Ku Tirhisana Ni Huvo Leyi Fumaka Namuntlha
“Yi ta ṅwi v̌eka mulanguteri wa mitiro ya yena hikwayo.”—LUKA 12:44, “BX.”
1. Kriste u sungule ku fuma hi 33 C.E. eka mfumo wihi, naswona hi ku tirhisa yini?
HI PENTEKOSTA ya 33 C.E., Yesu Kriste, Nhloko ya bandlha, u sungule ku tirha swinene emfun’weni wa malandza ya yena lama totiweke hi moya. A endla tano hi ndlela yihi ke? Hi ku tirhisa moya lowo kwetsima, tintsumi ni huvo leyi fumaka leyi vonakaka. Hi laha muapostola Pawulo a kombiseke ha kona, Xikwembu ‘xi kutsule vahlawuriwa evulawurini bya munyama ivi xi va hundzisela emfun’weni wa N’wana loyi xi n’wi rhandzaka.’—Vakolosa 1:13-18; Mintirho 2:33, 42; 15:2; Vagalatiya 2:1, 2; Nhlavutelo 22:16.
2. Kriste u sungule ku fuma hi 1914 eka Mfumo wihi lowukulu?
2 Eku heleni ka ‘minkarhi leyi vekiweke ya vamatiko,’ Yehova u engetele matimba ya vuhosi ya Kriste, a ma kurisa ma hundza bandlha ra Vukriste. (Luka 21:24) Ina, hi lembe ra 1914, Xikwembu xi nyike N’wana wa xona matimba ya vuhosi ehenhla ka “matiko,” ‘ku fuma ka misava,’ vanhu hinkwavo.—Psalma 2:6-8; Nhlavutelo 11:15.
U Vekiwe Ku Va “Mulanguteri Wa Mitiro Ya Yena Hikwayo”
3, 4. (a) Eka xifaniso xa Yesu xa tipondho, i mani loyi a a yimeriwa hi wanuna loyi a tswariweke hi nghanakana? (b) I swiendlakalo swihi swa Mfumo leswi humeleleke hi 1918 na 1919?
3 Lexi xiyekaka laha i xikombiso xa Yesu xa wanuna la tswariweke hi nghanakana. (Luka 19:11-27) A nga si ya ekule leswaku a ya vekiwa hosi, wanuna loyi u nyike malandza ya yena mali (tipondho) leswaku va ti tirhisa. Loko a vuya, wanuna loyi, loyi a faniselaka Kriste, u vitane “malandza lawa a nga ma nyika mali, . . . leswaku a ta tiva leswi un’wana ni un’wana a bindzuleke swona.” (Luka 19:15) Xana leswi swi hetisise yini endzhaku ka loko Yesu a nyikiwe matimba ya vuhosi?
4 Hi 1918 Hosi Yesu Kriste la vekiweke exiluvelweni xa vuhosi u kume ntlawa wuntsongo wa Vakriste lava eku sunguleni va tshikeke tikereke ta Vujagana ni lava a va khomekile hi ku khathalela swilaveko swa N’wini wa vona swa laha misaveni. Endzhaku ko va basisa onge hi ndzilo, Yesu u nyike malandza ya yena vuhosi lebyi engetelekeke hi 1919. (Malakia 3:1-4; Luka 19:16-19) U va veke ku va ‘valanguteri va swilo swa yena hinkwaswo.’—Luka 12:42-44.
‘Mimphamelo Ya Swakudya Hi Nkarhi Lowu Faneleke’
5, 6. (a) I xiavelo xihi lexi kurisiweke lexi mulanguteri wa Kriste a xi kumeke? (b) I vuprofeta byihi lebyi a byi fanele ku hetisisiwa endzhaku ka 1914, naswona ntlawa wa mulanguteri a wu fanele ku hlanganyela hi ku chivirika eku hetisekeni ka byona hi ndlela yihi?
