Va Amukele Rirhandzu Ra Xikwembu Handle Ka Vutianakanyi
“A v̌a nkhense Yehova hikwalaho ka v̌unene bya yena, hikwalaho ka ŝihlamariso leŝi a ŝi endlelaka v̌ana v̌a v̌anhu!”—PSALMA 107:8.
1. Xana muapostola Yohane u yi tshikelele njhani mfanelo ya rirhandzu epapileni rakwe ro sungula?
“XIKWEMBU i rirhandzu.” Vona ndlela leyi marito wolawo ma teleke nhlamuselo ha yona! A swi hlamarisi leswi muapostola Yohane a swi voneke swi hlawulekile ku ma phindha epapileni rakwe ro sungula. (1 Yohane 4:8, 16) Yehova Xikwembu a hi rirhandzu ntsena kambe u tlhela a va rirhandzu leri munhuhatiweke.
2. Hi tihi tindlela leti Xikwembu xi kombiseke rirhandzu eku tumbuluxeni ka wanuna ni wansati ni ku va lunghiselela, ha tona?
2 Ehleketa hi rirhandzu leri Xikwembu xi ri kombiseke hi ndlela leyi xi hi vumbeke ha yona. Marito ya Davhida yo tlangela ma fanela swinene. Tanihi Mupisalema la huhuteriweke, u te: “Nḍa ku nkhensa hikwalaho ka mahlori ya šiv̌umbeko ša mina.” (Psalama 139:14) Leswaku hi ta tshama hi hanyile ni ku tsaka, Xikwembu xi endle swi koteka eka hina ku kuma ntsako lowu nga heriki hi tindlela ta switwi swa ntlhanu—ku vona, ku twa, ku nantswa, nun’hwelo ni ku khumba. Mawaku ku xonga konghasi ka ntumbuluko loku hi rhendzeleke hinkwako! Vona ku hlamarisa ka swimilana ni swihari swo tala, swo hambana-hambana, a ha ha vulavuli hi ku xonga ka swiyimo ni swivumbeko swa vanhu! Nakambe Xikwembu xi endle lunghiselelo ro tsakisa ngopfu ra mihandzu, miroho ni swakudya swin’wana leswi kumekaka eka hina. (Psalma 104:13-16) Hi xivangelo lexinene, muapostola Pawulo u tsundzuxe vaaki va Listra wa khale leswaku Xikwembu xi “endla leswinene; xi mi nyikile timpfula to huma etilweni, na tinguva ta ndzalo, xi mi andzisela ni swakudya, xi tata timbilu ta n’wina hi ku tsaka.”—Mintirho 14:17.
3. Hi wahi matimba yo hlamarisa lawa Yehova a hi fuwiseke ha wona?
3 Ehleketa na hi mikateko hinkwayo leyi nga eka vutomi bya ndyangu lowu tsakeke. Ku tlula sweswo, anakanya hi ntsako hinkwawo lowu hi swi kotaka ku wu tsakela hikwalaho ka matimba ya hina ya mianakanyo ni mintlhaveko: mianakanyo, ku ehleketa, ku tsundzuka, ni ripfalo naswona ngopfu-ngopfu vuswikoti byo gandzela—hinkwaswo ka swona swi hi veka exiyin’weni lexi tlulaka swiharhi; nakambe a hi fanelanga hi rivala ntsako lowu vuyimbeleri byi nga hi nyikaka wona. Leswi kun’we ni tinyiko tin’wana to tala i swikombiso swa rirhandzu ra Xikwembu eka hina.
