Fambisana Ni Golonyi Ya Yehova Ya Le Tilweni
“U ta v̌a byela marito ya mina, hambi v̌a yingisa, hambi v̌a nga yingisi.”—EZEKIEL 2:7.
1, 2. I golonyi yihi ya vuhosi leyi Ezekiyele a yi voneke naswona u byeriwe yini?
GOLONYI ya Yehova ya le tilweni sweswi yi yima emahlweni ka malandza ya yena. Hi mahlo ya ripfumelo, ma vona golonyi yoleyo ya vuhosi ya Hosi ya vona Leyikulu. Hi leyi kwetsimaka, leyi chavisaka, leyikulu.
2 Golonyi yoleyi ya vuhosi yi kokiwe emahlweni ka muprofeta wa Xikwembu Ezekiyele exivonweni emalembeni ya 2 600 lama hundzeke. Eka golonyi leyi yi byarhaka xiluvelo—ku nga nhlengeletano ya Xikwembu ya le tilweni ya swivumbiwa swa moya—Yehova u humese xileriso lexi xi chavisaka eka Ezekiyele: “I v̌ana la’v̌a tiarisaka, la’v̌a nga ni timbilu le’ti nonon’hwaka; nḍa ku ruma e ka v̌ona, u ta v̌a byela, u ku: Hosi Yehova o ri: Hambi v̌a yingisa, kumbe v̌a nga yingisi, kasi i yindlu le’yi tiarisaka, v̌a ta ŝi tiv̌a leŝaku ku ni muprofeta e šikari ka v̌ona.”—Ezekiel 2:4, 5.
3. I ku yelana kwihi ka manguva lawa loku Ezekiyele a nga na kona?
3 Ezekiyele u hetisise xileriso xexo hi ku chivirika, a tirha tanihi xitirho lexi nga xoxe evokweni ra Xikwembu. Hi ku fanana, sweswi Xikwembu xi na xitirho xin’we xa nhlengeletano evulawurini bya xona. Ntlawa wa Ezekiyele, masalela lama totiweke, wu le mahlweni ka ntirho wa ku nyikela vumbhoni lebyi heleleke, kun’we ni “ntshungu lowukulu” wa “tinyimpfu tin’wana” lowu rhendzelaka kwalaho wu seketela. (Nhlavutelo 7:9, 10; Yohane 10:16) Hinkwavo i “ntlhambi wun’we,” Murisi Lonene, Yesu Kriste, u va kongomisa a ri hansi ka vuhosi bya Mukhandziyi lonkulu wa Golonyi, Yehova Xikwembu.
4, 5. Nhlengeletano leyi vonakaka ya Xikwembu yi ve kona hi ndlela yihi, naswona yi tokote yini ku pfumelelana na Esaya 60:22?
4 Ehansi ka nkongomiso wa Yehova, nhlengeletano leyi ya misava hinkwayo yi kule yi va xitirho xa matimba xo huwelela xileriso xa ku “[chava] Xikwembu, [ni ku] xi dzunisa, hikuva nkarhi wa xona wa ku avanyisa wu fikile.” (Nhlavutelo 14:7) Tanihi leswi Ezekiyele a nga ti tlakusangiki kumbe a tiveka tanihi muprofeta, kutani nhlengeletano leyi vonakaka ya Xikwembu a yi tivumbanga kumbe yi tiveka. A yi sungulanga hi ku rhandza kumbe matshalatshala ya munhu. Mukhandziyi wa Golonyi wa le henhla u vangele nhlengeletano leyi leswaku yi va kona. Hi ku nyikiwa matimba hi moya wa Xikwembu ni ku sekeriwa hi tintsumi leto kwetsima, vanhu va Yehova va tokote ku engeteleka ko tano loku hlamarisaka leswaku ‘lontsongo u ve tiko ra matimba.’—Esaya 60:22.
5 Timbhoni ta Yehova leti tlulaka 4 000 000 ti twarisa rungula ra Mfumo ematikweni ya 212. Va hlengeletane emabandlheni lama tlulaka 63 000 lama hleriweke hi swifundza ni miganga. Tihofisi ta marhavi lama engetelekeke ni switirho swo gandlisa swi tirha ehansi ka nkongomiso wa Huvo leyi Fumaka tanihi yindlu-nkulu ya nhlengeletano. Tanihi munhu un’we, hinkwavo va ya emahlweni, va chumayela mahungu lamanene, va dyondzisa lava swi amukelaka, va aka tindhawu to hlanganyela eka tona. Ina, nhlengeletano ya Yehova leyi vonakaka yi fambisana ni golonyi ya le tilweni ni Mukhandziyi wa yona.
