Ku Hangalasiwa Ka Mahungu Lamanene Ka Misava Hinkwayo
MFUMO wa Xikwembu wa fuma! Lawa i mahungu lamanene ngopfu. Hi yona mhaka leyi ha yona hi 1989 ku tlula 3 700 000 wa Timbhoni ta Yehova emisaveni hinkwayo hi ku chivirika ti huweleleke ‘mahungu lamanene’ lama vhumbiweke hi Yesu ni ‘mahungu lama tsakisaka’ lama twarisiweke hi ntsumi exivonweni xa Yohane. (Matewu 24:14; Nhlavutelo 14:6) Hi laha muapostola Pawulo a vuleke ha kona: “Ku dyondzisa ka vona ku twakele emisaveni hinkwayo, ni marito ya vona ma fikile emakun’wini ya misava.” (Varhoma 10:18) Naswona ku lava ku va vanhu va matiko ni va tinxaka ni tindzimi ni swivongo hinkwaswo va amukele rungula ra vona leri nge “Chavani Xikwembu, mi xi dzunisa” hi ku tsaka.—Nhlavutelo 14:7.
A Ka Ha Ri Na Ndzindza-khombo Wa Vutomi
Un’wana wo tano a ku ri wanuna wa le Nghilandi loyi a a hanya hi ku nga tiyiseki ka vutomi. Ken a a ri mutirhi eka ndzindza-khombo kutani loko a nghenile emutini wa van’wana va Timbhoni ta Yehova, va n’wi vutisile va ku: “Xana a wu ta swi tsakela ku hanya emisaveni leyi ndzindza-khombo wa vutomi a wu nga ta laveka?” Xana a va vula yini? Leswaku hi ku ya hi Bibele, ehansi ka Mfumo wa Xikwembu swilo swo tala leswi endlaka vutomi byi nga tiyiseki sweswi, ku katsa vuvabyi ni rifu, a swi nga ha vi kona.
Xana nchumu wo tano wa koteka? Ina, Xikwembu hi xoxe xi tshembisile. Hi xikombiso, Bibele yi ri: “Xikwembu hi xoxe xi ta va na vona [vanhu], xi va Xikwembu xa vona. Xi ta hlangula mihloti hinkwayo emahlweni ya vona, ni rifu a ri nga ha vi kona; hambi ya ri mahlomulo kumbe ku rila kumbe ku vaviseka a swi nga ha vi kona, hikuva leswo sungula swi hundzile.” (Nhlavutelo 21:3, 4) I yini lexi nga ta tisa ku cinca ko tano? I Mfumo wa Xikwembu. Hi ku ya hi Rito ra Xikwembu, lowu hi ku hatlisa wu ta “seletela ni ku herisa ku fuma kuloku [ka politiki ka manguva lawa] hikwako, kambe kona ku ta v̌a kona hi laha ku nga riki na makumu.”—Daniel 2:44.
Matsalwa yo tanihi lawa ma tivisiwe vanhu va madzana ya timiliyoni hi Timbhoni ta Yehova hi tsima ra tona ra ku chumayela ra misava hinkwayo. Vo tala, ku fana na Ken, va swi twisisile leswaku leswi a ko va ku navela ntsena. Vumbhoni byi tiyile. Switshembiso leswi swa Xikwembu swa tshembeka naswona swi ta hetiseka ku nga ri khale.
Mimpimanyeto Leyi Hambaneke
Lava va yingisaka Timbhoni ta Yehova loko ti ri karhi ti huwelela marito lama tsakisaka ya ntsumi va swi xiya leswaku ku chava Xikwembu ni ku xi dzunisa swi katsa leswi tlulaka ku pfumela eka switshembiso swa Bibele. Ku cinca langutelo ra vona hinkwaro naswona ku hunguta mahlomulo yo tala ya vutomi.
Rafael ni nsati wakwe va kume leswi swi ri ntiyiso. Va tshama eArgentina, kutani loko va tekanile malembe lama tlulaka 40 lama hundzeke, va swi endle pakani ya vona leyikulu evuton’wini ku tirha hi matimba leswaku va hlayisela vumundzuku lebyi sirhelelekeke. Hambi swi ri tano, malembe ya 21 endzhaku, leswi a va fanele ku swi kombisa eku tirheni ka vona hinkwako hi matimba a ku ri kaya lerintsongo leri ri lavaka ku lunghisiwa nkarhi na nkarhi. A va nga ha titwi va sirhelelekile ku fana ni loko va ha ku tekana.
