Yehova I Mupfuni Wa Mina
‘Vanani na xivindzi kutani mi ku: “Yehova i mupfuni wa mina; a ndzi nge chavi. Xana munhu a nga ndzi endla yini?”’—VAHEVERU 13:6, “NW.”
1, 2. (a) Mupisalema na muapostola Pawulo va phofula ku tiyiseka kwihi ha Yehova? (b) Hi swihi swivutiso leswi tlakukaka?
YEHOVA XIKWEMBU i xihlovo xa mpfuno lexi nga tsandzekiki. Mupisalema a a tiva leswi hi ntokoto kutani u swi kotile ku vula a ku: “Yehova o nḍi yimele, a nḍi nga tšhav̌i ntšhumu. Munhu a nga nḍi endla yini?” (Psalma 118:6) Marito lama fanaka ma phofuriwe hi muapostola Pawulo loko a tsala papila rakwe leri huhuteriweke hi Xikwembu ro ya eka Vakriste va Vaheveru.
2 Handle ko kanakana a a tshaha marito ya mupisalema eka Septuagint ya Xigriki, Pawulo u byele vagandzeri-kulobye va Vaheveru a ku: ‘Vanani na xivindzi kutani mi ku: “Yehova i mupfuni wa mina; a ndzi nge chavi. Xana munhu a nga ndzi endla yini?”’ (Vaheveru 13:6, NW) Ha yini muapostola a tsale hi ndlela leyi? Naswona xana hi nga dyondza yini eka mongo wa mhaka leyi?
Ku Lava Mpfuno Wa Yehova
3. (a) Xana hi le ka swiyimo swihi laha Yehova a tikombiseke a ri Mupfuni eka Pawulo? (b) Ha yini Vakriste va Vaheveru a va lava Yehova tanihi Mupfuni wa vona hi laha ku hlawulekeke?
3 Pawulo a a ri mbhoni leyi tinyiketelaka, loyi a a ri ni vumbhoni bya leswaku Yehova i Mupfuni wakwe. Xikwembu xi pfune muapostola emahlweni ka ku nonon’hwa ko tala. Pawulo u khotsiwile, a biwa ni ku khandliwa hi maribye. Eku fambeni ka yena tanihi mutirheli wa Vukriste la famba-fambaka, u tokote ku tshovekeriwa hi xikepe ni makhombo man’wana yo tala. A a tolovelane swinene ni ku tirha hi matimba, vusiku bya nkelunkelu, ndlala, torha hambi ku ri ku tshama a nga ambalanga. U te: “Ehandle ka swin’wana leswi ndzi nga swi hlayiki, ndza tikeriwa masiku hinkwawo ni ku karhateka emoyeni, loko ndzi anakanya [mabandlha hinkwawo].” (2 Vakorinto 11:24-29) Pawulo a a ri ni muxaka wolowo wa ku khathala hi Vakriste va Vaheveru. Masiku ya Yerusalema a ma pimiwile naswona vamakwavo va xinuna ni va xisati va muapostola va Vayuda eYudiya a va ta langutana ni miringo leyikulu ya ripfumelo. (Daniel 9:24-27; Luka 21:5-24) Kutani a va ta fanela ku va na Yehova tanihi Mupfuni wa vona.
4. Hi swihi swikhongotelo swa xisekelo leswi nyikeriweke hi ku tirhisa papila leri yaka eka Vaheveru?
4 Loko a sungula papila rakwe ro ya eka Vakriste va Vaheveru, Pawulo u kombise leswaku a va ta tokota mpfuno wa Xikwembu ntsena loko va yingisa N’wana wa Xikwembu, Yesu Kriste. (Vaheveru 1:1, 2) Yinhla leyi yi hlamuseriwile epapileni. Hi xikombiso, leswaku a seketela xitsundzuxo xa yena, muapostola u tsundzuxe vahlayi va yena leswaku Vaisrayele va xupuleriwe ku nga yingisi emananga. Vakriste va Vaheveru na vona a va nga ta pona ku xupuriwa loko va ale leswi Xikwembu xi va byeleke swona ha Yesu ivi va va vagwinehi lava namarhelaka Nawu wa Muxe lowu gandzelo ra Kriste ri wu vekeke etlhelo!—Vaheveru 12:24-27.
Rirhandzu Ra Vumakwerhu Ri Ri Karhi Ri Tirha
5. (a) Hi yihi ndzayo yin’wana leyi nyikiwaka hi papila leri yaka eka Vaheveru? (b) Pawulo u vule yini mayelana ni rirhandzu?
