‘Ku Katekile Lava Tiyiseleke’
1. Ku sukela hi 1914, hi xihi xiyimo emisaveni lexi hetisiseke Matewu 24:3-8, naswona i ku tivulela kwihi ka Ntwanano wa Matiko ni ka Nhlangano wa Matiko loku ku tsandzekeke?
EBUKWINI ya yena leyi nge The Present Age, Robert Nisbet, u vulavula hi “Nyimpi Ya Malembe Ya Makume-nkombo-ntlhanu leyi yi yeke emahlweni, leyi a yo yimanyana, ku sukela hi 1914.” Ina, “tinyimpi ni swiviko swa tinyimpi,” ku katsa ni tinyimpi ta misava—sweswo hi leswi Yesu a swi vhumbeleke nkarhi lowu wa makumu. (Matewu 24:3-8) Ntwanano wa Matiko wu sunguriwe hi 1920 “leswaku wu sivela nyimpi hi laha ku nga heriki.” Vona ndlela leyi wu hlulekeke ha yona! Nhlangano wa Matiko wu simekiwe hi 1945 “leswaku wu ponisa rixaka leri nga ta landzela eka nhlaselo wa nyimpi.” Kambe buku ya Max Harrelson leyi nge Fires All Around the Horizon yi ri: “Ku sukela eku heleni ka Nyimpi ya Vumbirhi ya Misava a ku si tshama ku va ni siku leri ha rona a ku nga ri na nyimpi endhawini yo karhi.”
2. I yini leswi vanhu van’wana va swi vutisaka malunghana ni swiyimo swa misava, kambe i swivutiso swihi leswi a hi fanele hi swi vutisa?
2 Vutherorisi ni vukari, nthyakiso ni vusweti, swidzidzirisi ni vuvabyi—hinkwaswo leswi swi engetela eka mahlomulo lawa. Vanhu van’wana va nga ha vutisa va ku: ‘Xana vanhu va nga swi kotisa ku yini ku hambeta va tiyiselela swiyimo swo tano leswi kavanyetaka swonghasi?’ Kambe, ngopfu-ngopfu hi fanele hi vutisa ku: ‘Xikwembu xi swi kotisa ku yini ku tiyisela ku onhiwa ka ntumbuluko wa xona wa laha misaveni? Xana xi ta pfumelela vanhu vo biha leswaku va onha misava ni ku tisa ndzhukano evitweni ra xona leri kwetsimaka ku fikela kwihi?’
3. (a) Hi xihi xivutiso lexi muprofeta Esaya a xi vutiseke naswona ha yini? (b) Hi yihi nhlamulo leyi Yehova a yi nyikeke naswona leswi swi komba yini esikwini ra hina?
3 Muprofeta Esaya u vutise xivutiso lexi fanaka. A a averiwe ku ya byela vanhu va tiko ra ka vona hi rungula leri humaka eka Yehova. Kambe a a byeriwe ka ha ri emahlweni leswaku a va nga ta n’wi yingisa yena ni Xikwembu lexi n’wi rhumeke. Kutani Esaya a vutisa a ku: “Ku ta v̌a ku fika rini, [Yehova]”? Ina, xana Esaya a a ta fanela ku chumayela ku fikela rini eka vanhu va ka vona lava sihalalaka naswona xana Yehova a a ta ku tiyiselela ku fikela kwihi ku ala ka vona ku yingisa rungula ra yena loku tisaka ndzhukano? Yehova u hlamurile a ku: “Miti yi ko yi mbunḍuka, yi pfumatiwa v̌aaki, ni tindlu ti pfumala v̌anhu, ni tiko ri onhaka ri v̌a rumbi.” (Esaya 6:8-11) Hi laha ku fanaka ni namuntlha, Xikwembu xi tiyisela mindzhukano yo tano ku kondza ku fika nkarhi wa xona lowu vekiweke wo tisa ku avanyisa ehenhla ka misava leyi eka yona mudyohi lonkulu a veke Vujagana lebyi nga tshembekiki.
