U Nga Swi Kota Ku Tiyisela Ku Ya Fika Emakumu

“A hi tsutsumeni hi ku tiyisela eka mphikizano lowu vekiweke emahlweni ka hina.”—VAHEVERU 12:1.

1, 2. Ku tiyisela swi vula yini?

“KU LAVEKA leswaku mi tiyisela,” marito lawa ma vuriwe hi muapostola Pawulo loko a tsalela Vakreste va Vaheveru va lembe-xidzana ro sungula. (Vaheveru 10:36) Loko a kandziyisa mfanelo leyi ya nkoka, muapostola Petro na yena u khutaze Vakreste a ku: “Eripfumelweni ra n’wina engetelani . . . ku tiyisela.” (2 Petro 1:5, 6) Kambe, kahle-kahle ku tiyisela swi vula yini?

² Dikixinari leyi hlamuselaka marito ya Xigriki hi Xinghezi yi vula leswaku riendli ra Xigriki leri nge “ku tiyisela” ri vula “ku yima ematshan’weni yo baleka . . . u tserhama, u nga tsekatseki.” Malunghana ni riviti ra Xigriki leri vulaka “ku tiyisela,” buku yin’wana yi ri: “I moya wa ku tiyiselela swilo, handle ko lan’wa, kambe hi ntshembo lowukulu . . . I mfanelo leyi endlaka munhu a yima a tiyile loko a langutane ni moya lowu hungaka. I nchumu lowu nga endlaka ndzingo wo tika wu hundzuka ku khana hikuva loko wu hundzile munhu u ta kuma lexi a xi lavaka.” Kutani ke, ku tiyisela ku endla leswaku munhu a yima a tiyile hambi loko a langutane ni swihinga ni maxangu naswona a nga heleriwi hi ntshembo. I vamani lava ngopfu-ngopfu va faneleke va va ni mfanelo leyi?

3, 4. (a) I vamani lava faneleke va tiyisela? (b) Hikwalaho ka yini hi fanele hi tiyisela ku fikela emakumu?

³ Hi ndlela yo fanekisela, hi nga vula leswaku Vakreste hinkwavo va le mphikizanweni wo tsutsuma lowu lavaka ku tiyisela. Kwalomu ka lembe ra 65 C.E., muapostola Pawulo u tsalele Timotiya mutirhi-kulobye tlhelo munghana wakwe la tshembekaka la famba-fambaka na yena, marito lawa lama tiyisaka nhlana: “Ndzi lwe nyimpi leyinene, ndzi tsutsume pfhumba ndzi kondza ndzi heta, ndzi hlayise ripfumelo.” (2 Timotiya 4:7) Hi xiga lexi nge “ndzi tsutsume pfhumba ndzi kondza ndzi heta,” Pawulo a a pimanisa vutomi byakwe tanihi Mukreste, ni mphikizano wo tsutsuma lowu nga ni mpfhuka lowu vekiweke swin’we ni laha wu helelaka kona. Hi nkarhi wolowo Pawulo se a a ri ekusuhi ni ku heta mpfhuka lowu a vekeriweke wona, naswona a a rindzele ku kuma hakelo ya yena hi ku tiyiseka. Kutani u ye emahlweni a ku: “Ku sukela hi nkarhi lowu ku ya emahlweni ndzi vekeriwe harhi ya ku lulama, leyi Hosi, muavanyisi wo lulama, a nga ta ndzi nyika yona yi va hakelo hi siku ra kona.” (2 Timotiya 4:8) Pawulo a a tiyiseka leswaku u ta yi kuma hakelo hi leswi a tiyiseleke ku fikela emakumu. Ku vuriwa yini hi hina van’wanyana?

