Hi Mhaka Ya Leswi A Khongeleke

EKA 1 Vatesalonika 5:17, 18, muapostola Pawulo u te: “Mi nga tshiki ku khongela. Eka hinkwaswo, nkhensani; hikuva hi kona ku rhandza ka Xikwembu ehenhla ka n’wina, ha Kriste Yesu.” Hambi swi ri tano, xana minkarhi yin’wana u tikuma u nyuma ku khongela loko u tsakela swakudya endhawini ya mani na mani, yo tanihi hi le khefini yo dyela eka yona? Hi ku ya hi xitsundzuxo xa Yesu ehenhleni ka xikhongelo xo lava ku voniwa, swa twisiseka leswaku un’wana a nga ha tsakela ku papalata ku tikokela nyingiso lowu nga fanelangiki. (Matewu 6:5, 6) Hambi swi ri tano, xikhongelo lexi nyikeriwaka hi vutlhari xi nga ha koka nyingiso lowunene.

Lowu a ku ri ntokoto wa mutirheli un’wana lontsongo la tirhaka eBethele ya le Brooklyn, yindlu-nkulu ya misava hinkwayo ya Timbhoni ta Yehova. A ri ku dyeni ka xifihlulo ekhefini yo dyela eka yona, a kunguhate ku ya ebandlheni ra yena ra kwalaho ku ya hlangana ni ntlawa lowu a wu ta hlanganyela entirhweni wa ku chumayela hi ta Mfumo. Loko xifihlulo xa yena xi fika, u nyikele xikhongelo hi ndlela ya yena leyi tolovelekeke. Loko a pfula mahlo, u kume mutirhi wa xisati a yime kwalaho a n’wi langutile.

U vutisile, “a wu ri ku khongeleni, a hi swona ke?” Loko a pfumerile, u te: “U fanele u ri un’wana wa Timbhoni ta Yehova. Vatswari va mina na vona i Timbhoni. Entiyisweni a ndzi si tshama ndzi tikatsa evukhongerini bya vona, kambe ndza swi tiva leswaku ndzi fanele ndzi tikatsa. Kumbexana ndzi fanele ndzi kuma xikhokhelo xa Xihondzo xo Rindza na Awake! Xana ndzi nga swi kuma eka wena?”

Makwerhu loyi lontsongo wa tsundzuka, “a ku sale kantsongo ndzi wisa swakudya swa mina.” Hambi swi ri tano, u kote ku fambisa swikhokhelo swimbirhi ni timagazini timbirhi leta ha ku humaka eka yena ni ku lunghiselela riendzo ro vuyela—hi mhaka ya leswi a khongeleke ntsena.