Chava Yehova, Muyingisi Wa Xikhongelo
“Wena l’a yingisaka mikhongelo! V̌anhu hikwav̌o v̌a ta ta ka wena!”—PSALMA 65:2.
1. Ha yini hi fanele hi langutela leswaku Yehova a va ni swilaveko eka lava navelaka ku n’wi tshinelela hi xikhongelo?
YEHOVA XIKWEMBU i ‘Hosi leyi nga riki na ku hela.’ Nakambe hi “l’a yingisaka mikhongelo,” loyi “v̌anhu hikwav̌o v̌a [nga] ta [ya eka yena].” (Nhlavutelo 15:3; Psalma 65:2) Kambe xana va fanele va yisa ku yini eka yena? Tihosi ta misava ti tirhisa swilo swo tanihi swiambalo ni mukhuva wa lava pfumeleriweke ku ya eka tona. Kutani ke, entiyisweni hi fanele hi langutela Hosi leyi nga riki na ku Hela leswaku yi va ni swilaveko leswi faneleke ku fikeleriwa hi un’wana ni un’wana la navelaka ku ta emahlweni ka yona hi xikombelo ni ku nkhensa.—Vafilipiya 4:6, 7.
2. Hi swihi swivutiso leswi tlakukaka emhakeni ya xikhongelo?
2 Xana i yini lexi Hosi leyi nga riki na ku Hela yi xi lavaka eka lava yi tshinelelaka hi xikhongelo? I vamani lava khongelaka naswona va twiwa? Naswona xana va nga khongela mayelana na yini?
Ku Vulavula Ni Hosi Leyi Nga Riki Na Ku Hela
3. Hi swihi swikombiso leswi u nga swi nyikaka swa swikhongelo leswi nyikeriweke hi malandza ya Xikwembu yo sungula naswona xana a va n’wi tshinelela hi ku tirhisa muhlanganisi?
3 Adamu “[n’wana] wa Xikwembu,” loko a nga si va mudyohi, swi le rivaleni leswaku a vulavula ni Hosi leyi nga riki na ku hela. (Luka 3:38; Genesa 1:26-28) Loko Avele n’wana wa Adamu a nyikele “mativ̌ula ya ntlhambi wa yena” eka Xikwembu, handle ko kanakana magandzelo lawa a ma fambisana ni marito ya xikombelo ni ya ku dzunisa. (Genesa 4:2-4) Nowa, Abrahama, Isaka na Yakobo va ake tialtari naswona va tshinelele Yehova hi xikhongelo ni magandzelo ya vona. (Genesa 8:18-22; 12:7, 8; 13:3, 4, 18; 22:9-14; 26:23-25; 33:18-20; 35:1, 3, 7) Naswona swikhongelo swa Solomoni, Ezra ni vapisalema lava huhuteriweke hi Xikwembu swa kombisa leswaku Vaisrayele a va tshinelela Yehova ku nga ri na muhlanganisi.—1 Tihosi 8:22-24; Ezra 9:5, 6; Psalma 6:1, 2; 43:1; 55:1; 61:1; 72:1; 80:1; 143:1.
4. (a) Hi yihi ndlela leyintshwa ya ku tshinelela Xikwembu hi xikhongelo leyi sunguriweke hi lembe xidzana ro sungula? (b) Ha yini swi fanerile hi laha ku hlawulekeke leswaku xikhongelo xi nyikeriwa hi vito ra Yesu?
4 Ku tshinelela Xikwembu lokuntshwa ku sunguriwe hi lembe xidzana ro sungula ra Nguva ya hina leyi Tolovelekeke. A ku ri hi ku tirhisa N’wana wa xona, Yesu Kriste, loyi hi laha ku hlawulekeke a a rhandza vanhu. Eka vutomi bya yena bya le mahlweni ka ku va munhu, Yesu u tirhe hi ntsako tanihi “mutirhi lonkulu,” a tsakela swilo leswi khumbaka vanhu. (Swivuriso 8:30, 31, NW) Tanihi munhu laha emisaveni, Yesu hi rirhandzu u pfune vanhu lava nga hetisekangiki emoyeni, a tshungula lava vabyaka ni ku pfuxa vafi. (Matewu 9:35-38; Luka 8:1-3, 49-56) Eka hinkwaswo, Yesu ‘u nyikele moya wa yena tanihi nkutsulo wa vo tala.’ (Matewu 20:28) Kutani ke, swi fanela swinene swonghasi leswaku lava va tiambexaka nkutsulo va tshinelela Xikwembu ha yena loyi a rhandzaka swinene vanhu! Leyi sweswi yi nga yona ntsena ndlela yo tshinelela Hosi leyi nga riki na ku Hela, hikuva Yesu hi yexe u te: “A ku na munhu loyi a taka eka Tatana, loko ku nga ri ha mina” naswona, “Xin’wana ni xin’wana lexi mi nga ta xi kombela eka Tatana hi vito ra mina, ú ta mi nyika xona.” (Yohane 14:6; 16:23) Ku kombela swilo hi vito ra Yesu swi vula ku n’wi xiya tanihi ndlela yo tshinelela Muyingisi wa xikhongelo.
