‘Nandza La Tshembekaka’ Ni Huvo Ya Yena Leyi Fumaka
“Šana i mani nanḍa lo’nene, wo tlhariha, loyi Hosi ya yena yi ṅwi v̌ekeke mulanguteri wa malanḍa ya yona ku v̌a nyika ŝakudya e nkarini wa ŝona?”—MATEWU 24:45, “BX.”
1. Ha yini Yehova a tiyimiserile ku nyika vuhosi, naswona leswi ngopfu-ngopfu u swi endle eka vamani?
YEHOVA i Xikwembu lexi hlelekeke. Nakambe i Xihlovo xa vulawuri hinkwabyo bya le nawini. Hi ku tiyiseka hi vutshembeki bya swivumbiwa swa yena leswi tshembekaka, Yehova u tiyimiserile ku swi nyika matimba. Loyi a n’wi nyikeke matimba lamakulu i N’wana wa yena, Yesu Kriste. Hakunene, Xikwembu “xi vekile hinkwaswo ehansi ka minkondzo ya Kriste, xi tlhela xi n’wi nyika eka [bandlha], a ri nhloko ya hinkwaswo.”—Vaefesa 1:22.
2. Pawulo u ri vitana yini bandlha ra Vukriste, naswona Kriste u nyike vuhosi eka vamani?
2 Muapostola Pawulo u vitana bandlha ra Vukriste ‘ndyangu wa Xikwembu’ ivi a vula leswaku N’wana wa Yehova la tshembekaka, Yesu Kriste, u vekiwe ku langutela ndyangu lowu. (1 Timotiya 3:15; Vaheveru 3:6) Hi ku fanana, Kriste u nyika matimba eka swirho swa ndyangu wa Xikwembu. Hi nga vona leswi eka marito ya Yesu lama nga eka Matewu 24:45-47. (BX) U te: “Šana i mani nanḍa lo’nene, wo tlhariha, loyi Hosi ya yena yi ṅwi v̌ekeke mulanguteri wa malanḍa ya yona ku v̌a nyika ŝakudya e nkarini wa ŝona? Ku katekile nanḍa yoloyi Hosi ya yena, siku yi fikaka, yi nga ta ṅwi kuma a endlise ŝeŝo. Kunene nḍi ri ka ṅwina, o ta ṅwi v̌eka muhlayisi wa hikwaŝo leŝi a nga na ŝona.”
Mulawuri Wa Yindlu Wa Lembe Xidzana Ro Sungula
3. I vamani lava vumbaka “nandza la tshembekaka, wo tlhariha,” naswona i rito rihi leri ri tirhisiwaka eka vona tanihi vanhu?
3 Eka dyondzo ya hina ya rixaladza ya Matsalwa, ha swi tiva leswaku swirho leswi totiweke hi moya swa ndyangu wa Xikwembu hi nkarhi wun’wana ni wun’wana lowu vekiweke swi hlanganile swi vumba “nandza la tshembekaka, wo tlhariha,” “mulanguteri,” kumbe “mulawuri wa yindlu.” Ha un’we-un’we, swirho swa ndyangu wa Yehova swi vitaniwa “swirho swa ndyangu” kumbe “malandza man’wana.”—Matewu 24:45; Luka 12:42; nhlamuselo ya le hansi ya Reference Bible.
4. Emahlweninyana ka rifu ra yena, i xivutiso xihi lexi Yesu a xi tlakuseke, naswona u tifanise na mani?
4 Tin’hweti ti nga ri tingani emahlweni ka rifu ra yena, Yesu u tlakuse xivutiso lexi, lexi rhekhodiweke eka Luka 12:42 (BX): “Mulanguteri hi wihi lo’wo ṭhembeka lowa v̌utlhari, yoloyi ṅwini wa yena a ṅwi v̌ekeke mulanguteri wa malanḍa ya yena, ku v̌a nyika ŝakudya hi nkari wa ŝona?” Kutani ke, masiku ma nga ri mangani a nga si fa, Yesu u tifanise ni wanuna, loyi a nga kusuhi ni ku teka riendzo ro ya ekule, loyi a vitaneke malandza yakwe kutani a ma siya ni swilo swa yena.—Matewu 25:14.
