Vutomi Ni Vutirheli Bya Yesu
Ku Kanetana Ku Humelela
EMAHLWENINYANA nimadyambu, Yesu u dyondzisa dyondzo leyinene ya ntirho wo titsongahata hi ku hlantswa milenge ya vaapostola va yena. Endzhaku ka sweswo, u tivise Xitsundzuxo xa rifu ra yena leri tshinelaka. Sweswi, ngopfu-ngopfu hikwalaho ka leswi swa ha ku endlekaka, mhaka leyi hlamarisaka ya humelela. Vaapostola va yena va katseka eka ku kanetana ka matimba ehenhleni ka leswaku i mani exikarhi ka vona loyi a nga lonkulu! Loku ku vonaka ku ri ku kanetana ka nkarhi na nkarhi.
Tsundzuka leswaku endzhaku ka loko Yesu a hundzuriwile entshaveni, vaapostola va kanetanile ehenhleni ka leswaku i mani exikarhi ka vona loyi a nga lonkulu. Ku tlula kwalaho, Yakobo na Yohane va lave swiyimo swa le henhla eMfun’weni, leswi vangeke ku kanetana loku yeke emahlweni exikarhi ka vaapostola. Sweswi, eka vusiku bya yena byo hetelela na vona, vona ndlela leyi Yesu a faneleke a ri na gome ha yona ku va vona va holova nakambe! Xana u endla yini?
Ematshan’wini yo holovela vaapostola hikwalaho ka hanyelo ra vona, nakambe Yesu hi tintswalo u vulavula na vona: “Tihosi ta matiko ta ma fuma, kutani vafumi va wona, va vuriwa ‘vahlayisi va tiko.’ Swi nga tshuki swi va tano eka n’wina. . . . Hikuva lonkulu i mani xana? Xana hi loyi a tshamaka eswakudyeni, kumbe hi loyi a tirhaka ku phamela van’wana xana? Ma swi tiva, hi loyi a tshamaka eswakudyeni.” Kutani, loko a va tsundzuxa xikombiso xa yena, u ri: “Kambe mina ndzi le xikarhi ka n’wina ndzi ri loyi a tirhelaka van’wana.”
Ku nga khathariseki ku nga hetiseki ka vona, vaapostola va tinamarheta na Yesu enkarhini wa mahlomulo ya yena. Kutani u ri: “Hilaha Tata wa mina a ndzi nyikeke Mfumo hakona, na mina ndzi mi nyika wona.” Ntwanano lowu wa munhu hi xiyexe exikarhi ka Yesu ni valandzeri va yena lavo tshembeka wu va hlanganisa na yena ku hlanganyela emfun’weni wa yena wa vuhosi. I nhlayo leyi pimiweke ya 144 000 ntsena leyi eku heteleleni yi tekeriwaka eka ntwanano lowu wa Mfumo.
Hambi leswi vaapostola va nyikiwaka ntshembo lowu wu tsakisaka wo hlanganyela na Kriste eku fumeni ka Mfumo, enkarhini lowu va tsanile emoyeni. Yesu u ri: “Vusiku byebyi, mi ta khunguvanyeka hinkwenu hikwalaho ka mina.” Loko a byela Petro leswaku U khongerile ematshan’wini ya yena, Yesu wa khutaza: “Loko u ta va u hundzukile, u ta tiyisa vamakwenu.”
Yesu wa hlamusela: “Vana vanga, ndza ha ta va na n’wina nkarhinyana; mi ta ndzi lava, kambe hilaha ndzi byeleke Vayuda hakona loko ndzi te: ‘Laha ndzi yaka kona mi nga ka mi nga ti,’ na n’wina sweswi ndza mi byela mhaka leyi. Ndzi mi nyika nawu lowuntshwa ndzi ri: Rhandzanani! Kukotisa leswi mina ndzi mi rhandzeke, rhandzanani na n’wina. Hinkwavo va ta tiva leswaku mi vadyondzisiwa va mina, loko mi rhandzana.”
Petro wa vutisa: “Hosi, xana u ya kwihi?”
Yesu wa hlamula: “Laha ndzi yaka kona, u nga ka u nga ndzi landzi sweswi; kambe endzhaku u ta ndzi landza.”
Petro u lava ku tiva: “Hosi, xana ndzi nga tsandzeka ku ku landza sweswi hikwalaho ka yini ke? Ndzi nga nyiketa vutomi bya mina hikwalaho ka wena!”
Yesu wa vutisa: “Xana u nga nyikela vutomi bya wena hikwalaho ka mina xana? Ndzi tiyisisile ndzi ri ka wena: Nkuku wu nga si ringa, u ta va u ndzi landzurile kanharhu.”
Petro wa kaneta, “hambiloko ndzi fanele ku fa na wena, ndzi nga ka ndzi nga ku landzuri!” Kutani loko vaapostola lavan’wana va hlanganyela na yena eku vuleni leswi fanaka, Petro hi ku tikurisa u ri: “Hambiloko va nga khunguvanyeka hinkwavo, mina ndzi nga ka ndzi nga khunguvanyeki.”
Loko a kombetela eka nkarhi lowu a rhumeke vaapostola va yena eriendzweni ro chumayela eGaleliya va ri hava xinkwamana xa mali kumbe nkwama wa timbuva, Yesu wa vutisa: “Xana mi ve mi pfumala nchumu ke?”
Va hlamula va ku: “A hi pfumalanga nchumu.”
U ri: “Kambe sweswi, loyi a nga ni xinkwamana xa mali, a a xi teke, na wona nkwama a a wu teke, ni loyi a pfumalaka banga, a a xavise xiambalo xa yena, a tixavela rona, hikuva ndza mi byela leswaku tsalwa leri nge: ‘U hlayiwile ni swidyohi,’ ri fanele ku hetiseka eka mina. Kunene timhaka leti nga vuriwa ehenhla ka mina ta karhi ta hetiseka.”
Yesu u kombetela eka nkarhi lowu a nga ta vambiwa ha wona ni swidyohi, kumbe vanhu lavo homboloka. Nakambe u kombetela leswaku valandzeri va yena endzhakunyana va ta hlangavetana ni nxaniso lowukulu. Kutani va ri: “Hosi, mabanga mambirhi hi lawa!”
Wa hlamula: “Swi ringene!” Hi laha hi nga ta vona ha kona, hi ku va va ri ni mabanga hi ku hatlisa swi ta pfumelela Yesu ku dyondzisa dyondzo yin’wana ya nkoka. Matewu 26:31-35; Marka 14:27-31; Luka 22:24-38; Yohane 13:31-38; Nhlavutelo 14:1-3.
◆ Ha yini ku kanetana ka vaapostola ku ri loku hlamarisaka?
◆ Yesu u tamela ku kanetana hi ndlela yihi?
◆ I yini lexi hetisisiwaka hi ntwanano lowu Yesu a wu endlaka ni vadyondzisiwa va yena?
◆ Hi wihi nawu lowuntshwa lowu Yesu a wu nyikelaka, naswona i wa nkoka wo tanihi kwihi?
◆ I ku titshemba kwihi loku tlulaka mpimo loku Petro a ku kombisaka, naswona Yesu u ri yini?
◆ Ha yini swileriso swa Yesu swo khoma xinkwamana xa mali ni nkwama wa timbuva swi hambanile ni leswi a swi nyikeke emahlweninyana?