“Mi Khongelelana”

YEHOVA i ‘Muyingisi wa xikhongelo.’ (Psalma 65:2) Hi minkarhi hinkwayo wa swi yingisa swikhongela swa lava tinyiketeleke eka yena hi mbilu hinkwayo, naswona hi nga ha tiyiseka leswaku wa va yingisa loko va khongelelana.

Kambe ha yini hi fanele ku khongelelana? Swikhongelo swo tano swi fanele swi nyikeriwa mayelana na yini? Naswona i timfanelo tihi ta Xikwembu leti kombisiwaka loko hi khongelelana?

Ha Yini Hi Khongelelana?

Matsalwa ma khutaza vanhu va Yehova ku khongelelana. Swikhongelo ehenhleni ka van’wana a a swi ri exikarhi ka swikombelo swa muapostola Pawulo eka Xikwembu. (Vakolosa 1:3; 2 Vatesalonika 1:11) Ku tlula kwalaho, mudyondzisiwa Yakobo u tsarile: “Mi khongelelana.”—Yakobo 5:16.

Swikhongelo swa malandza man’wana ya Xikwembu swa pfuna. Leswi swi kombisiwa eka Yakobo 5:13-18, laha Mukriste la vabyaka emoyeni a khutaziwaka ku vitana vakulu va bandlha leswaku “va ta n’wi khongelela, va n’wi tota mafurha hi vito ra [Yehova].” Hi ku twa xikhongelo xa vona munhu loyi a nga ekhombyeni a nga ha tiyisiwa naswona a tiyisekisiwa leswaku Xikwembu xi ta hlamula swikhongelo swa yena. (Psalma 23:5; 34:18) Handle ko khongela ni munhu yoloye, vakulu va ringeta ku vuyetela rihanyo ra yena ra moya hi ku hlamusela mianakanyo ya Matsalwa leyi fanaka ni mafurha lama horisaka.

Yakobo wa engetela: “Xikhongelo lexi endliwaka hi ku pfumela xi ta hanyisa muvabyi; [Yehova u] ta n’wi pfuxa emasangwini.” Ina, munhu la vabyaka emoyeni a nga ha pfuniwa hi “xikhongelo lexi endliwaka hi ku pfumela” xa vakulu. Ku tlula kwalaho, Xikwembu xi “ta n’wi pfuxa emasangwini” ku ya eka rihanyo ra moya loko a swi lava ku pfuniwa hi Matsalwa. Kambe ku vuriwa yini loko vuvabyi bya moya byi vangiwa hi xidyoho lexikulu? Loko munhu a tisola, Yehova u ta n’wi rivalela.

Yakobo u ri: “Hikwalaho, byelanani ku dyoha ka n’wina, mi khongelelana leswaku mi ta hanya. Xikhongelo xa munhu wo lulama xi ni matimba ngopfu, xa tirha. Eliya . . . u khongerile hi ku hiseka leswaku mpfula yi nga ni, kutani hi malembe manharhu ni tin’hweti ta tsevu, mpfula a yi nanga emisaveni. Endzhaku a tlhela a khongela kambe, kutani ri nisa mpfula, ni misava yi humesa mihandzu ya yona.” (1 Tihosi 17:1-7; 18:1, 42-45) Ku ni matimba eka xikhongelo xa munhu wo lulama lexi xi pfumelelanaka ni ku rhandza ka Xikwembu.—1 Yohane 5:14, 15.

Hi Khongelela Yini?

Mhaka yin’wana ni yin’wana yi nga ha va mhaka ya swikhongelo swa hina eka mupfumeri-kulorhi. Hi xikombiso, Pawulo u kombele van’wana ku n’wi khongelela leswaku a va ni vuswikoti byo vulavula mahungu lamanene. (Vaefesa 6:17-20) Ku vuriwa yini loko hi swi tiva leswaku un’wana u le hansi ka ndzingo? Hi nga ha khongelela leswaku ‘a nga endli xo biha ni xin’we’ ni leswaku Xikwembu xi nga n’wi tshiki eku ringiweni kambe xi n’wi kutsula eka lowo biha, Sathana Diyavulosi. (2 Vakorinto 13:7; Matewu 6:13) Naswona loko un’wana a vabya enyameni, hi nga ha kombela Yehova leswaku a n’wi nyika matimba lama lavekaka leswaku a tiyiselela vuvabyi bya yena.—Psalma 41:1-3.

