Vutomi Ni Vutirheli Bya Yesu

Ku Suka Eka Pilato Ku Ya Eka Heroda, A Tlhela A Vuya

LOKO Vayuda va hehle Yesu hi ku vula leswaku i hosi, Pilato u tlhela a nghena endlwini ya vuhosi ku n’wi vutisa. Hambi loko Yesu a nga endli matshalatshala yo fihla leswaku i hosi, u hlamusela leswaku Mfumo wa yena a hi nxungeto eRhoma.

Yesu u byela Pilato a ku: “Mfumo wa mina a hi wa misava leyi; loko a wu ri wa misava leyi, malandza ya mina a ma ta lwa leswaku ndzi nga nyiketiwi eka Vayuda; kambe hi laha swi nga ha kona, mfumo wa mina a hi wa laha hansi.” Xisweswo Yesu u pfumela kanharhu leswaku u na Mfumo, hambi loko wu nga ri wa laha misaveni.

Hambi swi ri tano, Pilato wa n’wi tengisa: “Hikokwalaho, u hosi, a hi swona ke?” Hi leswaku u hosi hambi loko Mfumo wa wena wu nga ri xiphemu xa misava leyi.

Yesu u pfumelela Pilato ku tiva leswaku u fikelele makumu lamanene, hi ku hlamula a ku: “Ku vula wena leswaku ndzi hosi. Leswi ndzi velekeriweke swona ni leswi ndzi nga tela swona laha misaveni, i ku ta ndzi ta veka vumbhoni ehenhla ka ntiyiso. Un’wana ni un’wana loyi a nga wa ntiyiso, u yingisa rito ra mina.”

Ina, ku ta ka Yesu emisaveni i ku ta veka vumbhoni ehenhleni ka “ntiyiso,” ngopfu-ngopfu ntiyiso wa Mfumo wa yena. Yesu u tiyimisela ku va la tshembekaka eka ntiyiso wolowo hambi loko wu koxa vutomi bya yena. Hambi swi ri tano, Pilato wa vutisa: “Ntiyiso i ncini?” naswona a nga yimeli nhlamuselo leyi yaka emahlweni. Swi ringene leswaku a nga avanyisa.

Pilato u tlhelela eka ntshungu lowu yimeke ehandle ka yindlu ya vuhosi. Kumbexana a khome Yesu hi voko, u byela vaprista lavakulu ni lava va nga na vona a ku: “A ndzi kumi nandzu eka munhu loyi.”

Hi ku hlundzukisiwa hi xiboho, mintshungu yi sungula ku phikelela yi ku: “U pfilunganya tiko hi ku dyondzisa hinkwako eYudiya; u sungule eGaleliya, sweswi u tile haleno.”

Angulo wa Vayuda wa vuhunguki wu fanele wu hlamarisa Pilato. Kutani, loko vaprista lavakulu ni vakulukumba va hambeta va huwelela, Pilato u hundzulukela eka Yesu kutani a vutisa: “Xana a wu titwi timhaka leto tala leti va ku vekaka nandzu ha tona ke?” Hambi swi ri tano, Yesu a nga endli matshalatshala yo hlamula. Ku rhula ka yena hambi loko a langutane ni xihehlo xa vukarhi swi endla leswaku Pilato a hlamala.

Hi ku vona leswaku Yesu i Mugaleliya, Pilato u vona ndlela yo huma eka vutihlamuleri bya yena. Mufumi wa Galeliya, Heroda Antipasi (n’wana wa Heroda Lonkulu), u le Yerusalema ePasekeni, kutani Pilato u rhumela Yesu eka yena. Emahlweninyana, Heroda Antipasi u tseme Yohane mukhuvuri nhloko, kutani Heroda u sungula ku chava loko a twa hi mintirho ya mahlori leyi Yesu a a yi endla, a a chava leswaku kahle-kahle Yesu i Yohane loyi a pfukeke eku feni.

Sweswi, Heroda u tsake ngopfu hi ku langutela ka vona Yesu. Leswi a hi ku va a khumbeka hi vuhlayiseki bya Yesu kumbe leswaku u lava ku vona matshalatshala ya ntiyiso yo dyondza loko swihehlo ehenhla ka yena swi ri ntiyiso kumbe e-e. Kambe, u navela ku tiva naswona u lava ku vona Yesu loko a endla mahlori.

Hambi swi ri tano, Yesu u ala ku anerisa ku navela ka Heroda. Entiyisweni, loko Heroda a n’wi vutisa, a nga hlamuli. Hi ku hlundzuka, Heroda ni masocha ya yena lama rindzaka ma endla Yesu xihlekiso. Va n’wi ambexa nguvu yo hatima kutani va n’wi tseketsela. Kutani va n’wi rhumela endzhaku eka Pilato. Hikwalaho, Heroda na Pilato, lava eku sunguleni a va ri valala, va hundzuka vanghana lavanene.

Loko Yesu a tlhela, Pilato u vitana vaprista lavakulu, vafumi va Vayuda ni vanhu endhawini yin’we kutani a ku: “Mi tisile munhu loyi eka mina, mi ku: ‘U hambukisa tiko.’ Sweswi ndzi kambile mhaka emahlweni ka n’wina, kambe a ndzi kumanga nandzu eka yena, hambi wu ri wun’we wa leswi mi n’wi hehlaka ha swona. Swi tano na Heroda, hikuva u n’wi tlheriserile ka hina; swa tikomba leswaku a nga endlanga ni xilo ni xin’we lexi fanelaka hi rifu. Hikokwalaho, ndzi ta lerisa leswaku a biwa, kutani ndzi ta n’wi ntshunxa.”

Xisweswo, Pilato kambirhi u twarisa Yesu a ri la nga hava nandzu. U navela ku n’wi ntshunxa, hikuva u xiya leswaku i mavondzo ntsena lama endlaka leswaku vaprista va n’wi tisa eka yena. Kambe loko Pilato a ya emahlweni a ringeta ku ntshunxa Yesu, u kuma nsusumeto wun’wana wa matimba wo endla tano. Loko a ri exitulwini xa yena xo avanyisa, nsati wa yena u rhumela rungula, a ku: “U nga tshuki u nghena emhakeni ya munhu yoloye wo lulama, hikuva matolo ndzi vavisekile ngopfu enorhweni [entiyisweni a wu huma eka Xikwembu] hikwalaho ka yena.”

Hambi swi ri tano, Pilato u ta n’wi ntshunxa njhani munhu loyi wo pfumala nandzu, tanihi leswi a a swi tivaka leswaku u fanela ku n’wi ntshunxa? Yohane 18:36-38; Luka 23:4-16; Matewu 27:12-14, 18, 19; 14:1, 2; Marka 15:2-5.

◆ Xana Yesu u xi hlamurisa ku yini xivutiso mayelana ni vuhosi bya yena?

◆ Hi wihi “ntiyiso” lowu Yesu a hetaka vutomi bya yena emisaveni a veka vumbhoni bya wona?

◆ Ku avanyisa ka Pilato hi kwihi, vanhu va hlamula njhani naswona i yini lexi Pilato a xi endlaka hi Yesu?

◆ I mani Heroda Antipasi, naswona ha yini a tsake ngopfu ku vona Yesu naswona u endla yini ha yena?

◆ Ha yini Pilato a navela ku ntshunxa Yesu?