Nhlangano Lowu Endlaka Ku Rhandza Ka Yehovha

EMISAVENI hinkwayo, ku ni mihlangano yo tala, ya vukhongeri, ya politiki, ya mabindzu ni leyi langutanaka ni matshamelo ya vanhu naswona a yi fani hi swikongomelo, mavonelo ni tifilosofi. Kambe ku ni nhlangano wun’we lowu hambaneke swinene ni leyin’wana hinkwayo. Rito ra Xikwembu ri swi veka erivaleni leswaku nhlangano wolowo i Timbhoni ta Yehovha.

² Lexi tsakisaka hi leswaku u tihlanganisa ni nhlangano wa Yehovha. Tanihi leswi u tivoneleke hi ya wena leswaku ku rhandza ka Xikwembu i yini, se wa ku endla. (Ps. 143:10; Rhom. 12:2) U mutirheli la hisekaka, la tirhaka ni nhlengeletano ya vamakwerhu lava nga ni rirhandzu emisaveni hinkwayo. (2 Kor. 6:4; 1 Pet. 2:17; 5:9) Hilaha swi tshembisiweke hakona eRitweni ra Xikwembu, sweswo swi endla leswaku u kuma mikateko yo tala ni ntsako lowukulu. (Swiv. 10:22; Mar. 10:30) Leswi u endlaka ku rhandza ka Yehovha hi ku tshembeka sweswi, u le ku lunghekeleni ku kuma vumundzuku lebyi vangamaka, lebyi nga ta va kona hilaha ku nga heriki.—1 Tim. 6:18, 19; 1 Yoh. 2:17.

³ Muvumbi wa hina Lonkulu u ni nhlangano lowu hlawulekeke emisaveni hinkwayo, lowu fumiwaka etilweni. Leswi vulaka leswaku wu fumiwa hi Yehovha, loyi a nga Nhloko ya swilo hinkwaswo. Hi n’wi tshemba hi mbilu hinkwayo. I Muavanyisi wa hina, Munyiki wa hina wa nawu ni Hosi ya hina. (Esa. 33:22) Leswi a nga Xikwembu lexi hlelekeke, u endle leswaku hi kota ‘ku tirhisana na yena’ leswaku ku hetisisiwa xikongomelo xakwe.—2 Kor. 6:1, 2.

⁴ Leswi makumu ya mafambiselo lawa ya swilo ma yaka ma tshinela, hi ya emahlweni hi yingisa vulawuri bya Hosi leyi vekiweke, ku nga Kreste Yesu. (Esa. 55:4; Nhlav. 6:2; 11:15) Ku hava ni un’we handle ka Yesu ntsena la profeteke leswaku valandzeri vakwe a va ta endla mintirho leyikulu ku tlula leyi a yi endleke loko a hetisisa vutirheli byakwe bya laha misaveni. (Yoh. 14:12) Hakunene wolowo a ku ri ntiyiso hikuva loko nkarhi wu ri karhi wu famba, valandzeri va Yesu a va ta andza kutani va hlanganisa nsimu ya le kule swinene. A va ta chumayela mahungu lamanene ya Mfumo ku ya fika emakumu ya misava.—Mat. 24:14; 28:19, 20; Mint. 1:8.

⁵ Leswi swi endlekile hakunene. Hambiswiritano, tanihi laha Yesu a swi vekeke erivaleni hakona, ntirho wa ku chumayela mahungu lamanene wu ta hela hi nkarhi lowu vekiweke hi Yehovha. Hinkwaswo leswi Rito ra Xikwembu ra vuprofeta ri swi vulaka hi siku lerikulu ra Yehovha leri chavisaka, swi kombisa leswaku se ri kwala nyongeni.—Yuw. 2:31; Sof. 1:14-18; 2:2, 3; 1 Pet. 4:7.

⁶ Loko hi ri karhi hi tiva ku rhandza ka Yehovha enkarhini lowu wa makumu, hi fanele hi endla matshalatshala lamakulu yo endla leswi Xikwembu xi swi languteleke. Sweswo swi lava leswaku hi yi tiva kahle ndlela leyi nhlangano wa Xikwembu wu tirhaka ha yona hi tlhela hi tirhisana na wona hilaha ku heleleke. Matirhelo hinkwawo ya nhlangano ma lawuriwa hi misinya ya milawu ya Matsalwa leyi katsaka swileriso, minkongomiso ni tidyondzo leti kumekaka eRitweni ra Xikwembu leri huhuteriweke.—Ps. 19:7-9.

⁷ Loko vanhu va Yehovha va namarhela nkongomiso wolowo lowu sekeriweke eBibeleni, va hanyisana ni ku tirha swin’we hi ku rhula ni hi vun’we. (Ps. 133:1; Esa. 60:17; Rhom. 14:19) I yini lexi endlaka leswaku hi tshama hi ri ni vun’we ni vamakwerhu emisaveni hinkwayo? I rirhandzu. Hi susumetiwa hi rirhandzu naswona hi ri ambarile. (Yoh. 13:34, 35; Kol. 3:14) Ndlela yoleyo leyi amukeriwaka hi Xikwembu, yi endla leswaku hi tshama hi ri karhi hi fambisana ni xiphemu xa le tilweni xa nhlangano wa Yehovha.