⁴ Leswaku a khutaza lava va ngheneleke mphikizano lowu, Pawulo u tsarile a ku: “A hi tsutsumeni hi ku tiyisela eka mphikizano lowu vekiweke emahlweni ka hina.” (Vaheveru 12:1) Tanihi Vakreste, hi nghenela mphikizano lowu wu lavaka ku tiyisela loko hi tinyiketela eka Yehovha Xikwembu ha Yesu Kreste. Ku yi sungula kahle ndlela ya ku va mudyondzisiwa i swa nkoka, kambe xa nkoka swinene i ku heta mpfhuka lowu hi vekeriweke wona. Yesu u te: “Kambe loyi a tiyiseleke ku fika emakumu hi yena la nga ta ponisiwa.” (Matewu 24:13) Hakelo leyi nga ta kumiwa hi lava va hetaka mpfhuka lowu i vutomi lebyi nga heriki! Xisweswo, leswi na hina hi nga ni pakani, hi fanele hi tiyisela ku fikela emakumu. I yini lexi nga ta hi pfuna leswaku hi fikelela pakani yoleyo?

Ku Tiwundla Hi Ndlela Leyi Faneleke—I Swa Nkoka

5, 6. (a) Leswaku hi kota ku tiyisela emphikizanweni wo kuma vutomi, xana hi fanele hi nyikela nyingiso eka yini? (b) Hi wahi malunghiselelo ya moya lawa hi faneleke hi ma tirhisa naswona hikwalaho ka yini?

⁵ Ekusuhi ni muti wa Korinto, le Grikiya, a ku ri ni ndhawu leyi khale a ku khomeriwa ka yona Mintlango ya Isthmus. Handle ko kanakana Pawulo a a swi tiva leswaku vamakwerhu va le Korinto a a va tolovelane na yona mimphikizano ya ku tsutsuma swin’we ni mimphikizano yin’wana leyi a yi endliwa kwalaho. Hi ku tiva sweswo, u va tsundzuxe hi mphikizano wa vutomi lowu va wu ngheneleke: “Xana a mi swi tivi leswaku lava tsutsumaka emphikizanweni va tsutsuma hinkwavo, kambe i un’we ntsena loyi a amukelaka hakelo? Tsutsumani hi ndlela leyi nga ta endla leswaku mi yi kuma.” Pawulo u kandziyise ntikelo wa ku tiyisela emphikizanweni ni ku tsutsuma ku kondza u fika emakumu. Kambe xana i yini lexi a xi ta va pfuna leswaku va endla tano? U engeterile a ku: “Mani na mani loyi a hlanganyelaka emphikizanweni wa tikhoma eka swilo hinkwaswo.” Ina, vanhu lava nghenelaka mphikizano emintlangweni ya khale a va tilunghiselela swinene, va xiya swilo leswi va swi dyaka ni leswi va swi nwaka naswona a va hlela swilo swa vona kahle leswaku va ta hlula.—1 Vakorinto 9:24, 25.

⁶ Ku vuriwa yini hi mphikizano lowu Vakreste va wu ngheneleke? Nkulu un’wana wa vandlha ra Timbhoni ta Yehovha u ri: “U fanele u xiya leswaku u wundleka kahle hi tlhelo ra moya loko u ta swi kota ku tiyisela emphikizanweni wo kuma vutomi.” Xiya swakudya swa moya leswi Yehovha, “Xikwembu lexi nyikaka ku tiyisela,” a hi nyikaka swona. (Varhoma 15:5) Xihlovo-nkulu xa swakudya swa hina swa moya i Rito ra yena, Bibele. Loko swi ri tano, xana a hi fanelanga hi va ni xiyimiso lexinene xo hlaya Bibele? Hi ku tirhisa “hlonga ro tshembeka ni ro tlhariha,” Yehovha u tlhele a hi lunghiselela timagazini leti pfunaka, ku nga Xihondzo xo Rindza ni Xalamuka! swin’we ni tibuku tin’wana leti sekeriweke eBibeleni. (Matewu 24:45) Loko ho hisekela ku ti hlaya ti ta hi tiyisa hi tlhelo ra moya. Ina, hi fanele hi tinyika nkarhi—‘hi xava nkarhi lowunene’—wa leswaku hi va ni dyondzo ya munhu hi xiyexe.—Vaefesa 5:16.

