Hi Nga Ri Amukerisa Ku Yini Rirhandzu Ra Xikwembu Handle Ka Vutianakanyi?
“Leswi Xikwembu xi hi rhandzeke hi mukhuva wolowo, na hina hi fanele ku rhandzana.”—1 YOHANE 4:11.
1, 2. Xana ku laveka yini eka hina leswaku hi amukela swikombiso swa rirhandzu ra Xikwembu handle ka vutianakanyi?
YEHOVA i ximunhuhatwa xa ntiyiso xa rirhandzu. Hakunene, eka nhloko-mhaka leyi hundzeke, hi vonile hi laha entiyisweni swikombiso swa rirhandzu ra yena swi taleke ha kona. Hi tlhele hi xiya ndlela leyi Muxe, Davhida na Yesu Kriste va swi amukeleke ha yona swikombiso sweswo swa rirhandzu handle ka vutianakanyi. Xana a swi fanelanga leswaku un’wana ni un’wana wa Timbhoni ta Yehova a lava ku endla hi ku fanana? Swi fanerile!
2 Xana ku laveka yini loko hi ta amukela swikombiso swa rirhandzu ra Xikwembu handle ka vutianakanyi? Xo sungula, hi fanele hi xi nyika xivandla xo sungula evuton’wini bya hina, hi xi rhandza hi mbilu, moya-xiviri, miehleketo ni matimba ya hina hinkwawo. (Marka 12:29, 30) Sweswo swi vula ku va la kongomisiwaka hi Xikwembu, ni ku va ni vuxaka leyi kufumelaka bya munhu hi xiyexe na Yehova. Xana ha swi tsakela ku vulavula ni Tata wa hina wa le tilweni hi xikhongelo? Xana hi khongela nkarhi na nkarhi, ni ku phikelela eku khongeleni? Xana ha hatlisa eku khongeleni ka hina, hambi ku khomeka swinene lerova hi nga khongela? (Varhoma 12:12; 1 Vatesalonika 5:17) Xana ha wu kongomisa nyingiso eka Yehova, hi nyika yena ni nhlengeletano yakwe ku dzuneka hi leswi hi nga ha vaka hi swi hetisisile? (1 Vakorinto 3:7; 4:7) Hakunene, xana hi titwa hi laha mupisalema a titweke ha kona? Malunghana ni Xikwembu, u te: “Ndzi ku ḍunise e ka ntlhanu na kambiri hi siku.”—Psalma 119:164.
3. Loko hi ri na xinkhubyana xo titsakisa, xana hi nga kombisa njhani leswaku hi amukela rirhandzu ra Xikwembu handle ka vutianakanyi?
3 Leswaku hi amukela rirhandzu ra Xikwembu handle ka vutianakanyi kumbe e-e, leswi swi nga ha paluxiwa kahle loko hi endla xinkhubyana xo titsakisa. Xana hi nkarhi wolowo mabulo ya hina ya rhendzeleka etimhakeni ta tiko kumbe eka swilo swa moya? A hi swona leswaku nkarhi na nkarhi hi fanele hi va ni dyondzo ya Bibele leyi nga ni ntikelo loko hi ri ni xinkhubyana xo titsakisa ni Vakriste-kulorhi. Kambe entiyisweni hi nga kuma swilo swo tsakisa swa moya leswi hi nga swi katsaka eka mabulo ya hina. Ku vuriwa yini hi ku ambelana mintoko ya nsimu, ni ku hlamuselana matsalwa ya Bibele lama hi tsakisaka, hi rungulelana hi laha hi dyondzeke ntiyiso ha kona, kumbe ku kombisa vumbhoni bya nkhathalelo wa rirhandzu ni mikateko ya Xikwembu?