I swa nkoka hi minkarhi hinkwayo ku khongelela vagandzeri kulobye va Yehova lava xanisekaka. Pawulo ni vanghana va yena va tokote nxaniso lowukulu, naswona u byele Vakriste va le Korinto a ku: “Loko na n’wina mi hi pfuna hi ku hi khongelela, kutani ku ta va ni lavo tala lava nga ta nkhensa Xikwembu hikwalaho ka hina, hi mhaka ya ntirho wa tintswalo lowu xi hi endleleke wona.” (2 Vakorinto 1:8-11; 11:23-27) Hambi loko hi khomiwa, hi nga ha khongelela vamakwerhu van’wana lava xanisiwaka, hi minkarhi hinkwayo hi tsundzuka leswaku Yehova u “yingisa mikhongelo ya lav̌o lulama.”—Swivuriso 15:29.

Ngoppfu-ngopfu hi fanele ku khongelela vamakwerhu lava byarheke vutihlamuleri lebyikulu exikarhi ka nhlengeletano ya Yehova. Leswi swi katsa lava va kongomisaka nhlengeletano ni ku lunghiselela swakudya swa moya leswi humesiwaka hi “nandza la tshembekaka, wo tlhariha.” (Matewu 24:45-47) Hi xikombiso, swirho swa Huvo leyi Fumaka ya Timbhoni ta Yehova swi faneriwa hi swikhongelo swa hina, naswona hi nga ha khongela leswaku Xikwembu xi va nyika “moya wa vutlhari.”—Vaefesa 1:16, 17.

Timfanelo Ta Vukriste Ta Kombisiwa

Hi ku khongelela vapfumeri-kulorhi, hi tikomba hi ri lava khumbekaka, lava nga riki na vutitivi, ni va rirhandzu. Nkhathalelo wo pfumala vutitivi, wa rirhandzu eka vamakwerhu va hina va moya va xinuna ni va xisati wu twanana ni yinhla ya Pawulo ya leswaku rirhandzu “a ri tilaveli leswi nga swa rona ntsena.” (1 Vakorinto 13:4, 5) Ku khongelela van’wana i ndlela yin’we yo ‘tikarhatela leswi nga riki swa wena ntsena, kambe ni ku tikarhatela leswi swi nga swa van’wana.’ (Vafilipiya 2:4) Loko hi khongelela ku hlayiseka ka van’wana emoyeni, hi tikuma hi tshinelela ekusuhi swinene na vona eka rirhandzu ra vumakwerhu leri hlawulaka vadyondzisiwa va Yesu.—Yohane 13:34, 35.

Mfanelo ya ku anakanyelana ya kula eka lava hi va khongelelaka. (1 Petro 3:8) Hi va twela vusiwana, hi hlanganyela eka mintsako ni mahlomulo ya vona. Emirini wa munhu, loko voko rin’we ri vavisekile, lerin’wana ra ri khathalela ni ku ringeta ku antswisa ku vava loku vangiwaka hi mbanga. (Ringanisa 1 Vakorinto 12:12, 26.) Hi ku fanana, ku khongelela vamakwerhu va xinuna ni va xisati lava xanisekaka ku kurisa ntwela-vusiwana wa hina eka vona ni ku hi pfuna ku va tsundzuka. Ha lahlekeriwa loko hi honisa Vakriste-kulobye lava tshembekaka eswikhongelweni swa hina, hikuva Xikwembu na Kriste a va va tshiki.—1 Petro 5:6, 7.

Timfanelo to hambana-hambana ta Xikwembu ta kombisiwa loko hi khongelela van’wana. Hi va lava hi va twisisaka ku antswa ni ku va lehisela mbilu. Vukarhi bya susiwa, kutani byi pfumelela xivandla xo aka mianakanyo leyi endlaka leswaku hi rhandzana ni ku tsaka. Nakambe ku khongelela van’wana swi tisa ku rhula ni vun’we exikarhi ka vanhu va Yehova.—2 Vakorinto 9:13, 14.

Yanani Emahlweni Mi Khongelelana

Tanihi Pawulo, hi nga ha kombela van’wana leswaku va hi khongelela. Handle ko khongela swin’we na hina, vanghana va hina va nga ha hi khongelela eka Xikwembu exihundleni hi mavito ya hina, va hi boxa, va boxa ni swiphiqo swa hina, ni ku kombela leswaku xi hi pfuna. Naswona mpfuno wu ta ta hikuva “[Yehova wa] swi tiva ku ponisa vanhu va vukhongeri eku karhatekeni ka vona.”—2 Petro 2:9.

Timbhoni ta Yehova leti hi boxaka eswikhongelweni swa tona na tona ti na miringo—kumbexana leyikulu swinene ku tlula ya hina. Kambe, va yisa mivilelo ya hina emahlweni ka Hosi leyi nga Heriki, kumbexana hambi ku ri ku halata mihloti ematshan’wini ya hina. (Ringanisa 2 Vakorinto 2:4; 2 Timotiya 1:3, 4.) Vona ntsako lowu hi fanelaka ku va na wona eka leswi! Hikwalaho, hi ku tlangela na hi swivangelo swin’wana leswa ha ku hlamuseriwaka, a hi khongelelaneni.