Nyikela Vumbhoni Ha Yehova Naswona U Nga Karhali
“Anakanyani yena loyi a nga tiyisela hi ndlela leyo tano, loko vadyohi va lwa na yena, leswaku mi nga karhali kumbe ku hela mbilu.”—VAHEVERU 12:3.
1, 2. I xitiyisekiso xihi lexi khorwisaka lexi Yesu a xi nyikeke vadyondzisiwa va yena leswaku u pfuxiwile?
“NDZI vone Hosi!” Hi marito wolawo lama nyanyulaka, Mariya wa Magadala u boxe mahungu ya ku pfuxiwa ka Yesu. (Yohane 20:18) Leswi swi funghe masiku ya 40 lama taleke hi swiendlakalo leswi nyanyulaka eka vadyondzisiwa va Kriste, lava va tshameke va khomiwa hi gome hikwalaho ka rifu rakwe.
2 Yesu a a nga lavi ku siya ku kanakana emianakanyweni ya vadyondzisiwa va yena leswaku hakunene a a hanya. Xisweswo, hi laha Luka a hlamuselaka ha kona: “[Yesu] ú tivonakisile ka vona a ri loyi a hanyaka, hi swikombiso leswo tala leswi khorwisaka; ú voniwile hi vona, hi masiku ya 40.” (Mintirho 1:3) Entiyisweni, eka xiendlakalo xin’wana “[u humelele] hi nkarhi wun’we eka vamakwavo lava tlulaka 500.” (1 Vakorinto 15:6) Hakunene, sweswi a ku nga ha ri na xivangelo xin’wana xo kanakana. Yesu a a hanya!
3. I xivutiso xihi mayelana ni Mfumo lexi vadyondzisiwa va Yesu va n’wi vutiseke xona naswona ha yini nhlamulo ya yena yi va hlamarisa?
3 Hi nkarhi wolowo vadyondzisiwa va Yesu a va ehleketa hi “Mfumo wa Xikwembu” wa le misaveni lowu pfuxetiweke eIsrayele. (Luka 19:11; 24:21) Kutani va vutisa Yesu va ku: “Hosi, xana u ta pfuxa mfumo wa Israyele enkarhini wolowo ke?” Handle ko kanakana nhlamulo ya yena yi va hlamarisile, hikuva u te: “A swi mi fanelanga ku tiva tinguva, hambi yi ri minkarhi leyi Tatana a nga tihlawulela yona hi vukulukumba bya yena; kambe mi ta nyikiwa matimba, siku Moya lowo Kwetsima wu taka ehenhla ka n’wina; kutani mi ta va timbhoni ta mina kwala Yerusalema, ni le tikweni hinkwaro ra Yudiya, ni ra Samariya, ni ku ya fika emakun’wini ya misava.” (Mintirho 1:6-8) Vona ntlhonthlo wonghasi lowu vekiweke emahlweni ka vadyondzisiwa! Naswona vona vutihlamuleri byonghasi! Xana a va ta wu hetisisisa ku yini ntirho wo tano? Nhlamulo yi te hi ku hatlisa hi ndlela leyi nyanyulaka.
Ku Amukela Mphikamakaneta
4. Hlamusela leswi humeleleke hi siku ra Pentekosta.
4 Luka wa hlamusela: “Kute loko siku ra Pentekosta ri fikile, vadyondzisiwa hinkwavo a va hlengeletanile exivandleni xi ri xin’we. Kutani hi nomu lo, ku twakala mpfumawulo lowu humaka etilweni, wu fana ni ku hunga ka xidzedze, wu tata yindlu hinkwayo leyi va tshameke ka yona. Kutani va vona leswi fanaka ni malangavi ya ndzilo, swi avana, swi tshama ehenhla ka un’wana ni un’wana wa vona. Hinkwavo va tala hi Moya lowo Kwetsima, kutani va sungula ku vulavula hi tindzimi tin’wana, hi laha Moya wu nga va nyika ku vulavula ha kona.” Pongo a ri ri rikulu lerova ri koka nyingiso wa mintshungu ya Vayuda lava rindzeleke nkhuvo eYerusalema. A va hlamarile ku twa ‘swilo leswi hlamarisaka swa Xikwembu hi tindzimi ta vona vini.’—Mintirho 2:1-11.