5 Papila leri yaka eka Vaheveru ri nyike lava languteriweke ku va vandyandzhaka va Mfumo wa le tilweni xitsundzuxo xa ndlela yo landzelela Xikombiso xa vona, Yesu Kriste, ‘va nyikela ntirho wo kwetsima hi xi chavo ni ku rhurhumela,’ naswona va va na Yehova tanihi Mupfuni wa vona. (Vaheveru 12:1-4, 28, 29) Pawulo u khutaze vapfumeri-kulobye leswaku va hlangana nkarhi na nkarhi ivi va ‘pfuxana, hi ku kombana rirhandzu ni mintirho leyinene.’ (Vaheveru 10:24, 25) Kutani u tsundzuxile a ku: “Yanani emahlweni mi rhandzana kukota vamakwavo.”—Vaheveru 13:1.
6. Yesu u nyike valandzeri vakwe “nawu lowuntshwa” malunghana ni rirhandzu hi ndlela yihi?
6 Yesu a a lava rirhandzu ro tano eka valandzeri vakwe, hikuva u te: “Ndzi mi nyika nawu lowuntshwa ndzi ri: Rhandzanani! Kukotisa leswi mina ndzi mi rhandzeke, rhandzanani na n’wina. Hinkwavo va ta tiva leswaku mi vadyondzisiwa va mina, loko mi rhandzana.” (Yohane 13:34, 35) Lowu a wu ri “nawu lowuntshwa” hikuva a wu lava leswi tlulaka leswi laviweke hi Nawu wa Muxe lowu wu nga te: “U ta ranḍa warikwenu [muakelani] kukotisa loko u tiranḍa.” (Levitika 19:18) “Nawu lowuntshwa” wu lave leswi tlulaka leswaku munhu a rhandza muakelani wakwe tanihi loko a tirhandza. A wu lava rirhandzu ro pfumala vutianakanyi lerova munhu a nyikela vutomi bya yena hikokwalaho ka un’wana. Vutomi ni rifu ra Yesu swi kombise muxaka wolowo wa rirhandzu. Tertullian u kombetele eka mfungho lowu wu hlawulaka loko a tshaha marito ya vanhu va tiko malunghana ni Vakriste ivi a ku: “‘Vona,’ ku vula vona, ‘ndlela leyi va rhandzanaka ha yona . . . ni ndlela leyi va tiyimiseleke ku felana ha yona.’”—Apology, ndzima XXXIX, 7.
7. Xana rirhandzu ra vumakwerhu ri vonakise ku yini endzhaku ka Pentekosta ya 33 C.E.?
7 Rirhandzu ra vumakwerhu a ri ri erivaleni exikarhi ka vadyondzisiwa va Yesu endzhaku ka Pentekosta ya 33 C.E. Leswaku vapfumeri vo tala lava ha ku khuvuriwaka vo huma etindhawini ta le kule va ta ndlandlamuxa ku tshama ka vona eYerusalema kutani va dyondza swo tala hi lunghiselelo ra Xikwembu ra ku pona ha Kriste, “vapfumeri hinkwavo a va hamba va hlengeletana, va avelana swilo swa vona hinkwaswo; a va xavisa leswi va swi fuweke ni leswi a swi ri swa vona, kutani va pambulela un’wana ni un’wana hi ku ya hi ku pfumala ka yena.”—Mintirho 2:43-47; 4:32-37.
8. I vumbhoni byihi lebyi nga kona leswaku rirhandzu ra vumakwerhu ri kona exikarhi ka Timbhoni ta Yehova namuntlha?
8 Rirhandzu ro tano ra vumakwerhu ri kona enkarhini wa hina exikarhi ka Timbhoni ta Yehova. Hi xikombiso, endzhaku ka Nyimpi ya Vumbirhi ya Misava, rirhandzu ro tano ri susumetele vanhu va Xikwembu ku endla tsima ra xilamulela-mhangu ra malembe mambirhi ni hafu. Timbhoni ta le Canada, Sweden, Switzerland, United States ni matiko man’wana ti nyikele hi swiambalo ni mali yo xava swakudya ku pfuna vapfumeri-kulobye ematikweni lama hlaseriweke hi nyimpi ya Austria, Belgium, Bulgaria, China, Czechoslovakia, Denmark, Nghilandi, Finland, Furwa, Jarimani, Greece, Hungary, Italy, Netherlands, Norway, Philippines, Poland na Romania. Lexi xo va xikombiso ntsena, hikuva malandza ya Xikwembu sweswinyana ma ha ku kombisa rirhandzu ro tano eka Vakriste lava hlaseriweke hi ku tsekatseka ka misava ePeru na Mexico, xidzedze eJamaica ni makhombo lama fanaka etindhawini tin’wana. Hi ndlela leyi ni tin’wana, vanhu va Yehova ‘va yisa rirhandzu ra vona ra vumakwerhu emahlweni.’
