‘Yimani Mi Tiya’—Mi Nga Wi

MPHIKAMAKANETA leyikulu leyi langutaneke ni vanhu namuntlha hi liya ya vuhosi bya vuako hinkwabyo. Yehova u hi rhamba leswaku hi teka goza ivi hi katseka emhakeni leyi hi ku titsongahatela Hosi ya yena leyi vekiweke, Kriste Yesu. Ku ni xilaveko xa xihatla xo amukela xirhambo xa yena naswona eka malembe ya ntlhanu ntsena lama hundzeke, vanhu vo tlula miliyoni va endle tano. Kambe lava va kume leswaku ku katseka swo tala eku tekeni ka xiyimo ku tlula xiboho xa xihatla xo tirhela Yehova. Ku fanele ku va ni ku tinyiketela ka vutomi hinkwabyo. Xana hi ta xi hlayisa xiyimo xa hina loko swilo swi nonon’hwa? Kumbe hi ta tsana hakantsongo-ntsongo, endzhaku ka loko eku sunguleni ‘hi yime hi tiya’?—1 Vakorinto 16:13; Vaheveru 2:1.

Loko u nga si kuma ndlela ya Vukriste yi ri leyi olovaka, kuma nkhongotelo hi ku tiva leswaku leswi fanaka a swi ri tano hi Yesu Kriste. Ina, hambi ku ri N’wana la nga tswariwa a ri yexe wa Xikwembu a a boheka ku khongelela matimba leswaku a ta hlayisa xiyimo xa yena, ngopfu-ngopfu loko ndzingo wa yena lowukulu wu tshinela. N’wi anakanye a ri entangeni wa Getsemane, a khongela hi matimba a ku: “Abba, Tatana! Eka wena hinkwaswo swa endleka; xinwelo lexi xi tshinete kule na mina; ntsena ku nga endliwi ku rhandza ka mina, kambe a ku endliwe ku rhandza ka wena.” (Marka 14:36) A a swi tiva leswaku ndlela leyi nga emahlweni a yi nonon’hwa. A a swi tiva kahle leswaku vito ra Tata wa yena ri ta khumbeka. Hikwalaho, munhu a ri un’we la hetisekeke emisaveni a a nga ri na tingana ku kombela mpfuno.

Loko swilo swi nonon’hwa eka hina, hi na xihlovo lexi fanaka xa matimba lexi Yesu a a ri na xona. Hi nga khongelela mpfuno eka Yehova leswaku hi nga tshuki hi khunguvanyeka hi wa. Xana hi wahi makhombo lama nga ha humelelaka leswaku ma hi khunguvanyisa? Ku ma tiva ni ku lunghiselela ka ha ri emahlweni kumbexana swi nga ha hi pfuna ku papalata ku wa.

Nxaniso Wu Nga Hi Khunguvanyisa

Bibele ya tsundzuxa: “Hinkwavo lava navelaka ku hanya vutomi bya vukhongeri eka Kriste Yesu, va ta xanisiwa.” (2 Timotiya 3:12) Nxaniso wu nga hi khunguvanyisa naswona wu ta hi swivumbeko swo hambana-hambana. (Marka 4:17) Ku nga ha va ku yirisiwa ka le nawini—ku tisa khombo ra ku khotsiwa hambi ku ri rifu—ku hlaseriwa hi mintlawa, nkaneto wa siku na siku lowu tsanisaka ripfumelo wa munghana la kanetaka la tiyimiseleke kumbe ku hlekuriwa ka nkarhi na nkarhi hi vanghana va xikolo.

Nxaniso swa nonon’hwa ku wu tiyisela, kambe ha tsundzuxiwa leswaku wu ta humelela hi xivumbeko xo karhi. Hikwalaho, hi nga aka ripfumelo ra hina sweswi ivi hi dyondza ku titshega hi matimba ya Yehova leswaku loko nkarhi wu fika, hi ta swi kota ku tiyisela hi matimba wolawo. (1 Petro 4:13, 14; 5:6-11) Hambi swi ri tano, swihingakanyo hakanyingi swi tumberile swinene ku tlula nhlaselo wa tihanyi wa nxaniso.

