Golonyi Ya Yehova Ya Le Tilweni Yi Ya eMahlweni
“Loko ma ri masonḍo, nḍi twa leswaku ma tšhyiwa e vito ra šidzedze.”—EZEKIEL 10:13.
1. I muxaka muni wa vutleketli lowu Yehova a nga na wona?
EMASIKWINI lawa ya swihaha-mpfhuka swo olova, varhangeri va misava va nga ha titwa onge va fike emaninginingini ya vuswikoti bya swo famba. Hambi swi ri tano, eka malembe ya 2 600 lama hundzeke, Yehova Xikwembu u paluxe leswaku u ni muxaka lowu tlakukeke wa vutleketli, swivumbeko swa wona hi leswi mumaki wihi na wihi a nga si tshamaka a swi vona. I golonyi leyikulu, leyi chavisaka! Xana swi tikomba swi hlamarisa leswi Muvumbi a fambaka hi xo famba lexi fanaka ni golonyi? Doo, hikuva golonyi ya Yehova ya le tilweni yi hambana ngopfu ni yihi na yihi leyi endliweke hi vanhu.
2. Xana Ezekiel ndzima 1 yi hlamusela golonyi ya Yehova ya le tilweni hi ndlela yihi, naswona muprofeta u kokela nyingiso wa hina ro sungula eka mani?
2 Eka ndzima 1 ya vuprofeta bya Ezekiyele, Yehova u kombisiwa tanihi loyi a khandziyeke golonyi leyikulu ya le tilweni. Golonyi leyi ya mavhilwa ya mune yi famba hi yoxe naswona yi nga endla swilo leswi hlamarisaka. Ezekiyele u vone golonyi leyi ya le tilweni exivon’weni hi 613 B.C.E., loko a a ri kusuhi ni wun’wana wa migerho ya Babilona wa khale. Muprofeta xo sungula u yisa nyingiso wa hina eka lava va langutelaka golonyi ya le tilweni ya Yehova. Loko hi hlaya, a hi ringeteni ku vona hi miehleketo leswi Ezekiyele a swi voneke.
Swivumbiwa Swa Mune Leswi Hanyaka
3. I yini lexi kombisiwaka hi mimombo ya mune ya tikerubimi leti ta mune?
3 Ezekiyele wa vika: “A nḍi languta, kutani ku huma e ṅwalungwini e mheho le’ya matimba, ni papa le’rikulu, ni nḍilo lo’wukulukumba lo’wu nga voninga hi matlhelo hinkwawo . . . e šikari kambe, a ku humelela le’ŝi fanaka ni ŝiv̌umbiwa ŝa mune le’ŝi hanyaka.” (Ezekiel 1:4, 5) Xin’wana ni xin’wana xa swivumbiwa leswi swa mune leswi hanyaka, kumbe tikerubimi, a xi ri na timpapa ta mune ni mimombo ya mune. A ti ri ni mombo wa nghala, lowu kombisaka vululami bya Xikwembu; mombo wa nkuzi, lowu kombisaka matimba ya xona; ni mombo wa gama, lowu kombisaka vutlhari bya Yehova. Nakambe a ti ri ni mombo wa munhu lowu yimelaka rirhandzu ra Yehova.—Deuteronoma 32:4; Yobo 12:13; Esaya 40:26; Ezekiel 1:10; 1 Yohane 4:8.
4. Hikwalaho ka yini tikerubimi a ti ri na mimombo ya mune, naswona tikerubimi a ti fana na yini hi rivilo?
4 Kerubimi yin’wana ni yin’wana yi ni mombo lowu languteke eka rin’wana ni rin’wana ra matlhelo ya mune. Hikwalaho, tikerubimi ti nga cinca ndlela hi nkarhi wolowo kutani ti landzelela mombo lowu languteke eka tlhelo leri naveriwaka. Kutani a ti fana na yini hi rivilo? Phela, a ti kota ku famba hi rivilo ra rihati! (Ezekiel 1:14) Ku hava xo famba lexi endliweke hi munhu lexi tshameke xi fikelela rivilo rero.