Vana Ni Malwandla
9. (a) Hi yihi mfanelo leyinene leyi boxiweke eka Vaheveru 13:2? (b) Xana van’wana va ‘amukele tintsumi’ handle ko swi xiya hi ndlela yihi?
9 Pawulo u ya emahlweni a boxa mfanelo yin’wana leyi kombisiwaka hi lava va landzelaka Kriste, ‘va nyikela ntirho wo kwetsima hi xichavo na hi ku rhurhumela,’ naswona va na Yehova tanihi Mupfuni wa vona. U khutazile a ku: “Mi nga rivali ku amukela vaendzi, hikuva hi ku endla sweswo van’wana va amukele tintsumi va nga swi tivi.” (Vaheveru 13:2) I vamani lava “amukele[ke] tintsumi va nga swi tivi”? Mupatriarka Abrahama u amukele tintsumi tinharhu. (Genesa 18:1-22) Timbirhi ta tona ti fambile ivi ntukulu wa yena Lota a amukela vaendzi lava vambe ekaya rakwe eSodoma. Hambi swi ri tano, va nga si etlela, muti wa Lota a wu rhendzeriwe hi ntshungu lowu hlomeke, “ku suka ka la’v̌antŝha ku fika ka ŝikoša.” Va sindzise leswaku Lota a humesa vaendzi va yena leswaku va endla swa tingana na vona, kambe u ale hi matimba. Hambi leswi eku sunguleni Lota a a nga swi tivi, u amukele tintsumi, leti ti pfuneke yena ni vanhwanyana va yena ku balekela rifu loko ‘Yehova a nise ndzilo ni xivavula hi le tilweni ehenhla ka Sodoma na Gomora.’—Genesa 19:1-26.
10. Vakriste lava nga ni malwandla va tsakela mikateko yihi?
10 Vakriste lava nga ni malwandla va kuma mikateko leyo tala. Va twa mintokoto leyi fuweke leyi hlamuseriwaka hi vaendzi va vona naswona va vuyeriwa eka xinakulobye xa vona xa moya. Gayo u bumabumeriwile hi ku amukela vapfumeri-kulobye hi malwandla, “lava nga vaendzi,” hi laha vanhu vo tala va Yehova va amukelaka valanguteri lava famba-fambaka ha kona. (3 Yohane 1, 5-8) Ku va ni malwandla i mfanelo ya ku hlawuriwa ku va nkulu. (1 Timotiya 3:2; Tito 1:7, 8) Nakambe swa xiyeka leswaku Yesu u tshembise mikateko ya Mfumo eka vanhu lava fanaka ni tinyimpfu lava hi malwandla va endleke leswinene eka ‘vamakwavo’ va yena lava totiweke.—Matewu 25:34-40.
Tsundzuka Lava Xanisiwaka
11. Ha yini xitsundzuxo eka Vaheveru 13:3 a xi fanerile?
11 Lava va navelaka ku kuma mpfuno wa Yehova ni ku ‘nyikela ntirho wo kwetsima eka yena hi xichavo ni ku rhurhumela’ a va fanelanga va rivala vapfumeri-kulobye lava xanisekaka. Pawulo a a ku twisisa ku nonon’hwa loku tokotiwaka hi Vakriste lava xanisiwaka. Emahlweninyana, vadyondzisiwa a va hangalasiwe hi nxaniso naswona mutirhi-kulobye Timotiya a ha ku ntshunxiwa ekhotsweni. (Vaheveru 13:23; Mintirho 11:19-21) Varhumiwa va Vakriste na vona a va famba-famba va vumba mabandlha lamantshwa kumbe ku aka lama ana ma nga kona hi tlhelo ra moya. Tanihi leswi vamakwerhu vo tala lava a va chivirika hi nkarhi wolowo a va ri Vamatiko, swi nga ha endleka leswaku Vakriste van’wana va Vaheveru va nga va khathalelanga swinene. Kutani ke, a xi fanerile xitsundzuxo lexi nge: “Anakanyani lava nge khotsweni, ku fana ni loko onge na n’wina mi ri ekhotsweni na vona; kutani ni lava va xanisiwaka, mi fanele ku titwa mi ri na vona, hikuva na n’wina mi ni miri.”—Vaheveru 13:3.