7. (a) Hikwalaho ka yini hi nga fanelanga hi enerisiwa ntsena hi ku tiva tidyondzo ta xisekelo ta Vukreste? (b) Hi nga ‘chivirikela eku wupfeni’ hi ndlela yihi?

⁷ Leswaku hi tshama hi ri vadyondzisiwa lava nga Vakreste, hi fanele hi tiva “dyondzo ya masungulo” hi tlhela “hi chivirikel[a] eku wupfeni.” (Vaheveru 6:1) Kutani ke, hi fanele hi navela ku tiva “ku anama ni ku leha ni ku tlakuka ni ku enta” ka ntiyiso naswona hi dya “swakudya leswi tiyeke [leswi swi nga] swa vanhu lava wupfeke.” (Vaefesa 3:18; Vaheveru 5:12-14) Hi xikombiso, anakanya hi marungula lama tshembekaka ya mune ya vutomi bya Yesu loko a ha ri emisaveni—Evhangeli ya Matewu, ya Marka, ya Luka ni ya Yohane. Loko ho ti kambisisa kahle Tievhangeli leti, hi ta tiva mintirho leyi Yesu a yi endleke ni leswaku a a ri munhu wa muxaka muni hi tlhela hi vona ndlela yo anakanya leyi n’wi susumeteleke ku endla mintirho leyi. Hi ndlela yoleyo hi ta swi kota ku va ni “mianakanyo ya Kreste.”—1 Vakorinto 2:16.

8. Xana minhlangano ya Vukreste yi hi pfuna njhani leswaku hi tiyisela emphikizanweni wo kuma vutomi?

⁸ Pawulo u tsundzuxe vapfumeri-kulobye a ku: “Naswona a hi khathalelaneni leswaku hi khutazana erirhandzwini ni le mintirhweni leyinene, hi nga fularheli ku hlengeletana ka hina, hilaha ku nga ntolovelo wa van’wana, kambe hi khutazana, naswona hi endla tano hilaha ku engetelekeke ngopfu tanihi leswi mi vonaka siku ri tshinela.” (Vaheveru 10:24, 25) Minhlangano ya Vukreste i xikhutazo lexikulu swinene eka hina! Naswona swa phyuphyisa ku va exikarhi ka vamakwerhu lava va hi rhandzaka ni lava va tiyimiseleke ku hi pfuna leswaku hi tiyisela ku fikela emakumu! A hi fanelanga hi ri tekela ehansi lunghiselelo leri ra rirhandzu leri humaka eka Yehovha. A hi veni “lava kuleke hi ku helela ematimbeni ya ku twisisa,” hi ku hisekela ku va ni dyondzo ya munhu hi xiyexe ni ku va kona eminhlanganweni nkarhi na nkarhi.—1 Vakorinto 14:20.

Vahlaleri Lava Ku Nyikaka Matimba

9, 10. (a) Xana vahlaleri va nga va xikhutazo hi ndlela yihi emphikizanweni lowu lavaka ku tiyisela? (b) Xana ‘papa lerikulu ra timbhoni leri hi rhendzeleke,’ leri ku vulavuriwaka ha rona eka Vaheveru 12:1, i yini?

⁹ Kambe, ku nga khathariseki leswaku xitsutsumi xi tilunghiselele kahle ku fikela kwihi, ku nga ha humelela swilo leswi nga xi hetaka matimba. Pawulo u vutisile a ku: “A mi tsutsuma kahle. I mani loyi a mi siveleke ku hambeta mi yingisa ntiyiso?” (Vagalatiya 5:7) Swi le rivaleni leswaku Vakreste van’wana va le Galatiya a va tolovelane ni vanhu vo biha, hikwalaho va hambukisiwa eka mphikizano wa vona wo kuma vutomi. Hi hala tlhelo, nseketelo ni xikhutazo xo huma eka van’wana swi nga endla leswaku swi olova ku tiyiselela mpfhuka. Leswi swi fana kahle ni nsusumeto lowu vahlaleri va mphikizano va nga vaka na wona eka lava tsutsumaka. Ntshungu lowu hisekaka wu nga endla leswaku lava tsutsumaka va hiseka ku sukela eku sunguleni ka mphikizano ku ya eku heleni ka wona. Ku huwelela ka vahlaleri, loku hakanyingi ku fambisanaka ni vuyimbeleri lebyi nga ni pongo ni ku phokoteriwa ka mavoko, swi nga khutaza lava tsutsumaka leswaku va ya emahlweni va tsutsuma loko va tshinelela ku hela ka mphikizano. Ina, vahlaleri lava seketelaka va nga va ni nsusumeto lowunene eka lava tsutsumaka.