4. Hi swihi swikombiso swa rirhandzu ra Xikwembu leswi vanhu va swi tokoteke hi mpfhuka vatswari va vona va tlula nawu?
4 A swi kanakanisi leswaku Adamu na Evha va tiphine hi ntsako wo tala exiyin’weni xa vona lexi heleleke entangeni wa Edeni. (Genesa 2:7-9, 22, 23) Xana Xikwembu xi ri cukumetile rixaka ra vanhu, loko handle ka vutianakanyi ri tsandzeke ku amukela vumbhoni hinkwabyo bya rirhandzu ra Xikwembu leri a va ri tsakela? Ni kantsongo! Xi hatlise xi endla lunghiselelo ro lulamisa mimbuyelo hinkwayo yo biha ya ku tlula nawu ka vatswari va hina vo sungula. (Genesa 3:15) Nakambe Yehova u kombise rirhandzu hi ku lehisela vatukulu va Adamu lava nga hetisekangiki mbilu. (Varhoma 5:12) Ku fikela rini? Phela, i ku ringana malembe ya kwalomu ka 6 000 ku fikela sweswi! Ngopfu-ngopfu Xikwembu xi kombise rirhandzu hi ku tirhisana ni malandza ya xona. I ya ntiyiso marito lama nge: “Yehova, Yehova, Šikwembu ša tintŝalo ni v̌unene, leši hlwelaka ku kariha, leši teleke tintŝalo ni ku ṭhembeka, leši ṭeṭelelaka e tinšaka ta madzana ya khume, leši khomelaka munhu eku homboloka, ni ku dyoha, ni šiv̌i.”—Eksoda 34:6, 7.
5. Xana Yehova u ri kombise njhani rirhandzu ro lehisa mbilu eku tirhisaneni ni tiko ra Israyele?
5 Ee, ku lehisa mbilu ka Yehova Xikwembu loku a ku kombiseke a ku ri ku kulu ngopfu, eku tirhisaneni ka yena ni Vaisrayele ku sukela hi nkarhi lowu a va humeseke tanihi tiko a va tisa ehansi ka Ntshava ya Sinayi ku kondza loko ku tilawula ka vona ku n’wi sindzise ku va hlonga hi ku helela. Hi laha hi hlayaka ha kona eka 2 Tikronika 36:15, 16: “Yehova, Šikwembu ša v̌atata wa v̌ona, a v̌a layile e mikarini le’yo tala hi tinṭumi ta yena, hikuv̌a a a ranḍa ku ponisa tiko ra yena ni v̌uako bya yena. Kambe a v̌a rukana tinṭumi ta Šikwembu, v̌a sanḍa marito ya šona, v̌a hleka v̌aprofeta v̌a šona, v̌ukari bya Yehova byi ko byi pfuka tiko ra yena ŝonghasi leŝaku ku nga ha v̌i na ku ponisiwa.” Kambe a ku ri ni lava a va amukela rirhandzu ra Yehova Xikwembu handle ka vutianakanyi. Leswaku hi vona leswi va endliseke xiswona, sweswi a hi kambisiseni vutomi bya van’wana va vanhu lava. Leswi swi ta veka masungulo ya ku komba ndlela leyi hina hi xiviri hi nga ha amukelaka rirhandzu ra Yehova hi ku endla hi tindlela leti tirhaka swinene.
Ndlela Leyi Muxe A Hlamuleke Ha Yona Handle Ka Vutianakanyi
6. Xana xikombiso xa Muxe a xi ri lexi xiyekaka hi tindlela tihi, naswona hi le ka mintirho yihi laha a tokoteke rirhandzu ra Xikwembu kona?
6 Muxe a a ri xikombiso lexi xiyekaka xa munhu loyi a amukeleke rirhandzu ra Xikwembu handle ka vutianakanyi. Mawaku minkarhi leyinene swonghasi leyi a yi vekiwe emahlweni ka Muxe tanihi n’wana la wundliwaka hi nhwanyana wa Faro! Kambe u hlawule “ku xaniseka swin’we ni vanhu va Xikwembu, ku ri na ku titsakisa nkarhinyana hi ku hanya eku dyoheni. U ehleketile leswaku ku rhuketeriwa hikwalaho ka mesiya i rifuwo leri tlulaka vukosi hinkwabyo bya Egipta, hikuva a a langutela hakelo leya ha taka.” (Vaheveru 11:25, 26) Hi nkarhi lowu fanaka, Muxe a a lava ku kutsula vamakwavo, Vaisrayele, evukhumbini bya Egipta. Kambe a va ma tlangelanga matshalatshala yakwe, naswona a ku nga ri wona nkarhi lowu faneleke wa Xikwembu leswaku va kutsuriwa. (Mintirho 7:23-29) Hambi swi ri tano, makume ya malembe endzhaku, hikwalaho ka ripfumelo ni ku navela loku pfumalaka vutianakanyi ka Muxe leswaku a pfuna vamakwavo, Yehova u n’wi nyike matimba ya ku endla masingita yo tala ni ku pfuna Vaisrayele ku ringana malembe ya 40 tanihi muprofeta wa Yena, muavanyisi, munyiki wa nawu ni muhlanganisi. Eka ntirho lowu, Muxe u tokote swikombiso swo tala swa rirhandzu ra Yehova eka yena ni Vaisrayele-kulobye.
