Mi Nga Heli Matimba Emphikizanweni Wo Kuma Vutomi!
“A Hi Tsutsumeni Hi Ku Tiyisela Emphikizanweni Lowu Vekiweke Emahlweni Ka Hina.”—Vaheveru 12:1, Nw.
1, 2. I swiendlakalo swihi leswi tsakisaka leswi nyanyuleke malandza ya Yehovha emasikwini lawa ya makumu?
HI HANYA eminkarhini leyi nyanyulaka ni leyi nonon’hwaka. Malembe yo tlula 80 lama hundzeke, hi 1914, Yesu u vekiwe exiluvelweni tanihi Hosi ya Mfumo wa Xikwembu wa le matilweni. Ku sungule “siku ra Hosi” kun’we ni ‘nkarhi wa makumu’ ya mafambiselo lawa ya swilo. (Nhlavutelo 1:10; Daniyele 12:9) Ku sukela enkarhini wolowo mphikizano wa Vakreste wo kuma vutomi wu ve wa xihatla lexikulu. Malandza ya Xikwembu ma tikarhatile hi matimba leswaku ma fambisana ni kalichi ya Yehovha ya le tilweni, ku nga nhlengeletano yakwe ya le tilweni, leyi fambaka yi nga yimi leswaku yi hetisisa swikongomelo swa Yehovha.—Ezekiyele 1:4-28; 1 Vakorinto 9:24.
2 Xana vanhu va Xikwembu va wu kumile ntsako loko va ‘tsutsuma emphikizanweni’ wo kuma vutomi lebyi nga heriki? Va wu kumile hakunene! Va tsakile loko va vona ku hlengeletiwa ka masalela ya vamakwavo wa Yesu, naswona va tsaka loko va xiya leswaku ku funghiwa ko hetelela ka masalela ya lava 144 000 ku le kusuhi ni ku hela. (Nhlavutelo 7:3, 4) Ku tlula kwalaho, va nyanyuriwa hi ku xiya leswaku Hosi leyi vekiweke hi Yehovha yi nghenise rihwevo ra yona leswaku yi tshovela ‘ntshovelo wa misava.’ (Nhlavutelo 14:15, 16) Naswona i ntshovelo lowukulu swonghasi! (Matewu 9:37) Ku ta fikela sweswi, ku hlengeletiwe mimoya-xiviri yo tlula ntlhanu wa timiliyoni—“ntshungu lowukulu wa vanhu [lava] ku nga [riki] na un’we la kotaka ku va hlaya. [Va] huma ematikweni hinkwawo, ni le tinxakeni hinkwato, va ri va swivongo hinkwaswo ni va tindzimi hinkwato.” (Nhlavutelo 7:9) Ku hava loyi a nga vulaka leswaku ntshungu lowu eku heteleleni wu ta va lowukulu ku fikela kwihi, tanihi leswi ku nga riki na munhu loyi a kotaka ku wu hlaya.
3. Minkarhi hinkwayo hi fanele hi ringeta ku hlakulela moya wa ntsako hambi ku ri ni swihinga swihi?
3 I ntiyiso, Sathana u ringeta ku hi wisa kumbe ku hi hungutisa rivilo loko hi ri karhi hi tsutsuma emphikizanweni. (Nhlavutelo 12:17) Naswona a swi nga olovi ku hambeta hi tsutsuma hikwalaho ka tinyimpi, tindlala, mintungu ni swiphiqo leswin’wana hinkwaswo leswi funghaka nkarhi wa makumu. (Matewu 24:3-9; Luka 21:11; 2 Timotiya 3:1-5) Hambiswiritano, timbilu ta hina ta khapa hi ntsako hileswi makumu ya mphikizano lowu ma tshinelaka. Hi lwela ku kombisa moya lowu Pawulo a khutazeke Vakreste-kulobye va le sikwini ra yena leswaku va va na wona loko a ku: “Titsakeleni eHosini masiku hinkwawo; ndzi tlhela ndzi vurisa sweswo, ndzi ri: Titsakeleni!”—Vafilipiya 4:4.