5 Hosi leyi fumaka Yesu Kriste yi nyike xiavelo lexi ndlandlamuxiweke eka mulanguteri wa yena, kumbe mulawuri wa yindlu, emisaveni. Vakriste lava totiweke a va fanele va va “vayimeri” va Xikwembu lava yimelaka hosi leyi tlhandlekiweke harhi, leyi nyikiweke matimba yo fuma ehenhla ka vanhu hinkwavo va misava. (2 Vakorinto 5:20; Daniel 7:14) Vutihlamuleri bya vona lebyi hlanganeke a byi nga ta va lebyiya byo nyika malandza laman’wana ya Kriste “swakudya hi nkarhi wa kona” ntsena. (Luka 12:42) Sweswi a va fanele va teka xiphemu lexikulu eku hetisiseni ka vuprofeta lebyi a byi ta hetiseka endzhaku ka ku simekiwa ka Mfumo hi 1914.
6 Leswi kahle-kahle a swi vula yini ke? A swi vula ku ndlandlamuxiwa ka ku chumayeriwa ka ‘mahungu lawa ya mfumo emisaveni hinkwayo leyi akiweke.’ (Matewu 24:14) Ku tlula kwalaho, a swi vula ku hangalasa marungula lama nga ni matimba ya ku avanyisa ehenhla ka mafambiselo lama hombolokeke ya Sathana ni vaseketeri va wona. Lebyi ku ve vuyelo byo ‘ninginisa matiko.’ Xisweswo, ‘swilo leswi rhandzekaka,’ “tinyimpfu tin’wana” ta Kriste, swi sungule ku nghena. (Hagai 2:7; Yohane 10:16) Ku sukela hi 1935 ku ya emahlweni “ntshungu lowukulu” wu sungule ku khitikanela enhlengeletanweni ya Yehova emisaveni hinkwayo. (Nhlavutelo 7:9, 10) Leswi swi vange nhluvuko lowukulu enhlengeletanweni. Hi ndlela yo fanekisela, maribye a ma ta siviwa hi nsimbhi, mhandzi hi koporo, nsimbhi hi silivhere ni koporo hi nsuku. (Esaya 60:17) Hinkwaswo leswi swi humelerile ku sukela hi 1919, ehansi ka nkongomiso lowukulu wa Yesu Kriste, loyi a nyikeke ntlawa wa yena wa nandza lowo tshembeka ni Huvo ya yena leyi Fumaka swilaveko swa yena hinkwaswo swa Mfumo emisaveni kumbe swilo swa yena.
7. Vutihlamuleri lebyi engeteriweke bya mulanguteri byi katse yini?
7 Hi nga swi twisisa hi ku olova leswaku ndzhwalo lowu engeteriweke wa vutihlamuleri lowu byarhisiweke nandza wa N’wini, mulanguteri, kumbe mulawuri wa yindlu wu katse mintirho leyikulu ya ku tsala ni ku hlela. Mimphamelo ya swakudya swa moya a yi fanele yi humesiwa minkarhi hinkwayo hi nkarhi wa kona eka Xihondzo xo Rindza. Hi 1919 The Golden Age (magazini lowu fambisanaka na xona lowu endzhakunyana wu veke Consolation, kutani wu va Awake!), wu sungule ku humesiwa leswaku wu pfuxa ku tsakela ka vanhu, ku engetela eku akeni ka ‘swirho swa ndyangu.’ (Matewu 24:45) Tibuku, swibukwana ni swiphephana leswo tala na swona swi humesiwile hi malembe layo tala.
Ku Basisiwa Loku Yaka eMahlweni
8. Swirho swa Huvo leyi Fumaka eku sunguleni a swi tivisiwa ku yini, naswona i marito wahi lama Xihondzo xo Rindza xa Xinghezi xi ma vuleke hi 1944?