Kutani va twe mahungu lamanene eka Timbhoni ta Yehova ivi va dyondza muxaka wo antswa wa rifuwo ni muxaka wo antswa wa ku sirheleleka. EDyondzweni ya yena ya le Ntshaveni, Yesu u vulavule hi leswi loko a te: “Mi nga tihlengeleteli xuma emisaveni, laha tinsumba ni ku kurha swi dyaka kona, ni laha makhamba ma tshovaka kona, ma yiva. Kambe tihlengeleteleni xuma etilweni, laha tinsumba ni ku kurha swi nga dyiki kona, ni laha makhamba ma nga tshoviki kona ma yiva.”—Matewu 6:19, 20.
Hambi loko Bibele yi nga hi dyondzisi leswaku hi va lava honisaka emhakeni ya rifuwo ra swilo leswi vonekaka, ya hi tsundzuxa leswaku hi nga veki ntshembo wa hina eka swilo swo tano. (Eklesiasta 7:12) Ematshan’weni ya sweswo, hi fanele hi tikarhatela ku kuma rifuwo ra moya hi ku hlaya Bibele, hi dyondza ku rhandza ka Xikwembu naswona hi rhangisa ku endla ku rhandza koloko evuton’wini bya hina. (Matewu 6:33) Rafael ni nsati wakwe va sungule ku nghenisa rifuwo leri ra moya naswona sweswi va titwa va fuwile hakunene, hayi hikwalaho ka xiyimo xa vona xa timali, kambe hikwalaho ka vuxaka bya vona ni Xikwembu. (Nhlavutelo 3:17, 18) Rungula ra Mfumo wa Xikwembu a ri ri mahungu lamanene ngopfu eka vona.
Vukati Lebyi Antswisiweke
Mahungu lamanene ya ni matimba ya xiviri yo hetisisa leswinene. Hi xikombiso, John la tshamaka eNghilandi, a a nga yi tsakeli Bibele, kambe nsati wa yena ni vana a va yi tsakela. Kutani va sungule ku va kona eminhlanganweni ya Timbhoni ta Yehova loko John a ye eku nweni ni vanghana va yena. Hikwalaho, u katsekile eka ku nwa lokukulu, ku dzaha ni ku tikhoma loko biha eku heteleleni. Eku heteleleni, u tshike nsati wakwe a ya tshama ni wansati un’wana.
Malunghiselelo yo dlaya vukati ma sungurile. Kambe John a a hlamarile loko nsati wakwe—la dyondzeke mahanyelo ya Vukriste eka dyondzo ya yena ya mahungu lamanene—a ha n’wi khoma kahle. John a a nga swi twisisi leswaku hikokwalaho ka yini. Loko ka ha sele mavhiki manharhu leswaku ku dlaya vukati ku hetiseka, mahanyelo ya Vukriste ya nsati wa John ma ve ni vuyelo. U kombise ku tisola ka xiviri hi ku tikhoma ka yena naswona malunghiselelo yo dlaya vukati ma herisiwile. Kutani John u tikambisisele mahungu lamanene hi yexe ivi a dyondza Bibele ni Timbhoni ta Yehova. Sweswi na yena i Mukriste, naswona u byela van’wana hi mahungu lamanene ya Mfumo kun’we ni nsati wa yena.
Emasikwini lawa ya ku hohloka ka mimpimanyeto ya mindyangu, vo tala va lava mpfuno lowu mahungu lamanene lama sekeriweke eBibeleni ma wu nyikaka. Un’wana wa Timbhoni ta Yehova ePeru a a tshame ekusuhi ni ndhuna-nkulu ya mavuthu eriendzweni ra xihaha-mpfhuka. Va sungule ku vulavula ivi ndhuna ya mavuthu yi sungula ku phofula swiphiqo swa yona swa ndyangu, ku katsa ni leswaku nsati wakwe a a godzomberiwa hi swidzidzirisi naswona a a ri ekusuhi no n’wi tshika leswaku a tekiwa hi jaha rin’wana. Hi vutlhari Mbhoni yi n’wi kombise leswaku Bibele yi nyikela xitsundzuxo lexinene, lexi tiyeke etimhakeni ta ndyangu ni leswaku yi n’wi pfunile yena hi yexe leswaku a tlhantlha swiphiqo swa yena swa ndyangu.—Vaefesa 5:21–6:4.
Ndhuna ya mavuthu yi nkhense Mbhoni leyi hikwalaho ka marito ya yona lama khongotelaka ivi yi endla xikhokhelo xa timagazini ta Xihondzo xo Rindza na Awake! leswaku yi ta kurisa vutivi bya yona bya mahungu lamanene. Kutani loko Mbhoni yi chika eka xihaha-mpfhuka, mpatswa lowuntshwa wu hatlisile leswaku wu ta fambisana na yona ivi wu kombela ku vulavula na yona. Va te: “A hi tshame emahlweni ka n’wina, kutani hi twa bulo ra n’wina ni nkulukumba luya. Na hina hi tsakela ku endla xikhokhelo xa timagazini leti.” Na vona a va lava ku tiva mahungu lamanene lama nga antswisaka vutomi.