5. Hi rihi langutelo ra Xikwembu hi misava ya vanhu, naswona leswi swi khumbana njhani ni xikhongelo?
5 Ngopfu-ngopfu hi fanele hi tlangela rirhandzu leri Yehova a ri kombiseke hi ku lunghiselela nkutsulo. Yesu u te: “Hikuva Xikwembu xi rhandzile misava [ya vanhu] swonghasi, xi ko xi nyika N’wana wa xona la nga un’we, leswaku un’wana ni un’wana la pfumelaka ka yena, a nga lovi, kambe a va ni vutomi lebyi nga heriki.” (Yohane 3:16) Ku enta ka rirhandzu ra Xikwembu ku hlamuseriwa kahle hi marito ya mupisalema: “Hikuv̌a hi laha matilo ma tlakukeke henhla ka misav̌a, hi ŝeŝo nsov̌o wa yena wu kurile henhla ka la’v̌a ṅwi tšhav̌aka; hi laha v̌uša byi hambaneke ni v̌upeladyambu, o hambanyisile ŝeŝo e ku dyoha ka hina kule na hina. Hi laha tatana a nga ni tintŝalo e ka v̌ana v̌a yena, hi ŝeŝo Yehova o ni tintŝalo e ka la’v̌a ṅwi tšhavaka. Hikuv̌a wa tiv̌a leši hi endliweke ha šona, wa ṭunḍuka leŝaku hi nṭhuri ntsena.” (Psalma 103:11-14) Swi tsakisa swinene swonghasi ku tiva leswaku swikhongelo swa Timbhoni leti tinyiketeleke ta Yehova swi tlhandlukela eka Tata wo tano la nga ni rirhandzu hi N’wana wa yena!
Lunghelo Leri Hikiweke
6. Xana Yehova u fanele a tshineleriwa hi langutelo rihi exikhongelweni?
6 Tihosi ta vanhu a ti pfumeleli un’wana na un’wana ku nghena endlwini ya vuhosi handle ko twarisiwa. Ku hlengeletana emahlweni ka hosi i lunghelo leri hikiweke. Xi tano xikhongelo eka Hosi leyi nga riki na ku hela. Kavula, lava va yi tshinelelaka ha Yesu Kriste hi ku tlangela loku faneleke ka vukulukumba lebyi vangamaka bya Xikwembu va langutela ku yingisiwa. Hosi leyi nga riki na ku Hela yi fanele yi tshineleriwa hi langutelo ra xichavo, ra ku gandzela. Naswona lava va navelaka ku yingisiwa va fanele va kombisa “ku tšhav̌a Yehova.”—Swivuriso 1:7.
7. Xana “ku tšhav̌a Yehova” i yini?
7 Xana “ku tšhav̌a Yehova” i yini? I xichavo lexi tengeke eka Xikwembu, lexi fambisanaka ni ku chava lokunene ka ku xi hlundzukisa. Xichavo lexi xi huma eka ku tlangela loku enteke ka tintswalo ni vunene bya xona. (Psalma 106:1) Swi katsa ku n’wi xiya tanihi Hosi ya hi laha ku nga heriki, la nga ni mfanelo ni matimba yo tisa nxupulo, ku katsa ni rifu ehenhla ka wihi na wihi la nga n’wi yingisiki. Vanhu lava kombisaka ku chava Yehova va nga khongela eka yena ni ku langutela ku yingisiwa.
8. Hikwalaho ka yini Xikwembu xi yingisa swikhongelo swa lava xi chavaka?
8 Entiyisweni, Xikwembu a xi swi yingisi swikhongelo swa vanhu lavobiha, lava nga tshembekiki ni lava tiendlaka vo lulama. (Swivuriso 15:29; Esaya 1:15; Luka 18:9-14) Kambe lava chavaka Yehova va yingisiwa hi mhaka ya leswi va landzeleleke mimpimanyeto ya yena yo lulama. Hambi swi ri tano, va endle swo tala. Lava chavaka Yehova va tinyiketele eka Xikwembu hi xikhongelo naswona va kombisa leswi hi ku nghenela nkhuvulo wa mati. Xisweswo va ni lunghelo leri nga hikiwangiki ra xikhongelo.