Swilo Leswi Hetaka Matimba Swi Nga Tsanisa Ripfumelo

I mani la nga wu tsundzukiki ntlhaveko wa tingana loko ha ha ri swihlangi ivi hi titwa hi khomisiwe tingana? Wa ha wu tsundzuka nkarhi lowu Papa a tshembiseke nchumu wo hlawuleka ku wu endlela ndyangu kutani hikwalaho ka xivangelo xo karhi a cinca mianakanyo ya yena? Kumbe nkarhi lowu a a ta famba na n’wina entangeni wa swiharhi ivi loko ku sale nkarhinyana ntsena a nga ha yi? Vona ndlela leyi a wu hetiwe matimba ha yona!

Vakriste lava kuleke na vona va nga hetiwa matimba naswona leswi etimhakeni tin’wana swi vange khombo hi tlhelo ra moya. Van’wana va veke ntshembo wa vona eka siku leri va tiyisekeke leswaku Armagedoni a yi ta ta ha rona. Loko ku nga humeleli nchumu hi siku rero, va titwe va hetiwe matimba. Van’wana va hetiwe matimba loko lunghelo leri a va ri languterile ri nga fiki. Ku tlula kwalaho, vanhu va nga va lava hetanaka matimba. Nhwanyana un’wana wa malembe ya 18 hi vukhale u byele vatswari va yena leswaku a a hetiwe matimba hi ku tikhoma ka majaha man’wana ebandlheni—ni ku tsandzeka ka vatswari va vona ku va laya—lerova a nga lavi ku twa nchumu hi ntiyiso.

Hambi loko ku hela matimba swi twisiseka eka swiyimo leswi hinkwaswo, xana munhu la hetiweke matimba u fanele ku khunguvanyeka a tshika vuxaka bya yena na Yehova? Anakanya hi ku hetiwa ka Yesu matimba loko vaapostola va yena va tshamela ku kanetana leswaku i mani la nga nkulukumba eka vona, xisweswo va kombisa langutelo ra ku tinavelela swa le henhla. (Luka 9:46; 22:24) Nakambe, anakanya ku hetiwa ka Yobo matimba loko vanghana vanharhu lava a va fanele va n’wi pfuna va n’wi hundzukela ivi va sungula ku kanakana ku tshembeka ka yena! (Yobo 22:5-10) Kambe, Yesu na Yobo a va khunguvanyekanga.

Vanhu hinkwavo va tsanile, kutani swi nga va vuhunguki ku pfumelela swihoxo swa van’wana swi khumba vuxaka bya hina na Yehova. (Psalma 51:5) Ku nga hetiseki ka van’wana a ku fanelanga ku hi sivela ku vona ntirho wo hlamarisa lowu Yehova a wu endlaka loko a ri karhi a hlengeleta ‘swilo hinkwaswo nakambe eka Kriste.’ (Vaefesa 1:9, 10) Tsundzuka leswaku i vanhu lava nga hetisekangiki, lava dyoheke ku fana na hina lava Yehova a va hlengeletaka, vanhu lava lavaka ndzayo ni ku basisiwa leswaku va tiya. (Psalma 130:3) Nala wa hina a hi makwerhu wa hina la nga hetisekangiki kambe i Sathana, la lavaka ku hi bvanyangeta loko a swi kota. A nge humeleli loko hi ‘teka xiyimo xa hina ku lwisana na yena, hi tiyile eripfumelweni.’ (1 Petro 5:8, 9) Loko hi ri na ripfumelo ro tano, hi nga ka hi nga “khomiwi hi tingana.”—Varhoma 9:33.

