Fambani Tanihi Vatirhi-kulobye Entiyisweni

Tinhla-nkulu Leti Humaka Eka Yohane Wa Vumbirhi Ni Wa Vunharhu

VUTIVI bya ntiyiso i mfungho lowu hlawulaka vagandzeri va Yehova. (Yohane 8:31, 32; 17:17) Ku famba entiyisweni wa Xikwembu swa laveka leswaku u ponisiwa. Kutani malandza ya Xikwembu ma fanele ku va vatirhi-kulobye entiyisweni.

Mapapila lama huhuteriweke ya Yohane wa vumbirhi ni wa vunharhu ma vulavula hi “ku hanya entiyisweni.” (2 Yohane 4; 3 Yohane 3, 4) Yohane wa Vunharhu nakambe u khutaza ku tirhisana tanihi “vatirhi-kulobye entiyisweni.” (3 Yohane 5-8) Kumbexana, ha vumbirhi mapapila lawa ma tsariwe ekusuhi kumbe aEfesa kwalomu ka 98 C.E. Kambe leswi ma swi vulaka swi nga pfuna vanhu va Yehova namuntlha.

Yohane Wa Vumbirhi Yi Kandziyisa Ntiyiso

Yohane wa Vumbirhi xo sungula yi kandziyisa ntiyiso ni rirhandzu ni ku tsundzuxa ehenhleni ka “nala wa Kriste.” (Tindzimana 1-7) Papila a a ri kongomisiwe eka ‘Nkosikazi leyi hlawuriweke’ kumbexana eka munhu wo karhi. Kambe loko a a ri kongomisiwe ebandlheni, “vana” va yena a a va ri Vakriste lava tswariweke hi moya, lava “hlawuleriweke” vutomi bya le tilweni hi Xikwembu. (Varhoma 8:16, 17; Vafilipiya 3:12-14) Yohane u tsakile leswi van’wana a a “va landza ntiyiso” kutani xisweswo va papalata vugwinehi. Hambi swi ri tano, a a va fanele ku tivonela ehenhleni ka “nala wa Kriste,” loyi a kanetaka leswaku Yesu u tile hi nyama. Namuntlha Timbhoni ta Yehova ti hlayisa xitsundzuxo xexo ehenhleni ka vugwinehi.

Ku ya emahlweni Yohane u nyikela ndzayo eku hanyisaneni ni vagwinehi kutani a hetelela hi mikateko ni marungula ya munhu yi xiyexe. (Tindzimana 8-13) Hi mintirho yo tanihi ku chumayela, yena ni van’wana va humese mihandzu leyi vangeleke ku hundzuka eka lava a va rhumeleke papila ra yena. Hi ku ‘tivonela’ ntsena hi tlhelo ra moya a va ta “kuma hakelo leyi [teleke],” entiyisweni ku katsa “hari” ya le tilweni leyi hlayiseriweke vatotiwa lava tshembekaka. (2 Timotiya 4:7, 8) Loko ku ta munhu un’wana eka vona ‘loyi a nga ha tshamangiki edyondzweni ya Kriste,’ a va nga ‘fanelanga va n’wi amukela emakaya ya vona hambi ku n’wi xeweta’ leswaku va papalata ku katseka eka ‘mintirho ya yena leyo biha.’ Endzhaku ko phofula ntshembo wa leswaku u ta ta a ta vulavula ni vapfumeri-kulobye va langutanile, Yohane u hetelela hi marungula.

Yohane Wa Vunharhu Yi Tshikilela Ntirhisano

Yohane wa Vunharhu a a yi kongomisiwe eka Gayo naswona xo sungula yi xiye leswi a a swi endlela vapfumeri-kulobye. (Tindzima 1-8) Gayo a a “hanya entiyisweni” hi ku khomelela eka tidyondzo hinkwato ta Vukriste. Nakambe a ‘endla ntirho wa vutshembeki’ hi ku pfuna vamakwerhu lava endzaka. Yohane u tsarile a ku: “Swa hi fanela ku seketela vanhu vo fana na vona, leswaku hi ta va lava tirhisanaka na vona entiyisweni.” Namuntlha Timbhoni ta Yehova ti kombisa malwandla yo tano eka valanguteri lava famba-fambaka.

Endzhaku ko pimanisa mahanyelo yo biha ya Diyotrefo ni lawaya ya Demetriyo, Yohane u hetise papila ra yena. (Tindzima 9-14) Diyotrefo la lavaka ku dzunisiwa a nga kombisanga xichavo eka Yohane naswona u ringete hambi ku ri ku hlongola lava va amukelaka vamakwerhu hi malwandla ebandlheni. Hambi swi ri tano, un’wana loyi va nge i Demetriyo u vuriwe tanihi xikombiso lexinene. Yohane a a langutele ku vona Gayo ku nga ri khale kutani naswona u hetelela hi marungula ni ku navelela Gayo leswaku a tsakela ku rhula.

[Bokisi/Xifaniso lexi nga eka tluka 30]

Hi Phepha, Peni Ni Inki: Yohane a a tsakela ku endzela ‘nkosikazi leyi hlawuriweke’ ni “vana” va yona ematshan’wini yo va tsalela swilo swo tala “hi phepha ni inki.” Ematshan’wini yo ya emahlweni a tsalela Gayo “hi inki ni peni,” muapostola nakambe a langutele ku n’wi vona ku nga ri khale. (2 Yohane 1, 12; 3 Yohane 1, 13, 14) Rito ra Xigriki leri hundzuluxeriweke ri ku “peni” (kaʹla·mos) ri vula mhandze kumbe rihlanga naswona ri nga hundzuluxeriwa ri ku “rihlanga ro tsala.” Exikarhi ka Magriki ni Varhoma, peni ya rihlanga a yi tontswile naswona yi larile kukota tipeni ta risiva ta minkarhi ya le ndzhaku. Rito ra Xigriki meʹlan, leri hundzuluxeriweke ri ku “inki,” i xivumbeko lexi nga hava rimbewu xa rihlawuri ra vununa meʹlas, leri vulaka “ntima.” Eka tiinki ta khale, muhlovo wa ntima a ku ri lowo fuwa hi khaboni—lowu nga ha va ka nsiti lowu kumekaka hi ku hisiwa ka mafurha kumbe tihunyi, kumbe choko ya ntima leyi endliweke hi ku tirhisa matsavu ni swiharhi. Hi ntolovelo, tiinki a ti hlayisiwa tanihi switina ni makhekhe lama omisiweke, leti a ti tsakamisiwa hi mutsari kutani a tota hi burachi kumbe rihlanga ra yena. Phepha ra masiku wolawo a ku ri nchumu wo vevuka lowu endliweke matluka hi mahanti lama kumiwaka eka ximilana xa papirasi. Vakriste vo sungula a va tirhisa phepha ro tano eka mapapila, tibuku-nsongwa ni tibuku ta khale ta matsalwa.