¹⁰ Eka mphikizano wo tsutsumela ku kuma vutomi lowu Vakreste va wu ngheneleke, xana vahlaleri i vamani? Endzhaku ko xaxameta timbhoni ta Yehovha ta le mahlweni ka Vukreste, hilaha ti xaxametiweke hakona eka Vaheveru ndzima 11, Pawulo u tsarile a ku: “Hikwalaho, leswi hi nga ni papa lerikulu swinene ra timbhoni leri hi rhendzeleke, . . . a hi tsutsumeni hi ku tiyisela eka mphikizano lowu vekiweke emahlweni ka hina.” (Vaheveru 12:1) Loko a tirhisa xigego lexi nge papa, Pawulo a nga tirhisanga rona rito ra Xigriki leri hlamuselaka papa rinene leri nga ni mpimo kumbe xivumbeko xo karhi. Kambe u tirhise rito leri “ri vulaka nchumu lowukulu lowu fanaka ni papa lerikulu, lowu nga hava xivumbeko, lowu funengeteke matilo hinkwawo,” hi ku ya hi mutsari wa tidikixinari W. E. Vine. Swi le rivaleni leswaku Pawulo a a vulavula hi ntshungu lowukulu wa timbhoni—leti teleke swinene lerova a ti fana ni papa lerikulu.

11, 12. (a) Xana timbhoni to tshembeka ta le mahlweni ka Vukreste ti nga hi nyika matimba njhani, hi ndlela yo fanekisela, leswaku hi tiyisela emphikizanweni? (b) Xana hi nga vuyeriwa swinene eka ‘papa lerikulu ra timbhoni’ hi ndlela yihi?

¹¹ Xana swi nga endleka leswaku timbhoni to tshembeka ta le mahlweni ka Vukreste, ti va vahlaleri va xiviri namuntlha? Doo! Hinkwato ti file, naswona ti rindzele ku pfuxiwa ka vafi. Hambiswiritano, tona a ti ri switsutsumi leswi humelelaka loko ta ha hanya, naswona xikombiso xa tona lexinene xi tsariwile, xi kona eBibeleni. Loko hi ri karhi hi hlaya Matsalwa, vanhu lava vo tshembeka va nga sungula ku hanya emianakanyweni ya hina naswona va nga hi khutaza, hi ndlela yo fanekisela, leswaku hi tsutsuma mpfhuka ku ya fika emakumu.—Varhoma 15:4.a

¹² Hi xikombiso, loko hi ringiwa hi swilo swa misava, xana ku kambisisa ndlela leyi Muxe a aleke rifuwo ra le Egipta ha yona, a swi nge hi pfuni leswaku hi ya emahlweni hi tshama endleleni leyi? Loko ndzingo lowu hi langutaneke na wona wu vonaka wu ri wukulu, hi nga khutazeka hakunene leswaku hi ya emahlweni hi tsutsuma, loko ho tsundzuka ndzingo wo tika lowu Abrahama a langutaneke na wona loko a komberiwe ku endla gandzelo hi n’wana wakwe Isaka. Leswaku ‘papa leri lerikulu’ ra timbhoni ri hi khutaza ku fikela kwihi, swi titshege hi ndlela leyi hi ti vonaka kahle ha yona hi mahlo ya mianakanyo.