12. Hi nga xi tirhisisa ku yini xitsundzuxo xo tsundzuka vapfumeri-kulorhi?
12 Vaheveru va “kombile tintswalo eka lava bohiweke ekhotsweni” kambe a va nga fanelanga va rivala vagandzeri-kulobye vo tano vo tshembeka, hambi va ri Vayuda kumbe Vamatiko. (Vaheveru 10:34) Kambe ku vuriwa yini hi hina? Hi nga swi kombisa njhani leswaku ha va tsundzuka Vakriste lava xanisiwaka? Etimhakeni tin’wana swi nga ha fanela eka hina ku endla xikombelo eka valawuri va hulumendhe hi papila ku ringeta ku pfuna vapfumeri-kulobye lava khotseriweke ripfumelo ra vona ematikweni lawa ntirho wo chumayela hi Mfumo wu yirisiweke kona. Ngopfu-ngopfu hi fanele hi va tsundzuka eswikhongelweni swa hina, hambi ku ri ku va vula hi mavito, loko swi koteka. Ku xanisiwa ka vona ka hi khumba swinene naswona Yehova wa swi twa swikombelo swa hina leswi humaka embilwini ehenhleni ka vona. (Psalma 65:2; Vaefesa 6:17-20) Hambi loko hi nga ri eseleni leyi fanaka ya khotso, swi fana ni loko hi ri na vona ni ku swi kota ku nyikela mpfuno ni xikhutazo. Vakriste lava tswariweke hi moya entiyisweni va rila ni vatotiwa lava xanisiwaka. (Ringanisa 1 Vakorinto 12:19-26.) Lava va ni nkhathalelo lowu fanaka hi vanghana va vona lava xanisiwaka lava nga ni mintshembo ya laha misaveni, lava na vona va tokotaka ku xanisiwa ka tinxaka-xaka emavokweni ya vaxanisi. Ntwela-vusiwana wo tano wu fanerile swinene, tanihi leswi hinkwerhu ka hina hi nga eka miri wa vumunhu ni leswi hi faneleke ku tokota ku vaviseka ni minxaniso tanihi vagandzeri va Yehova.—1 Petro 5:6-11.
Vukati Byi Fanele Byi Xiximeka
13. Hi ku komisa, i yini leswi Pawulo a a swi vula eka Vaheveru 13:4?
13 Ku landzelela xikombiso xa Kriste ni ku ‘nyikela ntirho wo kwetsima eka Yehova hi xichavo ni ku rhurhumela’ ku fanele ku khumba ku khathalela ka hina vanhu van’wana hi tindlela to tala. Endzhaku ko vula leswaku “na n’wina mi ni miri,” Pawulo u vulavule hi vuxaka lebyi nga ni xivumbeko xa miri kumbe xa nyama lexi endleke swi koteka ku khathalela van’wana hi ndlela leyi faneleke. (Vaheveru 13:3) U nyike Vakriste va Vaheveru xitsundzuxo lexi: “Ku tekana a ku ve loku xiximiwaka hi vanhu hinkwavo, vukati byi nga onhiwi hi ku kanganyisana, hikuva Xikwembu xi ta avanyisa timbhisa ni vaoswi.” (Vaheveru 13:4) Xi fanela swinene swonghasi xitsundzuxo lexi, tanihi leswi vunghwavava a byi andzile eMfun’weni wa Rhoma! Vakriste va namuntlha na vona va fanele va yingisa marito lawa hikwalaho ka mimpimanyeto ya le hansi ya mahanyelo ya misava ni ntiyiso wa leswaku lembe na lembe magidi ma susiwa ebandlheni hikwalaho ka vunghwavava.
14. Ha yini a wu ta vula leswaku vukati bya xiximeka?
14 Exikarhi ka lava a va nga byi xiximi vukati a ku ri na Vaessene va nkarhi wa Pawulo. Hi ntolovelo a va nga ngheneli vukati, ku fana ni van’wana eswivandleni swa vufundhisi namuntlha lava tekaka ku titshamela wexe ku tengile ku tlula ku teka. Hambi swi ri tano, eka leswi Pawulo a swi byeleke Vakriste va Vaheveru, u kombise kahle leswaku vukati bya xiximeka. Ku byi xixima a swi ri erivaleni loko Nahumi a phofule ku navela ka yena ehenhleni ka vingi va yena lava nga tinoni va xisati, Rhuti na Oripa a ku: “Yehova a mi nyike uṅwana ni uṅwana e ku ṭaka e ndlwini ya nuna wa yena.” (Ruti 1:9) Eka ndhawu yin’wana, Pawulo hi yexe u kombise leswaku ‘eminkarhini yo hetelela van’wana va ta wa eripfumelweni, va yirisa ku nghenela vukati.’—1 Timotiya 4:1-5.