5. (a) Yesu u va avele rini van’wana ku langutela swilo swa yena? (b) I xiavelo xihi lexi engetelekeke lexi Kriste a xi nyikeke lava a va ta va xiphemu xa mulawuri la hlanganeke wa yindlu ya yena?
5 Xana Yesu u va avele rini van’wana ku langutela swilo swa yena? Leswi swi humelele endzhaku ka ku pfuxiwa ka yena. Emaritweni ya yena lama tolovelekeke lama kumekaka eka Matewu 28:19, 20, Kriste u sungule a nyika lava a va ta va xiphemu xa mulawuri wa yindlu ya yena xiavelo lexi engetelekeke xo dyondzisa ni ku endla vadyondzisiwa. Hi ku nyikela vumbhoni ha un’we-un’we “ku ya fika emakun’wini ya misava,” valanguteri a va ta ndlandlamuxa nsimu ya vurhumiwa leyi Yesu a sunguleke ku yi hlakulela hi nkarhi wa vutirheli bya yena bya le misaveni. (Mintirho 1:8) Leswi swi katse ku tirha ka vona tanihi “vayimeri va Kriste.” Tanihi ‘valanguteri va swihundla leswo kwetsima swa Xikwembu,’ a va ta endla vadyondzisiwa naswona a va ta va phamela swakudya swa moya.—2 Vakorinto 5:20; 1 Vakorinto 4:1, 2.
Huvo Leyi Fumaka Ya Ndyangu
6. Ntlawa wa mulanguteri wa lembe xidzana ro sungula wu huhuteriwe hi Xikwembu ku phamela yini?
6 Loko va hlanganile, Vakriste lava totiweke hi moya a va ta va mulanguteri wa n’wini, kumbe mulawuri wa yindlu, la averiweke ku phamela swakudya swa moya eka xirho xin’wana ni xin’wana xa ndyangu wa Xikwembu hi nkarhi wa kona. Exikarhi ka malembe ya 41 C.E. na 98 C.E., swirho swa ntlawa wa mulanguteri wa lembe xidzana ro sungula a swi huhuteriwe hi Xikwembu leswaku swi tsala timhaka ta 5 ta vurunguri, mapapila ya 21 ni buku ya Nhlavutelo leswaku swi pfuna vamakwavo. Matsalwa lawa ma huhuteriweke ma ni swakudya leswinene swa moya swa swirho swa ndyangu, hi leswaku, munhu un’wana ni un’wana la totiweke wa ndyangu wa Xikwembu.
7. Kriste u hlawule nhlayo leyintsongo ya vavanuna eka ntlawa wa nandza hi xikongomelo xihi?
7 Hambi leswi Vakriste hinkwavo lava totiweke loko va hlanganile va vumbaka ndyangu wa Xikwembu, ku ni vumbhoni lebyi aneleke bya leswaku Kriste u hlawule nhlayo yintsongo ya vavanuna exikarhi ka ntlawa wa nandza ku tirha tanihi huvo leyi fumaka leyi vonakaka. Matimu yo sungula ya bandlha ma kombisa leswaku vaapostola va 12, ku katsa na Matiyasi, a va ri masungulo ya huvo leyi fumaka ya lembe xidzana ro sungula. Mintirho 1:20-26 yi hi nyika xikombiso xa leswi. Malunghana ni ku siviwa ka Yudasi Iskariyota, nhlamuselo yi endliwile kwalaho ehenhleni ka ‘vulanguteri bya yena’ ni le ka ‘ntirho lowu ni vuapostola.’