4. Byi ve byihi vuyelo bya ku tiyisela ka Yobo naswona i xitiyisekiso xihi lexi leswi swi hi nyikaka xona namuntlha?
4 Yehova i khale a ri karhi a tiyisela ku rhukana ka Sathana. Kwalomu ka malembe ya 3 600 lama hundzeke, Yobo wo tshembeka na yena u tiyiserile, a hlula ntlhontlho wa Sathana wa leswaku a nge byi hlayisi vutshembeki ehansi ka ndzingo. Vona ndlela leyi leswi swi tsakiseke mbilu ya Yehova ha yona! (Yobo 2:6-10; 27:5; Swivuriso 27:11) Hi laha Yokobo makwavo wa Yesu hi manana endzhakunyana a vuleke ha kona: “Langutani, lava hi vulaka leswaku va katekile, hi lava va tiyiseleke. Mi twile ta ku tiyisela ka Yobo, nakona mi vonile leswi [Yehova a a] kongomile swona, ni hilaha [Yehova a] taleke musa ni tintswalo hakona.” Hi laha ku fanaka, lava va tiyiselaka eka Yehova namuntlha va tiyisekisiwa hi vuyelo lebyi tsakisaka.—Yokobo 5:11.
5. Xana Yesu u swi kombise njhani leswaku ku tiyisela a ku ta laveka eka vanhu va Xikwembu namuntlha, naswona xana a va fanele va tiyisela va ri karhi va endla ntirho wihi?
5 Yesu u swi kombise kahle leswaku ku tiyisela a ku ta laveka eka vanhu va Xikwembu esikwini ra hina. Loko a vhumba xikombiso xa ‘ku hela ka mafambiselo lawa ya swilo,’ u te: “Loyi a tiyiselaka ku fika makumu, hi yena loyi a nga ta ponisiwa.” A tiyisela a ri karhi a endla yini? Marito ya Yesu lama landzelaka ma hlamula: “Kutani Evhangeli leyi ya Mfumo yi ta twarisiwa emisaveni hinkwayo, leswaku yi va vumbhoni eka vanhu va matiko hinkwawo.” (Matewu 24:3, 13, 14) Hi kona ‘makumu ma nga ta ta.’—Nakambe vona Marka 13:10, 13; Luka 21:17-19.
Mhaka Leyi Yehova A Tiyiselaka Ha Yona
6. Ha yini Yehova a ri xikombiso lexi xiyekaka xa ku tiyisela naswona hi xihi xivangelo xin’wana lexi n’wi endleke a tiyisela hi ndlela leyi?
6 Muapostola Pawulo u hlamusele leswaku “Xikwembu lexi a xi navela ku komba vukari bya xona ni ku endla leswaku ntamu wa xona wu tiviwa, xi vile ni mbilu leyo leha ngopfu, xi lehisela swibya leswi a swi vumberiwile ku kariheriwa ni ku fayeteriwa.” (Varhoma 9:22) Ha yini Yehova a tiyiselela vukona bya vanhu vo biha, swibya leswi faneriweke hi tihanyi? Xivangelo xin’wana hi lexi: ku kombisa leswaku ku fuma ka vanhu, handle ka Muvumbi wa munhu, a ku nge humeleli. (Yeremia 10:23) Ku nga ri khale, vuhosi bya Xikwembu byi ta lweriwa loko xi ri karhi xi kombisa leswaku hi xona ntsena xi nga tisaka ku rhula, ku twanana ni ntsako endyangwini wa vanhu, hi ku tirhisa ku fuma ka Mfumo wa Yesu.—Psalma 37:9-11; 45:1, 6, 7.
7. Xana Yehova u tiyisela hikwalaho ka swivangelo swihi swin’wana naswona leswi swi tise mpfuno wihi eka timiliyoni ku sukela hi va-1930?