4. Xana hi nga endlisa ku yini loko hi hetiwa matimba malunghana ni malunghelo yo karhi ya ntirho?
4 Xiyimo xin’wana lexi nga ha paluxaka mpimanyeto wa ku tlangela ka hina rirhandzu ra Xikwembu, hi loko hi honisiwa mayelana ni lunghelo ro karhi ra ntirho enhlengeletanweni ya Yehova. Xana hi titwisa ku yini? Loko hi ri ni mhaka swinene ni ku xixima Yehova, hi ta pfumela leswaku handle ko kanakana Xikwembu xi ta xiximiwa kahle hi laha ku ringanaka hambi loko lunghelo ro karhi ra ntirho ri ri na munhu wihi na wihi. (Ringanisa Luka 9:48.) Kambe loko hi khathalela ngopfu leswi nga swa hina kumbe vito ra hina, hi ta va ni gome hi leswi hi honisiweke, hi laha hi nga ehleketaka ha kona. Hi fanele hi tsundzuka leswaku Yehova wa hi rhandza naswona a nga ha swi tiva ni leswaku sweswi a hi nge wu rhwali ndzhwalo wa vutihlamuleri byo karhi bya le tilweni. A nga ha hi katekisa hi laha ku fuweke hi tindlela tin’wana, naswona swikombiso swo tano swa rirhandzu rakwe swi fanele swi hi pfuna ku hlayisa ku ringanisela ka hina hi tlhelo ra moya.—Swivuriso 10:22.
Ku Rhandza Vululami Ni Ku Venga Vuhomboloki
5. Swikombiso swa rirhandzu ra Xikwembu swi fanele swi va ni nkucetelo wihi emahanyelweni ya hina?
5 Swikombiso swa rirhandzu ra Xikwembu eka hina swi fanele swi hi susumetela ku tekelela Kriste eku rhandzeni ka ku lulama ni ku venga vuhomboloki. (Vaheveru 1:9) I ntiyiso, leswi a hi nge swi endli hi ku hetiseka, hi laha Yesu a endleke ha kona. Kambe, hi nga swi endla pakani ya hina leswaku hi va lavo kwetsima ni vo tshembeka ni lava yingisaka nawu hi laha swi kotekaka ha kona exiyin’weni xa hina lexi nga hetisekangiki. Leswaku hi endla leswi, a hi fanelanga ku kurisa rirhandzu ra ku lulama ni swilo leswinene ntsena, kambe a hi hlakuleleni ku venga, ku papalata, ni ku nyenya leswo biha. Hi laha muapostola Pawulo a swi vekeke ha kona: “Vengani leswo biha, mi namarhela leswinene.” (Varhoma 12:9) “Venga” i rito ra matimba swinene, leri vulaka “ku nyenyisisisa.”—Webster’s New Collegiate Dictionary.
6. I yini leswi nga hi pfunaka ku tihlayisa ehenhleni ka mindzingo leyi vekiwaka endleleni ya hina hi misava, miri wa hina lowu dyoheke, na Diyavulosi?
6 I yini lexi nga hi pfunaka ku tihlayisa ehenhleni ka nsusumeto wa mindzingo leyi tisiwaka endleleni ya hina hi misava ni miri wa hina vini lowu dyoheke na Diyavulosi? Ku tshembeka eka Yehova Xikwembu. Wa hi kombela: “N’wana nga, tlhariha, u ṭakisa mbilu ya mina, nḍi ta kuma rito eku hlamula la’v̌a nḍi rukanaka.” (Swivuriso 27:11) Ina, ku tshembeka eka Yehova ku ta hi susumeta leswaku hi teka ndlela ya vutlhari ya ku venga leswi a swi vengaka. Nakambe, ku nga khathariseki ndlela leyi swi nga vonakaka swi tsakisa kumbe swi tlhontlha ha yona ku tshova wun’wana wa milawu ya Xikwembu, hi fanele ku hambeta hi tibyela leswaku ku endla tano ntsena a swi fanelanga. (Vagalatiya 6:7, 8) Mbilu ya munhu yi ni lunya, mona ni ku nga tshembeki, hi laha hi tsundzuxiwaka ha kona eka Yeremia 17:9. Mbilu ya Mukriste yi rhandza swilo leswinene, ni leswo xonga, ni leswi tengeke. Kambe minkarhi yin’wana mboyamelo wa vudyoho wa yi kucetela leswaku yi navela ni leswo biha. Ku fana ni timbilu ta Vaisrayele lava gandzeleke Yehova kasi hi hala tlhelo a va hlayisa “ŝiṭunga” swa swifaniso swa vona, hi mukhuva wolowo timbilu ta hina ti nga ha va ni vutianakanyi ni mano. (1 Tihosi 22:44; Deuteronoma 12:2) Mbilu ya hina leyi nga hetisekangiki yi nga ha ringeta ku kuma swivangelo swo hi veka endzingweni. Yi nga ha ringeta ku vevukisa ntikelo wa xidyoho lexi hi ringiwaka ha xona. Kumbe, mbilu ya hina yi nga ha ringeta ku hi khorwisa leswaku nxupulo wihi na wihi wu ta va wa nkarhinyana ntsena.