15. I vamani lava vuriwaka vaoswi ni timbhisa eka Vaheveru 13:4, naswona xana Xikwembu xi ta va avanyisisa ku yini?
15 Vaheveru lava tshameke va va ehansi ka Nawu kambe va nghenisiwa eka ntwanano lowuntshwa a va wu tiva nawu lowu nge: “U nga ṭhuki u oŝa.” (Eksoda 20:14) Kambe a va ri etikweni leri thyakeke naswona a va lava xitsundzuxo lexi nge: “Vukati byi nga onhiwi hi ku kanganyisana, hikuva Xikwembu xi ta avanyisa timbhisa ni vaoswi.” Exikarhi ka vaoswi ku ni vanhu lava nga si nghenelaka vukati lava nghenelaka vuxaka bya rimbewu. Timbhisa hi laha ku hlawulekeke i vanhu lava ngheneleke vukati lava vaka ni vuxaka bya rimbewu ni lava nga riki vanghana va vona, va thyakisa masangu ya vona ya vukati. Tanihi leswi vaendli va vuoswi ni vumbhisa lava nga hundzukiki va faneriwaka hi ku avanyisa ka tihanyi ka Xikwembu, a va nge amukeriwi eka Yerusalema Lontshwa wa le tilweni kumbe hambi ku ri ku tsakela vutomi lebyi nga heriki emisaveni ehansi ka ku fuma ka Mfumo. (Nhlavutelo 21:1, 2, 8; 1 Vakorinto 6:9, 10) Xitsundzuxo lexi xa ku nga thyakisi masangu ya vukati nakambe xi fanele xi endla Vakriste lava tekaneke leswaku va papalata ku tikhoma loko biha ka rimbewu loku thyakisaka ni vanghana va vona, hambi loko ku ri hava lexi thyakeke ehenhleni ka ku hlangana loku faneleke ka miri evukatini.—Vona Xihondzo xo Rindza xa Xinghezi xa March 15, 1983, matluka 27-31.
Ku Aneriseka Hi Swilo Swa Sweswi
16, 17. I yini leswi vuriweke eka Vaheveru 13:5, naswona ha yini Vaheveru a va lava xitsundzuxo lexi?
16 Hi ta kuma ku aneriseka loko hi landzelela Xikombiso xa hina ivi hi ‘nyikela ntirho wo kwetsima hi xichavo na hi ku rhurhumela,’ hi tiyiseka leswaku Yehova i Mupfuni wa hina. Ku katseka swinene eku hlongoriseni ka swilo leswi vonekaka ku nga va ndzingo lowukulu. Kambe Vakriste a va fanelanga va hluriwa hi wona. Vaheveru va byeriwe ku: “Mi nga fumiwi hi mali eku hanyeni ka n’wina, kutani mi kolwa hi leswi mi nga na swona, hikuva Xikwembu xi te: ‘Ndzi nga ka ndzi nga ku tshiki, kumbe ku ku cukumeta, ni siku ni rin’we.’” (Vaheveru 13:5) Ha yini Vaheveru a va faneriwa hi xitsundzuxo lexi?
17 Kumbexana Vaheveru a va tikarhatela ngopfu mali hi leswi a va tsundzuka “ndlala leyikulu” hi nkarhi wa ku fuma ka Claudius Caesar (41-54 C.E.). Ndlala a yi ri yikulu lerova Vakriste va tindhawu tin’wana a va rhumela swipfuno eka vamakwavo eYudiya. (Mintirho 11:28, 29) Hi ku ya hi n’wamatimu wa Muyuda Josephus, ndlala yi ve kona malembe manharhu kumbe ku tlula, yi vanga vusiwana lebyi tshikilelaka eYudiya ni le Yerusalema.—Antiquities of the Jews, XX, 2, 5; 5, 2.