7 Ku tlula kwalaho, Yehova u tiyiserile a “tivisa vukulu bya ku kwetsima ka [yena], ehenhla ka swibya leswi [a] swi lunghiseke.” (Varhoma 9:23) Swibya leswi swi lunghisiweke i vatotiwa lava hlayisaka vutshembeki lava “va kutsuriweke exikarhi ka vanhu” leswaku va fuma na Kriste Yesu eMfun’weni wa yena wa le tilweni. Ku funghiwa ka lava 144 000 ku ye emahlweni ku sukela eminkarhini ya vaapostola. Sweswi ku tshinelela makumu. (Nhlavutelo 7:3; 14:1, 4) Naswona vona! Ku sukela hi va-1930 ku tiyisela ka Yehova loku yaka emahlweni ku pfumelele ku hlengeletiwa ka timiliyoni ta van’wana, “ntshungu lowukulu . . . va huma ematikweni hinkwawo,” lava va tsakelaka ntshembo wo pona mahlomulo yo hetelela ivi va kuma ndzhaka ya vutomi emisaveni ya Paradeyisi. (Nhlavutelo 7:4, 9, 10, 13-17) Xana u un’wana wa ntshungu lowukulu? Loko swi ri tano, xana a wu tsaki leswi Yehova a tiyiseleke vukona bya swibya leswi faneriweke hi tihanyi ku fikela sweswi ke? Hambi swi ri tano, u fanele u hambeta u tiyisela, hi laha Yehova a tiyiseleke ha kona.
Ku Tiyisela Ku Hakeriwa
8. Ha yini hinkwerhu ka hina hi fanele ku tiyisela naswona hi xihi xikombiso xa ku tiyisela lexi hi faneleke ku xi xiya swinene?
8 Hinkwerhu ka hina hi fanele hi tiyisela loko hi ta amukela switshembiso leswi. Endzhaku ko hlamusela ntiyiso lowu wa xisekelo eka Vaheveru 10:36, muapostola Pawulo u hlamusela ripfumelo leri tiyeke ni ku tiyisela ka ‘vunyingi lebyikulu bya timbhoni’ ta minkarhi ya khale hi vuxokoxoko. Kutani u hi khutaze ku “tsutsuma hi ri ni ku tiyisela eku tsutsumeni ka mpfhuka lowu hi vekeriweke wona. [Hi languta] eka Yesu, musunguri ni muhetisisi wa ku pfumela ka hina, . . . hikwalaho ka ku tsaka loku vekiweke emahlweni ka yena,” Yesu u tiyiserile eka ntirho wa mbilu hinkwayo, a nga lahlekeriwi hi ku langutela hakelo. Vona ndlela leyi xikombiso xa yena xi hi tiyisaka ha yona na hina leswaku hi tiyisela!—Vaheveru 12:1, 2.
9. Xana ku humelele yini eka swikombiso swa manguva lawa swa ku tiyisela?
9 Swikombiso swa ku tiyisela swi tele ni namuntlha. Swi nga ha endleka u tiva kumbe u twile hi vamakwerhu va xinuna ni va xisati lava va xiyekeke hi ku tiyisela ka vona. Vona ndlela leyi ripfumelo ra vona ri hi tiyiseke ha yona! Naswona lembe rin’wana ni rin’wana, loko Timbhoni ta Yehova ti vika ntirho wa tona wa misava hinkwayo eka Sosayiti ya Watch Tower, timhaka leti nyanyulaka ta ku tiyisela ni ku hlayisa vutshembeki ta amukeriwa. Chati leyi nga eka matluka ya mune lama landzelaka yi katsakanya ntirho lowukulu lowu hetisisiweke hi 1989 tanihi leswi Timbhoni leti ti ‘engeteleke ku tiyisela eripfumelweni ra tona.’—2 Petro 1:5, 6.