6. Xana ku katseka yini eku fambisaneni ni nhlengeletano leyi vonakaka ya Yehova?
6 Loko u ri un’wana wa Timbhoni ta Yehova, xana u fambisana ni nhlengeletano leyi vonakaka ya Xikwembu? Ku endla tano a hi ku va kona eminhlanganweni ya Vukriste ni ku heta nkarhi evutirhelini ntsena. Xo sungula, goza ri yelana ni ku endla nhluvuko ni ku kula ka moya. Ri katsa ku va ni langutelo lerinene, u rhangisa leswi faneleke ni ku tiva hinkwaswo. Loko hi fambisana ni golonyi ya Yehova ya le tilweni, vutomi bya hina byi fambisana ni rungula leri hi ri twarisaka.
7. Ha yini u kombisisa mahanyelo ya Ezekiyele tanihi muprofeta wa Xikwembu?
7 Emhakeni ya ku hlayisa goza, malandza ya Yehova ya manguva lawa ma nga dyondza swo tala eka xikombiso xa Ezekiyele. Hambi leswi a hlawuriweke ku va muprofeta hi Yehova, Ezekiyele a ha ri na mintlhaveko, nkhathalelo ni swilaveko. Hi xikombiso, tanihi wanuna lontsongo la tekeke, u tokote mahlomulo ya ku feriwa hi nsati wa yena. Hambi swi ri tano, a nga wu langutelanga hansi ntirho wa yena tanihi muprofeta wa Yehova. Hi ku xiya ndlela leyi Ezekiyele a tikhomeke ha yona eka swivumbeko swin’wana nakambe, hi nga titiyisa leswaku hi fambisana ni nhlengeletano leyi vonakaka ya Xikwembu. Leswi swi ta hi pfuna leswaku hi fambisana ni nhlengeletano ya xona leyi nga vonakiki.
Xileriso Xi Amukeriwa Ni Ku Hetisisiwa
8. Malunghana ni ntirho wa yena, Ezekiyele u veke xikombiso xihi?
8 Ezekiyele u veke xikombiso lexinene hi ku amukela xileriso xa yena ni ku xi hetisisa. Hambi swi ri tano, xichavo ni xivindzi a swi laveka ku xi hetisisa, hikuva ha hlaya: “N’wana wa munhu, u nga v̌a tšhav̌i, u nga tšhav̌isiwi hi ku v̌ulav̌ula ka v̌ona, hambi u le šikari ka ŝigatlu ni mitwa ni ŝipame, u nga tšhav̌i ku v̌ulav̌ula na v̌ona, u nga tšhav̌i mimombo ya v̌ona, hambi v̌a ri v̌anhu la’v̌a tiarisaka. U ta v̌a byela marito ya mina, hambi v̌a yingisa, hambi v̌a nga yingisi hikuv̌a v̌a tiarisile. Wena ṅwana wa munhu, u yingisa leŝi nḍi ku byelaka ŝona! U nga tiarisi ku kota yindlu leyi ya v̌atiarisi.”—Ezekiel 2:6-8.
9. Ezekiyele a a ta va a nga ri na nandzu wa ngati hi ku endla yini ntsena?
9 Ezekiyele a a nga fanelanga ku va ni rivengo kumbe a chava, a a fanele ku susumeteleka nkarhi na nkarhi ku hetisisa xileriso xa yena. A ta va a nga ri na nandzu wa ngati loko a vulavule hi marito ya Yehova hi rirhandzu na hi xivindzi ntsena. Ezekiyele u byeriwe ku: “Loko u ṭunḍuša mubihi, kambe a nga hundzuki e ku biheni ka yena, o ta fa e ku hombolokeni ka yena; loko u ri wena, u ta v̌a u ponisile moya wa wena.”—Ezekiel 3:19.