18. Xitsundzuxo lexi nga eka Vaheveru 13:5 xi nyikela dyondzo yihi eka hina?
18 Xana laha ku na dyondzo yo karhi eka hina? Ina, hikuva ku nga khathariseki leswaku hi nga swela ku fikela kwihi, a hi fanelanga ku rhandza mali kumbe ku kharhateka swinene ha yona. Ematshan’wini yo vilela hi nsirhelelo wa swilo leswi vonekaka, kumbexana hi kondza hi va ni makwanga, hi fanele hi ‘aneriseka hi leswi hi nga naswona.’ Yesu u te: “Rhangani mi tilavela Mfumo wa [xona] ni ku lulama ka [Xikwembu], kutani sweswo hinkwaswo mi ta engeteleriwa swona.” (Matewu 6:25-34) Nakambe u kombise leswaku hi fanele hi nyikela nyingiso leswaku hi ‘fuwa eka Xikwembu’ hikuva ‘vutomi bya hina a byi tiseketelanga hi leswi hi nga swona.’ (Luka 12:13-21) Kutani ke, loko ku rhandza mali ku xungeta vumoya bya hina, a hi yingiseni xitsundzuxo xa Pawulo eka Vaheveru hi tlhela hi tsundzuka leswaku “vukhongeri lebyi nga ni ku tsaka” i “rifuwo lerikulu.”—1 Timotiya 6:6-8.
Tshemba Yehova
19. I xitiyisekiso xihi lexi Xikwembu xi xi nyikeke Yoxuwa naswona xana leswi swi fanele swi hi khumbisa ku yini?
19 Tanihi valandzeri va Yesu lava lavaka ku ‘nyikela ntirho wo kwetsima hi xichavo na hi ku rhurhumela,’ hi fanele hi veka ntshembo wa hina hayi eka mali kambe eka Tata wa hina wa le tilweni, loyi mpfuno wa yena wu nga wa nkoka. Hambi hi langutane ni swiphiqo swo tanihi kwihi, hi fanele hi tsundzuka xitiyisekiso xakwe lexi nge: “Ndzi nga ka ndzi nga ku tshiki, kumbe ku ku cukumeta.” (Vaheveru 13:5) Laha Pawulo a a kombetela eka marito ya Xikwembu eka Yoxuwa: “Nḍi nga ka nḍi nga ku ṭhiki, nḍi nga ka nḍi nga ku siyi.” (Yoxuwa 1:5; ringanisa Deuteronoma 31:6, 8.) Yehova a nga n’wi tshikanga Yoxuwa naswona A nge hi cukumeti loko hi N’wi tshemba.
20. (a) Yi ri yini ndzimana ya lembe ya 1990? (b) Handle ko chava, hi fanele hi ya emahlweni hi endla yini?
20 Mpfuno wa Xikwembu lowu nga hlulekiki wu ta kandziyisiwa exikarhi ka Timbhoni ta Yehova eka tin’hweti leti landzelaka, hikuva ndzimana ya vona ya lembe ya 1990 yi ri: ‘Vanani na xivindzi kutani mi ku: “Yehova i mupfuni wa mina.”’ Marito lawa ma kumeka eka Vaheveru 13:6 (NW), laha Pawulo a tshaheke mupisalema ivi a byela Vaheveru a ku: “Hikokwalaho hi nga vula hi tiyile, hi ku: ‘[Yehova] i mupfuni wa mina, a ndzi nga chavi nchumu; munhu a nga ndzi endla yini xana?’” (Psalma 118:6) Hambi loko hi xanisiwa, a hi chavi, hikuva vanhu a va nge endli ku tlula leswi Xikwembu xi swi pfumelelaka. (Psalma 27:1) Hambi loko hi fanele ku fa tanihi vahlayisi va vutshembeki, hi na ntshembo wa ku pfuxiwa. (Mintirho 24:15) Kutani a hi yeni emahlweni hi landzelela Xikombiso xa hina eku ‘nyikeleni ka ntirho wo kwetsima hi xichavo na hi ku rhurhumela,’ hi tiyiseka leswaku Yehova i Mupfuni wa hina.
A Wu Ta Hlamurisa Ku Yini?
◻ Ha yini Vakriste va Vaheveru a va lava mpfuno wa Yehova hi laha ku hlawulekeke?
◻ Xana vanhu va Yehova va ‘yise rirhandzu ra vona ra vumakwerhu emahlweni’ hi ndlela yihi?
◻ Ha yini u va ni malwandla?
◻ I yini lexi hi nga xi endlaka ku kombisa leswaku ha va tsundzuka vapfumeri-kulorhi lava xanisiwaka?
◻ Ha yini vukati byi fanele ku hlayisiwa byi ri lebyi xiximekaka?