XIPHEMU XA LE TILWENI XA NHLANGANO WA YEHOVHA

⁸ Muprofeta Esaya, Ezekiyele na Daniyele va vone swivono swa xiphemu xa le tilweni xa nhlangano wa Yehovha. (Esa., ndz. 6; Ezek., ndz. 1; Dan. 7:9, 10) Hilaha ku fanaka, muapostola Yohane u vone xivono xa ndlela leyi swilo swi endliwaka ha yona etilweni kutani a hi tsongolela swin’wana swa swona ebukwini ya Nhlavutelo. U vone Yehovha a tshame exiluvelweni xo kwetsima a ri ni swivumbiwa leswi nga tintsumi, leswi a swi ri karhi swi huwelela swi ku: “Wa kwetsima, wa kwetsima, wa kwetsima Yehovha Xikwembu, lowa Matimba Hinkwawo, loyi a a ri kona ni loyi a nga kona ni loyi a taka.” (Nhlav. 4:8) Yohane u tlhele a vona ‘xinyimpfana xi yime exikarhi ka xiluvelo,’ Xinyimpfana xa Xikwembu, ku nga Yesu Kreste.—Nhlav. 5:6, 13, 14; Yoh. 1:29.

⁹ Leswi eka xivono lexi, Yehovha a tshameke exiluvelweni swi kombisa leswaku hi yena Nhloko ya nhlangano lowu. Loko 1 Tikronika 29:11, 12 yi vulavula hi yena ni xikhundlha xakwe xa le henhla swinene, yi ri: “Wena Yehovha, vukulu, matimba, ku saseka, vunene ni xindzhuti i swa wena; hikuva hinkwaswo leswi nga ematilweni ni leswi swi nga emisaveni i swa wena. Mfumo i wa wena, Wena Yehovha, Wena la tlakukeke la nga murhangeri wa hinkwavo. Rifuwo ni ku vangama swi kona hikwalaho ka wena, naswona u fuma swilo hinkwaswo; evokweni ra wena ku ni matimba ni ntamu, evokweni ra wena ku ni vuswikoti byo endla swilo leswikulu ni ku va nyika ntamu hinkwavo.”

¹⁰ Leswi Yesu Kreste a tirhaka swin’we na Yehovha, na yena u ni xikhundlha lexi tlakukeke etilweni naswona u nyikiwe matimba yo lawula swilo swo tala. Hakunene, Xikwembu xi ‘veke swilo hinkwaswo ehansi ka milenge ya yena, kutani xi n’wi endla nhloko ya swilo hinkwaswo evandlheni.’ (Efe. 1:22) Muapostola Pawulo u vule leswi malunghana na Yesu: “Xikwembu xi n’wi tlakusele exiyin’weni lexi tlakukeke kutani hi musa xi n’wi nyika vito leri nga ehenhla ka mavito man’wana hinkwawo, leswaku matsolo hinkwawo ya lava nga etilweni ni lava nga emisaveni ni lava nga ehansi ka misava, ma nkhinsama hi vito ra Yesu, naswona ririmi rin’wana ni rin’wana ri fanele ku twarisa erivaleni leswaku Yesu Kreste i Hosi leswaku ku vangamisiwa Xikwembu Tatana.” (Filp. 2:9-11) Hikwalaho hi nga tiyiseka leswaku Yesu Kreste u ta hi rhangela hi ndlela leyi lulameke.

¹¹ Muprofeta Daniyele u vone Nkulukumba wa Masiku exivonweni, a tshame exiluvelweni xa Yena ni tintsumi ta ‘magidi-gidi leti a ti hambeta ti n’wi tirhela, ni ta 10 000 ti andzisiwe ka 10 000 leti a ti tshama ti yime emahlweni ka yena.’ (Dan. 7:10) Bibele yi vula leswaku vuthu leri ra tintsumi i “mimoya ya ntirho wa le rivaleni, leyi rhumiweke ku ya tirhela lava nga ta dya ndzhaka ya ku ponisiwa.” (Hev. 1:14) Swivumbiwa leswi hinkwaswo swa moya swi hleriwe swi va ‘swiluvelo, tihosi, tihulumendhe ni valawuri.’—Kol. 1:16.

¹² Loko hi tinyika nkarhi wa ku anakanyisisa hi swivumbeko leswi swa xiphemu xa le tilweni xa nhlangano wa Yehovha, hi kota ku twisisa ndlela leyi Esaya a anguleke ha yona eka xivono lexi eka xona a “[voneke] Yehovha a tshame exiluvelweni” naswona “ehenhla ka yena ku yime tiserafi.” Esaya u te: “Khombo eka mina! Hikuva swi fana ni loko ndzi miyetiwile, hikuva ndzi munhu la nga basangiki enon’wini, ndzi tshama exikarhi ka vanhu lava nga basangiki enon’wini; hikuva mahlo ya mina ma vone Hosi, Yehovha wa mavuthu hi byakwe!” Hakunene, Esaya u hlamarile swinene, a titwa a nga ri nchumu endzhaku ko vona vukulu bya nhlangano wa Yehovha. Xivono lexi xi n’wi khumbe lerova loko ku vutisiwa etilweni leswaku i mani la nga yaka a ya twarisa ku avanyisa ka Yehovha, Esaya u te: “Hi mina loyi! Ndzi rhume.”—Esa. 6:1-5, 8.