Lembe Ra Hina Lerinene Ngopfu
10. (a) I mangani matiko ni mintlawa ya swihlala lama hlanganyeleke eku chumayeleni ka mahungu lamanene ya Mfumo hi 1989 naswona i vangani lava hlanganyeleke entirhweni lowu? (b) I maphayona mangani lama vikeke en’hwetini ya nhlohlorhi naswona hi wihi ntsengo wa nhlayo ya tiawara leti hetiweke entirhweni wa nsimu?
10 Hi laha chati leyi nga laha mahlweni yi kombisaka ha kona, matiko ni mintlawa ya swihlala ya 212 ma hlanganyerile eku chumayeleni ka Mfumo wa Yehova lowu taka. Wena muhlayi wa Xihondzo xo Rindza la rhandzekaka, xana u ve na rona lunghelo ro va un’wana wa lava 3 787 188 lava hlanganyeleke entirhweni lowu wukulu ke? Xana a wu ri un’wana wa lava 808 184 lava vikeke tanihi maphayona eka n’hweti ya nhlohlorhi ya ntirho wolowo? Loko u hlanganyerile eka ntsengo wa nhlayo ya misava hinkwayo wa 1989 wa tiawara ta 835 426 538 leti hetiweke entirhweni wa nsimu, u ni xivangelo xo tsaka.—Psalma 104:33, 34; Vafilipiya 4:4.
11. (a) Hi yihi nhlayo ya lava veke kona eka Xitsundzuxo hi March 22 n’wexemu leyi tsakisaka naswona ha yini? (b) I vangani lava khuvuriweke naswona i matiko wahi lama nga echatini lama a ma hlawulekile emhakeni leyi?
11 Nakambe, tsaka hi ntsengo lowu nyanyulaka wa lava veke kona va 9 479 064 eka nkhuvo wa Xitsundzuxo xa rifu ra Yesu hi March 22 n’wexemu! Leswi swi kombisa ku engeteleka loku nga vaka kona ka vahuweleri lava engetelekeke va Mfumo va 5 691 876, loko vanhu lava va tsakelaka vo fana na tinyimpfu va nga risiwa hi rirhandzu va ta etshangeni, leswaku va va ni xiyenge xa nkarhi na nkarhi va tirhela Yehova. Xana hi nga va pfuna ku endla leswi? (Yohane 10:16; Nhlavutelo 7:9, 15) Vo tala ana se va endla nhluvuko, hi laha swi kombisiweke ha kona hi ntsengo lowunene wa Timbhoni letintshwa leti khuvuriweke ta 263 855 hi lembe ra ntirho ra 1989.
12. Hi swihi swivumbeko swin’wana leswi chati yi nga swi kombisiki (a) malunghana ni tifektri ta Sosayiti ya Watch Tower? (b) malunghana ni ku fambisiwa ka timagazini ni swikhokhelo?
12 Ku ni swivumbeko swin’wana leswi chati leyi yi nga swi paluxiki. Torha ra minkandziyiso—Tibibele, tibuku, tibroxara, timagazini—a swi nga koteki ku ri enerisa. Hikokwalaho, tifektri ta Watchtower le New York ti tirhise tithani ta 25 999 ta maphepha leswaku ti kandziyisa Tibibele, tibuku ni tibroxara ta 35 811 000, ku andza ka tiphesente ta 101 ku tlula lembe ra 1988. Tifektri tin’wana letikulu ta Sosayiti ya Watch Tower, ngopfu-ngopfu eJarimani, Italy na Japani, a ti tirha minkarhi leyi engetelekeke, ti seketela “nandza la tshembekaka, wo tlhariha” ku “phamela swakudya [swa moya] hi nkarhi wa kona.” (Matewu 24:45) Hi April na May, ku vikiwe ku fambisiwa ka timagazini ni swikhokhelo loku hlamarisaka ematikweni yo tala, hi ku kandziyisa loku hlawulekeke eku hangalaseni ka minkandziyiso ya Xihondzo xo Rindza leyi vulavulaka hi “Babilona lonkulu.” (Nhlavutelo 17:5) Handle ko kanakana, eka April la landzelaka, maphayona ya nkarhinyana ni Timbhoni tin’wana va ta hlasela nsimu ya misava eka leswi swi nga ta tikombisa swi ri tsima ra hina lerinene ngopfu ra lembe ra ntirho ra 1990 ro nyikela vumbhoni.—Ringanisa Esaya 40:31; Varhoma 12:11, 12.