Ku Tiavanyisa Ku Nga Onha

Van’wana va lahle vuxaka bya vona na Yehova Xikwembu hikwalaho ka ku tivona va nga faneleki. Hi ku vona ku tsana ni swihoxo swa vona, va fikelela makumu ya leswaku Yehova a nge wu amukeli ntirho wa vona. Va vona onge eka un’wana wo fana na vona ku tivula leswaku hi wun’wana wa Timbhoni ta Yehova i vukanganyisi. Xana u tshama u titeka hi ndlela yo tano? Loko swi ri tano, u fanele u lwisana ni mintlhaveko yo tano.

Xana u titwa u nga faneleki ku tirhela Yehova? Kutani tivutise, ‘I mani la faneriwaka hi lunghelo leri rikulu?’ Vakriste hinkwavo va lwisana ni ku nga hetiseki ka vona nkarhi na nkarhi. Hambi ku ri muapostola Pawulo u vilerile: “Loko ndzi navela ku endla leswo lulama, leswo biha na swona swi kona eka mina.” (Varhoma 7:21) Xana Pawulo a a ri mukanganyisi hi mhaka ya leswi minkarhi yin’wana a a endla swilo leswi hoxeke? Doo. Mukanganyisi i munhu la tiendlaka leswi a nga riki swona. Loko hi ringeta ku endla leswi lulameke kambe hi hoxa nkarhi na nkarhi eka hina vini, xana sweswo swi hi endla vakanganyisi? Doo.

Bibele yi khutaza ku ‘ambala vumunhu lebyintshwa.’ (Vaefesa 4:24) Kambe, xana sweswo swi vula leswaku hi lahlekeriwa hi mikhuva hinkwayo ya vumunhu bya khale? E-e. Eka papila ra yena ro ya eka Vakolosa, Pawulo u vule leswaku vumunhu lebyintshwa bya ‘pfuxetiwa’ hi vutivi lebyi kongomeke. (Vakolosa 3:9, 10) Xiga lexi nge ‘ku pfuxetiwa’ xi vula goza leri hambetaka. Kutani ku cinca vumunhu bya hina i endlelo leri yaka emahlweni. Kutani ke, a swi hlamarisi leswi minkarhi yin’wana hi kumaka swihoxo eka hina vini.

Kavula, leswi a swi hunguti ntikelo wa xidyoho, kumbe ku vula leswaku hi nga pfumelela ku hluriwa hi ndzingo handle ko endla matshalatshala, hi anakanya leswaku Yehova u ta hi rivalela hi ku olova. Kambe swa hi pfuna leswaku hi nga tixopaxopi hi ndlela leyi hoxeke. Naswona swi hi endla hi ya hi rhandza Yehova hi mhaka ya leswi a nyikeleke gandzelo ra nkutsulo ra Kriste leswaku hi ta N’wi tirhela ku nga khathariseki xivumbeko xa hina xa vudyoho xa ndzhaka.

Muapostola Yohane u nyikele langutelo leri ringaniseriweke emhakeni leyi loko a te: “Ndzi mi tsalela timhaka leti leswaku mi ta ka mi nga dyohi.” Kambe hi ndlela leyi twalaka u engeterile: “Kambe loko un’wana a tshuka a dyoha [hikwalaho ka ku nga hetiseki ka vumunhu], hi ni muyimeri eka Tatana, a nga Yesu Kriste.” (1 Yohane 2:1) Ematshan’wini yo tiavanyisa ku tlula mpimo, vutivi lebyi mayelana ni xiyimo xa hina ni mpfuno lowu Yehova a wu nyikeleke swi hi endla hi engeta marito ya Pawulo: “A ku nkhensiwe Xikwembu ha Yesu Kriste, Hosi ya hina!”—Varhoma 7:25.

