Mahungu Lamanene Eka Vanhu Hinkwavo!

“KUTANI ndzi vona ntsumi yin’wana yi ri karhi yi haha ehenhla mapapeni, yi ri ni Evhangeli leyi nga heriki, leswaku yi ta yi twarisa eka lava akeke emisaveni, eka vanhu va matiko hinkwawo, ni va tinxaka hinkwato, ni va tindzimi hinkwato, ni va swivongo hinkwaswo.” (Nhlavutelo 14:6) Hi marito wolawo, muapostola Yohane la dyuhaleke u hlamusele xivono xa yena xa vuprofeta lexi huhuteriweke, xivono lexi hetisekaka esikwini ra hina. Mawaku ntshunxeko wonghasi ku tiva leswaku ku ni mahungu lamanene eka nguva leyi ya vugevenga, nthyakiso, vutherorisi, nyimpi ni ku kanakanisa ka ikhonomi ka misava hinkwayo leswi tlakukaka! Kambe i mahungu lamanene ku fikela kwihi lerova ma lava ku twarisiwa hi ntsumi? I mahungu ya njhani lama nga vaka lamanene lerova ma faneriwa hi ku twarisiwa eka matiko ni tinxaka ni tindzimi ni swivongo hinkwaswo ke?

Hi nga hlamula sweswo loko ho tsundzuka hi xiendlakalo xin’wana laha ntsumi hi yoxe yi twariseke mahungu lamanene. Laha a ku ri loko lembe xidzana ro sungula B.C.E. ri ya emakun’wini ya rona, kwalomu ka dzana ra malembe Yohane a nga si vona xivono xa yena. Varisi a va ri emadyelweni ni mintlhambi ya vona ekusuhi na Betlehema kutani ntsumi yi humelela ku ta tivisa ku tswariwa ka Yesu, yi ku: “Mi nga chavi! Vonani, ndzi mi tivisa mahungu lamanene lama nga ta tsakisa tiko hinkwaro swinene; hileswaku namuntlha mi velekeriwile Mulondzovoti emutini wa Davhida; i Kriste, Hosi.”—Luka 2:10, 11.

Ku tswariwa ka Yesu a ku ri “mahungu lamanene [ya ntsako lowukulu]” hakunene. U ve Kriste ni Muponisi la tshembisiweke, loyi a nyikeleke vutomi bya yena lebyi hetisekeke bya vumunhu leswaku vapfumeri va timbilu letinene va ta hanya. Ku tlula kwalaho, a a ta va Hosi ya Mfumo wa Xikwembu, ‘Hosana ya ku Rhula,’ loyi ehansi ka ku fuma ka yena vululami ni ku rhula eku heteleleni ku nga ta ta eka vanhu. (Esaya 9:6; Luka 1:33) Hakunene, ku tswariwa ka yena a ku ri mahungu lamanene leswaku ma twarisiwa hi ntsumi!

Yesu I Hosi

Le ndzhaku hi lembe xidzana ro sungula, Yesu u hetisise swikongomelo swo tala swa Xikwembu ha yena, kambe a nga vekiwanga exiluvelweni tanihi Hosi ya Mfumo wa Xikwembu hi nkarhi wolowo. Hi laha magazini lowu hi ku phindha-phindha wu vuleke ha kona, sweswo a swi humelelanga ku kondza ku va 1914. Hi laha ku hetiseka ka vuprofeta ku kombisaka kahle ha kona, hi lembe rero Mfumo wa Xikwembu wu simekiwile ematilweni. (Nhlavutelo 12:10, 12) Hambi leswi a ku ri ni timhaka to biha hi 1914—ku tlhekeka ka Nyimpi yo Sungula ya Misava—ku tswariwa ka Mfumo wa Xikwembu a ku ri mahungu lamanene ngopfu. Hi yona mhaka leyi ha yona Yesu a profeteke hi siku ra hina a ku: “Evhangeli leyi ya Mfumo yi ta twarisiwa emisaveni hinkwayo, leswaku yi va vumbhoni eka vanhu va matiko hinkwawo.”—Matewu 24:14.

Xana vuprofeta bya Yesu byi hetisekile? Nhlamulo yi ri ina! Naswona xivono xa Yohane xa vuprofeta na xona xi hetisekile. I ntiyiso, a hi nge yi voni ntsumi leyi nga vonakiki leyi Yohane a yi voneke. Kambe Timbhoni ta Yehova a ti vonaka loko ti ri karhi ti hangalasa mahungu lamanene ya ntsumi “eka vanhu va matiko hinkwawo, ni va tinxaka hinkwato, ni va tindzimi hinkwato, ni va swivongo hinkwaswo.” Marito ya vona ma karhi ma twiwa eka matiko ni swihlala swa 212. Naswona mintshungu ya yingisa. Mintokoto yin’wana ya lava yi ta kombisa ntsena ndlela leyi mahungu ya Mfumo wa Xikwembu ma nga manene ha yona hi xiviri.