10. Ntlawa wa Ezekiyele wu tikombe wu fana ni muprofeta hi ndlela yihi?
10 Tanihi le mhakeni ya Ezekiyele, ntlawa lowu totiweke wa Ezekiyele wu amukele ntirho wa wona lowu wu nyikiweke hi Xikwembu naswona wa wu hetisisa. Loko hi ri Timbhoni ta Yehova, hi fanele ku tsundzuka leswaku vutomi bya hina ni bya van’wana byi titshege hi ku yingisela ka hina. (1 Timotiya 4:15, 16) Mbhoni yin’wana ni yin’wana yi fanele ku fambisana ni nhlengeletano ya Yehova. Xikwembu a xi nge hi boheli egolonyini ya xona ivi xi hi koka na yona. Ku nga tsakeli ni mbilu leyi kanakanaka swi khomisa Mukhandziyi wa Golonyi tingana. Kutani nhlengeletano leyi vonakaka ya Yehova yi hi khutaza leswaku hi hlayisa swilaveko swa Xikwembu exikarhi ka vutomi bya hina. Ku amukela xikhutazo xo tano nkarhi na nkarhi ku hi hlayisa hi fambisana ni nhlengeletano ya Xikwembu naswona ku tlakusa vutirheli bya hina byo kwetsima ehenhla ka mukhuva, ntolovelo. Entiyisweni, vanhu va Yehova hinkwavo va kombisa ku tinyiketela loku xiyekaka. Xiphemu xa hina ha un’we-un’we i ku hlayisa goza.
Marito Ya Xikwembu Ma Hlayisiwa
11. Ezekiyele u veke xikombiso xihi malunghana ni marito ya Xikwembu?
11 Ezekiyele nakambe u veke xikombiso lexinene hi ku nghenisa marito ya Xikwembu embilwini ya yena. Hi ku lerisiwa, u dye buku leyi a nyikiweke hi Xikwembu. Ezekiyele u te: “A yi fana ni v̌ulombe hi ku ṭokombela.” Hambi leswi buku a yi tele hi “ŝirilo, ni mahlomulo, ni ku v̌av̌iseka,” a yi tsokombela eka Ezekiyele hikuva a a tlangela lunghelo ro yimela Yehova. A ku ri ntokoto lowu tsokombelaka eka muprofeta ku hetisisa xiavelo lexi a xi nyikiweke hi Xikwembu. Xikwembu xi n’wi byele xi ku: “Ṅwana wa munhu, amukela e mbilwini ya wena e marito hikwawo ya mina, u ma yingisa hi tindlev̌e!” (Ezekiyele 2:9–3:3, 10) Swivono sweswo swi endle Ezekiel a swi xiya kahle leswi Xikwembu xi n’wi pfumeleleke ku hlanganyela eka swona naswona swi tiyise vunghana bya yena na Yehova.
12. Ezekiyele u endle yini eka malembe yo tlula makume mambirhi ya ntirho wa vuprofeta?
12 Ezekiyele u nyikiwe swivono ni marungula ya swikongomelo ni ya vayingiseri vo hambana-hambana. A fanele ku yingisa hi rixaladza ivi a vulavula ni ku endla hi laha a kongomisiweke ha kona. Rungula ni maendlelo lamantshwa swi paluxiwe eka yena enkarhini wa malembe ya 22 ya ntirho wa vuprofeta. Nkarhi wun’wana Ezekiyele u vulavule rungula leri vuriweke kahle. Minkarhi yin’wana, u kombise ku tlangela, tanihi ku etlela emahlweni ka xitina lexi fanekiselaka Yerusalema. (Ezekiel 4:1-8) Xikombiso xa yena etimhakeni ta munhu hi xiyexe, tanihi ndlela leyi a anguleke ha yona eka rifu ra nsati wa yena, na xona a xi vula swokarhi. (Ezekiel 24:15-19) A fanele ku tiva leswintshwa, a nyikela rungula lerinene nkarhi hinkwawo ni ku teka goza lerinene hi nkarhi lowunene. Ezekiyele a bohekile eka vunghana lebyikulu lebyi tirhaka hi laha ku humelelaka na Yehova.
13. Hi nga byi aka njhani vunghana lebyikulu na Yehova?
13 Hi ku fanana, ku aka ni ku hlayisa vunghana lebyikulu na Yehova tanihi vatirhi-kulori va yena, hi fanele ku nghenisa Rito ra Xikwembu etimbilwini ta hina. (1 Vakorinto 3:9) Ku fambisana ni nhlengeletano leyi vonakaka ya Xikwembu emhakeni leyi swi lava leswaku hi fambisana ni mphakelo wa swakudya swa moya tanihi leswi swi phameriwaka hi nkarhi lowu faneleke. (Matewu 24:45-47) “Ririmi leri tengeke” ri engeteleka nkarhi na nkarhi. (Sofonia 3:9) Hakunene hi ta kota ku hlamula hi ku titsongahata eka nkongomiso wa Mukhandziyi wa Golonyi ntsena loko hi fambisana na yena.