7. Xana Muxe u swi amukele njhani swikombiso swa rirhandzu swa Xikwembu?
7 Xana Muxe u ri amukele njhani rirhandzu ni musa lowu nga fanelangiki wa Xikwembu? Xana u ‘amukele musa lowu nga fanelangiki wa Yehova ivi a tshika xikongomelo xa wona’? (2 Vakorinto 6:1) Nikantsongo! Handle ka vutianakanyi Muxe u amukele swikombiso swa Yehova swa rirhandzu hi ku endla ku rhandza ka Xikwembu hi ku helela. Minkarhi hinkwayo u langute eka Yehova naswona u ve ni vunghana lebyi tiyeke ni Muvumbi wakwe. Vona ndlela leyinene swonghasi leyi Xikwembu xi bumabumeleke Muxe ha yona loko xi laya Aroni na Meriyamu hikwalaho ko sandza makwavo! Ee, Yehova u vulavula na Muxe hi “nomu” ivi a n’wi tshika a vona “šiv̌umbeko lešinene ša Yehova.” (Tinhlayo 12:6-8) Ku nga khathariseki malunghelo yo tala ya, Muxe, u hambete a ri la titsongahataka eka vanhu naswona a landzela swileriso swa Yehova “hi laha . . . a nga ṅwi lerisa ha kona.”—Eksoda 40:16; Tinhlayo 12:3.
8. Xana Muxe u kombise njhani leswaku hakunene a a kongomisiwa hi Xikwembu?
8 Muxe u tlhele a kombisa leswaku a a kongomisiwa hi Xikwembu handle ka vutianakanyi hi nkhathalelo lowu a wu kombiseke hi vito, vunene ni vugandzeri lebyi tengeke bya Yehova. Xisweswo, eka makhamba mambirhi hi laha ku humelelaka Muxe u kombele Yehova, leswaku a engetela tintswalo eka Israyele hikuva vito ra Xikwembu a ri khumbeka. (Eksoda 32:11-14; Tinhlayo 14:13-19) Loko Vaisrayele va gandzela xifaniso xa rhole, Muxe u kombise ku hisekela vugandzeri byo tenga hi ku huwelela a ku: “Xana i mani la yimaka na Yehova ke? A a te ka mina!” (NW) Endzhaku ka sweswo, Muxe ni lava a va ri na yena va dlaya vagandzeri va swifaniso lava ringanaka 3 000. Kutani ku ringana malembe ya 40 u lehise mbilu eka vanhu vo vilela ni lava xandzukaka. Kunene a swi kanakanisi leswaku Muxe u amukele swikombiso swa rirhandzu swa Xikwembu handle ka vutianakanyi, a hi vekela xikombiso lexinene namuntlha.—Eksoda 32:26-28; Deuteronoma 34:7, 10-12.
Ku Angula Lokunene Ka Davhida
9. (a) Davhida u ri amukele njhani rirhandzu ra Yehova Xikwembu ke? (b) Ku fana na Davhida, xana hi nga n’wi xixima njhani Yehova hi swilo swa risima?
9 Xitlangi xin’wana lexikulu xa Bibele lexi vekeke xikombiso lexinene xa ku amukela rirhandzu ra Xikwembu handle ka vutianakanyi a ku ri mupisalema Davhida, hosi ya vumbirhi ya Israyele. Ku khathalela kakwe vito ra Yehova ku n’wi susumetele ku lwa na Goliyati xihontlovila xo tseketsela xa Mufilista, lexi eka xona Yehova a nyikeke Davhida ku hlula. (1 Samuel 17:45-51) Ku hiseka koloko ku susumete Davhida leswaku a tisa areka ya vunakulobye eYerusalema. (2 Samuel 6:12-19) Naswona xana ku navela ka Davhida ku akela Yehova tempele a ku nga ri xikombiso xin’wana xa ku hiseka ni ku tlangela kakwe rirhandzu ni vunene bya Xikwembu ke? Kavula a swi ri tano. Hi ku va a aleriwile, lunghelo rero, Davhida a swi n’wi sivelanga ku lunghiselela ntirho ni ku xixima Yehova hi ku nyikela nsuku, silivhere ni maribye lama durhaka ya risima swinene hi byakwe. (2 Samuel 7:1-13; 1 Tikronika 29:2-5) Ku amukela loku fanaka ka rirhandzu ra Xikwembu ko pfumala vutianakanyi ku fanele ku hi susumetela ku ‘dzunisa Yehova hi swilo swa hina swa nkoka’ hi ku tirhisa rifuwo ra hina ra leswi vonakaka leswaku hi kurisa swilaveko swa Mfumo.—Swivuriso 3:9, 10; Matewu 6:33.