4. I moya wa muxaka muni lowu kombisiweke hi Vakreste va Vafilipiya?
4 A swi kanakanisi leswaku Vakreste lava Pawulo a a va byela marito wolawo a va kuma ntsako eripfumelweni ra vona, hikuva Pawulo u te eka vona: “Hambetani mi tsaka eHosini.” (Vafilipiya 3:1, NW) Vandlha ra Vafilipiya a ri hanana naswona a ri ri ni rirhandzu ni ku hiseka kun’we ni ku gingiriteka. (Vafilipiya 1:3-5; 4:10, 14-20) Kambe Vakreste van’wana va lembe-xidzana ro sungula a va nga ri na wona moya wolowo. Hi xikombiso, Vakreste van’wana va Vayuda lava Pawulo a va tsaleleke buku ya Vaheveru a va vilerisa.
‘Nyikela Nyingiso Lowukulu’
5. (a) Vakreste va Vaheveru a va ri ni moya wihi loko ku simekiwa vandlha ro sungula ra Vukreste? (b) Hlamusela moya wa Vakreste van’wana va Vaheveru kwalomu ka 60 C.E.
5 Vandlha ro sungula ra Vukreste ematin’wini ya misava a ri vumbiwe hi Vayuda va ntumbuluko ni vaproselita, naswona ri simekiwe eYerusalema hi 33 C.E. Xana a ri ri ni moya wa muxaka muni? Munhu u fanele a hlaya tindzima to sungula ta buku ya Mintirho leswaku a twa hi ta ku gingiriteka ni ntsako wa rona, hambi ri langutane ni nxaniso. (Mintirho 2:44-47; 4:32-34; 5:41; 6:7) Hambiswiritano, endzhaku ka makume ya malembe, swilo swi hundzukile, kutani Vakreste vo tala va Vayuda handle ko kanakana va hungute rivilo emphikizanweni wo kuma vutomi. Buku yin’wana yi vula leswi landzelaka malunghana ni xiyimo xa vona, hilaha a xi ri hakona kwalomu ka 60 C.E.: “Xiyimo xa vulolo ni ku karhala, xa ku langutela swilo kambe swi nga endleki, xa mintshembo leyi nga hetisekiki, xa ku hluleka loku nga erivaleni ni xa ku pfumala ripfumelo eka swilo hinkwaswo. A va ri Vakreste kambe a va nga ku tlangeli ngopfu ku dzuneka ka ku rhamberiwa ka vona etilweni.” Xana swi tise ku yini leswaku Vakreste lava nga vatotiwa va va eka xiyimo xo tano? Ku kambisisa swiyenge swin’wana swa papila ra Pawulo leri yaka eka Vaheveru (leri tsariweke kwalomu ka 61 C.E.) swi hi pfuna ku hlamula xivutiso xexo. Nkambisiso wo tano wu ta pfuna hinkwerhu ka hina namuntlha leswaku hi papalata ku mbombomela exiyin’weni lexi fanaka xa ku tsana emoyeni.
6. Hi kwihi ku hambana kun’wana exikarhi ka vugandzeri bya Nawu wa Muxe ni vugandzeri lebyi sekeriweke eku pfumeleni eka Yesu Kreste?
6 Vakreste va Vaheveru a va humile eXiyudeni, ku nga vandla leri a ri vula leswaku ri yingisa Nawu lowu Yehovha a ri nyikeke wona ha Muxe. Swi tikomba onge Nawu wolowo wu hambete wu koka Vakreste vo tala va Vayuda, kumbexana hikwalaho ka leswi hi malembe-xidzana yo tala a ku ri wona ntsena ndlela yo tshinelela Yehovha, naswona a ku ri fambiselo leri hlawulekeke ra vugandzeri, leri a ri katsa vaprista, magandzelo ya nkarhi na nkarhi ni tempele ya le Yerusalema leyi a yi dumile emisaveni hinkwayo. Vukreste byi hambanile. Byi lava leswaku munhu a va ni langutelo ra moya, ro fana ni ra Muxe, loyi “a a langutela hakelo leya ha taka,” naswona “ú tiyiserile onge hi loko a ri karhi a vona loyi a nga voniwiki.” (Vaheveru 11:26, 27) Vakreste vo tala va Vayuda handle ko kanakana a va nga ri na rona langutelo rero ra moya. A va khwita hi milenge mimbirhi, ematshan’weni yo tsutsuma hi xikongomelo.