13. Xana Timbhoni ta Yehovha ta manguva lawa ti hi nyika matimba hi ndlela yihi eka mphikizano wo kuma vutomi?

¹³ Nakambe hi rhendzeriwe hi Timbhoni to tala ta Yehovha ta manguva lawa. Mawaku xikombiso lexinene swonghasi xa ripfumelo lexi vekiweke hi Vakreste lava totiweke swin’we ni vavanuna ni vavasati lava vumbaka “ntshungu lowukulu”! (Nhlavutelo 7:9) Hi nga hlaya matimu ya vona nkarhi na nkarhi eka magazini lowu ni le ka tibuku tin’wana ta Watch Tower.b Loko hi kambisisa ripfumelo ra vona, ha khutazeka leswaku hi tiyisela ku ya fika emakumu. Naswona a hi ku tsakisa ka swona ku kuma nseketelo wo huma eka vanghana lavakulu ni maxaka lawa ma tirhelaka Yehovha hi ku tshembeka! Ina, hi ni vanhu vo tala lava nga hi nyikaka matimba eka mphikizano lowu wo kuma vutomi.

Tsutsuma Hi Rivilo Lerinene

14, 15. (a) Hikwalaho ka yini swi ri swa nkoka ku tivekela rivilo lerinene? (b) Hikwalaho ka yini hi fanele hi ringanisela loko hi veka tipakani?

¹⁴ Loko munhu a tsutsuma mpfhuka wo leha, wo tanihi wa maratoni, u fanele a tsutsuma hi rivilo lerinene. Magazini lowu nge New York Runner wu ri: “Ku tsutsuma hi rivilo lerikulu swi nga ku endla u hluleka. Swi nga ha ku endla u koka ku tika eka tikhilomitara to hetelela kumbe swi ku endla u tshika ku tsutsuma.” Xitsutsumi xin’wana xa maratoni xi ri: “Xivulavuri lexi a xi hi dyondzisa loko ndza ha lunghiselela ku nghenela mphikizano, xi tsundzuxile xi ku: ‘U nga hlongorisi switsutsumi leswi tsutsumaka hi rivilo lerikulu. Tsutsuma hi mpimo lowu ku ringaneke. Loko swi nga ri tano u ta karhala, u tshika ku tsutsuma.’ Ku yingisa xitsundzuxo lexi swi ndzi pfunile leswaku ndzi heta mpfhuka lowu vekiweke.”

¹⁵ Eka mphikizano wo kuma vutomi, malandza ya Xikwembu ma fanele ma tikarhata swinene. (Luka 13:24) Hambiswiritano, mudyondzisiwa Yakobo u tsarile a ku: “Vutlhari lebyi humaka ehenhla . . . [bya] anakanyela.” (Yakobo 3:17) Hambiloko xikombiso lexinene xa van’wana xi nga hi khutazaka leswaku hi endla leswi engetelekeke, ku tianakanyela swi nga hi endla leswaku hi tivekela tipakani letinene leti pfumelelanaka ni vuswikoti ni swiyimo swa hina. Matsalwa ma hi tsundzuxa: “Un’wana ni un’wana a a kombise leswi ntirho wa yena wu nga swona, kutani u ta va ni xivangelo xo khana malunghana na yena hi yexe, naswona ku nga ri hi ku tiringanisa ni munhu un’wana. Hikuva un’wana ni un’wana u ta rhwala ndzhwalo wakwe.”—Vagalatiya 6:4, 5.

16. Xana ku titsongahata ku hi pfuna njhani leswaku hi tivekela rivilo lerinene?

¹⁶ Eka Mikiya 6:8 (NW), hi vutisiwa xivutiso lexi, lexi tlhontlhaka mianakanyo: “Xana Yehovha u kombela leswaku u n’wi tlherisela yini, loko ku nga ri ku . . . titsongahata loko u famba ni Xikwembu xa wena?” Ku titsongahata swi katsa ku tiva leswi swi hi tsandzaka ku swi endla. Xana vuvabyi kumbe ku dyuhala swi endla leswaku hi tsandzeka ku endla leswi engetelekeke entirhweni wa Xikwembu? Hi nga heli matimba. Yehovha u amukela matshalatshala ni magandzelo ya hina ‘hi ku ya hi leswi hi nga na swona, ku nga ri hi leswi hi nga riki na swona.’—2 Vakorinto 8:12; ringanisa Luka 21:1-4.