7. Ha yini hi fanele ku tihlayisa ehenhleni ko navela leswo biha?
7 Hi ku tlangela rirhandzu ra Xikwembu, hi fanele ku tihlayisa ehenhleni ka ku navela leswo biha, tanihi nkucetelo wa ku tikhoma loko biha hi tlhelo ra rimbewu, hambi u byi ngenerile vukati kumbe e-e. Hakanyingi, lexi sungulaka tanihi ntolovelo lowu vonakaka wu nga vuli nchumu xi vangele Vakriste vambirhi leswaku va katseka emintlhavekweni, laha va endleke xidyoho naswona va susiweke. Hambi vakulu, lava fanelaka ku va xikombiso lexi nga solekiki entlhambini, va ve ni gome etimhakeni leti!—Ringanisa 1 Tihosi 15:4, 5.
8. Hi xihi xikombiso xa xitsundzuxo lexi muapostola Pawulo a hi nyikaka xona, naswona xirhalanganya xo tano xi nga kombisiwa njhani?
8 Anakanya hi muapostola Pawulo, loyi a katekisiweke hi swivono ni matimba lama tlakukeke swin’we ni nyiko ya ku huhutela ka Xikwembu. Leswaku a hlula eku lweni kakwe ni mimboyamelo ya vudyoho, a a fanela ku xanisa—ina, ku ba swinene—miri wakwe. Xana ha eneriseka hi ku ka hi nga ma endli matshalatshala? (Varhoma 7:15-25; 1 Vakorinto 9:27) Hi languteka onge a hi ri eka xikwekwetsu lexintsongo xo tluta enambyeni lowu khulukaka hi ntamu naswona hi kokeriwa emabobomeni ya wona. Leswaku hi balekela mhangu, hi fanele ku tluta hi matimba hi fularhela nkhukhulo wa matimba. Hi nga ha vonaka hi nga endli nhluvuko lowukulu, kambe ntsena loko hi hambeta hi tikarhata hi matimba, a hi nge tlheleli emabobomeni leswaku hi lovisiwa. Entiyisweni, swikombiso swa rirhandzu ra Yehova Xikwembu eka hina swi fanele swi hi vangela ku tikarhata hi matimba leswaku hi tshembeka eka yena hi ku venga vuhomboloki ivi hi rhandza ku lulama.
Kombisa Rirhandzu Ra Vumakwenu
9. Hi xihi xitsundzuxo lexi muapostola Yohane a xi nyikelaka mayelana ni ku rhandza vamakwerhu?
9 Swikombiso swa rirhandzu ra Xikwembu swi fanela swi hi susumetela ni ku rhandza vamakwerhu hi laha Yesu Kriste a rhandzaka vadyondzisiwa vakwe ha kona. (Yohane 13:1) Swa fanela swinene loko muapostola Yohane a ku: “Rirhandzu ra kona i rikulu, hikuva a hi hina hi rhandzeke Xikwembu, kambe hi xona xi hi rhandzeke, kutani xi rhumele n’wana wa xona ku va mhamba ya swidyoho swa hina. Varhandziwa, leswi Xikwembu xi hi rhandzeke hi mukhuva wolowo, na hina hi fanele ku rhandzana.” (1 Yohane 4:10, 11) Entiyisweni, Yesu u vule leswaku ndlela leyi valandzeri vakwe va ntiyiso a va ta tiviwa ha yona i rirhandzu leri va nga na rona exikarhi ka vona.—Yohane 13:34, 35.
10, 11. Hi tihi tin’wana ta tindlela leti hi nga kombisaka rirhandzu ra vumakwerhu ha tona?
10 Ha swi tiva leswaku Vakriste va fanele va kombisa rirhandzu ra vumakwerhu. Kambe a hi xihoxo loko hi tsundzuxana hi tindlela to hambana-hambana leti hi nga kombisaka rirhandzu leri ro fana ni ra Kriste eka un’wana ni un’wana ha tona. Rirhandzu ro tano ri ta hi pfuna ku honisa ku hambana tanihi xivumbeko xa tinxaka, vutiko, dyondzo, ndhavuko ni xiyimo xa timali. Ku tlula kwalaho, rirhandzu ra vumakwerhu ri ta hi susumetela ku hlangana swin’we eminhlanganweni. Loko hakunene hi va rhandza vamakwerhu, a hi nge ma pfumeleli maxelo layo biha kumbe ku vabya loku nga nyawuriki ka miri leswaku ku hi sivela ntsako wa ku hlangana na vona ni ku hlanganyela eku khutazaneni. (Varhoma 1:11, 12) Ku tlula sweswo, rirhandzu ra vumakwerhu ri ta hi endla hi yi lunghiselela kahle minhlangano ya hina ni ku va ni xiphemu lexi xalamukeke eka yona leswaku hi ta kota ku khutazana leswaku hi va ni rirhandzu ni ku rhandza mintirho leyinene.—Vaheveru 10:23-25.