5. Xana ku vhumba ka Yesu eka Mintirho 1:8 ku hatle ku hetiseka hi mpimo wo tanihi kwihi?
5 Petro a nga hetanga nkarhi ku nyikela nkulumo ya matimba, a kombisa hi ndlela leyi khorwisaka swinene leswaku “Yesu wa Nazareta,” loyi va n’wi beleleke, a a ri “Hosi” leyi vhumbiweke hi Davhida hi marito lama nge: “[Yehova u] te ka Hosi yanga: Tshama evokweni ra mina ra xinene, ndzi kondza ndzi endla valala va wena vunavelo bya milenge ya wena.” Va khumbiwile swinene, vayingiseri va Petro va vutisile va ku: “Vavanuna varikwerhu, xana hi ta endla yini?” Loko a hlamula Petro u va khutazile a ku: “Hundzukani, kutani un’wana ni un’wana wa n’wina a khuvuriwa hi vito ra Yesu Kriste, leswaku mi rivaleriwa swidyoho swa n’wina.” Vuyelo byi ve byihi? Magidi manharhu ma khuvuriwile! (Mintirho 2:14-41) Vumbhoni ana se a byi nyikeriwa eYerusalema. Endzhakunyana, byi tlulele eYudiya hinkwaro, kutani byi ya eSamariya naswona eku heteleleni “ni ku ya fika emakun’wini ya misava.” Ku ndlandlamuka ka ntirho wo chumayela hi Mfumo a ku hatlisa lerova kwalomu ka 60 C.E. muapostola Pawulo a swi kota ku vula leswaku mahungu lamanene ma “twarisiwile eka swivumbiwa hinkwaswo leswi nge hansi ka tilo.”—Vakolosa 1:23.
Ku Andza Ka Mfumo Ni Nxaniso
6, 7. (a) Xana ku ndlandlamuka ka Mfumo ni ku xanisiwa ka Vakriste ku fambisane hi ndlela yihi hi lembe xidzana ro sungula? (b) Hi xihi xilaveko xa xihatla lexi tlhekekeke exikarhi ka Vakriste eYerusalema naswona xana xilaveko lexi xi hetisisiwe njhani?
6 Ku nga ri khale endzhaku ka Pentekosta ya 33 C.E., vadyondzisiwa va Yesu a va ri ni xivangelo xo tsundzuka marito ya yena lama nge: “‘Nandza a hi nkulu eka n’wini wa yena.’ Loko va ndzi xanisile, na n’wina va ta mi xanisa.” (Yohane 15:20) Varhangeli va Vayuda a va hlundzuka loko “rito ra Xikwembu ri ya emahlweni swinene; na yona nhlayo ya vadyondzisiwa yi ya yi andza ngopfu eYerusalema.” Mudyondzisiwa Stefano u khandliwe hi maribye a fa ehenhleni ka xihehlo xa vunwa. Xexo xi vonake ku ri xikombiso lexi vo tala a va xi rindzerile, hikuva “enkarhini wolowo, [bandlha ra] Yerusalema [ri] sungula ku xanisiwa swinene, vadyondzisiwa hinkwavo va hangalasiwa ematikweni ya Yudiya ni ya Samariya.”—Mintirho 6:7; 7:58-60; 8:1.