7. Mafambiselo lawa hi humeke eka wona ma nga yi khumba njhani ndlela leyi hi tsutsumaka ha yona emphikizanweni wo kuma vutomi?
7 Xana ku ni xiyimo lexi fanaka namuntlha? Kavula, xiyimo a xi fani ngopfu ni xa namuntlha. Hambiswiritano, Vakreste va huma emafambiselweni ya swilo lama tibumaka swinene. Misava yi nyika vanhu malunghelo lama nyanyulaka, kambe hi nkarhi lowu fanaka, ya va tikisela swinene. Tlhandla-kambirhi, vo tala va hina hi tshama ematikweni lawa ma taleriweke hi ku kanakana, laha vanhu va nga ni langutelo ra vutianakanyi, ra ku va vona vo rhanga. Loko hi tipfumelela ku kuceteriwa hi mafambiselo yo tano, ‘mahlo ya timbilu ta hina’ ma nga mphumeriwa hi ku olova. (Vaefesa 1:18) Xana hi ta tsutsumisa ku yini emphikizanweni wo kuma vutomi loko hi nga ha ku voni kahle lomu hi yaka kona?
8. Hi tihi tindlela tin’wana leti Vukreste byi tlulaka vugandzeri bya Nawu ha tona?
8 Leswaku a khutaza Vakreste va Vayuda, Pawulo u va tsundzuxe leswaku mafambiselo ya Vukreste i ya nkoka swinene ku tlula Nawu wa Muxe. Kunene, loko Vaisrayele va nyama va ha ri tiko ra Yehovha leri nga ehansi ka Nawu, Yehovha a a vulavula na vona hi milomu ya vaprofeta lava huhuteriweke. Kambe Pawulo u vula leswaku namuntlha u vulavula na vona “hi N’wana, loyi [a] n’wi vekeke ku va mudyandzhaka wa swilo hinkwaswo, loyi naswona [a] tumbuluxeke tilo ni misava ha yena.” (Vaheveru 1:2) Ku tlula kwalaho, Yesu hi lo nkulu eka tihosi hinkwato ta nxaxamelo wa Davhida, ‘vanakulobye.’ Nakambe hi lo nkulu eka tintsumi.—Vaheveru 1:5, 6, 9.
9. Ha yini hina, ku fana ni Vakreste va Vayuda va le nkarhini wa Pawulo, hi fanele hi ‘nyikela nyingiso lowukulu’ eka leswi Yehovha a swi vulaka?
9 Hikwalaho, Pawulo u tsundzuxe Vakreste va Vayuda a ku: “Hi fanele ku hlayisa swinene timhaka leti hi ti tweke, leswaku hi ta ka hi nga hambuki endleleni ya tona.” (Vaheveru 2:1) Hambileswi ku dyondza hi Kreste a ku ri nkateko lowukulu, a ku laveka leswi engetelekeke. A va fanele va yisa nyingiso lowukulu eRitweni ra Xikwembu leswaku va hlangavetana ni nkucetelo wa Vayuda lava a va hanya exikarhi ka vona. Na hina hi fanele hi ‘nyikela nyingiso lowukulu’ eka leswi Yehovha a swi vulaka, hikwalaho ka mavari-vari lawa hi tshamelaka ku twa ha wona emisaveni leyi. Leswi swi vula ku va ni madyondzelo lamanene ni ku namarhela xiyimiso lexinene xa ku hlaya Bibele. Hilaha Pawulo endzhakunyana a vulaka hakona epapileni rakwe leri yaka eka Vaheveru, nakambe swi vula ku va kona nkarhi na nkarhi eminhlanganweni ni ku twarisa vupfumeri bya hina eka van’wana. (Vaheveru 10:23-25) Ku gingiriteka hi ndlela yoleyo swi ta hi pfuna ku tshama hi xalamukile emoyeni, leswaku hi nga lahlekeriwi hi ntshembo wa hina lowu dzunekaka. Loko hi tata mianakanyo ya hina hi miehleketo ya Yehovha, a hi nge hluriwi kumbe ku tsanisiwa hi nchumu wo karhi lowu misava leyi yi nga hi endlaka wona.—Pisalema 1:1-3; Swivuriso 3:1-6.