11 Ku vuriwa yini hi ku pfuna vamakwerhu evutirhelini bya nsimu? Swi xiyiwile leswaku hakanyingi vakulu ni malandza ya vutirheli va tirha evutirhelini bya yindlu na yindlu swin’we kumbe va ri voxe loko va swi kota, hi ku hlelanyana, va rhamba vahuweleri va Mfumo lava lavaka mpfuno evutirhelini leswaku va famba na vona. Ku kombisa rirhandzu hi ndlela leyi swi ta endla ntirho wa nsimu wa vakulu ni malandza ya vutirheli leswaku wu hakela hi la ku engeteriweke kambirhi. Ku vuriwa yini mayelana ni ku famba ni muhuweleri lontshwa eka dyondzo ya Bibele ya le kaya?—Varhoma 15:1, 2.
12. Xana hi fanele ku n’wi twisisa njhani 1 Yohane 3:16-18?
12 Nakambe rirhandzu ri ta hi vangela leswaku hi sungula ku pfuna vamakwerhu lava entiyisweni va nga ha vaka ni swilaveko swa nyama. Muapostola Yohane u tsarile a ku: “Hi nga tiva leswi rirhandzu ri nga swona loko hi tiva Kriste, loyi a nyiketeke vutomi bya yena hikwalaho ka hina. Kutani na hina swa hi fanela ku nyiketa vutomi bya hina hikwalaho ka vamakwerhu. Kambe loko munhu a ri ni swilo swa misava leyi, kutani a vona makwavo a ri eku pfumaleni, kambe a nonon’hwisa mbilu ya yena a nga n’wi pfuni, xana rirhandzu ro rhandza Xikwembu ri nga tshamisisa ku yini eka yena xana? Vana vanga, hi nga rhandzaneni hi marito kumbe hi ku vulavula ntsena, kambe a ku ve hi mintirho ni ntiyiso.” (1 Yohane 3:16-18) Sweswi a hi nge he komberiwi eku va pfuna hi ku nyiketa mimoya-xiviri ya hina, kambe mikarhi yin’wana hi va na wona nkarhi wo kombisa ku va rhandza hi tindlela tin’wana, ku nga ri hi marito ntsena kumbe hi ku vulavula, kambe na hi mintirho. A swi bihanga ku rhandza vamakwerhu hi marito, kambe a hi lavi ku hika rirhandzu ra hina eka leswi loko va ri ni swilaveko swa swilo swa nyama. Yesu u vule leswaku “ku nyika i nkateko lowu tlulaka ku nyikiwa,” nakambe ku tirha ku nyika mpfuno wa nyama.—Mintirho 20:35.
13. (a) Hi yihi mintiyiso yin’wana ya xisekelo leyi hi yi dyondzeke hi ku pfuniwa hi nhlengeletano leyi vonakaka ya Yehova? (b) Xana i yinhla yihi ya matimba leyi Charles Taze Russell a yi vuleke?