8 Loko hi languta le ndzhaku ‘enkarhini lowu wa makumu,’ a swi hi hlamarisi leswi swirho swa Huvo leyi Fumaka eku sunguleni a swi tiviwa swinene tanihi ntlawa wa vahleri va Sosayiti ya Watch Tower. (Daniel 12:4) Xihloko lexi nge “Ku Ololoxa Ka Le Tilweni Namuntlha,” lexi humesiweke eka Xihondzo xo Rindza xa Xinghezi xa November 1, 1944, xi te: “Hi laha ku twisisekaka, lava va byarhisiweke ku humesa mintiyiso leyi paluxiweke ya Bibele a va langutiwa tanihi huvo leyi fumaka leyi hlawuriweke ya Hosi ku kongomisa hinkwavo lava naveleke ku gandzela Xikwembu hi moya ni ntiyiso ni ku xi tirhela hi vun’we eku hangalaseni ka mintiyiso leyi yi paluxiweke eka vanhu van’wana lava nga ni ndlala ni tora.”
9. Huvo leyi Fumaka eku heteleleni yi ve leyi tivekaka swinene hi ndlela yihi, naswona ha yini?
9 A ku ri ni swilaveko swa le nawini leswi katsekaka eku humeseni ka timagazini ni swipfuno swin’wana swo dyondza Bibele. Hikwalaho, Watch Tower Bible and Tract Society yi simekiwile ni ku tsarisiwa emfun’weni wa Pennsylvania, U.S.A. Hi malembe layo tala, Huvo leyi Fumaka leyi vonakaka yi sungule ku xiyiwa yi ri ni ntlawa wa swirho swa nkombo swa vakongomisi va vandla leri ri simekiweke ku humesa swipfuno swo dyondza Bibele leswi a swi laveka ivi swi tirhisiwa hi vanhu va Hosi emisaveni hinkwayo.
10, 11. I ku basisiwa kwihi loku endlekeke hi 1944, naswona i marito wahi lama vuriweke ehenhleni ka leswi eka Xihondzo xo Rindza xa Xinghezi?
10 Vakongomisi va nkombo va Sosayiti a va ri Vakriste lava tshembekaka. Kambe ntirho wa vona evandleni ra le nawini swi nga ha vula leswaku va kuma swikhundla swa vona eka Huvo leyi Fumaka hi mhaka ya leswi va hlawuriweke hi swirho swa le nawini swa Sosayiti ya Watch Tower. Nakambe, hi nawu vuxirho byo tano ni malunghelo ya byona ya ku nghenela nhlawulo eku sunguleni a byi nyikiwa vanhu vo karhi lava endleke minyikelo eka Sosayiti ntsena. Lunghiselelo leri ri lave ku hundzuriwa. Leswi swi endliwe eka nhlangano wa lembe na lembe wa vandla ra Pennsylvania ra Sosayiti ya Watch Tower lowu khomiweke hi October 2, 1944. Milawu ya Sosayiti yi cinciwile leswaku ku va xirho swi nga ha ngheneriwi hi mali. Swirho a swi ta hlawuriwa exikarhi ka malandza lama tshembekaka ya Yehova, naswona lawa ma katse vo tala lava tirhaka nkarhi hinkwawo eyindlu-nkulu ya Sosayiti, eBrooklyn, New York, ni le marhavini ya yona emisaveni hinkwayo.
11 Loko xi vika ehenhleni ka ku antswisiwa loku, Xihondzo xo Rindza xa Xinghezi xa November 1, 1944, xi te: “Mali, leyi hi laha yi yimeriweke ha kona hi minyikelo, a yi fanelanga ku tirhisiwa enhlawulweni, entiyisweni a yi fanelanga ku fambisana ni ku tatisa huvo leyi fumaka ya timbhoni ta Yehova emisaveni. . . . Moya lowo kwetsima, matimba lama tirhaka lama humaka eka Yehova Xikwembu hi ku tirhisa Kriste Yesu, hi wona lama fanelaka ku hlawula ni ku kongomisa emhakeni leyi.”
Yi Hambanile Ni Huvo Ya Vakongomisi
12. I yini leswi kombisaka leswaku Yehova u katekise ku antswisiwa ehansi ka vukongomisi bya Huvo leyi Fumaka?
12 Nhluvuko wa ntirho wo chumayela hi makume ya malembe lama landzeleke wu kombisa leswaku Yehova u katekise ku lulamisa loku hi ku twisisa ka Huvo leyi Fumaka. (Swivuriso 10:22) Phela nhlayo ya vahuweleri va Mfumo emisaveni hinkwayo yi tlakuke yi suka ehansi ka 130 000 hi 1944 yi ya eka 1 483 430 hi 1970! Kambe ku antswisa kun’wana a ka ha ta humelela.