9, 10. Xana vanhu lava nga khuvuriwangiki va nga khongela va ri ni ntshembo wa ku yingisiwa?
9 Leswaku munhu a twiwa hi Xikwembu, u fanele a vula marito ya xikhongelo lama fambisanaka ni ku rhandza ka Xikwembu. Ina, u fanele a tshembeka, kambe ku laveka swo tala. Muapostola u tsarile: “Kutani ehandle ka ku pfumela a swi endleki ku tsakisa Xikwembu. Un’wana ni un’wana loyi a lavaka ku tshinelela Xikwembu ú fanele ku pfumela leswaku xi kona, ni leswaku xi hakela lava va xi lavaka.” (Vaheveru 11:6) Kutani ke, xana vanhu lava nga khuvuriwangiki va nga khutaziwa ku khongela va ri na ntshembo wo yingisiwa?
10 Hi ku xiya leswaku xikhongelo i lunghelo leri hikiweke, Hosi Solomoni u kombele leswaku Yehova a yingisa ntsena vanhu vambe lava a va khongela eka Xikwembu etempeleni eYerusalema. (1 Tihosi 8:41-43) Malembe xidzana endzhakunyana, Korneliyo muluveri Wamatiko ‘u hambete a khongela eka Xikwembu’ tanihi munhu la tinyiketeleke. Loko a kume vutivi lebyi kongomeke, Korneliyo u tinyiketele eka Xikwembu, lexi endzhaku xi n’wi nyikeke moya lowo kwetsima. Endzhaku ka leswi, Korneliyo ni Vamatiko van’wana va khuvuriwile. (Mintirho 10:1-44) Ku fana na Korneliyo, un’wana ni un’wana la endlaka nhluvuko wo ya eku tinyiketeleni a nga ha khutaziwa ku khongela. Kambe munhu la nga tiyimiselangiki ku dyondzo Matsalwa, la nga swi tiviki swilaveko swa Xikwembu ehenhleni ka xikhongelo, ni la nga si kombisaka langutelo leri tsakisaka eka Xikwembu a nge vuriwi la chavaka Yehova, la nga ni ripfumelo kumbe la n’wi lavaka hi xiviri. Munhu wo tano a nga le ka xiyimo xo nyikela swikhongelo leswi amukelekaka eka Xikwembu.
11. Xana ku humelele yini eka van’wana lava a va endla nhluvuko wa ku ya eku tinyiketeleni, naswona xana va fanele va tivutisa yini?
11 Van’wana lava nkarhi wun’wana a va endla nhluvuko wo ya eku tinyiketeleni endzhakunyana va voneke va kokela endzhaku. Loko va nga ri na rirhandzu leri aneleke ra Xikwembu etimbilwini ta vona leswaku va endla ku tinyiketela loku nga hikiwangiki, va fanele va tivutisa loko va ha ri na rona lunghelo leri hlamarisaka ra xikhongelo. Va hava, hikuva lava tshinelelaka Xikwembu va fanele va ri lava xi lavaka hi xiviri naswona va ri vo lulama ni lavanene. (Sofonia 2:3) Un’wana ni un’wana la chavaka Yehova hakunene, i mupfumeri la tinyeketeleke eka Xikwembu naswona u ku kombisa hi ku khuvuriwa. (Mintirho 8:13; 18:8) Naswona i vapfumeri lava khuvuriweke ntsena lava nga ni lunghelo leri nga hikiwangiki ra ku tshinelela Hosi leyi nga riki na ku Hela hi xikhongelo.