8. Xana vutihlamuleri bya huvo leyi fumaka ya lembe xidzana ro sungula a byi katsa yini?
8 Ntirho wo tano wa vulanguteri wu katse vutihlamuleri bya vaapostola byo hlawula vavanuna lava fanelekaka eka swikhundla swa ntirho ni ku hlela vutirheli. Kambe a swi vula leswi engetelekeke. Nakambe a swi katsa ku dyondzisa ni ku hlavutela tinhla ta dyondzo. Ku hetisisa xitshembiso xa Yesu lexi rhekhodiweke eka Yohane 16:13, “Moya wa ntiyiso” a wu ta kongomisa bandlha ra Vukriste hi laha ku humelelaka eka ntiyiso hinkwawo. Ku sukela eku sunguleni, lava va amukeleke rito ni ku khuvuriwa, Vakriste lava totiweke va hambetile va tinyikela eka ‘dyondzo ya vaapostola.’ Entiyisweni, mhaka leyi vavanuna va nkombo lava bumabumeriweke va hlawuriweke ha yona eka ntirho wa nkoka wo phamela swakudya swa nyama a ku ri leswaku “lava khume na vambirhi” va ta kota ku ntshunxeka leswaku va ‘tinyiketela eku khongeleni ni le vutirhelini bya rito.’—Mintirho 2:42; 6:1-6.
9. Huvo leyi fumaka yo sungula yi hungutiwe yi va na swirho swa 11 hi ndlela yihi, kambe ha yini entiyisweni nhlayo yoleyo yi nga tatisiwanga yi va 12 hi ku hatlisa?
9 Swi vonaka onge eku sunguleni huvo leyi fumaka a yi vumbiwe hi vaapostola va Yesu ntsena. Kambe a yi ta tshama yi ri hi ndlela yoleyo ke? Kwalomu ka lembe ra 44 C.E., muapostola Yakobo, makwavo wa Yohane, u dlayiwile hi Heroda Agripa I. (Mintirho 12:1, 2) Entiyisweni ku hava matshalatshala lama endliweke ku n’wi siva tanihi muapostola, ku fana ni leswi endliweke emhakeni ya Yudasi. Ha yini ke? Handle ko kanakana leswi a swi ri hikwalaho ka leswi Yakobo a feke a tshembekile, wo sungula wa vaapostola va 12 ku fa. Hi tlhelo rin’wana, Yudasi a a ri mukanganyisi la hombolokeke naswona a a fanele a siviwa leswaku ku hetisisiwa nhlayo ya 12 ya maribye ya xisekelo ya Israyele wa moya.—Vaefesa 2:20; Nhlavutelo 21:14.
10. Huvo leyi fumaka ya lembe xidzana ro sungula yi kurisiwe rini, naswona hi ndlela yihi, naswona Kriste u yi tirhise ku kongomisa ndyangu wa Xikwembu hi ndlela yihi?
10 Swirho swo sungula swa huvo leyi fumaka ya lembe xidzana ro sungula a swi ri vaapostola, vavanuna lava fambeke na Yesu ni lava a va ri timbhoni ta ku fa ni ku pfuka ka yena. (Mintirho 1:21, 22) Kambe xiyimo lexi a xi ta hundzuka. Loko malembe ma ri karhi ma hundza, vavanuna van’wana va Vakriste va kume xiyimo xa moya naswona va hlawuriwe tanihi vakulu ebandlheni ra le Yerusalema. Eku heleni ka lembe ra 49 C.E., huvo leyi fumaka yi kurisiwile leswaku yi katsa ku nga ri vaapostola lava saleke ntsena, kambe ni vakulukumba van’wana va nga ri vangani eYerusalema. (Mintirho 15:2) Kutani ku vumbiwa ka huvo leyi fumaka a ku nga hikiwanga hi laha ku tiyeke, kambe Xikwembu entiyisweni xi kongomise swilo leswaku swi hundzuka swi fanela swiyimo swa vanhu va xona. Kriste, Nhloko leyi gingiritekaka ya bandlha, u tirhise huvo leyi yi fumaka leyi kurisiweke ku tlhantlha mhaka ya ntikelo ya dyondzo ya ku yimbisiwa ka Vakriste lava nga riki Vayuda ni ku tiveka ehansi ka Nawu wa Muxe. Huvo leyi fumaka yi tsale papila yi hlamusela xiboho xa yona naswona yi humese swileriso leswi faneleke ku hlayisiwa.—Mintirho 15:23-29.