7 Nxaniso wu yimile swa xinkarhana. Kambe endzhakunyana, Heroda Agripa I u dlaye muapostola Yakobo. Petro u khotsiwile kambe a ntshunxiwa hi ntsumi. Endzhakunyana vamakwerhu eYerusalema va phangeriwe swilo leswi vonekaka kutani swipfuno a swi fanele swi rhumeriwa eka vona hi vapfumeri-kulobye va matiko man’wana. (Mintirho 9:31; 12:1-11; 1 Vakorinto 16:1-3) Hi nkarhi wa ku endza ka muapostola Pawulo eYerusalema, tihanyi eka vukhongeri a ti ri kona tanihi leswi mintshungu yi huweleleke ha kona yi ku: “Munhu lowo tano a a susiwe emisaveni, a a dlawe!” (Mintirho 22:22) Entiyisweni, Vakriste volavo lava tshamaka eYerusalema ni le Yudiya a va lava xikhutazo lexikulu leswaku va hambeta va nyikela vumbhoni bya Mfumo hi ku tshembeka. Yesu u tshembise vadyondzisiwa vakwe leswaku “Moya lowo Kwetsima lowu Tatana a nga ta wu rhuma hi vito ra mina,” a wu ta tirha tanihi ‘mupfuni.’ (Yohane 14:26) Kambe xana Tatana a a ta wu nyikerisa ku yini mpfuno wo tano kumbe nkhongotelo lowu lavekaka? Hi ku komisa, nhlamulo yi ri, hi ku tirhisa muapostola Pawulo.
Papila Ra Pawulo Leri Yaka Eka Vaheveru
8. (a) I yini lexi susumeteleke Pawulo ku tsala papila rakwe ro ya eka Vaheveru? (b) Hi le ka xiyenge xihi xa papila rakwe laha hi nga ta nyikela nyingiso wa hina eka xona naswona hikokwalaho ka yini?
8 Kwalomu ka 61 C.E., Pawulo a a khotsiwile eRhoma, kambe a a swi tiva leswi a swi humelela eka vamakwavo eYerusalema. Hikwalaho, ehansi ka nkongomiso wa moya wa Yehova, u tsale papila rakwe ra le nkarhini eka Vaheveru. Ri tale hi nkhathalelo wa yena wa rirhandzu eka vamakwavo va xinuna ni va xisati va Vaheveru. Pawulo a a swi tiva leswaku ripfumelo ni ku tiyiseka ka vona a swi fanele swi akiwa eka Yehova tanihi Mupfuni wa vona. Kutani a va ta swi kota ku ‘tsutsuma mpfhuka lowu va vekeriweke wona hi ku tiyisela’ naswona hi xivindzi va vula va ku: “[Yehova] i mupfuni wa mina, a ndzi nga chavi nchumu; munhu a nga ndzi endla yini xana?” (Vaheveru 12:1; 13:6) Hi le ka xiyenge lexi xa papila ra Pawulo ro ya eka Vaheveru (tindzima 11-13) laha sweswi hi tsakelaka ku yisa nyingiso wa hina kona. Ha yini? Hikuva xiyimo lexi Vakriste volavo vo sungula a va langutane na xona xa fana ni lexi langutaneke ni Timbhoni ta Yehova namuntlha.
9. I mphikamakaneta yihi leyi langutaneke ni Vakriste eka lembe xidzana ro sungula leyi langutaneke ni Vakriste namuntlha naswona hi yihi ndlela yin’we ntsena leyi ku nga langutaniwaka na yona ha yona?
9 Exikarhi ka rixaka ra hina, mintshungu yi amukele rungula ra Mfumo hi ku tinyiketela eka Yehova ni ku khuvuriwa tanihi Timbhoni ta yena. Hambi swi ri tano, ku ndlandlamuka loku ka vugandzeri bya ntiyiso ku te ni nxaniso wa tihanyi, Vakriste vo tala va lahlekeriwa hi vutomi bya vona ku fana na Stefano, Yakobo ni timbhoni tin’wana to tshembeka ta lembe xidzana ro sungula. Hikwalaho, mphikamakaneta ya fana ni ya nkarhi wolowo: I vamani lava nga ta swi kota ku yimela ku ringiwa ka vutshembeki bya vona emahlweni ka nkaneto lowukulu eka rungula ra Mfumo? Ku tlula kwalaho, i vamani lava nga ta swi kota ku langutana ni swiendlakalo leswi chavisaka tanihi ‘nhlomulo lowukulu’ lowu nga si tshamaka wu va kona lowu hi ku hatlisa wu taka ehenhla ka rixaka ra namuntlha? (Matewu 24:21) Nhlamulo yi ri, hi lava va tiyimiseleke ku “[lwa] nyimpi leyinene ya ku pfumela,” lava va ‘tiyeke eripfumelweni.’ Lava hi vona lava eku heteleleni va nga ta swi kota ku vula va ku: “Ku hlula loku hlulaka misava i ku pfumela ka hina.”—1 Timotiya 6:12; 1 Petro 5:9; 1 Yohane 5:4.