10. Ha yini ndlela ya Davhida yi faneriwa hi ku tekeleriwa?
10 Hambi leswi Davhida a a endla swihoxo leswikulu, evuton’wini byakwe hinkwabyo u tikombise a a ri ‘munhu loyi a nkhensekaka embilwini ya Yehova.’ (1 Samuel 13:14; Mintirho 13:22) Tipisalema takwe ti tele hi swiga swo tlangela rirhandzu ra Xikwembu. The International Standard Bible Encyclopœdia yi vula leswaku Davhida “a engeteriwe ngopfu hi leswi nkhensekaka ku tlula swihi na swihi leswi kombisiweke eBibeleni.” Mupisalema Asaf u vule leswaku Xikwembu “ši hlawula Davida, nanḍa wa šona, ši ṅwi teka maṭhangeni ya tinyimpfu . . . A ta v̌a murisi wa Yakobo, tiko ra šona, na Israyele, nḍaka ya šona. Kutani Davida a v̌a risa hi mbilu leyi tengeke.” (Psalma 78:70-72) Entiyisweni, ndlela ya Davhida a yi ri yin’wana leyi hi nga yi landzelaka.
Yesu Kriste, Xikombiso Xa Hina Lexi Hetisekeke!
11, 12. Yesu u swi kombise njhani leswaku hakunene a a kongomisiwa hi Xikwembu?
11 Kavula, Yesu Kriste i xikombiso lexinene ngopfu xa munhu eMatsalweni, loyi a amukeleke rirhandzu ra Xikwembu handle ka vutianakanyi. Leswi swi susumetele Yesu ku endla yini xana? Xo sungula, u susumeteriwe ku kombisa ku tinyiketela loku tiyeke eka Yehova. A swi kanakanisi leswaku Yesu a a kongomisiwa hi Xikwembu hi ku helela. Ku tlangela ka yena rirhandzu ni vunene bya Tata wa yena wa le matilweni ku n’wi susumetele leswaku a va munhu wa moya wa ntiyiso. A ri ni vuxaka lebyikulu ni Xikwembu. Yesu a a ri munhu la khongelaka, naswona a a rhandza ku vulavula ni Tata wa yena wa le matilweni. Nkarhi na nkarhi, hi hlaya leswaku Kriste a a khongela. Eka khamba rin’wana u hete vusiku hinkwabyo a khongela. (Luka 3:21, 22; 6:12; 11:1; Yohane 17:1-26) Eku amukeleni ka rirhandzu ra Xikwembu, Yesu u kombise ntiyiso wa leswaku ‘munhu a nge hanyi hi vuswa ntsena kambe na hi marito hinkwawo lama humaka enon’wini wa Yehova.’ Entiyisweni, swakudya swa yena a ku ri ku endla ku rhandza ka Xikwembu. (Matewu 4:4; Yohane 4:34) Xana a hi fanelanga ku amukela rirhandzu ra Xikwembu hi ku fanana handle ka vutianakanyi, hi xi kombisa ku tinyiketela loku tiyeke?
12 Yesu Kriste u amukele rirhandzu ra Xikwembu handle ka vutianakanyi, nkarhi hinkwawo a a kongomisa nyingiso eka Xikwembu ni Tata wa yena. Loko un’wana a vula Yesu a ku i “Mudyondzisi lonene,” u arile ivi a ku: “A ku na lonene, loko xi nga ri Xikwembu ntsena.” (Luka 18:18, 19) Hi ku phindha-phindha, Yesu u tshikelele leswaku a a nge endli nchumu hi matimba ya yena n’wini. A nga kalanga a lahlekeriwa hi nkarhi wa ku kurisa vito ra Tata wa yena, naswona hi laha ku fanelekaka ngopfu u sungule xikhongelo xa yena xa xikombiso hi xikombelo lexi nge: “Vito ra wena a ri hlawuleke.” U khongerile a ku: “Tatana, dzunisa vito ra wena!” Naswona emahlweninyana ka ku fa, Kriste u byele Tata wakwe a ku: “Ndzi ku dzunisile laha misaveni, hi ku heta ntirho lowu u ndzi nyikeke wona leswaku ndzi wu tirha.” (Matewu 6:9; Yohane 12:28; 17:4) Hakunene, eku amukeleni ka rirhandzu ra Xikwembu, hi fanele hi lava ku dzunisa Yehova, hi khongelela leswaku vito ra yena ro kwetsima ri hlawuleka.
