi Fumaka va rhangela exikarhi ka hina; hikwalaho, hi fanele hi va xixima ni ku khongela leswaku Xikwembu xi va nyika vutlhari lebyi lavekaka ku fuma bandlha. (Ringanisa Vaefesa 1:15-17.) Swi fanela swinene swonghasi leswaku hi tsundzuka wihi na wihi ‘la hi byeleke rito ra Xikwembu’! Timotiya a nga dyondzisiwanga hi mana wakwe ni kokwa wakwe ntsena kambe endzhakunyana na hi Pawulo ni van’wana. (2 Timotiya 1:5, 6; 3:14) Kutani Timotiya a a swi kota ku anakanyisisa hi ndlela leyi ku tikhoma ka lava rhangelaka ku humeleleke ha yona kutani u swi kotile ku tekelela ripfumelo ra vona.
6. Xana hi fanele hi tekelela ripfumelo ra vamani, kambe hi landzelela mani?
6 Vanhu vo tanihi Avele, Nowa, Abrahama, Sara, Rahava na Muxe a va ri na ripfumelo. (Vaheveru 11:1-40) Xisweswo, hi nga tekelela ripfumelo ra vona handle ko kanakana hi leswi va feke va tshembekile eka Xikwembu. Kambe hi nga tlhela hi ‘tekelela ripfumelo’ ra vanhu vo tshembeka lava hi rhangelaka. Kavula, a hi landzeleli vanhu lava nga hetisekangiki, hikuva hi langute Kriste. Hi laha muhundzuluxeri wa Bibele Edgar J. Goodspeed a vuleke ha kona: “Tinghwazi ta khale a hi swikombiso swa mupfumeri, hikuva u ni xikombiso lexinene eka Kriste . . . Mutsutsumi wa Mukriste u fanele a veka mahlo yakwe eka Yesu.” Ina, ‘Kriste u xanisekele hina, a hi vekela xikombiso leswaku hi landzela swinene minkondzo ya yena.’—1 Petro 2:21; Vaheveru 12:1-3.
7. Vaheveru 13:8 yi fanele yi ri khumbisa ku yini langutelo ra hina ra ku xanisekela Yesu Kriste?
7 Loko a kombetela eka N’wana wa Xikwembu, Pawulo u tlhandlekerile a ku: “Yesu Kriste wa ha ri yena tolo ni namuntlha ni hi laha ku nga heriki.” (Vaheveru 13:8) Timbhoni to tshembeka tanihi Stefano na Yakobo ti kombise vutshembeki lebyikulu, eku landzeleleni ka ntila wa Yesu wa ku tshembeka. (Mintirho 7:1-60; 12:1, 2) Tanihi leswi a va tiyimiserile ku fa tanihi valandzeri va Kriste, ripfumelo ra vona hi fanele ku ri tekelela. Nkarhi lowu hundzeke, sweswi ni le nkarhini lowu taka, vanhu lava chavaka Xikwembu a va landzuli hikwalaho ka ku tokota ku dlayeriwa ripfumelo tanihi vadyondzisiwa va Yesu.
Ku Papalata Tidyondzo Ta Mavunwa
8. Xana u nga ma hlamusela njhani marito ya Pawulo eka Vaheveru 13:9?
8 Ku nga hundzuki ka vumunhu ni tidyondzo ta Yesu swi fanele swi hi endla hi namarhela leswi yena ni vaapostola vakwe va swi dyondziseke. Vaheveru va byeriwe ku: “Mi nga hambukisiwi hi ndlela ni tidyondzo ta tinxakaxaka leti nga tivikaniki. Swi lulamile loko mbilu yi tiyisiwa hi tintswalo ta Xikwembu, ku nga ri hi milawu hi tlhelo ra swakudya, leyi nga pfuniki nchumu eka lava va yi landzelelaka.”—Vaheveru 13:9.
9. Pawulo u kombetele eka swilo swihi leswi tlakukeke eka papila ro ya eka Vakriste va Vaheveru?
9 Vayuda va kombetele eka swilo swo tanihi ku nyikiwa ka Nawu loku xiyekaka eNtshaveni ya Sinayi ni vuhosi lebyi nga heriki bya Davhida. Kambe Pawulo u kombise Vakriste va Vaheveru leswaku hambi leswi ku sunguriwa ka ntwanano wa Nawu a ku chavisa, Yehova u nyikele vumbhoni hi matimba hi swikombiso, swihlamariso, mintirho ya matimba ni ku ava moya lowo kwetsima loko ntwanano lowuntshwa wu sunguriwa. (Mintirho 2:1-4; Vaheveru 2:2-4) Mfumo wa Kriste wa le tilweni a wu nge tsekatsekisiwi, hi laha vuhosi bya laha misaveni bya vafumi vo tanihi Davhida byi veke ha kona hi 607 B.C.E. (Vaheveru 1:8, 9; 12:28) Ku tlula kwalaho, Yehova u hlengeletela vatotiwa emahlweni ka xin’wana lexi kwetsimaka ku tlula xikombiso xa singita eNtshaveni ya Sinayi, hikuva va tshinelela Ntshava ya Siyoni ya le tilweni.—Vaheveru 12:18-27.