14, 15. I mukhuva wihi lowu lavekaka leswaku hi hlayisa goza leri vekiweke hi nhlengeletano ya Xikwembu?
14 Hikwalaho, hi fanele hi va ni xiyimiso lexinene xa xikhongelo xa munhu hi xiyexe, dyondzo ya munhu hi xiyexe ni ku hlanganyela eka vutirheli byo kwetsima bya mahungu lamanene. (Varhoma 15:16) Tsundzuka xikombiso xa Ezekiyele hi ku dya buku leyi khomeke rungula ra Xikwembu. Ezekiyele u dye buku hinkwayo, ku nga ri xiphemu xa yona. A nga hlawulanga swakudya leswi swi nga ha vaka a a swi rhandza. Hi ku fanana, dyondzo ya hina hi xiyexe ya Bibele ni tibuku ta Vukriste yi fanele ku fambisiwa leswaku u fambisana ni mphamelo wa swakudya swa moya, naswona hi fanele ku hlanganyela eka hinkwaswo leswi vekiwaka etafuleni ra moya, ku katsa ni mintiyiso leyi enteke.
15 Xana ha wa endla matshalatshala ya xikhongelo leswaku hi twisisa swakudya leswi tiyeke? Ku hlayisa goza swi lava leswaku vutivi ni ku twisisa ka hina ku kula ku tlula xisekelo, hikuva hi hlaya leswaku: “Un’wana ni un’wana loyi a hanyaka hi ntswamba, a nga si kuma dyondzo ya leswo lulama, hikuva i xihlangi. Kambe swakudya leswi tiyeke i swa lava kuleke, i swa lava miehleketo ya vona yi vupfeke, lava toloveleke ku hlawula leswinene eka leswo biha.” (Vaheveru 5:13, 14) Ina, ku endla nhluvuko wa moya i xiphemu xa nkoka xa ku hlayisa goza leri nhlengeletano ya Xikwembu yi ri vekaka.
Ku Nga Chavisiwi Hi Ku Kaneta
16, 17. Ezekiyele u hlangavetane njhani ni ku kaneta, ku sandza ni ku nga tsakeli?
16 Ezekiyele nakambe u veke xikombiso lexinene hi ku yingisela naswona a a nga tipfumeleri ku chavisiwa hi ku kaneta kumbe ku sandza. Hi ku fanana, hi ku fambisana ni ku andza ka ririmi leri tengeke, hi hundzukiseriwa eka tlhelo leri tekiwaka hi Mukhandziyi wa Golonyi ya vuhosi. Xisweswo hi hlomiseriwa ku hlamula eka swileriso swa yena, hi tiyisiwa leswaku hi nga chavisiwi hi ku kaneta kumbe ku sandza ka lava hi va byelaka rungula ra ku avanyisa ka Yehova. Tanihi Ezekiyele, Xikwembu xi hi tsundzuxe ka ha ri mahlweni leswaku vanhu van’wana va ta kaneta, va ri lava omeke tinhloko ni ku nonon’hwa timbilu. Van’wana a va nge swi twi hikuva a va swi lavi ku yingisela Yehova. (Ezekiel 3:7-9) Hambi swi ri tano, van’wana a a va ta va vakanganyisi, hi laha Ezekiel 33:31, 32 yi swi vekaka ha kona: “V̌a ta e ka wena v̌a tele; v̌anhu v̌a tiko ra mina v̌a ṭhama e mahlweni ka wena, v̌a twa marito ya wena, kambe a v̌a endli ha wona; hikuv̌a milomu ya v̌ona yi ma sanḍa, kambe timbilu ta v̌ona ti lanḍelela rifuwo ra v̌ona. V̌ona-ke, wena u le ka v̌ona ku kotisa risimu le’ri ranḍekaka ra uṅwana l’a nga ni rito le’ri ṭakisaka, l’a tiv̌aka ku yimba hi gubu. Hikuv̌a v̌a twa marito ya wena, kambe a va endli ha wona.”
17 Vuyelo a ku ta va byihi? Ndzimana 33 ya engetela: “Kambe loko leŝo ŝi tile, (kasi ŝa ta), v̌a ta ŝi tiv̌a kutani leŝaku muprofeta a a ri kona e šikari ka vona.” Marito wolawo ma paluxa leswaku Ezekiyele a nga tshikanga hikwalaho ko pfumala ku tsakela. Ku kaneta ka van’wana a ku n’wi endlanga a kaneta. Hambi vanhu va yingisela kumbe va nga yingiseli, u yingise Xikwembu naswona u hetisise ntirho wa yena.