13. (a) Ku fikela hi 1971, xiyimo a xi ri xihi malunghana ni Huvo leyi Fumaka? (b) Ku humelele yini eka nhlangano wa lembe na lembe wa Sosayiti hi 1971?
13 Ku fikela hi 1971, lava va Huvo leyi Fumaka a va ha tekiwa tanihi swirho swa nkombo swa huvo ya vakongomisi va Watch Tower Bible and Tract Society of Pennsylvania. Muungameri wa Sosayiti u byarhe vutihlamuleri lebyikulu byo endla swiboho leswi khumbaka ku tirha ka marhavi ya Sosayiti emisaveni hinkwayo. Kambe tinkulumo leti nga rivalekiki ti nyikeriwile eka nhlangano wa lembe na lembe lowu khomiweke hi October 1, 1971. Muungumeri wa Sosayiti u vulavule ehenhleni ka nhloko-mhaka leyi nge “Ku Tisa Ndhawu Leyi Kwetsimaka Eka Xiyimo Lexinene,” naswona xandla xa muungameri xi vulavule ehenhleni ka nhloko-mhaka leyi nge “Huvo Leyi Fumaka Hi Laha Yi Hambanaka Ha Kona Ni Vandla Ra Le Nawini.” Hi kwihi ku hambana loku nga kona exikarhi ka Huvo leyi Fumaka na vandla ra le nawini?
14. I ku hambana kwihi loku nga kona exikarhi ka vandla ra le nawini ni Huvo leyi Fumaka?
14 Hi laha ana se swi boxiweke ha kona, Watch Tower Bible and Tract Society of Pennsylvania yi ni huvo ya vakongomisi lava hikeriweke eka swirho swa nkombo. Vavanuna lava va Vakriste lava tinyiketeleke va hlawuleriwa malembe manharhu hi swirho swa vandla leswi endlaka ntsengo lowu nga tluriki 500, laha vo tala va vona va nga riki Vakriste lava totiweke. Ku tlula kwalaho, tanihi leswi vukona bya vandla byi nga enawini hi laha ku heleleke, ni yindlu-nkulu leyi vekeriweke ndhawu, byi nga herisiwa hi Khezari, hi leswaku Mfumo. (Marka 12:17) Hambi swi ri tano, Huvo leyi Fumaka a hi xitirho xa le nawini. Swirho swa yona a swi endleriwi nhlawulo. Va hlawuriwa hi moya lowo kwetsima ehansi ka nkongomiso wa Yehova Xikwembu na Yesu Kriste. (Ringanisa Mintirho 20:28.) Ku tlula kwalaho, lava va vumbaka Huvo leyi Fumaka i vavanuna lava hlawuriweke hi moya lava nga riki na ndhawu ya le nawini leyi kongomeke kumbe yindlu-nkulu.
15. I marito wahi malunghana ni nhlengeletano lama vuriweke eka Xihondzo xo Rindza xa Xinghezi xa December 15, 1971, naswona i yini leswi nga vuriwaka hi Huvo leyi Fumaka ya manguva lawa?
15 Loko ku tiwa eku twisiseni ka ku antswisiwa koloko, Xihondzo xo Rindza xa Xinghezi xa December 15, 1971 xi te: “Hi laha ku nkhensekaka timbhoni ta Yehova ta Vukriste ta swi tiva naswona ti seketela leswaku leyi a hi nhlengeletano ya vukhongeri ya munhu un’we, kambe leswaku yi na huvo leyi fumaka ya Vakriste lava totiweke hi moya.” Huvo leyi Fumaka ya ntlawa wa malandza lama totiweke ni ya timiliyoni ta vanghana va wona exikarhi ka tinyimpfu tin’wana hi laha ku humelelaka a yi hleriwe leswaku yi langutela ntirho wa yona wa vulanguteri.