Ku Pfuneka Eka Swikombiso Leswi Tshembekaka
10. (a) Ripfumelo i yini xana? (b) Xana Xikwembu xi titwise ku yini hi vavanuna ni vavasati va khale va ripfumelo?
10 Ripfumelo i yini xana? Pawulo wa hlamula: “Ku pfumela i ku tshemba loku tiyeke ehenhla ka swilo leswi languteriwaka, ni ku kholwa swinene hi tlhelo ra swilo leswi nga voniwiki. Hikuva ha kona, vanhu va khale va kumile ku nkhensiwa hi Xikwembu.” (Vaheveru 11:1, 2) Kutani Pawulo u seketela nhlamuselo ya yena ya ripfumelo hi ku kombisa ripfumelo ri ri karhi ri tirha. U kume tinhla ta yena eka vutomi bya ‘vanhu va minkarhi ya khale,’ kun’we ni vavasati vo tanihi Sara na Rahava. Swi khutaza swinene swonghasi ku tiva leswaku “Xikwembu a xi na tingana hi vona loko va xi vula Xikwembu xa vona”! (Vaheveru 11:16) Xana Xikwembu xi nga vula leswi fanaka eka hina hikwalaho ka ripfumelo ra hina? Hi nga tshuki hi xi nyika xivangelo xo va ni tingana ha hina loko siku rin’wana ni rin’wana ri hela.
11. Xana hina namuntlha hi nga pfunekisa ku yini eka ‘vunyingi lebyikulu bya timbhoni lebyi hi rhendzeleke’?
11 Endzhaku ka mhaka ya vavanuna ni vavasati lava vo tshembeka, Pawulo u ri: “Hikokwalaho, leswi hi rhendzeriweke hi vunyingi lebyikulu lebyi bya timbhoni, na hina a hi tshikeni hinkwaswo leswi swi hi sivelaka ku ya emahlweni, ni vudyoho lebyi hatlaka ku hi namarhela, hi tsutsuma hi ri ni ku tiyisela eku tsutsumeni ka mpfhuka lowu hi vekeriweke wona.” (Vaheveru 12:1) Hambi leswi sweswi va etleleke esirheni, xana swikombiso leswi swo tshembeka swi kona emianakanyweni ya hina? Xana u va tiva kahle ni mintokoto ya vona lerova u nga hlamula u ku ina? Leyi hi yin’wana ya tihakelo to tala ta dyondzo ya nkarhi na nkarhi ya Bibele, hi tirhisa switwi swa hina hinkwaswo ku pfuxeta mintokoto leyi nyanyulaka ya “vunyingi lebyikulu lebyi bya timbhoni.” Entiyisweni, ku nghenisa swikombiso swa vona swa ku tshembeka embilwini swi ta hi pfuna swinene ku hlula ku kayivela kwihi na kwihi ka ripfumelo. Kutani, leswi swi ta hi pfuna ku nyikela vumbhoni bya ntiyiso hi xivindzi ni ku pfumala ku chava ehansi ka swiyimo hinkwaswo.—Varhoma 15:4.
Ku Nga Karhali
12. (a) Xikombiso xa Yesu xi nga hi pfunisa ku yini leswaku hi nga ‘karhali ni ku hela mbilu’? (b) Hi swihi swikombiso swa siku ra namuntlha swa lava nga karhariki?