18. Hi swihi swivutiso leswi u nga ha tivutisaka swona?
18 Nhlengeletano leyi vonakaka ya Yehova sweswi yi ndlandlamuxa ku huwelela ka leswaku hinkwavo va fanele ku chava Xikwembu va xi dzunisa. Xana wa phikelela loko u vungunyiwa hikwalaho ko teka xiyimo lexi tiyeke eku nyikeleni ka vumbhoni bya Mfumo, hi ku tenga emahanyelweni ya wena? Xana u yima u tiyile loko u hlaseriwa hi ntshikilelo hikwalaho ka ku nga amukeli ngati, hi ku nga gandzeri swifaniso swa tiko, u nga tlangeli tiholideyi ta misava?—Matewu 5:11, 12; 1 Petro 4:4, 5.
19. Mayelana ni nkongomiso, hi ta endla yini loko hi fambisana ni golonyi ya Yehova ya le tilweni?
19 Ndlela leyi a yi olovi, kambe lava tiyiselaka ku ya fika emakumu va ta ponisiwa. (Matewu 24:13) Hi mpfuno wa Yehova, a hi nge va pfumeleri vanhu va misava va hi fanisa na vona ivi xisweswo va hi endla hi nga ha fambisani ni golonyi ya Yehova ya le tilweni. (Ezekiel 2:8; Varhoma 12:21) Loko hi fambisana ni nhlengeletano ya tintsumi leyi fanaka ni golonyi, hi ta pfumelelana swinene ni nkongomiso ni swiletelo leswi amukeriwaka hi ku tirhisa nhlengeletano leyi vonakaka ya Xikwembu. Yehova u phamela leswi hi swi lavaka leswaku hi kota ku hlangavetana ni minhlaselo eka ripfumelo ra hina, leswaku hi hlayisa nyingiso wa hina eRitweni ra vutomi ni ku hlayisa mahlo ya hina ma langute eka mintiyiso ya moya leyi nga malunghana ni Mukhandziyi la nga Mufumi wa golonyi ya le tilweni.
Ku Khutaziwa Ku Hlayisa Goza
20. Hi swihi swilo swin’wana leswi rhekhodiweke hi Ezekiyele leswi swi faneleke ku hi susumetela ku hlayisa goza?
20 Swivono swa Ezekiyele swi fanele ku hi susumetela ku hlayisa goza. A nga twarisanga ku avanyisa ka Xikwembu ntsena eka Israyele kambe u tlhele a rhekhoda vuprofeta bya ku vuyeteriwa. Ezekiyele u kombetele eka Loyi a a ta va ni lunghelo ra le nawini ro fuma exiluvelweni xa Yehova hi nkarhi lowu vekiweke. (Ezekiel 21:27) Nandza yoloye wa Vuhosi, “Davida,” a a ta tlhela a hlengeleta vanhu va Xikwembu a va risa. (Ezekiel 34:23, 24) Hambi leswi a va ta hlaseriwa hi Gogo wa Magogo, Xikwembu a xi ta va kutsula, naswona valala va xona a va ta boheka ku ‘tiva Yehova’ tanihi leswi va dlayiweke. (Ezekiel 38:8-12; 39:4, 7) Kutani malandza ya Xikwembu a ma ta tiphina hi vutomi lebyi nga heriki emafambiselweni ya vugandzeri lebyi tengeke lebyi katsaka tempele ya moya. Mati ya vutomi lama khulukaka ma huma exikwetsimisisweni a ma ta va xihlovo xa mphakelo ni ku hanyisa, naswona ndzhaka ya tiko a a yi ta nyikiwa vona.—Ezekiel 40:2; 47:9, 12, 21.