16. Swilo swa Kriste swa laha misaveni swi engeteriwe hi ndlela yihi ku sukela hi 1971, naswona hi swihi swin’wana swa swona leswi a swi vekeke eka vulanguteri bya nandza lowo tshembeka ni wa vutlhari, loyi a yimeriwaka hi Huvo leyi Fumaka?
16 Swilo swa laha misaveni swa Hosi Yesu Kriste swi hambete swi kula. Ku sukela hi 1971, nhlayo ya Timbhoni yi tlakuke yi suka ehansi ka 1 600 000 yi ya eka nhlohlorhi yo tlula 3 700 000 hi 1989. Vona vumbhoni bya ku katekisa ka Xikwembu! (Esaya 60:22) Ku andza loku ku endle swi fanela ku kurisa miako eyindlu-nkulu ya Sosayiti ni le marhavini ya yona, ni ku antswisa maendlelo yo humesa ni ku hangalasa. Swi vange ku akiwa ka Tiholo ta Mfumo ni Tiholo ta Nhlengeletano to tala emisaveni hinkwayo. Hi nkarhi lowu fanaka, Huvo leyi Fumaka na yona yi hambetile yi byarha vutihlamuleri byo langutela ntirho wa ku chumayela, yi humesa matsalwa yo dyondza Bibele, ni ku hlawula valanguteri emarhavini, emigangeni, eswifundzeni ni le mabandlheni. Leswi i swilaveko swa Mfumo leswi Kriste a swi vekeke eka vulanguteri bya nandza la tshembekaka, wo tlhariha, la yimeriwaka hi Huvo leyi Fumaka ya yena.
17. I ku antswisiwa kwihi kun’wana eka vulanguteri loku endliweke hi 1971, 1974 na 1976?
17 Huvo leyi fumaka ya lembe xidzana ro sungula yi kurisiwe yi katsa ni van’wana lava nga riki vaapostola va Yesu. Loko mphikamakaneta ya ku yimbisiwa yi tlhantlhiwile, huvo yoleyo entiyisweni yi katse ni ‘vaapostola ni vakulukumba va le Yerusalema.’ (Mintirho 15:1, 2) Hi ku fanana, Huvo leyi Fumaka yi kurisiwile hi 1971 yi tlhela yi kurisiwa hi 1974. Leswaku yi olovisa ntirho wa yona wa vulanguteri, Huvo leyi Fumaka yi lunghiselele tikomiti ta ntlhanu leswaku ti sungula ku tirha hi January 1, 1976. Komiti yin’wana ni yin’wana yi vumbiwa hi swirho swo sukela eka swinharhu ku ya eka swa tsevu, leswi hinkwaswo ka swona swi fikelelaka yinhla yin’we etimhakeni leti kambisisiwaka. Mutshami wa xitulu wa komiti yin’wana ni yin’wana u tirha lembe rin’we, naswona xirho xin’wana ni xin’wana xa Huvo leyi Fumaka xi tirha eka yin’we kumbe ku tlula ya tikomiti leti. Yin’wana ni yin’wana ya tikomiti leti ta ntlhanu yi nyika nyingiso wo karhi eka mhaka leyi kongomeke ya swilo swa Kriste swa laha misaveni. Komiti ya vutsevu—Komiti ya Mutshami wa Xitulu, leyi ku va xirho xa yona swi rhendzelekaka lembe na lembe, yi tamela swiphiqo swa xihatla.
Ku Tirhisana Swinene Ni Huvo Leyi Fumaka
18. Huvo leyi Fumaka yi tirhisa ku yini, naswona hi yihi ndlela yin’wana leyi hi nga kombisaka ku tirhisana ka hina na yona?