13. Xana rirhandzu ra Xikwembu ri n’wi susumete njhani Yesu leswaku a tirha?
13 Sweswi, xiya ndlela ya vumbirhi leyi ku amukela rirhandzu ra Xikwembu handle ka vutianakanyi ku susumeteleke Yesu ha yona. Ku n’wi vangele ku rhandza vululami ni ku venga vubihi, hi laha swi vhumbiweke ha kona eka Psalma 45:7. (Vaheveru 1:9) A a ‘tshembekile, a a pfumala nandzu, a a kala xivati naswona a a hambanile ni vadyohi.’ (Vaheveru 7:26) Yesu u tlhontlhe vakaneti vakwe va lunya leswaku va n’wi boha hi xidyoho, kambe a va swi endlanga sweswo. (Yohane 8:46) Eka makhamba mambirhi, ku venga kakwe vubihi ku n’wi endle leswaku a basisa tempele ya vagandzeri va makwanga. (Matewu 21:12, 13; Yohane 2:13-17) Vona ndlela ya matimba swonghasi leyi Yesu a avanyisaka varhangeri va vukhongeri va vukanganyisi ha yona, ni ku va byela leswaku i va tlhelo ra Diyavulosi!—Matewu 6:2, 5, 16; 15:7-9; 23:13-32; Yohane 8:44.
14. Eku amukeleni ka rirhandzu ra Yehova, xana Yesu u tirhisane njhani ni vadyondzisiwa vakwe?
14 Nakambe ndlela yin’wana leyi rirhandzu ra Yehova ri susumeteke Yesu ha yona yi nga voniwa eku tirhisaneni kakwe ni vaapostola swin’we ni valandzeri van’wana va yena. Vona ndlela leyi a va rhandzeke, a va lehisela mbilu ni ku va tiyiselela ha yona! Va fanele va n’wi ringe hi ndlela leyi khunguvanyisaka hi ku kanetana ka vona, va kanetana ku ya fikela evusikwini lebyi a nga nyiketiwa ha byona, ehenhleni ka loyi a a ri lonkulu. (Luka 22:24-27) Kambe, nkarhi hinkwawo Yesu u tikombise a ri ni mbilu yo rhula ni tintswalo. (Matewu 11:28-30) I ntiyiso, Yudasi u xenge Yesu, Petro a n’wi ala hi makhamba manharhu, naswona vaapostola lavan’wana va balekile loko ntlawa wo hlasela wu ta ku ta n’wi khoma. Kambe a nga vanga na tihanyi kumbe ku hlundzuka. Hi swi tivisa ku yini ke? Phela, loko a tlhela a hlangana ni vaapostola endzhaku ka ku pfuka kakwe eku feni, Yesu a nga va nyikanga ndzayo ya vukari hi ku hluriwa hi ku chava. Ku ri na sweswo, u va chavelerile ni ku va tiyisa hi ku yisa ntirho wa Mfumo emahlweni.—Yohane 20:19-23.
15. Xana handle ka vutianakanyi Yesu u pfunise ku yini eka swilaveko swa nyama swa vanhu?
15 Nakambe, a hi xiyeni ndlela yin’wana leyi handle ka vutianakanyi Yesu Kriste a amukeleke rirhandzu ra Xikwembu ha yona. U endle tano hi ku tiendla gandzelo leswaku a pfuna van’wana, hi rifu leri tsongahataka ro vava emhandzini ya nxaniso. (Vafilipiya 2:5-8) Yesu u pfunile eka swilaveko swa nyama swa vanhu hi ku phamela mintshungu ni ku hanyisa vo tala. (Matewu 14:14-22; 15:32-39) Mikarhi hinkwayo u veka swilaveko swa van’wana emahlweni ka swa yena. Hi yona mhaka leyi a swi koteke ku vula a ku: “Vahlati va ni mincele, ni tinyanyana ti ni swisaka, kambe N’wana-wa-Munhu a nga na laha a nga seketelaka nhloko ya yena kona.” (Matewu 8:20) Yesu a a ku twa ku tirha ka moya wa Xikwembu loko wu huma ka yena loko a hanyisa hi masingita. Kambe a nga ringetanga ni siku na rin’we leswaku a bindzula hi ku tirhisa matimba yo tano lama tlakukeke, ku fana ni loko wansati loyi a ri ni vuvabyi byo khuluka ngati ku ringana malembe ya 12 a khumba nguvu ya yena hi ripfumelo naswona a hanya. (Marka 5:25-34) Ku tlula kwalaho, Yesu a nga ma tirhisanga matimba lama tlakukeke hi vito ra yena n’wini.—Ringanisa Matewu 4:2-4.