¹³ Ku tiva nhlangano wa Yehovha ni ku wu rhandza, swi susumeta vanhu Vakwe hi ndlela leyi fanaka. Loko nhlangano lowu wu ri karhi wu ya emahlweni, hi tikarhatela ku fambisana na wona. Hi swi veka erivaleni leswaku ha wu tshemba nhlangano wa Yehovha namuntlha.

NHLANGANO WA YEHOVHA WU YA EMAHLWENI

¹⁴ Eka ndzima yo Sungula ya vuprofeta bya Ezekiyele, ku vulavuriwa hi Yehovha a tshame ekalichini leyikulu ya le tilweni. Kalichi leyi, leyi vangamaka yi fanekisela xiphemu lexi nga vonakiki xa nhlangano wa Yehovha. U khandziye kalichi leyi hileswi a yi kongomisaka hi ndlela leyinene ni leswi a yi tirhisaka ku fikelela swikongomelo swakwe.—Ps. 103:20.

¹⁵ Vhilwa ha rin’we ra kalichi leyi, ri ni rin’wana leri nga le ndzeni ka rona—hi leswaku leri hingakanyeke, kambe ma ringana. Hi yona mhaka leyi ku vuriwaka leswaku ‘loko ma famba, ma ya ematlhelweni ya wona ya mune.’ (Ezek. 1:17) Mavhilwa lawa ma nga ya kun’wana ni kun’wana hi xitshuketa. Hambiswiritano, kalichi leyi a yi tilawuli naswona a yi yi kun’wana ni kun’wana laha yi rhandzaka ku ya kona. Yehovha a nga wu pfumeleli nhlangano wakwe wu endla xin’wana ni xin’wana lexi wu xi rhandzaka. Ezekiyele 1:20 yi ri: ‘Laha moya wu voyamelaka ku ya kona, kalichi yi ya kona.’ Hikwalaho, Yehovha hi yena la kongomisaka nhlangano wakwe leswaku wu endla leswi moya wakwe wu lavaka leswaku wu swi endla. Xivutiso lexi hi faneleke hi tivutisa xona hi lexi nge, ‘Xana ndzi fambisana na wona?’

¹⁶ Ku fambisana ni nhlangano wa Yehovha swi katsa swo tala ku nga ri ku ya etinhlengeletanweni ta vandlha ni le nsin’wini ntsena. Kahle-kahle ku fambisana ka hina na wona swi vula ku endla nhluvuko ni ku kula hi tlhelo ra moya. Hi “tiyiseka hi swilo swa nkoka swinene” naswona hi fambisana hi ku kongoma ni malunghiselelo ya moya lawa hi wundliwaka ha wona. (Filp. 1:10; 4:8, 9; Yoh. 17:3) Hi fanele hi tsundzuka leswaku laha ku nga ni nhlangano ku fanele ku va ni nkongomiso lowunene ni ntirhisano. Kutani hi fanele ku tshama hi ri karhi hi vona nkoka wa ku ri tirhisa hilaha ku heleleke rifuwo ra moya ni ra nyama, leri Yehovha a hi nyikeke rona leswaku hi kota ku endla ntirho wakwe. Loko hi tshama hi ri karhi hi fambisana ni kalichi ya le tilweni ya Yehovha, hi hanya hi ku pfumelelana ni rungula leri hi ri chumayelaka.

¹⁷ Nhlangano wa Yehovha wu hi pfuna leswaku hi ya emahlweni hi endla ku rhandza ka Xikwembu. Tsundzuka leswaku Yehovha hi yena Mukongomisi wa kalichi leyi ya le tilweni. Hikwalaho, ku tshama hi ri karhi hi fambisana ni kalichi ya le tilweni, swi kombisa leswaku ha n’wi xixima Yehovha naswona ha n’wi tshemba tanihi Ribye ra hina. (Ps. 18:31) Bibele yi tshembisa leswi: “Yehovha u ta nyika vanhu vakwe ntamu. Yehovha u ta katekisa vanhu vakwe hi ku rhula.” (Ps. 29:11) Leswi hi nga eka nhlangano wa Yehovha namuntlha, hi kuma matimba lama humaka eka yena naswona hi tiphina hi ku rhula loku a katekisaka vanhu vakwe lava hlelekeke. Ina, a swi kanakanisi leswaku hi ta hambeta hi kuma mikateko leyi fuweke loko hi ya emahlweni hi endla ku rhandza ka Yehovha sweswi ni hilaha ku nga heriki.