18 Tikomiti ta Huvo leyi Fumaka ti khoma minhlangano ya vhiki na vhiki ku pfuxeta timhaka ta nkoka, ti endla swiboho endzhaku ka minkambisiso ya xikhongelo ni ku kunguhata ntirho lowu taka wa le tilweni. Hi laha ku kombisiweke ha kona eku sunguleni, Mintirho ndzima 15 yi kombisa leswaku xivutiso xo tika lexi lavaka xiboho xi yisiwe eka huvo leyi fumaka ya lembe xidzana ro sungula leswaku xi kambisisiwa. Hi ku fanana ni namuntlha, swivutiso swa nkoka swi yisiwa eka Huvo leyi Fumaka hinkwayo, leyi hlanganaka vhiki na vhiki kumbe nkarhi na nkarhi loko swi boha. Swirho swa Huvo leyi Fumaka, leswi sweswi swi nga 12 hi nhlayo, swi lava vukongomisi bya Yehova Xikwembu hi ku tirhisa Matsalwa na hi ku tirhisa xikhongelo. Ndlela yin’wana leyi hi kombisaka ku tirhisana ka hina ni Huvo leyi Fumaka i ku tsundzuka vahlawuriwa lava eswikhongelweni swa hina swa siku na siku hi laha ku hlawulekeke.—Varhoma 12:12.
19. Swiletelo swa Huvo leyi Fumaka swi fikisa ku yini emabandlheni?
19 Xana swiletelo ni swiboho swa Huvo leyi Fumaka swi fikisa ku yini emabandlheni? Endzhaku ka loko swirho swa huvo leyi fumaka ya lembe xidzana ro sungula swi fikelele xiboho xa swona hi mpfuno wa moya wa Xikwembu, swi rhumele papila emabandlheni. (Mintirho 15:22-29) Hambi swi ri tano, ndlela leyikulu namuntlha i ku tirhisa tibuku ta Vukriste.
20. (a) I ku antswisiwa kwihi kun’wana ka nhlengeletano loku endliweke hi 1976? (b) Xana Tikomiti ta Marhavi ti tirhisana hi ndlela yihi na Huvo leyi Fumaka?
20 Ku sukela hi February 1, 1976, rhavi rin’wana ni rin’wana ra Sosayiti ya Watch Tower a ri ri na Komiti ya Rhavi leyi vumbiweke hi vavanuna lava nga ni vutshila lava hlawuriweke hi Huvo leyi Fumaka. Tanihi vayimeri va Huvo leyi Fumaka va tiko kumbe matiko lama nga ehansi ka vukongomisi bya rhavi ra vona, vamakwerhu lava va fanele ku va vavanuna lava tshembekaka. Leswi swi hi tsundzuxa hi vavanuna va vutshila, lava chavaka Xikwembu lava tshembekaka lava pfuneke Muxe ku avanyisa vanhu eIsrayele wa khale. (Eksoda 18:17-26) Swirho swa Komiti ya Rhavi swi tirhisa swiletelo leswi amukeriweke hi ku tirhisa tibuku ta Sosayiti ni timagazini na Vutirheli Bya Hina Bya Mfumo, kun’we ni mapapila lama tolovelekeke ni mapapila lama hlawulekeke lama hlangavetanaka ni swiphiqo swa kwalaho. Tikomiti ta Marhavi minkarhi hinkwayo ti tivisa Huvo leyi Fumaka hi nhluvuko wa ntirho etikweni rin’wana ni rin’wana na hi swiphiqo leswi nga tlhekekaka. Swiviko swo tano leswi humaka emisaveni hinkwayo swi pfuna Huvo leyi Fumaka ku endla xiboho xa timhaka leti faneleke ku kambisisiwa etibukwini ta Sosayiti.
