Xiviko Xa Vahuweleri Va Mfumo
Ku Chumayela Mahungu Lamanene “eMakun’wini Ya Misava”
“EVHANGELI leyi ya Mfumo yi ta twarisiwa emisaveni hinkwayo, leswaku yi va vumbhoni eka vanhu va matiko hinkwawo; kutani hi kona makumu ma nga ta fika.” Ku vurise sweswo Yesu eka vadyondzisiwa va yena emahlweni ka ku fa ka yena. Hi ku hatlisa endzhaku ka ku pfuka ka yena, u ye emahlweni a ku: “Mi ta va timbhoni ta mina kwala Yerusalema, ni le tikweni hinkwaro ra Yudiya, ni ra Samariya, ni ku ya fika emakun’wini ya misava.” (Matewu 24:14; Mintirho 1:8) Namuntlha, vuprofeta lebyi bya hetiseka ematikweni yo tlula 200, ku katsa ni tiko ra le Amerika Dzonga ra Peru.
Timbhoni to tlula 32 000 ti chumayela mahungu lamanene etikweni rero ro saseka, naswona nsimu ya vona hakunene yi katsa swin’wana swa swiyenge swa le kule swinene swa misava: Andes leyi tlakukeke, leyi fikelelaka ku leha ka le xikarhi ka 4 000 na 4 500 wa timitara, ni khwati leri hisaka ra Amazon, laha vanhu va nga fikeleriwaka hi swikepe swa milambu ntsena. Rhavi ra Peru ra vika:
◻ “Endhawini ya khwati, hi na maphayona ya nhungu lama hlawulekeke lama averiweke eka swikepe swimbirhi leswintsongo swa milambu leswi vitaniwaka lanchas. Swikepe leswi swintsongo swi mbombomela hi [0,3 wa timitara] ntsena ematini, kutani a swi koteka ku ndlandlamuxa ku chumayeriwa ka mahungu lamanene ku ya fika etindhawini to tala letintshwa leti nga eka milambu leyintsongo. Ku fikela sweswi, vamakwerhu lava tirhisaka swikepe leswi va fambise madzana ya magidi ya timagazini, tibuku ni Tibibele hinkwako eNkoveni wa Amazon wa Peru. Tanihi vuyelo lebyi kongomeke, mabandlha lamantshwa ya mune ma simekiwile, kun’we ni mintlawa ya ntlhanu leyi nga yoxe leyi vikaka ntirho ni ku khoma minhlangano. Ku tshembiwa leswaku mintlawa leyi ku nga ri khale yi ta va mabandlha.”
◻ Doroba rin’wana ra khwati ri kule etlhelo ka xitichi xo pompa xa Trans-Andean xa phayiphi ya oyili, leyi rhwalaka oyili ku suka ekhwatini ehenhla ka Andes leyi tlakukeke ku ya fika eribuweni ra le vupela-dyambu. Hikwalaho ka vukona bya vatirhi va phayiphi ya oyili, doroba leri ri ve ni tindhawu ta kwalomu ka 20 to nwela eka tona naswona ri tiviwe tanihi ndhawu yo dakwela eka yona ni ya ku titsakisa. Hambi swi ri tano, endzhaku ka loko maphayona yo hlawuleka ma nyikele vumbhoni bya rixaladza, vo tala va amukele rungula ra Mfumo, naswona sweswi ku sele tindhawu ta mune to nwela eka tona ntsena edorobeni! Hi nkarhi wa riendzo ra sweswinyana ra mulanguteri wa xifundza, vanhu va 189 va te eka nkulumo ya le rivaleni. Sweswi ku na ntlawa wa vahuweleri va 7 edorobeni, naswona vanhu vo tlula 45 va va kona eminhlanganweni hinkwayo. Ku nga ri khale, hi ku katekisiwa hi Yehova, wu fanele ku va bandlha.
◻ Eka rin’wana ra mabandlha ya 221 entsindza wa Peru, Lima, wanuna wa malembe ya 29 hi vukhale u hlamusela ndlela leyi a kumeke ntiyiso ha yona. Loko a tshike xikolo a a ri ni malembe ya 13 hi vukhale, u joyine ntlawa wa madzolonga kutani a sungula ntirho-vutomi wa ku lwa, ku tirhisa swidzidzirisi ni ku endla vunghwavava. Endzhaku ka malembe mambirhi ya ntirho wa nyimpi wa nsindziso, u sungule ku va ni swiphiqo swa miehleketo. Kutani ke, hi 1983, makwerhu wa xisati la titsongahataka, la nga tinyungubyisiki u hlangane na yena evutirhelini bya yena bya yindlu na yindlu. Ro sungula, u twe hi ta misava leyintshwa ya rirhandzu ni ku rhula. Dyondzo ya Bibele yi sunguriwile, kutani hi mpfuno wa rirhandzu lowu humaka ebandlheni na hi matimba ya Yehova, u swi kotile ku hlula vubihi bya yena. Hi 1986 u khuvuriwile kutani sweswi u tirha tanihi nandza wa vutirheli ebandlheni.
Entiyisweni, marito ya Yesu ya leswaku Mfumo wu ta chumayeriwa “ku ya fika emakun’wini ya misava” ma hetiseka ePeru hi vuyelo lebyi hlamarisaka, ku pfuna vo tala etikweni rero lava va nga ni ndlala ni tora ra ntiyiso.