“Khongotelanani Masiku Hinkwawo”
10. (a) Ku nga humelela yini eka loyi a nga nyikeriki nyingiso lowukulu eRitweni ra Yehovha? (b) Hi nga ‘khongotelana masiku hinkwawo’ hi ndlela yihi?
10 Loko hi nga yisi nyingiso lowukulu eka swilo swa moya, switshembiso swa Xikwembu swi nga ha vonaka swi nga ri swa xiviri eka hina. Leswi swi humelerile ni le ka lembe-xidzana ro sungula loko mavandlha ma ha vumbiwe hi Vakreste lava totiweke ntsena, ni loko vaapostola van’wana va ha hanya. Pawulo u tsundzuxe Vaheveru a ku: “Vamakwerhu, tivoneleni leswaku ku nga vi na un’we exikarhi ka n’wina la nga ni mbilu yo biha, leyi nga riki na ku pfumela, kutani a hambukela kule ni Xikwembu lexi hanyaka. Kambe khongotelanani masiku hinkwawo, loko ma ha twa rito leri nge ‘namuntlha’, leswaku ku nga vi na un’we exikarhi ka n’wina loyi a tinonon’hwisaka hi ku xisiwa hi vudyoho.” (Vaheveru 3:12, 13) Rito ra Pawulo leri nge “tivoneleni” ri kandziyisa xilaveko xa ku xalamuka. Khombo ri le nyangweni! Ku pfumala ripfumelo—“vudyoho”—ku nga va kona etimbilwini ta hina, kutani hi nga hambukela ekule ni Xikwembu ematshan’weni yo tshinela ekusuhi na xona. (Yakobo 4:8) Pawulo u hi tsundzuxa ku ‘khongotelana masiku hinkwawo.’ Hi lava mpfuno wa ku hlangana ni vamakwerhu. “Munhu l’a tihlawulaka e ka v̌aṅwana o lav̌a ku tiṭakisa ntsena, wa hlunamela hikwaŝo le’ŝi nga ni fanelo.” (Swivuriso 18:1) Xilaveko xa ku va ni van’wana xi susumetela Vakreste namuntlha leswaku va va kona nkarhi na nkarhi eminhlanganweni ya vandlha, etinhlengeletanweni ni le mintsombanweni.
11, 12. Ha yini hi nga fanelanga hi enerisiwa hi ku tiva tidyondzo ta masungulo ntsena ta Vukreste?
11 Endzhakunyana loko a tsala papila ra yena, Pawulo u tlhela a nyika ndzayo leyi ya nkoka: “Hambileswi sweswi a mi fanele ku va vadyondzisi, ma ha lava ku dyondzisiwa nakambe tidyondzo to sungula ta Rito ra Xikwembu, hi munhu un’wana. Ma ha lava ntswamba, ku nga ri swakudya leswi tiyeke. . . . Swakudya leswi tiyeke i swa lava kuleke, i swa lava miehleketo ya vona yi vupfeke, lava toloveleke ku hlawula leswinene eka leswo biha.” (Vaheveru 5:12-14) Swi le rivaleni leswaku Vakreste van’wana va Vayuda va tsandzekile ku antswisa matwisiselo ya vona. A va nonoka eku amukeleni ka ku voningeriwa loku engetelekeke malunghana ni Nawu ni ku yimba. (Mintirho 15:27-29; Vagalatiya 2:11-14; 6:12, 13) Van’wana kumbexana va ye emahlweni va xixima mikhuva ya xintu yo tanihi Savata ya vhiki na vhiki ni ku hlayisa Siku ro Phahlelana Mariyeta lembe rin’wana ni rin’wana.—Vakolosa 2:16, 17; Vaheveru 9:1-14.
