Yingisa Swinene Rito Ra Xikwembu Ra Vuprofeta!
Tinhla-nkulu Leti Humaka Eka Petro Wa Vumbirhi
RITO ra Yehova ra vuprofeta, kumbe rungula, ri fana ni rivoni leri voningaka endhawini ya munyama, naswona Vakriste va ntiyiso va fanele ku nyikela nyingiso lowukulu eka rona. Leswi a swi olovi loko vadyondzisi va mavunwa va ringeta ku kurisa vugwinehi. Kambe swi nga endliwa hi mpfuno wa Xikwembu. Naswona hi fanele hi namarhela swi tiya eka rito ra Xikwembu loko hi ta pona ku tshinela loku hatlisaka ka siku ra Yehova.
Papila ra vumbirhi leri huhuteriweke ra muapostola Petro ri nga hi pfuna ku nyikela nyingiso eka rito ra Xikwembu ra vuprofeta. Petro u tsale papila leri kumbexana a ri eBabilona kwalomu ka 64 C.E. Epapileni ra yena u seketela ntiyiso wa Xikwembu, a tsundzuxa vapfumeri-kulobye hi siku ra Yehova leri taka tanihi khamba, ni ku pfuna vahlayi va yena leswaku va nga hambukisiwi hi xidyoho xa vanhu lava alaka nawu. Tanihi leswi siku ra Yehova ri nga kusuhi swinene na hina, hi pfuneka swinene eka marito lama huhuteriweke ya Petro.
Tshemba Rito Ra Vuprofeta
Tanihi Vakriste, hi fanele ku tinyiketela ku kombisa timfanelo ta Xikwembu naswona hi nyikela nyingiso eka rito ra vuprofeta. (1:1-21) Ku papalata ku hela matimba kumbe ku nga vi na mihandzu, hi fanele ku ‘engetela eka vunene bya ripfumelo ra hina, vutivi, ku tikhoma, ku tiyisela, rirhandzu ra vumakwerhu, ni rirhandzu.’ Loko Petro a vone Yesu la hundzuriweke, ni ku twa Xikwembu xi vulavula ha Kriste eka xiendlakalo xexo, rito ra vuprofeta ri endliwe leri nga ntiyiso. (Marka 9:1-8) Rito rero ra Xikwembu leri huhuteriweke hi fanele hi ri yingisa.
Tivonele Eka Vagwinehi
Hi ku nyikela nyingiso lowu tiyeke eka rito ra Xikwembu ra vuprofeta, hi ta tivonela ehenhleni ka vagwinehi ni vanhu van’wana lavo biha. (2:1-22) Petro u tsundzuxe leswaku vadyondzisi va mavunwa va ta nghenelela ebandlheni. Hambi swi ri tano, Yehova u ta nyikela ku avanyisa loku vavaka ehenhla ka vagwinehi volavo, hi laha a avanyiseke tintsumi leti nga yingisangiki ha kona, misava leyi nga chaviki Xikwembu ya siku ra Nowa, ni matiko ya Sodoma na Gomora. Vadyondzisi va mavunwa va sandza vuhosi lebyi nyikiweke hi Xikwembu ni ku sindzisa lava nga riki na matimba ku hlanganyela na vona eku endleni ka leswo biha. A swi ta antswa loko a va nga tivanga “ndlela ya ku lulama, ku ri na loko va yi tivile kutani va tlhelela endzhaku va tshika nawu lowo hlawuleka lowu va nyikiweke wona.”
Siku Ra Yehova Ra Ta!
Tanihi lava va nyikelaka nyingiso eka rito ra vuprofeta emasikwini lawa ya makumu, a hi fanelanga ku tipfumelela hi kuceteriwa hi swiphukuphuku leswi sandzaka rungula ra vukona bya Yesu. (3:1-18) Va rivala leswaku Xikwembu lexi kunguhateke ku herisa mafambiselo lawa ya swilo xi herise misava ya le mahlweni ka Ndhambi. Ku tiyisela ka Yehova a ku fanelanga ku langutiwa tanihi ku hlwela, hikuva u lava leswaku vanhu va hundzuka. Mafambiselo lawa ma ta herisiwa ‘esikwini ra Yehova’ naswona ma ta siviwa hi ‘matilo lamantshwa ni misava leyintshwa laha ku lulama ku akeke’ kona Hikwalaho, hi fanele ku endla hi laha hi nga kotaka ha kona leswaku hi nga vi na “xivati kumbe xisandzu, naswona [hi] ri ni ku rhula.” Ematshan’wini yo hambukisiwa hi vadyondzisi va mavunwa, a hi kuleni evutivini bya Yesu Kriste.
A hi hlayiseni marito ya Petro etimbilwini ta hina. Hi nga tsandzekeni ku tilangutela eka vadyondzisi va mavunwa. Hanya u ri karhi u tsundzuka leswaku siku ra Yehova ra ta ku nga ri khale. Naswona nkarhi na nkarhi u nyikela nyingiso eka rito ra Xikwembu ra vuprofeta.
[Bokisi/Xifaniso lexi nga eka tluka 31]
Ti Cukumetiwe eTatarus: Yehova “a [nga ti] tsetselelanga tintsumi loko ti dyohile, kambe [u] ti cukumetile eTiheleni, ni ku tinghenisa emakorhweni ya xivandla xa vafi, laha ti pfaleriwaka kona ku fikela siku ra ku avanyisa.” (2 Petro 2:4) Leyi a hi Tatarus ya ntsheketo leyi yimelaka hi Iliad ya Homer tanihi xivandla xa le hansi laha swikwembu swa le hansi swa mavunwa, mimoya ya Cronus na xin’wana Titan swi pfaleriweke kona. Tatarus ya le Bibeleni i khele, xivandla xo tanihi khotso laha Xikwembu xi cukumeteleke tintsumi leti nga yingisangiki esikwini ra Nowa. (Genesa 6:1-8; 1 Petro 3:19, 20; Yuda 6) “Munyama lowukulu” wu endla leswaku ti suka eku vonakaleni ka moya wa Xikwembu tanihi leti cukumetiweke ti suka endyangwini wa xona. Tanihi leswi leti ti yimeleke ku avanyisa loku vavisaka, ti le munyameni. Tatarus i ndhawu ya khele laha Sathana ni mademona ya yena va ku tokotaka emahlweni ka ku sungula ka ku fuma ka Kriste ka Gidi ra Malembe. Ku lovisiwa ka tona ku ta humelela endzhaku ka ku fuma ka Kriste ka Gidi ra Malembe.—Matewu 25:41; Nhlavutelo 20:1-3, 7-10, 14.
[Xifaniso]
Zeus u cukumeta swikwembu leswintsongo eka Tatarus ya ntsheketo
[Xihlovo Xa Kona]
National Archaeological Museum, Athens, Greece