10. Hi ku ya hi Vaheveru 13:9, mbilu yi tiyisiwa hi yini?
10 Hikwalaho Vaheveru a va fanele ku papalata ku ‘hambukisiwa hi tidyondzo ta Vayuda to hambana-hambana ni leti va nga ti tiviki.’ (Vagalatiya 5:1-6) ‘Timbilu ti nga tiyisiwa hi tintswalo leti nga fanelangiki ta Xikwembu’ leswaku ti ta tiya entiyisweni, hayi hi tidyondzo to tano. Van’wana va vonaka va kanetana hi swakudya ni magandzelo, hikuva Pawulo u vule leswaku mbilu a yi nga tiyisiwi hi “milawu hi tlhelo ra swakudya, leyi nga pfuniki nchumu eka lava va yi landzelelaka.” Mimpfuno ya moya yi va kona hikwalaho ko chava Xikwembu ni ku tlangela nkutsulo, hayi hi ku khathala loku nga fanelangiki ehenhleni ka ku dya swakudya swo karhi ni ku tlangela masiku yo karhi. (Varhoma 14:5-9) Ku tlula kwalaho, gandzelo ra Kriste ri endle magandzelo ya Valevhi ma nga ha tirhi.—Vaheveru 9:9-14; 10:5-10.
Magandzelo Lama Tsakisaka Xikwembu
11. (a) Hi wihi mongo wa marito ya Pawulo eka Vaheveru 13:10, 11? (b) Hi yihi alitari yo fanekisela leyi Vakriste va nga na yona?
11 Vaprista va Valevhi a va dya nyama ya swiharhi swo endla magandzelo, kambe Pawulo u tsarile a ku: “Hi ni alitari leyi, vaprista lava tirhaka eNtsongeni [tabernakela] va nga riki na fanelo ya ku dya swa yona. Hikuva tinyama ta swifuwo leswi ngati ya swona yi tisiwaka exivandleni lexo hlawuleka hi Muprista Lonkulu ku ta khongelela swidyoho, ti hisiweke ehandle ka nxaxa” hi Siku ro Phahlelana Mariyeta. (Vaheveru 13:10, 11; Levitika 16:27; 1 Vakorinto 9:13) Vakriste va ni alitari yo fanekisela leyi vulaka ku tshinelela Xikwembu exisekelweni xa gandzelo ra Yesu leri susaka swidyoho leswi tisaka ndzivalelo wa Yehova ni ku ponela evuton’wini lebyi nga heriki.
12. Eka Vaheveru 13:12-14, xana Vakriste lava totiweke va khutaziwe ku endla yini?
12 Pawulo a nga kandziyisi ku yelana loku ni Siku ro Phahlelana Mariyeta, kambe u engetela a ku: “Hi mukhuva wolowo, na yena Yesu ú twisiwe ku vaviseka a ri ehandle ka nyangwa ya muti” wa Yerusalema. Kwalaho Kriste u file ivi a nyikela gandzelo leri faneleke leri tirhaka hi ku helela. (Vaheveru 13:12; Yohane 19:17; 1 Yohane 2:1, 2) Muapostola u khutaze Vakriste-kulobye lava totiweke a ku: “Hikokwalaho, a hi humeni hi ya le ka yena [Kriste] ehandle ka nxaxa, hi rhwele ku rhuketeriwa ka yena. Hikuva kwala misaveni a hi na muti lowu tiyeke, kambe hi lava muti lowu wa ha taka. (Vaheveru 13:13, 14; Levitika 16:10) Hambi loko hi rhukaniwa hi laha Yesu a rhukaniweke ha kona, ha tiyisela tanihi Timbhoni ta Yehova. Hi ‘ala ku sandza Xikwembu ni ku navela swa misava kutani hi hanya hi ku twisisa ni ku lulama na hi ku chava Xikwembu exikarhi ka mafambiselo lawa ya swilo’ hi ri karhi hi langutele misava leyintshwa. (Tito 2:11-14; 2 Petro 3:13; 1 Yohane 2:15-17) Naswona lava totiweke exikarhi ka hina hi ku chivirika va lava “muti,” Mfumo wa le tilweni.—Vaheveru 12:22.