Tshama U Langute Hakelo

17, 18. I yini lexi pfuneke Yesu leswaku a tiyiselela mhandzi ya nxaniso?

¹⁷ Loko a kombetela eka xilaveko xa leswaku Vakreste va le Korinto va fanele va tiyisela emphikizanweni wo kuma vutomi, Pawulo u boxe yinhla yin’wana malunghana ni Mintlango ya Isthmus leyi a va fanele va anakanya hi yona. Malunghana ni lava nghenelaka mphikizano lowu, Pawulo u tsarile a ku: “Ina, va [tsutsumela] ku kuma harhi leyi onhakaka, kambe hina hi [tsutsumela] ku kuma leyi nga onhakiki. Hikokwalaho, ndlela leyi ndzi tsutsumaka ha yona a yi kanakanisi; swibakela swa mina ndzi swi kongomisa hi ndlela leyi nga ta endla leswaku ndzi nga bi moya.” (1 Vakorinto 9:25, 26) Muhluri eka mintlango leyi ya khale a a kuma harhi, leyi endliweke hi matluka ya murhi wa muphayini kumbe swimilana swin’wana, kumbe hi matluka ya ximilana xo fana ni kheroti—ku nga “harhi leyi onhakaka” hakunene. Kambe i yini lexi nga ta kumiwa hi Vakreste lava tiyiselaka ku fikela emakumu?

¹⁸ Loko a vulavula hi Yesu Kreste, Xikombiso xa hina lexinene, muapostola Pawulo u tsarile a ku: “Hikwalaho ka ntsako lowu a wu vekiwe emahlweni ka yena u tiyisele mhandzi ya nxaniso, a tsan’wa tingana, kutani a tshama evokweni ra xinene ra xiluvelo xa Xikwembu.” (Vaheveru 12:2) Yesu u tiyiserile ku fikela eku feni, hi ku tshama a langute hakelo yakwe, leyi katsaka ntsako lowu a nga na wona hi ku va ni xandla eku kwetsimiseni ka vito ra Yehovha, hi ku kutsula vanhu eku feni ni hi ku fuma tanihi Hosi ni Muprista Lonkulu, loko a ri karhi a nyika vanhu lava titsongahataka vutomi lebyi nga heriki eparadeyisini emisaveni.—Matewu 6:9, 10; 20:28; Vaheveru 7:23-26.

19. Xana hi fanele hi anakanya ha yini loko hi ri karhi hi lwela ku tshama hi ri vadyondzisiwa lava nga Vakreste?

¹⁹ Vona ntsako lowu hi vekeriweke wona loko hi ri karhi hi lwela ku tshama hi ri vadyondzisiwa lava nga Vakreste. Yehovha u hi nyike ntirho lowu enerisaka swinene wa ku chumayela mahungu lamanene ya Mfumo wa Xikwembu ni wa ku nyika vanhu van’wana vutivi bya Bibele lebyi ponisaka vutomi. (Matewu 28:19, 20) A hi ku tsakisa ka swona ku kuma munhu loyi a tsakelaka ku tiva Xikwembu xa ntiyiso ni ku n’wi pfuna leswaku a nghenela mphikizano wo kuma vutomi! Naswona ku nga khathariseki leswaku vanhu lava hi va chumayelaka va angula njhani, i lunghelo ku va ni xandla entirhweni lowu fambisanaka ni ku kwetsimisiwa ka vito ra Yehovha. Loko hi ya emahlweni ni ntirho lowu, ku nga khathariseki ku nga tsakeli kumbe nkaneto wa lava nga ensin’wini ya hina, hi kuma ntsako tanihi leswi hi endlaka mbilu ya Yehovha yi tsaka. (Swivuriso 27:11) Naswona hakelo leyikulu leyi a hi tshembisaka yona i vutomi lebyi nga heriki. Vona ndlela leyi leswi swi nga ta tsakisa ha yona! Hi fanele hi tshama hi ri karhi hi anakanya hi mikateko leyi naswona hi hambeta hi tsutsuma.