Nkarhi Wa Ku Tihlamulela Ka Mulawuri Wa Yindlu
11. Xana vurhangeri lebyi tiyeke lebyi simekiweke hi huvo leyi fumaka byi tlangeriwile hi vamakwerhu ke, naswona i yini leswi kombisaka leswaku Yehova u katekise lunghiselelo leri?
11 Ha un’we-un’we naswona tanihi mabandlha, Vakriste vo sungula va tlangele vukongomisi lebyi byi tiyeke lebyi nyikeriweke hi huvo leyi fumaka. Endzhaku ka loko bandlha ra le Antiyoka eSiriya ri hlaye papila leri humaka eka huvo leyi fumaka, ri tsakele xikhutazo. Loko mabandlha laman’wana ma amukele rungula ni ku hlayisa swileriso, ma ‘hambetile ma tiyisiwa eripfumelweni ni ku engeteleka hi nhlayo siku na siku.’ (Mintirho 16:5) Handle ko kanakana, Xikwembu xi katekise lunghiselelo leri.—Mintirho 15:30, 31.
12, 13. I swiendlakalo swihi leswi Yesu a swi vhumbeke eka swikombiso swa yena swa tipondho ni titalenta?
12 Kambe a hi languteni xiyenge xin’wana xa mhaka leyi ya nkoka. Exikombisweni xa yena xa tipondho, Yesu u tifanise na munhu la velekiweke hi nghanakana loyi a tekeke riendzo ro ya etikweni ra le kule ku ya vekiwa hosi ivi a tlhela a vuya. (Luka 19:11, 12) Hikwalaho ka ku pfuxiwa ka yena hi 33 C.E., Yesu Kriste u tlakusiwile a yisiwa evokweni ra xinene ra Xikwembu, laha a a fanele a tshama kona ku kondza valala va yena va vekiwa tanihi vunavelo bya minkondzo ya yena.—Mintirho 2:33-35.
13 Exikombisweni lexi yelanaka na xona, xifaniso xa titalenta, Yesu u vule leswaku endzhaku ka nkarhi wo leha, hosi yi vuyile ku ta tenga timhaka ni malandza ya yona. Eka malandza lama tikombiseke ma ri lama tshembekaka, hosi yi te: ‘Mi tshembekile eswilweni swi nga ri swingani, ndzi ta mi veka ku va mulanguteri wa leswo tala; nghenani eku tsakeni ka n’wini wa n’wina.’ Kambe etlhelweni ra nandza la nga tshembekangiki, u te: “Loyi a nga riki na nchumu, ú ta tekeriwa ni lexi a nga na xona. Loko a ri nandza loyi, wo ka a nga pfuni nchumu, n’wi cukumeteni ehandle emunyameni.”—Matewu 25:21-23, 29, 30.