13 Hi na wona nkarhi wa ku kombisa rirhandzu eka vamakwerhu lava kongomisaka ebandlheni kumbe hi ku hlangana ni nhlengeletano ya Yehova leyi vonakaka emisaveni hinkwayo. Leswi swi katsa ku va la tshembekeke eka “nandza la tshembekaka, wo tlhariha.” (Matewu 24:45-47) Ntiyiso hi leswaku, ku nga khathariseki leswaku i ku hlaya ka Bibele ko tanihi kwihi loku hi ku endleke, a hi ta va hi nga yi dyondzaka ntiyiso hi ri swerhu. A hi ta va hi nga yi kumanga ntiyiso malunghana na Yehova, ni makungu kun’we ni timfanelo, nhlamuselo ni ku hlawuleka ka vito ra yena, Mfumo, nkutsulo wa Yesu, ku hambana ka nhlengeletano ya Xikwembu ni ya Sathana, kumbe mhaka leyi ha yona Xikwembu xi pfumeleleke vubihi. Swi hi laha muungameri wo sungula wa Watch Tower Society, Charles Taze Russell, a tsaleke ha kona hi 1914 a ku: “Xana hina a hi vanhu lava katekisiweke, lava tsakeke? Xana Xikwembu xa hina a xi tshembekanga ke? Loko wihi na wihi a tiva nchumu wo karhi lowu antswaka a wu endle. Loko wihi na wihi wa n’wina o kuma nchumu wo karhi lowu antswaka, ha tshemba leswaku u ta hi byela. A ku na xin’wana xo antswa ku tlula leswi hi swi kumeke eRitweni ra Xikwembu . . . A ku na ririmi kumbe peni leyi nga tisaka ku rhula, ntsako ni nkateko lowu vutivi lebyi nga le rivaleni, bya Xikwembu xa ntiyiso byi wu tiseke etimbilwini ni le vuton’wini bya hina. Mahungu ya Vutlhari, Vululami, Matimba ni Rirhandzu ra Xikwembu swi enerisa ku navela ka mulawuri wa hina ni timbilu ta hina. A hi lavi swo tlula sweswo. A ku na leswi nga naveriwaka ku tlula ku kuma Mahungu lawa yo hlamarisa lama twisisekaka emianakanyweni ya hina.” (The Watch Tower, December 15, 1914, matluka 377-8) I ya ntiyiso swonghasi marito wolawo lama tsariweke kahle!
Ku Tirhela Lava Nga eHandle
14. Xana swikombiso swa rirhandzu ra Xikwembu swi fanele swi hi susumeta ku va khomisa ku yini lava va nga le handle?
14 Swikombiso swa rirhandzu ra Xikwembu leswi hi swi voneke swi fanele swi hi susumetela ku kombisa rirhandzu ra vuakelani eka lava nga le handle ka bandlha. Xana leswi hi nga swi endla njhani? Swiyimo swi nga ha komba leswaku hi nga pfuna vaakelani va hina hi swilo leswi vonakaka. Kambe, leswi nga swa nkoka ngopfu, hi nga kombisa rirhandzu ra vuakelani hi ku tisela van’wana mahungu lamanene ya Mfumo wa Xikwembu ni ku pfuna varhandzi va vululami leswaku va va valandzeri va Yesu Kriste. Xana hi tirha nkarhi na nkarhi evutirhelini bya le rivaleni, kumbe ha byi honisa? Xana byo va ntirho wa mukhuva ntsena kumbe ntirho wo hetisisa nawu? Kumbe hi susumetiwa hi rirhandzu ra vuakelani hakunene? Xana ha wu kombisa ntwela-vusiwana? Xana ha lehisa mbilu, hi yimela vanhu leswaku va hlamula? Xana ha swi khutaza swirho swa ndyangu leswaku swi tiphofula hi swoxe? Ee, ematshan’wini yo vulavula hi nga wisi, a hi pfumeleleni rirhandzu ra vuakelani ri hi susumetela ku yingisa ni ku va ni bulo ra Bibele ro tsakisa ni vanhu lava hi hlanganaka na vona evutirhelini bya hina.
15. (a) Ha yini “vumbhoni bya xitshuketa” ku ri rito ro antswa ku tlula “vumbhoni lebyi nga lunghiseleriwangiki”? (b) Hikwalaho ka yini u tirhisa nkarhi wa ku nyikela vumbhoni hi xitshuketa?
15 Xana ha xalamuka hi laha hi nga kotaka ha kona leswaku hi tirhisa nkarhi wo nyikela vumbhoni bya xitshuketa? Swi fanele swi tsundzukiwa leswaku leswi a hi ku nyikela vumbhoni lebyi nga hleriwangiki, ni ntirho wo pimanyeta, lowu nga lunghiseleriwangiki kumbe lowu nga pfuniki. Ku nyikela vumbhoni bya xitshuketa i swa nkoka swinene, naswona rirhandzu ra vanhu-kulorhi ri ta hi susumetela ku tinyika nkarhi wa ku hlanganyela eka byona. Hakanyingi vumbhoni byo tano byi veka mihandzu leyinene! Hi xikombiso, loko a ri entsombanweni wa Timbhoni ta Yehova le Italy n’walungu, makwerhu u ye egaraji ku ya kuma rivoni ra le henhla ra movha. Loko a ha yimile, u nyikele vumbhoni eka lava nge kusuhi na yena ni ku va nyika swiyimiso, a va rhambela nkulumo ya Bibele ya le rivaleni hi Sonto. Haxawa wa kona, entsombanweni wa misava hinkwayo le Rhoma, makwerhu loyi a nga n’wi xiyanga, u n’wi pfuxele hi rirhandzu. A a ri mani makwerhu loyi? A ri un’wana wa vanhu lava n’wexemu a va nyikeke swiyimiso le garaji! Munhu loyi u yile a ya yingisela nkulumo ya le rivaleni ivi a tsarisa vito rakwe leswaku a ta kuma dyondzo ya Bibele. Sweswi ha vambirhi ni nsati wakwe i Timbhoni ta Yehova leti tinyiketeleke. A swi kanakanisi leswaku ku nyikela vumbhoni bya xitshuketa swi nga vuyerisa swinene.