16. Hi tihi tindlela leti Yesu a eneriseke swilaveko swa moya swa vanhu ha tona?
16 Hambi leswi handle ka vutianakanyi Yesu a anerisa swilaveko swa vanhu swa nyama hi ku va hanyisa emavabyini ya vona ni ku va phamela swakudya hi masingita, nsusumeto lowukulu evutirhelini byakwe bya laha misaveni a ku ri ku chumayela mahungu lamanene ya Mfumo wa Xikwembu, ku dyondzisa ni ku endla vadyondzisiwa. Ku nga khathariseki mahlori hinkwawo yo hanyisa lawa a ma endleke, a a nga tiviwi tanihi N’anga Leyikulu kumbe Muendli wa Masingita kambe a a tiviwa tanihi Mudyondzisi Lonene. (Matewu 4:23, 24; Marka 10:17) Yesu u tivule Mudyondzisi, hi laha vadyondzisiwa hambi valala vakwe va endleke ha kona. (Matewu 22:16; 26:18; Marka 9:38) Mawaku ntiyiso wonghasi lowu a wu dyondziseke, hi laha wu nga ha kona eDyondzweni ya le Ntshaveni! (Matewu 5:1–7:29) Mayana ku fanela ka swi faniso swakwe, ni ku hlamarisa ka swifaniso swa yena swa vuprofeta kun’we ni vuprofeta byin’wana! A swi kanakanisi leswi eka khamba rin’wana masocha lama rhumiweke ku ya khoma Yesu ma tsandzekeke ku n’wi khoma!—Yohane 7:45, 46.
17. (a) Xana Yesu u hi nyike njhani xikombiso lexi hetisekeke xa rirhandzu? (b) Xana ku ta vulavuriwa ha yini eka nhloko-mhaka leyi landzelaka?
17 Handle ko kanakana, Yesu Kriste u hi vekele xikombiso lexi hetisekeke xa ku amukela swikombiso swa rirhandzu swa Xikwembu eka hina handle ka vutianakanyi. Yesu u rhangise Tata wa yena evuton’wini ni le rirhandzwini rakwe. U rhandze ku lulama hakunene, naswona u tirhisane ni vaapostola ni van’wana vadyondzisiwa vakwe hi rirhandzu, naswona u hete vutomi byakwe a tirhela swilaveko swa vanhu, swa moya ni swa nyama. Eku heteleleni, Yesu u chapute vutirheli bya yena hi ku nyikela vutomi byakwe tanihi nkutsulo. (Matewu 20:28) Kambe ku vuriwa yini hi hina? I ntiyiso, a hi hetisekanga, ku fana na Muxe na Davhida. Hambi swi ri tano, hi laha nhloko-mhaka leyi landzelaka yi kombaka ha kona, ku ni tindlela leti tirhaka leti hi nga tekelelaka Xikombiso xa hina eku amukeleni ka swikombiso swa rirhandzu swa Xikwembu handle ka vutianakanyi.
A Wu Ta Hlamula Njhani?
◻ Ha yini ku nga vuriwaka leswaku “Xikwembu i rirhandzu”?
◻ Muxe u swi amukele njhani swikombiso swa rirhandzu swa Xikwembu ke?
◻ Xana Davhida u amukele rirhandzu ra Yehova Xikwembu hi tindlela tihi?
◻ Hi xihi xikombiso lexi Yesu Kriste a xi vekeke eku amukeleni ka rirhandzu ra Xikwembu?
[Xifaniso lexi nga eka tluka 10]
Xana wa yi tiva ndlela leyi Muxe a amukeleke rirhandzu ra Xikwembu ha yona?
[Swifaniso leswi nga eka tluka 12, 13]
Yesu u amukele rirhandzu ra Xikwembu hi ku pfuna van’wana hi tlhelo ra moya ni nyama na hi ku nyikela vutomi byakwe tanihi nkutsulo