13. Xana magandzelo lama tsakisaka Xikwembu a ma vumbiwi hi yini ntsena?
13 Ku ya emahlweni Pawulo u boxe magandzelo lama tsakisaka Xikwembu, a ku: “A hi humeseni magandzelo masiku hinkwawo ha yena Yesu, hi dzunisa Xikwembu ha wona, hi leswaku, hi fanele ku vonga vito ra xona hi marito lama humaka emilon’weni ya hina. Mi nga rivali ku endla leswinene ni ku pambulela van’wana leswi mi nga na swona, hikuva magandzelo lawa hi wona lama tsakisaka Xikwembu.” (Vaheveru 13:15, 16) Magandzelo ya Vakriste a ma endliwi hi mintirho leyinene ntsena. Vanhu hi ntolovelo va swi endla swilo swo tano. Hi xikombiso, leswi swi humelerile loko vanhu va matiko yo tala va pfune lava hlaseriweke hi ku tsekatseka ka misava eSoviet Armenia eku heleni ka 1988.
14. Ku nyikela magandzelo lama amukelekaka eka Xikwembu swi kandziyisa ntirho wihi?
14 Ntirho wo kwetsima lowu hi wu nyikelaka eka Yehova “hi ku titsongahata ni xichavo” wu sekeriwe eka muxaka wa rirhandzu ro tinyiketela ro fana ni leri Yesu a ri kombiseke. (Vaheveru 12:28; Yohane 13:34; 15:13) Ntirho lowu wu kandziyisa ntirho wa hina wo chumayela, hikuva ha Kriste tanihi Muprista Lonkulu ‘hi nyikela magandzelo ya ku dzunisa eka Xikwembu, mihandzu ya milomu ya hina leyi twarisaka vito ra xona erivaleni.’ (Hosea 14:2; Varhoma 10:10-15; Vaheveru 7:26) Kavula, a hi ‘rivali ku endla leswinene ni ku avelana swilo ni van’wana,’ hambi ku ri ku katsa ni van’wana handle ka lava “va ndyangu wa lava pfumeleke.” (Vagalatiya 6:10) Ngopfu-ngopfu loko Vakriste-kulorhi va humeleriwe hi khombo kumbe va pfumala kumbe va ri emahlomulweni, hi nyikela mpfuno hi tlhelo ra leswi vonekaka ni swa moya. Ha yini? Hikwalaho ka leswi hi rhandzanaka. Na vona hi lava va khomelela ku twarisa ka le rivaleni ka ripfumelo ra vona handle ko chava, “hikuva magandzelo lawa hi wona lama tsakisaka Xikwembu.”—Vaheveru 10:23-25; Yakobo 1:27.
Titsongahate
15. (a) U nga xi hlamusela njhani xitsundzuxo lexi nga eka Vaheveru 13:17? (b) Ha yini u xixima lava rhangelaka?
15 Leswaku hi nyikela magandzelo lama amukelekaka, hi fanele hi tirhisana swinene ni nhlengeletano ya Xikwembu. Handle ko kandziyisa mhaka ya vulawuri, Pawulo u tsarile: “Yingisani vafambisi va n’wina, mi titsongahata eka vona, hikuva va hitekela mimoya ya n’wina, tani hi vanhu lava nga ta vutisiwa ehenhla ka yona. Mi vona leswaku va tirha ntirho wa vona hi ku tsaka, va nga wu endli hi ku vilela, hikuva loko swi ri tano, a swi nga mi pfuni nchumu n’wina.” (Vaheveru 13:17) Hi fanele ku xixima vakulu lava hlawuriweke lava rhangelaka ebandlheni, leswaku va nga tshuki va rila hi ku karhateka hikwalaho ko pfumala ka hina ku tirhisana na vona. Ku tsandzeka ka hina ku titsongahata ku ta va ndzhwalo wo tika eka valanguteri naswona swi nga hi endla hi vaviseka hi tlhelo ra moya. Moya wa ku tirhisana wu nyikela mpfuno naswona wu kondletela vun’we ni nhluvuko wa ntirho wo chumayela hi Mfumo.—Psalma 133:1-3.