U Nga Tshami U Khunguvanyekile

Yesu u nyikele xitsundzuxo xa matimba eka un’wana ni un’wana la nga vaka xikhunguvanyiso: “Kambe loyi a khunguvanyisaka un’wana wa lavatsongo lava va pfumelaka ka mina, swi nga antswa loko a boheleriwa ribye ra ku sila enhan’wini, a hoxiwa exidziveni xa lwandle.” (Matewu 18:6) Kambe ku vuriwa yini hi loyi a khunguvanyisiweke? Loko hi khunguvanyisiwe hi munhu wo karhi kumbe swiyimo swo karhi, xana hi fanele hi tiyimelela ivi hi ku, “A hi xihoxo xa mina, a ndzi nge he yi emahlweni ndzi tirhela Yehova”?

Xiya xifaniso. Xana u tshama u rheta ehenhla ka ayisi kumbe ku wa exitepisini? Kumbexana khombo leri ri lo ku juma. Swa twisiseka leswaku u tikume u etlele ehansi. Kambe xana u endle yini endzhaku ka sweswo? Xana u te: “A hi xihoxo xa mina leswi ndzi nga etlela laha. I ayisi [kumbe xitepisi] lexi faneleke ku soriwa. Kutani a ndzi nge he yimi nakambe”? Handle ko kanakana, u yimile u suka eka xivono lexi khomisaka tingana hi xihatla hi laha u koteke ha kona.

Xana sweswo a swi nge vi ntiyiso etimhakeni ta moya? Loko hi khunguvanyisiwa hi swiyimo swo karhi kumbe hi Vakriste-kulorhi, xexo i xiphiqo lexikulu lexi faneleke ku tlhantlhiwa. Hambi swi ri tano, loko hi tshama hi khunguvanyekile, hi tshamela ku sola un’wana hi xiphiqo xa hina, xana a hi ntiyiso leswaku xiyimo xa hina xi ya xi va xihoxo xa hina?

Lexi tsakisaka, loko hi khunguvanyisiwile, vakulu ni van’wana lava vupfeke va tiyimiserile ku pfuna. (Vagalatiya 6:1) Naswona Yehova u nyika matimba eka lava tiyimiseleke ku n’wi tirhela ku nga khathariseki ku nonon’hwa loku vaka kona. (Vafilipiya 4:13) Kutani minkarhi hinkwayo hi fanele hi tiyimisela ku kombela mpfuno loko swi tikomba onge nchumu wo karhi wu ta kavanyeta xiyimo xa hina lexi tiyeke eka Yehova ni Mfumo wa yena. Kutani a hi nge endli leswaku Sathana a hlula hi ku khunguvanyeka ivi hi tshama ehansi.

U Yime Kwihi?

Siku na siku, malandza lama tinyiketeleke ya Xikwembu ma langutana ni timhaka leti ringaka ku tinyiketela ka wona eka Yehova. Ku nga khathariseki leswaku va boheka ku langutana na yini, va fanele va yima kutani va hlayeriwa etlhelweni ra Hosi ya Yehova ya Vumesiya. Vafumi va matimba va misava leyi va teke xiyimo xa vona “ku pfukela Yehova ni Muhlawuriwa wa yena.” Mawaku lunghelo leri hi nga na rona ro n’wi yimela!—Psalma 2:2.

Hambi swi ri tano, a hi nge lwisani ni nkucetelo wa mafambiselo hinkwawo ya misava hi ri hexe, kutani ha khongoteriwa hi xitshembiso xa Yesu xo va ni bandlha ra yena “ku ko ku hela misava.” (Matewu 28:20) U ta hi seketela. Ku tlhandlekela kwalaho, mpfuno lowukulu wa ta loko hi namarhela Yehova ni ku lava nseketelo wa yena. Ku hundzukela eRitweni ra yena swi nga hi nyika matimba. Loko hi titwa hi nga ha swi koti ku tiyisela, Psalma 55:22 yi hi rhamba leswaku hi ‘nyiketa Yehova mindzhwalo ya hina kutani yena hi yexe u ta hi tiyisa. A nge pfumeleli lowo lulama a tsekatsekisiwa.’ Ina, Bibele yi khutaza vanhu va Xikwembu hinkwavo leswaku ‘va yima va tiya eripfumelweni’—va nga wi.—1 Vakorinto 16:13.