21. Valanguteri lava famba-fambaka va hlawuriwa hi ndlela yihi, naswona mintirho ya vona yi katsa yini?
21 Ehansi ka nkongomiso wa moya lowo kwetsima, Tikomiti ta Marhavi ti bumabumela vavanuna lava vupfeke, va moya ku tirha tanihi valanguteri va swifundza ni miganga. Endzhaku ka ku hlawuriwa hi ku kongoma hi Huvo leyi Fumaka, va tirha tanihi valanguteri lava famba-fambaka. Vamakwerhu lava va endzela swifundza ni mabandlha leswaku va swi aka etlhelweni ra moya ni ku swi pfuna ku tirhisa swiletelo leswi kumiweke eka Huvo leyi Fumaka. (Ringanisa Mintirho 16:4; Varhoma 1:11, 12.) Valanguteri lava famba-fambaka va yisa swiviko ehofisini ya rhavi. Hi mpfuno wa moya lowo kwetsima ni Matsalwa lama huhuteriweke, va pfunana ni vakulu va kwalaho eku bumabumeleni ka vamakwerhu lava fanelekaka ku hlawuriwa tanihi malandza ya vutirheli ni vakulu hi Huvo leyi Fumaka kumbe hi vayimeri va yona.—Vafilipiya 1:1; Tito 1:5; ringanisa 1 Timotiya 3:1-13; 4:14.
22. (a) Vakulu va bandlha va tirhisana njhani ni Huvo leyi Fumaka? (b) I yini leswi kombisaka leswaku Yehova u katekisa lunghiselelo leri ra le tilweni?
22 Hi ku fanana, lava va vumbaka tihuvo ta vakulu ‘va tikambela ni ku langutela ntlhambi, lowu va hlawuriweke ku va valanguteri va wona hi moya lowo kwetsima.’ (Mintirho 20:28) Valanguteri lava hi ku tshembeka va lava ni ku tirhisa swiletelo leswi humaka eka Yehova Xikwembu na Yesu Kriste hi ku tirhisa nandza lowo tshembeka ni wa vutlhari ni Huvo ya yena leyi Fumaka. Yehova wa ri katekisa lunghiselelo leri ra le tilweni, hikuva ‘mabandlha ma hambeta ma tiyisiwa eripfumelweni ni ku engeteleka hi nhlayo siku rin’wana ni rin’wana.’—Mintirho 16:5.
23. Malunghana ni Huvo leyi Fumaka, hi fanele hi tiyimisela ku endla yini?
23 I swinene swonghasi leswi hi ku tirhisa Huvo leyi Fumaka, Yehova Xikwembu ni N’wini, Yesu Kriste va kombisaka nseketelo eka vanhu va Xikwembu! (Psalma 94:14) Tanihi xiphemu xa nhlengeletano ya Yehova, ha un’we-un’we ha pfuneka eka nseketelo wo tano. (Psalma 145:14) Leswi swi fanele ku tiyisa ku tiyimisela ka hina ko tirhisana ni malunghiselelo ya Xikwembu. Hakunene, onge hi nga kumeka hi ri lava tirhisanaka ni Huvo leyi Fumaka ya Timbhoni ta Yehova minkarhi hinkwayo, loko hi kongome eka nkarhi lowu “ku tiv̌a Yehova ku [nga] ta eneta misav̌a, tani hi leŝi mati ma funengetaka v̌uento bya lwandle.”—Esaya 11:9.
Tinhla-nkulu To Ti Tsundzuka
◻ I vutihlamuleri byihi lebyi engetelekeke lebyi ntlawa wa nandza wu byi kumeke hi 1919?
◻ Hi malembe layo tala Huvo leyi Fumaka leyi vonakaka a yi tivisiwa ku yini?
◻ I ku antswisiwa kwihi loku hambetaka loku endliweke hi ku hlawuriwa ka swirho swa Huvo leyi Fumaka?
◻ Hi swihi swilo swin’wana swa Kriste swa laha misaveni leswi a swi byarhiseke ntlawa wa nandza ni Huvo leyi Fumaka ya yena?
◻ Hi nga tirhisana njhani na Huvo leyi Fumaka?
[Xifaniso lexi nga eka tluka 16, 17]
Yi ri eyindlu-nkulu ya yona ya misava hikwayo eBrooklyn, New York, Huvo leyi Fumaka yi langutela ntirho wa vukandziyisi na wo chumayela wa Timbhoni ta Yehova eka marhavi ya 93 ya Sosayiti ya Watch Tower
Jarimani
Japani
Arika Dzonga
Brazil