16. Ha yini swi fanerile ku titsongahata eka lava rhangelaka exikarhi ka hina?
16 Vona ndlela leyi swi fanelaka ha yona leswaku hi titsongahata eka lava rhangelaka! Va dyondzisa eminhlanganweni ya hina naswona va hi pfuna evutirhelini. Tanihi varisi, va khathalela ku hlayiseka ka hina. (1 Petro 5:2, 3) Va hi pfuna ku hlayisa vuxaka lebyinene na Xikwembu ni bandlha. (Mintirho 20:28-30) Hi ku titsongahatela vulanguteri bya vutlhari ni bya rirhandzu, hi kombisa xichavo eka Mulanguteri la Tlakukeke, Yehova Xikwembu ni Mulanguteri wa yena la Hlawuriweke, Yesu Kriste.—1 Petro 2:25; Nhlavutelo 1:1; 2:1–3:22.
Vana La Khongelaka
17. Hi swihi swikhongelo leswi Pawulo a swi kombeleke naswona ha yini a ve ni mfanelo yo swi kombela?
17 Tanihi leswi Pawulo ni vanghana va yena a va hambanisiwile ni Vaheveru, kumbexana hikwalaho ka nxaniso, u te: “Hi khongeleleni, hikuva hi titwa swinene leswaku hi ni ripfalo leri tengeke, hi ri karhi hi navela ku endla leswi lulameke minkarhi hinkwayo. Ndzi mi khongotela ku endlisa sweswo, hi mbilu hinkwayo ya n’wina, mi ndzi khongelela leswaku ndzi ta kota ku hatla ndzi vuyiseriwa eka n’wina.” (Vaheveru 13:18, 19) Loko Pawulo a a ri munhu wa vuxisi la nga ni ripfalo leri feke, xana a a ta va ni mfanelo yihi yo kombela Vaheveru ku khongelela leswaku a hlangana na vona ke? (Swivuriso 3:32; 1 Timotiya 4:1, 2) Kavula, a a ri mutirheli la tshembekaka, loyi hi ripfalo lerinene a lwisaneke ni lava sindzisaka Xiyuda. (Mintirho 20:17-27) Pawulo nakambe a a tiyiseka leswaku ku nga ri khale a a ta tlhela a hlangana ni Vaheveru loko vo khongelela leswaku sweswo swi humelela.
18. Loko hi langutela leswaku van’wana va hi khongelela, hi swihi swivutiso leswi hi nga ha tivutisaka swona?
18 Xikombelo xa Pawulo xa swikhongelo swa Vaheveru xi kombisa leswaku swa fanela leswaku Vakriste va khongelelana hambi na hi vito. (Ringanisa Vaefesa 6:17-20.) Kambe loko hi langutela van’wana leswaku va hi khongelela, xana a hi fanelanga ku fana na muapostola ivi hi tiyiseka leswaku hi na ‘ripfalo leri tshembekeke naswona hi tikhoma hi ku tshembeka eka swilo hinkwaswo’? Xana u tshembekile eswiendlweni swa wena hinkwaswo? Naswona xana u na ku tiyiseka loku fanaka ni ka Pawulo ehenhleni ka xikhongelo?—1 Yohane 5:14, 15.
Marito Yo Gimeta Ni Xikhongotelo
19. (a) A ku ri kwihi ku navela ka Pawulo exikhongelweni ehenhleni ka Vaheveru? (b) Ha yini ntwanano lowuntshwa wu ri ntwanano lowu nga heriki?
19 Loko a lave swikhongelo swa Vaheveru, Pawulo u phofule ku navela ka yena hi xikhongelo, a ku: “Sweswi ke, Xikwembu xa ku rhula lexi vuyiseke kambe Hosi ya hina Yesu exikarhi ka vafi—yena loyi a nga Murisi Lonkulu wa tinyimpfu, la nga fungha ntwanano lowu nga heriki hi ngati ya yena,—ingi xi nga mi longela hinkwaswo leswinene leswi nga ta mi pfuna ku endla ku rhandza ka xona, xi ri karhi xi tirha eka hina leswi xi swi tsakelaka, ha Yesu Kriste. Eka xona a ku ve ku dzuneka hi masiku ni masiku. Amen!” (Vaheveru 13:20, 21) Xi ri na misava ya ku rhula emianakanyweni, ‘Xikwembu xa ku rhula’ xi pfuxele Kriste evuton’wini byo pfumala ku fa ematilweni, laha Yesu a yiseke ntikelo wa ngati yakwe leyi halatiweke leyi tiyisaka ntwanano lowuntshwa. I ntwanano lowu nga heriki hikuva lava nga emisaveni va amukela mimpfuno leyi nga heriki eka mintirho ya vana va moya va Xikwembu va 144 000 lava fumaka na Yesu etilweni ni lava nga eka ntwanano lowuntshwa. (Nhlavutelo 14:1-4; 20:4-6) Xikwembu xi ‘hi hlomisa hi nchumu wun’wana ni wun’wana lowunene lowu lavekaka ku endla ku rhandza ka xona ni ku va lava tsakisaka emahlweni ka xona,’ hi ku tirhisa Kriste.