5. Xana Ezekiyele u ma hlamuserise ku yini mavhilwa ya golonyi ni swirhendzevutana swa wona?
5 Kan’we-kan’we, mavhilwa ya golonyi ma humelela exivon’weni. Vona ndlela leyi ma nga tolovelekangiki ha yona! Tindzimana 16 na 18 ti ri: “Nghohe ya masonḍo ni šiv̌umbeko ša wona a ši fana ni . . . sonḍo leri nghenisiweke šikari ka sonḍo riṅwana. Ŝirenḍev̌utana ŝa wona a ŝi tlakukile ngopfu, a ŝi tšhav̌isa, a ŝi tele hi mahlo e matlhelweni hinkwawo.” Vhilwa leri nge tlhelweni ka kerubimi yin’wana ni yin’wana a ri ta va mavhilwa ya mune eka tindhawu ta mune leti tshinelelaneke. Mavhilwa a a ma hatima kukotisa krisolita, ribye leri vonikelaka ra xitshopana kumbe ra rihlaza. Ri engetela ku vonakala kun’wana ni vuxongi eka xivono lexi xi kwetsimaka. Leswi swirhendzevutana swa mavhilwa a “swi tele hi mahlo ematlhelweni hinkwawo” a ma nga fambi emunyameni eka tlhelo rihi na rihi. Naswona mavhilwa wolawo a ma tlakukile swinene, lerova a ma kota ku hlanganisa mpfhuka lowukulu hi ku rhendzeleka kan’we eansini ya wona. Ku fana ni tikerubimi, a ma kota ku famba tanihi rihati.
Mavhilwa Endzeni Ka Mavhilwa
6. (a) Golonyi a yi ri na mavhilwa endzeni ka mavhilwa hi ndlela yihi? (b) Mavhilwa ma xaxamete tlhelo ra wona ro famba eka yini?
6 Xin’wana lexi a xi nga tolovelekangi. Vhilwa rin’wana ni rin’wana a ri ri ni vhilwa endzeni ka rona—vhilwa ra mpimo lowu fanaka leri hingakanyiweke eka vhilwa ra le hansi! Ku hi ndlela leyi mavhilwa a ma ta vuriwa ku “ma famba hi matlhelo ya wona ya mune.” (Ndzimana 17) Kan’we-kan’we mavhilwa a ma ta cinca tlhelo hikuva a ku ri ni tlhelo ra vhilwa leri languteke eka tlhelo rin’wana ni rin’wana. Mavhilwa ma xaxamete tlhelo ra wona ro famba ni leriya ra tikerubimi ta mune. Hi mavhilwa ya mune ya xivumbeko lexi, miri wa golonyi ya Xikwembu a wu ta famba hi ku tirhisa nseketelo lowu nga vonakiki lowu fanaka ni xikepe xa matimba lexi xi seketeriwaka hi xiseketelo xa moya loko xi famba ehenhla ka mati.
7. Xana xihlovo xa matimba ya mavhilwa a ku ri yini?
7 Xana mavhilwa ma ya kume kwihi matimba lawa yo tixaxameta ni ku famba hinkwako ka tikerubimi ta mune? Eka moya lowo kwetsima wa Xikwembu xa Matimba Hinkwawo. Ndzimana 20 yi ri: “Laha moya wu ŝi fambisaka kona, a ŝi fanele e ku ya . . . moya wa ŝiv̌umbiwa a wu ri masonḍweni.” Matimba lama tirhaka lawa ma fanaka lama nga vonakiki ya Xikwembu lawa a ma ri eka tikerubimi a ma ri eka mavhilwa wolawo.