“Khongelani . . . Hi Moya Lowo Kwetsima”
12. Hi rini laha ku nga vuriwaka leswaku munhu u ‘khongela hi moya lowo kwetsima’?
12 Loko munhu a tinyiketerile eka Xikwembu ivi a ku kombisa hi ku khuvuriwa, u le ka xiyimo xo ‘khongela hi moya lowo kwetsima.’ Malunghana na leswi Yuda u tsarile: “Kambe n’wina, varhandziwa, tiakeni eku pfumeleni ka n’wina loko hlawuleka ngopfu. Khongelani hi matimba hi Moya lowo Kwetsima. Tshamani erirhandzwini ra Xikwembu. Langutelani musa wa Hosi ya hina Yesu Kriste lowu yisaka evuton’wini lebyi nga heriki.” (Yuda 20, 21) Munhu u khongela hi moya lowo kwetsima loko a khongela hi ku susumetiwa hi moya wa Xikwembu kumbe matimba lama tirhaka na hi ku pfumelelana ni swilo leswi vuriweke eRitweni ra xona. Matsalwa, lama tsariweke ehansi ka ku huhuteriwa hi moya wa Yehova, ma kombisa ndlela yo khongela ni leswi hi nga swi kombelaka loko hi khongela. Hi xikombiso, hi ku tiyiseka hi nga khongelela leswaku Xikwembu xi hi nyika moya wa xona wo kwetsima. (Luka 11:13) Loko hi khongela hi moya lowo kwetsima, swikhongelo swa hina swi paluxa xiyimo xa mbilu leyi Yehova a yi rhandzaka.
13. Loko hi khongela hi moya lowo kwetsima, hi ta papalata yini, naswona hi xihi xitsundzuxo xa Yesu lexi hi nga ta xi tirhisa?
13 Loko hi khongela hi moya lowo kwetsima, swikhongelo swa hina a swi tatiwi hi marito ya ku bokoloka. A swi na swivulwa leswi nhlokohatiweke. E-e, a swi tali hi ku dzunisa ka ku hetisisa nawu, marito ya ku ndzunisa lama nga riki ya xiviri. Swikhongelo swa muxaka wolowo swi tele eVujaganini ni le ka Babilona Lonkulu, mfumo wa misava wa vukhongeri bya mavunwa. Kambe Vakriste va ntiyiso va yingisa xitsundzuxo xa Yesu: “Loko mi khongela, mi nga fani ni vakanganyisi; hikuva vona va rhandza ku khongela va yimile emasinagogeni ne mahlanganeni ya tindlela, leswaku va ta voniwa hi vanhu. . . . Loko mi khongela, mi nga bokoxeli kukota vamatiko, hikuva [hi xihoxo] va anakanya leswaku hi ku tata marito va ta yingisiwa. Mi nga tshuki mi fana na vona.”—Matewu 6:5-8, Byington.
14. Hi tihi tinhlamuselo leti twalaka leti van’wana va tiendleke mayelana ni xikhongelo?
14 Ku tlhandlekela eka Yesu ni vatsari va Bibele, van’wana va vule marito lama twisekaka mayelana ni xikhongelo. Hi xikombiso, mutsari wa Munghezi John Bunyan (1628-88) u te: “Xikhongelo i ku phofula moya, loku humaka embilwini, ka xiviri, loku twalaka, eka Xikwembu ha Kriste, hi matimba ni ku pfuniwa hi Moya, hikuva swilo swo tano Xikwembu xi swi tshembisile.” Mufundhisi wa Mupuritan Thomas Brooks (1608-80) wa xiya: “Xikwembu a xi languti marito ya vutlhari ya swikhongelo swa wena, ndlela leyi swi fuweke ha yona; kumbe mpimo wa swikhongelo swa wena, ku leha ka swona; kumbe nhlayo ya swikhongelo swa wena, leswaku i swingani; kumbe ku hleleka ka swikhongelo swa wena, ndlela leyi swi andlariweke ha yona; kambe xi languta ku pfumala vukanganyisi eka swona.” Eka tinhlamuselo leti ku nga engeteriwa marito ya Bunyan: “Exikhongelweni swa antswa ku va na mbilu leyi nga hava marito, ku tlula marito la ma nga hava mbilu.” Kambe loko hi nga soleki naswona hi swi fikelela swilaveko swa Xikwembu, xana hi nga tiyisekisa ku yini leswaku Hosi leyi nga riki na ku hela yi ta swi yingisa swikhongelo swa hina?