13. Hi wahi matiko lama xaxametiweke echatini lawa a ma nga xaxametiwanga n’wexemu? Hlamusela.
13 Tlhela u languta chati. Xana wa ma vona matiko lawa a ma nga xaxametiwanga hi mavito n’wexemu? Ina, vona! Le Hungary ni le Poland, ntirho wa hina wa ha ku nghenisiwa enawini. Ha va nkhensa swinene valawuri va matiko wolawo leswi sweswi va kombisaka ku xiya Timbhoni ta Yehova hi ndlela yo tano. Hikokwalaho, swikhongelo swa vamakwerhu va misava hinkwayo swi hlamuriwile, “leswaku hi kota ku hanya vutomi bya ku rhula ni ku tsaka, lebyi nga bya vukhongeri ni lebyi chavisekaka hi matlhelo hinkwawo.”—1 Timotiya 2:1, 2.
14. Nyikela tinhla-nkulu ta Mintsombano ya Muganga ya “Ku Chava Xikwembu” ePoland.
14 “Ku Chava Xikwembu”! Phela, Ntsombano wa Muganga wa “Ku Chava Xikwembu” swi kotekile leswaku wu va kona hambi ku ri ePoland, etindhawini tinharhu, hi August! Vamakwerhu va hina va le Poland va 91 024 va tikombe va ri vaamukeri lavanene swonghasi! (Vaheveru 13:1, 2, 16) Onge a ku ri hi hlori, vamakwerhu va makume ya magidi—Vaczech, Majarimani, Marhaxiya ni van’wana—va kume tivhisa leswaku va ta hi mabazi, switimela hambi ku ri hi milenge. Magidi man’wana ma te hi swihaha-mpfhuka ma huma hi le matikweni ya le Amerika, Yuropa Vupela-dyambu ni le swihlaleni swa Pacific na Japani. Switediyamu leswikulu, leswi basisiweke kahle hi vamakwerhu, a swi kule ku anela leswaku swi tshamisisa vanhu va 65 710 eChorzów, 40 442 ePoznan na 60 366 eWarsaw—ntsengo wa 166 518 wa lava veke kona! Eka ndhawu yin’wana ni yin’wana, xivono xa nkhuvulo xi humese mihloti ya ntsako. Le Poznan munhu wa malembe ya 9 ni wa malembe ya 90 hi vukhale va khuvuriwile naswona ntsengo wa 6 093 wa lava khuvuriweke eka mintsombano leyi minharhu a wu katsa vana va kondlo-a-ndzi-dyi vo hlayanyana, vo tala va vona a va huma eka tindhawu leti ku vuriwaka leswaku vukhongeri byi ta hela ni swikoxa. Hayi vukhongeri bya ntiyiso lebyi sekeriweke eRitweni ra Xikwembu! (Ringanisa Psalma 148:12, 13; Mintirho 2:41; 4:4.) Vona ndlela leyinene swonghasi leyi vamakwerhu va le Yuropa Vuxa va hakeriweke ha yona!