8. Mavhilwa ma nyikiwe vito rihi, naswona ha yini?
8 Mavhilwa ma hlamuseriwa hi rito “xidzedze” (Ezekiel 10:13) Leswi handle ko kanakana swi vangiwe hi leswi vhilwa rin’wana ni rin’wana ri swi endleke. Ra khunguluka-khunguluka kumbe ku rhendzeleka. Ku funghiwa ka xiphemu lexi xa golonyi ya le tilweni hi ndlela yo tano ku kokela nyingiso eka rivilo leri golonyi ya le tilweni yi fambaka ha rona. Hambi leswi mavhilwa ya yona ma rhendzelekaka hi rivilo lerikulu, a ma kota ku vona ndlela ya wona nkarhi na nkarhi hikwalaho ka ku tala ka mahlo ya wona.
9. Xana Ezekiyele u swi hlamuserise ku yini leswi a swi ri ehenhla ka mavhilwa lama fambaka hi xihatla ya golonyi?
9 Kambe sweswi a hi languteni ivi hi vona leswi nga ehenhla ka mavhilwa wolawo ya mune lawa ma tlakukeke hi ndlela leyi chavisaka, lama fambaka hi xihatla. Ndzimana 22 ya Ndzima 1 ya Ezekiel yi ri: “E henhla ka tinhloko ta ŝiv̌umbiwa a ku ri ni tilo le’ri fanaka ni kristala le’ri tlunyaka, a ri andlariwa e henhla ka tinhloko ta ŝona.” Lwangu, hambi leswi a ri tiyile, a ri vonikela, “leri fanaka ni kristala leri tlunyaka.” A ri hatima ku fana ni magidi ya tidayimani loko dyambu ri ti tlhava. Swa chavisa hakunene!
Mukhandziyi Wa Golonyi La Kwetsimaka
10. (a) Swiluvelo ni Lava va nge henhla ka swona swi hlamuseriwa hi ndlela yihi? (b) I yini leswi kombisiwaka hi mhaka ya leswaku Mukhandziyi wa golonyi u funengetiwe hi ku kwetsima?
10 Handle ko kanakana, golonyi ya yima leswaku Mukhandziyi wa yona a vulavula na Ezekiyele. Ehenhla ka lwangu, ku na lexi fanaka ni xiluvelo, xi vonaka xi ri safiri, kumbe bulawusele yo dzhwihala. Exiluvelweni, ku na Un’wana loyi xivumbeko xa yena xi fanaka ni munhu wa laha misaveni. Xiyimo xa munhu a xi ta pfuna Ezekiyele ku antswa leswaku a twisisa xikombiso lexi xa Xikwembu. Kambe xivumbeko xexo xa munhu xi funengetiwe hi ku kwetsima, lerova a xi hatima kukota koporo, mpfangano lowu vangamaka wa silivhere ni nsuku. Mawaku ku saseka loku rhurhumerisaka swonghasi! Ku sukela exisutini xa xivumbeko lexi xi fanaka ni xa munhu, ku kwetsima loku ka le henhla ku ndlandlamukele ehenhla ni le hansi. Xisweswo xivumbeko hinkwaxo xi funegetiwa hi ku kwetsima. Leswi swi kombisa leswaku Yehova u kwetsima hi laha ku nga hlamuselekiki. Ku tlula kwalaho, Mukhandziyi wa golonyi u fambisana ni nkwangulatilo lowu rhandzekaka. Mawaku ku hola ni ku rhula loku hlanganisiwaka hi nkwangulatilo endzhaku ka xidzedze! Hi ku va ni langutelo rero ro hola, Yehova u hlayisa timfanelo ta yena ta vutlhari, vululami, matimba ni rirhandzu eku ringaniseleni loku hetisekeke.
11. Ezekiyele u khumbiwe njhani hi xivono xa golonyi ya Yehova ni xiluvelo?
11 Golonyi ya Yehova ni xiluvelo swi rhendzeriwe hi ku vonakala na mivala yo saseka. Vona ku hambana konghasi na Sathana, hosi ya munyama ni vungoma! Naswona Ezekiyele u khumbiwe hi leswi hinkwaswo hi ndlela yihi? U ri, “loko nḍi ŝi v̌onile nḍi wa hi mombo wa mina, nḍi ri kari nḍi twa rito ra uṅwana l’a v̌ulav̌ulaka.”—Ezekiel 1:28.