Hambeta U Amukela Rirhandzu Ra Xikwembu
16. Hi swihi swivutiso leswi hi nga ha endlaka kahle loko hina hi tivutisa swona?
16 Yehova a a ri ni nsovo eku kombiseni ka rirhandzu eka swivumbiwa swa yena. Hi laha hi xiyeke ha kona, Matsalwa ma hi nyika swikombiso swo saseka swa lava va amukeleke swikombiso swa rirhandzu ra Xikwembu handle ka vutianakanyi. Hi laha swi fanelaka mupisalema la huhuteriweke u te: “A v̌a nkhense Yehova hikwalaho ka v̌unene bya yena, hikwalaho ka ŝihlamariso leŝi a ŝi endlelaka v̌ana v̌a v̌anhu.” (Psalma 107:8, 15, 21, 31) Xana hi ringeta ku amukela musa lowu nga fanelangiki ivi hi hupa xikongomelo xa wona? Sweswo swi nga tshuki swi humelerile! (2 Vakorinto 6:1) Un’wana ni un’wana wa hina a a tivutise a ku: ‘Xana hakunene ndza swi tlangela swikombiso swa rirhandzu ra Xikwembu leswi ana se ndzi swi voneke naswona ndzi tshembaka hi ku tiyiseka eku swi tsakela nakambe enkarhini lowu taka? Xana swi ndzi susumetela leswaku ndzi rhandza Yehova hi mbilu, moya-xiviri ni miehleketo kun’we ni matimba hinkwawo? Xana hakunene ndzi kongomisiwa hi Xikwembu? Naswona xana ndzi ringeta swinene ku landzelela mikondzo ya Yesu malunghana ni vutirheli bya mina hi ndlela yihi?’
17. Xana ku ta va ni vuyelo byihi loko hi amukela swikombiso swa rirhandzu ra Yehova Xikwembu handle ka vutianakanyi?
17 Entiyisweni, ku na tindlela to tala to kombisa ku nkhensa ka ntiyiso ka swikombiso hinkwaswo swa rirhandzu ra Xikwembu leri hi ri tokoteke. Hi ku tirhisa nkarhi hi laha ku fuweke leswaku hi kombisa ku tlangela ko tano, hi ta tsakisa mbilu ya Tatana wa hina la nge matilweni, ku va nkateko eka van’wana, ivi hi kuma ntsako, ku rhula ni ku eneriseka. Kutani, onge hi nga hambeta hi amukela swikombiso swa rirhandzu ra Xikwembu handle ka vutianakanyi.
U Nga Hlamula Njhani?
◻ Xana ku laveka yini leswaku u amukela rirhandzu ra Xikwembu handle ka vutianakanyi?
◻ Hi nga tihlayisa njhani ehenhleni ka mindzingo?
◻ Hi tihi tindlela tin’wana to kombisa rirhandzu ra vumakwerhu ha tona?
◻ Xana swikombiso swa rirhandzu ra Yehova swi fanele swi hi susumetela ku va khoma njhani vaakelani va hina?
[Xifaniso lexi nga eka tluka 17]
Hi fanele ku lwisana ni mboyamelo wa vudyoho leswaku hi papalata mhangu
[Xifaniso lexi nga eka tluka 18]
Vakulu va kombisa rirhandzu ra vumakwerhu hi ku famba ni van’wana evutirhelini bya Mfumo
[Xifaniso lexi nga eka tluka 19]
Charles Taze Russell, muungameri wo sungula wa Watch Tower Society, u kokele nyingiso eku rhuleni, ntsako ni nkateko lowu ku nga Yehova ntsena loyi a nga wu nyikaka