Vutomi Lebyi Hundzuriweke
Ku tlula kwalaho, mahungu lamanene lama sekeriweke eBibeleni ma cinca vanhu. Hi laha muapostola Pawulo a vuleke ha kona: “Rito ra Xikwembu ra hanya ni ku tirha.” (Vaheveru 4:12) Leswi a swi ri tano hi jaha rin’wana eMakedoniya, eGreece. A a hlamarisiwile ku dyondza leswaku, hi ku ya hi Bibele, vito ra Xikwembu i Yehova. Kutani u kombele munghana wakwe leswaku a n’wi hlanganisa ni Timbhoni ta Yehova hi xihatla hi laha swi nga kotekaka ha kona. Ku burisana kumbirhi ku endliwile ni Timbhoni, kun’wana ni kun’wana ku lehe kwalomu ka tiawara ta mune. Kutani jaha leri ri sungule dyondzo ya Bibele ya nkarhi na nkarhi, laha eka yo sungula ri hlayeke ku ko ku ba awara ya mbirhi ni mixo!
Ku sukela eka dyondzo yoleyo yo sungula, jaha leri hi ku hatlisa a ri twananisa vutomi bya rona ni mimpimanyeto ya Bibele. U hlanganyele minhlangano ya ku gandzela ni Timbhoni ta Yehova ivi a sungula ku rhandza Muvumbi swinene. Kutani Yehova u n’wi katekisile. Eka vhiki ro sungula ra dyondzo ya yena ya Bibele u tseme misisi ya yena yo leha. Hi vhiki ra vumbirhi, u tshike ku ya etikhefini ni le ka ti-disco ku ya lava vanghana lava nyanyulaka. Hi vhiki ra vunharhu, u cukumete sigarete ya yena yo hetelela. Endzhaku ko dyondza tin’hweti timbirhi, u sungule ku hlanganyela ni Timbhoni ku byela van’wana mahungu lamanene ya Mfumo. Ina, a a tsakile leswi Timbhoni ta Yehova ti tiseke mahungu lamanene exiphen’wini xa ka vona xa misava.
Mahungu Lamanene eKhotsweni
Hambi ku ri tinsimbi ta le khotsweni a ti ma siveli mahungu lamanene. Le Spain jaha leri vitaniwaka José ri tirhela xigwevo xo leha ekhotsweni hikwalaho ka vukhamba byo hloma ni swiendlo swin’wana swa vugevenga. Hambi swi ri tano, Timbhoni ta Yehova ti swi kotile ku n’wi byela mahungu lamanene kutani rungula ra Bibele ri cinca langutelo ra yena hi ku helela. Yehova u n’wi ‘nyike matimba.’—Vafilipiya 4:13.
José u vula leswaku swi nga ha endleka a heta vutomi bya yena hinkwabyo eka mafambiselo lawa a ri ekhotsweni hikwalaho ka ku tikhoma ka yena ka nkarhi lowu hundzeke. Kambe u khuvuriwile naswona sweswi i Mukriste. Nsati wa yena wa n’wi seketela swinene naswona u ringeta ku kurisa n’wana wa vona lontsongo hi ndlela ya Vukriste. Enkarhini wa sweswi, José u avelana mahungu lamanene ni vakhotsiwa-kulobye, vanhu lava swi nonon’hwaka ku va fikelela eka lava nga le handle ka khotso. Sweswi mukhotsiwa-kulobye i Mukriste la khuvuriweke.
Leswi swo va swikombiso swi nga ri swingani swo kombisa mimbuyelo ya tsima ra ku chumayela ra misava hinkwayo ra Timbhoni ta Yehova. Hakunene, mahungu lamanene lama twarisiwaka hi tintsumi ma huweleriwa hi Timbhoni ta Yehova tanihi “[mahungu lama tsakisaka] eka lava akeke emisaveni, eka vanhu va matiko hinkwawo, ni va tinxaka hinkwato, ni va tindzimi hinkwato, ni va swivongo hinkwaswo.”
I mahungu yo antswa naswona hi wona ntshembo wu ri woxe wa vanhu. Hi ku khutaza leswaku u ma yingisa. Ku fana na Ken na John eNghilandi, Rafael ni nsati wakwe eArgentina, ku fana na José eSpain ni ku fana ni timiriyadi ta van’wana, hi hlanganyela ni ntsumi ku khutaza hinkwenu leswaku mi “[Chava] Xikwembu, mi xi dzunisa, hikuva nkarhi wa xona wa ku avanyisa wu fikile. N’wi gandzeleni, yena muendli wa tilo ni misava ni wa lwandle ni swihlovo swa mati.”—Nhlavutelo 14:7.