Leswi Golonyi Yi Fanekiselaka Swona
12. I yini lexi fanekiseriwaka hi golonyi ya Yehova ya le tilweni?
12 Xana ku fanekiseriwa yini hi golonyi leyi yo hlamarisa? I nhlengeletano leyi tlakukeke kumbe ya le tilweni ya Yehova Xikwembu. Yi vumbiwe hi swivumbiwa hinkwaswo swa moya wa yena lowo kwetsima eka xivandla xexo lexi nga vonakiki—tiserafimi, tikerubimi ni tintsumi. Tanihi leswi Yehova a nga Xikwembu xa le Henhla-henhla, hinkwaswo swivumbiwa swa yena swa moya swi le hansi ka yena, naswona u swi fambisa hi ndlela ya ku swi lawula hi musa ni ku swi tirhisa hi ku ya hi xikongomelo xa yena—Psalma 103:20.
13. (a) Hikwalaho ka yini ku nga vuriwaka leswaku Yehova u fambisa nhlengeletano ya yena? (b) Xivono xa golonyi ya Yehova ya mavhilwa ya mune leyi yaka emahlweni xi ku khumba hi ndlela yihi?
13 Yehova u fambisa nhlengeletano leyi onge hi loko a ri egolonyini, a yi vangela leswaku yi famba yi ya kwihi na kwihi laha moya wa yena wu yi susumetelaka ku ya kona. A yi tsutsumi hi vuharhi ku nga ri na valawuri kumbe vutlhari lebyi lawulaka. Xikwembu a xi yi pfumeleli nhlengeletano leyi ku ya eka tlhelo rihi na rihi leri yi nga ha kuceteriwaka ku ya eka rona. Ematshan’wini ya sweswo yi landzelela swileriso swa xona. Hinkwavo, va famba hi vun’we va ya emahlweni eku hetisiseni ka swikongomelo swa Xikwembu. Nhlengeletano leyi hlamarisaka swonghasi yi paluxiwa hi xivono lexi xa golonyi ya Yehova ya le tilweni ya mavhilwa ya mune leyi yaka emahlweni! Hi ku pfumelelana ni leswi, nhlengeletano ya Yehova yi yimeriwa tanihi leyi nga ni matlhelo ya mune, leyi ringaniseriweke hi laha ku hetisekeke.
U Hlawuriwe Tanihi Mulanguteri
14. I mani loyi a fanekiseriwaka hi muprofeta Ezekiyele?
14 Kambe i mani la fanekiseriwaka hi muprofeta Ezekiyele? Hi ku ya hi mintiyiso ya matimu, swi le rivaleni leswaku huvo ya Timbhoni leti totiweke hi moya ta Yehova yi hlanganisiwa ni golonyi ya le tilweni. Xisweswo, Ezekiyele u ma fanekisela kahle masalela lama totiweke ya Timbhoni ta Yehova ku sukela hi 1919. Hi tlhelo ra moya, nhlengeletano ya Yehova ya le tilweni yi hlangane ni masalela lama totiweke hi lembe rolero, ku ma pfuxeta tanihi Timbhoni ta Yehova emisaveni hinkwayo. (Ringanisa Nhlavutelo 11:1-12.) Nhlengeletano yoleyo leyi fanaka ni golonyi a yi ya emahlweni hi nkarhi wolowo, tanihi leswi swi nga xiswona namuntlha. Entiyisweni, mavhilwa ya yona ya nhluvuko ma rhendzeleka hi xihatla ku tlula rini na rini. Yehova u khandziya hi ku hatlisa a ya emahlweni!