21. Ha yini xiphemu xa Timbhoni ta Yehova ta manguva lawa xi ri xikulu ku tlula lexiya xa Ezekiyele?
21 Mawaku ndlela leyi Ezekiyele a faneleke a nyanyuke ha yona ku rhekhoda vuprofeta lebyi! Hambi swi ri tano, xiphemu xa Timbhoni ta Yehova ta manguva lawa i xikulu. Hi hanya enkarhini lowu byin’wana bya vuprofeta byebyo byi hetisekaka ha wona. Entiyisweni, ha hlanganyela swinene eku hetisekeni kun’wana. Hi ndlela leyi hi hanyaka ha yona, xana ha un’we-un’we hi kombisa ku khorwiseka ka leswaku Yesu sweswi u fuma tanihi Loyi a nga ni lunghelo ra le nawini? Xana hi hexe ha tshemba leswaku Yehova hi ku hatlisa u ta tikwetsimisa ivi a nghenisa lava va fambisanaka ni nhlengeletano ya yena emisaveni ya yena leyintshwa? (2 Petro 3:13) Mianakanyo yo tano, leyi fambisanaka ni mintirho ya ripfumelo, yi kombisa leswaku hakunene hi fambisana ni golonyi ya Yehova ya le tilweni.
Yana eMahlweni U Hlayisa Goza
22. Ku nga endliwa yini leswaku ku papalatiwa ku hinganyetiwa leswaku hi ta hlayisa langutelo lerinene ra moya?
22 Loko hi ‘veka voko ra hina exikon’wini,’ a hi fanelanga hi languta endzhaku hi navela xihi na xihi lexi misava yi nga xi nyikaka. (Luka 9:62; 17:32; Tito 2:11-13) Kutani ke, a hi siveleni mboyamelo wihi na wihi wo veka rifuwo emisaveni, naswona a hi hlayiseni tihlo ra hina ri ri rinene, ri langute eMfun’weni. (Matewu 6:19-22, 33) Ku olovisa vutomi bya hina, hi susa mintshikilelo ya misava laha swi kotekaka kona, swi ta hi pfuna ku fambisana ni nhlengeletano ya Yehova. (Vaheveru 12:1-3) Mpfilumpfilu wu nga pfala xivono xa hina xa golonyi ya le tilweni ni Mukhandziyi wa yona. Kambe hi mpfuno wa yena, hi nga hlayisa langutelo leri baseke ra moya, hi laha Ezekiyele a endleke ha kona.
23. Timbhoni to tshembeka ti fanele ti va endlela yini lava ha riki vantshwa?
23 Xiphemu xa vutihlamuleri bya hina tanihi Timbhoni ta Yehova xi katsa ku pfuna vo tala lavantshwa leswaku va fambisana ni golonyi ya Xikwembu ya le tilweni. Hi 1990 ku lava ku va 10 000 000 va ve kona eka Xitsundzuxo xa rifu ra Yesu Kriste. Loko vo tala va vanhu lava, va va kona eka minhlangano yi nga ri yingani ya Vukriste, va fanele ku vona nkoka wa ku ya emahlweni ni nhlengeletano leyi vonakaka ya Yehova. Tanihi Timbhoni to tshembeka, hi nga va pfuna hi moya lowu hi wu kombisaka ni xikhutazo lexi hi xi nyikaka.
24. Hi fanele ku endla yini eminkarhini leyi leyi xiyekaka?
24 Leyi i minkarhi leyi xiyekaka. Hi mahlo ya ripfumelo, hi vone golonyi ya le tilweni yi kokiwa emahlweni ka hina. Mukhandziyi wa Golonyi la tlakukeke u nyike nhlengeletano ya yena leyi vonakaka ntirho wo chumayela ematikweni, leswaku eku heteleleni, va ta tiva loyi a nga Yehova. (Ezekiel 39:7) Endla swo tala hi nkarhi lowu lowunene leswaku u hlanganyela eku lweleni ka vuhosi bya Xikwembu ni ku kwetsimisa vito ra xona ro kwetsima hi ku fambisana ni golonyi ya Yehova ya le tilweni.
A Wu Ta Hlamula Njhani?
◻ Ezekiyele u veke xikombiso xihi malunghana ni ntirho wa yena?
◻ Swi vula yini ku fambisana ni nhlengeletano ya Xikwembu?
◻ Ezekiyele u ma langute njhani marito ya Yehova?
◻ Hi nga xi landzela njhani xikombiso xa Ezekiyele hi ku hlangavetana ni ku kaneta?
◻ I yini lexi faneleke ku susumetela malandza ya Yehova ku fambisana ni golonyi ya yena ya le tilweni?
[Swifaniso leswi nga eka tluka 15]
Ku laveka yini leswaku hi fambisana ni golonyi ya Yehova ya le tilweni?
[Xifaniso lexi nga eka tluka 16]
Ezekiyele u tlangele malunghelo lawa a nyikiweke hi Xikwembu? Xana wena wa ma tlangela?