Vutshembeki Lebyi Yaka eMahlweni eHansi Ka Ndzingo
15. Xana Timbhoni ta le Lebanon ti ku kombisise ku yini ku tiyisela ni ku tiya, naswona ku ve ni vuyelo byihi lebyinene?
15 Ku fana na muapostola Pawulo, Timbhoni ta Yehova ti boheka ku kombisa ku tiyisela ehansi ka swiyimo swo tala, swo hambana-hambana. (2 Vakorinto 11:24-27) Le Lebanon ku ni nyimpi ya xin’wana-manana. Xana vamakwerhu va endlisa ku yini? Hi xivindzi ni ku tiyimisela. Hi lembe ra 1989 a ku ri ni ku onheteriwa ni ku hoxiwa ka tibomo lokukulu, kambe hambi ku ri laha leswi a swi ri swikulu ngopfu, vamakwerhu a va tiyimiserile leswaku va nga tshuki va tsana. Bandlha ra le Beirut ra vika: “Mintlawa ya nkarhi na nkarhi ya ntirho wa nsimu a yi lunghiseleriwa eka madyambu hinkwawo ya vhiki. Ku nga khathariseki swiyimo swo nonon’hwa swa vuhlayiseki, vamakwerhu a va hetiwanga matimba. Hi hlanganise tinsimu leti engetelekeke ku tlula rini na rini. Hi April hi ve ni nhlohlorhi eka nhlayo ya maphayona. Tidyondzo letintshwa ta Bibele ti sunguriwile naswona timagazini ni tibuku leti engetelekeke swi fambisiwile.”
16. Xana vamakwerhu eColombia va ku kombisise ku yini ku tiyisela hi ku yisa mahungu lamanene emadorobeni lawa a ku nga ri na Timbhoni eka wona?
16 Colombia a ku vulavuriwa ha rona hikokwalaho ka ku xavisa swidzidzirisi ni vukari. Kambe ku tiyisela hi ku tshembeka ka Vakriste kwalaho na kona ku vumba mahungu. Sweswinyana, maphayona yo hlawuleka ya nkarinyana ma rhumeriwe eka madoroba ya 31 lama nga ni vaaki va khume ra magidi kumbe ku tlula laha a ku nga ri na Timbhoni. Eka doroba rin’wana, loko vanhu lava tsakelaka va twa leswaku maphayona lawa a ma ta va kona tin’hweti ti nga ri tingani ntsena, va kombele maphayona leswaku ma nga fambi. Eka yin’wana, vanhu lava tsakelaka va 18 va sayine papila ra ku tlangela hikokwalaho ka mpfuno wa moya lowu va nyikiweke wona hi nkarhi wa tin’hweti tinharhu lowu maphayona ma wu heteke ivi va kombela mpfuno lowu engetelekeke. Va te, “leyi i mhaka ya nkoka.” Handle ko kanakana, etimhakeni ha timbirhi malunghiselelo ma endliwile leswaku ku yiwa emahlweni ni ku hlakulela ku tsakela. Ku tirha tinsimu to tano ta le kule swi lava ku tiyisela, kambe ntirho wa ku tinyiketela wa maphayona lama endlaka tano wa katekisiwa swinene.
17, 18. (a) Xana Timbhoni ta Yehova eItaly ti tiyisele ehansi ka swiyimo swa njhani? (b) Timbhoni ti humelerise ku yini ku nga khathariseki ku hangalasiwa ka mavunwa ha tona?
17 Le Italy, Timbhoni ta Yehova ti langutana ni nkaneto lowukulu wa vafundhisi, kambe hi ku tiyisiwa hi Yehova va tiyiserile. Eka tikereke to hambana-hambana, vafundhisi va halangalase swiphephana leswaku swi nameketiwa etindlwini ta valandzeri va vona leswi tsariweke leswaku Timbhoni ta Yehova ti nga va endzeli emakaya ya vona. Vafundhisi vo tala va kucetele swifanyetana leswaku swi nameketa swiphephana leswi eminyangweni hinkwayo ya ndhawu yin’wana—hambi ku ri emakaya ya mindyangu ya Timbhoni! Hambi swi ri tano, Timbhoni a ti siveriwi hi ku olova naswona hakanyingi ti tirhisa swiphephana leswi ku sungula bulo. Ku tlula kwalaho, phepha-hungu ni thelevhixini ya kwalaho swi hlamusele mhaka leyi hi xitalo, swi sola rivengo leri kombisiweke hi vukhongeri naswona swi tshikilela leswaku maendlelo yo tanihi lawa a ma ri xikombiso xa ku tsana ka kereke. Profesa un’wana wa le yunivhesiti a a hlundzukisiwe hi swiphephana swa vakaneti lava lwisanaka ni Timbhoni lerova a endla xikhokhelo xa Xihondzo xo Rindza ni Awake!