15. Rito ra Mukhandziyi wa golonyi ya le tilweni ri ri yini, naswona i xileriso xihi lexi Ezekiyele a xi amukelaka?
15 Ezekiyele u tsakele ku tiva leswaku ha yini golonyi leyi ya le tilweni yi tshinele emahlweni ka yena kutani yi yima. U kume nhlamulo loko rito ri ta eka yena ri huma eka Loyi a tshameke ehenhla ka golonyi. Loko a hluriwile hi xivono lexi xi chavisaka, Ezekiyele u tiwisele ehansi. Yingisa loko rito ra Mukhandziyi wa golonyi ya le tilweni ri ku: “Ṅwana wa munhu, pfuka u yima, nḍi ta v̌ulav̌ula na wena!” (Ezekiel 2:1) Kutani Yehova a lerisa Ezekiyele ku va Mulanguteri ni ku laya yindlu leyi xandzukaka ya Israyele. Nakambe u lerisiwa ku vulavula hi vito ra Xikwembu. Vito ra Ezekiyele ri vula leswaku “Xikwembu Xa Tiyisa.” Kutani hi leswi Xikwembu xi tiyiseke ntlawa wa Ezekiyele kutani xi wu rhuma, xi wu veka tanihi mulanguteri eka Vujagana.
16, 17. (a) Xivono xa golonyi ya le tilweni xi vuyerise Ezekiyele hi ndlela yihi? (b) Esikwini ra hina, ku twisisa xivono xa golonyi ya le tilweni swi khumbe ntlawa wa Ezekiyele ni ntshungu lowukulu hi ndlela yihi?
16 Xivono xa golonyi ya le tilweni a xi ri lexinene ni ku saseka eka Ezekiyele, kambe xi tlhele xi n’wi lunghiselela ntirho lowu a nyikiweke wona tanihi mulanguteri wo twarisa xitsundzuxo xa ndzoviso lowu taka eYerusalema. Leswi fanaka swi ve tano hi ntlawa wa mulanguteri namuntlha. Ku twisisa ka vona xivono xa golonyi ya Yehova ya le tilweni leyi yaka emahlweni ku ve ni vuyelo lebyikulu eka masalela lama totiweke. Hi 1931 va dyondze swo tala hi xivono xa Ezekiyele, hi laha swi paluxiweke ha kona eka Buku yo Sungula, leyi nge Vindication. Kutani a ma tele hi ku tlangela ko tano lokunene lerova ku sukela eka nkandziyiso wa October 15, 1931 ku ya eka lowuya wa August 1, 1950, nkunguhato wa xifunengeto xa le mahlweni ka magazini wa Xihondzo xo Rindza eka khona ya wona ya le henhla evokweni ra xinene wu va ni nhlamuselo ya mutshila ya xivono xa Ezekiyele xa golonyi ya le tilweni. Xisweswo, ntlawa wa Ezekiyele wu endle hi ku ya hi xileriso lexi wu nyikiweke xona, naswona a wu tirha tanihi mulanguteri, wu twarisa xitsundzuxo xa Xikwembu. Nkarhi wa ku herisiwa loku chavisaka ka Vujagana loku humaka eka Yehova loyi a tshameke exiluvelweni eka golonyi ya yena ya le tilweni a wu nga ri kusuhi!
17 Namuntlha, “ntshungu lowukulu” wa vanhu lava fanaka ni tinyimpfu wu hlangana ni masalela lama totiweke. (Nhlavutelo 7:9) Hinkwavo, va twarisa xitsundzuxo xa ndzoviso lowu taka ehenhla ka Vujagana ni mafambiselo hinkwawo ya swilo ya vudiyavulosi. Ntirho wolowo wo tsundzuxa wu ya emahlweni hi xihatla, naswona hi laha swi kombisiweke ha kona eka Nhlavutelo 14:6, 7, tintsumi ta wu seketela.