Tanihi Leswi Makumu Ma Tshinelaka

20. Xana mphikizano wo kuma vutomi wu nga ya wu tika swinene hi ndlela yihi loko wu tshinela emakumu?

²⁰ Eka mphikizano lowu wo kuma vutomi, hi boheka ku lwisana ni nala wa hina lonkulu, Sathana Diyavulosi. Leswi hi tshinelelaka makumu, minkarhi hinkwayo u lava ku hi phija kumbe a hi heta matimba. (Nhlavutelo 12:12, 17) Naswona a swi olovi ku ya emahlweni hi va vahuweleri va Mfumo lava tshembekaka, lava tinyiketeleke tanihi leswi hi langutanaka ni tinyimpi, tindlala, mavabyi ni swiphiqo leswin’wana hinkwaswo leswi funghaka ‘nkarhi wa makumu.’ (Daniyele 12:4; Matewu 24:3-14; Luka 21:11; 2 Timotiya 3:1-5) Ku tlula kwalaho, minkarhi yin’wana makumu ma nga ha vonaka ma ri kule swinene ku tlula ndlela leyi a hi anakanye ha yona, ngopfu-ngopfu loko se hi ri ni nkarhi wo leha hi ri emphikizanweni lowu. Kambe, Rito ra Xikwembu ra hi tiyisekisa leswaku makumu ma ta fika. Yehovha u ri a ma nge hlweli. Makumu ma le kusuhi.—Habakuku 2:3; 2 Petro 3:9, 10.

21. (a) I yini lexi nga ta hi tiyisa loko hi ri karhi hi ya emahlweni ni mphikizano wo kuma vutomi? (b) Xana hi fanele hi tiyimisela ku endla yini tanihi leswi makumu ma tshinelaka?

²¹ Kutani ke, leswaku hi humelela emphikizanweni wo kuma vutomi, hi fanele hi titiyisa hi leswi Yehovha a hi lunghiseleleke swona leswaku hi wundleka hi tlhelo ra moya. Nakambe hi fanele hi kuma xikhutazo hi ku hamba hi hlengeletana swin’we ni vapfumeri-kulorhi, lava na vona va nga eka mphikizano lowu. Hambiloko nxaniso wa matimba kumbe swiendlakalo leswi nga rindzeriwangiki swo tshuka swi endla mphikizano wa hina wu tika swinene, hi nga swi kota ku tiyisela ku fikela emakumu hikuva Yehovha u hi nyika “matimba lama tlulaka lama tolovelekeke.” (2 Vakorinto 4:7) Swa khutaza swinene ku tiva leswaku Yehovha u lava hi hlula eka mphikizano lowu! Kutani ke, “a hi tsutsumeni hi ku tiyisela eka mphikizano lowu vekiweke emahlweni ka hina,” hi tiyiseka swinene leswaku “hi nguva leyi faneleke hi ta tshovela loko hi nga karhali.”—Vaheveru 12:1; Vagalatiya 6:9.

[Tinhlamuselo ta le hansi]

Wa Tsundzuka Xana?

◻ Hikwalaho ka yini hi fanele hi tiyisela ku ya fika emakumu?

◻ Hi wahi malunghiselelo ya Yehovha lawa hi nga fanelangiki hi ma honisa?

◻ Hikwalaho ka yini swi ri swa nkoka ku tivekela rivilo lerinene?

◻ Hi wihi ntsako lowu hi nga ta wu kuma loko hi hambeta hi tsutsuma?

[Xifaniso lexi nga eka tluka 18]

Kuma xikhutazo eminhlanganweni ya Vukreste