Wa Tsundzuka Xana?

Xana u kume minkandziyiso ya sweswinyana ya Xihondzo xo Rindza yi ri leyi pfunaka? Kutani hikwalaho ka yini u nga kambeli ku tsundzuka ka wena hi leswi landzelaka?

◻ I mintiyiso yihi leyi kanetanaka ni ku fundza ndhawu leyi ku khorwiwaka leswaku Yesu u velekeriwe eka yona?

Bibele a yi yi kombisi ndhawu ya xiviri leyi Yesu a velekeriweke eka yona. Timhaka ta Evhangeli ya Matewu na Luka ti nyika leswi nga swa nkoka ntsena. (Matewu 2:1, 5; Luka 2:4-7) Ku hlaya ka Yohane 7:40-42 ku komba leswaku vanhu hi ntolovelo a a va nga yi tivi ndhawu leyi a velekeriweke eka yona, van’wana a va ehleketa leswaku u tswaleriwe eGaleliya. Nakambe, hi nkarhi wa vutomi bya Yesu laha misaveni, a nga byi kombisanga vuxokoxoko bya ku velekiwa kakwe.—12/15, tluka 5.

◻ Xana Mukriste a nga wu hlayisa njhani ntsako a ri karhi a langutana ni miringo ya ku vabya ka miri, gome, ni swiphiqo swa timali?

Rito ra Xikwembu ri nyika nkhongotelo ni nkongomiso lowu lavekaka. Hi ku hlaya ni ku yingisela tipisalema, ku nga nyikeriwa ku phyuphya loku faneleke. Davhida u hi tsundzuxile: “Nyiketa Yehova e timhaka ta wena, o ta ku seketela.” U tlhela a hi tiyisa leswaku hakunene Yehova i ‘Muyingiseri wa swikhongelo.’ (Psalma 55:22; 65:2) Nhlengeletano ya Yehova, hi tibuku ta yona ni vakulu va mabandlha ya yona, yi tshama yi lunghekele ku hi pfuna ku lwisana ni swirhalanganya swa hina.—1/1, matluka 14-15.

◻ Loko Yesu a ya eku beleriweni, xana a a vula yini loko a ku: “Loko va endlise sweswo eka rikunyi lero tsakana, ku ta endliwa yini eka leri omeke?” (Luka 23:31)

Yesu a a kombetela eka murhi wa rixaka ra Vayuda. Hikwalaho ka vukona bya Yesu ni masalela ya Vayuda lawa a ma pfumela eka yena, rixaka leri ra ha ri ni ndzhongo wa vutomi eka rona. Hambi swi ri tano, loko hinkwavo a va hambanisiwe ni rixaka, a ku ta sala ntsena murhi lowu feke emoyeni, nhlengeletano ya rixaka leri omeke.—1/15, tluka 9.

◻ Xana lava “timbilu leti tengeke” lava ku vulavuriweke ha vona eka Matewu 5:8, va kota ku “vona Xikwembu” hi ndlela yihi?

Va “vona Xikwembu” hi ku xi xiya loko xi teka goza exikarhi ka vahlayisi va vutshembeki. (Ringanisa Eksoda 33:20; Yobo 19:26; 42:5.) Hambi swi ri tano, rito ra Xigriki, leri eka Matewu 5:8 ri hundzuluxeriweke va ku “vona” nakambe ri vula ku “vona hi mianakanyo, ku xiya, ku tiva.” Tanihi hi leswi Yesu a kombiseke vumunhu bya Xikwembu hi ku hetiseka, eka vumunhu byebyo ku twisisa ku endla lava “timbilu leti tengeke” va kota ku “vona Xikwembu.” (Yohane 14:7-9)—1/15, tluka 16.

◻ Ha yini hi gimeta hi leswaku Yesu i Mikayele ntsumi leyikulu?

Rito ra Xikwembu ri boxa ntsumi yin’we ntsena, naswona ri vulavula hi ntsumi yoleyo loko ri kombetela eka Hosi Yesu la pfuxiweke eku feni ri ku: “Hosi hi xiviri xa yona yi ta xika hi le tilweni, hi mpfumawulo wa rito ra ku lerisa, hi ku huwelela ka ndhuna ya tintsumi, ni ku ba ka mhalamhala ya Xikwembu.” (1 Vatesalonika 4:16) Eka Yuda 9 hi kuma leswaku vito ra ntsumi leyi leyikulu i Mikayele.—2/1, tluka 17.

◻ Hi tihi tindhawu ta mune leti eka tona hi nga kombisaka xichavo eka vanhu van’wana?

Hi fanele ku kombisa xichavo eka valawuri va tipolitiki, vathori, ni swirho swa le ndyangwini, ni le ka lava va nga le bandlheni.—2/1, matluka 20-2.

◻ Emahlweninyana ka rifu ra Yesu i xikombiso xihi lexinene lexi a xi vekeleke lava nga ni vatswari lava kuleke?

Loko Yesu a ha hayekiwe hi nhlomulo emhandzini ya nxaniso, u nyikele nkhathalelo eka mana wa yena hi tlhelo ra mpfuno wa swilo swa nyama ni swa moya, hi ku n’wi nyika nkhathalelo wa Yohane muapostola wakwe la rhandzekaka. (Yohane 19:25-27)—2/15, tluka 8.

◻ Hikwalaho ka yini Yesu a fanele ku xaniseka?

Ku xaniseka ka Yesu ku tirhe ku lulamisa mphikamakaneta ya malandza ya Xikwembu lama tshembekeke. Nakambe ku n’wi hlomisele ntirho wakwe tanihi Muprista Lonkulu wa vanhu, la nga ni tintswalo. (Vaheveru 4:15)—2/15, matluka 14-15.

◻ Hi yihi mphikamakaneta ya nkoka leyi tlakusiweke hi muxandzuki aEdeni?

Xana munhu wa swi kota ku tifuma kahle handle ka Xikwembu? Xana u fanele a titsongahata eka vuhosi bya Xikwembu ntsena? Handle ka sweswo, xana vanhu vahi na vahi a a va ta hlawula ku tirhela Xikwembu hi ku tirhandzela ka vona handle ka vutianakanyi?—3/1, tluka 6.

◻ Ha yini van’wana va dye swifanekiselo swa Xitsundzuxo hi xihoxo?

Van’wana lava ha riki vantshwa va nga ha va va nga si swi twisisa kahle swikongomelo swa Xikwembu. Va nga ha va va nga swi twisisi leswaku ku tota a hi loku “humaka eku rhandzeni ka munhu kumbe eku tikarhateni ka yena, kambe [ku] huma eka Xikwembu.” (Varhoma 9:16) A swi le matimbeni ya munhu ku hlawula leswaku u rhandza ku nghenisiwa eka ntwanano lowuntshwa ivi a va mudya-ndzhaka kun’we na Kriste. Ku hlawula Yehova, naswona moya wa yena wu tiyisekisa nhlawulo wolowo. (Varhoma 8:16; 1 Vakorinto 12:18)—3/15, tluka 21.

◻ Xana ‘ririmi leri tengeke’ leri ku vulavuriwaka ha rona eka Sofonia 3:9 i yini?

I ku twisisa lokunene ka ntiyiso mayelana ni Xikwembu ni swikongomelo swa xona.—4/1, matluka 21-2.