12 Xikombiso xa hina lexikulu xa ripfumelo i Yesu. Pawulo wa khutaza: “Hi tsutsuma hi ri ni ku tiyisela eku tsutsumeni ka mpfhuka lowu hi vekeriweke wona. A hi languteni eka Yesu. . . . Anakanyani yena loyi a nga tiyisela hi ndlela leyo tano, loko vadyohi va lwa na yena, leswaku mi nga karhali kumbe ku hela mbilu.” (Vaheveru 12:1-3) Xana u tshama u kambisisa ‘swinene’ xikombiso xa Yesu ku fikela kwihi? Xana a wu n’wi ‘langutisisa’ swinene hi ndlela yihi? (1 Petro 2:21) Sathana u lava leswaku hi ‘karhala ni ku hela mbilu.’ U lava leswaku hi tshika ku endla ntirho wo nyikela vumbhoni. Xana u swi endlisa ku yini leswi? Minkarhi yin’wana hi minkaneto leyi kongomeke yo huma eka valawuri va vukhongeri ni va misava, tanihi le ka lembe xidzana ro sungula. Lembe leri nga hundza, ntirho wo chumayela hi Mfumo wu yirisiwile eka matiko ya kwalomu ka 40. Kambe xana sweswo swi endle vamakwerhu va karhala? Doo! Ntirho wa vona wa ku tshembeka wu endle leswaku vanhu va 17 000 ni ku tlula va khuvuriwa ematikweni wolawo hi 1988. Mawaku xikhutazo lexi leswi swi faneleke swi va swona eka hinkwavo lava hanyaka ematikweni lama ha riki ni ntshunxeko wo karhi! Hi nga tshuki hi karhala ku chumayela mahungu lamanene ya Mfumo!
13. (a) Hi swihi swilo swin’wana leswi tumbeleke leswi nga hi endlaka hi tsana entirhweni wa hina wo chumayela? (b) Hi wihi ‘ntsako lowu a wu vekiwe emahlweni ka Yesu,’ naswona langutelo ro tano ra ku tsaka hi nga ri kumisa ku yini?
13 Hambi swi ri tano, ku ni swilo swin’wana leswi tumbeleke leswi nga hi endlaka hi tsana. Leswi swi katsa nkaneto endyangwini lowu avaneke, ntshikilelo wa mianakanyo, swiphiqo swa rihanyo, ntshikilelo wa tintangha, ku hetiwa matimba hikwalaho ko pfumala vuyelo lebyinene entirhweni wa hina wo chumayela kumbe ntlhaveko wo pfumala ku tiyisela hi mhaka ya leswi makumu ya mafambiselo lawa ya swilo ma nga si fikaka. Kambe, i yini lexi pfuneke Yesu ku tiyiselela ku karhateka emianakanyweni ni le mirini? A ku ri “ku tsaka loku vekiweke emahlweni ka yena.” (Vaheveru 12:2) Yesu a a tiyisiwa hi ntsako wo tsakisa mbilu ya Tata wakwe hi ku N’wi lwela ni ku langutela ntsako lowu nga ta landzela lowu a nga ta wu tokota eku kongomiseni ka mikateko leyi hlamarisaka ya Mfumo wa Vumesiya. (Psalma 2:6-8; 40:9, 10; Swivuriso 27:11) Xana hi nga ri landzelela swinene langutelo leri ra Yesu ra ku tsaka? Nakambe tsundzuka xitiyisekiso xa Petro eka 1 Petro 5:9, lexi nge: “Vamakwenu emisaveni hinkwayo va hlangana ni maxangu yo fanana ni lawa ni nga na wona.” Ku tiva leswaku Yehova wa twisisa, ku tokota rirhandzu ra vumakwerhu bya misava hinkwayo ni ku langutela ntsako lowu vekiweke emahlweni ka hina ehansi ka ku fuma ka Mfumo hi minkarhi hinkwayo—hinkwaswo leswi swi ta hi pfuna leswaku hi nga karhali ku tirhela Yehova hi ripfumelo ni ku chumayela tanihi leswi makumu ma tshineleke swinene.
