Swivutiso Swa Vahlayi

◼ Ha yini ku hundzuluxeriwa ka 2 Petro 1:19 eka New World Translation of the Holy Scriptures ku hambana ni loku ku nga eka Tibibele tin’wana?

Loko a tshikilela nkoka wa rito ra Xikwembu leri huhuteriweke, muapostola Petro u tsarile: “Hikwalaho hi na rito ra vuprofeta leri tiyisiweke swinene; naswona mi endla kahle hi ku ri hlayisa tanihi rivoni leri voningaka emunyameni, ku kondza vurhonga byi tshwuka ni nyeleti ya mixo yi huma, etimbilwini ta n’wina.”—2 Petro 1:19, NW.

Xiya leswaku xiga lexi nge “ku kondza vurhonga byi tshwuka ni nyeleti ya mixo yi huma” xi hambanisiwe hi tikhoma. Ku hundzuluxela ko tala ka Bibele a ku swi endli leswi.

Hi xikombiso, Dr. James Moffatt u hundzuluxela xiyenge xo hetelela xa ndzimana leyi a ku: “. . . ri voninga tanihi rivoni exivandleni xa munyama; ku kondza Vurhonga byi tshwuka ni nyeleti ya mixo yi huma etimbilwini ta n’wina.” Ku hundzuluxela ko fana ni loku ku yisa eka langutelo ra leswaku ku huma ka nyeleti ya mixo ku humelela etimbilwini ta vapfumeri, tanihi loko va tokota ku voninga ko karhi ka moya.

Hambi swi ri tano, hambi ku ri le ndzhaku esikwini ra Muxe, a ku ri na xikombiso xa leswaku ‘nyeleti a yi ta huma eka Yakobo.’ (Tinhlayo 24:7; ringanisa Psalma 89:34-37.) Yesu u tihlamusele erivaleni tanihi ‘rixaka ra Davhida, ni nyeleti leyi vangamaka ya mixo.’—Nhlavutelo 22:16.

Nhlamuselo leyi ya “nyeleti ya mixo,” yi fanelekela mongo wa leswi muapostola Petro a a bula ha swona. U kombetele eka xivono lexi hundzukaka lexi a xi voneke emalembeni ya kwalomu ka 30 ekusunguleni. (Matewu 16:28–17:9) Xivono xexo lexi vangamaka xi kombetele enkarhini lowu Yesu a a ‘ta ta emfun’weni wa yena ha wona,’ kumbe a dzunisiwa ematimbeni ya Mfumo. Leswi Petro a swi voneke swi kandziyise nkoka wa rito ra Xikwembu; hi ku fanana, Vakriste namuntlha va fanele ku hlayisa rito rero ra vuprofeta.

Hambi leswi timbilu ta vanhu hi ntolovelo a ti ri—naswona ta ha riki—emunyameni, leswi a swi fanelanga swi va tano eka Vakriste va ntiyiso. Swi tikomba onge va ni rivoni leri voningaka laha loko a ri nga ri kona a ku ta va munyama, etimbilwini ta vona. Petro a a swi tiva leswaku hi ku yingisela rito ra vuprofeta leri vangamaka ra Xikwembu, Vakriste a va ta tshama va xalamukile naswona va voningeriwa ku ya fika eku xeni ka siku lerintshwa. Wolowo a wu ta va nkarhi lowu “nyeleti ya mixo,” kumbe “nyeleti leyi vangamaka ya mixo,” yi nga ta fuma hi xiviri ematimbeni ya Mfumo.

Swa tsakisa leswi E. W. Bullinger a swi tsaleke ehenhleni ka 2 Petro 1:19 loko a ku: “Laha swi le rivaleni leswaku ku fanele ku va na swiangamelo, hikuva i vuprofeta lebyi byi nga rivoni leri vangamaka, naswona Kriste ni ku humelela ka Yena i Nyeleti ya mixo ni Vurhonga. Entiyisweni, nhlamuselo a yi nga vi swona leswaku hi khongoteriwa ku yingisa rito ra vuprofeta ku kondza loko Kriste a paluxiwa etimbilwini ta hina! E-e; kambe hi fanele ku hlayisa rito leri ra vuprofeta etimbilwini ta hina, ku kondza ku hetiseka ku fika eku humeleleni ka Kriste—ku humelela ka Yena loyi a vitaniwaka ‘Nyeleti ya Mixo.’”—Figures of Speech Used in the Bible, 1898.

Hi laha ku faneleke, ku hundzuluxela ko tala ka Bibele ku tirhisa swiangamelo eka 2 Petro 1:19.a New World Translation of the Holy Scriptures yi hlayisa ndlela ya xisekelo ya rungula leri humaka eka Xigriki xo sungula. Kambe yi tirhisa tikhoma ku hambanisa xiga “ku kondza vurhonga byi tshwuka ni nyeleti ya mixo yi huma” ni xitsundzuxo xa ku yingisa rito ‘tanihi rivoni leri voningaka emunyameni, etimbilwini ta n’wina.’

[Nhlamuselo ya le hansi]