18 Kereke ya Khatoliki eItaly yi tirhisa hambi ku ri vagwinehi leswaku yi hangalasa mavunwa hi vanhu va Yehova, kambe leswi na swona a swi tirhi hikuva vahuweleri va 172 382 va tiveka kahle naswona va xiximiwa. Wanuna un’wana u byele Timbhoni leti endzeke leswaku u hlaye swilo swo biha hi hina ebukwini leyi tsariweke hi un’wana la tshameke a va Mbhoni. Hikwalaho, a a kaneta swinene loko makwavo a ve un’wana wa Timbhoni ta Yehova. Kambe, endzhakunyana u xiye vuyelo lebyinene lebyi vangiweke hi ku cinca ka makwavo vukhongeri. U tivutisile a ku: ‘Xana swi kotekisa ku yini leswaku nchumu wo bihisa xileswi wu humesa vuyelo lebyinene swonghasi?’ Hikwalaho, u kombele dyondzo ya Bibele eka Timbhoni leti endzeke.—Ringanisa Vakolosa 3:8-10.
Ku Langutana Ni Nkaneto
19, 20. (a) Hi xihi xiyimo lexi laveke leswaku Timbhoni ti tiyisela eFinland, naswona i yini lexi xiyekaka hi nhlawulo wa kereke? (b) I ntokoto wihi lowu fanisaka nkoka wa ku tiyisela eku chumayeleni ka mahungu lamanene?
19 Ematikweni lawa Timbhoni ti endzaka hi ku phindha-phindha eka wona, hakanyingi ku ni ku kaneta loku anameke ehenhleni ka mahungu lamanene. Leswi swi tano eFinland. Kereke ya le tikweni rero yi lunghiselele nhlawulo ivi yi kuma leswaku tiphesente ta 70 ta vaaki a ti nga ku tsakeli ku endza ka Timbhoni ta Yehova emakaya ya vona. Hambi swi ri tano, tiphesente ta 30 a ti nga ali naswona eka vona tiphesente ta 4 ti vule leswaku kahle-kahle ta ti rhandza Timbhoni ta Yehova. Leyi i nhlayo leyikulu. Tiphesente ta mune eFinland ti yimela vanhu va 200 000. Yi pimanise ni nhlayo ya sweswi ya vahuweleri ya 17 303!
20 Muhuweleri un’wana loyi a a ri ensin’wini ku kaneriwe na yena hi nhlawulo lowu ivi a vutisiwa ku: “Xana a mi swi tivi leswaku tiphesente ta 70 ta hina ti mi teka tanihi lava nga lavekiki? Ha yini mi hambeta mi ta emitini ya hina?” Muhuweleri u hlamurile a ku: “Ina, kambe nkambisiso wolowo lowu fanaka wu kombise leswaku tiphesente ta n’wina ta 4 ta hi rhandza. Hi ringeta ku kuma vanhu volavo. Hambi ni loko a va ri phesente yin’we, a hi ta famba hi yindlu na yindlu hi ringeta ku va kuma.” Hi loko n’wini wa muti a ehleketanyana ivi a ku: “Xana rungula ra n’wina i ra nkoka swinene eka vona?” Muhuweleri u hlamule hi ku vutisa a ku: “Xana u nga tsakela ku ri twa?” Hi ku hatlisa n’wini loyi wa muti u kombise ku tsakela eka mahungu lamanene.