14. Yesu a a langutele yini eka malandza ya yena lama totiweke hi moya?
14 Endzhaku ka nkarhi wo leha—ku lava ku va malembe xidzana ya 19—Kriste u byarhisiwe matimba ya vuhosi hi 1914, eku heleni ka ‘minkarhi leyi vekiweke ya vamatiko.’ (Luka 21:24) Endzhakunyana ka kwalaho, u ‘tile a ta tenga timhaka’ ni malandza ya yena, Vakriste lava totiweke hi moya. (Matewu 25:19) Xana Yesu a a langutele yini eka vona ha un’we-un’we ni loko va hlanganile? Xiavelo xa mulanguteri xi hambetile hi laha a xi ri ha kona ku sukela eka lembe xidzana ro sungula. Kriste u byarhise vanhu titalenta—“un’wana ni un’wana a nyikiwa hi ku ringana matimba ya yena.” Hikwalaho, Yesu u langutele vuyelo byo ya hi xiyimo. (Matewu 25:15) Lowu tirhaka laha i nawu lowu nga eka 1 Vakorinto 4:2, lowu nge: “Leswi lavekaka eka valanguteri hileswaku munhu a kumeka a ri la tshembekeke.” Ku tirhisa titalenta a swi vula ku tirha tanihi vayimeri va Xikwembu hi ku tshembeka, ku endliwa vadyondzisiwa ni ku phamela mintiyiso ya moya eka vona.—2 Vakorinto 5:20.
“Nandza” Ni Huvo Ya Yena Leyi Fumaka Loko Nkarhi Wa Makumu Wu Tshinela
15. (a) Kriste a a langutele yini eka mulawuri la hlanganeke wa yindlu ya yena? (b) I yini leswi kombisaka leswaku Kriste a a langutela ntlawa wa nandza ku endla leswi a nga si ta ku ta kambela ndyangu wa yena?
15 Yesu a a langutele leswaku Vakriste lava totiweke loko va hlanganile va tirha tanihi mulanguteri la tshembekaka, va phamela malandza laman’wana ‘mpimo wa wona wa swakudya leswi phameriwaka hi nkarhi lowu faneleke.’ (Luka 12:42) Hi ku ya hi Luka 12:43, Kriste u te: ‘Ku katekile nandza yoloye, loyi loko n’wini wa yena a fika a n’wi kuma a endla tano!’ Leswi swi kombisa leswaku enkarhini wo karhi Kriste a nga si fika ku tenga timhaka ni malandza ya yena lama totiweke hi moya, a ma ta va ma phamela swakudya swa moya eka swirho swa bandlha ra Vukriste, ndyangu wa Xikwembu. Xana Kriste u kume vamani va ri karhi va endla tano loko a vuye ni matimba ya vuhosi hi 1914 ivi a ya mahlweni a kambela yindlu ya Xikwembu hi 1918?—Malakia 3:1-4; Luka 19:12; 1 Petro 4:17.
16. Loko Kriste a tile ku ta kambela yindlu ya Xikwembu hi 1918, ha yini a nga kumanga tikereke ta Vujagana ti ri karhi ti phamela swakudya swa moya hi nkarhi lowu faneleke?
16 Loko nkarhi wo leha wa ku rindza ka Yesu evokweni ra xinene ra Yehova wu tshinelela makumu, hakantsongo-ntsongo swi ve erivaleni leswaku i mani loyi a a phamela minkavelo ya swakudya swa moya eka swirho swa ndyangu wa Kriste hambi ku ri enkarhini wa le mahlweni ka 1914. Xana u anakanaya leswaku a ku ri tikereke ta Vujagana? Nikantsongo, hikuva a ti nghenelele swinene eka tipolitiki. A ti ri switirho swa ku tirhandzela swa ku kurisa tikoloni naswona ti ringete ku dlayana ku kombisa rirhandzu ra tona ra tiko, xisweswo ti khutaza vutiko. Leswi hi ku hatlisa swi tise nandzu lowukulu wa ngati eka tona, hi leswaku, hi ku nyikela nseketelo wa tona lowukulu eka tihulumendhe ta politiki leti katsekeke eka nyimpi yo sungula ya misava. Hi tlhelo ra moya, ripfumelo ra tona ri tsanisiwile hi Ximanguva lawa. Khombo ra moya ri tisiwile hi mhaka ya leswi vo tala va vafundhisi va tona va hlaseriweke hi ku olova hi vuxopaxopi lebyikulu ni hundzuluko. A ku na vuwundli bya swa moya lebyi a byi ta languteriwa eka vafundhisi va Vujagana!