20. Xana u nga katsakanya ni ku hlamusela xikhongotelo xa Pawulo xo hetelela eka Vakriste va Vaheveru hi ndlela yihi?
20 Hi ku nga tiyiseki leswaku Vaheveru a va ta ri amukerisa ku yini papila rakwe, Pawulo u te: “Ndza mi kombela swinene vamakwerhu, amukelani rito ra mina ra ku mi khongotela [mi yingisa N’wana wa Xikwembu hayi Vayuda], hikuva ndzi mi tsalele hi ku komisa [hi ku xiya ntikelo wa leswi nga endzeni]. Mi fanele ku twisiwa leswaku Timotiya makwa wa hina ú ntshunxiwile ekhotsweni; loko a hatla a fika, ndzi ta ta mi vona ndzi ri na yena.” Kumbexana a tsale a ri eRhoma, muapostola a a tshemba leswaku yena swin’we na Timotiya a va ta endzela Vaheveru eYerusalema. Kutani Pawulo u te: “Rungulani vafambisi va n’wina [tahihi vakulu lava tirhaka hi matimba] hinkwavo ni vahlawuriwa va Xikwembu hinkwavo [lava nga ni ntshembo wa le tilweni]. Lava va humaka etikweni ra Italiya va mi rungula. Tintswalo ta Xikwembu a ti ve na n’wina hinkwenu.”—Vaheveru 13:22-25.
Papila Ra Ntikelo Lowu Nga Heriki
21. Papila leri yaka eka Vaheveru ri hi pfuna ku twisisa tinhla tihi letikulu?
21 Kumbexana ku tlula buku yihi na yihi ya Matsalwa yo Kwetsima, papila leri yaka eka Vaheveru ri hi pfuna ku twisisa leswi vuriwaka hi magandzelo lama endliweke ehansi ka Nawu. Papila leri ri kombisa kahle leswaku gandzelo ra Yesu Kriste hi rona tsena leri nyikelaka nkutsulo lowu faneleke eka vanhu lava nga ni xidyoho. Naswona rungula leri xiyekaka leri kumekaka eka papila leri hi leswaku hi fanele hi yingisa N’wana wa Xikwembu.
22. Hi swihi swivangelo swin’wana swa hina swo tlangela papila ro ya eka Vaheveru?
22 Ku tlula kwalaho, hi laha hi voneke ha kona eka swihloko swimbirhi leswi hundzeke, hi ni swivangelo swin’wana swo tlangela papila leri ri huhuteriweke hi Xikwembu ro ya eka Vaheveru. Ri hi pfuna leswaku hi nga karhali evutirhelini bya hina naswona ri hi nyika xivindzi, hikuva ha swi tiva leswaku Yehova i Mupfuni wa hina. Ku tlula kwalaho, ri hi khutaza ku tirhisa milomu ya hina ni vuswikoti bya hina hinkwabyo handle ka vutianakanyi eku nyikeleni ka ntirho wo hlawuleka vusiku ni nhlikanhi ni ku nyikela magandzelo lama humaka embilwini lama tsakisaka Yehova, Xikwembu xa hina lexi faneleke hi ku dzunisiwa ni xa rirhandzu.
A Wu Ta Hlamurisa Ku Yini?
◻ Xana papila leri yaka eka Vaheveru ri va pfunise ku yini ku papalata tidyondzo ta mavunwa?
◻ Magandzelo lama tsakisaka Xikwembu ma kandziyisa ntirho wihi wa nkoka?
◻ Xana “vafambisi” i vamani naswona ha yini hi titsongahata eka vona?
◻ Xana papila leri yaka eka Vaheveru ri kandziyisa xikhongelo hi ndlela yihi?
◻ Ha yini hi nga vulaka leswaku papila leri yaka eka Vakriste va Vaheveru i ra nkoka lowu nga heriki?
[Swifaniso leswi nga eka tluka 23]
Magandzelo lama tsakisaka eka Xikwembu ma katsa ku endla maendzo ya vurisi ni ku aka Vakriste-kulobye hi ndzayo ya rirhandzu