Ku Fambisana Ni Golonyi Ya Le Tilweni
18. Xana ku fanele ku endliwa yini ku kuma nseketelo wa tintsumi lowu yaka emahlweni naswona hi fanele ku yingisa yini?
18 Tintsumi leti ti titsongahataka ti famba hi ku twanana tanihi xiphemu xa nhlengeletano ya Xikwembu ya le tilweni ti ri karhi ti pfuna malandza ya Yehova ya le misaveni eku hetisiseni ka xileriso xo twarisa switsundzuxo swa ku avanyisa ka Xikwembu. Loko hi tsakela nsirhelelo ni nkongomiso lowu yaka emahlweni wa malandza lawa ya matimba ya tintsumi ya Xikwembu, na hina hi fanele ku famba hi ntwanano kutani hi fambisana ni xidzedze xo fanekisela. Ku tlula kwalaho, tanihi xiphemu xa nhlengeletano leyi vonakaka ya Yehova leyi fambaka kun’we ni golonyi ya yena ya le tilweni, hi fanele hi yingisa minkongomiso ya moya wa Xikwembu. (Ringanisa Vafilipiya 2:13.) Loko hi ri Timbhoni ta Yehova, hi fanele ku famba hi tlhelo leri fanaka ni ra golonyi ya le tilweni. Entiyisweni a hi fanelanga hi tirha hi ku hambana na yona. Loko hi nyikiwa nkongomiso wa ndlela leyi hi faneleke ku famba ha yona, hi fanele ku wu landzela. Xisweswo, bandlha a ri nge avani.—1 Vakorinto 1:10.
19. (a) Tanihi leswi mavhilwa ya golonyi ya le tilweni ya nga na mahlo ematlhelweni hinkwawo ya wona, vanhu va Yehova va fanele ku xalamukela yini? (b) Xana endlelo ra hina eminkarhini leyi ya mpfilumpfilu ri fanele ri va rihi?
19 Mahlo lama nga ematlhelweni hinkwawo ya mavhilwa ya golonyi ya Xikwembu ma kombisa ku xalamuka. Tanihi leswi nhlengeletano ya le tilweni yi xalamukeke, kutani hi fanele ku xalamukela ku seketela nhlengeletano ya Yehova ya le misaveni. Ebandlheni, hi nga kombisa nseketelo wolowo hi ku tirhisana ni vakulu va kwalaho. (Vaheveru 13:17) Naswona eminkarhini leyi ya mpfilumpfilu, Vakriste va fanele ku namarhela ekusuhi swinene ni nhlengeletano ya Yehova. A hi fanelanga hi nghenisa tinhlamuselo ta hina eka swiendlakalo, hikuva hi ta va hi nga fambisani na yona golonyi ya Yehova ya le tilweni. Minkarhi hinkwayo a hi tivutiseni, ‘I ndlela yihi leyi golonyi ya le tilweni yi fambaka ha yona?’ Loko hi ya emahlweni ni nhlengeletano leyi vonakaka ya Xikwembu, nakambe hi ta va hi fambisana ni nhlengeletano leyi nga vonakiki.
20. I ndzayo yihi leyinene leyi Pawulo a yi nyikelaka eka Vafilipiya 3:13-16?
20 Emhakeni leyi, Pawulo u tsarile: “Vamakwerhu, loko a ri mina, a ndzi anakanyi leswaku ndzi swi kumile, kambe ndzi endla xilo xin’we ntsena: Ndzi rivala swa le ndzhaku, ni ku ringeta hi matimba ku ya fika eka leswi nga le mahlweni; kutani ndzi tsutsuma ndzi kongomile swa le mahlweni leswaku ndzi ta kuma hakelo, ku nga ku vitana ka Xikwembu ha Kriste Yesu, loku ha kona xi hi vitanelaka evuton’wini bya le henhla. Hina hinkwerhu lava hi kuleke emoyeni, hi fanele ku va ni mianakanyo leyo tano; kambe loko, eka swin’wana, mi anakanya hi ndlela yin’wana, Xikwembu xi ta swi hlavutela eka n’wina. Ntsena a hi khomeni hi tiya eka leswi hi nga fika eka swona.”—Vafilipiya 3:13-16.