17. Ha yini Kriste a landzule Vakriste van’wana lava totiweke, naswona hi vuyelo byihi eka vona?
17 Hi ku fanana, a ku na swakudya swa moya leswi fuweke leswi a swi huma eka Vakriste lavaya va totiweke lava a va khathalela swinene ku pona ka vona vini ntsena ku tlula ku tirhisa talenta ya N’wini. Va sungule ku ‘tsana,’ va nga ha faneleki ku langutela swilo swa N’wini. Hikwalaho, va lahleriwe “ehandle emunyameni,” laha tikereke ta Vujagana ta ha riki kona.—Matewu 25:24-30.
18. I vamani lava N’wini a va kumeke va ri karhi va phamela malandza ya yena laman’wana swakudya swa moya hi nkarhi wa kona, naswona i yini leswi kombisaka leswi?
18 Hikwalaho ke, loko a ta kambela malandza ya yena hi 1918, xana N’wini, Yesu Kriste, u kume vamani va ri karhi va phamela malandza laman’wana nkavelo wa wona wa swakudya leswi phameriwaka hi nkarhi lowu faneleke? Hi nkarhi wolowo, i vamani lava nyikeleke valavi va xiviri va ntiyiso ku twisisa loku pakanisaka ka gandzelo ra nkutsulo, vito ra Xikwembu, vukona bya Kriste lebyi nga vonakiki, ni nkoka wa 1914? I vamani lava paluxeke mavunwa ya Vunharhu-un’we, ku nga fi ka moya wa munhu ni ndzilo wa tihele? Naswona i vamani lava tsundzuxeke hi makhombo ya hundzuluko ni vungoma? Mintiyiso yi komba leswaku a ku ri ntlawa wa Vakriste lava totiweke lava tirhisanaka ni vakandziyisi va magazini wa Zion’s Watch Tower and Herald of Christ’s Presence, lowu sweswi wu vuriwaka Xihondzo xo Rindza Xi Huwelela Mfumo wa Yehova.
19. Ntlawa wa nandza lowo tshembeka wu tikombise njhani emahlweni ka 1918, wu phamele minkavelo ya swakudya swa moya hi tindlela tihi, naswona ku sukela rini?
19 Enkandziyisweni wa xona wa November 1, 1944, Xihondzo xo Rindza xa Xinghezi xi te: “Hi 1878, malembe ya makume mune emahlweni ka ku ta ka Hosi etempeleni hi 1918, a ku ri ni ntlawa wa Vakriste va xiviri lava tinyiketeleke lava va tshikeke tinhlengeletano ta vagwinehi ni ta vafundhisi ni lava laveke ku tirhisa Vukriste . . . Lembe leri landzeleke, ku nga July 1879, leswaku mintiyiso leyi Xikwembu hi ku tirhisa Kriste xi yi nyikeleke tanihi ‘swakudya hi nkarhi lowu faneleke’ yi hangalasiwa nkarhi hinkwawo eka ndyangu wa vana hinkwavo lava tinyiketeleke, magazini lowu, Xihondzo xo Rindza, wu sungule ku humesiwa.”
20. (a) Huvo leyi Fumaka ya manguva lawa yi humelele exivonweni hi ndlela yihi? (b) Swirho swa Huvo leyi Fumaka a swi ri karhi swi endla yini, naswona ehansi ka vukongomisi bya mani?