Leswi Vumundzuku Byi Swi Khomeke
21. (a) I ku lwa ka njhani loku hi faneleke hi ku tiyisela eka mafambiselo lawa naswona ha yini? (b) I yini leswi hi nga ha bohekaka ku swi tiyisela naswona i yini leswi vuprofeta bya Habakuk byi hi tiyisekisaka ha swona?
21 Ku vuriwa yini hi hina hinkwerhu? Xana hi tiyimiserile ku tiyisela eka Yehova na Kriste Yesu ku ya fika emakumu? Ma nga ha va ma nga ri kule ngopfu, kambe hi fanele ku tiyisela! Eka mafambiselo ya Sathana, hi fanele ku ri lwela swinene ripfumelo, tanihi leswi ku tikhoma loko biha, nthyakiso ni rivengo ra misava swi hi rhendzeleke hi matlhelo hinkwawo. (Yuda 3, 20, 21) Hi nga boheka ku tiyisela nxaniso wo karhi. Hambi ku ri sweswi, magidi ya vamakwerhu va hina va xaniseka emakhotsweni naswona van’wana va biwa hi ndlela ya tihanyi. Lava va swi tlangela swikhongelo swa hina. (2 Vatesalonika 3:1, 2) Ku nga ri khale, mafambiselo ya sweswi a ma nga ha vi kona! Hi laha Habakuk a vulaka ha kona: “Hikuv̌a hlav̌utelo leyo ya ha ṭhamele nkari wa kona, kambe yi ta hatlisa e ku heteleleni, yi nga ka yi nga šisi. Hambi yi nga hlwela, u yi langutela, hikuv̌a yi ta endlakala ŝinene, yi nga ka yi nga hlweri.”—Habakuk 2:3.
22. I vuyelo byihi lebyi hi nga byi langutelaka hi ku tiyiseka loko ho tirhisa ku tiyisela ka vaprofeta ni ku tiyisela ka Yobo?
22 Hi rirhandzu mudyondzisiwa Yakobo u hi byela ku: “Loko mi lava xikombiso xa ku lehisa mbilu emaxangwini, vamakwerhu, landzani ntila wa vaprofeta lava vulavuleke hi vito ra [Yehova].” Hina namuntlha lava vulavulaka hi vito ra Yehova hi nga va vahlayisi va vutshembeki hi nkarhi wa mindzingo yo vava, hi laha Esaya, Yeremiya, Daniyele na van’wana va endleke ha kona. Ku fana na Yobo, hi nga tiyisela. Mawaku ndlela leyinene leyi a hakeriweke ha yona hikwalaho ka ku tiyisela ka yena! Tintswalo ni ntwela-vusiwana wa Yehova swi ta hi tisela tihakelo leti nga pimekiki—loko ho tiyisela ku ya fika emakumu. Naswona onge marito ya Yakobo ma nga hetiseka eka un’wana ni un’wana wa hina: “Langutani, lava hi vulaka leswaku va katekile, hi lava va tiyiseleke.”—Yakobo 5:10, 11; Yobo 42:10-13.
A Wu Ta Hlamurisa Ku Yini?
◻ Hi xihi xilaveko xa ku tiyisela lexi Yesu a xi kandziyiseke?
◻ Xana Yehova u tiyisele hikokwalaho ka swivangelo swihi?
◻ Hi tihi tinhla-nkulu ta ntirho lowukulu lowu hetisisiweke hi 1989?
◻ Xana ku tiyisela ka vamakwerhu ePoland ku hakeriwe hi ndlela yihi?
◻ Timbhoni ta le Lebanon, Colombia na Italy ti ku kombise njhani ku tshembeka ehansi ka ndzingo?
[Chati leyi nga eka tluka 20-23]
XIVIKO XA NTIRHO WA LEMBE RA 1989 WA TIMBHONI TA YEHOVA EMISAVENI HINKWAYO
(See bound volume)