12 Hikwalaho, Pawulo u ri: “A hi tshikeni ku yima eka tidyondzo leto sungula ta vukriste, kutani hi kongoma eku hetisekeni.” (Vaheveru 6:1) Xitsutsumi xa maratoni lexi khathalaka swinene hi swakudya swa xona xi swi kota ku antswa ku tiyisela mphikizano wa mpfhuka wo leha, lowu karharisaka. Hi ku fanana, Mukreste loyi a khathalaka swinene hi swakudya swa moya—la nga tshamiki ‘etidyondzweni ta masungulo’ ntsena—u ta swi kota ku antswa ku ya emahlweni ni mphikizano, a kondza a fika eku heleni ka wona. (Ringanisa 2 Timotiya 4:7.) Leswi swi vula ku tsakela “ku anama, ni ku leha, ni ku tlakuka, ni ku enta” ka ntiyiso, xisweswo u kula u va munhu la vupfeke.—Vaefesa 3:18.
“Swa Fanela Leswaku Mi Tiyisela”
13. Vakreste va Vaheveru va ri kombise njhani ripfumelo ra vona eminkarhini ya khale?
13 Endzhakunyana ka Pentekosta ya 33 C.E., Vakreste va Vayuda va yime va tiyile hambileswi a va langutane ni nkaneto lowukulu. (Mintirho 8:1) Kumbexana Pawulo a a anakanya ha swona loko a tsala a ku: “Anakanyani masiku lama hundzeke lawa, kungateloko mi voningiwile, mi nga tiyisela eku lweni lokukulu ni le ku vavisekeni.” (Vaheveru 10:32) Ku tiyisela koloko ko tshembeka a ku kombisa rirhandzu leri a va ri na rona eka Xikwembu, naswona ku endle leswaku va vulavula hi ku ntshunxeka emahlweni ka xona. (1 Yohane 4:17) Pawulo u va khongotela leswaku va nga tshiki ku vulavula hi ku ntshunxeka hikwalaho ka ku pfumala ripfumelo. Wa va khutaza a ku: “Swa fanela leswaku mi tiyisela, leswaku mi ta kota ku endla ku rhandza ka Xikwembu, mi ta amukela leswi xi nga mi tshembisa swona. Hikuva, hilaha Matsalwa ma vulaka hakona, ‘Ka ha sele nkarhinyana ntsena, kutani loyi a taka ú ta fika, a nga ka a nga hlweli.’”—Vaheveru 10:35-37.
14. I timhaka tihi leti faneleke ti hi pfuna ku tiyisela niloko hi ri ni malembe yo tala hi ri karhi hi tirhela Yehovha?
14 Ku vuriwa yini hi hina namuntlha? Vo tala va hina a hi hiseka loko ha ha ku dyondza ntiyiso wa Vukreste. Xana ha ha hiseka hi ndlela yoleyo? Kumbe, xana hi ‘tshike rirhandzu leri a hi ri na rona eku sunguleni’? (Nhlavutelo 2:4) Xana hi horile, kumbexana hi helanyana matimba kumbe ku karhala ku rindzela Armagedoni? Kambe yima u anakanya. Ntiyiso wa ha ri wa nkoka ku fana ni le ku sunguleni. Yesu wa ha ri Hosi ya hina ya le tilweni. Ha ha ri ni ntshembo wo kuma vutomi lebyi nga heriki emisaveni ya paradeyisi, naswona ha ha ri na byona vuxaka na Yehovha. Naswona u nga tshuki u rivala: “Loyi a taka ú ta fika, a nga ka a nga hlweli.”