20 Loko wu nyikela rungula ehenhleni ka ku sungula ka Huvo leyi Fumaka ya manguva lawa, nkandziyiso wa Xihondzo xo Rindza xa Xinghezi, wa December 15, 1971, wu hlamuserile: “Malembe ya ntlhanu endzhakunyana [hi 1884] Zion’s Watch Tower Tract Society yi sunguriwile kutani yi tirha tanihi ‘xitirho’ xo yisa swakudya swa moya eka magidi ya vanhu lavanene lava lavaka ku tiva Xikwembu ni ku twisisa Rito ra xona . . . Vakriste lava totiweke, lava tinyiketeleke, lava khuvuriweke va sungule ku tihlanganisa ni Sosayiti yoleyo eyindlu-nkulu ePennsylvania. Ku nga khathariseki leswaku va le ka Huvo ya Vakongomisi kumbe e-e, va tiendle va kumeka eka ntirho wo hlawuleka wa ntlawa wa ‘nandza la tshembekaka, wo tlhariha.’ Va pfunetile eku phameleni ni le ku kongomiseni ka ntlawa wa nandza, kutani xisweswo huvo leyi fumaka yi sungule ku humelela. Leswi entiyisweni a swi ri ehansi ka nkongomiso wa matimba lama tirhaka kumbe moya lowo kwetsima lowu nga vonakiki wa Yehova. Nakambe ehansi ka nkongomiso wa Nhloko ya bandlha ra Vukriste, Yesu Kriste.”
21. (a) I vamani lava Kriste a va kumeke va ri karhi va phamela swakudya swa moya, naswona u va hakele hi ndlela yihi? (b) I yini leswi rindzeleke nandza lowo tshembeka ni Huvo ya yena leyi Fumaka?
21 Loko Yesu Kriste a kambele lava va tivulaka malandza ya yena hi 1918, u kume ntlawa wa matiko hinkwawo wa Vakriste wu ri karhi wu humesa mintiyiso ya Bibele leswaku yi tirhisiwa endzeni ka bandlha ni le handle entirhweni wo chumayela. Hi 1919 entiyisweni wu ve tanihi laha Kriste a vhumbeke ha kona: “Ku katekile nandza loyi a nga ta kumiwa a ri karhi a endlisa sweswo, siku n’wini wa yena a vuyaka. Ndzi tiyisile ndzi ri ka n’wina, ú ta vekiwa ku va mulanguteri wa rifuwo hinkwaro ra n’wini wa yena.” (Matewu 24:46, 47) Vakriste lava va ntiyiso va nghene eku tsakeni ka N’wini wa vona. Hi ku va va tikombisile va ri ‘lava tshembekaka eka swilo swi nga ri swingani,’ va hlawuriwe hi N’wini leswaku va ‘langutela swilo swo tala.’ (Matewu 25:21) Nandza lowo tshembeka ni Huvo ya yena leyi Fumaka a a rindzele xiavelo lexi engetelekeke. Mawaku ndlela leyi hi nga tsakaka ha yona leswi leswi swi nga va tano, hikuva Vakriste lava tshembekaka va vuyeriwa swinene entirhweni wa mbilu hinkwayo wa nandza lowo tshembeka ni Huvo ya yena leyi Fumaka!
Tinhla-nkulu To Ti Tsundzuka
◻ I mani Nhloko ya ndyangu wa Xikwembu, naswona Munhu loyi u nyike vuhosi eka vamani?
◻ I xiavelo xihi lexi hlanganeke lexi Kriste a xi nyikeke ntlawa wa nandza?
◻ I huvo yihi yin’wana leyi hlanganeke leyi veke kona eka ntlawa wa nandza, naswona a yi ri yihi mintirho ya yona leyi hlawulekeke?
◻ Loko Kriste a tile ku ta kambela ndyangu wa Xikwembu, i mani loyi a a phamela swakudya swa moya eka swirho swa wona?
◻ Huvo leyi Fumaka ya manguva lawa yi humelele hi ndlela yihi?
[Xifaniso lexi nga eka tluka 10]
“Nandza” wa lembe xidzana ro sungula a a ri ni huvo leyi fumaka leyi vumbiweke hi vaapostola ni vakulu va bandlha ra le Yerusalema