A Nga Fularheli
15. Hi ku komisa, i yini leswi Yesu a swi vuleke eka Luka 11:5-8?
15 Yehova a nga tshiki ku yingisa swikhongelo swa malandza ya yena lama tinyiketeleke. Leswi swi vekiwe erivaleni hi marito ya Yesu lama kufumetaka mbilu loko vadyondzisiwa va yena va kombele ndzetelo ehenhleni ka xikhongelo. Hi ku komisa u te: “Un’wana wa n’wina a nga va ni nakulobye, kutani a ya eka yena exikarhi ka vusiku, a ku ka yena: ‘Nakulorhi, ndzi lombe swinkwa swinharhu hikuva nakulorhi un’wana la nge riendzweni ú fikile kwala ka mina, kutani ndzi pfumala leswi ndzi nga n’wi fihlutaka ha swona.’ Kambe yena a n’wi hlamula a ri ndlwini a ku: ‘U nga ndzi karhati, nyangwa yi pfariwile; mina ni vana hi etlele, a ndzi swi koti ku pfuka, ndzi ku nyika.’ Mina ndzi ri: Hambiloko a nga lavi ku pfuka a n’wi nyika, hi mhaka ya vunakulobye bya vona ú ta kala a pfuka, a n’wi nyika hinkwaswo leswi a swi lavaka hikuva wa sindzisa.” (Luka 11:1, 5-8) Xana a yi ri yihi yinhla ya xifaniso lexi?
16. Malunghana ni xikhongelo, i yini lexi Yesu a lavaka leswaku hi xi endla?
16 Yesu entiyisweni a nga vuli swona leswaku Yehova a nga swi lavi ku hi pfuna. Ematshan’weni ya sweswo, Kriste u lava leswaku hi tshemba Xikwembu hi ku helela ni ku xi rhandza swinene lerova hi khongela handle ko karhala. Xisweswo, Yesu u ya emahlweni: “Hikokwalaho ke ndzi ri ka n’wina: Kombelani, mi ta nyikiwa; lavani, mi ta swi kuma; gongondzani, mi ta pfuleriwa, hikuva un’wana ni un’wana la kombelaka, wa nyikiwa; la lavaka, wa swi kuma; ku ta pfuleriwa la gongondzaka.” (Luka 11:9, 10) Kutani ke, entiyisweni, hi fanele hi hambeta hi khongela loko hi tokota nxaniso, gome hikwalaho ka ku tsana ka munhu hi xiyexe loku enteke swinene kumbe ndzingo wihi na wihi wun’wana. Yehova hi minkarhi hinkwayo u tiyimiserile ku pfuna malandza ya yena lama tshembekaka. A nga hi hlamuli a ku: “U nga ndzi karhati.”
17, 18. (a) Xana Yesu u hi khuthaze njhani leswaku hi kombela moya lowo kwetsima, naswona i yini lexi engetelaka matimba ya marito ya Yesu eka Luka 11:11-13? (b) Xana Yesu u ku pimanise njhani ku hanyisana ka mutswari wa laha misaveni ni lokuya ka Xikwembu?
17 Loko hi ta tsakela vuxaka bya le kusuhi ni Xikwembu, hi lava moya wa xona kumbe matimba lama tirhaka. Hikwalaho, Yesu u ya emahlweni: “Xana i tatana wihi exikarhi ka n’wina, loyi a nga nyikaka n’wana wa yena enyoka, loko a kombela nhlampfi ke? Ni loko a kombela tandza, ú ta n’wi nyika xipame xana? Kutani ke, leswi n’wina mi nga vanhu va tihanyi, mi tivaka ku nyika vana va n’wina swilo leswinene, xana Tatana wa le tilweni a nge tlurisi ngopfu ku nyika Moya lowo Kwetsima eka lava kombelaka ka yena xana?” (Luka 11:11-13) Matewu 7:9-11 yi vulavula hi ku nyika ribye ematshan’wini ya xinkwa. Matimba ya marito ya Yesu ma andza loko hi xiya leswaku xinkwa xa matiko ya kahle ya le Bibeleni a xi ri xa mpimo ni xivumbeko xa ribye ro saseka ra xirhendzevutana. Tinxaka tin’wana ta tinyoka a ti fana ni tinxaka to karhi ta tinhlampfi naswona ku ni xipamu lexintsongo xo basa lexi xi fanakanyana ni tandza. Kambe loko a komberiwa xinkwa, nhlampfi kumbe tandza, i tatana wa njhani la nga nyikaka n’wana wa yena ribye, nyoka kumbe xipamu ke?
18 Loko a ya emahlweni Yesu u pimanisa ku hanyisana ka mutswari wa laha misaveni ni swiendlo swa Xikwembu eku tirhisaneni ni swirho swa ndyangu wa xona wa vagandzeri. Loko hina, hambi loko hi ri vabihi hikwalaho ka xidyoho xa ndzhaka, hi swi kota ku nyika vana va hina tinyiko, hi nga langutela leswikulu swinene swonghasi eka Tata wa hina wa le tilweni leswaku a nyika nyiko ya moya wa yena wo kwetsima eka malandza ya yena lama tshembekaka, lawa hi ku titsongahata ma wu kombelaka!