21. I ku landzela mukhuva wihi lowu swi kotekaka ha wona ku endla nhluvuko emoyeni ni nhlengeletano ya Xikwembu?
21 Laha rito “mukhuva” a ri vuli endlelo ro biha leri hi nga kotiki ku ri tshika. Malandza ya Yehova ya na mukhuva lowunene lowu ha wona va endlaka nhluvuko wa moya! I mukhuva wa ku nghenela dyondzo ya munhu hi xiyexe ya Bibele, ku va kona eminhlanganweni ya bandlha, ku va kona nkarhi hinkwawo eku chumayeleni ka mahungu lamanene ya Mfumo ni ku kombisa timfanelo ta nhlengeletano ya Xikwembu ya le tilweni. Mukhuva wo tano wu va pfuna ku landzelela vukongomisi bya nhlengeletano ya Yehova leyi fanaka ni golonyi ya le tilweni. Hi ku phikelela eka mukhuva lowu, hi ta fikelela pakani ya hina, hambi ku ri vutomi lebyi nga riki na ku fa bya le tilweni kumbe vutomi lebyi nga heriki emisaveni.
22. (a) Leswaku masalela ya vatotiwa ni ntshungu lowukulu wa tinyimpfu tin’wana va hlanganisiwa hi vun’we, i yini lexi faneleke ku endliwa? (b) I yini lexi nga tumbeliki emahlweni ya Yehova?
22 Hi laha Yohane 10:16 yi kombisaka ha kona, “tinyimpfu tin’wana” na ntlawa wa Ezekiyele va ta hlanganisiwa hi vun’we. Xisweswo, i swa nkoka leswaku hinkwavo enhlengeletanweni ya Yehova va twisisa nhlamuselo leyi heleleke ni leswi fanekiseriwaka hi xivono lexi rhekhodiweke eka Ezekiyele ndzima 1 loko va ta famba hi ku twanana ni golonyi ya Xikwembu ya le tilweni. Xivono xa yona xi hi pfuna ku twisisa leswaku hi fanele ku famba hi ku pfumelelana ni nhlengeletano ya Xikwembu, leyi vonakaka ni leyi nga vonakiki. Nakambe, tsundzuka leswaku mahlo ya Yehova “ma famba-famba emisav̌eni hikwayo e ku tiyisa la’v̌a nga v̌a yena hi timbilu hikwato ta vona.” (2 Tikronika 16:9) Ku hava xilo ni xin’we lexi nga tumbelaka emahlweni ya Yehova, ngopfu-ngopfu xihi na xihi lexi yelanaka na xikongomelo xa yena xo tilwela tanihi Mufumi wa Hinkwako-nkwako.
23. Kun’we ni golonyi ya Yehova ya le tilweni leyi yaka emahlweni, hi fanele ku endla yini?
23 Golonyi ya Yehova ya le tilweni hakunene yi ya emahlweni namuntlha. Hi ku hatlisa hinkwaswo swi ta tisiwa eku kwetsimeni hi ku pfumelelana ni Loyi a kwetsimaka loyi a fambisaka golonyi—hinkwaswo swi lwela yena tanihi Hosi Leyikulu ya vuako. Tiserafimi, tikerubimi na tintsumi ta yena ta hi tiyisa eka ntirho wa hina lowukulu wa ku chumayela wa misava hinkwayo. Kutani, a hi yeni emahlweni ni nhlengeletano ya Yehova ya le tilweni. Kambe hi nga swi kotisa ku yini ku fambisana ni golonyi yoleyo ya le tilweni leyi fambaka hi ku hatlisa?
A Wu Ta Hlamurisa Ku Yini?
◻ I timfanelo tihi leti yimeriwaka hi swivumbiwa swa mune leswi hanyaka leswi voniweke hi Ezekiyele?
◻ Golonyi ya Yehova ya le tilweni yi fanekisela yini?
◻ I mani loyi a fanekiseriwaka hi Ezekiyele muprofeta wa Xikwembu?
◻ Ku twisisa golonyi ya Yehova ya le tilweni ku khumbe ntlawa wa Ezekiyele ni ntshungu lowukulu hi ndlela yihi?