15. Ku fana na Yesu, Vakreste van’wana va tiyisele nxaniso lowukulu hi ndlela yihi?
15 Hikwalaho, marito ya Pawulo lama tsariweke eka Vaheveru 12:1, 2 (NW) ma fanerile swinene: “Nakambe a hi suseni ntiko wun’wana ni wun’wana ni xidyoho [ku pfumala ripfumelo] lexi hi phasaka hi ku olova, naswona a hi tsutsumeni hi ku tiyisela eka mphikizano lowu vekiweke emahlweni ka hina, loko hi ri karhi hi languta swinene-nene eka Murhangeri Lonkulu ni Muhetisekisi wa ripfumelo ra hina, Yesu. Hikwalaho ka ntsako lowu a wu vekiwe emahlweni ka yena u tiyisele mhandzi ya nxaniso, a tsan’wa tingana, kutani a tshama evokweni ra xinene ra xiluvelo xa Xikwembu.” Ku ni swilo swo tala leswi malandza ya Xikwembu ma swi tiyiseleke emasikwini lawa ya makumu. Ku fana na Yesu, loyi a a tshembekile ku kondza a fa rifu ra gome, vamakwerhu van’wana va tiyisele ku xanisiwa lokukulu hi ku tshembeka—ku pfaleriwa etikampeni ta makhotso, ku twisiwa ku vava, ku pfinyiwa, hambi ri ri rifu. (1 Petro 2:21) Xana timbilu ta hina a ti khapi hi rirhandzu ha vona loko hi xiya ku tshembeka ka vona?
16, 17. (a) Vakreste vo tala va lwisana ni mitlhontlho yihi ya ripfumelo ra vona? (b) Hi ta pfuneka leswaku hi hambeta hi tsutsuma emphikizanweni wo kuma vutomi loko hi tsundzuka yini?
16 Hambiswiritano, eka vo tala ku tirha marito ya Pawulo lama landzelaka: “Enyimpini ya n’wina ni vudyoho, a mi si lwa mi kala mi huma ngati.” (Vaheveru 12:4) Nilokoswiritano, eka mafambiselo lawa, ndlela ya ntiyiso a yi olovi eka hina hinkwerhu. Van’wana va hetiwa matimba hi ‘mavulavulelo yo kaneta ya vadyohi’ emintirhweni ya ku tihanyisa kumbe exikolweni, va tiyisela ku hlekuriwa kumbe va lwisana ni ku kuceteriwa ku endla xidyoho. (Vaheveru 12:3) Ndzingo lowukulu wu herise ku tiyimisela ka van’wana ku hlayisa misinya ya milawu leyi tlakukeke ya Xikwembu. (Vaheveru 13:4, 5) Vagwinehi va khumbe xiyimo lexinene xa moya xa vo talanyana lava yingisaka vuxisi bya vona lebyi nga ni chefu. (Vaheveru 13:9) Timholovo ti siye van’wana va ri hava ntsako. Ku kandziyisa ngopfu vuhungasi ni swiendlo swa ku tirivatisa ku tsanise Vakreste van’wana. Naswona vo tala va titwa va tshikileriwa hi swiphiqo swa ku hanya emafambiselweni lawa ya swilo.
17 I ntiyiso, ku hava ni xin’we eka swiyimo leswi lexi lavaka ‘ku lwa hi kala hi huma ngati.’ Naswona swiyimo swin’wana swi nga va swi fambisana ni swiboho leswi hoxeke leswi hi tiendleleke swona. Kambe hinkwaswo swi tlhontlha ripfumelo ra hina. Hikokwalaho hi faneleke hi langutisisa xikombiso xa Yesu lexi hlawulekeke xa ku tiyisela. Hi nga tshuki hi rivala leswaku ntshembo wa hina wu hlawuleke ku fikela kwihi. Hi nga tshuki hi rivala leswaku Yehovha ‘u hakela lava n’wi lavaka hi ku chivirika.’ (Vaheveru 11:6) Kutani hi ta kuma matimba ya moya lama nga ta hi pfuna ku ya emahlweni ni mphikizano wo kuma vutomi.
Hi Nga Swi Kota Ku Tiyisela
18, 19. I swiendlakalo swihi swa matimu leswi kombaka leswaku Vakreste va Vaheveru le Yerusalema va yingise xitsundzuxo xa Pawulo lexi huhuteriweke?