19. (a) I yini lexi kandziyisiwaka hi marito ya Yesu lama tsariweke eka Luka 11:11-13 na Matewu 7:9-11? (b) Loko hi kongomisiwa hi moya lowo kwetsima, xana hi nga yi languta njhani miringo ya hina?
19 Marito ya Yesu ma tiyisa leswaku hi fanele hi kombela eka Xikwembu moya wa xona lowo kwetsima. Loko hi kongomisiwa ha wona, a hi nge ‘vileli mayelana ni swiphiqo swa hina evuton’wini’ ni ku languta miringo ni leswi hetaka matimba tanihi leswi swi hi vavisaka. (Yuda 16) I ntiyiso, “munhu l’a v̌elekiweke hi wansati o ni masiku ma nga ri mangani, o šure makhombo,” naswona van’wana a va hanyanga va kondza va vona makumu ya swiphiqo swa vona. (Yobo 14:1) Kambe hi nga tshuki hi languta miringo ya hina tanihi maribye, tinyoka ni swipamu leswi hi ndlela yo karhi Muyingisi wa swikhongelo a hi nyikeke swona. I xihlovo xa rirhandzu naswona a nga ringi munhu hi swilo swo biha. Ematshan’weni ya sweswo, u hi nyika ‘nyiko yin’wana ni yin’wana leyinene ni leyi hetisekeke.’ Eku heteleleni, u ta lulamisela vanhu hinkwavo lava n’wi rhandzaka ni ku n’wi chava swilo hinkwaswo. (Yakobo 1:12-17; 1 Yohane 4:8) Lava va fambeke entiyisweni hi malembe layo tala va swi tiva hi ntokoto leswaku yin’wana ya miringo ya vona yo tika, hi xikhongelo ni ripfumelo, yi va pfunile naswona yi engetele mihandzu ya moya wa Xikwembu evuton’wini bya vona. (3 Yohane 4) Kahle-kahle, hi yihi ndlela yo antswa leyi ha yona hi nga dyondzaka ku titshega hi Tata wa hina wa le tilweni naswona hi pfuniwa ku hlakulela mihandzu ya moya ya rirhandzu, ntsako, ku rhula, ku leha mbilu, musa, vunene, ripfumelo, ku rhula ni ku tikhoma?—Vagalatiya 5:22, 23.
20. Xana marito ya Yesu lama tsariweke eka Luka 11:5-13 ma fanele ma va ni vuyelo byihi eka hina?
20 Marito ya Yesu lama rhekhodiweke eka Luka 11:5-13 xisweswo ma hi nyika xitiyisekiso lexi katekisiweke xa rirhandzu ni nkhathalelo wa musa wa Yehova. Leswi swi fanele swi tata mbilu ya hina hi ku tlangela ni rirhandzu leri enteke swinene. Ma fanele ma tiyisa ripfumelo ra hina ni ku kurisa ku navela ka hina ko hambeta hi ya evunavelweni bya milenge ya Hosi leyi nga riki na ku Hela ivi hi tshama eka vukona bya yena bya rirhandzu. Ku tlula kwalaho, marito ya Yesu ma hi tiyisekisa leswaku a hi nge tlherisiwi hi nga ri na nchumu. Tata wa hina u tsakisiwa swinene hi ku n’wi rhwexa mivilelo ya hina. (Psalma 55:22; 121:1-3) Kutani loko hina, tanihi malandza ya yena lama tshembekaka lama tinyiketeleke, hi kombela moya wa yena wo kwetsima, u hi nyika wona hi ku ntshuxeka. Lexi i Xikwembu xa hina lexi nga ni rirhandzu naswona hi nga tiyiseka swinene leswaku i Muyingisi wa swikhongelo.
Wa Tsundzuka Xana?
◻ Xana hi fanele hi tshinelela Xikwembu hi xikhongelo ha mani, naswona ha yini?
◻ Xana xikhongelo i lunghelo leri hikiweke hi ndlela yihi?
◻ Xana ku ‘khongela hi moya lowo kwetsima’ swi vula yini?
◻ Xana u nga swi kombisa njhani hi Matsalwa leswaku swikhongelo swa malandza lama tshembekaka lama khuvuriweke ya Yehova swa yingisiwa?
[Swifaniso leswi nga eka tluka 14]
Tatana la nga munhu u nyika vana va yena tinyiko letinene, Yehova u nyika moya lowo kwetsima eka lava wu kombelaka