Mhaka Leyi Yehova A Layaka Ha Yona
14. I mimpfuno yihi leyi nga vaka kona eka miringo ni ku xaniseka leswi hi nga bohekaka ku swi tiyiselela?
14 Sweswi Pawulo u voninga xivangelo lexi ha xona hi faneleke ku tiyiselela miringo ni ku xaniseka. U ringanyeta leswaku hi xiya xivumbeko xo tano xa nxupulo. Pawulo u ri: “N’wananga, u nga teki ku layiwa hi [Yehova] u ku endla mhaka leyitsongo, na swona u nga heli mbilu loko u tshinyiwa hi [yena]. Hikuva [Yehova u] laya loyi [a] n’wi rhandzaka.” (Vaheveru 12:5, 6) Hambi ku ri Yesu u “dyondzile ku yingisa hi mhaka ya ku xaniseka ka yena.” (Vaheveru 5:8) Entiyisweni, na hina hi fanele hi dyondza ku yingisa. Xiya mimbuyelo leyi pfunaka ya ku pfumelela ndzayo yi hi ololoxa. Pawulo u te: “Ku veka mihandzu ya ku rhula ya vutomi lebyo lulama, eka lava va dyondzisiweke hi kona.” Vona ndlela leyi sweswo swi khutazaka ha yona!—Vaheveru 12:11.
15. Xana hi nga xi tirhisisa ku yini xitsundzuxo xa Pawulo xo ‘hambeta hi endlela milenge ya hina tindlela letinene’?
15 Loko hi amukela ‘ndzayo leyi humaka eka Yehova’ hi langutelo leri, hi ta amukela xitsundzuxo xa Pawulo lexi kongomeke lexi nge: “Hikokwalaho, tiyisani mavoko ya n’wina lama debyaka, ni matsolo ya n’wina lama gudlaka. Mi fanele ku lulamisela milenge ya n’wina tindlela leto lulama.” (Vaheveru 12:12, 13) Minkarhi yin’wana swa olova ku hambuka ‘endleleni yo lala leyi yaka evuton’wini.’ (Matewu 7:14) Muapostola Petro ni van’wana eAntiyoka va tshama va va ni nandzu wo endla leswi. Ha yini? Hikuva ‘a va nga fambi hi ku lulama hi ku ya hi ntiyiso wa mahungu lamanene.’ (Vagalatiya 2:14) Namuntlha, hi fanele hi hambeta hi yingisa Mudyondzisi wa hina Lonkulu, Yehova Xikwembu. Hi fanele hi tirhisa swinene mpfuno lowu lunghiseleriweke hi ku tirhisa “nandza lowo tshembeka, lowa vutlhari.” Leswi swi ta tiyisekisa ‘ndlela leyinene’ ya milenge ya hina.—Matewu 24:45-47; Esaya 30:20, 21.
16. (a) Xana “rimitsu ra ku bava” ri nga nghenisa ku yini ebandlheni? (b) Ha yini Pawulo a hlanganisa ku tikhoma loko biha ni ku pfumala ku tlangela swilo swo kwetsima naswona hi nga tisirhelerisa ku yini eka makhombo yo tano?
16 Pawulo u ya emahlweni a tsundzuxa leswaku hi fanele ku “vona leswaku ku nga vi na un’we loyi a tsandzekaka ku kuma tintswalo ta [Xikwembu]; tivoneleni leswaku ku nga vi na loyi a milaka exikarhi ka n’wina kukota ‘rimitsu ra ku bava’ leri vangaka ku karhateka, ni ku nyamisa lavo tala.” (Vaheveru 12:15) Ku vilela, ku nga eneriseki, ku kuma swihoxo hi ndlela leyi swilo swi endliwaka ha yona ebandlheni ku nga fana ni “rimitsu ra ku bava” leswi nga hangalakaka hi ku hatlisa ni ku onha mianakanyo leyi tengeke ya van’wana ebandlheni. Hi nga hlula mianakanyo yo tano leyi hoxeke hi ku anakanyisisa hi mikateko leyi nga pimekiki leyi ntiyiso wu yi tiseke evuton’wini bya hina. (Psalma 40:5) Khombo rin’wana hi leriya ra ku va ni mimboyamelo ya ku tikhoma loko biha kumbe ku ‘pfumala ku tlangela swilo swo kwetsima, ku fana na Esawu.’ (Vaheveru 12:16) Pawulo u xaxameta makhombo lawa mambirhi swin’we, tanihi leswi rin’wana ri nga yisaka eka lerin’wana hi ku olova. A ku na Mukriste la nga welaka eka ku navela ko tano ka vutianakanyi loko a tirhisa marito ya Petro lama nge: “N’wi aleleni [Diyavulosi], mi tiya eku pfumeleni ka n’wina.”—1 Petro 5:9.