18 Xana Vakreste va Vayuda va angurise ku yini eka papila ra Pawulo? Malembe ya kwalomu ka tsevu endzhaku ka loko papila leri yaka eka Vaheveru ri tsariwile, Yudiya a ri ri enyimpini. Hi 66 C.E., vuthu ra Varhoma ri rhendzele Yerusalema, ri hetisisa marito ya Yesu lama nge: “Kutakuloko mi vona muti wa Yerusalema wu rhendzeriwile hi mavuthu ya valala, tivani leswaku ku hangalasiwa ka wona ku kusuhi.” (Luka 21:20) Hambiswiritano, leswaku a pfuna Vakreste lava a va ta va eYerusalema hi nkarhi wolowo, Yesu u te: “Hi nkarhi wolowo, lava nge Yudiya, a va tsutsumele etintshaveni; lava nga mutini, a va hume ka wona; kutani lava nge handle etikweni, va nga tshuki va nghena emutini.” (Luka 21:21) Kutani ku lwa na Rhoma ku tise ndzingo: Xana Vakreste volavo va Vayuda a va ta baleka eYerusalema, xivandla xa vugandzeri bya Vayuda ni ndhawu ya tempele yo vangama?
19 Swi nga languteriwanga, naswona hi xivangelo lexi nga tivekiki, Varhoma va tlhelele endzhaku. Kumbexana Vayuda va vukhongeri va swi langute tanihi xikombiso xa leswaku Xikwembu a xi sirhelela muti wa vona wo kwetsima. Ku vuriwa yini hi Vakreste? Matimu ma hi byela leswaku va balekile. Kutani, hi 70 C.E., Varhoma va vuyile ivi va lovisa Yerusalema hi ku helela, laha ku nga fa vanhu vo tala swinene. ‘Siku ra Yehovha’ leri vhumbhiweke hi Yuwele a ri wele Yerusalema. Kambe Vakreste lava tshembekaka a va nga ha ri kona kwalaho. Va ‘ponisiwile.’—Yuwele 2:30-32; Mintirho 2:16-21.
20. Ku tiva leswaku ‘siku ra Yehovha’ lerikulu ri tshinele swi fanele swi hi susumeta hi tindlela tihi?
20 Namuntlha, ha swi tiva leswaku ‘siku ra Yehovha’ rin’wana lerikulu ku nga ri khale ri ta wela mafambiselo lawa hinkwawo ya swilo. (Yuwele 3:12-14) A hi swi tivi leswaku siku rero ri ta fika rini. Kambe Rito ra Xikwembu ra hi tiyisekisa leswaku ri ta ta hakunene! Yehovha u vula leswaku a ri nge hlweli. (Habakuku 2:3; 2 Petro 3:9, 10) Hikwalaho, a hi “[hlayiseni] swinene timhaka leti hi ti tweke.” Papalata ku lahlekeriwa hi ripfumelo, “xidyoho lexi hi phasaka hi ku olova.” Tiyimisele ku tiyisela ku ya fika emakumu. Tsundzuka, nhlengeletano leyikulu ya le tilweni ya Yehovha leyi fanaka ni kalichi yi ya emahlweni. Yi ta hetisisa xikongomelo xa yona. Kutani onge hinkwerhu hi nga hambeta hi tsutsuma, hi nga heli matimba emphikizanweni wo kuma vutomi!
Wa Tsundzuka Xana?
◻ I ku yingisa xikhongotelo xihi lexi Pawulo a xi byeleke Vafilipiya leswi nga ta hi pfuna ku tiyisela emphikizanweni wo kuma vutomi?
◻ I yini lexi nga ta hi pfuna ku lwisana ni mboyamelo wa misava leyi wo hi kavanyeta?
◻ Hi nga pfunana njhani leswaku hi tiyisela emphikizanweni?
◻ Hi swihi swilo swin’wana leswi nga endlaka leswaku Mukreste a hunguta rivilo?
◻ Xikombiso xa Yesu xi nga hi pfuna njhani leswaku hi tiyisela?
[Xifaniso lexi nga eka tluka 9]
Ku fana ni switsutsumi, Vakreste a va fanelanga va pfumelela nchumu xi va kavanyeta
[Xifaniso lexi nga eka tluka 10]
A ku na nchumu lexi nga sivelaka kalichi leyikulu ya le tilweni ya Yehovha ku hetisisa xikongomelo xa Xikwembu