“Swilo Leswi Nga Voniwiki”
17. Pimanisa swiendlakalo leswi chavisaka eNtshaveni ya Sinayi ni leswi kongomaneke ni Vakriste namuntlha.
17 Ripfumelo ra hina ri titshege swinene hi “swilo leswi nga voniwiki.” (Vaheveru 11:1) Swin’wana swa swilo leswi nga voniwiki Pawulo u ya emahlweni a vulavula ha swona eka Vaheveru 12:18-27. U hlamusela swiendlakalo leswi chavisaka eNtshaveni ya Sinayi loko Xikwembu xi vulavule na Israyele hi ku kongoma ni loko Muxe a te: “Ndza rhurhumela hi ku chava.” Kutani muapostola wa engetela: “Kambe n’wina, mi tshinelele ntshava ya Siyoni ni muti wa Xikwembu lexi hanyaka, Yerusalema wa le tilweni, ni le ka tintsumi leti nga hlayekiki hi ku tala. Mi tile enkhubyeni wa ku tsaka.” Pawulo u vule leswaku emhakeni ya Vaisrayele va khale eNtshaveni ya Sinayi, rito ra Xikwembu ri tsekatsekise misava, kambe sweswi xi tshembisile xi ku: “Ndza ha to tsekatsekisa, ku nga ri misava ntsena, kambe na rona tilo.” Hambi loko ngopfu-ngopfu marito lawa ma kongomisiwe eka Vakriste lava totiweke, “ntshungu lowukulu” wa van’wana lava fanaka ni tinyimpfu na wona wu nga ma nghenisa embilwini. (Nhlavutelo 7:9) Xana u swi twisisa kahle leswi Pawulo a swi vulaka? Hi yime emahlweni ka nhlengeletano ya magidi ya tintsumi. Kavula, hi yime ni le mahlweni ka Yehova. Evokweni ra yena ra xinene ku na Yesu Kriste. Hakunene, hi le ka xivandla lexi chavisaka swinene ni le hansi ka vutihlamuleri lebyikulu ku tlula Vaheveru va khale eNtshaveni ya Sinayi! Nakambe tsundzuka, ku tsekatseka eka nyimpi leyi taka ya Armagedoni ku ta endla leswaku matilo ni misava leswo biha swa sweswi swi nyamalala. Entiyisweni namuntlha a hi nkarhi wo ‘tshika’ ku yingisa Rito ra Xikwembu ni ku ri hlayisa!
18. Hi yihi ndlela yin’we ntsena leyi hi nga hambetaka hi nyikela vumbhoni ha Yehova ha yona handle ko karhala?
18 Kutani ke, hakunene hi hanya enkarhini lowu chavisaka swinene ematin’wini ya vanhu. Tanihi Timbhoni ta Yehova, hi rhumeriwe ematikweni ya le kule ku ya chumayela mahungu lamanene ya Mfumo wa Xikwembu lowu simekiweke. Leswaku hi endla tano, hi fanele hi va ni ripfumelo leri nga ta ka ri nga tsekatsekisiwi, ripfumelo leri nga karhariki, ripfumelo leri hi pfumelelaka ku amukela ndzayo ya Yehova. Loko hi ri na ripfumelo ro tano, hi ta kumiwa exikarhi ka lava va nga ‘ta hambeta va va ni tintswalo leti nga fanelangiki, leti ha tona hi nga nyikelaka ntirho wo kwetsima lowu amukelekaka eka Xikwembu hi ku chava ni ku rhurhumela.’ (Vaheveru 12:28) Ina, hi ta hambeta hi nyikela vumbhoni ha Yehova naswona hi nga karhali.
A Wu Ta Hlamurisa Ku Yini?
◻ Ha yini papila ra Pawulo leri yaka eka Vaheveru ri ri leri pfunaka eka hina?
◻ I mphikamakaneta yihi leyi Vakriste va faneleke va kongomana na yona namuntlha?
◻ Hi nga pfunekisa ku yini eka timbhoni to tshembeka ta khale?
◻ Ha yini Yehova a laya lava a va rhandzaka?
◻ Hi xihi xilotlelo xa ku nyikela vumbhoni handle ko karhala?